မုံရွာ

■ ကနီမှာလည်း ဗုံးကြဲခံရလို့ နေအိမ်တွေပျက်စီး

ကျော်စွာ ၊ ကျော်ကြီး

မုံရွာ၊ ဖေဖော်ဝါရီ ၄၊ ၂၀၂၆ ။

စစ်ကိုင်းတိုင်း၊ မုံရွာနဲ့ကနီမြို့နယ်တွေမှာ လေကြောင်းကနေဗုံးကြဲတိုက်ခိုက်ခံရတာကြောင့် လူ ၂ ဦး သေဆုံးပြီး ဘုန်းကြီးကျောင်းဆောင်တွေနဲ့ နေအိမ်တွေထိခိုက်ပျက်စီးခဲ့တယ်လို့ ဒေသခံတွေဆီက သိရပါတယ်။

မုံရွာမြို့နယ်၊ သက္ကယ်ကျင်းရွာဘုန်းကြီးကျောင်းနဲ့ ဘုရားဝန်းထဲကို ဖေဖော်ဝါရီ ၄ ရက် ဒီကနေ့မနက် ၅ နာရီကျော်မှာ နမခက လာတဲ့ စက်တပ်လေထီးက ဗုံး ၄ လုံးကြဲချတိုက်ခိုက်တာလို့ မုံရွာမြို့နယ်ပကဖတာဝန်ရှိသူတဦးက မြေလတ်အသံကို ပြောပါတယ်။

” သေဆုံးက ၂ ယောက်ဖြစ်သွားတယ်။ ဆေးရုံမှာ ၁ ယောက်ဆုံးတယ်။ သားအဖ ၂ ယောက်။ အမှန်က ** တွေမီးရှို့လိုက်လို့ နေရာပြန်မဆောက်နိုင်ကြလို့ ပေးတဲ့မိုးကာလေးတွေနဲ့ ဘုရားဝန်းထဲမှာ တဲထိုးပြီးနေကြတာ။ မီးဘေးသင့်တွေ။” လို့ သူက ပြောပါတယ်။

ဗုံးစထိမှန်လို့ ဘုန်းကြီးကျောင်းနဲ့ဘုရားဝန်အတွင်းနေထိုင်နေတဲ့ အသက် ၁၈ နှစ် နဲ့ အသက် ၅၀ ဝန်းကျင် သားအဖ ၂ ဦးသေဆုံးခဲ့ပြီး အသက် ၃၀ ကနေ ၅၀ ကြားရှိ သံဃာ ၁ ပါး၊ အမျိုးသမီး ၂ ဦးနဲ့ အမျိုးသား ၄ ဦးဒဏ်ရာရခဲ့ကာ ဘုရားဝန်းနဲ့ဘုန်းကြီးကျောင်းအတွင်းက အဆောက်အဦးတွေ ပျက်စီးခဲ့တယ်လို့ ဆိုပါတယ်။

ထိခိုက်သေဆုံးသူတွေက တဆက်တည်းကပ်လျက်တည်ရှိတဲ့ သက်ကယ်ကျင်းနဲ့လယ်ပြင်ကျေးရွာက ဒေသခံတွေဖြစ်ပြီး၂၀၂၃ အတွင်း စစ်ကော်မရှင်တပ်ကစစ်ကြောင်းထိုး၊ မီးရှို့ခဲ့လို့ ၂ ရွာပေါင်း အိမ်​ခြေ ၅၀၀ ခန့်မီးလောင်ပျက်စီးခဲ့ကာ လက်ရှိအထိ နေအိမ်ပြန်မဆောက်နိုင်တာကြောင့် ဒေသခံ ၁၀၀ ကျော်ဟာ ကျေးရွာဘုရားဝန်းနဲ့ ဘုန်းကြီးကျောင်းတွေမှာ မှီခိုနေထိုင်ကြနေရတ​ယ်လို့ သိရပါတယ်။

ဒါ့အပြင် ကနီမြို့နယ်၊ မုဌောကျေးရွာကို ဖေဖော်ဝါရီ ၃ ရက် ယမန်နေ့ နေ့လယ်ပိုင်းက စက်တပ်လေထီးနဲ့ ဗုံးကြဲတိုက်ခိုက်ခဲ့တာကြောင့် နေအိမ်တွေပျက်စီးဆုံးရှုံးခဲ့တယ်လို့ သိရပါတယ်။

“ လူတွေကတော့ ပုံးကျင်းထဲ ဝင်လိုက်နိုင်တယ်၊ ၁ ယောက်မှ မထိဘူး။ အိမ်ကတော့ မွစာကြဲသွားတယ်၊ ပျားပုံးတွေတွေလည်း ပျက်စီးတာရှိတယ်၊ ဘာတိုက်ပွဲမှမရှိဘဲ ဒီတိုင်းကြဲနေတာ” လို့ ရွာခံအမျိုးသမီးတဦးက မြေလတ်အသံကို ပြောပါတယ်။

