သေဆုံး

ရွှေဘို၊ ဖေဖော်ဝါရီ ၂၂၊ ၂၀၂၃။

စစ်ကိုင်းတိုင်း၊ ရွှေဘိုမြို့နယ်၊ ပေါက်ချိုင်ရွာကို စစ်ကြောင်းထိုးနေတဲ့စစ်သားတွေကို ဒေသခံPDF မဟာမိတ်တွေက ဖေဖေါ်ဝါရီလ ၂၁ ရက်မနေ့ကမနက်ပိုင်းမှာ လက်နက်မျိုးစုံနဲ့ တိုက်ခိုက်ခဲ့တာကြောင့် ထိခိုက်သေဆုံးမှုတွေ များခဲ့တယ်လို့ ဗိုလ်ကျားရိုင်း – ရွှေဘို LPDF က သတင်းထုတ်ပြန်ထားပါတယ်။

ရွှေဘိုမြို့နယ်၊ သပြေကန်ရွာက စာသင်ကျောင်းနဲ့နေအိမ်တလုံးကိုမီးရှို့ပြီး အင်အား ၇၀ ဝန်းကျင်နဲ့ ထွက်လာတဲ့စစ်ကြောင်းက ပေါက်ချိုင်ရွာကနေအိမ်ကိုမီးရှို့ချိန် မနက် ၉ နာရီလောက်မှာ တိုက်မိုင်း အလုံးရေ ၂၀ ကျော်အပြင် ၆၀ မမ ကျကွဲလက်နက်ကြီးတွေ၊ ဒရုန်းတွေနဲ့ အသင့်စောင့် တိုက်ခိုက်ခဲ့တာလို့ ဆိုပါတယ်။

“နယ်မြေရှင်းလင်းရေးလုပ်တဲ့အခါမှာ စစ်သားအလောင်းမီးရိူ့ထားတာတွေ၊ တိုက်မိထားတဲ့ မိုင်းကျင်းတွေဘေးမှာ သွေးကွက်တွေ တွေ့ရတယ်။ စစ်ကြောင်းရှေ့ဆက်မတိုးတာကိုတွက်ရင် သူတို့ဘက်က ဗိုလ်ကြီးအဆင့်လောက်ကျသွားတဲ့သဘောမှာရှိတယ်”လို့ ဗိုလ်ကျားရိုင်းအဖွဲ့က တာဝန်ခံရဲဘော်ဗလကြီးက ပြောပါတယ်။

နယ်မြေရှင်းလင်းစဥ် ၃ ပွင့်ဗိုလ်အကျီတထည်၊ ၄၀ မမ ဗုံးသီးအခွံ၊ ကျည်ဘောက်တခု၊ ၇၃ မမပို့ယမ်းဗူး၊ နင်းမိုင်းတလုံး၊ အခြားအသုံးအဆောင်ပစ္စည်းတွေလည်း သိမ်းဆည်းရမိတယ်လို့ သူကဆက်ပြောပါတယ်။

တိုက်ခိုက်မှုကြောင့် စစ်သား ၂၅ ဦးသေဆုံးကာ ၁၈ ဦးဒဏ်ရာရတယ်လို့ ဗိုလ်ကျားရိုင်း – ရွှေဘို LPDF ကထုတ်ပြန်ထားပေမယ့် ဒီဒဏ်ရာရ၊ သေဆုံးမှုအရေအတွက်နဲ့ပတ်သက်ပြီး မြေလတ်အသံက သီးခြားအတည်မပြုနိုင်သေးပါဘူး။

တိုက်ခိုက်မှုအတွင်း ထိခိုက်သေဆုံးသူတွေများတဲ့အတွက် စစ်ကြောင်းရှေ့ဆက်မတိုးတော့ပဲ ဒဏ်ရာရစစ်သားတွေကိုထမ်းကာ အနီးဆုံးဖြစ်တဲ့ တည်သီးတောရွာဘက်ကို ဝင်ရောက်သွားတယ်လို့ ဆိုပါတယ်။

