ယာဉ်တိုက်မှု

မကွေး၊ မေ ၂၁၊ ၂၀၂၃။

မကွေးတိုင်းဒေသကြီး၊ မြို့သစ်မြို့နယ်၊ ရွှေပန်းတောကျေးရွာအနီး နေပြည်တော်-မကွေးကားလမ်းပိုင်းမှာ ဟိုက်ဂျက်ယာဥ်နဲ့ မန္တလာမင်းခရီးသည်တင်ယာဥ်တို့ ခေါင်းချင်းဆိုင်တိုက်မိပြီး ၅ ဦးသေဆုံးကာ ၇ ဦး ဒဏ်ရာရရှိတယ်လို့ သိရပါတယ်။

မေလ ၂၁ ရက်ဒီကနေ့မနက် ၁၀ နာရီခန့်မှာ နေပြည်တော်ဘက်ကနေ မကွေးဘက်ကိုမောင်းနှင်လာတဲ့ ဟိုက်ဂျက်ယာဥ်နဲ့ မျက်နှာချင်းဆိုင်ယာဥ်ကြောကနေလာတဲ့ မန္တလာမင်းခရီးသည်တင်ယာဥ်တို့ ခေါင်းချင်းဆိုင်တိုက်မိတာလို့ ဒေသခံတဦးက မြေလတ်အသံကို ပြောပါတယ်။

“ဟို​ဂျက်ယာဥ်က နေပြည်တော်ဘက်ကနေဆေးခန်းပြပြီး စလင်းဘက်ကိုပြန်တာ။ ဖြစ်တဲ့နေရာက ကွေ့ကြောဆိုတော့ ဘယ်သူမှား၊ဘယ်သူမှန် မသိရသေးဘူး။ ထိခိုက်သေဆုံးတာတွေကတော့ ဟိုက်ဂျက်ပေါ်က လူတွေပါ” လို့ ပြောပါတယ်။

ယာဥ်တိုက်မှုကြောင့် ဟိုက်ဂျက်ယာဥ်ပေါ်ပါ အသက် ၆၀ ကျော် အမျိုးသမီး ၁ ဦး၊ အသက် ၄၀ ကျော် အမျိုးသမီး ၃ ဦးနဲ့ ယာဉ်မောင်းအမျိုးသား ၁ ဦး၊ စုစုပေါင်း ၅ ဦးသေဆုံးခဲ့ပြီး ကလေးငယ်တွေအပါအဝင် ၇ ဦး ဒဏ်ရာရရှိခဲ့တယ်လို့ ဆိုပါတယ်။

ယာဥ်တိုက်မှုကြောင့် ထိခိုက်သေဆုံးသွားသူတွေဟာ စလင်းမြို့နယ်ဘက်ကဖြစ်ပြီး ယာဉ်တိုက်မှုဖြစ်ပွားတဲ့နေရာအနီးရှိ ဒေသခံတွေက မြို့သစ်မြို့နယ်ဆေးရုံကို ပို့ဆောင်ပေးနေတယ်လို့ သိရပါတယ်။

စာတည်း – ရင်ငြိမ်း

ပဲခူး၊ မေ ၉၊ ၂၀၂၃။

ပဲခူးတိုင်း၊ ရေတာရှည်မြို့နယ်နဲ့ နေပြည်တော်၊ လယ်ဝေးမြို့နယ်အစပ် ရန်ကုန်-မန္တလေးအမြန်လမ်းမကြီး မိုင်တိုင် ၁၉၀/၅ အနီးမှာ ဧပြီလ ၉ ရက် ဒီကနေ့မနက်အစော ၅ နာရီဝန်းကျင်က ယာဉ်တိုက်မှုဖြစ်ပွားခဲ့လို့ ၁ ဦး သေဆုံးပြီး ၁၄ ဦး ဒဏ်ရာရခဲ့တယ်လို့ သိရပါတယ်။

အမြန်လမ်းမပေါ်မှာ စက်ချို့ယွင်းလို့ ရပ်တန့်ထားတဲ့ ခရီးသည်တင်ကားကို လိုက်ထရပ်ယာဉ်က ဝင်တိုက်မိလို့ လိုက်ထရပ်ယာဉ် မောင်းနှင်လာတဲ့ ယာဥ်မောင်းအမျိုးသား သေဆုံးပြီး ယာဉ်ပေါ်ပါ လူ ၁၄ ဦး ဒဏ်ရာရရှိခဲ့တာလို့ ဒေသခံတဦးက မြေလတ်အသံကို ပြောပါတယ်။

