မုံရွာ

မုံရွာ၊ ဧပြီ ၁၃၊ ၂၀၂၃။

စစ်ကိုင်းတိုင်း၊ မုံရွာမြို့နယ်၊ ကံသာဦးရပ်ကွက်မှာ ပြုလုပ်တဲ့ စစ်ကောင်စီသင်္ကြန်ပွဲမှာ အနုပညာရှင်တွေ ဖိတ်ခေါ်ထားပြီး ဧပြီလ ၁၃ ရက် ဒီကနေ့မနက်ပိုင်းမှာ တပ်မိသားစု ယိမ်းအဖွဲ့တွေနဲ့ ဖွင့်ပွဲပြုလုပ်ခဲ့ပြီး ရန်အောင်၊ စိုးသူ၊ စိုးမြတ်နန္ဒာ၊ ခန့်စည်သူ၊ မေသဉ္ဇာဦးတို့ ဖွင့်ပွဲမှာ ဖျော်ဖြေကြတယ်လို့ ဒေသခံတွေက ပြောပါတယ်။

“ကန်သာယာ ပတ်ချာလည်မှာ လုံခြုံရေးတွေ ချထားတာ မနည်းဘူး။ သူတို့ဌာနဆိုင်ရာဝန်ထမ်းတွေကလွဲရင် ဘယ်သူမှ အဝင်မခံဘူး။ ပြောရရင် သူတို့လူတွေပဲ ရှိတာ။ ကျနော်တို့ ပြည်သူတွေ မရှိဘူး” လို့ မုံရွာဒေသခံတဦးက ပြောပါတယ်။

အရှေ့ကန်သာယာနဲ့ အနောက်ကန်သာယာကြားမှာ ဗဟိုမဏ္ဍပ်တခု၊ ဘေးလျှောက်လမ်းတွေမှာတော့ စတုဒီသာမဏ္ဍပ်နဲ့ လမ်းလျှောက်သင်္ကြန် ဆောက်လုပ်ထားပြီး ကန်သာယာတဝိုက်ကိုလည်း ပိတ်ဆို့ထားကာ မဏ္ဍပ်ထဲကို အပြင်လူအဝင်မခံဘူးလို့လည်း သိရပါတယ်။

အခုနှစ် မုံရွာသင်္ကြန်မှာ ရန်အောင်၊ မေသန်းနု၊၊ စိုးသူ၊ စိုးမြတ်နန္ဒာ၊ ခန့်စည်သူ၊ မေသဉ္ဇာဦး၊ ခရစ္စတီးနားတို့အပြင် တခြားအနုပညာရှင်တွေလည်း ရောက်ရှိနေကြပြီး မဏ္ဍပ်ရှေ့က ဝင်းယူနတီဟိုတယ်မှာ တည်းခိုနေကြတယ်လို့ သိရပါတယ်။

မုံရွာအခြေစိုက် ကာကွယ်ရေးတပ်ဖွဲ့တွေကတော့ စစ်ကောင်စီကျင်းပတဲ့ သင်္ကြန်ကိုမသွားကြဖို့ သတိပေးထားပြီး မနေ့က ညပိုင်းကလည်း မုံရွာမြို့ပေါ်မှာ ပေါက်ကွဲသံကြားရပြီး ဘယ်အဖွဲ့စည်းက ပြုလုပ်တယ်ဆိုတာတော့ စုံစမ်းနေဆဲပဲ ဖြစ်ပါတယ်။

မုံရွာမြို့က စစ်ကောင်စီတပ်ဖွဲ့ဝင်တွေနဲ့ သူတို့ရဲ့ မိသားစုတွေ သင်္ကြန်ကာလမှာ အခုလို သင်္ကြန်မဏ္ဍပ်ဆောက်ပြီး ရုပ်ရှင်သရုပ်ဆောင်တွေနဲ့အတူ ပျော်ပါးနိုင်ဖို့အတွက် မုံရွာမြို့မှာရှိတဲ့ စီးပွားရေးလုပ်ငန်းရှင်တွေက တဦးလျှင် ကျပ် ၃ သိန်းမှ ကျပ် ၅ သိန်းအထိ အလှူငွေထည့်ဝင်ခဲ့ရပါတယ်။

