သေဆုံး

ပဲခူး၊ မေ ၂၃၊ ၂၀၂၃။

ပဲခူးတိုင်းဒေသကြီး၊ ဝေါမြို့နယ်၊ ညောင်ခါးရှည်ရဲစခန်း တိုက်ခိုက်ခံရပြီးနောက် စစ်ကောင်စီတပ်တွေက ဒေသခံ ၅၀ ကျော်ကို ဖမ်းဆီးပြီး စစ်ဆေးနေချိန်အတွင်းမှာ အမျိုးသား ၂ ဦးသေဆုံးခဲ့တယ်လို့ သိရပါတယ်။

သေဆုံးသူ ၂ ဦးဟာ ကျုံပါကျေးရွာက ကိုအောင်မြင့်သိန်း ၃၀ နှစ်နဲ့ ဦးမြသိန်း ၆၀ နှစ်တို့ ဖြစ်တယ်လို့ ဝေါ ပကဖ တာဝန်ရှိသူက ပြောပါတယ်။

“ဦးမြသိန်းက ဖမ်းဆီးခံချိန်ကတည်းက သေနတ်ထိထားတာ။ ဆေးကုသခွင့်မရဘဲ ဆုံးသွားတယ်လို့ သိရပါတယ်။ ကိုအောင်မြင့်သိန်းကျတော့ ဖမ်းဆီးခံရချိန်မှာ အိမ်မိုးနေတာ။ စကစ တပ်သားတွေကိုတွေ့တော့ လန့်ပြီး အမိုးပေါ်ကနေ ခုန်ချလိုက်တာ။ မထနိုင်ချိန် စကစ က ဖမ်းသွားတာ”လို့ ပြောပါတယ်။

သူတို့ ၂ ဦးစလုံးဟာ ကျုံပါကျေးရွာမှာ နေထိုင်သူတွေဖြစ်ပြီး ဧပြီလ ၂၉ ရက် တနေ့တည်းမှာပဲ ဖမ်းဆီးခံလိုက်ရတာ ဖြစ်ပါတယ်။

ဦးမြသိန်းကတော့ သေနတ်ဒဏ်ရာနဲ့ဖမ်းဆီးခံရပြီး ၅ ရက်လောက်အကြာမှာ သေဆုံးသွားပြီး မိသားစုဘက်က အလောင်းပြန်မရဘူးလို့ သိရပါတယ်။

ကိုအောင်မြင့်သိန်းကတော့ စစ်ကောင်စီတပ်သားတွေရဲ့နှိပ်စက်မှုကြောင့် လက်နဲ့ခြေထောက်တွေမှာ ကျိုးကြေပြီး၊ မျက်နှာနဲ့ခန္ဓာကိုယ်မှာလည်း ဒဏ်ရာတွေရရှိကာ သေဆုံးခဲ့တာပါ။ အလောင်းကိုတော့ မေလ ၂၂ ရက်မှာ ပဲခူးဆေးရုံမှာပဲ မိသားစုကကြည့်ခွင့်ရခဲ့ပြီး ပြန်မရဘူးလို့ သိရပါတယ်။

ဖမ်းဆီးခံရသူတွေထဲက ၂၀ ဦးကျော်ကတော့ ပြန်လွတ်လာခဲ့ပြီး ကျန်သူအများစုမှာ ဒီကနေ့အချိန်ထိ ပြန်မလွတ်သေးဘဲ စစ်ကြောရေးမှာပဲ ရှိနေတယ်လို့ ဆိုပါတယ်။

ဖမ်းဆီးထားသူတွေကိုတော့ ဘောနပ်ကြီးအခြေစိုက် အမှတ် ၃၄၀ အမြောက်တပ်ရင်းရှိ စစ်ကြောရေးနေရာနဲ့ ဝေါမြို့မရဲစခန်းတွေမှာ ချုပ်ထားပြီး စစ်ဆေးနေတာလို့ သိရပါတယ်။