တိုက်ခိုက်မှုကို ဗိုလ်ကျားရိုင်း-ရွှေဘို(LPDF)အဖွဲ့၊ ဗိုလ်ဂျပန်ကြီး TTT- Shwebo -LPDF၊ C&T SHWEBO LPDF၊ ဗိုလ်ကျားပျံ – ရွှေဘို (LPDF)အပါအဝင် မဟာမိတ်အဖွဲ့တွေက ပူးပေါင်း လုပ်ဆောင်ခဲ့ကြတာလည်း ဖြစ်ပါတယ်။

အဲဒီစစ်ကြောင်းဟာ ဖေဖေါ်ဝါရီလ ၁၂ ရက်ကစတင်ကာ ကျောက်မြင့်ရွာ၊ တင့်တယ်ရွာ၊ ငါးဆူကုန်းရွာ၊ မဲတောရွာ၊ ချီပါရွာ၊ ပန်းလှိုင်ရွာ၊ ရေတော်မူရွာ၊ ဝါးရုံကန်ရွာ၊ သန်းတောရွာ၊ ထူးကြီးရွာ၊ တည်ပင်ကျေးရွာတွေကိုလည်း မီးရိူ့ခဲ့တဲ့ စစ်ကြောင်းဖြစ်တယ်လို့လည်း သိရပါတယ်။

ရွှေဘို၊ ဖေဖော်ဝါရီ ၂၂၊ ၂၀၂၃။

စစ်ကိုင်းတိုင်း၊ ရွှေဘိုမြို့နယ် အရှေ့ခြမ်း‌ရှိ ကုလားမရွာနဲ့ လက်ကောက်ကျကျေးရွာ အနောက်ဘက် ဘိုးနတ်တောင်‌နဲ့ တောင်လှတောင်အပေါ်မှာ ရောက်ရှိနေတဲ့ စစ်ကောင်စီနဲ့ပျု‌စောထီး ပူးပေါင်းတပ်ဖွဲ့‌ကို PDF တွေဘက်က လက်နက်ကြီးနဲ့ ပစ်ခတ်ခံရလို့ ပျု ၁ ဦး သေဆုံးသွားတယ်လို့ သိရပါတယ်။

ရွှေဘိုကျောက်မြောင်းနယ်ဘက်က စစ်ကောင်စီတပ်ဖွဲ့ဝင်တွေနဲ့ တောင်ခြေအနီးမှာရှိတဲ့ ပျူ ရွာတွေက ပျူစောထီးပူးပေါင်းတပ်ဖွဲ့တွေဟာ အဲ့ဒီတောင်တွေပေါ်ကို အင်အား ၃၀ နီးပါးနဲ့ စစ်ကြောင်းထိုး ရောက်ရှိနေတာဖြစ်ပြီး အဲ့ဒီစစ်အုပ်စုကို ဖေဖော်ဝါရီ ၂၀ ရက်နေ့က လက်လုပ် ၆၀ မမ လက်နက်ကြီး ၇ လုံးနဲ့ သွားရောက် ပစ်ခတ်တိုက်ခိုက်ခဲ့တာကြောင့် ၁ နာရီနီးပါးအကြာ အပြန်အလှန်တိုက်ပွဲ ဖြစ်ပွားခဲ့တယ်လို့ ဆိုပါတယ်။

“ဘိုးနတ်တောင်နဲ့ တောင်လှ ဆိုတာ ကျေးရွာ အထင်ကရ တောင်တွေပါ။ စခတွေက အခင်းဖြစ်တဲ့ တောင်ပေါ်ကို အဲဒီနေ့ကပဲ တိုးလာတာပါ။ လက်နက်ကြီးတွေ စက်လက်တွေနဲ့ တရစပ် ပစ်ခတ်ကြတယ်။ အဲ့ဒီမှာပဲ ကျနော်တို့ဘက်ကနေ စနိုက်ဘာနဲ့ ပစ်ခတ်လိုက်တာ ရန်သူ ထိမှန်သွားတယ်။ အဲ့ဒီမှာ စကုပ်ကနေ မြင်တွေ့ ရတာ၊ ထိမှန်သေဆုံးသွားတာကို မြင်လိုက်ရတာမျိုးမို့ အတည်ပြုနိုင်ခဲ့တာပါ” လို့ ဝက်လက်ပြည်သူ့တော်လှန်ရေးတပ်ဦး ဗဟိုသတင်းနှင့်ပြန်ကြားရေး တာဝန်ခံ ရဲဘော်လွန်းညီက မြေလတ်အသံကို ပြောပါတယ်။