လေကြောင်းတိုက်ခိုက်မှုကြောင့် လူနေအိမ် ၂ လုံး၊ ကား ၁စီးနဲ့ အိမ်မွေးတိရစ္ဆာန်တွေအပါ မွေးမြူရေးပျားပုံးတွေလည်း ပျက်စီးခဲ့ရတယ်လို့ သိရပါတယ်။

အဆိုပါတိုက်ခိုက်မှုအပြီး မုဌောရွာခံတွေနဲ့ အနီးဝန်းကျင်ကျေးရွာနေပြည်သူအချို့ဟာ လေကြောင်း အန္တရာယ်ကြောက်တာကြောင့် နေအိမ်တွေမှာ ဆက်လက်မနေထိုင်ရဲတော့ဘဲ ထွက်ပြေးတိမ်းရှောင်နေကြတယ်လို့ သိရပါတယ်။

မုံရွာ၊ ဒီဇင်ဘာ ၁၆၊ ၂၀၂၅။

စစ်ကိုင်းတိုင်း၊ မုံရွာမြို့နယ်အတွင်းက ကျေးရွာ ၃ ရွာကို စစ်ကော်မရှင်စစ်ကြောင်းကမီးရှို့ခဲ့တာကြောင့် နေအိမ် ၉၀ ကျော်မီးလောင်ပျက်စီးခဲ့တယ်လို့ မုံရွာမြို့နယ်ပြည်သူ့ကာကွယ်ရေးအဖွဲ့ဆီက သိရပါတယ်။

ဒီဇင်ဘာ ၁၅ ရက်နေ့လယ် ၁ နာရီကျော်မှာ မုံရွာနမခ ကထွက်လာတဲ့ အင်အား ၁၀၀ ကျော်ပါ စစ်ကြောင်းက ပေါက်ပင်နဲ့ နဂါးတွင်းကျေးရွာတွေကို မီးရှို့ခဲ့သလို မုံရွာ GTC ကျောင်းဝင်းအတွင်း ထွက်လာတဲ့စစ်ကြောင်းက ဆည်တော်ကြီးရွာကို မီးရှို့ခဲ့တာလို့ ဆိုပါတယ်။

“ပေါက်ပင်ကိုအရင်ရှို့တာ၊ ပေါက်ပင်ပြီးမှ နဂါးတွင်း၊ ဒေသခံတွေဖမ်းဆီးတာကိုတော့မကြားဘူး။ ပေါက်ပင်ကိုမီးရှို့နေချိန် ထိတွေ့တိုက်ပွဲဖြစ်သေးတယ်။ နောက်တကြောင်းက ဆည်ကြီးတောဘက်လည်း ရှို့တယ်။ မီးခိုးလုံးတွေမြင်ရတယ်”လို့ မုံရွာမြို့နယ်ပကဖ တာဝန်ရှိသူကပြောပါတယ်။

မီးရှို့ခံရလို့ နဂါးတွင်းကျေးရွာက အိမ်ခြေ ၅၀ လုံး၊ ပေါက်ပင်ကျေးရွာက အိမ်ခြေ ၄၀ ကျော်မီးလောင်ပျက်စီးခဲ့ပြီး ဆည်တောကြီးကျေးရွာမီးရှို့မှုမှာတော့ အပျက်အစီးမသိရသေးဘူးလို့ ဆိုပါတယ်။

ရွာတွေကိုမီးရှို့ခဲ့တဲ့ စစ်ကြောင်း ၂ ကြောင်းစလုံးဟာ ညနေ ၅ နာရီမှာ မုံရွာမြို့ပေါ်ကို ပြန်ဆုတ်သွားတယ်လို့ သိရပါတယ်။

စစ်ကော်မရှင်ဘက်စစ်ကြောင်းထိုးလို့ အိမ်ခြေ ၅၀၀ ကနေ ၁,၀၀၀ ကြားရှိတဲ့ ပေါက်ပင်၊ နဂါးတွင်း၊ ဆည်တော်ကြီး၊ အောင်ကန်သာကျေးရွာတွေက ဒေသခံပြည်သူ ၅,၀၀၀ ကျော်လည်းထွက်ပြေးခဲ့ရပြီး စစ်ကြောင်းပြန်ဆုတ်ချိန်မှာတော့ ရွာခံတွေ ကျေးရွာထဲပြန်လာနေပြီလို့ သိရပါတယ်။

