ချောက်၊ မေ ၂၆၊ ၂၀၂၅။

မကွေးတိုင်း၊ ချောက်မြို့နယ်နဲ့ ပဲခူးတိုင်း၊ အုတ်ဖိုမြို့နယ်တွေမှာ အုပ်ချုပ်ရေးမှူး ၂ ဦး ပစ်သတ်ခံရတယ်လို့ ဒေသကာကွယ်ရေးအဖွဲ့တွေဆီက သိရပါတယ်။

မေ ၂၄ ရက်နေ့လယ် ၁၂ နာရီခန့်မှာ ချောက်မြို့နယ်၊ အုံမြားကြီးကျေးရွာအုပ်ချုပ်ရေးမှူး အသက် ၆၈ နှစ်အရွယ် ဦးနေဝင်းဟာ ရွာဘုန်းကြီးကျောင်းထဲရှိနေချိန် ခေါင်းကိုပစ်ခတ်ခံရပြီး သေဆုံးခဲ့တာလို့ ဆိုပါတယ်။

“ဦးနေဝင်းက ရွာထဲမှာရှင်းခံလိုက်ရတာလို့တော့ သိရတယ်။ သူကစစ်မှုထမ်းယန္တရား အသက်ဝင်အောင်လုပ်ပေးနေသူပေါ့။ စကစခန့်အုပ်ကြီး။ သူကလည်းဆိုးတယ်။ စစ်မှုထမ်း ကြေးကောက်တာ။ စစ်သားတွေနဲ့ပေါင်းတာက တရွာလုံးကကြောက်နေရတာ”လို့ ဒေသ ကာကွယ်ရေးအဖွဲ့တဦးက ပြောပါတယ်။

ဦးနေဝင်းပစ်သတ်ခံရပြီးနောက် မေ ၂၅ ရက်မနက်ပိုင်းကစတင်ပြီး စစ်ကောင်စီတပ်အင်အား ၄၀ ခန့်ဟာ စဥ့်ကူးမြို့ဘက်ကနေ ရွှေဘုံတောင်၊ အုံမြား၊ ရွာမတို့ကိုဝင်မွှေကာ နေ့လယ်ပိုင်းမှာ ပြည်တော်သာရွာအနီး ဒေသကာကွယ်ရေးအဖွဲ့ဝင်အချို့နဲ့ ၁၅ မိနစ်ခန့်တိုက်ပွဲဖြစ်ခဲ့သေးတယ်လို့ ဆိုပါတယ်။

အဲ့ဒီနောက်ညနေပိုင်းမှာ စစ်ကြောင်းက စဥ့်ကူးမြို့ဘက်ကို ပြန်ထွက်သွားတယ်လို့ သိရပါတယ်။

အလားတူ ပြီးခဲ့တဲ့ မေ ၂၂ ရက်ကလည်း ပဲခူးတိုင်း၊ အုတ်ဖိုမြို့နယ်၊ ဂွေ့ချောင်းကြီးကျေးရွာအနီးမှာ ဆိုင်ကယ်နဲ့ပြန်လာတဲ့ မြောက်ချောကုန်းအုပ်ချုပ်ရေးမှူး အသက် ၅၈ နှစ်အရွယ် ဦးသန်းလွင်ဆိုသူ ပစ်ခတ်ခံရပြီး သေဆုံးခဲ့ပါသေးတယ်။

အဆိုပါ အုပ်ချုပ်ရေးမှူး ၂ ဦးကို ပစ်သတ်ခဲ့တာနဲ့ပတ်သက်ပြီး ဘယ်လက်နက်ကိုင်အဖွဲ့တွေက ပစ်ခတ်တယ်ဆိုတာကိုတော့ သတင်းထုတ်ပြန်တာမျိုးမရှိသေးပါဘူး။

မေ ၂၄ ရက်ကလည်း ညောင်ဦးမြို့နယ်၊ မြေနီကျေးရွာမှာ စစ်ကောင်စီတပ်နဲ့ပေါင်းပြီး အမှုပွဲစားလုပ်နေတဲ့ အမျိုးသား ၁ ဦးပစ်သတ်ခံရလို့ သေဆုံးသွားတယ်လို့သိရပါတယ်။