တိုက်ပွဲအတွင်း စစ်ကောင်စီတပ်ဖွဲ့တွေက လက်နက်ကြီးတွေနဲ့ ပြန်လည်ပစ်ခတ်ခဲ့ပေမယ့်လည်း တော်လှန်ရေးတပ်ဖွဲ့တွေဘက်က အထိခိုက်မရှိ အောင်မြင်စွာ ဆုတ်ခွာနိုင်ခဲ့တယ်လို့လည်း သူက ဆိုပါတယ်။

အဲ့ဒီတိုက်ခိုက်မှုကို ပြည်သူ့တော်လှန်ရေးတပ်ဦး(ဝက်လက် လှုပ်ရှားစစ်ဒေသ)တပ်ဖွဲ့နဲ့ Brave Brothers မဟာမိတ်တပ်ဖွဲ့တွေက ပူးပေါင်းတိုက်ခိုက်ခဲ့တာလို့ သိရပါတယ်။

လက်ရှိမှာ စစ်ကောင်စီတပ်ဖွဲ့ဟာ အဲ့ဒီတောင်တွေပေါ်မှာ အထိုင်ချတပ်စွဲထားပြီး တောင်တွေပေါ် နဲ့ အနီးတ၀ိုက်ရွာတွေကို စစ်ကြောင်းထိုးမှုတွေ လုပ်ဆောင်လာနိုင်လို့ ဒေသခံတွေ ကာကွယ်နိုင်ဖို့ ပြင်ဆင်ထားကြဖို့လည်း PDF ပြန်ကြားရေးတာဝန်ခံ ရဲဘော်လွန်းညီက ဆိုပါတယ်။

ငါန်းဇွန်၊ ဖေဖော်ဝါရီ ၂၁၊ ၂၀၂၃။

မန္တလေးတိုင်း၊ ငါန်းဇွန်မြို့နယ်၊ သားကြင်ကျေးရွာအနီးမှာ လှည့်ကင်းထွက်လာတဲ့ စစ်ကောင်စီအဖွဲ့ တိုက်ခိုက်ခံရပြီး တပ်ကြပ်ကြီး ၁ ဦးအပါအဝင် ၄ ဦးသေဆုံးတယ်လို့ သိရပါတယ်။

ဖေဖော်ဝါရီလ ၂၀ ရက်ည ၇ နာရီ ၁၅ မိနစ်ခန့်မှာ သားကြင်ရွာမှာတပ်စွဲထားတဲ့ စစ်ကောင်စီအဖွဲ့မှ အင်အား ၁၀ ဦးကျော်ဟာ လှည့်ကင်းထွက်ချိန် ကျေးရွာအပြင်ဘက်ဘုရားနားအရောက်မှာ တိုက်ခိုက်ခဲ့တာလို့ Local People’s Defense Force – SINTGAING ပြန်ကြားရေးတာဝန်ခံက ပြောပါတယ်။

“ကျနော်တို့အဖွဲ့ကို ဒေသကာကွယ်ရေးမိတ်ဖက်အဖွဲ့တွေကခေါ်လို့ ပူးပေါင်းသွားရောက်တိုက်ခိုက်ခဲ့တာပါ။ တိုက်ပွဲဖြစ်ချိန်ကတော့ မိနစ် ၂၀လောက်ကြာတယ်။ သူတို့လူတွေ အလစ်အငိုက်ခံလိုက်ရလို့ ပြန်ပစ်တာပါ။ ထိခိုက်သူတွေကို သူတို့အဖွဲ့တွေပြန်ဆွဲသွားတာက မျက်မြင်ပါ။ မျက်မြင်အရတော့ ၄ ယောက်သေတယ်” လို့ ပြောပါတယ်။

