သေဆုံး

တောင်ငူ၊ ဇွန် ၂၀၊ ၂၀၂၅။

ပဲခူးတိုင်း၊ တောင်ငူမြို့နယ်၊ ထိုးဝါးချောင်းကျေးရွာအနီး တောင်ငူ-လိပ်သိုလမ်းမှာ စစ်ကောင်စီယာဥ်တန်း တိုက်ခိုက်ခံရပြီး သေဆုံးသူရှိကာ ကျည်မျိုးစုံနဲ့ရိက္ခာတွေလည်း သိမ်းဆည်းခဲ့တယ်လို့ ဇွန် ၂၀ ရက်မှာ တောင်ငူခရိုင် တပ်ရင်း ၃၅၀၂၊ တပ်ခွဲ ၁ က သတင်းထုတ်ပြန်လာပါတယ်။

ဇွန် ၁၇ ရက်မနက် ၇ နာရီခွဲမှာ လိပ်သိုကနေ တောင်ငူဘက်ကိုပြန်ဆင်းလာတဲ့ ကား ၅ စီး အင်အား ၈၀ ကျော်ပါယာဥ်တန်းကို ကြားဖြတ်တိုက်ခိုက်ရာ အပြန်အလှန်ပစ်ခတ်မှု မိနစ် ၄၀ ခန့်ဖြစ်ပွားခဲ့တယ်လို့ ဆိုပါတယ်။

“တောင်ငူကနေ ကမ်းနီးချောင်းကနေတဆင့် လိပ်သို ထုံးဘိုကြီးကြောကို စစ်ကြောင်းဝင်နေတာ။ အဲ့စစ်ကြောင်းကို ချောင်းနေရာကနေ လိပ်သိုဘက်ကဆင်းလာတဲ့ ကားတန်းကိုတွေ့လို့ပစ်လိုက်ကြတာ။ “လို့ တောင်ငူခရိုင် တပ်ရင်း ၃၅၀၂ ပြန်ကြားရေးတာဝန်ခံ ကိုစွန်ရဲကပြောပါတယ်။

တိုက်ပွဲအတွင်းမှာ စစ်ကောင်စီဘက်က ၅ ဦးထက်မနည်းသေဆုံးတာကို မြေပြင်တပ်ဖွဲ့ဝင်ရဲ့တွေ့ရှိချက်အရ အတည်ပြုနိုင်ခဲ့တယ်လို့ ဆိုပါတယ်။

ဒါ့အပြင် တိုက်ပွဲဖြစ်ပြီးနောက် စစ်ကောင်စီတပ်ဖွဲ့ဝင်တွေကျန်ရစ်ခဲ့တဲ့ ၆၀ မမ ၅ လုံး၊ ကျည်မျိုးစုံ ၉၀၀၊ M14 မိုင်း ၄ လုံး၊ လက်ပစ်ဗုံး ၄ လုံး၊ စကားပြောစက် ၂ လုံး၊ ကျည်ဘောက် ၄ ခု၊ ဖုန်း ၁ လုံး၊ စစ်ကောင်စီတပ်ဖွဲ့ဝင်တွေအသုံးပြုမယ့် ရိက္ခာအချို့နဲ့ မြေသယ်ကား ၁ စီးကို သိမ်းဆည်းရမိခဲ့တယ်လို့ သိရပါတယ်။

အဆိုပါ တိုက်ခိုက်မှုကိုတော့တပ်ရင်း (၃၅၀၂) တပ်ခွဲ(၁)၊ တပ်ခွဲ (၂) ၊ KNU တပ်မဟာ(၂)၊ တပ်ရင်း(၅) လက်အောက်ခံ ကမ်းနီကြားဒေသကာကွယ်ရေးအဖွဲ့တို့ ပူးပေါင်းတိုက်ခိုက်ခဲ့တာလို့ သိရပါတယ်။

ပြီးခဲ့တဲ့ဇွန် ၁၃ ရက်နဲ့ ၁၄ ရက်တွေမှာလည်း တောင်ငူဘက်ကနေ အင်အား ၂၀၀ ခန့်နဲ့ စစ်ကြောင်းထိုးလာတဲ့ စစ်ကောင်စီတပ်ဖွဲ့ဝင်တွေနဲ့ ထိုးဝါးချောင်း၊ ဆိတ်ကုန်းနဲ့ ထုံးဘိုကြီးကျေးရွာတွေအနီး တိုက်ပွဲဖြစ်ခဲ့သေးတယ်လို့ ကိုစွန်ရဲကပြောပါတယ်။

