မန္တလေး

မန္တလေး၊ မေ ၂၄၊ ၂၀၂၃။

မန္တလေးတိုင်း၊ မြင်းခြံမြို့နယ်၊ မန်ကျည်းစုကျေးရွာက နေအိမ်တွေကို စစ်ကောင်စီတပ်က မီးရှို့ဖျက်ဆီးခဲ့လို့ အိမ်ခြေ ၁၀၀ ခန့်မီးလောင်ပျက်စီးခဲ့ပြီး အဖွားတဦးလည်း မီးလောင်သေဆုံးခဲ့တယ်လို့ သိရပါတယ်။

မေလ ၂၄ ရက် ဒီမနက်အ‌‌စောပိုင်း ၁ နာရီလောက်မှာ စစ်သားနဲ့ ပျူစောထီး အင်အား ၅၀ နီးပါးက ဖောကားသုံးစီးနဲ့ ရွာထဲကို၀င်ကာ နေအိမ်တွေထဲက ပစ္စည်းတွေကို ကားပေါ်တင်ပြီးနောက် နေအိမ်တွေကို မီးရှို့ခဲ့တာလို့ မြင်းခြံဒေသခံတဦးက ပြောပါတယ်။

“လက်နက်တွေလည်း ပစ်ဖောက်ရော ရွာသားတွေ ကြောက်လန့်ပြီထွက်ပြေးကုန်တာ တချို့ဆို အဝတ်တထည်ကိုယ်တခုနဲ့ပဲထွက်ပြေးကြတာ။ မီးထဲမှာ တယောက်ကဆုံးသွားတယ်။ ကျန်တယောက်က မသန်စွမ်းဖြစ်နေတဲ့ အသက် ၃၅ နှစ်အရွယ် ကိုခင်မောင်ဌေး ကိုတော့ မီးထဲကကယ်ထုတ်နိုင်ခဲ့ပေမဲ့ အခုချိန်ထိစကားမပြောနိုင်တော့သလို အသက်ရှူတာတွေလည်းမောနေတယ်” လို့ ဆိုပါတယ်။

မီးရှို့နေချိန်အတွင်း ထွက်မပြေးနိုင်ခဲ့တာကြောင့် အသက် ၇၀ အရွယ် ဒေါ်မြအေး ဆိုသူ မီးလောင်သေဆုံးခဲ့ရတာလည်း ဖြစ်ပါတယ်။

မန်ကျည်းစုရွာကို လယ်သစ်ရွာက ပျူခေါင်းဆောင် ငပေါက်နဲ့ ကျောက်ကန်ရွာက ပျူခေါင်းဆောင် လှမိုးတို့ပူးပေါင်းပြီး စစ်ကောင်စီတပ်ဖွဲ့တွေနဲ့အတူ ဝင်ရောက်မီးရှို့ခဲ့တာလို့လည်း ဒေသခံတွေက ပြောပါတယ်။

ရွာကိုမီးရှို့ပြီး မနက် ၂ နာရီလောက်မှာတော့ စစ်အုပ်စုဟာ မန်ကျည်းစုကျေးရွာနဲ့ ၃ မိုင်လောက်ဝေးတဲ့ ကျောက်ကန်နဲ့ လယ်သစ်ရွာတွေဘက်ကို ပြန်လည်ထွက်ခွာသွားတယ်လို့ ဆိုပါတယ်။

အခုချိန်ထိလည်း ရွာထဲမှာမီးတွေလောင်နေဆဲဖြစ်ပြီး၊ စစ်တပ်နဲ့ပျူတွေက ကျန်ရှိနေတဲ့ နေအိမ်တွေကို ထပ်ပြီးမီးရှို့မှာ စိုးရိမ်တဲ့အတွက် ဒေသခံတွေကတော့ ရွာထဲကို ပြန်လည်၀င်ရောက် နေထိုင်ခြင်းမရှိသေးပါဘူး။

“ရွာသားတွေကတော့ နီးစပ်ရာ ဘုန်းကြီးကျောင်းတွေနဲ့ သူတို့ဆွေမျိုးတွေရှိတဲ့ရွာတွေမှာ နေနေကြတုန်းပဲ၊ မီးသတ်ဖို့ကလည်း ပျူတွေက ရွာသားတွေ သိုလောင်ထားတဲ့ရေကန်တွေကို အကုန်သေနတ်တွေနဲ့ပစ်ဖောက်သွားတော့ ရေတွေကမရှိတော့ဘူး၊ ကျန်သေးတဲ့ အိမ်တွေကို မီးထပ်ရှို့ဦးမှာဆိုပြီး သတင်းတွေကြားနေရလို့ ရွာသားတွေက ရွာထဲမဝင်ရဲသေးပါဘူး” လို့ အထက်ပါ ဒေသခံက ဆက်‌ပြောပါတယ်။

