မြေလတ်အသံ၊ ဇူလိုင် ၂၃၊ ၂၀၂၅။

ပဲခူးတိုင်း၊ အုတ်ဖိုမြို့နယ်၊ ကြို့ကိုးပင်ရွာကို စစ်ကောင်စီတပ်က ဇူလိုင် ၂၂ ရက် မနေ့ညနေ ၆ နာရီကျော်မှာ ဝင်ရောက်မီးရှို့ပြီး ရွာခံအမျိုးသား ၆ ဦးကို ဖမ်းဆီးထားတယ်လို့ ဒေသခံတွေဆီကသိရပါတယ်။

ဝိုင်းကျေးရွာစခန်းကနေ စစ်ကြောင်းထိုးထွက်ခွာလာတဲ့ အင်အား ၁၀၀ ခန့်ရှိ စစ်ကောင်စီတပ်ဖွဲ့ဝင်တွေက ကြို့ကိုးပင်ရွာကို ဝင်ရောက်မီးရှို့ပြီး ဇူလိုင် ၂၃ ရက် ဒီကနေ့အထိ တပ်စွဲထားတယ်လို့ဆိုပါတယ်။

“စကစတွေပြန်ဆုတ်တာတော့ မရှိသေးဘူး။ စာသင်ကျောင်းမှာ ပထမနေတယ်။ နောက်တော့ ရွာထဲက ဖိုးသဲတို့ အိမ်တိုက်မှာ နေတယ်။ မနေ့ညကဆိုရင် လက်နက်ကြီး၊ လက်နက်ငယ်ပစ်ခတ်သံတွေကြားရတယ်။ တချို့က နှစ်ဖက်ပစ်တယ်ပြောတယ်”လို့ အုတ်ဖိုဒေသခံတော်လှန်ရေးတပ်ဖွဲ့ဝင်တဦးက မြေလတ်အသံကို ပြောပါတယ်။

ဖမ်းဆီးခံရသူတွေမှာ ကျေးရွာအတွင်းထွက်မပြေးဘဲကျန်ခဲ့သူတချို့နဲ့ ထွက်ပြေးပြီးနောက် ရွာအတွင်းပြန်ဝင်လာသူတချို့ပါဝင်ပြီး ဇူလိုင် ၂၃ ရက်အထိ ဖမ်းဆီးထားတဲ့အပြင် ကျေးရွာအတွက် တပ်စွဲထားဆဲဖြစ်တာကြောင့် ၎င်းတို့ရဲ့ အသေးစိတ်အချက်အလက်တွေနဲ့ မီးရှို့ခံနေရတဲ့ အိမ်ခြေ ၃၀၀ ခန့်ရှိ ကြို့ကိုးပင်ကျေးရွာနေအိမ်တွေရဲ့ အခြေအနေတွေကို မသိရသေးပါဘူး။

ဇူလိုင် ၂၀ ရက်မနက်ပိုင်းမှာ ကြို့ကိုးပင်ကျေးရွာထိပ်ကို ရောက်ရှိလာတဲ့ အင်အား ၁၀၀ ခန့်ပါ စစ်ကြောင်းကို စောင့်ကြိုတိုက်ခိုက်ခဲ့ရာ စစ်ကောင်စီတပ်ဖွဲ့ဝင် ၅ ဦးသေဆုံးပြီး ၃ ဦးဒဏ်ရာရရှိခဲ့တယ်လို့ သာယာဝတီခရိုင် တပ်ရင်း ၃၈ဝ၂၊ တပ်ခွဲ ၆ Black Dragon GBK – PDF ကထုတ်ပြန်ထားပါတယ်။ အဲ့ဒီနောက် ယမန်နေ့ ညနေပိုင်းမှာ ကျေးရွာတွင်း ဝင်ရောက်စစ်ကြောင်းထိုးလာတာလည်း ဖြစ်ပါတယ်။

ပြီးခဲ့တဲ့ဇွန် ၈ ရက်ကလည်း အင်အား ၁၅၀ ခန့်ရှိတဲ့ စစ်ကောင်စီတပ်သားတွေကအုတ်ဖိုမြို့နယ်က ကိုင်းကြီး၊ ကိုင်းကလေး၊ ဒေါင်းကြီး၊ ဒေါင်းလေး၊ ဒေါင်းစပါးကွင်းစတဲ့ကျေးရွာတွေ စစ်ကြောင်းထိုးခဲ့ပါသေးတယ်။

