ဝက်လက်

ဝက်လက်၊ ဩဂုတ် ၉၊ ၂၀၂၅။

စစ်ကိုင်းတိုင်း၊ ဝက်လက်မြို့နယ်မှာ ဝက်လက်မြို့နယ်ကျောင်းသားများသမဂ္ဂက ဦးဆောင်ပြီး ၃၇ နှစ်မြောက် ၈၈၈၈ လူထုအရေးတော်ပုံအထိမ်းအမှတ် အခမ်းအနားပြုလုပ်ခဲ့တယ်လို့ ဝက်လက်မြို့နယ်ကျောင်းသားသမဂ္ဂဥက္ကဌ ကိုဟန်မင်းစိုးက မြေလတ်အသံကို ပြောပါတယ်။

အခမ်းအနားကို ဝက်လက်မြို့နယ်ကျောင်းသားမျာရသမဂ္ဂ (ဗကသများအဖွဲ့အချုပ်)၊ ဝက်လက်မြို့နယ် အမျိုးသားဒီမိုကရေစီအဖွဲ့ချုပ်၊ ဝက်လက်မြို့နယ် ပကဖ၊ ဝက်လက်မြို့နယ် ပအဖ၊ ကျန်းမာရေးဌာန၊ CDM အစုအဖွဲ့တွေ၊ လူငယ်လွတ်မြောက်ရေးတပ်ဖွဲ့ – YLA နဲ့ ဝက်လက်မြို့နယ် သပိတ်ဦးဆောင်ကော်မတီတို့က ပူးပေါင်းလုပ်ဆောင်ခဲ့တာလို့ သိရပါတယ်။

“ပူးပေါင်းလုပ်ဆောင်ခဲ့တာက ဝက်လက်မြို့နယ် အမျိုးသားဒီမိုကရေစီအဖွဲ့ချုပ်ကရယ်၊ ကျနော်တို့ မြို့နယ်ပကဖ၊ မြို့နယ် ပအဖ၊ ကျနော်တို့ ကျန်းမာရေးဌာနရယ်၊ CDM အစုအဖွဲ့တွေရယ်၊ နောက်ပြီးတော့ လူငယ်လွတ်မြောက်ရေးတပ်ဖွဲ့ – YLA ရယ်၊ သပိတ်ဦးဆောင်ကော်မတီရယ် ဒါတွေနဲ့ ကျနော်တို့ ပူးပေါင်းလုပ်ဆောင်ခဲ့တာပါ။”လို့ ဝက်လက်မြို့နယ်ကျောင်းသားသမဂ္ဂဥက္ကဌ ကိုဟန်မင်းစိုးက မြေလတ်အသံကို ပြောပါတယ်။

လူထုအင်အား ၁၀၀ နီးပါးတက်ရောက်ခဲ့ပြီး အခမ်းအနားကို အစီအစဉ် ၇ ခုနဲ့ ပြုလုပ်ခဲ့ပြီး မြို့နယ်သမဂ္ဂကလည်း မိန့်ခွန်းပြောခဲ့တယ်လို့ ဆိုပါတယ်။

“ကျနော်တို့ အခမ်းအနားအစီအစဉ် ၇ ရပ်နဲ့ လုပ်ခဲ့တာပါ၊ ကျနော်တို့ ဗကသများအဖွဲ့ချုပ်က ပေးပို့တဲ့ သဝဏ်လွှာ ဖတ်ကြားခြင်းအစီအစဉ်ပါတယ်၊ ကျနော်တို့ မြို့နယ်သမဂ္ဂက ရဲဘော်တွေ မိန့်ခွန်းပြောတဲ့ အစီအစဉ််ပါတယ်၊ ပြီးတော့ ကျနော်တို့ မဟာမိတ်အဖွဲ့အစည်းတွေကနေ အမှတ်တရစကား ပြောကြားတဲ့ အစီအစဉ်တွေပါတယ်၊ ပြီးတော့ ကျနော်တို့ ကမ္ဘာမကြေဘူးသီချင်းနဲ့ အခမ်းအနားကို ပိတ်သိမ်းခဲ့တာပါ။”လို့ ကိုဟန်မင်းစိုးက ပြောပါတယ်။

