ဝက်လက်၊ ဧပြီ ၁၇၊ ၂၀၂၅။

စစ်ကိုင်းတိုင်း၊ ဝက်လက်မြို့နယ်၊ သစ်ဆိမ့်ကျေးရွာရှိ ဆေးပေးခန်းအနီးကို စစ်ကောင်စီက လေကြောင်းသုံးဗုံးကြဲချခဲ့တာကြောင့် အသက် ၅ နှစ်အရွယ် ကလေးငယ် ၁ ဦးအပါအဝင် အရပ်သား ၄ ဦး သေဆုံးခဲ့တယ်လို့ ဒေသခံတွေဆီကနေ သိရပါတယ်။

ဧပြီ ၁၆ ရက် သင်္ကြန်အတက်နေ့ နေ့လယ် ၁ နာရီ ၄၀ မိနစ်က ဝက်လက်မြို့နယ်အရှေ့ခြမ်းရှိ သစ်ဆိမ့်ကျေးရွာက ရွာဆေးပေးခန်းအနီးကို တံတားဦးဘက်ကတက်လာတဲ့ ဂျက်ဖိုက်တာ ၁ စီးပေါ်ကနေ ပေါင် ၅၀၀ အားရှိတဲ့ ဗုံးသီး ၁ လုံး ကြဲချတိုက်ခိုက်ခဲ့တာလို့ သိရပါတယ်။

စစ်ကောင်စီရဲ့ လေကြောင်းသုံး ဗုံးကြဲချခဲ့တာကြောင့် သစ်ဆိမ့်ရွာဆေးပေးခန်းအနီးက အရပ်သားတွေနေထိုင်တဲ့ နေအိမ် ၂ လုံးပေါ် ကို ကျရောက်ပေါက်ကွဲခဲ့ပြီး အသက် ၅ နှစ်အရွယ် ကလေးငယ် ၁ ဦး၊ အသက် ၃၀ အရွယ် အမျိုးသမီး ၁ ဦး၊ အသက် ၄၀ ကျော်အရွယ် အမျိုးသမီး ၁ ဦးနဲ့ အသက် ၅၀ အရွယ် အမျိုးသား ၁ ဦး စုစုပေါင်းအရပ်သား ၄ ဦး နေရာတင် သေဆုံးပြီး ၆ ဦး ဒဏ်ရာရရှိခဲ့တယ်လို့ သိရပါတယ်။

“စစ်**တွေ ပစ်မှတ်ထားကြဲတာကတော့ ဆေးပေးခန်းကို ကြဲတာဗျ၊ အဲ့ဆေးခန်းရဲ့ အနောက်ဘက်က လူနေအိမ်ပေါ်ကို ဗုံးကျကွဲသွားတာ၊ ကြဲချပြီးတာနဲ့ ချက်ချင်းပြန်တက်သွားတယ်၊ စက်သေနတ်တို့နဲ့ ပစ်ခတ်တာတော့ မရှိဘူးဗျ။”လို့ ဝက်လက်မြို့နယ်မြေပြင်ကင်းထောက် တော်လှန်ရေးတပ်ဖွဲ့ဝင်တဦးက မြေလတ်အသံကို ပြောပါတယ်။

ဒဏ်ရာရရှိခဲ့တဲ့ အရပ်သား ၆ ဦးအနက် ၁ ဦးဟာ စိုးရိမ်ရအခြေအနေမှာရှိပြီး ကျန်ရှိတဲ့ ၅ ဦးကတော့ နီးစပ်ရာဆေးပေးခန်းတွေမှာ ဆေးကုသမှုခံယူနေတယ်လို့ သူကဆက်ပြောပါတယ်။

သေဆုံးသွားသူ ၄ ဦးရဲ့ ရုပ်အလောင်းတွေကို နှစ်ဆန်းတစ်ရက်နေ့မကူးခင် သင်္ကြန်အတက်နေ့ ညနေမှာဘဲ ချက်ချင်း သဂြိုဟ်လိုက်ရတယ်လို့ သိရပါတယ်။

