မုံရွာ

မုံရွာ၊ မတ် ၂၄၊ ၂၀၂၃။

စစ်ကိုင်းတိုင်း၊ မုံရွာမြို့နယ်၊ အောက်စိမ့်တော့ရွာအနီးမှာ ဖမ်းဆီးသတ်ဖြတ်ခံထားရတဲ့ လူငယ် ၄ ဦးရဲ့ ရုပ်အလောင်းတွေကို မတ်လ ၂၃ ရက်မနေ့က တွေ့ရှိခဲ့တယ်လို့ ဒေသခံတွေဆီက သိရပါတယ်။

အသတ်ခံထားရတဲ့ လူငယ် ၄ ဦး အပါအဝင် ၈ ဦးကို မတ်လ ၁၂ ရက်နေ့ ည ၇ နာရီဝန်းကျင်က မုံရွာမြို့၊ နန္ဒဝန်ရပ်ကွက်မှာ စစ်ကောင်စီတပ်က ဖမ်းဆီးခဲ့တာဖြစ်ပြီး ဖမ်းဆီးခံခဲ့ရပြီးတဲ့နောက် မတ် လ ၂၂ ရက်နေ့ ညပိုင်းက ၄ ဦး အသတ်ခံခဲ့ရကာ ကျန်လူငယ် ၄ ဦးရဲ့ အခြေအနေကိုတော့ မသိရဘူးလို့ မြေပြင်ရဲဘော်တဦးက မြေလတ်အသံကို ပြောပါတယ်။

“သူတို့တွေကို ၁၂ ရက်နေ့ထဲက နန္ဒဝန်ရပ်ကွက်ထဲမှာ ဝင်ဖမ်းသွားတာကို သိလိုက်တယ်။ စကစဘက်က သူတို့ကို မုံရွာလိပ်စာတွေနဲ့ တင်ထားပေမယ့် မုံရွာမြို့ပေါ်ကဆိုလည်း ကျတော်တို့ သိရမှာ။ ရဲဘော်လို့လည်း ကြားတယ်။ KTV ဝန်ထမ်းတွေလို့လည်း ကြားတယ်။ ခုက ကျတော်တို့လည်း သူတို့က ဘယ်သူတွေဆိုတာ လိုက်စုံစမ်းနေတုန်းပဲ” လို့ မုံရွာမြို့ပေါ် ရဲဘော်တဦးက ပြောပါတယ်။

အဲ့ဒီလူငယ် ၈ ဦးကို စစ်တပ်ဝါဒဖြန့်တယ်လီဂရမ် Fifty Two ချန်နယ်မှာ မတ်လ ၁၂ ရက်နေ့က မုံရွာမြို့၊ နန္ဒဝန်ရပ်ကွက်မှာရှိတဲ့ KTV တခုကို ဝင်ရောက်စီးနင်းရာမှာ လက်နက်တွေနဲ့အတူ ဖမ်းဆီးရမိခဲ့တယ်လို့ မတ်လ ၂၃ ရက်နေ့မှာ ဓာတ်ပုံတွေနဲ့တကွ ဖော်ပြထားပါတယ်။

“စကစဘက်က ဖမ်းမိတယ်လို့ပဲ တင်ထားတာ။ နောက်ကွယ်က ပုံတွေထွက်လာတော့ အသတ်ခံထားရပြီ။ သူတို့တယ်လီဂရမ်မှာ တင်ထားတဲ့ အင်္ကျီတွေနဲ့ပဲ သေနတ်နဲ့ပစ်ပြီးမှ ဓားနဲ့ထိုးမွှေထားခဲ့တာ။ စစ်ကြောင်းပြန်ဆုတ်တဲ့လမ်းကြောင်းက ယာခင်းတွေထဲမှာ စွန့်ပစ်ထားခဲ့တာ” လို့ လူငယ် ၄ ဦးရဲ့ ရုပ်အလောင်းတွေကို သဂြိုလ်ပေးခဲ့တဲ့ အဖွဲ့ဝင်တဦးက ပြောပါတယ်။