ဒီအခမ်းအနားမှာပဲ ဝက်လက်မြို့နယ်ကျောင်းသားများသမဂ္ဂအနေနဲ့ ပြည်သူလူထုရဲ့တင်ပြချက်တွေကို ချက်ချင်းတုံ့ပြန် ဆောင်ရွက်ပေးဖို့၊ ချက်ချင်းတုံ့ပြန်ဆောင်ရွက်ဖို့ ပျက်ကွက်ခဲ့ရင်လည်း ပျက်ကွက်သူတွေကို ပထမအဆင့်သတိပေးရေး၊ ဒုတိယအဆင့် စစ်ဆေးအပြစ်ပေးရေး၊ ကျောင်းသားသမဂ္ဂ လွတ်လပ်စွာဖွဲ့စည်းတည်ရှိခွင့်ကို အာမခံပေးရေး၊ တော်လှန်ရေးကာလ ပညာရေးစနစ်သစ် တည်ဆောက်တဲ့နေရာမှာ အားတက်သရောပါ၀င်နေတဲ့ သမဂ္ဂကျောင်းသားတိုင်းကို အကာအကွယ်ပေးရေး တို့ကိုပါ NUG အပါအဝင် အာဏာလက်ကိုင်တော်လှန်ရေးအဖွဲ့အစည်းတွေကို တောင်းဆိုခဲ့တယ်လို့ သိရပါတယ်။

စာတည်း – လင်း

အမှုမှာလွတ်မြောက်နေသူတွေကိုလည်း အယူခံတင်ပြီး တရားဆက်လက်ရင်ဆိုင်မယ်လို့ ဆို

ဝက်လက်၊ ဇူလိုင် ၂၄၊ ၂၀၂၅။

ဝက်လက်မြို့နယ်ကျောင်းသားများသမဂ္ဂအဖွဲ့ဝင် ကိုမြင့်မြတ်ဦးကို လုပ်ကြံသတ်ဖြတ်စဥ်မှာ ပါဝင်ခဲ့သူကို ဇူလိုင် ၂၁ ရက်မှာ အမျိုးသားညီညွတ်ရေးအစိုးရ၊ ဝက်လက်တရားရေးဌာနကနေ အလုပ်ကြမ်းနဲ့ ထောင်ဒဏ် ၁၀ နှစ်ချမှတ်ခဲ့တယ်လို့ ဝက်လက်မြို့နယ်ကျောင်းသားများသမဂ္ဂဆီက သိရပါတယ်။

ကိုမြင့်မြတ်ဦးသတ်ဖြတ်ခံရပြီးနောက်မှာ သံသယရှိသူ ၄ ဦးကို ဝက်လက်မြို့နယ် ပြည်သူ့လုံခြုံရေးအဖွဲ့က ဖမ်းဆီးစစ်ဆေးခဲ့ပြီး အဲ့ဒီထဲက စိုင်နိုင်ကြီးရွာသား အသက် ၁၉ နှစ်အရွယ် ပေါင်ချိန်ကို အမိန့်ချမှတ်ခဲ့တာဖြစ်ပြီး ကျန် ၃ ဦးကိုတော့ ပြန်လွှတ်ပေးလိုက်ပြီလို့ သိရပါတယ်။

“တရားခံကို လုပ်ကြံသတ်ဖြတ်မှု ဖြစ်ပြီးမကြာမီမှာ တရားခံပေါင်ချိန်ကိုဖမ်းမိသွားပါတယ်၊ ပလဖ ကပေါ့၊ တရားခံကစိုင်နိုင်ကြီးရွာကပဲ၊ အသက်က ၁၉ ဗျ၊ နာမည်က ပေါင်ချိန်တဲ့ဗျ၊ အမိန့်ချတာက ၂၁ ရက်နေ့မနက်ပိုင်းမှာ NUG၊ ဝက်လက်တရားရေးဌာနကအမိန့်ချလိုက်တာ” လို့ ဝက်လက်မြို့နယ် ကျောင်းသားများသမဂ္ဂ ဥက္ကဌက မြေလတ်အသံကို ပြောပါတယ်။