တိုက်ပွဲတွေကြောင့် ဆိတ်ကုန်း၊ ထုံးဘိုကြီး၊ ထိုးဝါးချောင်းကျေးရွာတွေက ဒေသခံ ၃,၅၀၀ ကျော်ဟာ နေရပ်စွန့်ခွာထွက်ပြေးနေရတာ တပတ်ကျော်ရှိနေပြီး စစ်ကြောင်းကလည်း အဲ့ဒီကျေးရွာတွေအနီးမှာ ဇွန် ၂၀ ရက် ဒီနေ့အထိ လှည့်ပတ်သွားလာနေသေးတာကြောင့် ဒေသခံတွေမှာ နေရပ်မပြန်ရသေးဘူးလို့ သိရပါတယ်။

စာတည်း – လင်း

မြင်းခြံ၊ ဇွန် ၁၉၊ ၂၀၂၅။

မန္တလေးတိုင်း၊ မြင်းခြံခရိုင်၊ မြင်းခြံမြို့မြောက်ဘက်အထွက် တလုတ်ရွာနဲ့ အနိမ့်ကျေးရွာအကြားမှာ စစ်ကောင်စီတပ်ဖွဲ့ဝင်တွေ လိုက်ပါလာတဲ့ကားကိုပစ်ခတ်ရာ ဗိုလ်ကြီး ၁ ဦးအပါ ၃ ဦး သေဆုံးခဲ့တယ်လို့ Myingyan Black Tiger-MBT မြင်းခြံခရိုင်တပ်ရင်း – ၉ ဆီက သိရပါတယ်။

စစ်ကောင်စီတပ်ဖွဲ့ဝင် ရုရှားပြန် ၃ ပွင့်ဗိုလ် ပြည့်ဖြိုးကျော်၊ တပ်သားပိုင်စိုး၊ ပျူစောထီးခေါင်းဆောင် မင်းသိုက်၊ တပ်ကြပ်မုတ်ဆိတ်တို့လိုက်ပါလာတဲ့ကားဟာ မြင်းခြံမြို့ကနေ အနိမ့်ကျေးရွာကို ပြန်လာစဥ် အထက်ပါနေရာမှာ MBT အဖွဲ့မှကွန်မန်ဒို ၇ ဦးက စောင့်ကြိုပစ်ခတ်ခဲ့ရာ တပ်ကြပ် မုတ်ဆိတ်ကတော့ဒဏ်ရာပြင်းထန်ရပြီး ကျန် ၃ ဦး သေဆုံးခဲ့တာလို့ ဆိုပါတယ်။

“ကျန်တဲ့ ၃ ဦးကတော့ ကားထဲမှာ ရှော(သေ)သွားတာ၊ ကျနော်တို့လက်နက်ရဖို့ကြိုးစားခဲ့တယ်၊ ဒါပေမဲ့ အဲ့ဒီကားရဲ့နောက်မှာ သူတို့ရဲ့လုံခြုံရေးကားက တောက် လျှောက်ရောက်လာတာဖြစ်တဲ့အတွက်ကြောင့်မလို့ ကျနော်တို့ နောက်ကားနဲ့ တိုက်ပွဲဖြစ်ပြီးတော့ ချက်ချင်းပြန်ဆုတ်ခွာခဲ့တာ” လို့ ဗိုလ်မိုက်ခဲက ပြောပါတယ်။

ဒီပစ်ခတ်မှုကို ဇွန် ၁၇ ရက်ညနေ ၆ နာရီခွဲလောက်မှာပြုလုပ်ခဲ့တာဖြစ်ပြီး မတိုက်ခိုက်ခင် ၁ ပတ်အလိုကတည်း ကွန်မန်ဒိုအဖွဲ့တွေဟာ အဆိုပါနေရာအနီးကိုရောက်ရှိနေတာလို့ ဆိုပါတယ်။

