မြင်းမူ

မြင်းမူ၊ မတ် ၃၊ ၂၀၂၃။

စစ်ကိုင်းတိုင်း၊ မြင်းမူမြို့ကနေလာတဲ့ စစ်ကောင်စီစစ်ကြောင်းကို မြင်းမူမြို့နဲ့ ပုလဲတန်ရွာကြားမှာ မိုင်းဖောက်ခွဲတိုက်ခိုက်ခံရလို့ စစ်သား ၃ ဦး သေဆုံးပြီး ၄ ဦး ထိခိုက်ဒဏ်ရာရရှိသွားတယ်လို့ Dog Killers People’s Defence Force Myinmu တပ်ဖွဲ့က မတ်လ ၂ ရက် မနေ့က သတင်းထုတ်ပြန်လာပါတယ်။

အင်အား ၆၀ နီးပါးရှိတဲ့ စစ်ကောင်စီစစ်ကြောင်းဟာ ပြီးခဲ့တဲ့ ဖေဖော်ဝါရီလ ၂၈ ရက်မှာ အထူးပြုလုပ်ထားတဲ့ မိုင်းဘီးလူးအမည်ရှိ မိုင်းအမျိုးအစားနဲ့ တိုက်ခိုက်ခဲ့တာလို့ Dog Killers People’s Defence Force Myinmu တပ်ဖွဲ့မှ တာဝန်ရှိက မြေလတ်အသံကို ပြောပါတယ်။

“အဲဒီစခတွေက မြင်းမူမြို့နယ်ထဲမှာရှိတဲ့ ရွာသားတွေကို သတ်ဖြတ်တာတွေ၊ မုဒိမ်းကျင့်တာတွေလုပ်ပြီး စစ်ကြောင်းထွက်လာတာပါ။ ကျနော်တို့ကလည်း စစ်ကြောင်းထိုးလာတဲ့ *တွေကို အထူးထုတ် မိုင်းဘီးလူးကြီးတလုံးနဲ့ ဖောက်ခွဲခဲ့တာ။ သူတို့ဘက်က သေဆုံးသွားတဲ့သူ ဒဏ်ရာရသွားတဲ့သူတွေကို ထမ်းလာတာကို ကျနော်တို့မျက်စိနဲ့ မြင်တွေ့ခဲ့ပါတယ်” လို့ ဆိုပါတယ်။

ဒီစစ်ဆင်ရေးကို People’s Army To Fight Dictatorship(PAFD).တပ်ခွဲ DK PDF(MMU)၊ People’s Knight Defense Force Myinmu (PKDF.MMU)၊ မြင်းမူမြို့တိုက်နယ် အနောက်ခြမ်း ပ က ဖ၊ D.B.B.F.MMU မဟာမိတ်အဖွဲ့တွေက ပူးပေါင်းလုပ်ဆောင်ခဲ့တာလည်း ဖြစ်ပါတယ်။

မိုင်းဆွဲပြီးတဲ့နောက်မှာ စစ်ကောင်စီဘက်က လက်နက်ကြီး၊ လက်နက်ငယ်၊ စက်သေနတ်တွေနဲ့ ပြန်လည်ပစ်ခတ်ခဲ့တယ်လို့ သိရပါတယ်။

ပစ်ခတ်မှုကို ဖေဖော်ဝါရီ ၂၈ ရက်မှာ ပြုလုပ်ခဲ့ပေမယ့် နယ်မြေအခြေအနေကြောင့် သတင်းထုတ်ပြန်မှုကို နောက်ဆုတ်လိုက်ရတာလို့လည်း အထက်ပါတာဝန်ရှိသူက ပြောပါတယ်။

တိုက်ခိုက်မှုအတွင်း စစ်သား ၃ ဦး သေဆုံးခဲ့တယ်လို့ မြေပြင်တိုက်ခိုက်ရေးရဲဘော်တွေက ပြောပေမယ့် မြေလတ်အသံက သီးခြားအတည်မပြုနိုင်သေးပါဘူး။

အလားတူ ဖေဖော်ဝါရီလ ၂၇ ရက်ကလည်း DK PDF တပ်ဖွဲ့ဟာ မြင်းမူမြို့၊ စီးပွားရေးဘဏ်မှာ အထိုင်ချတပ်စွဲထားတဲ့ စစ်ကောင်စီတပ်ဖွဲ့ကို လက်နက်ငယ်တွေနဲ့ သွားရောက်ပစ်ခတ်ခဲ့ပါသေးတယ်။