ကိုမြင့်မြတ်ဦး လုပ်ကြံခံရစဉ်ကဖြစ်စဉ်အနီးမှာ ဆိုင်ကယ် ၂ စီးတွေ့ခဲ့ရတာကြောင့် တရားခံ ၁ ဦးတည်း မဖြစ်နိုင်သေးတဲ့အတွက် အရေးယူမှုကိုအလုံးစုံကျေနပ်မှုမရှိသေးဘဲ လုပ်ကြံသတ်ဖြတ်မှုမှာ နောက်ထပ်လွတ်မြောက်နေသေးသူတွေကို အရေးယူနိုင်ဖို့ အယူခံတင်ပြီးတရားဆက်လက် ရင်ဆိုင်သွားမယ်လို့ လည်း ဆိုပါတယ်။

“ဒီကိစ္စနဲ့ပတ်သက်ပြီး ကျနော်တို့ ဝက်လက်မြို့နယ်ကျောင်းသားများသမဂ္ဂအနေနဲ့ ကျေနပ်မှုကတော့ လုံးဝမှကို မရှိသေးပါဘူးခင်ဗျာ၊ အဓိကက အဲ့ဒီမှာ မျက်မြင်သက်သေတွေထွက်ဆိုတော့ အဲ့ဒီ လုပ်ကြံမှုမှာ ဆိုင်ကယ် ၂ စီးလာတယ်လို့ ပြောတယ်၊ အဲ့ဒီအချိန်မှာ၊ ဆိုင်ကယ် ၂ စီးဆိုတော့ ၁ ဦးတည်း မဖြစ်နိုင်ဘူးလေ၊ ၁ ယောက်တည်း ဆိုင်ကယ် ၂ စီး စီးခဲ့လို့မှမရတာ။” လို့ ဝက်လက်မြို့နယ် ကျောင်းသားသမဂ္ဂ ဥက္ကဌက ပြောပါတယ်။

သတ်ဖြတ်ခံရချိန် အသက် ၁၆ နှစ်အရွယ်ရှိ ကိုမြင့်မြတ်ဦးဟာ ၂၀၂၄၊ ဇူလိုင် ၈ ရက် ညပိုင်းက စိုင်နိုင်ကြီးရွာအပြင် သုဿန်အနီးမှာအင်တာနက်သွားသုံးပြီးအပြန် သတ်ဖြတ်ခံခဲ့ရတာဖြစ်ပြီး လည်ပင်း ပြတ်ရှဒဏ်ရာ၊ ညာဘက် ဂျိုစောင်းပြတ်ရှဒဏ်ရာ၊ ညာဘက်လက်မောင်း ထိုးသွင်း ဒဏ်ရာတွေနဲ့ သေဆုံးခဲ့တာပါ။

အဲ့ဒီနောက် ကိုမြင့်မြတ်ဦး သတ်ဖြတ်ခံရမှုအတွက် ဇူလိုင် ၁၁ ရက်မှာ မိသားစုဝင်တွေက ဝက်လက်မြို့နယ် ပြည်သူ့ ရဲတပ်ဖွဲ့(ပလဖ)စခန်းကို သွားရောက်တိုင်ကြားထားပြီး ပလဖအနေနဲ့လည်း အဆိုပါအမှုအပေါ် ရာဇသတ်ကြီးပုဒ်မ ၃၀၂/၃၉၂ နဲ့ အမှုဖွင့်ကာ စစ်ဆေးဆောင်ရွက်မှုတွေပြုလုပ်ခဲ့တာဖြစ်ပါတယ်။

စာတည်း – လင်း

◼လေကြောင်းရန်ကြောင့် ဒေသခံ ၅,၀၀၀ ခန့် ရွာပြင်ထွက်နေရ

ဝက်လက်၊ ဇူလိုင် ၁၈၊ ၂၀၂၅။

စစ်ကိုင်းတိုင်း၊ ဝက်လက်မြို့နယ်၊ ဧရာဝတီမြစ်နံဘေးရှိ ရှားကွဲရွာ၊ ငါးဘတ်ချောင်းရွာနဲ့ ရေလည်မော်ရွာတွေမှာ လေကြောင်းကနေ ဗုံးကြဲခံရလို့ ကာကွယ်ရေးအဖွဲ့ဝင် ၁ ဦးအပါ ၂၂ ဦးသေဆုံးခဲ့တယ်လို့ ဒေသခံတွေထံက သိရပါတယ်။