“ဒီမစ်ရှင်မဖော်ဆောင်ခင် ၁ ပတ်လောက်အလိုကတဲ့က ကွန်မန်ဒို ၇ ဦးက ရန်သူ့စခန်းကြားကို အဆင်းရဲခံကင်းပုန်းဝတ်ပြီး စောင့်ဆိုင်းခဲ့တာတွေရှိတယ်၊ သူတို့ထွက်လာတဲ့အချိန် ကျနော်တို့ သုတ်သင်ရှင်းလင်းနိုင်ခဲ့ပါတယ်၊ ကွန်မန်ဒို ၇ ဦးက သွက်သွက်လက်လက်လုပ်ခဲ့တာ မစ်ရှင်က ၁၀ မိနစ်ပဲ ကြာခဲ့ပါတယ်” လို့ ဗိုလ်မိုက်ခဲက ဆက်ပြောပါတယ်။

စစ်ကောင်စီတပ်ဖွဲ့လုံခြုံရေးကား ကပ်လျက်လိုက်ပါလာတာကြောင့် သေဆုံးစစ်ကောင်စီတပ်ဖွဲ့ဝင် ၃ ဦးနဲ့ စီးနင်းလာတဲ့ကားကို သိမ်းဆည်းနိုင်တာမရှိခဲ့ဘဲ ဒဏ်ရာပြင်းထန်ရတဲ့ တပ်ကြပ် မုတ်ဆိတ်ကတော့ မြင်းခြံပြည်သူ့ဆေးရုံကြီးမှာ ဆေးကုသမှုခံယူနေရတယ်လို့ ဆိုပါတယ်။

ဒီတိုက်ခိုက်မှုပြီးနောက် နဘူးအိုင်ရွာကို စစ်ကောင်စီတပ်က လေကြောင်းတိုက်ခိုက်မှုလုပ်သွားပြီး မြင်းခြံမြို့ပေါ်ကနေလည်း လက်နက်ကြီးတွေနဲ့ပစ်ခတ်တာတွေရှိတယ်လို့ သိရပါတယ်။

စာတည်း- လင်း

မြေလတ်အသံ၊ ဇွန် ၁၈၊ ၂၀၂၅။

ပဲခူးတိုင်း၊ မင်းလှမြို့နယ်မှာ ဇွန် ၁၆ ရက်မှာဖြစ်ပွားခဲ့တဲ့ တိုက်ပွဲအတွင်း ဗိုလ်မှူး ၁ ဦး၊ ခရိုင်ရဲမှူး ၁ ဦး၊ မြို့မရဲစခန်းမှူး ၁ ဦး အပါအဝင် စစ်ကောင်စီတပ်ဖွဲ့ဝင် ၂၀ ဦးခန့်သေဆုံးခဲ့တယ်လို့ ပဲခူးရိုးမ PDF-ဗျူဟာ ၂၂ က ထုတ်ပြန်ပါတယ်။

ဇွန် ၁၆ ရက်ညနေ ၄ နာရီကျော်မှာ ဆင်အိုင်ချောင်းပေါက်ကျေးရွာအနီးမှာ ၁ ကြိမ်၊ ညနေ ၅ နာရီမှာ ရန်ကုန်-ပြည်လမ်းပိုင်းရှိ စစ်ကွင်းတာဆုံရဲကင်းစခန်းကို ၁ ကြိမ်နဲ့ ၅ နာရီကျော်မှာ ရှမ်းတောကျေးရွာအနီး ၁ ကြိမ် စုစုပေါင်း ၃ ကြိမ်တိုက်ပွဲဖြစ်ပွားခဲ့တာလို့ ဆိုပါတယ်။

“ခရိုင်မှူး၊ မြို့မရဲစခန်းမှူးနဲ့ ဗိုလ်မှူး ဒီ ၃ ကောင်က စစ်ကွင်းတာဇုံ အုတ်တွင်းရွာနားမှာသေတာပါ။ သူတို့က စစ်ကြောင်းထိုးဖို့အတွက် ညွှန်ကြားချက်တွေပေးဖို့ ရောက်နေတာလို့ ကနဦးသိရပါတယ်။ ကျနော်က စစ်ဆင်ရေးနယ်မြေမှာ ရှိနေတာမို့ အတည်ပြုနိုင်တာပါ”လို့ ပဲခူးရိုးမ PDF-ဗျူဟာ ၂၂ မှတာဝန်ရှိသူတဦးက ပြောပါတယ်။