အဲ့ဒီစစ်‌ကြောင်းကို ခြုံခိုတိုက်ခိုက်ဖို့သွားကြချိန် တဖက်ကသတင်းရသွားပြီး စတင်ပစ်ခတ်ခဲ့လို့ သတ်မှတ်နေရာမရောက်ခင်မှာပဲ ထိတွေ့တိုက်ပွဲဖြစ်ခဲ့ကာ အနီးကပ်ပစ်ခတ်ခဲ့ရတယ်လို့လည်း ပူးပေါင်းပါ၀င်တိုက်ခိုက်ခဲ့တဲ့ ငါန်းဇွန်ပကဖတပ်ဖွဲ့မှ သတင်းတာဝန်ခံက ပြောပါတယ်။

“ချဉ်းကပ်တဲ့အနေထားကို ဒီကောင်တွေက ရိပ်စားမိသွားတယ်၊ သတင်းပေးရှိလို့လား ဘာလားတော့ မသိဘူးပေါ့နော်၊ ကျနော်တို့မှန်းသိလိုက်တာနဲ့ စပစ်တာဗျ၊ ဘောလုံးကွင်းထဲမှာစပစ်တော့ ခြုံခိုတိုက်ခိုက်ဖို့ သတ်မှတ်ထားတဲ့နေရာ မရောက်တဲ့အချိန်တွင်းမှာပဲ Battle ဖြစ်သွားတယ်”လို့ ပြောပါတယ်။

အဲဒီတိုက်ပွဲမှာ စစ်ကောင်စီဘက်က တပ်ကြပ်ကြီးအပါ ၄ ဦးသေဆုံးပြီး ၇ ဦးဒဏ်ရာရခဲ့သလို စစ်ကောင်စီတပ်သားတွေအသုံးပြုတဲ့ MA – 2 ၁ လက်နဲ့ဖုန်း၁ လုံးကို သိမ်းဆည်းရမိခဲ့ပြီး သေဆုံးဒဏ်ရရာသူတွေကိုတော့ စစ်ကောင်စီဘက်က ည ၁၂ နာရီခန့်မှာ ကားတွေနဲ့သယ်ဆောင်ကာ ငါန်းဇွန်မြို့ဘက်ကိုသွားတယ်လို့ သိရပါတယ်။

သေဆုံးခဲ့သူတွေထဲမှာ ဗိုလ်ကြီးနန္ဒမင်း ဆိုသူပါပါ၀င်တယ်လို့ တော်လှန်ရေးအင်အားစုတွေဘက်က ‌ပြောဆိုပေမယ့် မြေလတ်အသံက သီးခြားအတည်မပြုနိုင်သေးပါဘူး။

စစ်ကောင်စီဘက်က လက်နက်ကြီးနဲ့ပစ်ခတ်လို့ သားကြင်ရွာထဲက နေအိမ်တခုပေါ် ကျရောက်ပေါက်ကွဲခဲ့ကာ အိမ်မှာရှိတဲ့ ပြည်သူ ၂ ဦးလည်း ထိခိုက်ခဲ့တယ်လို့ သိရပါတယ်။

အဆိုပါစစ်ကောင်စီတပ်ဟာ အင်အား ၃၀ ကျော်နဲ့ သာကြင်ကျေးရွာမှာ တပ်စွဲထားတာ ၃ လကျော်ရှိနေပြီး ဘေးအနီးအနားရွာတွေကို စစ်ကြောင်းလိုက် လှုပ်ရှားသွားလာတာတွေရှိတယ်လို့ ဆိုပါတယ်။

အဲဒီတိုက်ခိုက်မှုကို LPDF SINTGAING၊ TGYR – Youth Guerrila Counter Revolution (LPDF)၊ ငါန်းဇွန်မြို့နယ်ပကဖ၊ MN PDF Myitnge၊ မာန်စွယ်ကျားပြည်သူ့ကာကွယ်ရေးတပ်ဖွဲ့၊ ဇာမဏီ ပျောက်ကြားတပ်ဖွဲ့၊ ကျောက်ဆည် ပကဖ မဟာမိတ်တပ်ဖွဲ့တွေက ပူးပေါင်းတိုက်ခိုက်ခဲ့တာပါ။