ဇူလိုင် ၁၇ ရက် ယမန်နေ့ ညနေ ၅ နာရီကျော်မှာ စစ်ကောင်စီတပ်သုံး သယ်ယူပို့ဆောင်ရေးလေယာဥ် Y-12 ပေါ်ကနေ ငါးဘတ်ချောင်းကျေးရွာကို ဗုံး ၁၈ လုံး၊ ရေလည်မော်ရွာကို ဗုံး ၅ လုံးခန့်နဲ့ ရှားကွဲရွာကို ဗုံး ၇ လုံး စုစုပေါင်း ဗုံးအလုံး ၃၀ ကျော်ကြဲချသွားခဲ့တာလို့ ဆိုပါတယ်။

” ဆိပ်ကမ်းနေရာနဲ့ ဘုန်းကြီးကျောင်းနေရာတွေ ရှားကွဲမှာထိတာ။ ငါးဘတ်ချောင်းမှာလည်း ဘုန်းကြီးကျောင်းနဲ့ ရွာမြောက်ပိုင်းတွေမှာကျတာ။ ခန့်မှန်းဗုံးအလုံးရေဆို ၃၀ လောက်ရှိမယ်”လို့ ဝက်လက်ဒေသခံတဦးက မြေလတ်အသံကို ပြောပါတယ်။

စစ်ကောင်စီက ဗုံးကြဲခဲ့တဲ့ကျေးရွာတွေအနီးမှာ တိုက်ပွဲတွေဖြစ်ပွားနေတာမျိုးမရှိပေမယ့် ယမန်နေ့က မန္တလေးကနေ ဧရာဝတီမြစ်ကြောင်းအတိုင်း ဆန်တက်လာတဲ့ စစ်သင်္ဘောအုပ်စုကြောင့် မြစ်ကမ်းဘေးကျေးရွာတွေကို ဗုံးကြဲတာဖြစ်နိုင်ကြောင်း ၎င်းက သုံးသပ်ပြောပါတယ်။

လေကြောင်းကနေဗုံးကြဲခဲရလို့ ငါးဘတ်ချောင်းကျေးရွာက အသက် ၁၀ နှစ်အောက်ကလေး ၃ ဦးအပါ ၁၂ ဦး၊ ရှားကွဲရွာကအသက် ၁၂ နှစ်အရွယ် မိန်းကလေး ၁ ဦးအပါ ၉ ဦး၊ ရေလည်မော်ကျေးရွာက အသက် ၂၀ ကျော်အရွယ် မြို့နယ်ပလဖအဖွဲ့ဝင် ဒိုးဒိုး၊ စုစုပေါင်း ၂၂ ဦး သေဆုံးခဲ့ပြီး အရပ်သားသေဆုံးမှုတွေနဲ့ပတ်သက်ပြီး အချက်အလက်တွေကို စိစစ်ကောက်ယူနေဆဲလို့ သိရပါတယ်။

ဒါ့အပြင် ကျေးရွာ ၃ ရွာက ဒေသခံပြည်သူ ၃၀ ကျော်ထိခိုက်ဒဏ်ရာရထားပြီး နေအိမ်ပျက်စီးမှု ၂၀ ကျော်ရှိခဲ့ကာ လေကြောင်းအန္တရာယ်ကြောင့် အိမ်ခြေ ၈၀ ကနေ ၄၀၀ ခန့်ရှိ ငါးဘတ်ချောင်း၊ ရှားကွဲ၊ ရေလည်မော်၊ ရေကမိုး၊ ရွာသစ်၊ လှေပိုးဆိပ်၊ သစ်ဆိပ့်၊ ဂူကြီး၊ သရက်ပင်ဆိပ်ကျေးရွာတွေက ဒေသခံ ၅,၀၀၀ ခန့် ဘေးလွတ်ရာမှာ တိမ်းရှောင်နေကြရပြီး ဇူလိုင် ၁၈ ရက် ဒီကနေ့ထိ ရွာထဲပြန်မဝင်ရဲကြသေးဘူးလို့ သိရပါတယ်။