“ဖြစ်တာက လယ်ဝေးနဲ့ ရေတာရှည်၊ မြို့လှအစပ်လောက်ကျတာပေါ့။ ရပ်ထားတဲ့ကားကလည်း လမ်းဘေးမြေသားလမ်းပေါ်မှာ ရပ်ထားတာမျိုးမဟုတ်ဘဲ ညာဘက်ခြမ်းကွန်ကရစ်လမ်းပေါ်မှာ တစီးလုံး ရပ်ထားတာမျိုးပါ။ ရောင်ပြန်တွေ အချက်ပြမီးတွေ ပြထား၊မထားတော့ မသိရဘူး” လို့ ပြောပါတယ်။

ယာဥ်တိုက်မှုကြောင့် မြင်းခြံမြို့နေသူ ယာဥ်မောင်း ကိုထွန်းထွန်းနိုင် ဆိုသူဟာ နေရာမှာသေဆုံးသွားပြီး ယာဥ်ပေါ်ပါ အမျိုးသား ၁၄ ဦး ဒဏ်ရာရရှိခဲ့ကာ ဒဏ်ရာရရှိသူတွေဟာလည်း မြင်းခြံမြို့နယ်တဝိုက်က ဒေသခံတွေ ဖြစ်တယ်လို့ သိရပါတယ်။

ယာဥ်တိုက်မှုကြောင့် ထိခိုက်သေဆုံးဒဏ်ရာရသူတွေကိုတော့ အမြန်လမ်းမီးသတ်နဲ့ လူမှုကူညီရေးအဖွဲ့ တွေက နေပြည်တော် ကုတင် ၁၀၀၀ ဆေးရုံကို ပို့ဆောင်ပေးထားတယ်လို့ ဆိုပါတယ်။

ပြီးခဲ့တဲ့ ဧပြီလထဲမှာလည်း ရန်ကုန်-မန္တလေးအမြန်လမ်းမကြီးပေါ်မှာ ယာဉ်တိုက်မှု ၃ ခုထက်မနည်း ဖြစ်ပွားခဲ့ပြီး ၆ ဦး သေဆုံးခဲ့ကာ ဒဏ်ရာရရှိသူတွေလည်း ရှိတယ်လို့ သိရပါတယ်။

စာတည်း – ရင်ငြိမ်း

နတ်မောက်၊ ဧပြီ ၆၊ ၂၀၂၃။

မကွေးတိုင်း၊ နတ်မောက်မြို့နယ်၊ စျေးသာရွာအနီးမှာ ဧပြီလ ၅ ရက် မနေ့ညနေ ၅ နာရီခန့်က သံဃာတော် ၁၃ ပါးနဲ့ အမျိုးသား ၃ ဦး လိုက်ပါလာတဲ့လိုက်ထရပ်ကား ယာဉ်တိုက်မှုဖြစ်လို့ သံဃာ ၁ ပါးပျံလွန်တော်မူပြီး ၅ ပါး ဒဏ်ရာရသွားတယ်လို့ သိရပါတယ်။

နတ်မောက်ကနေ ညောင်ကန်ရွာဘက်ကို နတ်မောက်-ပျော်ဘွယ်လမ်းအတိုင်းမောင်းနှင်လာစဉ် ပန်းတင်ရိုး ရေကျော် သဲချောင်းအနီးမှာ ကားဘီးပေါက်ပြီး လမ်းညွှန်ဆိုင်းဘုတ်ကို ဝင်တိုက်မိခဲ့တာလို့ ဒေသခံလူမှုကူညီရေးအသင်းဝင်တဦးက မြေလတ်အသံကို ပြောပါတယ်။

“သူတို့သွားမယ့်ကျောင်းက ညောင်ကန်နားက ရွာပဲ။ ဘီးပေါက်ပြီး “ရေကျော်ရှေ့” ဆိုတဲ့ ဆိုင်းဘုတ်ကိုဝင်တိုက်ပြီး ကားက လည်ထွက်သွားတာ။ အဲဒီမှာ သံဃာ ၁ ပါးက ဘာနဲ့ထိုးမိတာလဲမသိဘူး၊ ပျံလွန်တော်မူသွားတယ်” လို့ ပြောပါတယ်။

