မြင်းမူ

မကွေး၊ မေ ၂၃၊ ၂၀၂၃။

အညာဒေသက ပြည်သူတွေရဲ့ နေအိမ်တွေကို စစ်ကောင်စီက မီးရှို့ဖျက်ဆီးသွားခဲ့ရာမှာ မှတ်ပုံတင်နဲ့ သန်းခေါင်စာရင်းတွေပါ မီးထဲလောင်ကျွမ်းပျောက်ဆုံးခဲ့တာကြောင့် မိုဘိုင်းဆက်သွယ်ရေးကုမ္ပဏီတွေက ဖုန်းဆင်းကဒ်တွေကို မှတ်ပုံတင်ဖို့ အကြောင်းကြားလာတဲ့အခါမှာ မှတ်ပုံတင်ဖို့ အခက်ဖြစ်နေတယ်လို့ ဒေသခံတွေက ဆိုပါတယ်။

မိုဘိုင်းဆက်သွယ်ရေး ကုမ္ပဏီတွေဖြစ်ကြတဲ့ MPT ၊ Atom ၊ Ooredoo ကုမ္ပဏီကနေ မေလ ၂၇ ရက်နောက်ဆုံး ထားပြီး ဖုန်းဆင်းကဒ်တွေကို ပြန်လည်မှတ်ပုံတင်ခိုင်းနေတာမှာ ပြည်သူတွေ အခက်ကြုံနေရတာဖြစ်တယ်လို့ စစ်ကိုင်းတိုင်း မြင်းမူမြို့နယ်က ဒေသခံတွေကဆိုပါတယ်။

“တချို့ပြည်သူတွေဆိုရင် စစ်ကြောင်းလာရင် ထွက်ပြေးကြရတယ်။ ပြေးရင်း စကစတွေနဲ့တွေ့လို့ သူတို့ရဲ့ အထုပ်လေးတွေကို လုယူသွားတဲ့အခါ မှတ်ပုံတင်တွေပါ ပါသွားကြတာ။ နောက်ပြီး မီးရှို့လို့ နေအိမ်တွေ မီးလောင်တဲ့အထဲမှာ မှတ်ပုံတင်တွေ၊ အိမ်ထောင်စုစာရင်းတွေနဲ့ အခြားအရေးကြီး စာရွက်စာတမ်းတွေပါ ပါကုန်တယ်။ ဘယ်လိုဆက်လုပ်ရမလဲဆိုတာတော့မသိတော့ပါဘူး” မြင်းမူမြို့နယ်က ဒေသခံတဦးက ဆိုပါတယ်။

ပြီးခဲ့တဲ့ ဧပြီလက စတင်ပြီး Atom ဆက်သွယ်ရေးကုမ္ပဏီကနေ ဖုန်းဆင်းကဒ်တွေ မှတ်ပုံတင်ဖို့ အကြောင်းကြား စာတွေကို Message ကနေတဆင့်အကြောင်းကြားခဲ့တာဖြစ်ပါတယ်။ ဒါပေမဲ့ ဒေသခံတွေအနေနဲ့ ဆင်းကဒ် မှတ်ပုံတင်ဖို့အဆင်မပြေနိုင်တဲ့အတွက် ဆက်သွယ်ရေးတွေ ပြတ်တောက်ပြီး တခြားစီးပွားရေးလုပ်ငန်းတွေပါ ထိခိုက်လာမှာကို စိုးရိမ်နေတယ်လို့ မြင်းမူမြို့ခံတွေက ဆိုပါတယ်။

စာတည်း – လင်းဇေ

စစ်ကိုင်း၊ မတ် ၃၀၊ ၂၀၂၃။

စစ်ကိုင်းတိုင်း၊ မြင်းမူမြို့နယ်မှာ PDFတွေရဲ့ တိုက်ခိုက်တာကိုခံထားရတဲ့ ဘိုးမင်းကျီးကင်းကျေးရွာမှ စစ်ကောင်စီစခန်းကို အင်အားသွားဖြည့်ဖို့လာတဲ့ စစ်ကားတစီး မတ် ၂၉ ရက်ည ၉ နာရီကျော်မှာ မိုင်းဆွဲခံရလို့ ၁၃ ဦး သေဆုံးခဲ့တယ်လို့ PDF တာဝန်ရှိသူက ပြောပါတယ်။