စာတည်း – လင်း

အုတ်ဖို၊ ဧပြီ ၂၀၊ ၂၀၂၅။

ပဲခူးတိုင်းအနောက်ခြမ်း၊ အုတ်ဖိုမြို့နယ်က လက်ပစ်ဗုံးကိုင်ဆောင်တဲ့ အုပ်ချုပ်ရေးမှူး ၁ ဦးကို ဧပြီ ၂၀ ရက် ဒီနေ့မနက် ၆ နာရီကျော်လောက်မှာ သေနတ်နဲ့ပစ်ခတ်ရာသေဆုံးခဲ့တယ်လို့ မြေအောက်ပြောက်ကျားတပ်ဖွဲ့က သတင်းထုတ်ပြန်ပါတယ်။

အုတ်ဖိုမြို့အနောက်ဘက် ၁ မိုင်ခန့်အကွာ ငရှဥ့်ရိုးအုပ်စုက အသက် ၄၅ နှစ်ဝန်းကျင် အုပ်ချုပ်ရေးမှူး နိုင်ဦးကို ငရှဥ့်ရိုးရွာလယ်မှာ သေနတ်နဲ့အနီးကပ်ပစ်ခဲ့တာလို့ ဆိုပါတယ်။

“ကျည်ကုန်မခံဘူး ၁ ချက်ထဲပဲဆော်ခဲ့တာ ပွဲသိမ်းပဲ။ အုတ်ဖိုအနောက်ဘက်ကို PDF တွေ မလာရဲဘူးထင်နေတာ။ အနောက်ဘက်က အုပ်ကြီးတွေ မခန့်လေးစားနဲ့ ပြည်သူကို ရက်စက်လွန်းတယ်”လို့ မြေအောက်ပြောက်ကျားတပ်ဖွဲ့တာဝန်ခံ ရဲဘော်ဒေဝက ပြောပါတယ်။

တိုက်ခိုက်မှုအပြီးမှာပဲ အုတ်ဖိုမြို့စောင့်တပ်က စစ်သားနဲ့ ရဲအင်အား ၄၀ ဦးလောက်က အလောင်းကို ကိုနိုင်ဦးနေထိုင်တဲ့ ကျောင်းစုရွာကို ပြန်သယ်သွားတယ်လို့ ရဲဘော်ဒေဝက ဆက်ပြောပါတယ်။

ပစ်ခတ်ပြီးနောက် လက်ပစ်ဗုံး ၂ လုံး၊ မိုလ်ဘိုင်းဖုန်း ၁လုံး၊ ငွေ ၁ သိန်းကျပ် နဲ့ မှတ်ပုံတင် ၁ ခု သိမ်းဆည်းခဲ့တယ်လို့ ဆိုပါတယ်။

အုပ်ချုပ်ရေးမှူး နိုင်ဦးဟာ စစ်ကောင်စီကထုတ်ပေးထားတဲ့ သေနတ်နဲ့လက်ပစ်ဗုံးပြပြီး ပြည်သူတွေဆီက စစ်မှုထမ်းကြေးလို့ဆိုကာ ခြိမ်းခြောက်ငွေတောင်းတာ၊ လူငယ်တွေကိုအဓမ္မပေါ်တာဆွဲ ဖမ်းဆီးရုံသာမက အသက် ၆၀ ကျော်အရွယ် အမျိုးသားတွေကိုပါ ပေါ်တာဆွဲဖမ်းဆီးပြီး ခြိမ်းခြောက် ငွေညစ်တာတွေလုပ်တယ်လို့ ထုတ်ပြန်ချက်မှာဖော်ပြပါတယ်။

မြေအောက်ပြောက်ကျားတပ်ဖွဲ့အနေနဲ့ တော်လှန်ရေးတပ်ဖွဲ့တွေကို ဒုက္ခပေးနေကြတဲ့ စစ်ကောင်စီနဲ့ ထောက်တိုင်တွေကို အရှိန်မြှင့် တိုက်ခိုက်သွားမှာဖြစ်လို့ ပြည်သူတွေအနေနဲ့ ၎င်းတို့ အနီးဝန်းကျင်မှာ သွားလာနေထိုင်တာတွေ မပြုလုပ်ဖို့ကိုလည်း အသိပေးထားပါသေးတယ်။

ပြီးခဲ့တဲ့ ဧပြီ ၈ ရက် မွန်းလွဲ ၁ နာရီခွဲဝန်းကျင်ကလည်း အုတ်ဖိုမြို့နယ်၊ သရက်နှစ်ဖျားလိမ်အုပ်စု ပေါင်းတည်စုရွာက လက်ပစ်ဗုံးကိုင်ဆောင်တဲ့ ရာအိမ်မှူးဖိုးဖြူကို မြေအောက်ပြောက်ကျားတပ်ဖွဲ့က သေနတ်နဲ့ ပစ်ခတ်ရှင်းလင်းခဲ့ပါသေးတယ်။