ကားပေါ်လိုက်ပါလာတဲ့ သံဃာတော်တွေဟာ စာသင်သားသံဃာတော်တွေဖြစ်ပြီး ရန်ကုန်မှာပြုလုပ်တဲ့စာမေးပွဲတခုကို ဖြေဆိုပြီးတဲ့နောက် နတ်မောက်ကိုပြန်လာစဉ်မှာ အခုလိုယာဉ်တိုက်မှု ဖြစ်ပွားခဲ့တာလို့ ဆိုပါတယ်။

ယာဥ်တိုက်မှုကြောင့် ပျံလွန်တော်မူသွားတဲ့ သံဃာတော်ရဲ့ ရုပ်ကလာပ်ကို ဇာတိရွာကိုပို့ဆောင်ဖို့စီစဉ်နေပြီး ဒဏ်ရာရသံဃာ ၅ ပါးကိုတော့ နတ်မောက်ဆေးရုံကို ပို့ဆောင်ကုသပေးနေပြီး သာမန်ပွန်းပဲ့ ဒဏ်ရာလောက်သာ ရရှိခဲ့တာဖြစ်တယ်လို့ သိရပါတယ်။

စာတည်း – ရင်ငြိမ်း

မင်းလှ၊ မတ် ၁၁၊ ၂၀၂၃။

ပဲခူးတိုင်းအနောက်ခြမ်း၊ မင်းလှမြို့နယ်၊ ရန်ကုန်-ပြည်လမ်းရှိ သင်အိုင်ရွာနဲ့ကျောက်တိုင်ရွာကြားမှာ ရပ်ထားတဲ့ကားကို ဗုဒ္ဓဆင်းတုတော် သွားပင့်တဲ့ကားက ဝင်ရောက်တိုက်မိခဲ့တာလို့ သိရပါတယ်။

မတ်လ ၁၁ ရက် ဒီမနက်အစောပိုင်းက ဖြစ်ပွားခဲ့တာဖြစ်ပြီး မင်းလှမြို့နယ်၊ စစ်ကွင်းမြို့က ရှားဖြူကွင်းရွာနဲ့ စီတုန်းရွာက ဘုန်းကြီး ၂ ပါးနဲ့ ကလေး၊ လူကြီး ၂၀ ကျော်လောက် လိုက်ပါလာတဲ့ Light Truck ကားဖြစ်ပြီး ပြည်မြို့ကို မောင်းနှင်လာချိန် မနက် ၇ နာရီလောက်မှာ ယာဥ်မတော်တဆ ဖြစ်ပွားခဲ့တာလို့ သိရပါတယ်။

“Light Truck ကားက ရှေ့မှာလမ်းတခြမ်းတင်ရပ်ပြီး ပြင်နေတဲ့ကားကို ဝင်တိုက်တာမှာ ကားက ဘယ်မောင်းဆိုတော့ ယာဥ်မောင်းဘေးကနေ ခေါင်းခန်းက စီးလာတဲ့ ဘုန်းကြီးညှပ်နေလို့ ဆွဲထုတ်ယူရတယ်” လို့ မြို့ခံတဦးက ပြောပါတယ်။

ဘုန်းကြီးတပါးခြေ ၂ ချောင်းကျိုးသွားပြီး ဒဏ်ရာရရှိသူတွေကို မင်းလှဆေးရုံကတဆင့် ဒဏ်ရာပြင်းထန်သူ ၅ ဦးကို ရန်ကုန်ဆေးရုံနဲ့ ၆ ဦးကို သာယာဝတီဆေးရုံကို အနီးဝန်းကျင်က ပရဟိတအသင်းကားတွေနဲ့ ပို့ဆောင်ခဲ့တယ်လို့ ဆိုပါတယ်။

ဒဏ်ရာအနည်းငယ်သာရတဲ့ သူ ၂ ဦးခန့်ကို မင်းလှဆေးရုံမှာပဲ ဆေးဝါးကုသနေပြီး ကျန်သူအချို့က ပွန်းပဲ့ဒဏ်ရာလောက်သာ ရရှိခဲ့တယ်လို့ သိရပါတယ်။

ပြီးခဲ့တဲ့ မတ်လ ၁ ရက် ည ၇ နာရီလောက်ကလည်း ပဲခူးတိုင်းအနောက်ခြမ်း ရန်ကုန်-ပြည်လမ်းရှိ အုတ်ရှစ်ကုန်းကျေးရွာအနီးမှာ Toyota Mark II ကားတစီး မီးလောင်မှု ဖြစ်ပွားခဲ့ပါသေးတယ်။