စာတည်း – ဟိန်းစံ

ညောင်ဦး၊ ဇူလိုင် ၁၄၊ ၂၀၂၅။

မန္တလေးတိုင်း၊ ညောင်ဦးမြို့နယ်၊ လက်ထုပ်ကျေးရွာမှာ အမျိုးသား ၁ ဦးပစ်သတ်ခံရတယ်လို့ ညောင်ဦးမြို့နယ်ပြည်သူ့ကာကွယ်ရေးအဖွဲ့ဆီက သိရပါတယ်။

ပစ်သတ်ခံရသူဟာ ရွာလှည့်စျေးရောင်းသူ အသက် ၅၃ နှစ်အရွယ် ဦးမျိုးမြင့်ဝင်းဖြစ်ပြီး ဇူလိုင် ၁၃ ရက်မနက် ၉ နာရီကျော်က နေအိမ်မှာရှိနေချိန်ပစ်သတ်ခံရတာလို့ ဆိုပါတယ်။

“အဲ့ဘက်ခြမ်းက ရှင်းခံရတယ်လို့ သိရတယ်။ ဘယ်အဖွဲ့အစည်းက ရှင်းခဲ့တယ်ဆိုတာမသိရသေးဘူး။ လောလောဆယ်တော့ သာမန်လူလို့တော့သိရတယ်။ ပြစ်မှုကျူးလွန်ထားတာ ဘာမှမရှိဘူးလို့တော့ စုံစမ်းထားရတယ်။ “လို့ ညောင်ဦးမြို့နယ်ပကဖ တာဝန်ခံ ကိုဇီးကပြောပါတယ်။

ပစ်ခတ်ခံရတာကြောင့် ဦးမျိုးမြင့်ဝင်းရဲ့ ဝမ်းဗိုက်နဲ့လက်တွေမှာ ကျည်ထိဒဏ်ရာတွေနဲ့ သေဆုံးခဲ့တယ်လို့ သိရပြီး ဒီပစ်ခတ်မှုကိုတော့ ဘယ်အဖွဲ့ကလုပ်ခဲ့တယ်တယ်ဆိုတာ ဇူလိုင် ၁၄ ရက်အထိ သက်ဆိုင်ရာအဖွဲ့တွေဘက်က သတင်းထုတ်ပြန်တာမျိုးမရှိသေးပါဘူး။

ပြီးခဲ့တဲ့ ဇွန် ၁၉ ရက်ကလည်း ညောင်ဦးမြို့နယ်၊ လက်ပံခြေပေါ်ကျေးရွာအုပ်စု၊ တောင်ဖက်တန်းကျေးရွာနေ အုပ်ချုပ်ရေးရွာခွဲတာဝန်ခံ ၁ ဦးနေအိမ်မှာ ရှိနေချိန် သေနတ်သမားတွေကလာရောက်ပစ်သတ်လို့ သေဆုံးသွားသေးတယ်လို့ သိရပါတယ်။

စာတည်း – လင်း

မြေလတ်အသံ၊ ဇွန် ၂၇၊ ၂၀၂၅။

စစ်ကိုင်းတိုင်း၊ ကန့်ဘလူမြို့နယ်ကို စစ်ကောင်စီတပ်က ၃ ရက်ဆက်တိုက် စစ်ကြောင်းထိုးဝင်ရောက်ခဲ့ချိန် အမျိုးသား ၉ ဦးကို ဖမ်းဆီးသတ်ဖြတ်ခဲ့တယ်လို့ ကျွန်းလှ ကန့်ဘလူ တက်ကြွလှုပ်ရှားသူများအဖွဲ့ -ကန့်ဘလူခရိုင်ဆီက သိရပါတယ်။

ပျူစောထီးတွေနဲ့ စစ်ကောင်စီတပ်ဖွဲ့ဝင်အင်အား ၁၀၀ ခန့်ဟာ ဇွန် ၂၃ ရက်မနက် ၈ နာရီ ကနေ ဇွန် ၂၆ ရက်မနက် ၉ နာရီအထိ သပြေသာ၊ ကျောင်းကုန်း၊ ဖိုလ်ကုန်းစတဲ့ ကျေးရွာ ၃ ရွာကို စစ်ကြောင်းထိုးဝင်ရောက်ပြီး နေအိမ်တွေကိုမီးရှို့ကာ ရွာခံအမျိုးသား ၉ ဦးကိုပါသတ်သွားခဲ့တာလို့ ဆိုပါတယ်။