ပုံစာ – သိမ်းဆည်းရမိသည့် လက်ပစ်ဗုံး ငွေ ၁ သိန်းကျပ်နှင့် ဖုန်း။

သတင်း – မောင်ဆွေအင်း၊ စာတည်း – လင်း

အုတ်ဖို၊ ဧပြီ ၁၀၊ ၂၀၂၅။

ပဲခူးတိုင်း၊ သာယာဝတီခရိုင်၊ အုတ်ဖိုမြို့နယ်က ပျူစောထီးဆိုသူ ၂ ဦး သေနတ်နဲ့ပစ်ခံရပြီးသေဆုံးခဲ့တယ်လို့ သာယာဝတီခရိုင် တပ်ရင်း ၃၈၀၁၊ တပ်ခွဲ ၅၊ ကြို့ပင်ကောက် HERO ပြောက်ကျားတပ်ဖွဲ့က ဧပြီ ၁၀ ရက် ဒီမနက်မှာ သတင်းထုတ်ပြန်ထားပါတယ်။

အုတ်ဖိုမြို့နယ်၊ ကြို့ပင်ဝိုင်းရွာကနေ ၂ မိုင်လောက်ဝေးတဲ့ သက်ကယ်ချင်းကုန်းရွာ အရက်ဆိုင်ကနေ ပြန်လာတဲ့ အသက် ၂၈ နှစ်အရွယ် ကိုဖိုးဖြူနဲ့ ကိုရန်နိုင်စိုးတို့ ၂ ဦးကို ဧပြီ ၈ ရက် ည ၈ နာရီခွဲလောက်မှာ သေနတ်နဲ့ပစ်ခတ်ခဲ့တာလို့ ဆိုပါတယ်။

“စစ်သားတွေ အရက်သောက်နေတယ်ဆိုတာ သတင်းရလို့ ကြို့ပင်ရွာထိပ်ကနေ စောင့်ပစ်တာ။ နှစ်ယောက်သား ခြေလျင်ပြန်လာတာလေ။” လို့ HEROပြောက်ကျားတပ်ဖွဲ့က ဒုတပ်ခွဲမှူး ရဲဘော်မိုးသီးက ပြောပါတယ်။

အလောင်းတွေကိုတော့ ဧပြီ ၉ ရက်မနက်ပိုင်းမှာအလယ်ကုန်းရွာ စစ်ကောင်စီယာယီအထိုင်စခန်းရှိ စစ်ကေင်စီတပ်ဖွဲ့ဝင်တွေက အုတ်ဖိုမြို့ဘက်ကို ကားနဲ့သယ်သွားတယ်လို့ သူကဆက်ပြောပါတယ်။

ဒါ့အပြင် ဧပြီ ၁၀ ရက် ဒီမနက်ပိုင်းကလည်း ပစ်ခတ်မှုဖြစ်တဲ့ကြို့ပင်ဝိုင်းရွာထိပ်မှာ စစ်ကောင်စီတပ်ဖွဲ့တွေက စစ်ဆေးမှုတွေပြုလုပ်ခဲ့တယ်လို့ ဆိုပါတယ်။

အဲဒီ ၂ ဦးဟာ လူငယ်တွေကို ပေါ်တာဆွဲရာမှာဦးဆောင်သူတွေဖြစ်ကာ စစ်ကောင်စီဲနဲ့ပေါင်းပြီး ငွေကြေးကောက်ခံနေတာ၊ ပြည်သူတွေနဲ့ PDF တွေကို လိုက်လံစုံစမ်းတာ၊ ရပ်ရွာအတွင်းကလူငယ်တွေရှိတဲ့ အိမ်တွေကို ငွေကြေးကောက်ခံရာမှာ ပတ်သက်သူတွေဖြစ်တဲ့အတွက် ခုလိုပစ်ခတ်ခဲ့တာလို့ ဆိုပါတယ်။

ဧပြီ ၈ ရက် မွန်းလွဲ ၁ နာရီခွဲကလည်း အုတ်ဖိုမြို့နယ်၊ သရက်နှစ်ဖျားလိမ်အုပ်စု၊ ပေါင်းတည်စုရွာက လက်ပစ်ဗုံးဆောင်တဲ့ ရာအိမ်မှူး ကိုဖိုးဖြူ ကိုလည်း ပေါင်းတည်စုရွာအနီးလမ်းပေါ်မှာ အုတ်ဖိုမြေအောက်ပြောက်ကျားတပ်ဖွဲ့က သေနတ်နဲ့ပစ်သတ်ခဲ့ပါသေးတယ်။