ဖေဖော်ဝါရီလ ၁၅ ရက်ညပိုင်းကလည်း ငါန်းဇွန်မြို့နယ်၊ ညောင်ပင်ကြီးရိုးရွာအနီး ငါန်းဇွန်-တံတားဦး ၁၄ မိုင်လမ်းပေါ်မှာ လှည့်ကင်းထွက်လာတဲ့ စစ်ကောင်စီအဖွဲ့မိုင်းဆွဲတိုက်ခိုက်ခံရပြီး ထိခိုက်သေဆုံးတာတွေ ရှိခဲ့သေးတယ်လို့ သိရပါတယ်။

ယင်းမာပင်၊ ဖေဖော်ဝါရီ ၂၀၊ ၂၀၂၃။

စစ်ကိုင်းတိုင်း၊ ယင်းမာပင်မြို့နယ်၊ ဘန့်ဘွေးရွာကနေ စစ်ကြောင်းထွက်လာတဲ့ စစ်သားနဲ့ ပျူစောထီးတွေကို ဒေသခံကာကွယ်ရေးတပ်တွေက ဖေဖေါ်ဝါရီလ ၁၉ ရက်မနေ့မနက် ၁၀ နာရီလောက်ကတိုက်ခိုက်တာကြောင့် ၃ ဦးသေဆုံးခဲ့တယ်လို့ ဗျတ္တညီနောင်အဖွဲ့က ပြောပါတယ်။

ဘန့်ဘွေးရွာရဲ့မြောက်ဘက် ၁ မိုင်ခွဲလောက်အကွာ ရေထွက်ရိုးကျေးရွာအနီးမှာ အင်အား ၁၄ ဦးလောက်နဲ့ စစ်ကြောင်းထိုးလာတာကို စောင့်ကြိုတိုက်ခိုက်ခဲ့တာလို့ ဆိုပါတယ်။

“စစ်သားတွေနဲ့ပျူစောထီးတွေ စစ်ကြောင်းထွက်လာတာကို ဒေသအထူးအဖွဲ့က ရေထွက်ရိုးနားက စောင့်ပြီး မောင်းပြန်တွေနဲ့တိုက်ခိုက်ခဲ့တာပါ။ ကျနော်တို့ကျန်တဲ့ ၄ ဖွဲ့ကလည်း ဘန့်ဘွေးရွာထဲက စစ်သားတွေကို လက်နက်ကြီးနဲ့ပစ်ပေးနေတာပါ” လို့ ဗျတ္တညီနောင်အဖွဲ့တာဝန်ရှိသူက ပြောပါတယ်။

တိုက်ခိုက်ခံရမှုကြောင့် ဘန့်ဘွေးရွာသားပျူစောထီးနှစ်ဦးနဲ့ စစ်သားတဦးသေဆုံးခဲ့ပြီး စစ်ကြောင်းကတော့ ရှေ့ဆက်မတိုးတော့ဘဲ နောက်ပြန်လှည့်ကာ အဲဒီနေ့မှာပဲသေဆုံးသူတွေကို ဘန့်ဘွေးသချိုင်းမှာ မီးရှို့သင်္ဂြိုလ်ခဲ့တယ်လို့ သူကဆက်ပြောပါတယ်။

တိုက်ခိုက်မှုဖြစ်ခဲ့တဲ့ ရေထွက်ရိုးရွာအနီးကို မဟာမိတ်အဖွဲ့တွေက နယ်မြေရှင်းလင်းရာ အသားစတွေနဲ့အတူ သွေးစွန်းစစ်ဦးထုပ်တလုံးနဲ့ ကျည် ၅ တောင့်တွေ့ရှိခဲ့တယ်လို့ ဆိုပါတယ်။