စစ်သည်အင်အား ၄၀ ခန့်ပါတဲ့ သံပြားကာကားတစီးနဲ့ စစ်ကိုင်းမြို့ကနေ ဘိုးမင်းကျီးကင်းစခန်းကို ထွက်ခွာလာချိန် မြင်းမူ-ဝမ်းပြည့်-အလ္လကပ္ပကျေးရွာ ကားလမ်းမကို အရောက်မှာ မိုင်း ၆ ကြိမ်ဆွဲတိုက်ခိုက်ခဲ့တာဖြစ်တယ်လို့ People’s knight Defense Force Myinmu မှ ဗိုလ်အေးချမ်းက ပြောပါတယ်။

“အဲဒီကားကို မြင်းမူနဲ့ဝမ်းပြည့်ကြားမှာ မိုင်း ၂ ကြိမ် ဆွဲတယ်။ ဝမ်းပြည့်နဲ့အလ္လကပ္ပကြားမှာ ၄ ကြိမ်ဆွဲတယ်။ ကားကတော့ စခန်းကို ဆက်မောင်းသွားတယ်။ တိုက်ခိုက်ခံရလို့ ကားပေါ်မှာ အော်ဟစ်ညီးညူသံတွေ ကြားလိုက်ရတယ်။ ကျနော်တို့သတင်းပေးပြောချက်အရ ၁၃ ကောင် ကားပေါ်မှာတင် သေတယ်။ ဒဏ်ရာရတဲ့ အရေအတွက်ကိုတော့ မသိရဘူး။ သူတို့ကို ဒီမနက်မှာ ဆေးရုံကိုတင်ဆောင်သွားကြတယ်” လို့ ဆိုပါတယ်။

ဗိုလ်အေးချမ်းပြောကြားချက်အရ အဲဒီကားပေါ်မှာ စစ်ကောင်စီ ဗိုလ်ကြီးတဦးပါလာပြီး ဘိုးမင်းကျီးကင်းစခန်းမှာ တာဝန်ထမ်းဆောင်ဖို့ လာတဲ့သူဖြစ်ပြီး၊ ဗိုလ်ကြီးရဲ့အသေးစိတ် အချက်အလက်ကိုတော့ မသိရှိရဘူး။

“စခန်းကဗိုလ်နဲ့ အပြောင်းအလဲလုပ်ဖို့ ထွက်လာတာလို့ သိထားရတယ်။ ဗိုလ်ရဲ့နာမည်တွေတော့ မသိဘူး။ ကားတိုက်ခိုက်ခံရတဲ့နောက်ပိုင်းမှာတော့ စကစတွေဘက်က တရစပ် ရမ်းသမ်းပစ်ခတ်ခဲ့တယ်။ ကျနော်တို့ရဲဘော်တွေတော့ အထိအခိုက်မရှိခဲ့ဘူး” လို့ ဆိုပါတယ်။

ဒီတိုက်ခိုက်မှုကိုတော့ People’s knight Defense Force Myinmu (PKDF-MMU) ၊ Dog Killers Defense Force ( DKPDF -MMU) ၊ D.B.B.F-MMU စတဲ့ မဟာမိတ်အဖွဲ့တွေက ပူးပေါင်းလုပ်ဆောင်ခဲ့တာ ဖြစ်ပါတယ်။

ဒါ့အပြင် မတ်လ ၂၈ ရက်နေ့လည်အချိန်မှာလည်း မြင်းမူမြို့နဲ့ ၈ မိုင်ခန့်ဝေးတဲ့ ဘိုးမင်းကျီးကင်းကျေးရွာက စစ်ကောင်စီအထိုင်ချစခန်းကို People ‘s knight Defense Force Myinmu ၊ Black Eagle Defence Force (MMU) ၊ Dog Killers Defense Force ( DKPDF -MMU) ၊D.B.B.F-MMU တို့က ပေ ၃၀၀၀ အကွာကနေ ၆၀ မမနဲ့ ၅ ကြိမ် တိုက်ခိုက်ခဲ့တာကြောင့် ၃ ဦး ဒဏ်ရာပြင်းထန်ရရှိခဲ့တယ်လို့ သိရပါတယ်။