နိုဝင်ဘာ ၇ ရက်ကလည်း မုံရွာမြို့နယ်၊ ကျပိုင်ကျေးရွာလမ်းဆုံအနီးမှာ ဆိုင်ကယ် စီးလာတဲ့ အမျိုးသား ၄ ဦးပစ်ခံရပြီး ၃ ဦးသေဆုံးကာ ပစ်ခတ်မှုအတွင်းအနီးအနားနေပြည်သူ ၁ ဦးပါဒဏ်ရာရတယ်လို့ သိရပါတယ်။

စာတည်း – လင်း

မြေလတ်အသံ၊ နိုဝင်ဘာ၂၃၊ ၂၀၂၅။

စစ်ကိုင်းတိုင်း၊ မုံရွာမြို့နယ်က ကျေးရွာ ၂ ရွာကြားကို စစ်ကော်မရှင်တပ်က ဂျိုင်ရိုကော်ပတာ (Gyrocopter) နဲ့ဗုံးကြဲတိုက်ခိုက်ခဲ့တာကြောင့် ကလေးငယ် ၂ ဦးအပါအဝင် ၃ ဦး သေဆုံးခဲ့တယ်လို့ ဒေသခံတွေဆီက သိရပါတယ်။

အနောက်မြောက်တိုင်းစစ်ဌာနချုပ် – နမခ ဘက်ကတက်လာတဲ့ ဂျိုင်ရိုကော်ပတာ ၃ စီးက ရတုံရွာနဲ့ ဘူးတောင်းကန်ရွာအကြားရှိ တဲဆောင် ၁ ခုကို နိုဝင်ဘာ ၂၂ ရက်မနက် ၁၀ နာရီကျော်မှာ ဗုံးကြဲတိုက်ခိုက်ခဲ့ရာမှာ သေဆုံးခဲ့ကြတာလို့ဆိုပါတယ်။

“ရတုံရွာနဲ့ ဘူးတောင်ကန်ရွာကြားက တောတဲ။ တောတဲဆိုတာ လယ်စောင့်တဲပုံစံပေါ့။ တောထဲက ယာခင်းစောင့်တဲဆိုတော့ စိုက်ပျိုးရေးလုပ်ပြီး ခဏနားချိန်ပါကြဲခံရတာ။ ဒဏ်ရာရသူမရှိ။ ပျက်စီးမှုကတော့ တဲ ၁ လုံး။ ဂျိုင်ရိုကော်ပတာ ၃ စီနဲ့ကြဲတယ်။ မကြဲခင် နမခက ၁၂၀ ၃ လုံးပစ်တယ်”လို့ မုံရွာဒေသခံ အမျိုးသားတဦးက ပြောပါတယ်။

ဗုံးစထိမှန်တာကြောင့် သေဆုံးခဲ့သူတွေဟာ ဘူးတောင်းကန်ရွာခံတွေဖြစ်တဲ့ ၈ နှစ်အရွယ် မအိရွှေရည်ဖြိုး၊ ၅ နှစ်အရွယ် မောင်ဟိန်းထက်နဲ့ ၃၀ နှစ်အရွယ် ကိုအောင်စိုးထွေးတို့ဖြစ်ပြီး ၎င်းတို့ ၃ ဦးဟာ တူဝရီးတော်စပ်ကြတယ်လို့ ဆိုပါတယ်။

အဆိုပါမိသားစု ၃ ဦးဟာ ဘူးတောင်းကန်ကျေးရွာကို စစ်ကော်မရှင်တပ်ကမီးရှို့ဖျက်ဆီးခဲ့တဲ့ ၂၀၂၄ ဖေဖော်ဝါရီကစလို့ ကျေးရွာကတိမ်းရှောင်ကာ ကျေးရွာ၂ ရွာကြားရှိတောထဲမှာ စိုက်ပျိုးရေး လုပ်ကိုင်ရင်း နေထိုင်ကြတာလို့လည်း အထက်ပါအမျိုးသားပြောပါတယ်။

သေဆုံးသူတွေရဲ့ရုပ်အလောင်းတွေကို ဘူးတောင်းကန်ကျေးရွာသားတွေက နိုဝင်ဘာ ၂၂ ရက်နေ့လယ် ၃ နာရီကျော်မှာ မီးသင်္ဂြိုဟ်ပေးခဲ့ကြတယ်လို့ သိရပါတယ်။

ပြီးခဲ့တဲ့အောက်တိုဘာလ ၆ ရက်ည (သီတင်းကျွတ်လပြည့်ည) ကလည်း မုံရွာမြို့နယ်နဲ့ ချောင်းဦးမြို့နယ်အစပ်ရှိ ဗုံတိုရွာမှာ ဆီမီးသပိတ်ပြုလုပ်နေချိန် စစ်ကော်မရှင်တပ်က ဗုံးကြဲတိုက်ခိုက်ခဲ့တာကြောင့် ဒေသခံ ၂၀ ဦးကျော်သေဆုံးခဲ့ပြီး ၄၀ ကျော်ထိခိုက် ဒဏ်ရာရရှိခဲ့တယ်လို့ သိရသည်။