စာတည်း – လင်းဇေ

မုံရွာ၊ ဧပြီ ၈၊ ၂၀၂၃။

စစ်ကိုင်းတိုင်း၊ မုံရွာမြို့တနေရာမှာ တော်လှန်လူငယ်များကွန်ယက် (မုံရွာ) အဖွဲ့က ရုန်းကန်တော်လှန်ပြည်သူ့အသံ သံချပ်ကို ဧပြီလ ၇ ရက်မနေ့က ပြုလုပ်ခဲ့ပါတယ်။

တော်လှန်သင်္ကြန်ကာလအတွက် ဒီသံချပ်ကို ပြုလုပ်ရတာဟာ တော်လှန်ရေးမှာစစ်ကိုင်းတိုင်း သာမက ပြည်သူတရပ်လုံး ပါဝင်လာစေဖို့ ရည်ရွယ်ပြုလုပ်ခဲ့တာလို့ မုံရွာတော်လှန်လူငယ်များကွန်ယက်မှ အဖွဲ့ဝင်တဦးက ပြောပါတယ်။

ဒါ့အပြင် မုံရွာမှာ စစ်ကောင်စီက သင်္ကြန်ကာလအတွင်း စည်ကားအောင် လုပ်ဆောင်မှုတွေရှိနေပြီး ဒီလုပ်ဆောင်မှုတွေနဲ့ပတ်သက်ပြီးတော့လည်း အခုလိုပြောပါတယ်။

“သူတို့အပေါ်မြင်တဲ့ အမြင်အနေနဲ့ကတော့ ရွံစရာကောင်တွေဆိုတာထက် ပြောစရာ ဘာမှမရှိတော့ပါဘူးခင်ဗျ။ ပြည်သူတွေကို ပြောချင်တဲ့စကားဆိုရင်တော့ ကျနော်တိုရဲ့ အဆုံးသတ် တိုက်ပွဲအနေနဲ့ စစ်*နိဂုံး ၂၀၂၃ ဆိုတဲ့ ဆောင်ပုဒ်အတိုင်း ဒီနှစ်ကို အပြီးသတ်ချေမှုန်းမှာမို့ သူတို့အဆုံးသတ်မှသာ ကျနော်တို့ပြည်သူတရပ်လုံး အစစ်အမှန်ပျော်ရွှင်ရတဲ့ ပွဲကြီးကျင်းပကြရအောင်လို့ ပြောချင်ပါတယ်” လို့ မုံရွာတော်လှန်လူငယ်များကွန်ယက်မှ ပြောပါတယ်။

သံချပ်ရိုက်ကူးရေးပြုလုပ်တဲ့နေရာဟာ စစ်တပ်က စစ်ကြောင်းထိုးနေတဲ့နေရာတွေနဲ့ မဝေးသလို ဘယ်လိုထောက်လှမ်းနေမှန်းလည်း မသိတာကြောင့် အန္တရာယ်မကျရောက်အောင် သတိထားပြီး လုပ်ခဲ့ရတယ်လို့ ဆိုပါတယ်။

တိုက်ပွဲတွေကြားက လုပ်ခဲ့ရတဲ့သံချပ်ဖြစ်တဲ့အတွက် အမှားတွေ၊ လိုအပ်ချက်တွေပါလာရင်လည်း သည်းခံနားထောင်ပေးဖို့ မုံရွာတော်လှန်လူငယ်များ ကွန်ယက်က မေတ္တာရပ်ခံထားပါတယ်။

“ရုန်းကန်တော်လှန်ပြည်သူ့အသံ” သံချပ်ကို ကြည့်ရှုချင်တဲ့ ပြည်သူတွေအနေနဲ့ မုံရွာတော်လှန်လူငယ်များ ကွန်ယက်စာမျက်နှာမှာ သွားရောက်ကြည့်ရှုနိုင်ပါတယ်။

မုံရွာ၊ ဧပြီ ၈၊ ၂၀၂၃။

စစ်ကိုင်းတိုင်း၊ မုံရွာခရိုင်အတွင်း ချင်းတွင်းမြစ်ကမ်းဘေးကျေးရွာများသပိတ်စစ်ကြောင်းက ဧပြီလ ၇ ရက်နေ့ ညနေပိုင်းမှာ “ပြည်သူရှိနေသရွေ့ ပါတီရှိနေမယ်” စာသားကိုင်ဆောင်ပြီး စစ်အာဏာရှင်ဆန့်ကျင်ဆန္ဒပြကာ လူထုသပိတ်ဖော်ဆောင်ခဲ့တယ်လို့သိရပါတယ်။