ဧပြီလ ၂၇ ရက် ည ၇ နာရီလောက်က ညောင်ခါးရှည်ရဲစခန်းကို ဝေါ ပကဖ၊ တပ်ရင်း (၃၇၀၁) ပြောက်ကျားအဖွဲ့က ပူးပေါင်းတိုက်ခိုက်ရာမှာ ရဲ ၁ ဦးသေ၊ ၂ ဦးဒဏ်ရာရခဲ့ပြီးနောက် ဧပြီလ ၂၈ ရက်ကစလို့ ကျုံပါ၊ ညောင်ခါးရှည်၊ ကဒွတ်၊ ဖိုးစပါယ် စတဲ့ကျေးရွာက ဒေသခံတွေကို စစ်အုပ်စုက ဖမ်းဆီးခဲ့တာလည်း ဖြစ်ပါတယ်။

စာတည်း – လင်း

မကွေး၊ မေ ၂၀၊ ၂၀၂၃။

မကွေးတိုင်းဒေသကြီး၊ နတ်မောက်မြို့နယ်၊ မြင်းတဲကြီးကျေးရွာနားမှာ PDF ၁ ဦးကို ဝင်ဖမ်းတဲ့ ရဲတွေ မိုင်းခွဲခံရလို့ ၄ ဦးသေဆုံးသွားတယ်လို့ သိရပါတယ်။

မေလ ၂၀ ရက် ဒီနေ့ မနက် ၁၀ နာရီကျော်မှာ မြင်းတဲကြီးကျေးရွာ ပေ ၁၀၀ လမ်းဘေးက ဖူးပွင့်ဝေ စားသောက်ဆိုင်နားမှာ ရဲ ၁၀ ဦးဝန်းကျင်ကို မိုင်းခွဲတိုက်ခိုက်ခဲ့တာဖြစ်တယ်လို့ နတ်မောက် ဂဠုန်တပ်ဖွဲ့က ဗိုလ်အောင်ဒင်ကပြောပါတယ်။

“ကျနော်က မစ်ရှင်လုပ်ဖို့သွားတာ။ ဗိုက်ကလဲဆာတော့ ဆိုင်မှာဝင်စားနေတာ။ အဲဒါကို စကစ ဘက်က သတင်းရလို့ ကျနော်ကိုလာဖမ်းတာ။ သူတို့က ဆိုင်ထဲမဝင်ခင် ကျနော့် ဆိုင်ကယ်ကို စစ်ဆေးနေချိန် ဆိုင်ကယ်မှာ အသက်သွင်းပြီးသား မိုင်းကလည်း ရှိနေတော့ ရီမုနဲ့ခွဲချပြီး ပြေးတာပဲ။ စကစ အဖွဲ့ကသူတွေ ဆိုင်ကယ်နားမှာ ပုံကျသွားတယ်”လို့ ပြောပါတယ်။

မိုင်းခွဲပြီးပြေးချိန် ရဲတဦးက လိုက်ပစ်ခတ်ခဲ့ပေမယ့် ထိမှန်တာမရှိဘဲ ​ပြေးလွှားချိန် ကျောက်ခဲတွေနဲ့ထိလို့ ခြေထောက်ဒဏ်ရာရခဲ့တယ်လို့ သိရပါတယ်။

မိုင်းခွဲတိုက်ခိုက်ခံရလို့ ရဲတပ်ဖွဲ့ဝင် ၃ ဦးနေရာမှာ လဲကျသေဆုံးသွားပြီး ၅ ဦးခန့်ဒဏ်ရာရသွားသလို ဒဏ်ရာရသူတွေထဲက ၁ ဦး လမ်းမှာ ထပ်သေတယ်လို့ဆိုပါတယ်။