အဆိုပါတိုက်ပွဲတွေအတွင်း စစ်ကောင်စီတပ်ဘက်မှ ခဲယမ်းတွေ၊ ဖုန်း ၂ လုံး နဲ့ စကားပြောစက်တချို့တို့ သိမ်းဆည်းရမိခဲ့ပြီး တော်လှန်ရေးမဟာမိတ်ပူးပေါင်းတပ်ဖွဲ့ဝင် ၂ ဦး မစိုးရိမ်ရ ဒဏ်ရာရရှိခဲ့တယ်လို့ သူကဆိုပါတယ်။

ပြည်သူ၊ စစ်ဘက်သတင်းအရင်းအမြစ်၊ ဆေးဘက်သတင်းအရင်းအမြစ်တွေရဲ့ ပြောဆိုချက်အရ စစ်ကြောင်းထိုးဖို့ရာညွှန်ကြားချက်ပေးရန် စစ်ကွင်းတာဇုံရဲကင်းစခန်းကို ရောက်ရှိနေတဲ့ သာယာဝတီခရိုင် စီမံအုပ်ချုပ်ရေးအဖွဲ့ဝင်၊ ဒုတိယဗိုလ်မှူးကြီး ဇော်မျိုးဝင်း နဲ့ အုတ်ဖိုမြို့နယ် စီမံအုပ်ချုပ်ရေးအဖွဲ့ဝင် ဗိုလ်မှူးတို့လည်း သေဆုံးခဲ့တယ်လို့သိရပေမယ့် အချက်အလက်တွေကို အတည်ပြုနိုင်ဖို့ ဆောင်ရွက်နေဆဲဖြစ်တယ်လို့ ထုတ်ပြန်ချက်မှာဖော်ပြပါတယ်။

အဆိုပါ စစ်ဆင်ရေးကို ပြည်သူ့ကာကွယ်ရေး တပ်မတော်၊ တောင်ပိုင်းတိုင်းစစ်ဒေသ၊ ပဲခူးတိုင်း စစ်ဌာန၊ ဗျူဟာ (၂၂) လက်အောက်ခံတပ်ရင်းတွေဖြစ်ကြတဲ့ သာယာဝတီခရိုင် အမှတ်(၃) တပ်ရင်း၊ သာယာဝတီခရိုင် အမှတ်(၁)တပ်ရင်းရဲ့ တပ်ခွဲ(၆)/ဧရာညီနောင်PDF ၊ MDF (Special Force) နဲ့ Asho Chin Defense Force(ACDF) မဟာမိတ် ပူးပေါင်းတပ်ဖွဲ့တွေက လုပ်ဆောင်ခဲ့တာဖြစ်ပါတယ်။

ဒါ့အပြင် ဇွန် ၁၇ ရက် မနက် ၂ နာရီမှာလည်း စစ်ကွင်းတာဇုံရဲကင်းစခန်းရှိ ကောင်စီစစ်တပ်က လက်နက်ကြီးတွေနဲ့ ရမ်းသမ်းပစ်ခတ်ခဲ့ရာ ဖားလေးကွင်းကျေးရွာ၊ မြောက်စုရှိ နေအိမ်‌ပေါ် ကိုကျရောက်ပေါက်ကွဲခဲ့တာကြောင့် အသက် ၈၀ အရွယ်ဒေါ်တင်ရီ သေဆုံးခဲ့ရပြီး နောက်ထပ် အမျိုးသမီး ၁ ဦးလည်း ပြင်းထန် ထိခိုက်ဒဏ်ရာရရှိခဲ့တယ်လို့သိပါတယ်။

စာတည်း – လင်း

ချောင်းဦး၊ ဇွန် ၁၈၊ ၂၀၂၅။

စစ်ကိုင်းတိုင်း၊ မုံရွာမြို့နယ်၊ တောပုကျေးရွာအနီးမှာ အိမ်စီးကားနဲ့ ထွက်လာတဲ့ စစ်ကောင်စီတပ်ဖွဲ့ဝင်နဲ့ပျူစောထီးတွေကို ပစ်ခတ်တိုက်ခိုက်ခဲ့ရာ သုံးပွင့်ဗိုလ်အပါအဝင် ၃ ဦး သေဆုံးခဲ့ပြီး လက်နက်တချို့သိမ်းဆည်းရရှိခဲ့တယ်လို့ Brave Heart Army-BHA အဖွဲ့ဆီကနေ သိရပါတယ်။

