ရွှေဘို၊ ဖေဖော်ဝါရီ ၂၁၊ ၂၀၂၅။

စစ်ကိုင်းတိုင်း၊ ရွှေဘိုမြို့နယ်၊ ပျူစောထီးနဲ့ပူးပေါင်းတပ်ဖွဲ့တွေထိန်းချုပ်ထားတဲ့ ညောင်ကိုင်းရွာက ရဲတပ်သားတဦး လက်နက်နဲ့အတူ ဘက်ပြောင်းခိုလှုံလာတယ်လို့ တောင်သူဦးကြီးများအဖွဲ့-LDF ဆီက သိရပါတယ်။

ဘက်ပြောင်းလာသူမှာ ညောင်ကိုင်းရွာမှာတပ်စွဲနေတဲ့ အသက် ၂၅ နှစ်အရွယ် ရဲတပ်သား စိန်သောင်း ဖြစ်ပြီး ဖေဖော်ဝါရီ ၁၆ ရက် နေ့လယ် ၁၂ နာရီခန့်မှာ ၎င်းတပ်စွဲနေရာကနေ ထွက်ခွာလာတာလို့ ဆိုပါတယ်။

“ သူကလည်း သတ်မှတ်ထားတဲ့ နယ်မြေတနေရာရောက်အောင်လာပြီးတော့ ကျနော်တို့ကလည်း သတ်မှတ်ထားတဲ့‌နေရာအထိ သွားပြီးခေါ်ထုတ်တာ။” လို့ တောင်သူဦးကြီးများအဖွဲ့-LDF တာဝန်ခံအမျိုးသမီးက ပြောပါတယ်။

ရဲတပ်သား စိန်သောင်း ဟာ ကရင်နီပြည်နယ်ဇာတိဖြစ်ပြီး စစ်အာဏာသိမ်းပြီးနောက် ရွှေဘိုမြို့ကတဆင့် ညောင်ကိုင်းရွာကိုပို့ဆောင်ခံရတာ ၁ နှစ်ခန့်ရှိပြီဖြစ်ကာ ဘက်ပြောင်းလာဖို့ ယမန်နှစ်အောက်တိုဘာလက စတင်ဆက်သွယ်လာတာဖြစ်တယ်လို့ ဆိုပါတယ်။

ဘက်ပြောင်းလာသူရဲတပ်သားနဲ့အတူ BA 94(အူဇီ)သေနတ် ၁ လက်၊ ကျည်ဘောက် ၂ ခု၊ လက်ပစ်ဗုံး ၁ လုံးယူဆောင်လာတာကြောင့် တောင်သူဦးကြီးများအဖွဲ့-LDF က ငွေ ၁၀ သိန်းကျပ် ဆုချီးမြှင့်ခဲ့တယ်လို့ သိရပါတယ်။

စာတည်း – ဟိန်းစံ

စစ်ကိုင်း၊ ဖေဖော်ဝါရီ ၈၊ ၂၀၂၅။

စစ်ကိုင်းတိုင်း၊ ရွှေဘိုမြို့နယ်၊ ဆိပ်သာကျေးရွာမှာ လက်နက်ကြီးကျလို့ သားအမိ ၂ ဦး ဒဏ်ရာရခဲ့တယ်လို့ ရွှေဘိုတိုက်နယ် ၂ ပကဖ တာဝန်ရှိသူထံက သိရပါတယ်။

ဖေဖော်ဝါရီ ၇ ရက်မနက် ၁၀ နာရီခွဲခန့်မှာ ဇီးဖြူကုန်းရွာမှာတပ်စွဲထားတဲ့ စစ်ကောင်စီတပ်ဖွဲ့ဝင်တွေနဲ့ ပျူစောထီးအဖွဲ့ဝင်တွေဟာ ဇီးဖြူကုန်းနဲ့ ၃ မိုင်ခန့်အကွာရှိ ဆိပ်သာရွာကို လက်နက်ကြီး ၃ လုံးပစ်ခတ်ခဲ့တယ်လို့ ဆိုပါတယ်။