စစ်ကောင်စီတပ်ရဲ့ဖမ်းဆီးခံထားရသူတွေဟာ အောင်မျိုးငြိမ်း၊ ဝေလင်းဦး၊ အောင်သူဝင်း၊ ကျော်လွင်မိုး၊ သူရဇော် ၊ ငယ်ဦး၊ ဝင်းနိုင်၊ ထက်ဖြိုးဝင်းတို့ဖြစ်တယ်လို့ စစ်တပ်ဝါဒဖြန့် တယ်လီဂရမ်မှာ ဖော်ပြထားပြီး အဲ့ဒီထဲက ‌အောင်မျိုးငြိမ်း၊ ဝေလင်းဦး၊ သူရဇော်နဲ့ ငယ်ဦးတို့ကို စစ်ကောင်စီတပ်က သတ်ဖြတ်ခဲ့တာ ဖြစ်ပါတယ်။

ဖမ်းဆီး၊ အသတ်ခံထားရတဲ့ လူငယ် ၈ ဦးဟာ ဘယ်အဖွဲ့အစည်းက ဖြစ်တယ်ဆိုတာ အတည်ပြုနိုင်တာမျိုး မရှိသေးဘဲ မြေလတ်အသံအနေနဲ့လည်း စုံစမ်းနေဆဲပဲ ဖြစ်ပါတယ်။

မုံရွာမြို့ပေါ်မှာ တော်လှန်ရေးရဲဘော်တွေ မကြာခဏဆိုသလို ဖမ်းဆီးခံနေရပြီး စစ်ကောင်စီဘက်က ဖမ်းဆီးတာတွေနဲ့ပတ်သက်လို့ ချက်ချင်းထုတ်ပြန်တာမျိုး မလုပ်ဆောင်တော့ဘဲ ကွင်းဆက်အကုန်မိမှ ထုတ်ပြန်တာမျိုးတွေ ပြောင်းလဲလုပ်ဆောင်လာတယ်လို့ မုံရွာအခြေပြု မြေပြင်ရဲဘော်တဦးက ပြောပါတယ်။

စာတည်း – ရင်ငြိမ်း

မုံရွာ၊ မတ် ၁၆၊ ၂၀၂၃။

စစ်ကိုင်းတိုင်း၊ မုံရွာမြို့နယ်ထဲက ထနောင်းတောရွာကို မတ်လ ၁၅ ရက် မနေ့ကမနက် ၅ နာရီလောက်က စစ်ကောင်စီတပ်သားတွေ မီးဝင်ရှို့လို့ အိမ်ခြေ ၆၀ ကျော် မီးလောင်ခဲ့တဲ့အပြင် သက်ကြီးပိုင်း အဖိုး ၂ ဦးနဲ့ အဖွား ၁ ဦး သေဆုံးခဲ့ပါတယ်။

အိမ်ခြေ ၂၅၀ ကျော်ရှိတဲ့ အဲ့ဒီရွာကို အင်အား ၃၀ နီးပါးရှိတဲ့ စစ်ကောင်စီတပ်သားတွေ ရုတ်တရက် သေနတ်တွေ ပစ်ဖောက် ရောက်လာခဲ့လို့ ဒေသခံတွေ ချက်ချင်းထွက်ပြေးခဲ့ရတယ်လို့ ဒေသခံတဦးက ဆိုပါတယ်။

“ရွာအရှေ့ကနေ သေနတ်ဖောက်ပီး ဝင်လာကြတာ။ ဘာပစ္စည်းမှကို မသယ်လာနိုင်ခဲ့ဘူး။ အမတယောက်ဆိုရင်လည်း ကလေးတယောက်က စစ်သားတွေဝင်လာပြီပြောမှ ချက်ချင်း ထွက်ပြေးရတာဆိုတော့ ဘာတခုမှပါမလာဘူး” လို့ ဆိုပါတယ်။