စာတည်း – 007

စစ်ကိုင်း၊ မတ် ၂၉၊ ၂၀၂၃။

စစ်ကိုင်းတိုင်း၊ မြင်းမူမြို့နယ်၊ ဘိုးမင်းကျီးကင်းကျေးရွာမှာ ဝင်ရောက်တပ်စွဲနေတဲ့ စစ်ကောင်စီတပ်သားတွေ မတ်လ ၂၈ ရက်မနေ့ကနေ့လယ် ၂ နာရီဝန်းကျင်မှာ တိုက်ခိုက်ခံရတာကြောင့် ၃ ဦး ဒဏ်ရာပြင်းထန်ရရှိသွားတယ်လို့ သိရပါတယ်။

ခန့်မှန်းခြေအင်အား ၃၀ ကျော်နဲ့ တပ်စွဲထားတဲ့ ကျေးရွာထဲက စစ်ကောင်စီတပ်စခန်းကို ၆၀ မမနဲ့ ၅ ကြိမ်တိုက်ခိုက်ခဲ့တာလို့ People’s knight Defense Force Myinmuမှ ဗိုလ်အေးချမ်းက ပြောပါတယ်။

“ဒီနေ့မှာ စုံစမ်းသိရတာက စကစ ၃ ကောင် ဒဏ်ရာပြင်းပြင်းထန်ထန် ရသွားတယ်တဲ့။ သူတို့ကိုတော့ ဆေးရုံမပို့ဘဲ စခန်းထဲမှာပဲ ကုသနေတယ်လို့ သိရတယ်။ လက်နက်ကြီး ၅ လုံးပစ်တာမှာ ၂ လုံးက ရှုံးသွားတယ်။ ကျန် ၃ လုံးက တော့ စခန်းကို ထိထိမိမိ ကျသွားတာ” လို့ ဆိုပါတယ်။

ပစ်ခတ်တိုက်ခိုက်နေချိန်အတွင်းမှာလည်း ၄၀ မမ တွေနဲ့ ပြန်လည်ပစ်ခတ်ခဲ့ပေမယ့် ကာကွယ်ရေးရဲဘော်တွေ အထိအခိုက်မရှိ ပြန်လည်ဆုတ်ခွာနိုင်ခဲ့တယ်လို့ ဗိုလ်အေးချမ်းက ပြောပါတယ်။

ဒီတိုက်ခိုက်မှုကို People ‘s knight Defense Force Myinmu၊ Black Eagle Defence Force (MMU) ၊ Dog Killers Defense Force ( DKPDF -MMU) ၊ D.B.B.F-MMU တို့က ပူးပေါင်းလုပ်ဆောင်ခဲ့တာ ဖြစ်ပြီး၊ စစ်ကောင်စီဘက်က ထိခိုက်ဒဏ်ရာရသူတွေရဲ့ အခြေအနေကို တပ်တွင်းသတင်းပေးရဲ့ ပြောပြချက်အရ အတည်ပြုနိုင်ခဲ့တာလို့လည်း ဆိုပါတယ်။

အဲ့ဒီစစ်ကောင်စီတပ်သားတွေဟာ ဘိုးမင်းကျီးကင်းကျေးရွာမှာ ပြီးခဲ့တဲ့ ၂၀၂၂ ခုနှစ်၊ ဇွန်လကတည်းက တပ်စွဲနေထိုင်နေတာလည်း ဖြစ်ပါတယ်။

ပြီးခဲ့တဲ့ မတ်လ ၉ ရက်ညပိုင်းမှာလည်း စစ်ကိုင်းဘက်ကနေ မုံရွာဘက်ကို ထွက်ခွာလာတဲ့ စစ်ကောင်စီကား ၁၂ စီးကို အလ္လကပ္ပနဲ့ ဝမ်းပြည့်ကျေးရွာကြားကို အရောက်မှာ ပဒေသာမိုင်း ၅ လုံးတွဲနဲ့ People ‘s knight Defense Force Myinmu အပါအဝင် ပူးပေါင်းအဖွဲ့တွေက တိုက်ခိုက်ခဲ့တာကြောင့် စစ်ကားပျက်စီးမှုတွေ ရှိခဲ့ပါသေးတယ်။