မိုင်းခွဲတိုက်ခိုက်ခံရပြီးနောက် စစ်ကောင်စီအဖွဲ့ဝင်တွေက ဗိုလ်အောင်ဒင်ကို လိုက်လံရှာဖွေကြပေမယ့် လုံခြုံတဲ့နေရာကို ပြန်ရောက်ပြီလို့ သိရပါတယ်။

စာတည်း- ဇို

ပဲခူး၊ မေ ၁၈၊ ၂၀၂၃။

ပဲခူးတိုင်းဒေသကြီး၊ တောင်ငူမြို့၊ တောင်ငူအကျဥ်းထောင်က အထူးတရားရုံးမှာ နိုင်ကျဉ်းအပါအဝင် အကျဥ်းသား ၁၀ဦးက သေနတ်လုကာ ပစ်ခတ်ထွက်ပြေးလို့ စစ်ကောင်စီတပ်ကြပ် ၁ ဦးသေပြီး ၁ ဦးဒဏ်ရာရသွားပါတယ်။

မေလ ၁၈ ရက် နေ့လယ် ၃နာရီ ရုံးထုတ်ချိန်မှာ အကျဥ်းသားတွေက အစောင့်တွေဆီကသေနတ်လုယူပြီး အစောင့်တွေကို ပစ်ခတ်ထွက်ပြေးသွားတယ်လို့ ဒေသခံတဦးကပြောပါတယ်။

“အစောင့်အင်အားနည်းတော့ သိရသလောက် စကစ အစောင့်တွေထဲက တယောက်သေတယ်။ တယောက်ကတော့ ​ခြေထောက်ကိုထိပြီး ဒဏ်ရာရသွားတယ်။ အကျဥ်းသားတွေကတော့ လွတ်သွားတယ်”လို့ ပြောပါတယ်။

အကျဥ်းသားတွေ ပစ်ခတ်လို့ စစ်ကောင်စီတပ် အမှတ် ၅ ပညာရေးကျောင်းက တပ်ကြပ်မောင်မျိုး သေဆုံးပြီး ပျူစောထီး ကျော်မြင့်ဆိုသူမှာ ခြေထောက်သေနတ်ထိမှန်ဒဏ်ရာရခဲ့တယ်လို့ သိရပါတယ်။

အဲ့ဒီအပြင် ထွက်ပြေးသွားတဲ့ အကျဥ်းသားတွေက ကာဘိုင် ၁ လက်၊ MA 11 ၁ လက်၊ ခြောက်လုံးပြူး ၁ လက်၊ G – 3 ၁ လက်တို့ကို ယူဆောင်ထွက်ပြေးသွားတယ်လို့ သိရပါတယ်။

ထွက်ပြေးသွားသူတွေဟာ စစ်ကောင်စီဘက်က အကြမ်းဖက်ဥပဒေပုဒ်မတွေတပ်ပြီး ဖမ်းခံထားရတဲ့ သန့်ဇင်၊ အောင်ကျော်ဦး၊ ဗေဒါ (ခ) ဘုန်းညွန့်ဇော်၊ ချစ်မင်းသူ၊ ဇင်ကိုကိုအောင်၊ သီဟအောင်၊ ငြိမ်းချမ်းအောင်၊ တိုးနိုင်ထွန်း၊ စည်သူသန်းအေး၊ ခင်မျိုးကြည်တို့ဖြစ်တယ်လို့ သိရပါတယ်။