သတင်း – မောင်ဆွေအင်း၊ စာတည်း – လင်း

အုတ်ဖို၊ ဧပြီ ၉၊ ၂၀၂၅။

ပဲခူးတိုင်းအနောက်ခြမ်း၊ သာယာဝတီခရိုင်၊ အုတ်ဖိုမြို့နယ်က ရာအိမ်မှူးတဦး သေနတ်နဲ့ပစ်ခတ်ခံရပြီး သေဆုံးခဲ့တယ်လို့ မြေအောက်ပြောက်ကျားတပ်ဖွဲ့က သတင်းထုတ်ပြန်ထားပါတယ်။

အုတ်ဖိုမြို့၊ သရက်နှစ်ဖျားလိမ်အုပ်စု၊ ပေါင်းတည်စုရွာနေ အသက် ၄၅ နှစ်အရွယ် ရာအိမ်မှူး ကိုဖိုးဖြူဟာ ဧပြီ ၈ ရက် မွန်းလွဲ ၁ နာရီခွဲမှာ ခမရ ၆ တပ်ကပြန်လာစဉ် ပေါင်းတည်စုရွာအနီး မြေအောက်ပြောက်ကျားတပ်ဖွဲ့ဝင်တွေက ပစ်ခတ်ခဲ့တာလို့ ဆိုပါတယ်။

” တိမ်မြုတ် ခမရ ၆ နဲ့ ပေါင်းတည်စုရွာချင်းဆက်လမ်းမှာ သူနေတဲ့ရွာကို ဆိုင်ကယ်နဲ့ တယောက်တည်းပြန်လာတာကို သေနတ်နဲ့ပစ်တာ ပွဲချင်းပြီးသေတယ်။ ခေါင်းကိုတည့်တည့်မှန်တာ” လို့ မြေအောက်ပြောက်ကျားတပ်ဖွဲ့ စစ်ရေးတာဝန်ခံဗိုလ်တောက်တဲ့က ပြောပါတယ်။

ဧပြီ ၉ ရက် ဒီမနက်အစောပိုင်းမှ အလောင်းကို ကျေးရွာသားတွေက လာသယ်သွားတယ်လို့ သူက ဆက်ပြောပါတယ်။

ပစ်ခတ်ပြီးနောက် ကိုဖိုးဖြူဆီကနေ လက်ပစ်ဗုံး ၁ လုံး၊ ဆိုင်ကယ် ၁ စီး၊ မိုလ်ဘိုင်းဖုန်း ၂ လုံး နှင့် ငွေ ကျပ် ၆၇,၀၀၀ ကို သိမ်းယူခဲ့တယ်လို့ ထုတ်ပြန်ချက်မှာဖော်ပြထားပါတယ်။

ကိုဖိုးဖြူဟာ တော်လှန်ရေးတပ်ဖွဲ့ဝင်တွေရဲ့အချက်အလက်တွေကိုစုံစမ်းပြီး စစ်ကောင်စီဆီ သတင်းပေးတာ၊ စစ်ကောင်စီတပ်တွေကို ဧည့်ခံကျွေးမွေးတာ၊ ပြည်သူတွေကိုခြိမ်းခြောက်တာတွေလုပ်တာကြောင့် ခုလိုပစ်ခတ်တာလို့လည်းဆိုပါတယ်။

မြေအောက်ပြောက်ကျားတပ်ဖွဲ့အနေနဲ့ ပြည်သူတွေနဲ့ တော်လှန်ရေးတပ်ဖွဲ့တွေကို ဒုက္ခပေးနေတဲ့ စစ်ကောင်စီနဲ့ ထောက်တိုင်တွေကို အရှိန်မြှင့်တိုက်ခိုက်သွားမှာဖြစ်လို့ ပြည်သူတွေအနေနဲ့ ၎င်းတို့အနီး သွားလာနေထိုင်တာတွေမပြုလုပ်ဖို့လည်း ထုတ်ပြန်ချက်မှာ အသိပေးထားပါသေးတယ်။

ပြီးခဲ့တဲ့ မတ် ၁၁ ရက် မနက် ၉ နာရီလောက်ကလည်း ခမရ ၆ က သရက်နှစ်ဖျားလိမ်အုပ်စု၊ ချောင်းခွ(ကေ)ရွာက စစ်ကောင်စီသတင်းပေးဆိုသူ ကိုအေးလွင်ကို မြေအောက်ပြောက်ကျားတပ်ဖွဲ့က ပစ်ခတ်ရာသေဆုံးခဲ့ပါသေးတယ်။