စာတည်း – လင်း

မြင်းမူ၊ မတ် ၂၃၊ ၂၀၂၃။

စစ်ကိုင်းတိုင်း၊ မြင်းမူမြို့နယ်၊ အလ္လကပ္ပကျေးရွာက ဒေသခံ ၇ ဦးကို စစ်ကောင်စီတပ်သားတွေက မတ်လ ၂၃ ရက်ဒီမနက်ပိုင်းမှာ ဖမ်းဆီးသွားတယ်လို့ ဒေသခံတွေဆီက သိရပါတယ်။

အဖမ်းခံရသူတွေမှာ အမျိုးသား ၅ ဦးနဲ့ အမျိုးသမီး ၂ ဦးတို့ဖြစ်ပြီး၊ ရွာထဲရောက်နေတဲ့ စစ်ကောင်စီတပ်သားတွေက ဖမ်းဆီးသွားတာလို့ ဒေသခံအမျိုးသားတဦးက ပြောပါတယ်။

“အဖမ်းခံရသူတွေက တောသူ၊တောင်သားတွေပါ။ စကစတွေနဲ့တွေ့လို့ ဖမ်းဆီးခံလိုက်ရတာ။ အဖမ်းခံရသူတွေရဲ့ နာမည်တွေ၊အသက်တွေ မသိရသေးဘူး။ စကစတွေက ရွာထဲမှာပဲ ရှိနေသေးတယ်။ ပြန်မထွက်ကြသေးဘူး” လို့ ဆိုပါတယ်။

မြင်းမူမြို့ပေါ်ကနေ အင်အား ၃၀ ကျော်ပါတဲ့ စစ်ကောင်စီစစ်ကြောင်းတခုဟာ ဒီမနက် ၄ နာရီလောက်က အလ္လကပ္ပရွာထဲကို တိတ်တဆိတ်ဝင်ရောက်လာချိန် ဒေသခံတွေ အဖမ်းခံလိုက်ရတာလို့ သူကဆက်ပြောပါတယ်။

“သတင်းပေးလို့ အဖမ်းခံရတာတော့ မဟုတ်ဘူး။ စကစတွေက ဒီပတ်ဝန်းကျင်မှာ မိုင်းရှင်းလင်းရေးလုပ်နေတယ်လို့ သိထားရတယ်။ ရွာထဲကိုဝင်လာခဲ့တာကတော့ ဘာကြောင့်လဲဆို တာ မသိဘူး။ ရွာကလူတွေအများစုကတော့ ထွက်ပြေးတိမ်းရှောင်နေရတာ ကြာပြီ” လို့ ဆိုပါတယ်။

ဒါ့အပြင် ဖမ်းဆီးထားတဲ့ အမျိုးသား ၅ ဦးနဲ့ အမျိုးသမီး ၂ ဦးတို့ကို စစ်ကောင်စီတပ်သားတွေက ရွာရဲ့ဘုန်းတော်ကြီးကျောင်းထဲမှာ ချုပ်နှောင်ထားပြီး၊ ဒီနေ့လည်အချိန်ထိ ပြန်မလွတ်လာကြသေးဘူးလို့ သိရပါတယ်။

ပြီးခဲ့တဲ့ မတ်လ ၅ ရက်မှာလည်း အင်အား ၁၀၀ ကျော်ပါတဲ့ စစ်ကောင်စီစစ်ကြောင်းတခုဟာ လက္ကပင်ကျေးရွာကိုဝင်ရောက်ပြီး ရွာထဲရှိနေတဲ့ ပြည်ကြီးတံခွန်ဆရာတော် ဦးအဂ္ဂ၊ PDF ရဲဘော် ၅ ဦးနဲ့ ရွာခံအမျိုးသား ၄ ဦးတို့ကို ဖမ်းဆီးပြီး၊ အဲဒီထဲက PDF ရဲဘော် ၅ ဦးကို သတ်ဖြတ်ကာ အလောင်းတွေကို မြစ်ထဲမျောခဲ့ကြတယ်လို့ သိရပါတယ်။