အဲဒီတိုက်ခိုက်မှုမှာ ဗျတ္တညီနောင်၊ ဝင်္ကပါအဖွဲ့၊ Black Team၊ Golden Triangel forceနဲ့အတူ ဒေသအထူးအဖွဲ့တို့ ပူးပေါင်းလုပ်ဆောင်ခဲ့တာဖြစ်ပြီး စစ်ကောင်စီဘက်က သေဆုံးမှုအရေအတွက်ကိုတော့ မြေလတ်အသံက သီးခြားအတည်မပြုနိုင်သေးပါဘူး။

ဘန့်ဘွေးကျေးရွာဟာ အိမ်ခြေ ၃၅၀ လောက်ရှိပြီး ပြီးခဲ့တဲ့တနှစ်ခွဲကျော်လောက်ကတည်းက စစ်တပ်က အင်အား ၇၀ လောက်နဲ့ တပ်စွဲနေကာ နေအိမ်တွေကိုမီးရိူ့ခဲ့တာကြောင့် အိမ်ခြေ ၃၄၀ လောက်ကဒေသခံတွေဟာ ရွာကိုစွန့်ခွာပြီး တောတိုက်တွေထဲမှာနေထိုင်နေကြရတာဖြစ်သလို ကျန်အိမ်ခြေ ၁၀ လုံးလောက်တော့ စစ်တပ်နဲ့ပေါင်းပြီး ပျူစောထီးအဖြစ်ကျန်ရှိခဲ့တာဖြစ်ပါတယ်။

ပြီးခဲ့တဲ့ဖေဖေါ်ဝါရီလ ၁၅ ရက်ကလည်း စစ်သားတွေနဲ့ပျူစောထီးတွေဟာ ဘန့်ဘွေးရွာအနီးရှိ တောတိုက်တွေထဲက နေအိမ် ၈ လုံးကို မီးရှို့ဖျက်ဆီးခဲ့ကြပါသေးတယ်။

ဒါ့အပြင် ဇန်နဝါရီလ ၁၇ ရက်ကလည်း ဘန့်ဘွေးရွာက စစ်သားနဲ့ပျူတွေဟာ စစ်ရှောင်နေတဲ့ ဘန့်ဘွေးရွာသား အသက်၂၅ နှစ်အရွယ် ကိုခင်မောင်ဌေးနဲ့ တူဖြစ်သူ ၁၆ နှစ်အရွယ် မောင်နိုင်လင်းအောင်တို့ ၂ ဦးကို ဘန့်ဘွေးရွာကိုရှောင်ကွင်းဖောက်ထားတဲ့လမ်းမှာ ဖမ်းဆီးခဲ့ပြီး၊ ဒီနေ့တိုင်မိသားစုနဲ့ အဆက်အသွယ်မရရှိသေးပါဘူးလို့လည်း သိရပါတယ်။

ရေတာရှည်၊ ဖေဖော်ဝါရီ ၂၀၊ ၂၀၂၃။

ပဲခူးတိုင်းဒေသကြီး၊ ရေတာရှည်မြို့နယ်၊ ဇရစ်ရိုးကုန်းကျေးရွာနဲ့ ပိန်းသီလာကျေးရွာ အနောက်ဘက် စစ်တောင်းမြစ်ဘေး တိုက်ပွဲမှာ စစ်ကောင်စီဘက်က အရာရှိတွေအပါအဝင် ၃၀ ကျော်သေဆုံးခဲ့ပြီး အရာရှိတွေရဲ့ အလောင်းတွေကိုသာ ပြန်ကောက်သွားတယ်လို့ သိရပါတယ်။

ဖေဖော်ဝါရီလ ၁၆ ရက်က ကျေးရွာတွေဘက်ကို မီးရှို့ဓါးပြတိုက်ပြန်လာတဲ့ စစ်သားအင်အား ၁၀၀ ကျော်ကို ကြားဖြတ်တိုက်ခိုက်ခဲ့ရာမှာ အရာရှိ​တွေ အပါအဝင် ထိခိုက်သေဆုံးများပြားခဲ့တယ်လို့ ပဲခူးတိုင်းဒေသကြီး ပြည်သူ့ကာကွယ်ရေးတပ်ဖွဲ့တာဝန်ရှိသူကပြောပါတယ်။

