လက်နက်ကြီး

မြေလတ်အသံ၊ အောက်တိုဘာ ၁၁၊ ၂၀၂၅။

စစ်ကိုင်းတိုင်း၊ ချောင်းဦးမြို့နယ်၊ ငါးလုံးတင်ကျေးရွာကို စစ်ကော်မရှင်တပ်ပစ်ခတ်လိုက်တဲ့ လက်နက်ကြီးကျရောက်ပေါက်ကွဲခဲ့တာကြောင့် အမျိုးသမီး ၂ ဦးသေဆုံးခဲ့တယ်လို့ ဒေသခံတွေဆီက သိရပါတယ်။

အောက်တိုဘာ ၁၀ ရက်ည ၉ နာရီကျော်မှာ ချောင်းဦးမြို့ပေါ်ကနေ ပစ်ခတ်လိုက်တဲ့ လက်နက်ကြီး ကျည် ၁ လုံးက ငါးလုံးတင်ရွာထဲကိုကျရောက်ပေါက်ကွဲခဲ့ရာ အသက် ၅၀ ကျော်အရွယ် အမျိုးသမီး ၂ ဦး သေဆုံးကာ ၁၁ နှစ်အရွယ်ယောကျာ်းလေး ၁ ဦးဒဏ်ရာရရှိခဲ့ တာလို့ဆိုပါတယ်။

“သေဆုံးတဲ့သူတွေက ဆွေမျိုးတွေမတော်ကြဘူး။ စစ်ဘေးရှောင်တွေ။ ကလေးနဲ့ အမျိုးသမီးကြီး ၁ ယောက်ကတော့ မြေးဖွားတော်ကြတယ်။ အမျိုးသမီး ၂ ယောက်မှာ ၁ ယောက်က ပွဲချင်းပြီး သေတယ်။ နောက် ၁ ယောက်ကတော့ ဆေးကုနေရင်းသေတာ”လို့ ချောင်းဦးဒေသခံအမျိုးသား တဦးကပြောပါတယ်။

သေဆုံးသူ ၂ ဦးမှာ ၁ ဦးက အောက်တိုဘာ ၁၀ ရက်ညမှာသေဆုံးခဲ့ပြီး နောက် ၁ ဦးကတော့ အောက်တိုဘာ ၁၁ ရက်ဒီမနက်ပိုင်းမှာဘဲ ဆေးကုသရင်းသေဆုံးခဲ့တာဖြစ်တာလို့ ဆိုပါတယ်။

ငါးလုံးတင်ကျေးရွာဟာ အိမ်ခြေစုစုပေါင်း ၁,၀၀၀ ခန့်ရှိပြီး ချောင်းဦးမြို့နယ်၊ တောင်ဘက်မှာတည်ရှိကာ ချောင်းဦးမြို့နဲ့ ၆ မိုင်ကျော်ကွာဝေးပါတယ်။

ပြီးခဲ့တဲ့မေ ၁၅ ရက်ည ၉ နာရီကလည်း ချောင်းဦးမြို့ပေါ်ကနေ ပစ်ခတ်လိုက်တဲ့ လက်နက်ကြီးကျည် ၂ လုံးဟာ ငါးလုံးတင်ကျေးရွာကို ကျရောက်ပေါက်ကွဲခဲ့တာကြောင့် ရွာသား ၅ ဦးသေဆုံးခဲ့တယ်လို့ ဒေသခံတွေဆီကသိရပါတယ်။

အလားတူ အောက်တိုဘာ ၆ ရက် (သီတင်းကျွတ်လပြည့်နေ့) ည ၈ နာရီမှာလည်း ချောင်းဦးမြို့နယ်၊ ဘုံတိုကျေးရွာအနီး ဒေသတွင်းသပိတ်အဖွဲ့တွေနဲ့ ပြည်သူတွေစုပေါင်းပြီး ဆီမီးသပိတ် ပြုလုပ်နေချိန် မုံရွာနမခက တက်လာတဲ့ ပါရာမော်တာက ၁၂၀ မမ ဗုံးသီး ၂ လုံးကြဲချခဲ့ရာ သပိတ်ဦးဆောင်သူတွေ အပါအဝင် ပြည်သူ ၂၄ ဦးသေဆုံးကာ ၄၆ ဦး ဒဏ်ရာရခဲ့ပါသေးတယ်။

စာတည်း – လင်း

ရွှေဘို၊ အောက်တိုဘာ ၃၊ ၂၀၂၅။

စစ်ကိုင်းတိုင်း၊ ရွှေဘိုမြို့၊ အမှတ် ၇ ရပ်ကွက်ရှိ အောင်မြေချမ်းမြေကျောင်းထိုင်ဘုန်းကြီးကျောင်းဝန်းအတွင်း လက်နက်ကြီးကျရောက်ပေါက်ကွဲခဲ့တာကြောင့် ကိုရင် ၃ ပါး ပျံလွန်တော်မူကာ ၈ ပါး ထိခိုက်ဒဏ်ရာရတယ်လို့ မြို့ခံတွေဆီက သိရပါတယ်။