စာတည်း – လင်း

မုံရွာ၊ နိုဝင်ဘာ ၁၈၊ ၂၀၂၅။

စစ်ကိုင်းတိုင်း၊ မုံရွာမြို့၊ စက်မှုဇုံ၊ ထန်းတောရပ်ကွက်၊ ကန်ပတ်လမ်းနေ လူငယ် ၁ ဦးကို PDF လို့ ဆိုကာ နေအိမ်အတွင်းဝင်ရောက်ဖမ်းဆီးသွားတယ်လို့ အဆိုပါရပ်ကွက်အတွင်းနေထိုင်သူတွေဆီက သိရပါတယ်။

ဖမ်းဆီးခံရသူဟာ အသက် ၁၉ နှစ်အရွယ် ကိုပြည့်စုံဆိုသူဖြစ်ပြီး နိုဝင်ဘာ ၁၈ ရက်မနက် ၂ နာရီခန့်မှ စစ်ကော်မရှင်နဲ့ရဲအင်အား ၂၀ ခန့်နေအိမ်အတွင်းထိ ဝင်ရောက်ဖမ်းဆီးသွားတယ်လို့ ဆိုပါတယ်။

“နာမည်အတိအကျနဲ့ မနေ့ညက အိမ်ထောင်စု သန်းခေါင်စာရင်းဝင်စစ်တာ။ အတိအကျနဲ့ အဲ့ အိမ်တအိမ်ထဲကို ခြေလျင်လာခဲ့ပြီးမှဖမ်းခေါ်သွားတာ။ အိမ်ထဲထိဝင်ရှာတာ။ အိမ်ရှင်တွေလည်းမနိုးဘူး သူတို့ဟာသူတို့ တံခါးတွေဖွင့် အိမ်ပတ်ပတ်လည်ဝိုင်းထားပြီး ဖမ်းသွားတာ”လို့ ရပ်ကွက်နေသူတဦးက ပြောပါတယ်။

ဖမ်းဆီးခံရသူလူငယ်မှာ အိမ်ထောင်ရှိပြီး သံပန်းသံခါးလုပ်ငန်းမှာလုပ်ကိုင်နေသူဖြစ်ကာ PDF တွေနဲ့ပတ်သက်မှုရှိ၊ မရှိတော့မသိရဘူးလို့ ဆိုပါတယ်။

လက်ရှိမှာတော့ ကိုပြည့်စုံကို စစ်ကော်မရှင်အဖွဲ့တွေက စက်မှုဇုံရှိ ရွာထောင်တောရကျောင်းမှာ ဖမ်းဆီးထားပြီးစစ်ဆေးမှုတွေပြုလုပ်နေတယ်လို့ သိရပါတယ်။

ဒါ့အပြင် ရွာထောင်တောရကျောင်းထဲမှာ ကိုပြည့်စုံအပြင် စစ်မှုထမ်းအပါအဝင် နည်းပေါင်းစုံနဲ့ ဖမ်းဆီးခံထားရတဲ့ အမျိုးသား ၃၀ ကျော်လောက်ရှိနေတယ်လို့လည်း သိရကြောင်း အထက်ပါရပ်ကွက်နေသူက ပြောပါတယ်။

မုံရွာမြို့ပေါ်မှာ စစ်ကော်မရှင်အဖွဲ့တွေက နေ့စဉ်ညနေပိုင်းတွေမှာ စစ်ကား၊ အိမ်စီးကားတွေနဲ့ ကင်းပတ်ပြီး အလုပ်ပြန်တဲ့သူတွေကိုဖမ်းဆီးမှုတွေပြုလျှက်ရှိနေတယ်လို့လည်း သိရပါတယ်။

၂၀၂၁၊ စစ်အာဏာသိမ်းချိန်ကနေ ၂၀၂၅၊ နိုဝင်ဘာ ၁၇ ရက်အထိ စစ်ကော်မရှင်နဲ့ လက်အောက်ခံအဖွဲ့အစည်းတွေကြောင့် ဖမ်းဆီးခံရတဲ့ဒေသခံပြည်သူ စုစုပေါင်း ၂၉,၉၇၇ ဦးရှိခဲ့ပြီး အဲ့ဒီထဲက ၂၂,၆၅၈ ဦးကထိန်းသိမ်းခံထားရဆဲဖြစ်တယ်လို့ နိုင်ငံရေးအကျဥ်းသားများ ကူညီစောင့်ရှောက်ရေးအသင်း – AAPP ရဲ့စာရင်းအရ သိရပါတယ်။

စာတည်း – လင်း