အဲ့ဒီနောက် ဆရာတော်ဦးအဂ္ဂကို စစ်ကောင်စီတပ်သားတွေက တပ်မ ၃၃ ထဲကို ခေါ်ဆောင်သွားခဲ့တယ်လို့ သိရှိရပြီး၊ ရွာခံသား ၄ ဦးကိုတော့ ဒီနေ့အချိန်အထိ သတင်းအစအန လုံးဝမရရှိကြသေးဘူးလို့ ဒေသခံတွေက ပြောပါတယ်။

စာတည်း – လင်း

မြင်းမူ၊ မတ် ၁၃၊ ၂၀၂၃။

စစ်ကိုင်းတိုင်း၊ မြင်းမူမြို့နယ်၊ လက္ကပင်ကျေးရွာထဲမှာ စစ်ကောင်စီတပ်သားတွေရဲ့ဖမ်းဆီးတာကို ခံလိုက်ရတဲ့ ပြည်ကြီးတံခွန်ဆရာတော်ဦးအဂ္ဂ မှာ တပ်မ(၃၃)ထဲ စစ်ကြောရေးခံနေရပြီး ရွာခံသား ၄ ဦးမှာ သတင်းအစအနမရဘဲ ပျောက်ဆုံးနေဆဲ ဖြစ်တယ်လို့ သိရပါတယ်။

ပျောက်ဆုံးနေတဲ့ လက္ကပင်ရွာခံသား ၄ ဦးမှာ ကိုစိုးတေ (၁၇နှစ်)၊ မင်းမင်းထက် (၃၀နှစ်)၊ ကိုရဲလင်း (၃၀နှစ်)၊ ဖိုးထောင် (၅၃နှစ်) တို့ဖြစ်ပြီး သူတို့ဟာ သတင်းမရဘဲ ပျောက်ဆုံးနေတာ ဒီကနေ့နဲ့ဆို ၉ ရက်ရှိပြီ ဖြစ်တယ်လို့ မြင်းမူအခြေစိုက် Knight Commanders PDF မှ တာဝန်ခံ ဘယ်သန်ကြီးက ပြောပါတယ်။

“ဆရာတော်ကို လူဝတ်လဲပြီးတော့ ဖမ်းသွားတာ။ ဒီနေ့အချိန်ထိတော့ အသက်ရှင်ပြီး စစ်ကြောရေးခံနေရတယ်လို့ သတင်းအတိအကျ ရထားတယ်။ ဒေသခံ ၄ ယောက်ကိုတော့ ဘာမှသတင်းမရဘူး။ သေပြီလား ဆိုတာလည်း မသိရသေးဘူး” လို့ ဆိုပါတယ်။

ပြီးခဲ့တဲ့ မတ်လ ၅ ရက်နေ့က အင်အား ၁၀၀ ကျော်ပါတဲ့ စစ်ကောင်စီစစ်ကြောင်း တခုဟာ လက္ကပင်ကျေးရွာကို ဝင်ရောက်လာပြီး ဆရာတော် ဦးအဂ္ဂ၊ PDF ရဲဘော် ၅ ဦး၊ ရွာခံအမျိုးသား ၄ ဦးတို့ကို ဖမ်းဆီးပြီးနောက် အဲဒီထဲက PDF ရဲဘော် ၅ ဦးကို သတ်ဖြတ်ပြီး အလောင်းတွေကို မြစ်ထဲမျောခဲ့ကြတယ်လို့ သိရပါတယ်။

ပြည်ကြီးတံခွန်ဆရာတော် ဦးအဂ္ဂမှာ အာဏာသိမ်းပြီးချိန်မှစတင်ပြီး အာဏာရှင်ကို ရရာနေရာက ဦးဆောင်တော်လှန်နေပြီး၊ စစ်ကောင်စီနဲ့ ပျူစောထီးတပ်ဖွဲ့တို့ရဲ့ ဖျက်ဆီးခံရတဲ့ ပြည်သူတွေရဲ့ ဒုက္ခဆင်းရဲအပူကို အေးမြသောမေတ္တာ စာနာသောကရုဏာနှလုံးသား ရဲရင့်သောသတ္တိတို့နဲ့ ဦးဆောင်ဦးရွက်ပြုကာ ပြည်သူကို ကျေးဇူးပြုနေသော တော်လှန်ရဟန်းတော်တပါး ဖြစ်တယ်လို့ သံဃသမဂ္ဂ (မန္တလေး)မှ ထုတ်ပြန်ထားပါတယ်။

