ဒိန်းဂျား ၊ ကျော်ကြီး

မြေလတ်အသံ၊ မေ ၁၄၊ ၂၀၂၅။

ပဲခူးတိုင်းနဲ့ မန္တလေးတိုင်းကမြို့နယ်တွေမှာ ဒုရဲအုပ် နယ်ထိန်းခေါင်းဆောင် ၁ ဦးနဲ့ အုပ်ချုပ်ရေးမှူး ၁ ဦး ပစ်ခတ်ခံရပြီးသေဆုံးခဲ့တယ်လို့ သက်ဆိုင်ရာမြို့နယ်တွေရဲ့တော်လှန်ရေးတပ်ဖွဲ့ဝင်တွေက ပြောပါတယ်။

ပဲခူးတိုင်း၊ ကြို့ပင်ကောက်မြို့နယ်၊ အလယ်ကုန်းကျေးရွာနဲ့ ကြို့ပင်ကောက်မြို့ လမ်းပိုင်းပေါ်မှာ ဒုရဲအုပ် နယ်ထိန်းခေါင်းဆောင် ပစ်ခတ်ရာသေဆုံးခဲ့တယ်လို့ သာယာဝတီခရိုင် ၃၈၀၂ တပ်ခွဲ ၄၊ မြေအောက်ပြောက်ကျားတပ်ဖွဲ့ – အုတ်ဖိုက မေ ၁၄ ရက်မှာ သတင်းထုတ်ပြန်ပါတယ်။

ပစ်ခတ်ခံရသူဟာ အလယ်ကုန်းကျေးရွာ နယ်မြေရဲစခန်းက အသက် ၃၁ နှစ်အရွယ် ဒုရဲအုပ် နယ်ထိန်းခေါင်းဆောင် မာန်ဟိန်းဆိုသူဖြစ်ပြီး မေ ၁၃ ရက် မနက် ၁၀ နာရီခန့်မှာ ပစ်ခတ်ခဲ့တာ လို့ဆိုပါတယ်။

“သူက တာဝန်ကျရာ အလယ်ကုန်း စခန်းကနေ ကြို့ပင်ကောက်မြို့ကို အပြန်လမ်းမှာ စောင့်ပြီး ရှင်းလင်းခဲ့တာပါ။ ခုချိန်ထိ အမြဲပြည်သူအပေါ် ဒုက္ခပေးနေဆဲမို့ ရှင်းလင်းရတာပါ။ ကျနော်တို့ကို မြင်တာနဲ့ မြေအောက်ပြောက်ကျားတပ်ဖွဲ့ အုတ်ဖိုမှန်းသိတော့ နီးရာအိမ်ထဲဝင်ပြေးတာ အိမ်ထဲထိလိုက်ပြီး ဦးခေါင်းကိုတချက်ပစ်ခဲ့တယ်”လို့ မြေအောက်ပြောက်ကျားတပ်ဖွဲ့ အုတ်ဖိုမှ တပ်ဖွဲ့င်ဒေဝကပြောပါတယ်။

ပစ်ခတ်မှုကြောင့်နေရာတင်သေဆုံးခဲ့ပြီး သူ့ဆီကနေ G3 ကျည် ၁၂ တောင့်၊ ဆိုင်ကယ် ၁ စီး၊ စကားပြောစက် ၁ လုံး၊ ငွေ ၆၀၀ ကျပ်ကို သိမ်းဆည်းရမိခဲ့တယ်လို့ ဆိုပါတယ်။

ဒါအပြင် မန္တလေးတိုင်း၊ ငါန်းဇွန်မြို့နယ်၊ ရွှေတောင်ကျေးရွာက အုပ်ချုပ်ရေးမှူး ဦးထွန်းဦးကို မေ ၁၂ ရက်ညနေ ၅ နာရီခွဲမှာ ပစ်ခတ်ရာသေဆုံးခဲ့တယ်လို့ နဂါးနီပြောက်ကျားတပ်ဖွဲ့ – မြင်းခြံ ဆီက သိရပါတယ်။

“သူတို့ရွာအရှေ့ ကြက်ပြင်မှာ **ဂိတ်ရှိတယ်၊ ဂိတ်ကိုပုံမှန်သွားပြီး‌တော့ သောက်စားပြီးပြန်လာတာ၊ သူက ဆိုင်ကယ်နဲ့တိုက်မလို့လုပ်ပြီး မောင်းသွားတာ၊ ရွှေတောင်ရွာထိပ်မှာ ရှင်းလင်းခဲ့တာ၊ သူ့ကို လိုက်ပစ်တာမှာ ပေါင် ၁ ချက်၊ လက် ၁ ချက်၊ ဦးခေါင်း ၁ ချက် ပစ်ခဲ့တာ၊ အလောင်းကိုတော့ ရွှေတောင်နဲ့ မြို့သာကြားထဲမှာ ထားခဲ့တာ”လို့ နဂါးနီပြောက်ကျားတပ်ဖွဲ့-မြင်းခြံ တာဝန်ခံက ပြောပါတယ်။