မုံရွာ၊ ဧပြီ ၇၊ ၂၀၂၃။

စစ်ကိုင်းတိုင်း၊ မုံရွာမြို့နယ်၊ ကံသာဦးရပ်ကွက်မှာ ပြုလုပ်မယ့် ကန်သာယာသင်္ကြန်မှာ ရုပ်ရှင်သရုပ်ဆောင် အယောက် ၂၀ ဖိတ်ထားပြီး လမ်းလျှောက်သင်္ကြန်ကျင်းပဖို့ ကြိုးစားနေတယ်လို့ ဒေသခံတွေကတဆင့် သိရပါတယ်။

အရှေ့ကန်သာယာနဲ့ အနောက်ကန်သာယာကြားမှာ ဗဟိုမဏ္ဍပ်တခု ဆောက်လုပ်နေပြီး၊ ဘေးလျှောက်လမ်းတွေမှာတော့ လမ်းလျှောက်သင်္ကြန်နဲ့ စတုဒီသာအတွက် မဏ္ဍပ် ၂ ခုဆောက်လုပ်နေကာ သင်္ကြန်ကိုလာရောက်မယ့် သရုပ်ဆောင်တွေကိုတော့ မသိရသေးဘူးလို့ ဆိုပါတယ်။

“ကျတော်တို့ကြားတာတော့ ရန်အောင်က အကြိုနေ့လာမယ် ကြားတာပဲ။ ကျန်တဲ့အနုပညာရှင်တွေတော့ မကြားမိဘူး။ ဒါကလည်း အတိကျတော့ ပြောလို့မရဘူး။ ထွက်လာတဲ့သတင်းတွေအရပေါ့။ သင်္ကြန်လူစည်အောင်ဆိုရင်တော့ သူတို့တပ်မိသားစုတွေ၊ ဌာနဆိုင်ရာဝန်ထမ်းတွေကို ထုတ်လာပြီးမှပဲ စည်ကားအောင် လုပ်လိမ့်မယ်။ ပြည်သူတွေကတော့ လည်ဖို့ မဖြစ်နိုင်ဘူး။” လို့ မုံရွာဒေသခံတဦးက ပြောပါတယ်။

ဒါ့အပြင် မုံရွာမြို့ပေါ်မှာရှိတဲ့ လုပ်ငန်းရှင်တွေကို သင်္ကြန်မဏ္ဍပ်နဲ့ အစီစဉ်တွေအတွက်ဆိုပြီး ၃ သိန်းကနေ ၅ သိန်းအထိ ငွေကြေးကောက်ခံတာတွေ လုပ်နေတယ်လို့ ဆိုပါတယ်။

“အခုလက်ရှိ မဏ္ဍပ်အဆောက်အဦး ၃ ခု ဆောက်နေတယ်။ ဝင်းယူနတီဟော်တယ်ရှေ့နဲ့ တင်ဝင်းထွန်းဟော်တယ်ရှေ့မှာ၊ အနုပညာရှင်တွေက အဲ့ hotel တွေမှာပဲ နေဖို့များတယ်။” လို့ မုံရွာဒေသခံတဦးက ပြောပါတယ်။

စစ်ကောင်စီဘက်က မဟာသင်္ကြန်ဖြစ်မြောက်ရေးကော်မတီဝင်တွေကတော့ မုံရွာသင်္ကြန်ကို လာရောက်လည်ပတ်ဖို့နဲ့ ရေကစားမယ့်သူတွေအတွက် စတုဒီသာမဏ္ဍပ်တွေလည်း ဆောက်လုပ်ထားပြီး ယိမ်းအကယှဉ်ပြိုင်ပွဲတွေ၊ ဆုချီးမြှင့်ပွဲတွေ ကျင်းပဖို့လည်း စီစဉ်ထားတယ်လို့ ဆိုပါတယ်။

ပြည်သူတွေအနေနဲ့ သင်္ကြန်မှာ အပျော်မလွန်ကြဖို့၊ စစ်ကောင်စီက ကျင်းပတဲ့သင်္ကြန်ကို မပါဝင်ကြဖို့ ပြည်သူ့ကာကွယ်ရေးအဖွဲ့တွေက တားမြစ်ထားတာတွေလည်းရှိလို့ လည်ပတ်မယ့်အခြေနေက‌ နည်းပါးတယ်လို့ သိရပါတယ်။