စာတည်း – လင်း

မြင်းမူ၊ ဖေဖော်ဝါရီ ၂‌၇၊ ၂၀၂၃။

စစ်ကိုင်းတိုင်း၊ မြင်းမူမြို့နယ် Zero ပြောက်ကျားတပ်မဟာ တပ်ရင်း ၇-မြင်းခြံခရိုင် စခန်းကို မျက်စိလည် ရောက်လာတဲ့ မုံရွာ နမခ က စစ်ကြောင်းဟာ တိုက်ခိုက်ခံရပြီး ၁၇ ဦး သေဆုံးခဲ့တယ်လို့ အဲဒီတပ်ဖွဲ့ထံက သိရပါတယ်။

ယမန်နေ့ ဖေဖော်ဝါရီလ ၂၆ ရက်နေ့ နံနက်ပိုင်းမှာ လေယာဉ်နဲ့ချသွားတဲ့ အင်အား ၁၀၀ ဝန်းကျင်ရှိ စစ်ကောင်စီစစ်ကြောင်းနဲ့ PDF အဖွဲ့တွေ ထိတွေ့တိုက်ပွဲ ဖြစ်ခဲ့တယ်လို့ Zero ပြောက်ကျားတပ်မဟာ တပ်ရင်း ၇-မြင်းခြံခရိုင် တပ်ရင်းမှူး ဗိုလ်သက်ကြီးက ပြောပါတယ်။

“မနေ့က မြင်းမူမြို့နယ် ညောင်ပင်ကန်ကျေးရွာကနေပြီးတော့ ထိုးလာတဲ့ စစ်ကြောင်းက ကန်တော်ဘက်ကို တည့်တည့်လာတယ်။ မနက် ၉ နာရီလောက်ကတည်း စပြီး‌တော့ ထိတွေ့တိုက်ပွဲ ဖြစ်တယ်။ ည ၇ နာရီခွဲမှာ တိုက်ပွဲပြီးတယ်။ ကျနော်တို့က စခန်းကို ဟပေးလိုက်တာ၊ တိုက်ပွဲက ပြင်းထန်းတယ်။ ရန်သူ့ဘက်က စစ်** ၁၇ ကောင် သေတယ်။ ကျ‌နော်တို့ဘက်က ဆားတောင်မိုးကြိုးအဖွဲ့က ရဲဘော် ၂ ယောက် ကျဆုံးတယ်” လို့ ဗိုလ်သက်ကြီးက ပြောပါတယ်။

Zero ပြောက်ကျားတပ်မဟာ တပ်ရင်း ၇-မြင်းခြံခရိုင် စခန်းက မရွှေ့ပြောင်းနိုင်တဲ့ပစ္စည်း သိန်း ၃၅၀ ဖိုးလောက် ဆုံးရှုံးခဲ့ရပြီး မုံရွာ နမခ စစ်ကြောင်းက ကန်တော်ရွာ ဘုန်းကြီးကျောင်း ၂ ကြောင်းလည်း မီးရှို့သွားတယ်လို့ ဆက်ပြောပါတယ်။

တိုက်ခိုက်မှုကို Zero ပြောက်ကျားတပ်မဟာ တပ်ရင်း ၇-မြင်းခြံခရိုင်၊ တပ်ရင်း ၂ မြင်းခြံခရိုင်၊ ကျောက်ဆည်ခရိုင် တပ်ရင်း ၁၊ စစ်ကိုင်းခရိုင် တပ်ရင်း ၂၊ ဆားတောင်မိုးကြိုးအဖွဲ့၊ နယ်မြေခံအင်အားစုအချို့ နှင့် လက်နက်ကြီးအဖွဲ့အချို့တို့က ပူးပေါင်းတိုက်ခိုက်ခဲ့တာလို့ သိရပါတယ်။

ပြီးခဲ့တဲ့ ဖေဖော်ဝါရီလ ၂၄ ရက်နေ့ကလည်း အရာတော်မြို့နယ်မှာ နေအိမ်တွေကို မီးရှို့နေတဲ့ မုံရွာ နမခ က စစ်ကောင်စီစစ်ကြောင်းနဲ့ Zero ပြောက်ကျားတပ်မဟာ တပ်ရင်း ၇-မြင်းခြံခရိုင်တို့ တိုက်ပွဲဖြစ်ပြီး စစ်သား ၁၀ ဦး သေဆုံးခဲ့တယ်လို့ သိရပါတယ်။