အိမ်ခြေ ၂၇၀ ရှိတဲ့ မန်ကျည်းစုကျေးရွာဟာ အခုလိုမီးရှို့ခံရတာ ၂ ကြိမ်မြောက်ရှိပြီး၊ ပြီခဲ့တဲ့ ၅ လလောက်ကလည်း မန်ကျည်းစုရွာက နေအိမ် ၅ လုံးကို စစ်သားနဲ့ ပျူစောထီးတပ်ဖွဲ့တွေက မီးရှို့ဖျက်ဆီးသွားခဲ့ပါသေးတယ်။

အခုလိုစစ်အုပ်စုက မီးရှို့ဖျက်ဆီးနေလို့ မန်ကျည်းစုရွာအပါအဝင် ထိန်ပန်းရွာနဲ့ ရွာသစ်ရွာက ဒေသခံတွေလည်း ဘေးလွတ်ရာကို ထွက်ပြေးတိမ်းရှောင်နေရတယ်လို့ သိရပါတယ်။

စာတည်း – လင်း

မန္တလေး၊ မေ ၂၄၊ ၂၀၂၃။

မန္တလေးတိုင်း၊ ငါန်းဇွန်မြို့နယ်က စစ်ကောင်စီခန့်အုပ်ချုပ်ရေးမှူး ၂ ဦး မေလ ၂၄ ရက် ဒီမနက် ၇ နာရီက သေနတ်ပစ်ခတ်ခံရပြီး သေဆုံးခဲ့တယ်လို့ သိရပါတယ်။

သန့်ဇင်ကုန်းကျေးရွာ အုပ်ချုပ်ရေးမှူး ဦးသန်းဇော်လင်း ၃၅ နှစ်နဲ့ ဇလှပ်မရွာ အုပ်ချုပ်ရေးမှူးတို့ကို သန့်ဇင်ကုန်းရွာနဲ့ ဇလှပ်မရွာကြားရှိ အရက်ဆိုင်မှာ ပစ်ခတ်ရှင်းလင်းခဲ့တာလို့ TGYR – Youth Guerrilla Counter Revolution – LPDF မှ တိုက်ခိုက်ရေးခေါင်းဆောင်က ပြောပါတယ်။

“သူတို့ ၂ ယောက်ကို တယောက် ၃ ချက်စီနဲ့ ၆ ချက်ပစ်ပြီးရှင်းလင်းခဲ့တာ။ နေရာမှာတင် ပွဲချင်းပြီးတယ်။ ဒီအုပ်ကြီးတွေက အုပ်စုလိုက်ဖွဲ့ပြီး အရက်သောက်ကြတာများတယ်။ ဒီနေ့မှာတော့ ၂ ယောက်ပဲတွေ့ရတယ်။ ဒီ ၂ ကောင်က စကစ သတင်းပေးလုပ်တာရယ်၊ ရွာသားတွေကို ဖိနှိပ်ချုပ်ချယ် ဗိုလ်ကျနေကြတာဗျ။ ဒါကြောင့် ရှင်းလင်းခဲ့တာ”လို့ ဆိုပါတယ်။

အဲ့ဒီအုပ်ချုပ်ရေးမှူး ၂ ဦးမှာ စစ်ကောင်စီသတင်းပေးလုပ်နေတာ ၂ နှစ်ကျော်ကြာရှိပြီ ဖြစ်တာကြောင့် သူတို့ကို သေနတ်နဲ့ လက်ပစ်ဗုံးတွေ ပေးထားတယ်လို့ သိရပေမယ့် ခုရှင်းလင်းချိန်မှာတော့ အဆိုပါပစ္စည်းတွေ မတွေ့ခဲ့ရဘူးလို့ ပြောပါတယ်။

ဒီရှင်းလင်းမှုကို TGYR – Youth Guerrilla Counter Revolution(LPDF)၊ 925 – ပြောက်ကျားတပ်ဖွဲ့နဲ့ ဒေါင်းဖိုက်တာတပ်ဖွဲ့က ပူးပေါင်းလုပ်ဆောင်ခဲ့တာ ဖြစ်ပါတယ်။