ဇွန် ၁၆ ရက်ည ၁၁ နာရီခွဲအချိန်က ချောင်းဦးအထွေထွေအုပ်ချုပ်ရေးရုံးကနေ မုံရွာမြို့ဘက်ကို ထွက်လာတဲ့ စစ်ကောင်စီအဖွဲ့ဝင် ၅ ဦး လိုက်ပါလာတဲ့ အိမ်စီးကား ၁ စီးကို ကြားဖြတ်တိုက်ခိုက်ခဲ့တာလို့ ဆိုပါတယ်။

“ကားက‌တော့ ၁ စီးတည်းဘဲဗျ။ သေဆုံးလောင်းတွေကိုတော့ ချောင်းဦးထွေအုပ်ကနေ ပြန်လာကောက်သွားတယ်ဗျ။ ကျနော်တို့အဝေးကနေ ပစ်နေတုန်း ၂ ယောက်က ဆင်းပြေးသွားတာ။ အပြန်အလှန် ပစ်ခတ်မှုကတော့ရှိခဲ့ပါတယ်ဗျ။ ကျန်တဲ့ ၃ ယောက်ကို အရမိပစ်ပြီး လက်နက်တွေ ကောက်ခဲ့တာ။ ကားကိုမီးရှို့ဖျက်ဆီးပြီးတာနဲ့ တပ်ပြန်ဆုတ်ခဲ့တာ။”လို့ Brave Heart Army-BHA အဖွဲ့ရဲ့ တာဝန်ရှိသူတဦးက မြေလတ်အသံကို ပြောပါတယ်။

တိုက်ခိုက်မှုအတွင်း သုံးပွင့်ဗိုလ် ၁ ဦးနဲ့ ပျူစောထီး ၂ ဦး နေရာတင် ပွဲချင်းပြီးသေဆုံးခဲ့ကာ ကျန်ရှိတဲ့ စစ်သား ၂ ဦးအနက် ၁ ဦးက ဒဏ်ရာရပြီး ၁ ဦးက ထွက်ပြေးသွားတယ်လို့ သိရပါတယ်။

သေဆုံးသွားခဲ့တဲ့ စစ်ကောင်စီတပ်ဖွဲ့ဝင်တွေရဲ့ အလောင်း ၃ လောင်းကိုတော့ ဇွန် ၁၇ ရက်နေ့ မနက်ပိုင်း ၇ နာရီဝန်းကျင်လောက်မှာ ချောင်းဦးထွေအုပ်ရုံးက စစ်ကောင်စီတပ်ဖွဲ့ဝင်တွေ လာရောက်ကောက်ယူသွားခဲ့တယ်လို့ သူကဆက်ပြောပါတယ်။

တိုက်ခိုက်မှုအတွင်း MA 1၊ MA 5၊ M 9၊ ပါရီ၊ Sig batter စတဲ့ သေနတ်အရှည် ၂ လက်နဲ့ အတို ၃ လက်၊ ဖုန်း ၃ လုံးတို့ သိမ်းဆည်းရရှိပြီး စစ်ကောင်စီတပ်ဖွဲ့ဝင်တွေ မောင်းနှင်လာတဲ့ အိမ်စီးကားကိုတော့ မီးရှို့ဖျက်ဆီးခဲ့တယ်လို့ သိရပါတယ်။

ပစ်ခတ်တိုက်ခိုက်မှုဖြစ်ပွားခဲ့ပြီးနောက် ဇွန် ၁၇ ရက် မနက်အစောပိုင်းမှာ မုံရွာ- မန္တလေးလမ်းပိုင်း ခရီးသွားတွေကို မအူစစ်ဂိတ်စခန်းနဲ့ ချောင်းဦးနယ်၊ ငါးယှန်စစ်ဂိတ်စခန်းက စစ်ကောင်စီတပ်ဖွဲ့ဝင်တွေက မှတ်ပုံတင်တွေစစ်ဆေးပြီး မသင်္ကာသူဆို အင်္ကျီအိတ်တွေကစ ဖွင့်စစ်တယ်လို့ ကားသမား တဦးဆီကနေ သိရပါတယ်။