အောက်တိုဘာ ၂ ရက်မနက် ၁၁ နာရီကျော်မှာ ကျောက်မြောင်းအခြေစိုက် ခမရ ၁၁ ကပစ်ခတ်တဲ့ ဟောင်ဝစ်ဇာ လက်နက်ကြီးဟာ ဘုန်းကြီးကျောင်းဝင်းအတွင်းကို ကျရောက်ပေါက်ကွဲခဲ့တယ်လို့ ဆိုပါတယ်။

“တာဂဏန်းဘက်မှာ တိုက်ပွဲဖြစ်စစ်ကြောင်းထိုးနေလို့ လက်နက်ကြီးနဲ့လှမ်းပစ်ရာမှာ အောင်မြေကို ကျတယ်။ မျက်စိထိတဲ့သူ လက်ထိတဲ့သူ ခြေထောက်ထိတဲ့သူ။ ပျံလွန်တော်မူသွားတဲ့ ဆိပ်ခွန်က ကိုရင်လေးဆို ခြေတွေလက်တွေတောင်မရှိဘူး။ ဆွမ်းစားပြီးချိန် ငါတို့က မြင်တယ်။ မီးလုံးကြီးက ရဲပြီးသွားတာ ဒါဟောင်ဝစ်ဇာဘဲဟဆိုပြီး။ ထင်တဲ့အတိုင်းဘဲ ဆေးရုံမှာရှုပ်ယှက်ခတ်ကုန်တယ်”လို့ မြို့ခံတဦးကပြောပါတယ်။

လက်နက်ကြီးကျရောက်ပေါက်ကွဲတာကြောင့် အသက် ၁၄ နှစ်အရွယ် အရှင်ဝိမလ၊ ရှင်ညာဏိက၊ ရှင်ဥတ္တမအပါအဝင် ၃ ပါး ပျံလွန်တော်မူခဲ့ပြီး နောက်ထပ် အသက် ၁၂ နှစ်ကနေ ၁၄ နှစ်အရွယ်ရှိ ကိုရင် ၈ ပါးဒဏ်ရာပြင်းထန်ရခဲ့တယ်သလို ကိုရင်တွေနေတဲ့ အဆောင်လည်းပျက်စီးခဲ့တယ်လို့ ဆိုပါတယ်။

ထိခိုက်သေဆုံးဒဏ်ရာရတဲ့ကိုရင်တွေကို မြို့ခံပရဟိတတွေနဲ့ ဒေသခံတွေက ရွှေဘိုဆေးရုံကို ပို့ပေးခဲ့ရပြီး ကိုရင်တွေရဲ့ရုပ်အလောင်းကိုတော့ ညနေပိုင်းမှာကျောင်းတိုက်ကို ပြန်သယ်လာပြီး အောက်တိုဘာ ၃ ရက် ဒီနေ့လယ် ၂ နာရီမှာ ဥသျှစ်ကန်သုသာန်ကို ပို့ဆောင်သဂြိုဟ်သွားမယ်လို့ သိရပါတယ်။

အဆိုပါ မနက် ၆ နာရီခန့်မှာ စစ်ကော်မရှင်တပ်အင်အား ၁၀၀ ခန့်ဟာ ရွှေဘိုမြို့တောင်ဘက်အထွက် တာဂဏန်းကျေးရွာဘက်ကို စစ်ကြောင်းထိုးရာ PDF ပူးပေါင်းတပ်တွေဘက်က ကြားဖြတ်တိုက်ခိုက်တာခံရပြီး သေဆုံးထိခိုက်များပြားခဲ့ပြီး လက်နက်အချို့ကိုလည်း တော်လှန်ရေးအဖွဲ့တွေဘက်က သိမ်းဆည်းရမိတာရှိတယ်လို့ ဒေသကာကွယ်ရေးအဖွဲ့ဝင်အချို့ဆီက သိရပါတယ်။

အဆိုပါ တိုက်ပွဲနဲ့ပတ်သက်ပြီး အခြေအနေကိုတော့ တိုက်ပွဲပါတပ်ဖွဲ့တွေဘက်ကနေ အသေးစိတ်ပြန်လည် ထုတ်ပြန်သွားမယ်လို့ ဆိုပါတယ်။

ပြီးခဲ့တဲ့ မတ် ၂၅ ရက်ကလည်း ရွှေဘိုမြို့၊ အမှတ် ၁ ရပ်ကွက်ရှိ အောင်ဇေယျစျေးထဲကို အမှတ် ၈ လေ့ကျင်ရေးတပ်ကနေ ပစ်တဲ့ လက်နက်ကြီးကျလို့ ကလေးငယ်အပါအဝင် ၅ ဦးဒဏ်ရာရတယ်လို့ သိရပါတယ်။