မေ ၁၁ ရက်ကလည်း ဝက်လက်မြို့နယ်၊ ရွှေပန်းကုန်းကျေးရွာမှာ စစ်ကောင်စီဘက်က လေကြောင်းကနေ ဗုံးကြဲခဲ့လို့ ပြည်သူ ၂ ဦးဒဏ်ရာရတယ်လို့ သိရပါတယ်။

စာတည်း – ဟိန်းစံ

မြေလတ်အသံ၊ ဇူလိုင် ၁၃၊ ၂၀၂၅။

နေပြည်တော်၊ ဇေယျာသီိရိမြို့နယ်အခြေစိုက် အမှတ် ၂ အဆင့်မြင့်ဆက်သွယ်မှုတပ်ရင်း (အဆရ ၂) က စစ်ကောင်စီတပ်ဖွဲ့ဝင် ၁ ဦး ဘက်ပြောင်းခိုလှုံလာခဲ့တယ်လို့ ဝက်လက်မြို့နယ်ပကဖထံက သိရပါတယ်။

ခိုလှုံလာသူမှာ အဆရ ၂ မှ အသက် ၂၄ နှစ်အရွယ် တပ်သား မိုးကောင်း ဖြစ်ပြီး သူဟာ ဇွန် ၃၀ ရက်မှာ ဝက်လက်ပကဖထံချိတ်ဆက်ကာ နေပြည်တော်တပ်ကနေ စွန့်ခွာထွက်ပြေးလာခဲ့ပြီးနောက် ဇူလိုင် ၁ ရက်မှာ ရောက်ရှိလာခဲ့တာလို့ ဆိုပါတယ်။

” သူ့မိသားစုတွေက ဝက်လက်မြို့နယ်မှာ နေထိုင်ပါတယ်။ သူ့မိသားစုကနေတဆင့် ကျနော်တို့ ဝက်လက်မြို့နယ်ပကဖကို ချိတ်ဆက်ပြီးတော့ သူအလင်းဝင်မယ်ဆိုတဲ့အကြောင်းကို ချိတ်ဆက်ပြီးတော့ လုပ်ဆောင်တာပါ” လို့ ဝက်လက်မြို့နယ်ပကဖသတင်းတာဝန်ခံ အလင်းရောင်က မြေလတ်အသံကို ပြောပါတယ်။

တပ်သား မိုးကောင်း ဟာ ဝက်လက်မြို့နယ်ဇာတိဖြစ်ပြီး ပြီးခဲ့တဲ့ ၂၀၁၉ မှာ ဝက်လက်ကနေ လားရှိုးမြို့ကိုသွားရောက် အလုပ်လုပ်ကိုင်နေချိန် သူနေထိုင်တဲ့ မန်ဆူဘုန်းကြီးကျောင်းမှာ စစ်ကောင်စီတပ်သားတွေရဲ့ ခေါ်ဆောင်သွားမှုခံရပြီးနောက် စစ်ကောင်စီတပ်အတွင်းရောက်ရှိသွားခဲ့ကာ ၂၀၂၀ မှာ သပိတ်ကျင်းစု ဆောင်းရေးတပ်ကတဆင့် စစ်သင်တန်းကျောင်းကို ပို့ဆောင်ခံခဲ့ရတာဖြစ်တယ်လို့ ၎င်းရဲ့ပြောဆိုမှုတွေကိုကိုးကားပြီး အထက်ပါသတင်းတာဝန်ခံက ပြောပါတယ်။

လက်ရှိမှာ တပ်သား မိုးကောင်းကို စစ်ဆေးမှုတွေဆက်လက်လုပ်ဆောင်နေပြီး မိသားစုနဲ့အတူ လူအခွင့်အရေးနဲ့အညီ ဘေးကင်းလုံခြုံစွာထားရှိထားတယ်လို့ ကိုအလင်းရောင်က ဆိုပါတယ်။

၂၀၂၄ ဒီဇင်ဘာ ၁၂ ရက်ကလည်း ကချင်ပြည်နယ်၊ ကာမိုင်းမြို့မှာ တိုက်ခိုက်ရေးဝင်ရောက်နေတဲ့ စစ်ကိုင်းအခြေစိုက် တပ်မ ၃၃ လက်အောက် နည်းဗျူဟာ ၃၃၂ က ရဲမာန်အောင်စစ်ဆင်ရေးမှာ တာဝန်ထမ်းဆောင်ခဲ့တဲ့ အသက် ၃၀ အရွယ် စစ်ကောင်စီတပ်သားတဦး ဘက်ပြောင်းခိုလှုံလာခဲ့တယ်လို့ သိရပါတယ်။