ဦးထွန်းဦးဟာ စစ်ကောင်စီတပ်ဖွဲ့ဝင်တွေနဲ့ပေါင်းပြီး ဒေသခံတွေအပေါ်အနိုင်ကျင့်တာတွေရှိတာကြောင့် ပစ်ခတ်ခဲ့တာလို့ နဂါးနီပြောက်ကျားတပ်ဖွဲ့-မြင်းခြံရဲ့ မေ ၁၃ ရက်ကထုတ်ပြန်တဲ့ ထုတ်ပြန်ချက်မှာ ဖော်ပြထားပါတယ်။

ဦးထွန်းဦးဆီကနေ လက်ပစ်ဗုံး ၂ လုံးနဲ့ နိုင်ငံသားကပ်ပြား ၁ ခု တို့ကို သိမ်းဆည်းရရှိခဲ့ပြီး ပစ်ခတ်မှုဖြစ်ပြီးနောက် မေ ၁၃ ရက်မနက်ပိုင်းမှာ စစ်ကောင်စီတပ်ဖွဲ့ဝင်တွေက အလောင်းကို ရွှေတောင်ရွာထဲ ပြန်သယ်သွားကြတယ်လို့ သိရပါတယ်။

ပြီးခဲ့တဲ့ မတ် ၃ ရက်ကလည်း မြင်းခြံခရိုင် ငါန်းဇွန်မြို့၊ အင်းဝဘဏ်အနီးမှာ တပ်စွဲထားတဲ့ စစ်ကောင်စီတပ်ဖွဲ့ဝင်တွေကို နဂါးနီပြောက်ကျားတပ်ဖွဲ့က ပစ်ခတ်တိုက်ခဲ့ရာ ၄ ဦးသေဆုံးခဲ့တယ်လို့ အဲ့ဒီအဖွဲ့ဆီက သိရပါတယ်။

စာတည်း – လင်း

မန္တလေး၊ မေ ၅၊ ၂၀၂၅။

မန္တလေးတိုင်း၊ ပုသိမ်ကြီးမြို့နယ်၊ အုန်းချောကျေးရွာအုပ်စုအတွင်းရှိ ဆည်တော်လေးဆည်က ရေလွှတ်တာကြောင့် အိမ်ထောင်စု ၂၀၀ ခန့်အရေးပေါ်ရွှေ့ပြောင်းကြရတယ်လို့ ဒေသလူမှုကူညီရေး အဖွဲ့ဝင်တွေဆီက သိရပါတယ်။

မေ ၃ ရက်မှာရွာတဲ့မိုးကြောင့် တောင်ကျချောင်းရေစီးဆင်းပြီး ဆည်တော်လေးဆည်အတွင်း ရေဝင်ရောက်တာများလာတဲ့အတွက် မေ ၄ ရက် မနက်ပိုင်းမှာ ဆည်ရေလွှတ်ချခဲ့တာလို့ ဆိုပါတယ်။

ဆည်ရေအပါအဝင် တောင်ကျချောင်းရေတွေကြောင့် အုန်းချောချောင်းအတွင်းရေများလာရာက ချောင်းနံဘေးလူနေအိမ်တွေထဲထိရေဝင်ရောက်လာတာလို့ ဆိုပါတယ်။

“ဆည်တော်လေးရေနဲ့တောင်ကျရေဆုံပြီး ရေဝင်တာပေါ့။ အုန်းချော၊ ငါးမိုင်၊ ခြောက်မိုင်၊ တံတားကွင်းလမ်းတွေပေါ့။ ကမ်းနားကအိမ်တွေဆို မြုပ်တာတွေရှိတယ်။ အရေအတွက်ကတော့ ရာဂဏန်းတော့ မရှိဘူး။ ရေဝင်လို့ ရွှေ့ပြောင်းကြတာမျိုးရှိတယ်”လို့ ဒေသလူမှုကူညီရေး အသင်းဝင်တဦးက ပြောပါတယ်။

တောင်ကျရေတွေဟာ ကမ်းနားအနိမ့်ပိုင်းတွေမှာ ၅ ပေခန့်ထိတက်လာပြီး အမြင့်ပိုင်းတွေမှာတော့ ၁ ပေခန့်ရှိတယ်လို့ ဆိုပါတယ်။

လက်ရှိမှာတော့ အုန်းချောကျေးရွာက အိမ်ထောင်စု ၂၀၀ ခန့်ဟာ ကျေးရွာရဲ့ကုန်းမြင့်ပိုင်းတွေရှိ ဘုန်းကြီးကျောင်း၊ စာသင်ကျောင်းတွေမှာ ကိုယ့်အစီအစဥ်နဲ့ကိုယ်ရွှေ့ပြောင်းနေထိုင်ကြပြီး မေ ၅ ရက်ဒီမနက်ပိုင်းထိ ရေပြန်မကျသေးတာကြောင့် နေအိမ်တွေကိုပြန်ရတာမျိုးမရှိသေးဘူးလို့ ဒေသလူမှုကူညီရေးအသင်းဝင်တဦးက ပြောပါတယ်။