အဲ့ဒီနောက် စစ်ကောင်စီတပ်သားတွေက ရွာထဲမှာရှိတဲ့ နေအိမ်တွေကို မီးရှို့ခဲ့တာကြောင့် အိမ်ခြေ ၆၀ ကျော် မီးလောင်ဆုံးရှုံးခဲ့သလို အသက် ၈၀ အရွယ် အဖွားတဦးနဲ့ ၆၀ ကျော် အရွယ် အဘိုး ၂ ဦး သေဆုံးခဲ့တယ်လို့ ဆိုပါတယ်။

“တဦးက မီးထဲပါသွားတာ။ နှစ်ဦးက အိမ်သာထဲကိုထည့်ပြီး မီးရှို့သွားတယ်” လို့ ဒေသခံတဦးက ပြောပါတယ်။

နေအိမ်တွေ မီးရှို့ခံလိုက်ရတဲ့ ဒေသခံတွေဟာ နီးစပ်ရာကျေးရွာတွေမှာပဲ ထွက်းပြေးခိုလုံခဲ့ရပြီး ရွာထဲပြန်မဝင်ရဲခဲ့ကြဘူးလို့ ဆိုပါတယ်။ အဲ့ဒီအပြင် မီးရှို့ပြီးထွက်သွားတဲ့ စစ်သားတွေက ညောင်ပင်စောက်တာဝါတိုင်ဘက်ကနေ သေနတ်တွေနဲ့ ရမ်းသမ်းပစ်ခတ်ခဲ့သေးတယ်လို့ ပြောပါတယ်။

၂၀၂၂ ခုနှစ် စက်တင်ဘာလ ၂၇ ရက်ကလည်း စစ်ကောင်စီတပ်သားတွေဟာ ထနောင်းတောမြောက်ရွာ နေအိမ် ၄ လုံး ထနောင်းတောတောင်ရွာ နေအိမ် ၃ အိမ်ကိုလည်း မီးရှို့ ဖျက်ဆီးခဲ့သေးတယ်လို့ သိရပါတယ်။

မုံရွာ၊ မတ် ၁၅၊ ၂၀၂၃။

စစ်ကိုင်းတိုင်း၊ မုံရွာမြို့နယ်ထဲက ထနောင်းတော(တောင်ရွာ)ကို စစ်သားနဲ့ ပျူစောထီးတပ်ဖွဲ့တွေက မတ်လ ၁၅ ရက်ဒီမနက်ပိုင်းမှာ ဝင်ရောက်မီးရှို့ခဲ့တယ်လို့ ဒေသခံတွေဆီက သိရပါတယ်။

အင်အား ၂၀ ဝန်းကျင်ရှိတဲ့ စစ်သားနဲ့ပျူတွေက ဒီမနက် ၆ နာရီလောက်မှာ ရွာထဲကို လက်နက်တွေ ပစ်ဖောက်ဝင်လာခဲ့ပြီး နေအိမ်တွေကို မီးရှို့ခဲ့တာလို့ မုံရွာ – အမြင့်လမ်းသတင်းမှန်ပြန်ကြားရေးတာဝန်ခံတဦးက ပြောပါတယ်။

“အခုလောလောဆယ်တော့ ဘာမှတိတိကျကျ မသိရသေးဘူး။ စစ်ကြောင်းပြန်မှပဲ သိရမယ်။ နေအိမ်တွေကို မီးရှို့တာ တော်တော်များတယ်လို့ ကြားတယ်။ ရွာသားတွေလည်း ထွက်ပြေးနေရတယ်” လို့ ဆိုပါတယ်။

အခုလက်ရှိအချိန်ထိလည်း ရွာထဲမှာ စစ်ကောင်စီတပ်ဖွဲ့တွေက မီးရှို့နေဆဲ ဖြစ်တာကြောင့် ဒေသခံတွေအနေနဲ့ နီးစပ်ရာကျေးရွာနဲ့ တောတွေထဲမှာ ရှောင်တိမ်းနေရဆဲဖြစ်ကာ နောက်ဆက်တွဲအခြေအနေတွေကိုတော့ မြေလတ်အသံက ဆက်လက်စုံစမ်းနေဆဲ ဖြစ်ပါတယ်။