ပုံစာ – ကိုဖိုးဖြူဆီက သိမ်းဆည်းရမိသည့်ပစ္စည်းများ။

သတင်း – မောင်ဆွေအင်း၊ စာတည်း – လင်း

မြေလတ်အသံ၊ မတ် ၁၇၊ ၂၀၂၅။

ပဲခူးတိုင်းအနောက်ခြမ်း၊ သာယာဝတီခရိုင်၊ အုတ်ဖိုမြို့နယ်အပိုင် ပဲခူးရိုးမအတွင်းမှာ စစ်ကောင်စီတပ်နဲ့ တော်လှန်ရေးတပ်ဖွဲ့တွေအကြား စစ်ရေးတင်းမာနေလို့ ဖြတ်သန်းသွားလာခွင့်ပိတ်လိုက်တယ်လို့ PDF ၃၈၀၂ တပ်ရင်း၊ တပ်ခွဲ ၄ (အုတ်ဖိုမြောက်အောက်ပြောက်ကျားတပ်ဖွဲ့) က မတ် ၁၆ ရက်စွဲနဲ့ ထုတ်ပြန်ပါတယ်။

အုတ်ဖိုမြို့နယ်အပိုင် ပဲခူးရိုးအတွင်း ကာကွယ်ရေးတပ်ဖွဲ့တွေရဲ့ စစ်ရေးလှုပ်ရှားနယ်မြေအတွင်းကို စစ်ကောင်စီတပ်က စစ်ကြောင်းထိုးတာတွေရှိလာပြီး စစ်ဆင်ရေးအရှိန်မြင့်တာတာကြောင့် ယမန်နေ့ကစတင်ကာ မော်တော်ယာဉ်၊ သုံးဘီး၊ ဆိုင်ကယ်၊ ကျွဲ/နွားတွေ သွားလာခွင့်ကို တားမြစ်လိုက်တာလို့ ဆိုပါတယ်။

ဖြစ်ပေါ်လာမယ့် နှစ်ဖက်တိုက်ပွဲတွေအကြား ပြည်သူတွေထိခိုက်မှုမရှိစေဖို့နဲ့ အုတ်ဖိုမြို့နယ်အပိုင် ပဲခူးရိုမအတွင်း သစ်တောသယံဇာတတွေ ခိုးထုတ်နေမှုတွေကို ထိထိရောက်ရောက်အရေးယူနိုင်ဖို့ အခုလို တားမြစ်ချက်ထုတ်ပြန်ထားတာဖြစ်ပြီး ပြည်သူတွေအနေနဲ့လိုက်နာပေးကြဖို့ အသိပေးတယ်လို့လည်း ဖော်ပြပါတယ်။

စစ်ကောင်စီတပ်က အုတ်ဖိုမြို့နယ်အပြင် ပဲခူးရိုးမအတွင်း ကြို့ပင်ကောက်မြို့နယ်အပိုင် ကျေးရွာတွေဖြစ်တဲ့ သခွတ်ပင်၊ ရုံးချောင်း၊ အေးရွာလေး ၊ ကျောက်ကုန်း ၊ သင်္ခရိုင်စတဲ့ ကျေးရွာတွေနဲ့အနီးတဝိုက်ကို စစ်ကြောင်းထိုးဝင်ရောက်ဖို့ ပြင်ဆင်မှုတွေလုပ်ဆောင်နေတယ်လို့ ပဲခူးအနောက်ခြမ်းတပ်သတင်းရင်းမြစ်တွေထံက သိရပါတယ်။

ပဲခူး၊ ဖေဖော်ဝါရီ ၁၈၊ ၂၀၂၅။

ပဲခူးတိုင်း၊ သာယာဝတီခရိုင်၊ အုတ်ဖိုမြို့နယ်၊ ထန်းပင်ကုန်းရွာစစ်ဆေးရေးဂိတ်က စစ်ကောင်စီတပ်သားတဦး ဘက်ပြောင်းခိုလှုံလာတယ်လို့ သာယာဝတီခရိုင် တပ်ရင်း ၃၈၀၂ တပ်ခွဲ ၅ ဆီက သိရပါတယ်။