စစ်ကောင်စီထောက်ခံ တယ်လီဂရမ်တွေမှာတော့ အကြမ်းဖက်မှုတိုက်ဖျက်ရေး ဥပဒေပုဒ်မများဖြစ်သော ၄၉ (က)/ ၅၀ (က)/ ၅၀ (ည)/ ၅၁ (ဂ)/ ၅၂ (က) အမှုမှ သန့်ဇင်၊ အောင်ကျော်ဦးနှင့် ဗေဒါ (ခ) ဘုန်းညွန့်ဇော် တို့မှာ ထွက်ပြေးလွတ်မြောက်သွားပြီး ချစ်မင်းသူ၊ ဇင်ကိုကိုအောင်၊ သီဟအောင်၊ ငြိမ်းချမ်းအောင်၊ တိုးနိုင်ထွန်း၊ စည်သူသန်းအေး၊ ခင်မျိုးကြည်တို့ (၇)ဦးကို ပြန်လည်ဖမ်းမိခဲ့ပြီးဖြစ်တယ်လို့ ဖော်ပြထားပေမယ့် မြေလတ်အသံက အတည်မပြုနိုင်သေးပါဘူး။

စာတည်း – ဇို

ပဲခူး၊ မေ ၁၇၊ ၂၀၂၃။

ပဲခူးတိုင်းအနောက်ခြမ်း၊ ပေါင်းတည်မြို့နယ်၊ ပဲခူးရိုးမအစပ်မှာ စစ်ကောင်စီနဲ့ ဒေသခံ ကာကွယ်ရေးတပ်တို့ ဆက်တိုက်ဆိုသလို ထိတွေ့တိုက်ခိုက်မှုဖြစ်ခဲ့ရာ စစ်ကောင်စီတပ်သား ၅ ဦးထက်မနည်းသေဆုံးပြီး ထိခိုက်ဒဏ်ရာရရှိသူတွေလည်း ရှိခဲ့တယ်လို့ ပေါင်းတည်မြို့နယ် ပြည်သူ့ကာကွယ်ရေးတပ်ဖွဲ့ (PPDF)ရဲ့ တာဝန်ရှိသူဆီက သိရပါတယ်။

စစ်သားအင်အား ၁၀၀ ကျော်နဲ့ စစ်ကြောင်းထိုးတပ်စွဲနေတာတွေကို ဒေသခံ PDF တွေက မေလ ၇ ရက်ကနေ ၁၅ ရက်အတွင်း ခုခံတိုက်ခိုက်မှု ၆ ကြိမ် ပြုလုပ်ခဲ့တာလို့ သိရပါတယ်။

“ရိုးမအစပ်မှာ စစ်သားကအင်အား ၁၀၀ ကျော်ရှိတယ်။ အဲဒီ ၁၀၀ ကျော်ကနေ တခါတလေ စစ်ကြောင်း ၄ ကြောင်းဖြန့်ထိုးတယ်။ ကျနော်တို့ကလည်း အနီးကပ်တိုက်တာတွေရော သွားလမ်းလာလမ်းတွေကိုရော မိုင်းထောင်မိုင်းဆွဲတာ ထိတွေ့မှု ၆ ကြိမ် ပြုလုပ်နိုင်ခဲ့တယ်၊ အနီးကပ်မြင်ရတာရော ကင်းထောက်တွေရဲ့သတင်းပေးမှုတွေအရ စစ်သား ၅ ဦးထက်မနည်းသေပြီး ဒဏ်ရာရသူတွေလည်းရှိတယ်” လို့ PPDF ရဲ့တာဝန်ရှိသူက ပြောပါတယ်။

အဲ့ဒီစစ်ကောင်စီစစ်ကြောင်းဟာ အရင်ကလို တနေရာတည်းမှာ ကြာကြာမနေပဲ ရိုးမအစပ်မှာ လှည့်လည်လူပ်ရှားနေတာကို မျက်ခြေမပြတ်သတင်းစောင့်ယူကာ တိုက်ခိုက်ခဲ့တာလို့ သူက ဆက်ပြောပါတယ်။