စာတည်း – ဟိန်းစံ

ဝက်လက်၊ ဇူလိုင် ၁၁၊ ၂၀၂၅။

စစ်ကိုင်းတိုင်း၊ ဝက်လက်မြို့နယ်၊ ရေလည်မော်ကျေးရွာ၊ သံခွန်ဆိပ်ကမ်းကို စစ်ကောင်စီတပ်က လေကြောင်းကနေ ဗုံးကြဲတိုက်ခိုက်ခဲ့တာကြောင့် အမျိုးသား ၁ ဦးနဲ့ အမျိုးသမီး ၁ ဦးသေဆုံးခဲ့တယ်လို့ ဒေသခံတွေဆီကသိရပါတယ်။

ဇူလိုင် ၁၁ ရက် မနက် ၉ နာရီ ၄၅ မိနစ်လောက်မှာ စစ်ကောင်စီရဲ့ ဂျက်ဖိုက်တာ ၁ စီးက ပေါင် ၃၀၀ ဗုံး ၄ လုံးကြဲချတိုက်ခိုက်ခဲ့တာလို့ ဆိုပါတယ်။

“မြစ်ကြောင်းကိုဖြတ်ဖို့ ပြည်သူတွေသွားလာနေတဲ့ အဆုံကြတာပေါ့၊ ဘယ်နေရာကမှလည်း သွားလာဖြတ်သမ်းခွင့်မရှိတော့ ဒီနေရာကနေ ပြည်သူတွေ၊ ကားတွေသွားနေရတဲ့နေရာတခုပါ၊ လူစုံတဲ့အချိန်ကို ရည်ရွယ်ချက်ရှိရှိနဲ့ လာပြီးဗုံးကြဲပစ်ခတ်သွားတာ၊” လို့ ဝက်လက်မြို့ခံတဦးက ပြောပါတယ်။

အသက် ၄၀ အရွယ်အမျိုးသမီး ၁ ဦးနဲ့ အသက် ၅၀ အရွယ်အမျိုးသား ၁ ဦးသေဆုံးခဲ့ပြီး သူတို့က ဘယ်ဒေသကဆိုတာကိုတော့ အတည်မပြုနိုင်သေးပါဘူး။

ဒ့ါအပြင် ဗုံးကြဲတိုက်ခိုက်ခဲ့ပြီးနောက် ဂျက်ဖိုက်တာပေါ်ကနေပါ စက်လက်တွေနဲ့ပါပစ်ခတ်ခဲ့ကာ နောက်ထပ် ဒဏ်ရာရရှိသူ ၆ ဦးရှိခဲ့ပြီး သူတို့ကိုတော့ဆေးဝါးကုသပေးနေတယ်လို့ သိရပါတယ်။

အခုဗုံးကြဲခံရတဲ့ ရေလှည်မော်ကျေးရွာသံခွန်ဆိပ်ကတဆင့် ဒေသခံတွေပြည်သူတွေဟ မန္တလေး၊ စစ်ကိုင်း၊ မိုးကုတ်၊ မူဆယ်၊ လားရှိုးတို့ကိုကူးသန်းသွားလာတာတွေလုပ်လေ့ရှိတယ်လို့ အထက်ပါဒေသခံက ပြောပါတယ်။

အလားတူ ဒီမနက် ၁ နာရီကျော်လောက်မှာလည်း စစ်ရှောင်တွေရှိနေတဲ့ စစ်ကိုင်းမြို့နယ်၊ လင်းတလူးရွာက ဘုန်းကြီးကျောင်းကို စစ်ကောင်စီတပ်က လေကြောင်းကနေ ဗုံးကြဲတိုက်ခိုက်ခဲ့တာကြောင့် စစ်ရှောင် ၃၀ နီးပါးသေဆုံးခဲ့ပါသေးတယ်။