“ဖြစ်ခဲ့တာကတော့ ပွဲကြီးပါပဲ။ တိုက်ပွဲက ၄ နာရီကျော်လောက်ဖြစ်ခဲ့တယ်။ သူတို့ ရွာတွေကို မီးရှို့ သိမ်းဆည်းပြီးပြန်လာတာကို ကြားဖြတ်တိုက်ခိုက်တာ။ တိုက်ပွဲမှာ သေဆုံးခဲ့တဲ့ စကစ အရာရှိတွေကိုတော့ ​သူတို့ဘက်က ပြန်ကောက်သွားတယ်လို့ သိရတယ်။ အခြားအဆင့် အလောင်းတွေဘဲ ကျန်ခဲ့တယ်။ “လို့ ပြောပါတယ်။

တိုက်ပွဲအပြီး မြေပြင်မှာ တွေ့ရတဲ့ တပ်သားအလောင်း ၇လောင်းသာတွေ့ရပြီး ကျန်တပ်သားတွေက ဆေးရုံရောက်မှ သေဆုံးတာတွေဖြစ်တယ်လို့ ဖရဲသီးသတင်းပေးနဲ့ မြေပြင်အချက်အလက်တွေအရ ထုတ်ပြန်ခဲ့တာလို့ ဆိုပါတယ်။

အဲဒီတိုက်ပွဲမှာ စစ်ကောင်စီတပ်သားတွေဆီက MA3 သေနတ် ၄လက်၊ MA11 ၂လက်၊ MA2 ၁လက်၊ ကျည်ဘောက် ၁၈ခု၊ ကျည် ၅၂၀တောင့် ၆၀မမ ဗုံးသီး၂လုံး အပြင် ရိက္ခာနဲ့ဆက်စပ်ပစ္စည်းတွေကို PDF ဘက်က သိမ်းဆည်းရခဲ့တယ်လို့ သိရပါတယ်။

အဲဒီအပြင် ပြည်သူပိုင်နေအိမ်တွေကနေ စစ်ကောင်စီတပ်ဖွဲ့ဝင်တွေ ဓားပြတိုက်ခိုးယူလာတဲ့ လက်ကောက် ၂ကွင်း၊ ဆွဲကြိုး ၁ကုံး၊ လက်စွပ် ၁ကွင်း၊ ဖုန်း ၃လုံးတို့ကိုပါ ထပ်မံသိမ်းဆည်းရရှိခဲ့ပြီး လက်ဝတ်ရတနာတွေနဲ့ အသုံးအဆောင်ပစ္စည်းတွေကို မူလပိုင်ရှင်ထံပြန်ပေးဖို့ စုံစမ်းနေတယ်လို့ သိရပါတယ်။

မကွေး၊ ဖေဖော်ဝါရီ ၁၉၊ ၂၀၂၃။

မကွေးတိုင်း၊ ဆောမြို့နယ်၊ ကျောက်ထုအမြှောက်တပ်ကထွက်လာတဲ့ စစ်ကောင်စီတပ်သားတွေကို ကျောက်ထုမြို့နယ်အတွင်းမှာ ဒေသခံကာကွယ်ရေးတပ်တွေက ၂ ရက်မိုင်းဆွဲတိုက်ခိုက်ရာ ထိခိုက်သေဆုံးမှုတွေများခဲ့တယ်လို့ သိရပါတယ်။

ဖေဖော်ဝါရီလ ၁၆ ရက်မနက်ပိုင်းက ကျောက်ထုနဲ့ ရွှေရောင်သာရွာလမ်းကြောမှာ ၂ ကြိမ်၊ ဖေဖော်ဝါရီလ ၁၈ ရက်မနေ့ကနေ့လည်ပိုင်းက မီအယ်ကျေးရွာတောင်ဘက်မှာမိုင်းဆွဲတိုက်ခိုက်ခဲ့ပြီး လက်နက်ငယ်တွေနဲ့ပါ ပစ်ခတ်တိုက်ခိုက်ခဲ့တာလို့ Kyaukhtu Regional People Defense Force တာဝန်ခံက ပြောပါတယ်။