မေလ ၇ ရက် မနက် ၃ နာရီမှာ သိမ်ကုန်းရွာတာဝါတိုင်စောင့်စစ်သားတွေကို လက်လုပ် ၄၀ မမ ၄ လုံးနဲ့ တိုက်ခိုက်ပြီး၊ အဲ့ဒီနေ့ မနက် ၈ နာရီလောက်မှာတော့ ပဲခူးရိုးမအစပ် သစ်ပျောက်စမ်းရွာအရှေ့ဘက်ကို စစ်ကြောင်းထိုးလာတဲ့ စစ်သားအင်အား ၄၀ ကို ကြို့ပင်တောင်အနီးကနေ မိုင်းဆွဲခဲ့လို့ စစ်သား ၆ ဦး ဒဏ်ရာရရှိခဲ့တယ်လို့ ဆိုပါတယ်။

ဒါ့အပြင် မေလ ၁၂ ရက်မှာ ရုပ်ဆိုင်ရွာမှာ တပ်စွဲထားတဲ့စစ်သားတွေကိုလည်း ရွာပြင်ကိုထွက်လာချိန် လက်နက်ငယ်တွေနဲ့ တိုက်ခိုက်ခဲ့လို့ စစ်သား ၄ ဦးလောက် ထိခိုက်ဒဏ်ရာရခဲ့ပါသေးတယ်။

အလားတူ မေလ ၁၃ ရက်မနက် ၇ နာရီလောက်မှာလည်း စစ်ကြောင်းထိုးလာတဲ့ တပ်သားတွေကို ဘန့်ဘွေးကန်ရွာအနီးကနေ လက်နက်ငယ်တွေနဲ့တိုက်ခိုက်ခဲ့ပြီးနောက် မနက် ၁၀ နာရီလောက်မှာတော့ ထိတွေ့မှုဖြစ်ခဲ့ရာ စစ်သား ၂ ဦးသေဆုံးပြီး ၅ ဦး ဒဏ်ရာရခဲ့ပါတယ်။

အဲ့ဒီနေ့က သေဆုံးသူတွေကိုတော့ ဘန့်ဘွေကန်းရွာအနီးက ယာတဲပေါ်မှာတင်ပြီး မီးရှို့ခဲ့တယ်လို့ သိရပါတယ်။

အဲ့ဒီနောက် မေလ ၁၅ ရက်ညနေ ၅ နာရီလောက်မှာတော့ သိမ်ကုန်းတာဝါတိုင်နဲ့ သိမ်ကုန်း ဘုန်းကြီးကျောင်းမှာတပ်စွဲနေတဲ့ စစ်သား ၇၀ လောက်ကို အသင့်ထောင်ထားတဲ့ အဝေးထိန်းပဒေသာမိုင်း ၂ လုံးနဲ့ တိုက်ခိုက်ခဲ့ရာ စစ်သား ၃ ဦးသေဆုံးပြီး ၂ ဦးဒဏ်ရာ ရှိခဲ့တယ်လို့ ဆိုပါတယ်။

“ဒီကောင်တွေ (စစ်သား)တွေ အလောင်းလာကောက်ပြီးအပြန်မှာ ထပ်ဆွဲမယ်ဆိုပြီးအပိုင်စောင့်နေတာ၊ သူတို့က အလောင်းကောက်ပြီးအခြားတလမ်းကနေ အထိုင်ချတဲ့ သိမ်ကုန်းရွာဘက်ကို ပြန်သွားလို့ တပွဲတော့လွတ်သွားတယ်” လို့ PPDF တာဝန်ရှိသူက ပြောပါတယ်။

ထိတွေ့တိုက်ခိုက်မှုတွေအတွင်း စစ်ကောင်စီဘက်က ထိခိုက်သေဆုံးတာတွေကိုတော့ မြေလတ်အသံက သီးခြားအတည်မပြုနိင်သေးပါဘူး။

အဲဒီ ထိတွေ့တိုက်ခိုက်မှုတွေကို ပြည်ခရိုင် – ၃၆၀၂ တပ်ရင်းနဲ့ ပေါင်းတည်မြို့နယ် ပြည်သူ့ကာကွယ်ရေးတပ်ဖွဲ့ – ၃၆၀၁ တို့က တိုက်ခိုက်ခဲ့တာလို့ သိရပါတယ်။