ခုမီးရှို့နေတဲ့ စစ်အုပ်စုဟာ မုံရွာ-မန္တလေးလမ်းဘေး မြေနဲကျေးရွာအဝင်မှာ တပ်စွဲထားတဲ့ စစ်အုပ်စုဖြစ်တယ်လို့လည်း အထက်ပါဝာာဝန်ခံက ပြောပါတယ်။

ပြီးခဲ့တဲ့ ၂၀၂၂ ခုနှစ်၊ စက်တင်ဘာလ ၂၇ ရက်ကလည်း ထနောင်းတော (မြောက်ရွာ)က နေအိမ် ၄ လုံးကို စစ်ကောင်စီတပ်တွေက မီးရှို့ဖျက်ဆီးခဲ့ပါသေးတယ်။

စာတည်း – လင်း

မုံရွာ၊ မတ် ၁၄၊ ၂၀၂၃။

စစ်ကိုင်းတိုင်း၊ မုံရွာမြို့နယ်၊ သက္ကယ်ကျင်းကျေးရွာမှာ PDF ရှိတယ်ဆိုတဲ့ စွပ်စွဲချက်နဲ့ မတ်လ ၁၃ ရက်မနေ့ကနေ့လယ်ပိုင်းမှာ စစ်ကောင်စီတပ်တွေကဝင်ရောက်လာပြီး နေအိမ်တွေကိုပါ မီးရှို့ဖျက်ဆီးခဲ့တယ်လို့ သိရပါတယ်။

မုံရွာအခြေစိုက် အနောက်မြောက်တိုင်းစစ်ဌာနချုပ်က စစ်သားတွေဟာ မအူဂိတ်ကနေတဆင့် သက္ကယ်ကျင်းရွာကို ပစ်ခတ်တာတွေမလုပ်ပဲ ခြေလျင်ဝင်ရောက်လာကာ နေအိမ် ၁၁ လုံးကိုမီးရှို့ခဲ့ကြတာလို့ သက္ကယ်ကျင်းဒေသခံတဦးက ပြောပါတယ်။

“ရွာထဲမှာဘာမှမရှိပါဘူး၊ အကုန်လုံးရိုးရိုးသားသားလုပ်စားကြတာပါ။ PDF ရှိတယ်ထင်ပြီး မီးရှို့သွားတာပါ။ သူတို့အခုလိုလုပ်လိုက်တဲ့အတွက် ကျနော့်အနေနဲ့ကတော့ ဘာမှပြောစရာမရှိပါဘူး၊ ပြောလည်းမပြောရဲပါဘူး၊ သူတို့လာရင်ပြေးမယ်၊ အဓိက က လူလွတ်အသက်ရှင်ဖို့ပဲ အရေးကြီးတာပါ”လို့ ဆိုပါတယ်။

အိမ်ခြေ ၁၁၀၀ ဝန်းကျင်ရှိတဲ့ သက္ကယ်ကျင်းကျေးရွာဟာ အခုလို မီးရှို့ဖျက်ဆီးခြင်း ခံရတာက ပထမအကြိမ်ဖြစ်တယ်လို့လည်း အထက်ပါဒေသခံက ဆက်ပြောပါတယ်။

“အရင်ကတော့ ရွာထဲကို စစ်ကြောင်းထိုးလာတာမျိုးတော့ရှိတယ်၊ မီးတော့မရှို့ခဲ့ဘူး၊ ဒီတကြိမ်တော့ မီးရှို့ခံလိုက်ရတယ်။ မီးရှို့ခံရတဲ့အိမ်တွေကတော့ ဘယ်လိုနေရမယ်မသိသေးဘူး၊ ရွာကတဲထိုးပေးမယ်လို့ ပြောတယ်”လို့ ဆိုပါတယ်။