စာတည်း – လင်း

မြေလတ်အသံ၊ စက်တင်ဘာ၂၈၊ ၂၀၂၅ ။

စစ်ကိုင်းတိုင်း၊ ဆားလင်းကြီးမြို့နယ်ရှိ ကြေးစင်တောင်စီမံကိန်း ကြေးနီထုတ်စီမံကိန်းလုပ်ငန်းခွင်ထဲ လက်နက်ကြီးဗုံးသီး ကျရောက်ပေါက်ကွဲတာကြောင့် တရုတ်ကုမ္ပဏီဝမ်ပေါင်နဲ့ယန်စီရဲ့ ကြေးနီထုတ်လုပ်ရေးလုပ်ငန်းတွေကို ယာယီရပ်ဆိုင်းလိုက်တယ်လို့ ကုမ္ပဏီနဲ့နီးစပ်တဲ့ ဒေသခံဆီက သိရပါတယ်။

စက်တင်ဘာ ၂၇ ရက် ယမန်နေ့ မနက် ၁၀ နာရီလောက်မှာ ကြေးပြားထုတ်စက်ရုံအနီး ၁လုံး၊ မိုင်းမြို့တွင်း ၁ လုံး၊ စက်ကြီးပြင်စက်ရုံအနီး ၁ လုံး၊ စက်ရုံတွင်းလမ်းပေါ် ၂ လုံး စုစုပေါင်း ၅လုံး ကျရောက်ပေါက်ကွဲခဲ့တာဖြစ်ပြီး အဲ့ဒီနောက်တူးဖော်ရေးဌာနက စက်ယန္တရားတွေအပါ ထုတ်လုပ်မှုလုပ်ငန်းတွေကို ရပ်ဆိုင်းလိုက်တာလို့ ဆိုပါတယ်။

“ဆဲလိုင်း( နံပါတ် ၁၁) ပေါ်ကျတဲ့အလုံးဆို ကြေးပြားထုတ်တဲ့စက်ရုံနဲ့ အနီးစပ်ဆုံးကျတာ။ တရုတ်တွေတော်တော်ကြောက်သွားပုံရတယ်။ လုပ်ငန်းချက်ချင်းရပ်သွားတာ။” လို့ ကုမ္မဏီနဲ့နီးစပ်တဲ့ဒေသခံတဦးက မြေလတ်အသံကို ပြောပါတယ်။

အခင်းဖြစ်ပြီးနောက် ဒီကနေ့ စက်တင်ဘာ ၂၈ ရက်မနက်ပိုင်းအထိ ကြေးနီထုတ်လုပ်ရေးလုပ်ငန်းတွေ ရပ်ဆိုင်းထားဆဲဖြစ်ကြောင်းသိရပြီး ဖြစ်စဥ်နဲ့ပတ်သက်လို့ ဘယ်တပ်ဖွဲ့တွေက ပစ်ခတ်တယ်ဆိုတာ အတည်မပြုနိုင်သေးသလို ဒေသတွင်းတော်လှန်ရေးအင်အားစုတွေဘက်ကလည်း ထုတ်ပြန်ထားတာမတွေ့ရသေးပါဘူး။

ကြေးနီစီမံကိန်းအတွင်း ဗုံးသီးကျရောက်ပေါက်ကွဲပြီးနောက် ယန်စီကုမ္မဏီတွင်းတပ်စွဲနေတဲ့ စစ်ကော်မရှင်တပ်သားတွေက စီမံကိန်းအနီးရှိ ကျေးရွာတွေဘက်ကို လက်နက်ကြီးတွေနဲ့ ပြန်လည်ပစ်ခတ်ခဲ့လို့ ရွှေပန်းခိုင်နဲ့ သဲတောကြီးကျေးရွာတွေအနီး ကျရောက်ပေါက်ကွဲခဲ့ကာ လူထိခိုက်မှုတော့ မရှိဘူးလို့ သိရပါတယ်။

စစ်အာဏာသိမ်းပြီးနောက် လက်ပံတောင်းနဲ့ ကြေးစင်တောင် ကြေးနီထုတ်လုပ်ရေးစီမံကိန်းလုပ်ငန်း ခွင်ကအလုပ်သမားအများစု အကြမ်းမဖက်အာဏာဖီဆန်ရေးလှုပ်ရှားမှု CDM မှာပါဝင်ခဲ့လို့ လုပ်ငန်းတွေ ၃ နှစ်ကျော်ကြာရပ်ဆိုင်းခဲ့ရပေမယ့် အခုနှစ်စပိုင်းကစတင်ကာ CDM ဝန်ထမ်းအများစု လုပ်ငန်းခွင်ပြန်လည်ဝင်ရောက်သွားတာကြောင့် လက်ရှိမှာ အာဏာမသိမ်းမီကအတိုင်း ပုံမှန်ပြန်လည် လည်ပတ်နေတာလည်း ဖြစ်ပါတယ်။

စာတည်း – ဟိန်းစံ

မတ္တရာ၊ စက်တင်ဘာ ၂၄၊ ၂၀၂၅။

မန္တလေးတိုင်း၊ မတ္တရာမြို့နယ်၊ ရုံးပင်ကျေးရွာမှာ စစ်ကော်မရှင်တပ်တွေပစ်ခတ်တဲ့ လက်နက်ကြီး ကျရောက်ပေါက်ကွဲခဲ့တာကြောင့် အမျိုးသမီး ၁ ဦးသေဆုံး ၂ ဦးဒဏ်ရာရတယ်လို့ ကျေးရွာနဲ့ နီးစပ်သူတွေဆီက သိရပါတယ်။