“၁၆ ရက်နေ့က ကျောက်ထုအမြှောက်တပ်ထဲကထွက်လာတာ၊ ခလရ ၂၇၄ တပ်က စစ်ကား ၂ စီး ဖောကား ၁ စီးနဲ့ အင်အား ၁၀၈ ဦးပါတဲ့စစ်သားတွေကို ကျောက်ထုနဲ့ရွှေရောင်သာအကြား မနက် ၈ နာရီ ၅၃ မိနစ်မှာမိုင်းဆွဲခဲ့တယ်၊ ၂ နေရာမိုင်းဆွဲတိုက်ခိုက်တာမှာ*တွေဘက်က ၁၁ ယောက်လောက် သေတယ်” လို့ပြောပါတယ်။

အဲ့ဒီနေ့တိုက်ခိုက်ခံရတဲ့ တပ်သားတွေဟာ လယ်စောကျေးရွာမှာညအိပ်ပြီး ထီးလင်းဘက်က ပျူစောထီးစစ်ကြောင်းနဲ့တပ်ချိန်းကာ ကျောက်ထုဘက်ကိုပြန်လာချိန် ၁၈ ရက်နေ့လည် ၁၂ နာရီ ၄၁ မိနစ်လောက်ကစပြီး ဒုတိယအကြိမ် မိုင်း ၃ ကြိမ်ခွဲတိုက်ခိုက်ခံရတဲ့အပြင် လက်နက်ငယ်တွေနဲ့ပါ ပစ်ခတ်ခံခဲ့ရတာလည်း ဖြစ်ပါတယ်။

ဒီစစ်ကြောင်းကိုတိုက်ခိုက်ချိန်မှာတော့ စစ်ကောင်စီဘက်က အင်အား ၁၇၀ ဝန်းကျင်ပါလာပြီး စစ်သား ၁၄ ဦးသေဆုံးခဲ့တယ်လို့ သိရကာ၊ ၂ ရက်တာတိုက်ခိုက်မှုအတွင်း စစ်သား ဆယ်ဂဏန်းကျော် သေဆုံးခဲ့တယ်လို့ ကာကွယ်ရေးရဲဘော်တွေကခန့်မှန်းပေမယ့် အရေအတွက်အတိအကျကိုတော့ မြေလတ်အသံက သီးခြားအတည်မပြုနိုင်သေးပါဘူး။

ဒီတိုက်ခိုက်မှုကို Kyaukhtu Regional People Defense Force နဲ့ ဂန့်ဂေါခရိုင် တပ်ရင်းအမှတ် (၈)/(၉)တို့က ပူးပေါင်းလုပ်ဆောင်ခဲ့တာလည်းဖြစ်ပါတယ်။

အဲ့ဒီစစ်ကောင်စီတပ်သားတွေထဲမှာ မင်းတပ်အခြေစိုက် ခလရ ၂၇၄ လည်းပါဝင်ပြီး၊ ကျောက်ထုအမြှောက်တပ်ထဲမှာတပ်စွဲနေကာ တိုက်ခိုက်ခံရပြီးနောက်မှာတော့ သူတို့တပ်စွဲရာ အမြှောက်တပ်ထဲကို ပြန်သွားကြတယ်လို့ သိရပါတယ်။

ပြီးခဲ့တဲ့ဖေဖော်ဝါရီလ ၇ ရက်ကလည်း ကျောက်ထုမြို့နယ်၊ သရက်ချည်ကျေးရွာဘက်ကနေ ကျောက်ထုဘက်ကိုပြန်လာတဲ့ စစ်အုပ်စုကို Kyaukhtu Regional People Defense Forceအဖွဲ့က ငလွန်းကျေးရွာနဲ့ ကျောက်ထုမြို့အကြား မိုင်းဆွဲတိုက်ခိုက်ခဲ့ရာ စစ်သား ၃ ဦး သေဆုံးခဲ့ပါသေးတယ်။