အဆိုပါစစ်ကောင်စီတပ်တွေဟာ သက္ကယ်ကျင်းကျေးရွာကိုမီးရှို့ပြီး ညနေ ၄ နာရီလောက်မှာတော့ ရွာကနေထွက်ခွာသွားတဲ့အတွက် တိမ်ရှောင်နေတဲ့ ဒေသခံရွာသားအချို့ကတော့ ညနေ ၅ နာရီလောက်မှ ရွာထဲကိုပြန်ဝင်ခဲ့ကြတယ်လို့ သိရပါတယ်။

စာတည်း – လင်း

မုံရွာ၊ မတ် ၁၃၊ ၂၀၂၃။

စစ်ကိုင်းတိုင်း၊ မုံရွာမြို့နယ်ထဲက ကျေးရွာတရွာမှာ မုံရွာ−အမြင့်လမ်း သပိတ်ဦးဆောင်ကော်မတီက ဦးဆောင်ပြီး မတ်လ ၁၃ ရက် ဒီနေ့လယ် ၁၂ နာရီလောက်မှာ လူထုဟောပြောပွဲကျင်းပခဲ့ပါတယ်။

လူထုဟောပြောပွဲမှာ ဒေသခံပြည်သူ ၁၀၀ နီးပါး တက်ရောက်ခဲ့ပြီး ဟောပြောပွဲကို ၂ နာရီနီးပါး ပြုလုပ်ခဲ့တယ်လို့ သပိတ်မှာပါဝင်သူ တဦးက ပြောပါတယ်။

“ပြောသွားတာကတော့ လက်ရှိနိုင်ငံရေးအခြေအနေ၊ လူထုပါဝင်မှု၊ ဖက်ဒရယ်ဒီမိုကရေစီအကြောင်းတွေကို အဓိကထားပြီး ပြောသွားခဲ့တာ” လို့ ပြောပါတယ်။

အခုလို ဟောပြောရခြင်း ရည်ရွယ်ချက်မှာလည်း တော်လှန်ရေးမှာ ပြည်သူတွေအနေနဲ့ တက်တက်ကြွကြွ ပါဝင်လာအောင်၊ သပိတ်တွေ အမြဲတမ်းထွက်ဖို့ အဆင်မပြေတဲ့အခါ တော်လှန်ရေးအသိ၊ တော်လှန်ရေးအရွှေ့ကို ဒေသခံတွေသိရှိဖို့အတွက် ပြုလုပ်ရခြင်း ဖြစ်တယ်လို့လည်း ဆိုပါတယ်။

မုံရွာ−အမြင့်လမ်း သပိတ်ဦးဆောင်သူ ကော်မတီအနေနဲ့ အခုလို လူထုဟောပြောပွဲလုပ်တာဟာ ပထမအကြိမ်ဖြစ်ကြောင်းနဲ့ နောက်ထပ်လည်း လူထုဟောပြောပွဲကို ဆက်လုပ်သွားမယ်လို့ သပိတ်မှာပါ၀င်သူ တ‌ဦးက ပြောပါတယ်။

ပြီးခဲ့တဲ့ မတ်လ ၁၀ ရက်ကလည်း မုံရွာ−အမြင့်လမ်း သပိတ်ဦးဆောင်ကော်မတီတပ်ဖွဲ့နဲ့ ချောင်းဦးမြို့နယ် လူငယ်အင်အား သပိတ်ကော်မတီတို့ ပူးပေါင်းပြီး “ဖက်ဒရယ် ခရီးကြမ်းကိုချီ ပြည်သစ်ကိုတည်” စတဲ့ စာသားကို ကိုင်ဆောင်ကာ ချောင်းဦးမြို့နယ်အတွင်းမှာ လူထုသပိတ်တိုက်ပွဲကို ကျင်းပခဲ့ပါသေးတယ်။

စာတည်း – လင်း