စက်တင်ဘာ ၂၃ ရက်ညနေ ၃ နာရီခန့်မှာ လက္ကောင်းကြီးကျေးရွာသင်္ချိုင်းမှာ တပ်စွဲထားတဲ့ စစ်ကော်မရှင်တပ်ဖွဲ့ဝင်တွေက ရုံးပင်ကျေးရွာဘက်ကို လက်နက်ကြီး ၆ လုံးပစ်ခဲ့ရာ လူနေအိမ်ပေါ်တွေနဲ့ ကျေးရွာအပြင်ဘက်ကိုကျရောက်ပေါက်ကွဲခဲ့တယ်လို့ ဆိုပါတယ်။

“ထိတဲ့သူမိသားစုက နေအိမ်ပေါ်တည့်တည့်ကျတာ။ အမျိုးသမီးက သေတယ်။ ကလေးနဲ့ ယောကျာ်းလုပ်သူက ဒဏ်ရာရတယ်။ ခုတလော ဒီကောင်တွေ(စကမ)လက်နက်ကြီးတွေပစ်တာ များပြားလာ တယ်။ တနေ့ကို အလုံး ၅၀ လောက် ပြည်သူကျေးရွာတွေကိုပစ်နေတာ။ သူတို့ပစ်တဲ့နေရာတွေက တိုက်ပွဲဖြစ်တာမရှိဘူး”လို့ ရုံးပင်ကျေးရွာနဲ့နီးစပ်သူတဦးကပြောပါတယ်။

လက်နက်ကြီးထိမှန်လို့ အသက် ၃၅ နှစ်အရွယ် မအေးအေးမော်မှာ နေရာမှာတင်သေဆုံးပြီး အသက် ၁၀ နှစ်အရွယ် သမီးဖြစ်သူမှာ မျက်ခုံးဒဏ်ရာရ၊ အမျိုးသားဖြစ်သူ အသက် ၃၆ နှစ်အရွယ် ကိုသိန်းထွေးမှာ လက်မှာဒဏ်ရာသွားပြီး နေအိမ်လည်းပျက်စီးခဲ့တယ်လို့ ဆိုပါတယ်။

စစ်ကော်မရှင်ဘက်က လက်နက်ကြီးပစ်ခတ်လို့ အိမ်ခြေ ၁၅၀ ကျော်ရှိတဲ့ ရုံးပင်ကျေးရွာက ဒေသခံ ၅၀၀ ကျော်လည်း ဘေးလွတ်ရာကိုတိမ်းရှောင်နေရတယ်လို့ ဆိုပါတယ်။

စက်တင်ဘာ ၁၃ ရက်ကလည်း မတ္တရာမြို့နယ်အရှေ့မြောက်ခြမ်း၊ အင်ကြင်းမြိုင်ကျေးရွာ အနီးဝန်းကျင်ကို စစ်ကော်မရှင်တပ်က လေကြောင်းကနေဗုံးကြဲလို့ ကိုရင် ၁ ပါးအပါအဝင် ၃ ဦးသေဆုံးတယ် သိရပါတယ်။

စာတည်း – လင်း

မုံရွာ၊ စက်တင်ဘာ ၁၆၊ ၂၀၂၅။

စစ်ကိုင်းတိုင်း၊ မုံရွာမြို့နယ်၊ ညောင်ပင်စောင့်ကျေးရွာမှာ စစ်ကော်မရှင်တပ်ကပစ်ခတ်တဲ့ လက်နက်ကြီး ထိမှန်ပြီး သက်ကြီးပိုင်းအမျိုးသား ၁ ဦးသေဆုံးကာ ၃ ဦးဒဏ်ရာရခဲ့တယ်လို့ ဒေသခံတွေဆီက သိရပါတယ်။

စက်တင်ဘာ ၁၅ ရက်ည ၉ နာရီကျော်မှာ စစ်ကော်မရှင်တပ်တွေအထိုင်ချထားတဲ့ ရွှေတောင်ဦး စခန်းကုန်းကနေပစ်ခတ်တဲ့ လက်နက်ကြီးဟာ ညောင်ပင်စောင့်ရွာ လက်ဖက်ရည်ဆိုင်အနီးက ကားပေါ်ကို ကျရောက်ပေါက်ကွဲခဲ့တာလို့ဆိုပါတယ်။

“လက်နက်ကြီးက လက်ဖက်ရည်ဆိုင်အရှေ့က ကားပေါ်ကျတာဆိုတော့ ကားကပြားသွားတယ်။ ဆိုင်ပိုင်ရှင်ရဲ့ ကားဘဲ။ ဆိုင်ထဲရှိနေသူတွေထိကုန်တာ”လို့ ဒေသခံတဦးကပြောပါတယ်။