ပြီးခဲ့တဲ့ ၂၀၂၂ ခုနှစ်၊ ဒီဇင်ဘာလ ၂၃ ရက်မှာလည်း ငါန်းဇွန်မြို့နယ်၊ ညောင်လေးပင်ရွာက စစ်ကောင်စီခန့် အုပ်ချုပ်ရေးမှူး ဦးမင်းဆန်းကို TGYR-LPDFအဖွဲ့က ပစ်ခတ်ရှင်းလင်းခဲ့ပြီး သူ့ဆီက လက်ပစ်ဗုံးတလုံးကို သိမ်းဆည်းရမိခဲ့တယ်လို့ သိရပါတယ်။

စာတည်း – လင်း

စဉ့်ကူး၊ မေ ၁၁၊ ၂၀၂၃။

မန္တလေးတိုင်း၊ စဉ့်ကူးမြို့နယ်၊ သာယာဝတီကျေးရွာအုပ်စုအုပ်ချုပ်ရေးမှူးနဲ့ ဆယ်အိမ်မှူး မေလ ၁၀ ရက်၊ နေ့လည် ၃ နာရီအချိန်လောက်မှာ သေနတ်ပစ်ခတ်ခံရပြီး အုပ်ချုပ်ရေးမှူး သေဆုံးသွားတယ်လို့ သိရပါတယ်။

ပစ်ခတ်ခံရသူတွေဟာ သာယာဝတီကျေးရွာနေ အသက် ၅၃ နှစ်အရွယ် ကျေးရွာအုပ်စု အုပ်ချုပ်ရေးမှူး ဦးကျော်လင်းနဲ့ မြစိမ်းကျေးရွာနေ အသက် ၂၆ နှစ်အရွယ် ဆယ်အိမ်မှူး ကိုမောင်စိုး တို့ဖြစ်ကြပြီး ဦးကျော်လင်း နေအိမ်အတွင်းရှိနေချိန် သေနတ်ကိုင်ဆောင်ထားတဲ့လူတစုက ဆိုင်ကယ်နဲ့ရောက်လာပြီး ပစ်ခတ်ခဲ့တာလို့ ဒေသခံအမျိုးသားတဦးက မြေလတ်အသံကို ပြောပါတယ်။

” သူတို့က စကစတွေနဲ့ပေါင်းနေတာ ကြာပြီဗျ။ အုပ်ကြီးအိမ်ကို မောင်စိုးကအလည်ရောက်နေတာလို့သိရတယ်။ သူတို့ကို စကစတွေကပဲ ရာထူးတွေအပ်ထားတာ။ လာပစ်တာက PDF တွေလို့တော့ ပြောကြတယ်။ ပြီးတော့ စကစတွေကို လိုက်ပို့နေတဲ့ အုပ်ကြီးရဲ့စပီးဘုတ်တစီးကို ဖောက်ခွဲခဲ့သေးတယ်” လို့ ပြောပါတယ်။

ပစ်ခတ်ခံရတာကြောင့် ကျေးရွာအုပ်စုအုပ်ချုပ်ရေးမှူး ဦးကျော်လင်းမှာ နေရာမှာတင် သေဆုံးခဲ့ပြီး ဆယ်အိမ်မှူး မောင်စိုးမှာ ပေါင်ကျည်ထိမှန်ဒဏ်ရာရရှိခဲ့တယ်လို့ သိရပါတယ်။

ဒါ့အပြင် ဦးကျော်လင်း အသတ်ခံရပြီးတဲ့နောက် သာယာဝတီကျေးရွာနဲ့ကပ်လျက်ရှိ စစ်ကောင်စီတပ်စွဲနေတဲ့ ထုံးကြီး(ပျူ)ရွာစခန်းက လက်နက်ကြီး၊ လက်နက်ငယ်တွေနဲ့ ၁၅မိနစ်ခန့်ကြာ ပစ်ခတ်ခဲ့တယ်လို့ ဒေသခံတွေကပြောပါတယ်။

ပစ်ခတ်မှုနဲ့ပတ်သက်လို့ ဒေသတွင်းတော်လှန်ရေးအင်အားစုတွေဘက်က ထုတ်ပြန်တာမျိုးမရှိသေးဘဲ စဉ့်ကူးမြို့နယ်ပကဖခေါင်းဆောင်ကို မြေလတ်အသံက ဖုန်းနဲ့ဆက်သွယ်ခဲ့ရာမှာ တိုက်ပွဲဖြစ်မယ့် အခြေအနေရှိနေတာကြောင့် ဖြေကြားနိုင်ခြင်းမရှိသေးကြောင်း ပြောဆိုပါတယ်။