အဆိုပါစစ်ကောင်စီစစ်ကြောင်းဟာ ပေါင်းတည်ပြည်သူ့ကာကွယ်ရေးတပ်ဖွဲ့ တပ်ရင်း – ၃၆၀၁ ရဲ့ ရှေ့တန်းကင်းတဲ ၆ လုံးကိုလည်း ပြီးခဲ့တဲ့ မေလ ၅ ရက်က မီးရှို့ဖျက်စီးခဲ့ပါသေးတယ်။

စာတည်း – လင်း

ပဲခူး၊ မေ ၁၃၊ ၂၀၂၃။

ပဲခူးတိုင်းဒေသကြီး၊ ရေတာရှည်မြို့နယ်၊ ဆွာစက်ရုံအုပ်စု၊ ရှမ်းရွာနေ ကြံ့ခိုင်ရေးနယ်မြေစည်းရုံးရေးမှူး ၁ ဦး နေအိမ်မှာ ပစ်ခတ်ခံရပြီး သေဆုံးသွားတယ်လို့ သိရပါတယ်။

မေလ ၁၂ ရက် ည ၈ နာရီခန့်မှာ ရှမ်းရွာကျေးရွာ (ပြည်ထောင်စုကြံ့ခိုင်ရေးနှင့်ဖွံဖြိုးရေးပါတီ နယ်မြေစည်းရုံး ရေးမှူး)၊ ရာအိမ်မှူး ဦးသန်းမြိုင် ၆၃ နှစ်ဟာ နေအိမ်မှာ ရှိနေချိန် သေနတ်သမားတွေက ဝင်ရောက်ပစ်ခတ်သွားတယ်လို့ ဒေသခံတဦးက ပြောပါတယ်။

“သူက ရာအိမ်မှူးလည်း လုပ်တယ်။ အရင်ကတော့ ကြံ့ခိုင်ရေးပါတီက နယ်မြေစည်းရုံးရေးမှူးပါ။ အခုတော့ လုပ်မလုပ် မသိရဘူး။ သူကတော့ ကျေးရွာအုပ်ကြီးက ခိုင်းတာရှိရင် လိုက်လုပ်ပေးရတာတော့ရှိတယ်။ ကျန်တာကတော့ ဘာလုပ်နေလဲဆိုတာတော့ မသိရဘူး”ပြောပါတယ်။

သေနတ်နဲ့ပစ်ခတ်ခံရလို့ ဦးသန်းမြိုင်ဟာ မေးစေ့အောက်ဖက်မှာ ကျည်ဖောက်ဝင်ဒဏ်ရာရပြီး နေရာမှာပဲ သေဆုံးသွားတယ်လို့ သိရပါတယ်။

သေဆုံးသွားတဲ့ ဦးသန်းမြိုင်အလောင်းကို စစ်ကောင်စီအဖွဲ့က စစ်ဆေးဖို့ ဆွာဆေးရုံကို ယူဆောင်သွားပါတယ်။

အဲဒီပစ်ခတ်မှုကိုတော့ ဘယ်အဖွဲ့က ဘာကြောင့်လုပ်ဆောင်ခဲ့တယ်ဆိုတာ ထုတ်ပြန်ထားတာမျိုး မရှိသေးပါဘူး။

မေလ ၈ ရက် ညကလည်း ရေတာရှည်မြို့နယ်၊ ရဲကုန်းအုပ်စု ဝါးရုံလဲကျေးရွာက ကြံ့ခိုင်ရေးပါတီဝင် ဦးစိုးကြည် ၄၈ နှစ်ဟာ နေအိမ်မှာ လည်ပင်းကိုဓားနဲ့လှီးပြီး သတ်ဖြတ်ခံရသေးတယ်လို့ သိရပါတယ်။

စာတည်း – လင်းဇေ