အလားတူအဲ့ဒီနေ့ ည ၇ နာရီခွဲလောက်မှာပဲ မန္တလေးတိုင်း၊ ငါန်းဇွန်မြို့နယ်၊ ဆင်တပ်ကျေးရွာကို စစ်ကောင်စီက လေကြောင်းသုံးဗုံးကြဲချခဲ့တာကြောင့် အရပ်သား ၂ ဦးသေဆုံးခဲ့တယ်လို့ သိရပါတယ်။

၂၀၂၁ စစ်အာဏာသိမ်းချိန်ကနေ ၂၀၂၅ ဧပြီ ၁၁ ရက်အထိ စစ်ကောင်စီနဲ့ ၎င်းတို့ရဲ့ လက်ပါးစေတွေကြောင့် သေဆုံးခဲ့တဲ့အရပ်သားပြည်သူစုစုပေါင်း ၆,၄၉၉ ဦးရှိခဲ့တယ်လို့ နိုင်ငံရေးအကျဥ်းသားများ ကူညီစောင့်ရှောက်ရေးအသင်း – AAPP က ထုတ်ပြန်ပါတယ်။

သတင်း – ခေတ်သဒ္ဒါ၊ စာတည်း – လင်း

စစ်ကိုင်း၊ ဖေဖော်ဝါရီ ၁၁၊ ၂၀၂၅။

စစ်ကိုင်းတိုင်း၊ ဝက်လက်မြို့က ဒေသခံ ၂၀ ကျော်ကို စစ်ကောင်စီတပ်ဖွဲ့ဝင်တွေက ဇန်နဝါရီ ၈ ရက် ညပိုင်းမှာလိုက်လံဖမ်းဆီးပြီး ရွှေဘိုမြို့အထွေထွေအုပ်ချုပ်ရေးမှူးရုံးကိုပို့ထားတယ်လို့ ဝက်လက်မြို့နယ် ပြည်သူ့ကာကွယ်ရေးတပ်ဖွဲ့ဝင် ဖေဖော်ဝါရီဝမ်းက ပြောပါတယ်။

စစ်ကောင်စီတပ်ဖွဲ့ဝင်တွေဟာ ဝက်လက်မြို့ပေါ်ကို ညတွင်းချင်းဝင်ရောက်ကာ အသက် ၂၀ ကနေ ၃၀ ဝန်းကျင်အရွယ်အမျိုးသားတွေကိုဖမ်းဆီးခဲ့တာဖြစ်ပြီး ဖေဖော်ဝါရီ ၁၁ ရက်ဒီနေ့အထိ ပြန်မလွှတ်ပေးသေးဘူးလို့ ဆိုပါတယ်။

“ မြို့ခံတွေကိုအိမ်တွေထဲအထိအတင်းဝင်ဖမ်းတာ။ ဝက်လက်မြို့ပေါ်မှာ ဒါပထမဆုံးပဲ။ အဖမ်းခံရတဲ့ အထဲမှာ အမျိုးသမီးတွေတော့မပါဘူး၊ အခုလိုပေါ်တာဆွဲတော့ ဝက်လက်မြို့ပေါ်က ပြည်သူတွေကို မြို့ပြင်ကိုထွက်ပြေးတာမျိုးတော့ရှိတယ်” လို့ ဝက်လက်မြို့နယ်ပြည်သူ့ကာကွယ်ရေး ဖေဖော်ဝါရီဝမ်းက ပြောပါတယ်။

ဖမ်းဆီးခံရတဲ့ညမှာပဲ မိသားစုဝင်တွေက အထုပ်အပိုးတွေပြင်ဆင်ပြီး ထွေအုပ်ရုံးကို သွားရောက်ပို့ဆောင်ပေးရကာ ဖမ်းဆီးထားတဲ့သူတွေကို စစ်မှုထမ်းဖို့အတွက် ရွှေဘိုအခြေစိုက် အမှတ် ၈ စစ်အခြေခံလေ့ကျင့်ရေးတပ်ကို ရဟတ်ယာဉ်နဲ့ပို့ဖို့ လုပ်ဆောင်နေတယ်လို့သိရကြောင်း သူကဆက်ပြောပါတယ်။