“လက်နက်ကြီးတွေက ရွာနားနဲ့ရွာထဲကို ကျရောက်ပေါက်ကွဲတော့ သားအမိ ၂ ဦးမှာ မိခင်ကတော့ လက်အဖျားလေးထိတယ်။ သားကတော့ ခြေထောက်ကိုမှန်တယ်။ ကံကောင်းတယ်ပြောရမယ် စစ်ရှောင်ပြည်သူတွေနေတဲ့နေရာ မကျလို့။ ထိခိုက်တဲ့သားအမိကလည်း ရွာထဲမှာပဲရှိနေချိန် ထိတာ။”လို့ တိုက်နယ် ၂ ပကဖ တာဝန်ရှိသူက ပြောပါတယ်။

လက်နက်ကြီးကျရောက်ပေါက်ကွဲတာကြောင့် ဆိပ်သာရွာမှ အသက် ၅၀ ကျော်အရွယ် ဒေါ်ဝင်းသန်းနဲ့ သားဖြစ်သူ မူတူး ၄ နှစ်တို့ မစိုးရိမ်ရဒဏ်ရာတွေရရှိခဲ့ပြီး ရွာမှာလာရောက် စစ်ဘေးရှောင်နေတဲ့ မိသားစု ၁ စုရဲ့ နွား ၂ ကောင် သေဆုံးခဲ့တယ်လို့ ဆိုပါတယ်။

ဆိပ်သာကျေးရွာဟာ ရွာခံတွေနဲ့စစ်ဘေးရှောင်တွေသာ နေထိုင်ကြတာဖြစ်ပြီး အနီးအနားမှာလည်း တိုက်ပွဲဖြစ်ပွါးခြင်းမရှိဘဲ စစ်ကောင်စီပူးပေါင်းတပ်ဖွဲ့ဘက်က လက်နက်ကြီးနဲ့ပစ်ခတ်ခဲ့တာလို့ သူက ဆက်ပြောပါတယ်။

ဆိပ်သာကျေးရွာဟာ အိမ်ထောင်စု ၁၄၀ ခန့်၊ လူဦးရေ ၆၀၀ ခန့် နေထိုင်ကြပြီး စစ်ဘေးရှောင်တွေကတော့ အိုးဘိုရွာနဲ့ ပျူစောထီးအားကောင်းခဲ့တဲ့ သီးလုံးရွာတို့ကနေ လွန်ခဲ့တဲ့ ၁ နှစ်ကျော်ကတည်းက လာရောက်နေထိုင်ကြတာလို့ သိရပါတယ်။

ပြီးခဲ့တဲ့ ဒီဇင်ဘာ ၈ ရက်ကလည်း ရွှေဘိုမြို့နယ်၊ သပြေသာကျေးရွာမှာ စစ်ကောင်စီစစ်ကြောင်းဝင်ရောက်လာပြီး အမျိုးသား ၄ ဦးကို သတ်ဖြတ်မီးရှို့ကာ အိမ် ၁၅၀ ခန့်ကိုလည်း မီးရှို့ခဲ့သေးတယ်လို့ သိရပါတယ်။

စာတည်း – ကိုချမ်း

စစ်ကိုင်း၊ ဇန်နဝါရီ ၁၄၊ ၂၀၂၅။

စစ်ကိုင်းတိုင်း၊ ရွှေဘိုမြို့၊ ရွှေဘိုအကျဥ်းထောင်မှ လွတ်ရက်စေ့ပြီးလွတ်လာတဲ့ နိုင်ငံရေးအကျဥ်းသားတွေကို ရဲတပ်ဖွဲ့ဝင်တွေကထပ်မံဖမ်းဆီးပြီးချုပ်နှောင်ထားတယ်လို့ မြန်မာနိုင်ငံလုံးဆိုင်ရာနိုင်ငံရေးအကျဉ်းသားများကွန်ရက် – PPNM ဆီက သိရပါတယ်။