စာတည်း – 007

စစ်ကိုင်း၊ မတ် ၂၇၊ ၂၀၂၃။

စစ်ကိုင်းတိုင်း၊ မုံရွာမြို့ပေါ်က အမျိုးသမီး ၃ ဦးကို စစ်ကောင်စီတပ်သားတွေက မတ်လ ၂၆ ရက် မနေ့ကနေ့လယ်ပိုင်းမှာ ဖမ်းဆီးသွားခဲ့တယ်လို့ ဒေသခံတွေဆီက သိရပါတယ်။

အဖမ်းခံရသူမှာ မအေးမြတ်သူနဲ့ အခြားအမျိုးသမီး ၂ ဦးတို့ဖြစ်ပြီး၊ သူတို့ကို စစ်ကောင်စီတပ်သားတွေက အိမ်စီးကားနဲ့ လာရောက်ဖမ်းဆီးသွားတာလို့ မြို့ခံ အမျိုးသားတဦးက ပြောပါတယ်။

“အေးမြတ်သူက သားသည်လမ်းနဲ့ တိုင်းရင်းဆေးရုံလမ်းထိပ်မှာ စကစတွေနဲ့ တွေ့ပြီး အဖမ်းခံရတာ။ နောက်နှစ်ယောက်ကတော့ ရတနာစက်ဘီး အရောင်းဆိုင်မှာ အဖမ်းခံရတာ။ သူတို့က ဝန်ထမ်းလား၊ ဝယ်သူတွေလားတော့ မသိရသေးဘူး။ စက်ဘီးဆိုင်ကို စကစတွေက ကားတစီးနဲ့ရောက်လာပြီးတော့ ဆိုင်မှာရှိတဲ့ လူတွေအကုန်လုံးကို တနာရီကြာ ဒူးထောက်ခိုင်းခဲ့တယ်တဲ့။ ပြီးမှပဲ အဲ့အထဲက အမျိုးသမီးနှစ်ယောက်ကို ဖမ်းသွားတာ” လို့ ဆိုပါတယ်။

ဖမ်းဆီးခံ အမျိုးသမီးတွေနဲ့ပတ်သက်တဲ့ အသေးစိတ်အချက်အလက်တွေကိုတော့ မြေလတ်အသံက ဆက်လက်စုံစမ်းနေဆဲပါ။

မုံရွာမြို့မှာ မတ်လ ၂၆ ရက်တနေ့တည်းမှာ စစ်ကောင်စီတပ်သားတွေက အင်အားအများအပြားနဲ့ အက်တောရပ်ကွက်၊ နန္ဒဝန်ရပ်ကွက်၊ သာစည်လမ်းနဲ့ တိုင်းရင်းဆေးရုံလမ်းမတို့မှာ စစ်ဆေးမေးမြန်းတာတွေ ပြုလုပ်ခဲ့ပြီးနောက် အခုလိုအမျိုးသမီး ၃ ဦး ဖမ်းဆီးခံလိုက်ရတာ ဖြစ်ပါတယ်။

အဖမ်းခံရတဲ့ အမျိုးသမီးတွေဟာ အသက် ၂၀ နဲ့ ၃၀ နှစ်အရွယ်တွေဖြစ်ပြီး၊ သူတို့ကို ဘာကြောင့်ဖမ်းဆီးပြီး၊ ဘယ်နေရာမှာ ထိန်းသိမ်းထားလဲဆိုတာကိုတော့ ခုချိန်ထိ မသိရှိရသေးပါဘူး။

ပြီးခဲ့တဲ့မတ်လ ၂၅ ရက်နေ့လယ် ၂ နာရီလောက်မှာလည်း မုံရွာမြို့နယ်၊ မုံရွေးကျေးရွာ စျေးအနီးရှိ လက်ဖက်ရည်ဆိုင်တဆိုင်အပါအဝင် လူနေအိမ် ၂ လုံးကို စစ်ကောင်စီတပ်သားတွေက မီးရှို့ခဲ့သေးတယ်လို့ ဒေသခံတွေဆီက သိရပါတယ်။

စာတည်း – လင်း