လက်နက်ကြီးထိမှန်တာကြောင့် လက်ဖက်ရည်ဆိုင်ပိုင်ရှင် အသက် ၆၀ ကျော်အရွယ် ဦးလှအောင် သေဆုံးပြီး သားမက်ဖြစ်သူ အသက် ၃၀ ကျော်အရွယ် ကိုရဲမင်းအောင်နဲ့ ဆိုင်ထိုင်နေသူ ကျေးရွာ အတွင်းက အသက် ၄၀ ဝန်းကျင်အရွယ်အမျိုးသား ၂ ဦးတို့ထိခိုက်ဒဏ်ရာရခဲ့တယ်လို့ ဆိုပါတယ်။

သေဆုံးဒဏ်ရာရသူတွေကိုတော့ ဒေသခံတွေက မုံရွာပြည်သူ့ဆေးရုံကို ညတွင်းချင်းပို့ဆောင်ခဲ့ရတယ်လို့ သိရပါတယ်။

လက်နက်ကြီးကျရောက်ပေါက်ကွဲတဲ့နေရာက မုံရွာနတ်လူထိပ်ပန်ရပ်ကွက်ထိပ်ရှိ စစ်ကော်မရှင် စစ်ဆေးရေးဂိတ်နဲ့ မီတာ ၁၀၀ ခန့်သာကွာဝေးပြီး ပေါက်ကွဲတဲ့နေရာကို လာရောက်ကြည့်ရှု့တာမျိုး မရှိဘူးလို့ အထက်ပါဒေသခံကပြောပါတယ်။

မေ ၂၂ ရက်ကလည်း မုံရွာမြို့နယ်၊ နဂါးတွင်းကျေးရွာမှာ လက်နက်ကြီးကျရောက်ပေါက်ကွဲပြီး ရွာခံ ၂ ဦး သေဆုံးကာ ၁၀ ဦးဒဏ်ရာရရှိခဲ့ပါသေးတယ်။

စာတည်း – လင်း

မုံရွာ၊ သြဂုတ် ၃၀၊ ၂၀၂၅။

စစ်ကိုင်းတိုင်း၊ ဘုတလင်မြို့နယ်အရှေ့တောင်ခြမ်းရှိ ထူးကြီးရွာက အမျိုးသမီး ၁ ဦး စစ်ကော်မရှင်တပ်ကပစ်တဲ့လက်နက်ကြီး ထိမှန်သေဆုံးပြီး နေအိမ်အဆောက်အဦတချို့လည်း ပျက်စီးခဲ့တယ်လို့ ဒေသခံတွေဆီက သိရပါတယ်။

သြဂုတ် ၃၀ ရက် ဒီမနက် ၇ နာရီ ၄၅ မိနစ်လောက်မှာ မုံရွာအခြေစိုက် အနောက်မြောက်တိုင်း စစ်ဌာနချုပ်ကပစ်ခတ်တဲ့ ၁၂၀ မမ လက်နက်ကြီးထိမှန်ပြီး ထူးကြီးရွာဒေသခံ အသက် ၃၀ အရွယ် မသီတာအေး ထိမှန်သေဆုံးခဲ့တာလို့ ဆိုပါတယ်။

“လက်နက်ကြီးထုတဲ့အခြေနေက မလုပ်တာ၂ လလောက်ရှိပြီ။ ဒီနေ့ပြန်ထုတာ၊ ဘုတလင်က ဒီတပတ်အတွင်း လေကြောင်းရော၊ လက်နက်ကြီးနဲ့ရော၊ မြေပြင်စစ်ကြောင်းရော ဆက်တိုက် ထိုးနေတယ်”လို့ ဘုတလင်မြို့နယ်တွင်း စစ်ရှောင်ကူကယ်လုပ်နေတဲ့ အမျိုးသားတဦးက မြေလတ်အသံကိုပြောပါတယ်။

ထူးကြီးကျေးရွာမှာ အိမ်ခြေ ၁၆၀ ကျော်၊ လူဦးရေ ၆၀၀ ကျော်ရှိပြီး ဒီပစ်ခတ်မှုကြောင့် နေအိမ် ၁ လုံးလည်း ပျက်စီးခဲ့တယ်လို့ သိရပါတယ်။

သြဂုတ်ပထမပတ်ကစတင်ကာ စစ်ကော်မရှင်တပ်ဟာ နမခ နဲ့ ဘုတလင်မြို့တွင်းတပ်စွဲနေတဲ့ စစ်ကြောင်းတွေပေါင်းပြီး ဘုတလင်မြို့နယ်အတွင်းကကျေးရွာတွေကို အင်အားဖြန့်စစ်ကြောင်းထိုးတာ၊ လက်နက်ကြီး၊ ပါရာမော်တာတွေနဲ့လည်း မကြာခဏပစ်ခတ်တာတွေ ရှိခဲ့တာကြောင့် ဒေသခံထိခိုက်သေဆုံးမှုတွေလည်း ရှိခဲ့ပါတယ်။