၂၀၂၄ အောက်တိုဘာ ကနေ ၂၀၂၅ ဇန်နဝါရီ ပထမပတ်အတွင်း ထောင်ကလွတ်လာတဲ့ နိုင်ငံရေးအကျဥ်းသား ၁၅ ဦး ထပ်မံဖမ်းဆီးခံရတာဖြစ်ပြီး အများစုမှာအမျိုးသားတွေဖြစ်တယ်လို့ ဆိုပါတယ်။

“ထောင်ကလွတ်ရက်စေ့တဲ့အချိန်မှာ ထောင်ဗူးဝအထွက်ကနေပဲ မြို့မရဲစခန်းက လာရောက် ခေါ်ဆောင်တာပါ။ ပြီးတော့ဘာပုဒ်မမှ မတပ်ပဲနဲ့ကို ဖမ်းဆီးထိန်းသိမ်းထားတာ” လို့ မြန်မာနိုင်ငံလုံးဆိုင်ရာနိုင်ငံရေးအကျဉ်းသားများကွန်ရက် – PPNM မှ ဦးဆောင်ကော်မတီဝင် ကိုသိုက်ထွန်းဦးက ပြောပါတယ်။

ဖမ်းဆီးခံထားရတဲ့ နိုင်ကျဥ်းတွေကို ရွှေဘိုမြို့မရဲစခန်းနဲ့ စခန်းအနီးရှိ စစ်ကောင်စီတပ်ဖွဲ့ဝင်တွေ ဝင်ရောက်တပ်စွဲထားတဲ့ မှန်သာဘုန်းကြီးကျောင်းအတွင်းမှာ အသီးသီး ချုပ်နှောင်ထားတာလို့ သူကဆက်ပြောပါတယ်။

“ငွေကြေးတတ်နိုင်တဲ့တချို့ကတော့ ငွေကြေးနဲ့ စကစနဲ့ ရဲအရာရှိတွေကိုပေးပြီးမှ ခေါ်ထုတ်နိုင်တာမျိုး ရှိတယ်”လို့ ကိုသိုက်ထွန်းဦးက ပြောပါတယ်။

ပြန်လည်ဖမ်းဆီးခံရသူတွေကို မိသားစုဝင်တွေနဲ့ အဆက်အသွယ်ဖြတ်ထားပြီး အခုလိုအ‌ခြေအနေတွေဟာ လွတ်ရက်စေ့ပေမယ့်လည်း လွတ်လပ်စွာသွားလာခွင့်ကို ပေါ်ပေါ်တင်တင်ချိုးဖောက်ခံနေရတာဖြစ်တယ်လို့ ကိုသိုက်ထွန်းဦးက ဆိုပါတယ်။

အခုလို ဥပဒေမဲ့ ဆက်လက်ဖမ်းဆီးထားနိုင်မှုတွေမဖြစ်ပေါ်ရန် ထိထိရောက်ရောက် တားဆီးပေးနိုင်တဲ့ အခြေအနေတွေရှိမနေတဲ့အတွက် တတ်စွမ်းတဲ့အဖွဲ့အစည်းတွေအနေနဲ့ တားဆီးရှုံ့ချတာနဲ့ အရေးယူတာတွေကို ထိထိရောက်ရောက်လုပ်ဆောင်ပေးဖို့ကိုလည်း PPNM ရဲ့ထုတ်ပြန်ချက်မှာ ရေးသားထားပါတယ်။