“များသောအားဖြင့်တော့ ဓားတွေမွှန်းထားတဲ့သူတွေအကုန်လုံးတော်တော်နီးနီးမှာတော့ ဓားဒဏ်ရာတွေကရှိတယ်။ ဘယ်နှစ်ယောက်လည်လှီးခံထားရလည်းဆိုတာက ပြောမရပေါ့နော်။ အကုန်လုံးက လက်ပြန် ကြိုးတုပ်ထားတဲ့ဟာရှိမယ်။ မီးရှို့သတ်ထားတဲ့ဟာ မလောင်တာရှိမယ်။ တော်တော်များများကတော့ သတ်ဖြတ်ထားတာမက ခြေတွေ၊ လက်တွေမှာက သွေးယိုစီးမှုတွေရှိတယ်။ သွေးတွေစလက်နဲ့များတယ်”လို့ ကျွန်းလှ ကန့်ဘလူ တက်ကြွလှုပ်ရှားသူများအဖွဲ့ -ကန့်ဘလူခရိုင်မှ တာဝန်ရှိသူတဦးက ပြောပါတယ်။

အသတ်ခံရသူ ၉ ဦးဟာ သပြေသာရွာမှ စွံ့အနေသူ အသက် ၅၀ အရွယ် ဦးလှိုင်းဇာဇာ၊ ဦးအောင်နိုင် ၄၅ နှစ်၊ ဦးတရုတ်ကြီး ၄၅ နှစ်၊ ကိုမျိုးထက် ၃၄ နှစ်၊ ဖိုလ်ကုန်းရွာမှ ဦးဝင်း ၅၃ နှစ်၊ ဦးချစ်ဝင်း ၆၀ နှစ်၊ ကျောင်းကုန်းရွာမှ ကိုသိန်းတိုး ၃၇ နှစ်၊ ဦးမြင့်မောင် ၄၅ နှစ်နဲ့ ဦးမျိုးဆန်း ၄၅ နှစ် တို့ဖြစ်ကြပါတယ်။

အဆိုပါ ၉ ဦးမှာ ကာကွယ်ရေးအဖွဲ့ဝင်တွေမဟုတ်ဘဲ ရွာခံပြည်သူတွေသာဖြစ်သလို သူတို့အနေနဲ့ စစ်ကြောင်းထိုးဝင်လာချိန် မရှောင်လိုက်နိုင်ဘဲ နေအိမ်အတွင်း ပိတ်မိခဲ့သူတွေဖြစ်နိုင်ပြီး ၎င်းတို့ရဲ့ ရုပ်အလောင်းတွေကို ဇွန် ၂၆ ရက်ညနေ ၄ နာရီခန့်မှာ နယ်မြေရှင်းလင်းရေးဝင်လုပ်ချိန် တွေ့ရှိခဲ့ရတာလို့ အထက်ပါတာဝန်ရှိသူက ဆိုပါတယ်။

အဆိုပါစစ်ကြောင်းဟာ ကန့်ဘလူအခြေစိုက် ၆၀၀၆ အမြောက်တပ်ရင်းမှဖြစ်ပြီး ဇွန် ၂၆ ရက်မနက် ၉ နာရီကျော်မှာ သပြေသာရွာနဲ့ ကျောင်းကုန်းရွာကနေ ထွက်ခွာခဲ့ပြီးနောက် စစ်ကောင်စီရဲ့ ကြံစိုက်ပျိုးရေးတပ် (ကစရ) ကိုရောက်ရှိသွားပြီဖြစ်တယ်လို့ ကန့်ဘလူခရိုင်တပ်ရင်း ၄ ဆီကသိရပါတယ်။

စစ်ကြောင်းကြောင့် သပြေသာ၊ ကျောင်းကုန်း၊ ဖိုလ်ကုန်းစတဲ့ကျေးရွာတွေအပါအဝင် အနီးအနားရှိ ကျေးရွာတွေက ပြည်သူ ၈,၀၀၀ ခန့်လည်း ဘေးလွတ်ရာနေရာတွေဆီ ထွက်ပြေး တိမ်းရှောင်နေကြရတယ်လို့ သိရပါတယ်။