သြဂုတ် ၂၆ ရက်တရက်တည်းမှာပဲ စစ်ကော်မရှင်တပ်က ဘုတလင်မြို့နယ်၊ တောင်ကလပ်ဘုန်းကြီးကျောင်းအနီး ပါရာမော်တာနဲ့ ဗုံးသီးချတိုက်ခိုက်လို့ အသက် ၂၀ အရွယ် စစ်ရှောင်အမျိုသမီး သေဆုံးတဲ့အပြင် သခွတ္တနယ်ရွာကိုလည်း တိုက်လေယာဥ် ၂ စီးနဲ့ ထပ်မံဗုံးကြဲခဲ့တာကြောင့် အသက် ၁၈ နဲ့ ၂၂ နှစ်အရွယ် အမျိုးသား ၂ ဦး သေဆုံးခဲ့ပါသေးတယ်။

လက်ရှိမှာတော့ စစ်ကော်မရှင်တပ်ဟာ ဘုတလင်မြို့ထဲမှာ ပြန်လည်တပ်စွဲထားပြီး စစ်ကြောင်းထိုးတာကိုရက်နားထားပေမယ့် မုံရွာ နမခ ကနေ လက်နက်ကြီးနဲ့ပစ်ခတ်နေတာကြောင့် ဒေသခံတွေ စိုးရိမ်နေကြရတယ်လို့ သိရပါတယ်။

စာတည်း – လင်း

မြေလတ်အသံ၊ သြဂုတ် ၂၁၊ ၂၀၂၅။

စစ်ကိုင်းတိုင်း၊ ဆားလင်းကြီးမြို့နယ်ရှိ လက်ပံတောင်းတောင်တရုတ်ကြေးနီစီမံကိန်းအတွင်းက အလုပ်သမားအမျိုးသား ၁ ဦး လက်နက်ကြီးဗုံးသီးအစထိမှန်သေဆုံးခဲ့တယ်လို့ သေဆုံးသူနဲ့နီးစပ်တဲ့ ဒေသခံတွေထံက သိရပါတယ်။

သေဆုံးသူမှာ လက်ပံတောင်းတောင်ကြေးနီစီမံကိန်းကုမ္ပဏီခွဲတခုဖြစ်တဲ့ အောက်ရှင်းကုမ္ပဏီရဲ့ ယမ်းတိုက်မှာ တာဝန်ကျနေတဲ့ ငါးတန်းကျေးရွာနေ အသက် ၅၀ နှစ်ဝန်းကျင်အရွယ် ကိုကျော်နိုင် ဆိုသူဖြစ်ပြီး သြဂုတ် ၁၇ ရက် မနက် ၁၁ နာရီခန့်က ၎င်းတာဝန်ကျရာ ယမ်းတိုက်ဧရိယာမှာရှိနေစဥ် လက်နက်ကြီးဗုံးသီးကျရောက်ပေါက်ကွဲကာ ထိမှန်သေဆုံးခဲ့တာလို့ ဆိုပါတယ်။

” အောက်ရှင်းကုမ္ပဏီ၊ ဝမ်ပေါင်ကုမ္ပဏီအခွဲဗျ ယမ်းခွဲဖို့နဲ့ဆိုင်တဲ့ အလုပ်တွေလုပ်တဲ့ ကုမ္ပဏီပြောရမှာပဲ။ ကိုကျော်နိုင် အလောင်းကို နေ့ချင်းပဲအိမ်ပြန်ပို့တယ်။ အခြားသောဝန်ထမ်းတွေတော့ ထိခိုက်တာမရှိဘူး “ လို့ သေဆုံးသူနဲ့နီးစပ်သူဆားလင်းကြီးဒေသခံတဦးက မြေလတ်အသံကို ပြောပါတယ်။

ဗုံးစထိမှန်တာကြောင့် ကိုကျော်နိုင်မှာ လည်ပင်းဖောက်ထွက်ဒဏ်ရာနဲ့နေရာမှာ သေဆုံးခဲ့ပြီး တရုတ်ကုမ္ပဏီက ငါးတန်းကျေးရွာရှိ မိသားစုဝင်တွေထံ ဖုန်းဆက်အကြောင်းကြားခဲ့လို့ ရုပ်အလောင်းကိုသွားရောက်သယ်ဆောင်ခဲ့ပြီးနောက် ဩဂုတ် ၁၈ ရက်မှာ ဝါးတန်းရွာမှာ သင်္ဂြိုဟ်ခဲ့တယ်လို့ သိရပါတယ်။

လုပ်ငန်းခွင်အတွင်း ကိုကျော်နိုင် သေဆုံးခဲ့အပေါ် လက်ရှိအထိ တရုတ်ကုမ္ပဏီဘက်က လျော်ကြေးကိစ္စပြောဆိုညှိနှိုင်းတာမျိုးမရှိသေးသလို စီမံကိန်းအတွင်းလက်နက်ကြီးဗုံးသီးကျရောက် ပေါက်ကွဲမှုနဲ့ ပတ်သက်ပြီး သတင်းတစုံတရာ ထုတ်ပြန်တာမရှိသေးပါဘူး။