စစ်အာဏာသိမ်းချိန်ကနေ ၂၀၂၅ ဇန်နဝါရီ ၁၃ ရက်အထိ ဖမ်းဆီးခံရသူ စုစုပေါင်း ၂၈,၂၀၂ ဦးရှိပြီး အဲ့ဒီထဲမှာ ၂၁,၄၉၃ ဦးက ထိန်းသိမ်းခံထားရဆဲဖြစ်တယ်လို့ နိုင်ငံရေးအကျဥ်းသားများ ကူညီစောင့်ရှောက်ရေးအသင်း – AAPP က ထုတ်ပြန်ထားပါတယ်။

စာတည်း – လင်း

ရွှေဘို၊ မတ် ၁၆၊ ၂၀၂၃။

စစ်ကိုင်းတိုင်း၊ ရွှေဘိုမြို့နယ်၊ ညောင်းကိုင်းကျေးရွာက ထွက်လာတဲ့ ပျူစောထီးကားကို ဒေသခံကာကွယ်ရေးတပ်တွေက မိုင်းဆွဲတိုက်ခိုက်ခဲ့ရာ ပျူစောထီး ၂ ဦး သေဆုံးခဲ့တယ်လို့ သိရပါတယ်။

ပျူစောထီး ၄ ဦး လိုက်ပါလာတဲ့ကားကို မတ်လ ၁၄ ရက်မနက် ၁၀ နာရီလောက်မှာ ဂျူးမြေဇင်း၊ ထန်းနှောင်းကိုင်းနဲ့ မြို့လှရွာ လမ်းဆုံမှာ တိုက်ခိုက်ခဲ့တာလို့ ဗိုလ်ကျားရိုင်း – ရွှေဘို (LPDF) အဖွဲ့ဆီက သိရပါတယ်။

“၂ ကောင်သေတာ။ ဒီပတ်ချာလည်ရွာတွေမှာ ပြည်သူပိုင်နေအိမ်တွေဆိုလည်း ခိုးဆိုးလုနှိုက်နေတာ၊ ဒီနားနယ်တဝိုက်ကတော့ သူတို့အဆိုးဆုံးပဲ။ စစ်ကြောင်းတွေဆိုလည်း သူတို့လှမ်းလှမ်းခေါ်တာပဲ။ မိုင်းက ပဒေသာ ၃ လုံးကွဲတာ” လို့ ပြောပါတယ်။

မိုင်းဆွဲခံရပြီးနောက် သေဆုံးပျူစောထီး ၂ ဦးရဲ့အလောင်းကို မိုင်းဆွဲတဲ့နေရာအနီးက ကြက်ခြံထဲမှာ မီးရှို့ထားခဲ့တယ်လို့လည်း သိရပါတယ်။

ဒီတိုက်ခိုက်မှုကို ဗိုလ်ကျားရိုင်း-ရွှေဘို (LPDF)၊ မတစ်ထောင်-တစ်ကောင်ဘွား (ဒီပဲယင်း)၊ ဗိုလ်ဂျပန်ကြီး (T.T.T) – SHWEBO (LPDF) အဖွဲ့၊ တောင်သူကြီးများအဖွဲ့ -LDF နဲ့ ရွှေဘိုမြို့နယ် တိုက်နယ် -၂ မဟာမိတ်အင်အားစုတွေက ပူးပေါင်းတိုက်ခိုက်ခဲ့တာလို့ သိရပါတယ်။

ပြီးခဲ့တဲ့ မတ်လ ၅ ရက်ကလည်း ညောင်ကိုင်းရွာက ပြန်လာတဲ့ ပျူနဲ့စစ်သားတွေကို ဗိုလ်ကျားရိုင်း – ရွှေဘို(LPDF)အဖွဲ့က ဂျိုးမြေဇင်းနဲ့ မြို့လှရွာအကြားမှာ မိုင်းဆွဲတိုက်ခိုက်ခဲ့ရာ တပ်ကြပ်တဦး ခြေ‌ထောက်ပြတ်ပြီး ပျူစောထီးတဦး သေဆုံးခဲ့ပါသေးတယ်။

စာတည်း – လင်း