စာတည်း – လင်း

တောင်တွင်းကြီး၊ ဇွန် ၁၈၊ ၂၀၂၅။

မကွေးတိုင်း၊ တောင်တွင်းကြီးမြို့မှာ လိုင်စင်မဲ့ယာဥ်စီးနင်းမှုနဲ့ထောင်ကျနေသူ အမျိုးသား ကိုဗစ်ကြောင့်သေဆုံးသွားတယ်လို့ ဒေသခံတွေထံက သိရပါတယ်။

သေဆုံးသူဟာ တောင်တွင်းကြီးမြို့၊ ရွှေအိုး ၁ ရပ်ကွက်၊ အပိုင်း ၃ နေသူ အသက် ၃၁ နှစ်အရွယ် ကိုဘိုဘို၀င်းဆိုသူဖြစ်ပြီး ဇွန်လ ၁၇ ရက်ညမှာ မကွေးပြည်သူ့ဆေးရုံမှာ သေဆုံးသွားတာလို့ဆိုပါတယ်။

“ဆေးရုံတက်က လွန်ခဲ့တဲ့ ၃ ရက်လောက်ကတည်းက တက်နေရတာ။ ပုံမှန်ဖျားနာပုံစံနဲ့တက်တာ။ မနေ့ညက ၁၀ နာရီလောက်မှာ ဆုံးသွားတာ။ မကွေးထောင်ကနေ ဆေးရုံလာတက်ရတာ။ ကိုဗစ်လူနာဖြစ်ကြောင်းဆေးရုံက အတည်ပြုချက်ရတယ်”လို့ ဒေသခံတဦးကပြောပါတယ်။

သေဆုံးသွားတဲ့ ကိုဘိုဘိုဝင်းရဲ့အလောင်းကိုတော့ နေအိမ်ပြန်မသယ်တော့ဘဲ ယနေ့မနက်ပိုင်းမှာ မကွေးမြို့၊ ချမ်းမြေသာယာသုသာန်မှာ သဂြိုဟ်လိုက်တယ်လို့ သိရပါတယ်။

ကိုဘိုဘိုဝင်းဟာ ဇွန် ပထမအပတ်အတွင်းမှာ တောင်တွင်းကြီးမြို့မှာ ပလုံကောက်ဖို့ဆိုင်ကယ်နဲ့သွားစဥ် လိုင်စင်မဲ့ယာဥ် စစ်ဆေးနေတဲ့ စစ်ကောင်စီအဖွဲ့တွေနဲ့တွေ့ပြီး ဖမ်းဆီးခံလိုက်ရတာပါ။

အဲဒီနောက် ပို့ကုန်သွင်းကုန်ပုဒ်မ ၈ နဲ့တရားစွဲဆိုခဲ့ရပြီး တောင်တွင်းကြီးတရားရုံးကနေ နေ့ချင်း ထောင်တလကျခံဖို့ အမိန်ချခံရပြီးနောက် မကွေးထောင်ကို ပို့ဆောင်ခံလိုက်ရတာလို့ သိရပါတယ်။

ကိုဗစ်ရောဂါနဲ့သေဆုံးသူက မကွေးအကျဥ်းထောင်ကနေဆေးရုံတက်လာရသူဖြစ်တာကြောင့် ထောင်အတွင်းမှာ ရောဂါကူးစက်နိုင်သူတွေရှိနေနိုင်ပြီး အရေအတွက် ဘယ်လောက်ထိရှိနေတယ်ဆိုတာကိုတော့မသိရသေးဘူးလို့ ဆိုပါတယ်။

မကွေးမြို့မှာ ယခုလို ကိုဗစ်လူနာပြန်တွေ့ရတာ ပထမဆုံးအကြိမ်ဖြစ်ပြီး သေဆုံးတာကလည်း ပထမဆုံးဖြစ်ပါတယ်။

ပြီးခဲ့တဲ့ ၂၀၂၂ ခုနှစ် ကိုဗစ်တတိယလှိုင်းကာလက မကွေးမြို့နယ်အတွင်းမှာ ကိုဗစ်ကြောင့် သေဆုံးသူ ၃၀၀ ကျော်ရှိခဲ့တယ်လို့ ဒေသလူမှုကူညီရေးအသင်းတွေထံက သိရပြီး မြေပြင်မှာ ပိုများနိုင်တယ်လို့ သိရပါတယ်။