အခင်းဖြစ်ပွားတဲ့ ဩဂုတ် ၁၇ရက်မှာ တရုတ်စီမံကိန်းစက်ရုံဧရိယာအတွင်းကို ရှော့တိုက်ဒုံးနဲ့ လက်နက်ကြီးတွေ အလုံး ၃၀ နီးပါးပစ်ခံခဲ့ရကြောင်း ဒေသခံတွေထံကသိရပြီး အဲ့ဒီပစ်ခတ်မှုတွေနဲ့ ပတ်သက်လို့ ဒေသတွင်းတော်လှန်ရေးတပ်ဖွဲ့တွေဘက်က သတင်းထုတ်ပြန်တာ မတွေ့ရသေးပါဘူး။

တရုတ်စီမံကိန်းလက်နက်ကြီးတွေနဲ့ပစ်ခတ်ခံရပြီးနောက် ဩဂုတ် ၁၈ ရက်မနက်ပိုင်းမှာ လက်ပံတောင်းတောင်စီမံကိန်းအနီးရှိ မိုးကြိုးပြင်ကျေးရွာကို စစ်ကော်မရှင်တပ်က ပါရာမော်တာနဲ့ လာရောက်ဗုံးကြဲခဲ့လို့ ရွာခံသက်ကြီးပိုင်းအမျိုးသမီး ၁ ဦးသေဆုံးပြီး သမီးနဲ့သားမက်ဖြစ်သူ အမျိုးသားတို့ ထိခိုက်ဒဏ်ရာရခဲ့တယ်လို့ သိရပါတယ်။

လက်ပံတောင်းတောင်ကြေးနီးစီမံကိန်းဟာ ဝမ်ပေါင်ကုမ္ပဏီနဲ့စစ်တပ်ပိုင် ဦးပိုင်ကုမ္ပဏီတို့ အကျိုးတူလုပ်ဆောင်နေတာဖြစ်ပြီး စစ်အာဏာသိမ်းပြီးနောက် ကြေးနီထုတ်လုပ်မှုလုပ်ငန်းတွေအနည်းငယ်သာ လည်ပတ်နိုင်ခဲ့ပေမယ့် ယခုနှစ်ဇွန်လကစတင်ကာ မူလအတိုင်းလုပ်ငန်းအားလုံး အလုံးစုံပြန်လည်ပတ်နေပြီလို့ တရုတ်စီမံကိန်းဝန်ထမ်းဟောင်း ဆားလင်းကြီးဒေသခံတွေထံက သိရပါတယ်။

စာတည်း – ဟိန်းစံ

ရေစကြို၊ ဩဂုတ် ၆၊ ၂၀၂၅။

မကွေးတိုင်း၊ ရေစကြိုမြို့နယ်၊ ဖြုံဘူးကျေးရွာကို စစ်ကောင်စီတပ်ကပစ်ခတ်တဲ့ လက်နက်ကြီးကျည် ထိမှန်ပြီး အသက် ၂ နှစ် အရွယ် ကလေး ၁ ဦးသေဆုံးခဲ့တယ်လို့ ရေစကြိုမြို့ မြို့ခံတွေဆီက သိရပါတယ်။

ဩဂုတ် ၄ ရက် မနက် ၁၀ နာရီဝန်းကျင်မှာ ရေစကြိုအခြေစိုက် ခလရ ၂၅၆ တပ်ကပစ်ခတ်တဲ့ ၈၀ မမ လက်နက်ကြီးကျည်တွေက ဖြုံဘူးကျေးရွာကိုကျရောက်ပေါက်ကွဲချိန် ထိမှန်သေဆုံးခဲ့ကြတာလို့ ဆိုပါတယ်။

“အားလုံးပေါင်း ၁၇ လုံးပစ်တာ၊ တနေကုန်ပဲ၊ မနက် ၁၀ နာရီလောက်က ခလရ ၂၅၆ ကနေပြီးတော့ အနောက်ဘက်ကို ၃ လုံးပစ်တာ၊ အထိအခိုက်တော့မရှိပါဘူး၊ နေ့လယ် ၁၂ နာရီလောက်ကြတော့ ရေလယ်ကျွန်းဘက်ကို လှမ်းပစ်တာ ဖြုံဘူးရွာထဲကျတဲ့အချိန်မှာ ကလေး ၁ ဦးကတော့ ဆေးကုသမှုခံယူပြီး ဆုံးသွားတယ်၊” လို့ ရေစကြိုမြို့ခံတဦးက ပြောပါတယ်။

ဒီပစ်ခတ်မှုကြောင့် အသက် ၂ နှစ် အရွယ် ယောကျ်ားလေး ၁ ဦး သေဆုံးပြီး အသက် ၆၀ နှစ် အရွယ်ဦးဝင်းကြည်ကတော့ ဒဏ်ရာပြင်းပြင်းထန်ထန်ရခဲ့တယ်လို့ ဆိုပါတယ်။