မေလ ၄ ရက်နေ့ကလည်း စဉ့်ကူးမြို့နယ်နဲ့ သပိတ်ကျင်းမြို့နယ်အစပ် ခုနှစ်တဲစုကျေးရွာအနီးတပ်စွဲထားတဲ့ စစ်ကောင်စီတပ်ကို PDF တွေဘက်က အလစ်အငိုက်ဝင်ရောက်တိုက်ခိုက်ခဲ့သေးတယ်လို့သိရပါတယ်။

စာတည်း-ရင်ငြိမ်း

မန္တလေး၊ မေ ၁၀၊ ၂၀၂၃။

မန္တလေးတိုင်း၊ မြင်းခြံမြို့နယ်၊ သင်ပြွန်းကျေးရွာအဝင်လမ်းခွဲအနီးမှာ ဆက်ကြေးကောက်နေတဲ့ စစ်ကောင်စီတပ်ဖွဲ့ ကို ဒေသကာကွယ်ရေးပူးပေါင်းအဖွဲ့တွေက ဒရုန်းနဲ့ ဗုံးကြဲတိုက်ခိုက်ခဲ့ရာ စစ်ကောင်စီတပ်သား ၂ ဦး သေဆုံးခဲ့တယ်လို့ Myingyan District Drone Strike Teamမှ တာဝန်ရှိသူက ပြောပါတယ်။

မေလ ၉ ရက် မနက် ၁၀ နာရီခန့်မှာ အင်အား ၃၀ ခန့်ရှိ စစ်ကောင်စီတပ်ဖွဲ့ဝင်တွေဟာ လမ်းသွားလမ်းလာ မော်တော်ယာဉ်တွေ၊ ဆိုင်ကယ်တွေကို စစ်ဆေးကာ ငွေတောင်းခံနေတဲ့အဖွဲ့ဖြစ်ပြီး လမ်းခွဲအနီးက သူတို့အနားယူတဲ့ အဆောက်အဦတခုကို ဒရုန်းနဲ့ဗုံးချတိုက်ခိုက်ခဲ့တာလို့ သူက ဆက်ပြောပါတယ်။

ဗုံးချတိုက်ခိုက်ခံရလို့ စစ်ကောင်စီတပ်သား ၂ ဦးသေဆုံးသွားပြီး တချို့လည်း ဒဏ်ရာရခဲ့ပါတယ်။ ထိခိုက် သေဆုံးဒဏ်ရာရသူတွေကို မြင်းခြံမြို့ဘက်ကို ကားနဲ့တင်ဆောင်သွားတယ်လို့ သူက ဆိုပါတယ်။

“သူတို့က စစ်ဆေးရေးလုပ်ပြီးတော့ သောက်စားပြီး နားနေတဲ့အချိန်မှာ ဗုံးချခဲ့တာ။ ထိခိုက်သေဆုံးကိုတော့ မြေပြင်သတင်းယူနေတဲ့သူတွေဆီက သိရတာဖြစ်တယ်။ အမြဲတမ်းတပ်စွဲစစ်ဆေးနေတဲ့ နေရာတော့ မဟုတ်ဘူး။ တခါတလေမှလာပြီး စစ်ဆေးရေးလုပ်တဲ့နေရာပါ” လို့ Myingyan District Drone Strike Teamမှ တာဝန်ရှိသူက ဆိုပါတယ်။

အဲဒီတိုက်ခိုက်မှုကိုတော့ Myingyan District Drone Strike Team နဲ့အတူ မဟာမိတ်တွေဖြစ်တဲ့ မြင်းခြံခရိုင် တပ်ရင်းအမှတ် ၁၊ တပ်ခွဲ ၁၊ မြင်းခြံခရိုင် တပ်ရင်းအမှတ် ၄၊ 27 revolution force တပ်ခွဲ ၃၊ မြင်းခြံခရိုင်တပ်ရင်း ၃၊ တပ်ရင်း ၈၊ ဗိုလ်စားပြောက်ကျားတပ်ဖွဲ့၊ 8 stars အဖွဲ့၊ နွားထိုးကြီးမြို့နယ်ပကဖ တို့က ပူးပေါင်းပါဝင် တိုက်ခိုက်ခဲ့တာပါ။

မေလ ၈ ရက်ကလည်း မြင်းခြံခရိုင်၊ တောင်သာမြို့နယ်၊ ရတနာပုံကျေးရွာနားမှာ ယာယီတပ်စွဲထားတဲ့ စစ်ကောင်စီအဖွဲ့ ဒရုန်းနဲ့တိုက်ခိုက်ခံရပြီး ထိခိုက်သေဆုံးမှုတွေရှိခဲ့တယ်လို့ သိရပါတယ်။

စာတည်း – ရင်ငြိမ်း