စာတည်း – လင်း

ကမ္မ၊ ဇွန် ၁၁၊ ၂၀၂၅။

မကွေးတိုင်း၊ ပခုက္ကူမြို့နယ်၊ ကမ္မမြို့အနီး ဆုံကုန်းကျေးရွာမှာ စစ်ကောင်စီတပ်ကလေကြောင်းကနေ ဗုံးကြဲခဲ့တာကြောင့် ဒေသခံအမျိုးသား ၁ ဦးဗုံးစထိမှန်သေဆုံးခဲ့တယ်လို့ အညာမြေအရပ်ဖက် အဖွဲ့အစည်းမှ တာဝန်ရှိသူတဦးကပြောပါတယ်။

ဇွန် ၁၀ ရက်မနေ့ကမနက် ၈ နာရီလောက်ကစပြီး ၁၀ ကြိမ်ထက်မနည်းဗုံးကြဲခဲ့တာကြောင့် ဆုံကုန်းရွာလည်ရှိ ဓမ္မာရုံအနီးတဝိုက်ကိုကျရောက်ပြီး အသက် ၃၀ အရွယ်အမျိုးသားကို ထိမှန်သေဆုံးခဲ့တာလို့ ဆိုပါတယ်။

“၈ နာရီဝန်းကျင်လောက် အိမ်သာတက်နေရင်း လေကြောင်းတိုက်ခိုက်ခံရတာ၊ ရွာလယ်ဓမ္မာရုံနား ကျတာကနေ အစမှန်တာထင်တယ်။ မရှောင်ပဲရွာမှာကျန်ခဲ့တဲ့လူ (ထိတာ)။ အခြားပျက်စီးမှု အသေးစိတ်မသိရသေးဘူး”လို့ အညာမြေအရပ်ဖက်အဖွဲ့အစည်းမှ တာဝန်ရှိသူတဦးကဆိုပါတယ်။

ကမ္မမြို့ပေါ်ကို စစ်ကောင်စီတပ်ဘက်က ကားအစီးရေ ၁၁၈ စီး၊ စစ်အင်အား ၄၀၀ ခန့်ရောက်တဲ့ ဇွန် ၆ ရက်ကစတင်ပြီး ကမ္မမြို့အနီးတဝိုက်ကိုလေကြောင်းကနေ နေ့စဉ်နီးပါးဗုံးကြဲချနေတာဖြစ်ပြီး မနေ့ကဗုံးအလုံးရေ ၃၀ ကျော်ကြဲချခဲ့တယ်လို့ သိရပါတယ်။

“နေ့တိုင်းလာနေတာပါ။ ပါရာမော်တာလာတယ်၊ Y 12 လာတယ်၊ ဒရုန်းနဲ့လာတယ်၊ (မနေ့က) ၃၆ လုံးချပြီး အကြိမ်ရေအနေနဲ့ Y 12 ၁၅ ကြိမ်၊ ပါရာမော်တာ ၂ ကြိမ်ဗျ”လို့ အညာမြေအရပ်ဖက် အဖွဲ့အစည်းမှတာဝန်ရှိသူတဦးကဆိုပါတယ်။

ဇွန် ၆ ရက် နေ့လယ် ၂ နာရီခန့်မှာ ကမ္မမြို့အနောက်ဘက်ကို စက်တပ်လေထီးနဲ့ ပစ်ခတ်တိုက်ခိုက်ခဲ့ပြီး ကမ္မမြို့အနောက်ဘက်ရှိ ဂျိုးပျံရပ်ကွက်၊ မကျီးသုံးပင်ရွာ၊ သံဘိုရွာအနီးတို့ကိုလည်း ဇွန် ၇ ရက် ညနေ ၅ နာရီဝန်းကျင်မှာလေကြောင်းကနေ ၁၁ ကြိမ်၊ ဗုံးအလုံးရေ ၃၀ ကျော်ကြဲချခဲ့တယ်လို့ ဆိုပါတယ်။

ဒေသခံတွေလည်းနေရပ်ကထွက်ပြေးတိမ်းရှောင်နေကြတာကြောင့် ထိခိုက်ပျက်စီးမှုအခြေအနေတွေကိုတော့ အတည်မပြုနိုင်သေးပါဘူး။