“ သူတို့မိသားစုဝင်တွေလည်းပိုက်ဆံနဲ့ ဘာညာသွားရွေးတာမျိုးတွေမရှိဘူး။ ပေါ်တာဆွဲဖမ်းတဲ့ နေ့ကတည်းက အဆွဲခံရတဲ့ဒီလူတွေရဲ့အထုပ်အပိုးတွေကိုမှ သူတို့မိသားစုဝင်တွေကဖမ်းထားတဲ့ ထွေအုပ်ရုံးဘက်ကို လိုက်ပေးရတယ်” လို့ တပ်ဖွဲ့ဝင် ဖေဖော်ဝါရီဝမ်းက ပြောပါတယ်။

အခုလို စစ်ကောင်စီတပ်ဖွဲ့ဝင်တွေက မြို့ပေါ်မှာပေါ်တာဆွဲလာတဲ့အတွက် ဒေသခံတွေလည်း စိုးရိမ်နေကြပြီး မြို့ပြင်ကိုထွက်ပြေးတိမ်းရှောင်ဖို့လုပ်ပေမယ့် စစ်ကောင်စီကမြို့အဝင်အထွက်မှာ ရှိနေတဲ့အတွက် ထွက်လို့မရကြဘူးလို့ သိရပါတယ်။

၂၀၂၁ စစ်အာဏာသိမ်းချိန်ကနေ ၂၀၂၅ ဖေဖော်ဝါရီ ၁၀ ရက်အထိ အာဏာသိမ်းဖြစ်စဥ်နဲ့ ဆက်စပ်ပြီးဖမ်းဆီးခံရသူစုစုပေါင်း ၂၈,၅၃၉ ဦးရှိပြီး အဲ့ဒီထဲက ၂၁,၈၀၃ ဦးကတော့ ထိန်းသိမ်းခံထားရဆဲဖြစ်တယ်လို့ နိုင်ငံရေးအကျဥ်းသားများကူညီစောင့်ရှောက်ရေးအသင်း – AAPP က ထုတ်ပြန်ထားပါတယ်။

စာတည်း – လင်း

မြေလတ်အသံ၊ ဖေဖော်ဝါရီ ၁၊ ၂၀၂၅။

စစ်အာဏာသိမ်းလိုက်တဲ့ ၄ နှစ်ပြည့်တဲ့ ဖေဖော်ဝါရီ ၁ ရက်မှာ စစ်ကိုင်းတိုင်း၊ ဝက်လက်မြို့နယ်အတွင်း ဒေသခံတွေနဲ့ ကျောင်းသား၊ ကျောင်းသူတွေပူးပေါင်းပြီး စစ်သုံးစစ်တိုက်ဖျက်ရေး လူထုလှူပ်ရှားမှု ချီတက်ဆန္ဒပြပွဲ ပြုလုပ်ခဲ့ကြတယ်လို့ Wetlet Township Student’s Union – ABFSUက ထုတ်ပြန် ပါတယ်။

အဲဒီဆန္ဒပြပွဲကို ဝက်လက်မြို့နယ်ထဲကကျေးရွာတရွာမှာ မနက် ၉ နာရီကနေ ၁၁ နာရီအထိ စုစုပေါင်းအင်အား ၂၀၀ ကျော်ပါဝင်ခဲ့တယ်လို့ ဆိုပါတယ်။

“ပြည်သူလူထုအနေနဲ့ လက်ရှိတော်လှန်ရေး ၄ နှစ်ကျော်ကာလတွင်မကဘူး။ ဒီတော်လှန်ရေးရဲ့ အဆုံးသတ်နိုင်တဲ့အထိ ကျောင်းသား၊ပြည်သူလူထုတရပ်လုံး ပူးပေါင်းပါဝင်ပေးဖို့ မေတ္တာရပ်ခံ ချင်ပါတယ်”လို့ Wetlet Township Student’s Union – ABFSU ဥက္ကဌ ကိုဟန်မင်းစိုးက ပြောပါတယ်။