မြင်းမူ၊ ဖေဖော်ဝါရီ ၂‌၆၊ ၂၀၂၃။

စစ်ကိုင်းတိုင်း၊ မြင်းမူမြို့နယ်၊ ပဒတ္တိုင်းကျေးရွာကိုမီးရှို့ပြီးထွက်လာတဲ့ စစ်ကောင်စီတပ်သားတွေ ဖေဖော်ဝါရီလ ၂၅ ရက်မနေ့ကမနက် ၁၀ နာရီလောက်မှာတိုက်ခိုက်ခံရတာကြောင့် ၃ ဦးသေဆုံးခဲ့တယ်လို့ သိရပါတယ်။

အင်အား ၇၀ ကျော်နဲ့ ပဒတ္တိုင်းရွာကိုမီးရှို့ခဲ့တဲ့စစ်ကြောင်းမှာ အရာတော်မြို့နယ်၊ ကန်ရင်းမလဲ သာရွာဘက်ကဖြစ်ပြီး၊ တိုက်ခိုက်မှုအတွင်း စစ်သား ၃ ဦးသေဆုံးခဲ့သလို ၁၅ ဦးလောက်လည်း ထိခိုက်ဒဏ်ရာရရှိနိုင်တယ်လို့ တောင်သာအခြေစိုက် Delta Force Taungtha အဖွဲ့မှ တာဝန်ခံကိုဇင်ယော်က ပြောပါတယ်။

“ကျနော်တို့နဲ့ တိုက်ပွဲဖြစ်တာက ပေ ၁၅၀ အကွာလောက်ပဲရှိတယ်။ ကျနော်တို့က နေရာ ကောင်းကောင်းယူပြီး တိုက်ခိုက်နိုင်ခဲ့တယ်။ တိုက်ပွဲအတွင်းမှာဘဲ စကစ ၃ ကောင်သေတာကို မျက်မြင်တွေ့ခဲ့တယ်။ ၁၅ ကောင်ထက်မနည်းဒဏ်ရာရသေးတယ်လို့တော့ ကင်းထောက်က ပြောတယ်။ ဒါကိုတော့ အတည်မပြုနိုင်သေးဘူး”လို့ ပြောပါတယ်။

အဆိုပါဒဏ်ရာရသွားတဲ့ စစ်ကောင်စီတပ်သားတွေကို စိုင်မြစ်ကျေးရွာမြောက်ဘက်ရှိ တောရပ်ကျောင်းမှာ ဝင်ရောက်ပြီးဆေးကုသခဲ့ကြတယ်လို့ ဆိုပါတယ်။

“တိုက်ပွဲကတော့ မိနစ် ၂၀ လောက်ကြာတယ်။ ကျနော်တို့ကပျောက်ကြားစနစ်နဲ့ တိုက်ခိုက်ခဲ့တာဆိုတော့ ရဲဘော်တွေအထိအခိုက်မရှိခဲ့ဘူး။ တိုက်ပွဲမှာ စကစ ၃ ကောင်သေတာကို ထမ်းစင်နဲ့ သယ်သွားတာကိုတွေ့ခဲ့ရတယ်။ ဒဏ်ရာရတာကိုတော့ အသေးစိတ်အချက်အလက်မသိရသေးဘူး”လို့ တိုက်ခိုက်မှုမှာပါဝင်တဲ့ People Revolution Force Kyaukse ( PRFK)မှ တာဝန်ခံ ကိုစစ်နိုင်ကလည်း အတည်ပြုပြောပါတယ်။

ဒီတိုက်ခိုက်မှုကို တောင်သာအခြေစိုက် Delta Force Taungthaအဖွဲ့နဲ့မဟာမိတ်အဖွဲ့တွေဖြစ်ကြတဲ့ ကျောက်ဆည်တော်လှန်ရေးအင်အားစု(PRFK)၊ မလှိုင်တော်လှန်ရေးအင်အားစုတို့ ပူးပေါင်း လုပ်ဆောင်ခဲ့တာဖြစ်ပါတယ်။

အဲ့ဒီစစ်ကောင်စီစစ်ကြောင်းဟာ ဖေဖော်ဝါရီလ ၂၆ ရက်ဒီကနေ့မှာတော့ ထီးဆောင်းကျေးရွာဘက်ကို ရောက်ရှိနေပြီလို့ ကာကွယ်ရေးရဲဘော်တွေက ပြောပါတယ်။