စာတည်း – လင်း

မြေလတ်အသံ၊ ဇွန် ၁၇၊ ၂၀၂၅။

ပဲခူးတိုင်းအနောက်ခြမ်း၊ မင်းလှမြို့နယ်၊ အုတ်တွင်းရွာ၊ ရန်ကုန်-ပြည်လမ်း စစ်ကွင်းတာဆုံစစ်ဆေးရေးဂိတ်အနီး ထိတွေ့တိုက်ပွဲဖြစ်ပွားခဲ့ပြီး အရပ်သား ၃ ဦးသေဆုံးတယ်လို့ ဒေသခံတဦးထံက သိရပါတယ်။

ဇွန် ၁၆ ရက် ညနေပိုင်းမှာ စစ်ကွင်းတာဆုံစစ်ဆေးရေးစစ်ကောင်စီဂိတ်ကို ဒေသကာကွယ်ရေးတပ်တွေက ဝင်ရောက်ပစ်ခတ်တာကြောင့် တိုက်ပွဲတွေဖြစ်ပွားနေချိန် ပြည်လမ်းအတိုင်းမောင်းနှင်လာတဲ့ အိမ်စီးကား ၁ စီး သေနတ်ပစ်ခံခဲ့ရတာလို့ ဆိုပါတယ်။

“ အဲ့တိုက်ပွဲဖြစ်ချိန် ပြည်ဘက်ကနေ ရန်ကုန်ဘက်ကို မောင်းလာတဲ့ အိမ်စီးကား ၁ စီးကိုရပ်ခိုင်းတာ၊ ရပ်မပေးလို့ဆိုပြီး သေနတ်နဲ့ပစ်လို့ ၃ ယောက်သေပါတယ်။ ဘယ်အဖွဲ့ကပစ်တာလည်းတော့ မသိရပါဘူး” လို့ မြေပြင်အခြေအနေကိုသိရှိသူတဦးက မြေလတ်အသံကို ပြောပါတယ်။

သေနတ်ပစ်ခံရတာကြောင့် သေဆုံးသွားတဲ့ရုပ်အလောင်းတွေနဲ့ကားဟာ ဒီကနေ့ ဇွန် ၁၇ ရက် မနက် ၁၀ နာရီခန့်အထိရန်ကုန်-ပြည်လမ်းဘေးမှာရှိနေသေးကာ သေဆုံးသူတွေနဲ့ပတ်သက်ပြီး အချက်အလက်တွေမသိရဘူးလို့ ဆိုပါတယ်။

စစ်ကွင်းတာဆုံစစ်ဆေးရေးဂိတ်မှာ စစ်ကောင်စီပူးပေါင်းတပ်ဖွဲ့ အင်အား ၃၀ ခန့် အထိုင်ချတပ်စွဲထားပြီး တော်လှန်ရေးတပ်တွေဘက်က ဝင်ရောက်ပစ်ခတ်ချိန် စစ်ကောင်စီတပ်သားတွေသေဆုံးမှုရှိတယ်လို့လည်း အထက်ပါဒေသခံက ဆိုပါတယ်။

ဒါ့အပြင် ယမန်နေ့မနက်ပိုင်းမှာ မင်းလှမြို့နယ်အတွင်း ထောက်ကြန့်အုပ်စု၊ ဆင်အိုင်ချောင်းပေါက်ရွာအနီးတိုက်ပွဲဖြစ်ခဲ့ပြီး လက်ရှိမှာလည်း ရန်ကုန်-ပြည်လမ်း အရှေ့ဘက်ပဲခူးရိုးမအကြားကျေးရွာတွေမှာ တိုက်ပွဲတွေဆက်ဖြစ်နေတယ်လို့ သိရပါတယ်။

ဇွန် ၁၇ ရက် ဒီကနေ့နံနက် ၂ နာရီခန့်မှာလည်း မင်းလှမြို့နယ်၊ ဖားလေးကွင်းမြောက်စုမှာ လက်နက်ကြီးဗုံးသီးကျရောက်ပေါက်ကွဲတာကြောင့် သက်ကြီးပိုင်းအငြိမ်းစားကျောင်းအုပ်ဆရာမ ၁ ဦး သေဆုံး ပြီး အတူနေမိန်းကလေး ၁ ဦးလည်း လက်ချောင်းပြတ်တောက်ဒဏ်ရာတွေရရှိခဲ့တယ်လို့ သိရပါတယ်။

စာတည်း – ဟိန်းစံ