စစ်အာဏာသိမ်းမှု ၄ နှစ်ပြည့် အထိမ်းအမှတ်အဖြစ် လူထုချီတက်ဆန္ဒပြပွဲအပြင် ဆန္ဒပြသပိတ်မှောက် ရာမှာပါဝင်သူတွေကို တော်လှန်သွေးနိုးကြားတတ်ကြွစေမယ့် နိုင်ငံရေးဟောပြောဆွေးနွေးမှုတွေကို ဒေသစည်းရုံးရေးတပ်ဖွဲ့ဝင်တွေကဦးဆောင်ကာ ဟောပြောဆွေးနွေးခဲ့ကြတယ်လို့ သူကဆိုပါတယ်။

စစ်ကိုင်း၊ ဇန်နဝါရီ ၁၉၊ ၂၀၂၅။

စစ်ကိုင်းတိုင်း၊ ၀က်လက်မြို့မှာ ဇန်နဝါရီလဆန်းပိုင်းက စတင်ဖြစ်ပွားတဲ့တိုက်ပွဲတွေကြောင့် ဝက်လက်မြို့လမ်းပိုင်းတွေ ပိတ်ထားရလို့ ကုန်စည်စီးဆင်းမှုပြတ်တောက်ကာ စားသုံးကုန်ပစ္စည်း‌၊ ဆေးဝါးနဲ့ စက်သုံးဆီတွေ ရှားပါးပြတ်လပ်နေတယ်လို့ ဝက်လက်မြို့ခံတွေထံက သိရပါတယ်။

၀က်လက်မြို့နယ်အတွင်း စစ်ကြောင်းထိုးလာတဲ့ စစ်ကောင်စီတပ်နဲ့ ဒေသတော်လှန်ရေးပူးပေါင်းတပ်ဖွဲ့တွေ တိုက်ပွဲဖြစ်ပွားခဲ့တဲ့ ဇန်နဝါရီ ၄ ရက်ကနေစပြီး မြို့အ၀င်အထွက်လမ်းတွေကို ပြည်သူ့ကာကွယ်ရေးတပ်တွေဘက်က ယာယီအသုံးပြုခွင့် ပိတ်ထားတာဖြစ်ပါတယ်။

ဝက်လက်မြို့ အဝင်အထွက်လမ်းတွေကို အခုလိုပိတ်ဆို့ထားတာကြောင့် မြို့တွင်းမှာ ကုန်ပစ္စည်းတွေပြတ်လပ်လာပြီး ကုန်ဈေးနှုန်းဟာလည်း အရင်ကရှိနေတဲ့ ဈေးနှုန်းထက် ထက်ဝက်ခန့်ဈေးတက်လာတယ်လို့ မြို့ခံတွေက ပြောပါတယ်။

“ဆန် ၁ ပြည် ၇ ထောင်ကျော်တယ်။ ဆီက ၁ ပိဿာ ၁၈,၀၀၀၊ ကြက် ၁ တလုံး ၈၀၀၊ ဓာတ်ဆီက ၁ လီတာ ၁ သောင်း၊ ကွမ်းက ၁ရွက်ကို ၃၀၀ နှုန်းဖြစ်နေပြီ၊ အကုန်ငတ်နေပြီ။” လို့ ဝက်လက်မြို့ခံတဦးက ပြောပါတယ်။

လမ်းပိတ်ထားလို့ အနီးအနားရွာတွေက ဈေးသည်တွေ လာမရောင်းတဲ့အတွက် ဟင်းသီးဟင်းရွက်၊ အသားငါးတွေ ၀ယ်မရတော့ဘဲ မြို့တွင်းမှာရှိတဲ့ဈေးဆိုင်တွေလည်း ရောင်းစရာကုန်ပစ္စည်းမရှိလို့ ပိတ်ထားကြတယ်လို့ ပြောပါတယ်။