ပြည်သူကို ကျေးဇူးပြုကာ မတရားမှုကို အစွမ်းကုန် တော်လှန်သော ပြည်ကြီးတံခွန်ဆရာတော် ဦးအဂ္ဂရဲ့ အသက်အန္တရာယ်ဖြစ်ပေါ်ခဲ့ပါက စစ်ကောင်စီတပ်အနေနဲ့ ရာနှုန်းပြည့် တာဝန်ရှိပြီး တာဝန်ခံရမည်ဖြစ်တယ်လို့ ထုတ်ပြန်ချက်မှာ ဖော်ပြထားပါတယ်။

စာတည်း – 007

မြင်းမူ၊ မတ် ၉၊ ၂၀၂၃။

စစ်ကိုင်းတိုင်း၊ မြင်းမူမြို့နယ်၊ လက္ကပင်ကျေးရွာက ဒေသခံအမျိုးသား ၅ ဦးကို စစ်ကောင်စီတပ်က သတ်ဖြတ်ခဲ့ပြီး ၇ ဦးကို လူသားဒိုင်းအဖြစ် ဖမ်းဆီးခေါ်ဆောင်သွားတယ်လို့ ဒေသခံတွေဆီက သိရပါတယ်။

အဲ့ဒီရွာကို စစ်ကောင်စီတပ်က မတ်လ ၅ ရက်နေ့က ဝင်ရောက်စီးနင်းကာ ဒေသခံ ၂၀၀ ဝန်းကျင်လောက်ကို ဖမ်းဆီးထားပြီး ၂ ရက်ကြာ တပ်စွဲခဲ့ပြီးတဲ့နောက် စစ်ကြောင်း ပြန်လည်ထွက်ခွာချိန် မတ်လ ၇ ရက်နေ့ မနက်ပိုင်းမှာ တခြားဒေသကနေ စစ်လာရှောင်တဲ့အမျိုးသား ၅ ဦးကို သတ်ဖြတ်သွားတာလို့ ဆိုပါတယ်။

“အသတ်ခံရသူတွေက လက္ကပင်မှာ လာရောက် ခိုလှုံနေကြတဲ့သူတွေပါ။ သူတို့ရဲ့ကိုယ်ရေးအချက်အလက်ကို မသိရသေးဘူး။ သတ်ပြီးတော့ မြစ်ရေထဲ မျောချခဲ့ကြတာကြောင့် မြစ်အနီးအနားမှာရှိတဲ့ ရွာတွေက ဆယ်ပြီး မီးသင်္ဂြိုဟ်ပေးခဲ့ရတယ်။ ဓားစာခံအဖြစ် ခေါ်ခံရတဲ့သူတွေကတော့ ရွာခံသားတွေပါ။ အိမ်တွေကိုတော့ မီးရှို့ခဲ့တာမရှိဘူး။ သူတို့သတင်းရလို့ ဖြိုဖျက်ခဲ့တဲ့ အိမ်တချို့တော့ ရှိခဲ့တယ်” လို့ မြင်းမူအခြေစိုက် Knight Commanders PDF တာဝန်ခံ ဘယ်သန်ကြီးက မြေလတ်အသံကို ပြောပါတယ်။

အဲ့ဒီစစ်ကောင်စီတပ်ဟာ စစ်ကိုင်းမြို့နယ်၊ တာတိုင်ရွာက ဒေသခံ ၁၆ ဦးနဲ့ ပကဖခေါင်းဆောင်တို့ကို သတ်ဖြတ်သွားတဲ့ အင်အား ၁၀၀ ခန့်ပါ တပ်မ ၉၉ လက်အောက်ခံတပ်ရင်းတွေရဲ့စစ်ကြောင်းဖြစ်ပြီး လက်ရှိမှာအလ္လကပ္ပရွာမှာ ရောက်ရှိတပ်စွဲနေတယ်လို့ သူက ဆက်ပြောပါတယ်။