စစ်ကောင်စီတပ်သားအောင်တင်မြင့်ဟာ ထန်းပင်ကုန်းရွာစစ်ဆေးရေးဂိတ်ကိုရောက်ရှိပြီး ၄ ရက်အကြာ ဖေဖော်ဝါရီ ၁၇ ရက် မနက် ၁၀ နာရီလောက်မှာ ထွက်ပြေးအလင်းဝင်ခဲ့တာလို့ ဆိုပါတယ်။

“သူ့ကို ကင်းမှူးအနေနဲ့တာဝန်ပေးထားပြီး မနက် ၆ နာရီကနေ ညနေ ၁၀ နာရီအထိကင်းစောင့်ရတာ။ တောထဲမှာ ကျနော်တို့ရှိတယ်ဆိုပြီး ထွက်ပြေးလာရင်းကနေ ရဲဘော်တွေနဲ့တွေ့လို့ အလင်းဝင်လာတာပါ၊ သူ့အနေနဲ့ တော်လှန်ရေးမှာပါဝင်သွားဖို့ဆန္ဒရှိနေပါတယ်။ AA နဲ့ ချိတ်ဆက်ရရင် အဲ့ကိုသွားချင်ပါတယ် ပြောပါတယ်။” လို့ သာယာဝတီခရိုင် တပ်ရင်း ၃၈၀၂ တပ်ခွဲ ၅ မှ တာဝန်ရှိသူက ပြောပါတယ်။

တပ်သားအောင်တင်မြင့်ဟာ ပြီးခဲ့တဲ့ ၂၀၂၄ အောက်တိုဘာလမှာ ရခိုင်ပြည်နယ်၊ ပုဏ္ဏားကျွန်းမြို့နယ်ကနေ ရန်ကုန်ကိုလာစဉ် အုတ်ဖိုတာဆုံစစ်ဆေးရေးဂိတ်မှာ ဖမ်းဆီးခံရပြီး စစ်မှုထမ်းအပတ်စဉ် ၆ အတွက် ဂျိုးဖြူ အမှတ် (၂) စစ်သင်တန်းကျောင်းကိုအပို့ခံလိုက်ရပြီးနောက်မှာ စစ်ကောင်စီတပ်သားဖြစ်လာတာလို့ ဆိုပါတယ်။

“သူ့ကို အုတ်ဖိုတာဆုံဂိတ်က စခ တွေဖမ်းတုန်းက စစ်မှုမထမ်းရင် ထောင် ၅ နှစ်ချမယ်ဆိုလို့ တပ်ထဲဝင်တယ်ပြောပါတယ်။ စစ်တပ်ထဲဝင်ရင် ရှေ့တန်းမှာထွက်ပြေးဖို့အဲ့ကတည်းက ဆုံးဖြတ်ထားတယ် ပြောတယ်” လို့ တပ်သားအောင်တင်မြင့်ရဲ့ပြောပြချက်ကို ကိုးကားပြီး အထက်ပါ တာဝန်ရှိသူက ဆက်ပြောပါတယ်။

သာယာဝတီခရိုင်တပ်ရင်း ၃၈၀၂ တပ်ခွဲ ၅ ဟာ ဖေဖော်ဝါရီ ၄ ရက်ကလည်း အုတ်ဖိုမြို့နယ်၊ စင်မြင့်ရွာ အနီးမှာ စစ်ကောင်စီတပ်သားတွေနဲ့ အပြန်အလှန်ပစ်ခတ်မှုဖြစ်ခဲ့တာကြောင့် စစ်ကောင်စီတပ်သား ၆ ဦးသေဆုံးကာ၊ ၁၅ ဦးထိမှန်ဒဏ်ရာရရှိခဲ့တယ်လို့ သိရပါတယ်။

စာတည်း – လင်း

ပဲခူး၊ ဖေဖော်ဝါရီ ၆၊ ၂၀၂၅။

ပဲခူးတိုင်း၊ သာယာဝတီခရိုင်၊ အုတ်ဖိုမြို့ရှိ မြန်မာနိုင်ငံစစ်မှုထမ်းဟောင်းအဖွဲ့ ရုံးကို Golden Garuda Battalion – G2B တပ်ဖွဲ့မှ မိုင်းခွဲတိုက်ခိုက်ခဲ့တယ်လို့ အဲဒီတပ်ဖွဲ့ဆီက သိရပါတယ်။