“ဈေးထဲ ဘောလုံးကန်လို့ ရတယ်” လို့ ဝက်လက်မြို့ခံတဦးက ဆိုပါတယ်။

ယခုလက်ရှိမှာ ဝက်လက်မြို့နယ်အတွင်းတိုက်ပွဲတွေဖြစ်ပွားတာ မရှိတော့ပေမယ့် မြို့နယ်အတွင်းအ၀င်အထွက်လမ်းပိုင်းတွေကို ဆက်လက်ပိတ်ထားသေးပြီး ပြန်ဖွင့်မယ့်အချိန်ကိုတော့ မသိရသေးဘူးလို့ ဒေသခံတွေက ပြောပါတယ်။

၂၀၂၃ တုန်းကလည်း ပြည်သူ့ကာကွယ်ရေးတပ်တွေဘက်က ၀က်လက်မြို့အ၀င်အထွက်လမ်းတွေကို ၂၂ ရက်တိတိ ပိတ်ထားခဲ့လို့ အခုလို ကုန်ပစ္စည်းပြတ်လပ်မှုတွေ ကြုံခဲ့ရသေးတယ်လို့ ၀က်လက်မြို့ခံတွေဆီကနေ သိရပါတယ်။

၂၀၁၄ သန်းခေါင်စာရင်းအရ ဝက်လက်မြို့လူဦးရေဟာ ၁၀,၀၀၀ ကျော်ရှိပါတယ်။ လက်ရှိ စစ်အာဏာသိမ်းပြီးတဲ့နောက် ဝက်လက်မြို့လူဦးရေဟာ မူလရှိတဲ့လူဦးရေရဲ့ တဝက်ခန့်သာရှိတော့တယ်လို့ ဒေသခံတွေက ပြောပါတယ်။

ဇန်နဝါရီ ၅ ရက် တနေ့တည်းမှာ ရွှေဘိုမြို့၊ အမှတ် ၈ စစ်အခြေခံလေ့ကျင့်ရေးတပ်ရင်းကနေ ထွက်လာတဲ့ စစ်ကောင်စီစစ်ကြောင်းကို ဝက်လက်မြို့နယ်၊ မှတ်ထိကျေးရွာနဲ့ မင်းကုန်းကျေးရွာကြားမှာ တော်လှန်ရေး တပ်ဖွဲ့တွေက တိုက်ခိုက်ခဲ့ရာ စစ်ကောင်စီတပ်ဖွဲ့ဝင် ၄၇ ဦးသေဆုံးပြီး ၆ ဦးဖမ်းဆီးရမိခဲ့ပါတယ်။

အလားတူ စစ်ကိုင်းတိုင်း၊ ဆားတောင်မြို့ကထွက်လာပြီး ဝက်လက်မြို့နယ်၊ အုန္နဲဘုတ်ရွာကို စီးနင်းတပ်စွဲနေတဲ့ စစ်ကောင်စီတပ်မ ၃၃ လက်အောက် စစ်သားတွေကို ဝင်ရောက်တိုက်ခိုက်ခဲ့ရာ စစ်ကောင်စီတပ်ဖွဲ့ဝင် ၂၀ ဦးကျော်သေဆုံး၊ ၃ ဦး အရှင်ဖမ်းမိထားကာ MA 1 သေနတ် ၅ လက်၊ မြေမြှုပ်မိုင်း ၄ လုံး၊ ရှေ့ထွက်မိုင်း ၁ လုံး၊ ၆၀ မမ ဗုံးသီး ၃ လုံး၊ Jammer စက် ၁ လုံးနဲ့ ခဲယမ်းပစ္စည်းအချို့ကိုလည်း သိမ်းဆည်းရရှိခဲ့ပါတယ်။