စာတည်း – လင်း

ဝက်လက်၊ ဇွန် ၂၈၊ ၂၀၂၅။

ဝက်လက်မြို့နယ် ကျောင်းသားများသမဂ္ဂအဖွဲ့ဝင် ကိုမြင့်မြတ်ဦး သတ်ဖြတ်ခံရမှု ၁ နှစ်ပြည့် ချီတက်အလေးပြုခြင်းအခမ်းအနားကို စစ်ကိုင်းတိုင်း၊ ဝက်လက်မြို့နယ်အတွင်း ကျေးရွာ ၁ ရွာမှာပြုလုပ်ခဲ့တယ်လို့ ဝက်လက်မြို့နယ်ကျောင်သားများသမဂ္ဂ(ဗကသများအဖွဲ့ချုပ်)ထံက သိရပါတယ်။

အသက် ၁၆ နှစ်အရွယ် ကိုမြင့်မြတ်ဦးဟာ ၂၀၂၄ ဇူလိုင် ၈ ရက်ညပိုင်းမှာ ဝက်လက်မြို့နယ်အတွင်း ကျေးရွာ၁ ရွာရဲ့ သင်္ချိုင်းအနီး အင်တာနက်အသုံးပြုနေစဥ် လူတစုရဲ့သတ်ဖြတ်မှုကိုခံခဲ့ရတာဖြစ်ပြီး ၎င်းကျဆုံးမှု ၁ နှစ်ပြည့်ကို မြန်မာသက္ကရာဇ်နှစ် ၁ နှစ်ပြည့်မြောက်တဲ့ ဇွန် ၂၇ ရက်မှာ ပြုလုပ်ခဲ့တာလို့ ဆိုပါတယ်။

“ ဇူလိုင်လ ၈ ရက်နေ့ညပိုင်းမှာ ရွာသုသာန်ဘေးက အင်တာနက်ရတဲ့ သစ်ပင်ပေါ်မှာ လိုင်းသွားသုံးတာပေါ့၊ အဲ့အချိန်မှာ ခန့်မှန်းခြေ ၃၊ ၄ ယောက်လောက်ဖြစ်မယ်ထင်တယ်၊ ကျနော်တို့ သံသယယူဆချက်အရတော့၊ အဲ့ဒီ ၃၊ ၄ ယောက်ကလည်လှီးပြီးသတ်သွားတာ” လို့ ကိုမြင့်မြတ်ဦး လုပ်ကြံခံခဲ့ရစဉ်က ဖြစ်စဉ်အကျဉ်းကို ဝက်လက်ဗကသဥက္ကဌက မြေလတ်အသံကို ပြောပါတယ်။

နှစ်ပတ်လည် ချီတက်အလေးပြုပွဲလုပ်ရတဲ့ ရည်ရွယ်ချက်နဲ့ ပတ်သက်လို့ “ ကျနော်တို့က ကျသွားတဲ့ ရဲဘော်ကို ကျနော်တို့စိတ်ထဲမှာ လုံးဝမမေ့ဘူးဆိုတာကို သက်သေပြလိုက်တာပဲ” လို့ ဝက်လက်ဗကသ ဥက္ကဌက ဆိုပါတယ်။

ကိုမြင့်မြတ်ဦးသတ်ဖြတ်ခံရခြင်း ၁ နှစ်ပြည့် အလေးပြုချီတက်ခြင်းအခမ်းအနားကို ဝက်လက်မြို့နယ် ကျောင်းသားများသမဂ္ဂအဖွဲ့ဝင်များအပါ ကျောင်းသားသမဂ္ဂအဖွဲ့ဝင်အင်အား ၂၀ ဦးထက်မနည်းတက်ရောက်ခဲ့တယ်လို့ သိရပါတယ်။

ကိုမြင့်မြတ်ဦး သတ်ဖြတ်ခံရမှု ၁ နှစ်ပြည့်ပြီးချိန်မှာတော့ ကျူးလွန်သူတွေကို NUG ဝက်လက်မြို့နယ်တရားရေးဌာနက အရေးယူမှုတွေဆောင်ရွက်နေပြီး အမိန့်ချမှတ်တော့မယ်လို့ အထက်ပါဥက္ကဌထံက ပြောပါတယ်။

စာတည်း – ဟိန်းစံ