ဖေဖော်ဝါရီ ၅ ရက် မနေ့က မနက် ၄ နာရီခွဲလောက်မှာ အုတ်ဖိုမြို့၊ မြို့မရဲစခန်းအနီးမှာရှိတဲ့ စစ်မှုထမ်းဟောင်းအဖွဲ့ရုံးကို ကာကွယ်ရေးတပ်ဖွဲ့တွေက မိုင်း ၂ လုံးနဲ့ သွားရောက်တိုက်ခိုက်ခဲ့ရာ စစ်မှုထမ်းဟောင်းအဖွဲ့၀င် ၁ ဦးသေဆုံးပြီး ၃ ဦးထက်မနည်း ထိမှန်ဒဏ်ရာရရှိခဲ့တယ်လို့ ဆိုပါတယ်။

“အဲဒီရုံးမှာက အမြဲတမ်း ဒီအုပ်ချုပ်ရေးအဖွဲ့တွေ ၇ ဦးလောက်ရှိတယ်။ သေဆုံးသွားတာကတော့ ၁ ဦးကတော့ သေချာတယ်။ ကျန်တဲ့ ၂ ဦး ၃ ဦးမက ဒဏ်ရာရတာရှိတယ်။ ပြင်းထန်ဒဏ်ရာရတယ်။ သေဆုံးတဲ့သူ အလောင်းကို ရဲကားနဲ့သယ်သွားတယ်။ ပြီးတော့ အုတ်ဖိုဆေးရုံရင်ခွဲရုံကိုပို့တယ်။” လို့ Golden Garuda Battalion – G2B တပ်ဖွဲ့ရဲ့စစ်ရေးတာဝန်ခံ ကိုဂျာနူးက ပြောပါတယ်။

၆၄ နှစ်မြောက်ကချင်တော်လှန်ရေးနေ့ကို ဂုဏ်ပြုတဲ့အနေနဲ့ စာစောင်တွေထုတ်ဝေပြီး ဂုဏ်ပြုတာထက်စာရင် အခုလိုမစ်ရှင်နဲ့ ဂုဏ်ပြုချင်တဲ့အတွက် လုပ်ဆောင်ရခြင်းဖြစ်တယ်လို့ သူကဆိုပါတယ်။

ဒါ့အပြင် အဆိုပါရုံးမှာ စစ်မှုထမ်းဖို့ဖမ်းလာတဲ့သူတွေကို လာရောက်စုဆောင်းတာမျိုးတွေ ပြုလုပ်သလို အဲဒီရုံးက ကားတွေနဲ့ စစ်မှုထမ်းဖို့အတွက် အတင်းအကြပ်ပေါ်တာဆွဲခေါ်တာတွေလုပ်တယ်လို့ ကိုဂျာနူးက ပြောပါတယ်။

အဲ့ဒီရုံးဟာ အုတ်ဖိုမြို့မရဲစခန်းအနီးမှာရှိတဲ့အတွက် မစ်ရှင်ကိုဖော်ဆောင်ဖို့ အခက်အခဲတွေရှိခဲ့တယ်လို့ ဆိုပါတယ်။

“မြို့မရဲစခန်းနဲ့က ခြံစည်းရိုးပဲခြားတယ်။ လုံခြုံရေးတင်းကျပ်တဲ့ အခြေနေတွေကနေပြီးတော့ ကျနော်တို့ရအောင်သွားပြီးတော့ ခက်ခက်ခဲခဲမိုင်းထောင်ပြီးတော့မှ သေချာပြင်ဆင်ရတာဖြစ်တဲ့အတွက် အသက်အန္တရာယ်တွေ အများကြီးရှိတာပေါ့။ တချက်ကလေး ပေါက်သွားတာနဲ့ ကျနော်တို့ရဲဘော်တွေ အားလုံး အသက်ဆုံးရှုံးနိုင်ချေရှိတယ်ဆိုတော့ ဒီဟာကိုဖော်ဆောင်ဖို့အတွက်ကတော့ ကြာပြီပေါ့နော်။ စစ်မှုထမ်းတွေကိုအတင်းအကြပ် ပေါ်တာဆွဲကတည်းက ကျနော်တို့သေချာစောင့်ကြည့်နေတာဖြစ်တယ်။”လို့ ကိုဂျာနူးကပြောပါတယ်။

တိုက်ခိုက်ပြီးနောက် ကာကွယ်ရေးတပ်ဖွဲ့တွေထွက်လို့မရအောင် မြို့ပတ်ပတ်လည်မှာ စစ်ကောင်စီက ဂိတ်ချလုံခြုံရေးချထားသလို ရုံးပတ်ပတ်လည်ကိုလည်း အရပ်ဝတ်တွေနဲ့ ကင်းပုန်းဝပ်ပြီးစောင့်ဆိုင်းနေတာမျိုးတွေလည်းရှိတယ်လို့ သိရပါတယ်။