ကမ္မမြို့ပေါ်ရောက်ရှိနေတဲ့စစ်ကောင်စီအဖွဲ့ဟာ မေ ၂၉ ရက်မှစတင်ကာ ပခုက္ကူအခြေစိုက် တပ်မ ၁၀၁ ကနေထွက်ခွာလာတဲ့စစ်ကြောင်းဖြစ်ပြီး လက်ရှိမှာ မြို့ပေါ်စျေးကိုလည်း ဖွင့်ခိုင်းထားတယ်လို့ သိရပါတယ်။

“ကမ္မထဲက ၁ အိမ်မီးရှို့တယ်လို့တော့ ကြားတယ်။ ပြည်သူအချို့ရှိတယ်လို့ ပြောတယ်။ စျေးကိုလည်းဖွင့်ခိုင်းတယ်။ ဘယ်သူမှတော့သွားမဝယ်ရဲဘူး။ အသက်ကြီးတဲ့စျေးသည်အများစုတော့ ဖွင့်ရတယ်ပြောတယ်။ ဒီနေ့ကတော့စစ်ကြောင်း‌ရွှေ့ဖို့လှုပ်နေတာပြင်ဆင်တဲ့သဘောပါ”လို့ အညာမြေအရပ်ဖက်အဖွဲ့အစည်းမှ တာဝန်ရှိသူတဦးကဆိုပါတယ်။

ဒါ့အပြင် ပေါက်မြို့နယ်၊ ရေပြာဘက်မှာလည်း တပ်မ ၁၀၁ က နောက်ထပ်စစ်အင်အား ၂၅၀ ရောက်ရှိနေတယ်လို့ သိရပြီး စစ်ကြောင်း ၂ ခုပေါင်းမယ်အခြေအနေရှိတယ်လို့လည်းသူက ခန့်မှန်းပါတယ်။

စာတည်း – လင်း

စလင်း၊ ဇွန် ၃၊ ၂၀၂၅။

မကွေးတိုင်း၊ စလင်းမြို့နယ်၊ ဆွယ်တည်ရွာသစ်နဲ့ ဆွယ်တည်ရွာမကျေးရွာတွေက စာသင်ကျောင်းတွေ လေယာဥ်နဲ့ဗုံးကြဲတိုက်ခိုက်ခံရပြီး အမျိုးသား ၁ ဦး သေဆုံးကာ အမျိုးသမီး ၁ ဦးထိခိုက်ဒဏ်ရာရရှိခဲ့တယ်လို့ ဒေသခံတွေဆီက သိရပါတယ်။

ဇွန် ၃ ရက် ဒီကနေ့ နေ့လယ် ၁၁ နာရီ ၃၄ မိနစ်လောက်မှာ ဆွယ်တော်ရွာမ စာသင်ကျောင်းကို ဗုံး ၁ လုံး၊ နေ့လယ် ၁၁ နာရီ ၃၅ မိနစ်မှာ ဆွယ်တည်ရွာသစ်စာသင်ကျောင်းကို ဗုံး ၁ လုံး ကြဲချတိုက်ခိုက်သွားတာဖြစ်ပြီး စာသင်ကျောင်းနဲ့ အနီးနားနေအိမ်တွေပေါ်ကျရောက်ပေါက်ကွဲခဲ့တယ်လို့ ဆိုပါတယ်။

“ စာသင်ကျောင်းတွေမှာ စာသင်ကြားနေတာမရှိပါဘူးရှင့်။ ဆွယ်တည်ရွာသစ်နဲ့ ဆွယ်တည်ရွာမက ကပ်နေတဲ့အတွက် ၁ မိနစ်အတွင်းမှာချတာပါ၊ ပေါင်(ဗုံးအမျိုးအစား)ကတော့ ဘယ်လောက်လည်း မသိဘူး၊ အသံကတော့တော်တော်ပြင်းပါတယ်။ လယ်ထဲကနေ မြက်ရိတ်ပြန်လာတဲ့ ဇနီးမောင်နှံ ၂ ဦးထိပါတယ်၊ အမျိုးသမီးကတော့ မြောင်းထဲက ပေါင်း(ဘောင်) အောက်မှာ ခိုလိုက်တဲ့အတွက် ဒဏ်ရာအနည်းငယ်ရပြီးတော့ အမျိုးသားကတော့ သေဆုံးပါတယ်” လို့ စလင်းမြို့ခံအမျိုးသမီးတဦးက မြေလတ်အသံကို ပြောပါတယ်။