ပြီးခဲ့တဲ့ဖေဖော်ဝါရီလ ၂၃ ရက်မှာလည်း အရာတော်မြို့နယ်၊ မင်းရွာကြီးမြောက်ရွာထဲ တပ်စွဲထားတဲ့ စစ်ကောင်စီစစ်ကြောင်းနဲ့ တောင်သာ PDF၊ စစ်ကိုင်းခရိုင်တပ်ရင်း ၇တို့အကြား ထိပ်တိုက်တွေ့ဆုံပြီး တိုက်ပွဲဖြစ်ပွားခဲ့ရာ စစ်ကောင်စီတပ်သား ၁၀ ဦးသေဆုံးခဲ့ပါသေးတယ်။

စစ်ကိုင်း၊ ဖေဖော်ဝါရီ ၂၄၊ ၂၀၂၃။

စစ်ကိုင်းတိုင်း၊ စစ်ကိုင်းမြို့အခြေစိုက် အမှတ် ၃၃ ခြေမြန်တပ်မဌာနချုပ် (တမခ ၃၃)ကနေ စစ်သားအင်အားအပြည့်နဲ့ ထွက်ခွာလာတဲ့ ကား ၂ စီးကို ဖေဖော်ဝါရီလ ၂၃ ရက်နေ့ ညပိုင်းက မြင်းမူမြို့နယ်ထဲမှာ မိုင်းဆွဲတိုက်ခိုက်ခံခဲ့ရတယ်လို့ သိရပါတယ်။

မြင်းမူမြို့နယ် နဘဲကြူးဇရပ်နဲ့ ကံပြားဇရပ်အကြားမှာ ပဒေသာမိုင်း ၁၀ လုံးနဲ့ မိုင်းဆွဲ တိုက်ခိုက်ခဲ့တာဖြစ်ပြီး တိုက်ခိုက်မှုကြောင့် စစ်ကောင်စီတပ်ဖွဲ့ဝင် ၄ ဦး ထိခိုက် ဒဏ်ရာရရှိခဲ့တယ်လို့ Moe Nyo Revolution Force M.N.R.F အဖွဲ့တာဝန်ခံက မြေလတ်အသံကို ပြောပါတယ်။

“မနေ့က ညပိုင်းမှာ စစ်ကိုင်း တပ်မ ၃၃ က ခွေးကား ၂ စီး လာတာကို ကြိုတင်သတင်းရတာနဲ့ စောင့်ပြီး တိုက်ခိုက်ခဲ့တာ၊ ကား ၂ စီးလုံးမှာ အင်အားအပြည့် ပါလာတယ်။ ည ၉ နာရီ ၂၀ မိနစ်မှာ ဒုတိယကားကို ထိထိမိမိ ပဒေသာမိုင်းဆွဲလိုက်တာ။ မြင်းမူ နဘဲကြူးဇရပ်နဲ့ ကံပြားဇရပ်ကြားမှာ မိုင်းဆွဲခဲ့တာ။ ထိခိုက် ဒဏ်ရာရတာက ၄ ကောင် ဒဏ်ရာရပြီး သေဆုံးမှုကိုတော့ မသိရသေးဘူး” လို့ သူက ပြောပါတယ်။

နဘဲကြူးဇရပ်နဲ့ ကံပြားဇရပ်အကြားမှာ အဲ့ဒီ စစ်ကိုင်းတပ်မ ၃၃ က စစ်ကားတွေ မိုင်းဆွဲခံရလို့ ကားပေါ်ပါလာတဲ့ စစ်ကောင်စီတပ်ဖွဲ့ဝင်တွေကို ထီးဆောင်းရွာမှာ ချထားခဲ့ပြီး ကားတွေက စစ်ကိုင်းဘက်ကို ပြန်သွားတယ်လို့ သိရပါတယ်။

မိုင်းဆွဲတိုက်ခိုက်မှုကို Moe Nyo Revolution Force M.N.R.F ၊ PENTAGRAM ငါး‌ထောင့်ကြယ် နှင့် ကျောက်ဆည်နဂါးနီ ပြည်သူ့ကာကွယ်ရေးတပ်တို့က ပူးပေါင်းလုပ်ဆောင်ခဲ့တာလို့ သိရပါတယ်။

ပြီးခဲ့တဲ့ ဖေဖော်ဝါရီလ ၂ ရက်နေ့ကလည်း စစ်ကိုင်းတိုင်း စစ်ကိုင်းမြို့နယ် တာတိုင်ကျေးရွာကို မီးရှို့တဲ့ စစ်အုပ်စုကို Moe Nyo Revolution Force M.N.R.Fက တိုက်ခိုက်ခဲ့လို့ စစ်သား ၄ ဦး သေဆုံးခဲ့တယ်လို့ သိရပါတယ်။