သတင်း – လကျာ်၊ စာတည်း – လင်းဇေ

စစ်ကိုင်း၊ ဇွန် ၁၈၊ ၂၀၂၃။

စစ်ကိုင်းတိုင်း၊ ဝက်လက်မြို့နယ်အတွင်းမှာ စစ်ကောင်စီတပ်သားတွေက အကြောင်းမဲ့ လက်နက်ကြီး၊ လက်နက်ငယ်တွေနဲ့ ပစ်ခတ်လို့ ဇွန်လ ၁၆ ရက် တရက်တည်းမှာတင် စစ်ကောင်စီလက်အောက်ခံ ကျေးရွာအုပ်ချုပ်ရေးမှူးရဲ့ သားဖြစ်သူအပါ ၂ ဦး သေဆုံးခဲ့တယ် လို့ ဝက်လက် ပကဖအဖွဲ့ဆီက သိရပါတယ်။

၁၆ ရက်မနက်ပိုင်းက ဝက်လက်မြို့အနောက်ဘက်၊ မူးဆည်ဘောင်အနီး တပ်စွဲထားတဲ့ စစ်ကောင်စီတပ်က လက်နက်ငယ်တွေနဲ့ ပစ်ခတ်တာကြောင့် သခွတ္တောရွာမမှာ နေထိုင်တဲ့ အသက် ၃၃ နှစ်အရွယ် ကိုရဲမော် ကျည်ထိမှန်သေဆုံးခဲ့ပြီး၊ ညနေပိုင်းမှာတော့ လှတောရွာဘက်ကနေ ပစ်လိုက်တဲ့ လက်နက်ကြီးကျည်က အသက် ၂၃ နှစ်အရွယ် ကိုထက်ဝေစိုးကို ထိမှန်သေဆုံးခဲ့တာလည်း ဖြစ်ပါတယ်။

“နှစ်ဦးစလုံးက နှမ်းခင်းထဲ အလုပ်လုပ်နေရင်း စစ်တပ်က ရမ်းပစ်တဲ့ကျည်နဲ့ သေဆုံးရတာ။ ကိုရဲမော်က နေရာတင်သေတာ၊ ထက်ဝေစိုးက ည ၁၂ နာရီလောက်မှာသေတာ”လို့ ဒေသခံတဦးက ပြောပါတယ်။

သူတို့ ၂ ဦးဟာ သခွတ္တောရွာမှာ နေထိုင်သူတွေဖြစ်ကာ ကိုရဲမော်က ရွာအနောက်ဘက်ရှိ နှမ်းခင်းမှာ ကျည်ထိမှန်ခဲ့တာဖြစ်ပြိး ကိုထက်ဝေစိုးကတော့ ရွာတောင်ဘက်ရှိ နှမ်းခမ်းတခုမှာ ရှိနေချိန် ကျည်ထိမှန်ခဲ့တာလို့ သိရပါတယ်။

ကိုထက်ဝေစိုးရဲ့ ဖခင်က သခွတ္တောရွာ အုပ်ချုပ်ရေးမှူးဖြစ်ပြီး လက်ရှိရွာမှာမနေဘဲ ဝက်လက်မြို့ပေါ်က ဝန်ထမ်းအိမ်ရာတခုမှာ နေထိုင်နေတာလို့လည်း အထက်ပါဒေသခံက ဆက်ပြောပါတယ်။

ဇွန်လ ၁၇ ရက် မနေ့ကမနက် ၉ နာရီမှာ ကိုရဲမော်ရဲ့အလောင်းကို မြေမြှုပ်သဂြိုဟ်ပြီး ၁၁ နာရီလောက်မှာတော့ ကိုထက်ဝေစိုးရဲ့အလောင်းကို မီးသဂြိုဟ်ခဲ့တယ်လို့ သိရပါတယ်။

ပြီးခဲ့တဲ့နှစ် ဇွန်လဝန်းကျင်ကလည်း သခွတ္တောရွာတောင်ပိုင်းက နေအိမ် ၂၀ ကိုစစ်တပ်ကမီးရှို့လို့ ပြာကျပျက်စီးခဲ့ရပါသေးတယ်။

စာတည်း – လင်း