“တာတိုင်ရွာဒေသခံတွေကို သတ်ခဲ့တဲ့ စစ်ကြောင်းပဲ။ အဲ့ဒီကနေ လက္ကပင်ရွာကိုဝင်တာ ၂ ညအိပ်ပြီးတော့ ကျော်မည်းရွာကိုဝင်ပြီး တညအိပ်တယ်။ အဲ့ကနေ အလ္လကပ္ပရွာကို ဝင်ပြီးတော့ ဒီနေ့အထိ တပ်စွဲနေတယ်” လို့ ပြောပါတယ်။

လူသားဒိုင်းအဖြစ် ခေါ်ဆောင်သွားခံရတဲ့ လက္ကပင်ရွာဒေသခံ အမျိုးသား ၇ ဦးနဲ့ပတ်သက်ပြီး စုံစမ်းသိရှိရတာမျိုး မရှိသေးဘဲ အဆက်အသွယ် ပြတ်တောက်နေတယ်လို့ ဆိုပါတယ်။

လက္ကပင်ကျေးရွာမှာ အိမ်ခြေ ၃၀၀ ကျော်ရှိတဲ့ရွာ ဖြစ်ပြီး ကျေးရွာဘုန်းတော်ကြီးကျောင်းမှာ စစ်ကောင်စီတပ် မီးရှို့တာ ခံထားရတဲ့ တခြားကျေးရွာက ဒေသခံတွေ လာရောက်ခိုလှုံနေကြတယ်လို့ ဒေသခံတွေက‌ ပြောပါတယ်။

စာတည်း – ရင်ငြိမ်း

မြင်းမူ၊ မတ် ၈၊ ၂၀၂၃။

စစ်ကိုင်းတိုင်း၊ မြင်းမူမြို့နယ်နဲ့ မုံရွာမြို့နယ်အတွင်းရှိ စစ်ကောင်စီတပ်သားတွေနဲ့ ပျူစောထီးတွေကို သက်ဆိုင်ရာ ဒေသကာကွယ်ရေးတပ်တွေက မတ်လ ၆ ရက်နဲ့ ၇ ရက်မှာ တိုက်ခိုက်ခဲ့တာကြောင့် စစ်သားသေဆုံးမှုတွေ ရှိခဲ့တယ်လို့ သိရပါတယ်။

မြင်းမူမြို့၊ အထက ၁ ကျောင်းဝန်းထဲမှာ တပ်စွဲနေတဲ့ စစ်ကောင်စီတပ်တွေကို မတ်လ ၇ ရက် နေ့လယ် ၁၁ နာရီ ၅၀ မိနစ်လောက်မှာ ဗုံးခွဲတိုက်ခိုက်ခဲ့ရာ စစ်သား ၂ ဦး သေဆုံးခဲ့တယ်လို့ True Fighte မြို့ပြပြောက်ကျားတပ်ဖွဲ့မှ ဗိုလ်စွန်ရဲက ပြောပါတယ်။

“အင်အားက အယောက် ၂၅ ယောက်ရှိတာ။ သူတို့က ကျောင်းဝန်းထဲမှာ ထမင်းစားနေကြတာ။ ထမင်းစားပြီးတဲ့ **၅ ကောင်က ပန်းကန်ဆေးဖို့ ၇ တန်းကျောင်းဆောင်ဘက်ကို ထွက်လာချိန် လျက်ဆားပုလင်း(ဗုံး)နဲ့ ပစ်ခတ်ခဲ့တာ။ **တွေရဲ့အနီးနားကို ကျတယ်။ ၂ ကောင်ကျတယ်။ ၃ ကောင် ဒဏ်ရာ အပြင်းအထန်ရတယ်” လို့ ပြောပါတယ်။

အဲ့ဒီစစ်သားတွေဟာ စစ်ကိုင်းအခြေစိုက် တမခ ၃၃ က စစ်သားတွေ ဖြစ်နိုင်တယ်လို့ ကာကွယ်ရေးရဲဘော်တွေက ခန့်မှန်းထားပြီး၊ ဗုံးနဲ့ပစ်ခတ်ပြီးနောက် ပြန်လည်ပစ်ခတ်တာတွေလည်း လုပ်ခဲ့တယ်လို့ သိရပါတယ်။