ဗုံးပေါက်ကွဲမှုကြောင့် ဆွယ်တည်ရွာမကျေးရွာနေ အသက် ၃၀ နှစ်ဝန်းကျင်ရှိအမျိုးသားသေဆုံးခဲ့ပြီး ၎င်းရဲ့ဇနီးဖြစ်သူ အမျိုးသမီးမှာ ထိခိုက်ဒဏ်ရာရရှိခဲ့ကာ ဆွယ်တည်ရွာသစ် စာသင်ကျောင်းဆောင်တခုလုံး ပျက်စီးခဲ့တယ်လို့ သိရပါတယ်။

လေကြောင်းတိုက်ခံရမှုကြောင့် အိမ်ခြေ ၁၃၅၊ လူဦးရေ ၆၀၀ ကျော်ရှိ ဆွယ်တည်ရွာမ နဲ့ အိမ်ခြေ ၆၀၊ လူဦးရေ ၂၅၀ ရှိ ဆွယ်တည်ရွာသစ်က ဒေသခံတွေဟာ ဘေးလွတ်ရာကိုတိမ်းရှောင်နေကြတယ်လို့ သိရပါတယ်။

စာတည်း – ဟိန်းစံ

ပြင်ဦးလွင်၊ ဧပြီ ၂၆၊ ၂၀၂၅။

မန္တလေးတိုင်း၊ ပြင်ဦးလွင်မြို့၊ ရပ်ကွက်ကြီး ၆၊ အောင်မြေဇေယျာဘုန်းကြီးကျောင်းစာသင်တိုက်မှာ ငလျင်ဒဏ်ထိထားတဲ့ ကျောင်းကုဋီ(အိမ်သာ)ကိုဖြိုချရာက အမျိုးသားတဦးသေဆုံးမှု ဖြစ်ပွားခဲ့တယ်လို့ မြို့ခံတွေထံက သိရပါတယ်။

သေဆုံးသူမှာ အသက် ၃၈ နှစ်အရွယ် ဦးထွန်းထွန်းနိုင်ဆိုသူဖြစ်ပြီး ဧပြီ ၂၅ ရက် ယမန်နေ့ညနေ ၃ နာရီခန့်မှာ ကျောင်းဝန်းအတွင်းကုဋီအဆောက်အဦဖြိုချတာကို ဝိုင်းဝန်းလုပ်ကိုင်ပေးနေချိန် အမိုးပြိုကျပြီးပိမိခဲ့တာလို့ ဆိုပါတယ်။

” ကုဋီဖြိုရင်းနဲ့ပိမိပြီးသေတာလို့ ကျောင်းနဲ့နီးစပ်သူတွေပြောပြလို့သိရတယ်။ သေသူက အဲ့ဒီကျောင်းက ဦးဇင်းတပါးရဲ့ညီလို့ပြောတယ်။ ကျောင်းကငလျင်ဒဏ်ထိထားတာ ကုဋီကသုံးမရတော့လို့ ဖြိုချရင်းအပေါ်ကနေ ပြိုကျလာရင်း ပြေးမလွတ်တော့လို့ ဖြစ်သွားတာ” လို့ ပြင်ဦးလွင်မြို့ခံတဦးက မြေလတ်အသံကို ပြောပါတယ်။

အိမ်သာ အမိုးပိမိလို့ ဦးထွန်းထွန်းနိုင်မှာ ဇက်ကျိုး၊ ခေါင်းပေါက် သွေးထွက်ဒဏ်ရာတွေနဲ့နေရာမှာပင်သေဆုံးသွားပြီး ရုပ်အလောင်းတွေကို ဒေသလူမှုကူညီရေးအသင်းတွေက ပြင်ဦးလွင်ပြည်သူ့ဆေးရုံကို ပို့ဆောင်ပေးခဲ့ကြရတယ်လို့ ဆိုပါတယ်။

မတ် ၂၈ ရက်မှာလှုပ်ခတ်ခဲ့တဲ့ အင်အားပြင်းငလျင်ကြီးကြောင့် ပြင်ဦးလွင်မြို့မှာလည်း ငလျင်ဒဏ်ခံစားခဲ့ရပြီး အဆောက်အဦပျက်စီးထိခိုက်မှုတွေရှိခဲ့တယ်လို့ သိရပါတယ်။

စာတည်း – ဟိန်းစံ