ဒါ့အပြင် အဲ့ဒီနေ့ ည ၁၁ နာရီခွဲလောက်မှာ ရေစကြိုမြို့အနောက်ဘက်အခြမ်းကို ၉ လုံး ထပ်မံ ပစ်ခတ်ခဲ့ပြီး ဒီပစ်ခတ်မှုမှာတော့ အထိအခိုက်မရှိခဲ့ဘူးလို့ ရေစကြိုမြို့ခံတဦးက ပြောပါတယ်။

ဖြုံဘူးကျေးရွာဟာ လူဦးရေ ၆၀၀ လောက်ရှိပြီး ဩဂုတ် ၃ ရက်ကစလို့ တရွာလုံး ရွာကနေတိမ်းရှောင်နေရတာလို့ သိရပါတယ်။

စာတည်း – လင်း

ချောင်းဦး၊ ဇူလိုင် ၃၀၊ ၂၀၂၅။

စစ်ကိုင်းတိုင်း၊ ချောင်းဦးမြို့နယ်၊ ကျီကုန်းရွာကို စစ်ကောင်စီတပ်ပစ်ခတ်တဲ့လက်နက်ကြီး ကျရောက် ပေါက်ကွဲပြီး ကလေး ၁ ဦးအပါ အမျိုးသမီး ၂ ဦးသေဆုံးပြီး ၅ ဦးထိခိုက်ဒဏ်ရာရရှိခဲ့တယ်လို့ ချောင်းဦးမြို့နယ်ပြည်သူ့ကာကွယ်ရေးအဖွဲ့ဆီက သိရပါတယ်။

ဇူလိုင် ၂၉ ရက် ညနေ ၄ နာရီခွဲလောက်က ချောင်းဦးမြို့နယ်၊ မုံရွာ-မန္တလေးလမ်းမပေါ် မြပုလဲဂိတ်မှာ တပ်စွဲထားတဲ့ စစ်ကောင်စီတွေဟာ ကျီကုန်းရွာကို ၈၀ မမ လက်နက်ကြီး ၂ လုံးနဲ့ ပစ်ခတ်ခဲ့တယ်လို့ သိရပါတယ်။

လက်နက်ကြီး ၂ လုံးဟာ ကျီကုန်းရွာထဲက ရွာလမ်းမကြီးပေါ် ကျရောက်ပေါက်ကွဲခဲ့ပြီး အသက် ၁၀ နှစ်အရွယ် မိန်းကလေး ၁ ဦး၊ အသက် ၃၀ အရွယ် အမျိုးသမီး ၁ ဦးတို့ သေဆုံးခဲ့ပြီး အသက် ၄၀ အရွယ်အမျိုးသမီး ၁ ဦး၊ အသက် ၆၀ အရွယ် အမျိုးသမီး ၁ ဦးနဲ့ အသက် ၁၀ နှစ်အရွယ် ကိုရင် ၁ ပါးအပါအဝင်အမျိုးသား ၃ ဦးတို့ ထိခိုက်ဒဏ်ရာရရှိခဲ့တယ်လို့ ဆိုပါတယ်။

“တိုက်ပွဲမရှိဘဲနဲ့ ပစ်ခတ်တာ။ လက်နက်ကြီး ၂ လုံးနဲ့ ပစ်ခတ်တယ်ဗျ။ ရွာလမ်းမပေါ် ကျရောက် ပေါက်ကွဲတယ်။ မနီးမဝေးမှာပဲကျတာပေါ့နော်။ ထိတဲ့အလုံးကတော့ လမ်းဘေးမှာကျပြီး လမ်းသွားလမ်းလာပြည်သူတွေ ထိခိုက်တာ။”လို့ ချောင်းဦးမြို့နယ် ပကဖ တာဝန်ခံ ကိုသန့်က မြေလတ်အသံကို ပြောပါတယ်။

ထိခိုက်ဒဏ်ရာရရှိသူ ၅ ဦးကိုတော့ ဆေးကုသပေးနေပြီး မစိုးရိမ်ရတဲ့အခြေအနေမှာရှိတယ်လို့ သူကဆက်ပြောပါတယ်။

ချောင်းဦးမြို့နယ်အတွင်းကကျေးရွာတွေကို စစ်ကောင်စီတပ်ကလက်နက်ကြီးနဲ့ မကြာခဏ ပစ်ခတ်မှုရှိတာကြောင့် ပြည်သူတွေအနေနဲ့လည်း လက်နက်ကြီးရန်နဲ့ လေကြောင်းရန်ကို အထူးဂရုစိုက်နေထိုင်ဖို့ ချောင်းဦးမြို့နယ် ပကဖတာဝန်ခံ ကိုသန့်က ပြောပါတယ်။

ပြီးခဲ့တဲ့ ဖေဖော်ဝါရီ ၁၈ ရက်နေ့ ညပိုင်းကလည်း ချောင်းဦးနယ်၊ ကျီကုန်းရွာကို မြပုလဲစစ်ဂိတ်က လက်နက်ကြီးနဲ့ ပစ်ခတ်လို့ အမျိုးသမီး ၂ ဦးသေဆုံးပြီး ၃ ဦးဒဏ်ရာရရှိခဲ့တယ်လို့ သိရပါတယ်။

စာတည်း – လင်း