ဒါ့အပြင် မုံရွာမြို့နယ်၊ တောပုရွာအနီး ကင်းပတ်နေတဲ့စစ်သားနဲ့ ပျူစောထီးတွေကိုလည်း မတ်လ ၆ ရက်မနက် ၇ နာရီလောက်မှာ Monywa Local Revolution Union ရဲ့ တပ်ခွဲ ၂ Brave Heart Army – BHA အဖွဲ့နဲ့ ပူးပေါင်းအဖွဲ့တွေက မိုင်းဆွဲတိုက်ခိုက်ခဲ့ပါတယ်။

အင်အား ၃၀ နဲ့ ကင်းလှည့်နေချိန် တောပုရွာအနီးမှာပဲ ပဒေသာမိုင်း ၅ လုံးနဲ့ တိုက်ခိုက်ခဲ့ရာ ပျူစောထီး ၄ ဦး သေဆုံးခဲ့တယ်လို့ Brave Heart Army – BHA အဖွဲ့မှ ပြန်ကြားရေးတာဝန်ခံ မပိုးပိုးက ပြောပါတယ်။

“သူတို့ရွာနားက စပါးခင်းတွေကို စစ်သားအချို့ရယ်၊ ရဲရယ် ပါသလို ပျူစောထီးတွေကလည်း စစ်ယူနီဖောင်းနဲ့ ကင်းပတ်နေတာ။ မိုင်းမိသွားလို့ လက်နက်ငယ်တွေ၊ လက်နက်ကြီးတွေနဲ့ ပြန်လှန်ပစ်တာမျိုးတွေ လုပ်တယ်” လို့ ပြောပါတယ်။

ပွိုင့် ၁ နေရာတည်းမှာတင် မိုင်း ၅ လုံးဆင်တိုက်ခိုက်ခဲ့တာကြောင့် ပျူစောထီး ၃ ဦးက နေရာတင် သေဆုံးခဲ့ပြီး ကျန် ၁ ဦးတော့ ဆေးကုနေချိန်ကျမှ သေဆုံးခဲ့တာလို့ မပိုးပိုးက ဆက်ပြောပြပါတယ်။

အဲဒီတိုက်ခိုက်မှုကို BHA ရဲဘော်တွေက ဦးဆောင်ပြီး၊ MLRU တပ်ခွဲ ၁၊ တပ်ခွဲ ၃ ရဲဘော်တွေနဲ့ ပူးပေါင်းလုပ်ဆောင်ခဲ့တယ်လို့လည်း ဆိုပါတယ်။

အထက်ပါ တိုက်ခိုက်မှုတွေအတွက် စစ်ကောင်စီဘက်က ထိခိုက်သေဆုံးမှုတွေနဲ့ ပတ်သက်ပြီး မြေလတ်အသံက သီးခြားအတည်ပြုနိုင်သေးပါဘူး။

ပြီးခဲ့တဲ့ ဖေဖေါ်ဝါရီလ ၂၇ ရက် နေ့လယ်ကလည်း Brave Heart ဟာ မုံရွာမြို့၊ ကွက်သစ်ရပ်ကွက်က စစ်မှုထမ်းဟောင်း ဒုတပ်ကြပ်သန်းနိုင် ဆိုသူကို မုံရွာလွှတ်တော်နဲ့ နမခကြားမှာ ၉ မမ နဲ့ ၂ ချက် ပစ်ခတ်ရှင်းလင်းခဲ့ပါသေးတယ်။

လက်ရှိမှာ စစ်ကိုင်းအတွင်းက ရွှေဘို၊ မုံရွာ၊ ခင်ဦး၊ ရေဦး၊ မြင်းမူ၊ ဒီပဲယင်း၊ ဝက်လက် စတဲ့မြို့နယ်တွေမှာ စစ်ကောင်တပ်တွေက စစ်ကြောင်းထိုး တိုက်ခိုက်မှုတွေနဲ့ နေအိမ်မီးရှို့တာတွေကို ဆက်တိုက်ဆိုသလို လုပ်ဆောင်နေသလို ကာကွယ်ရေးတပ်တွေနဲ့ ထိတွေ့တိုက်ခိုက်မှုတွေဟာလည်း ခပ်စိတ်စိတ် ဖြစ်ပွားလျှက် ရှိနေပါတယ်။

စာတည်း – လင်း