ဆည်တော်လေးဆည်အထက်ဘက်ဒေသတွေမှာ မိုးများလာပါက အထက်ဖြစ်စဥ်မျိုး နှစ်စဥ်နီးပါး ဖြစ်တတ်တဲ့အတွက် ချောင်းနံဘေးနေဒေသခံတွေရေဘေးရှောင်ရလေ့ရှိပြီး ချောင်းရေတန့်နေပြီး ရေပြန်မကျတဲ့အခြေအနေဆိုရင် တပတ်ကျော်ထိရေဘေးရှောင်ရတာမျိုးရှိတယ်လို့ သိရပါတယ်။

စာတည်း – လင်း

စဉ့်ကူး၊ မေ ၅၊ ၂၀၂၅။

မန္တလေးတိုင်း၊ စဉ့်ကူးမြို့နယ်ရှိ ကျေးရွာ ၂ ရွာကို စစ်ကောင်စီတပ်က မေ ၃ ရက်မနက်ပိုင်းမှာ လေကြောင်းကနေ ဗုံး ၅ ကြိမ်ကြဲချတိုက်ခိုက်ခဲ့ရာ ပြည်သူ ၁ ဦးသေဆုံးပြီး ၄ ဦးထိခိုက်ဒဏ်ရာ ရရှိခဲ့တယ်လို့ ပြင်ဦးလွင်ခရိုင်ပြည်သူ့ကာကွယ်ရေးအဖွဲ့မှ တာဝန်ရှိသူတဦးဆီက သိရပါတယ်။

ဗုံးကြဲခံရတဲ့ကျေးရွာ ၂ ရွာမှာ လက်ပန်လှ နဲ့ ထုံးကြီးတို့ဖြစ်ပြီး လက်ပန်လှရွာ ပြည်စိုးအောင်ရပ်ကွက်၊ မူလအောင်မြေဘုန်းကြီး ကျောင်းအရှေ့မြောက်ဘက် လယ်ကွင်းကို ၁ ကြိမ်၊ တံတားအနီးကို ၁ ကြိမ်၊ ငြိမ်းချမ်းအောင်ရပ်ကွက်ကို ၂ ကြိမ်နဲ့ ထုံးကြီးကျေးရွာကို ၁ ကြိမ် အသီးသီးကြဲချခဲ့တာလို့ ဆိုပါတယ်။

“ဖိုက်တာနဲ့လာကြဲတာဗျ။ လက်ပန်လှကို ၄ ကြိမ်ကြဲတယ်။ တခါလာကြဲရင် ဗုံးသီး ၁ လုံးစီချတာ။ ထုံးကြီးရွာကိုကြဲတဲ့အခါမှာတော့ ၂ လုံးကျဲချခဲ့တယ်”လို့ ပြင်ဦးလွင်ခရိုင်ပြည်သူ့ကာကွယ်ရေး အဖွဲ့မှတာဝန်ရှိသူတဦးက ပြောပါတယ်။

ထုံးကြီးကျေးရွာဗုံးကြဲခံရမှုမှာ အသက် ၃၀ အရွယ် အမျိုးသား ၁ ဦးသေဆုံးပြီး နောက်ထပ်အမျိုးသား ၃ ဦးထိခိုက်ဒဏ်ရာရရှိခဲ့ကာ လူနေအိမ် ၅ လုံးလည်း မီးလောင်ပျက်စီးခဲ့တယ်လို့ သူကဆက်ပြောပါတယ်။

လက်ပန်လှကျေးရွာဗုံးကြဲခံရမှုမှာတော့ အမျိုးသမီး ၁ ဦးဒဏ်ရာရရှိခဲ့ကာ လူနေအိမ် ၂ လုံး ပြိုကျပျက်စီးပြီး သေဆုံးမှုမရှိခဲ့ဘူးလို့ အထက်ပါတာဝန်ရှိသူကဆက်ပြောပါတယ်။

“စကစကပြည်သူကိုညှာတာရမယ့်အစား ဗုံးကြဲချနေတယ်။ သူက (စကစ) နိုင်ငံတကာအမြင်မှာတော့ ပြည်သူတွေကိုကူညီနေတယ်ဆိုပြီးတော့ ဝါဒဖြန့်နေတယ်။ တကယ်တမ်းကျတော့ ပြည်သူကို သတ်ဖြတ်နေတယ်။ အဲ့တာကြောင့် ဗုံးခိုကျင်းတွေတူးကြဖို့နဲ့ အမြဲသတိရှိကြဖို့လိုတယ်”လို့ သူကဆိုပါတယ်။

ပြီးခဲ့တဲ့ ဧပြီ ၁၈ ရက်ကလည်း စဉ့်ကူးမြို့နယ်၊ လက်ပန်လှကျေးရွာ၊ ပြည်စိုးအောင်ရပ်ကွက်ရှိ စာသင်ကျောင်းကို စစ်ကောင်စီတပ်ကဗုံးကြဲခဲ့တာကြောင့် အမျိုးသမီး ၁ ဦးသေဆုံးကာ ၂ ဦး ဒဏ်ရာရခဲ့တယ်လို့ သိရပါတယ်။

စာတည်း – လင်း