စာတည်း − လင်း

ပဲခူး၊ ဇန်နဝါရီ ၂၉၊ ၂၀၂၅။

ပဲခူးတိုင်း၊ သာယာဝတီခရိုင်၊ အုတ်ဖိုမြို့နယ်မှာ ဇန်နဝါရီ ၂၈ ရက်နေ့လယ် ၁ နာရီလောက်မှာ ပျူစောထီး ၁ ဦးကို သေနတ်နဲ့ပစ်ခတ်ရာသေဆုံးခဲ့တယ်လို့ သာယာဝတီခရိုင် တပ်ရင်း ၃၈၀၂၊ တပ်ခွဲ ၄ မြေအောက်ပြောက်ကျားတပ်ဖွဲ့ -အုတ်ဖို ဆီကသိရပါတယ်။

အုတ်ဖိုမြို့နယ်၊ သဖန်းပင်ဆိပ်ရွာမှာနေထိုင်တဲ့ ပျူစောထီး တင်နိုင်ထွန်း ဆိုသူကို အုတ်ဖိုတာဆုံနဲ့ သဖန်းပင်ဆိပ်ရွာကြားမှာ ဆိုင်ကယ်နဲ့လာတာကိုသတင်းရတဲ့အတွက် စောင့်ကြိုပစ်ခတ်ခဲ့တာလို့ ဆိုပါတယ်။

“သူက တပ်ကထွက်တာ။ အာဏာသိမ်းစက စစ်**စိတ် လုံးဝမပျောက်ဘူး။ ပြည်သူတွေအပေါ်လူပါးဝတဲ့ လူစားမျိုးပါ။ သူကြွေးကြော်တာက ငါသာခုချိန်ထိ စစ်ထဲကမထွက်သေးရင် ခုမြို့နယ်က PDF တွေကို အပြီးချေမှုန်းပစ်မယ်တဲ့။ သူ့ကြောင့်အသတ်ခံရတာက ပြည်သူ ၄ ယောက်၊ အဖမ်းခံရ၊ စစ်မှုထမ်းအတွက်ပေါ် တာကိုထည့်တာက ၈ ယောက်။ လူငယ်တွေချည်းပဲ။” လို့ ၃၈၀၂ တပ်ရင်း၊ တပ်ခွဲ ၄ မှ တပ်ခွဲမှူးရဲဘော်ဒေဝ က ပြောပါတယ်။

ပစ်ခတ်ပြီးနောက် လက်ပစ်ဗုံး ၁ လုံး၊ မိုဘိုင်းဖုန်း ၁ လုံးနဲ့ ဆိုင်ကယ် ၁ စီးတို့ကိုသိမ်းဆည်းခဲ့တယ်လို့ သိရပါတယ်။

ကိုတင်နိုင်ထွန်းဟာ ကာကွယ်ရေးအဖွဲ့တွေရဲ့အချက်အလက်တွေကို စစ်ကောင်စီတပ်ဖွဲ့ဝင်တွေဆီပေးပို့တာ၊ လူငယ်တွေကိုပေါ်တာဆွဲဖို့ စစ်ကောင်စီဆီသတင်းပေးတာ၊ ဖမ်းဆီးခိုင်းတာတွေလုပ်တယ်လို့ သာယာဝတီခရိုင် တပ်ရင်း ၃၈၀၂၊ တပ်ခွဲ ၄ မြေအောက်ပြောက်ကျားတပ်ဖွဲ့-အုတ်ဖိုရဲ့ ထုတ်ပြန်ချက်မှာပါရှိပါတယ်။

ပြီးခဲ့တဲ့ ၂၀၂၄ ဒီဇင်ဘာ ၄ ရက်ကလည်း တိမ်မြှုပ်ရွာအခြေစိုက် ခမရ ၆ ကနေထွက်လာတဲ့စစ်ကောင်စီ ဆိုင်ကယ်ယာဉ်တန်းကို သာယာဝတီခရိုင် တပ်ရင်း ၃၈၀၂၊ တပ်ခွဲ ၄ မြေအောက်ပြောက်ကျားတပ်ဖွဲ့ -အုတ်ဖို တပ်ဖွဲ့ဝင်တွေက စောင့်ကြိုတိုက်ခိုက်ခဲ့ရာ MA 3 သေနတ် ၁ လက်၊ ကျည်ဘောက် ၂ ခု၊ ၅.၅၆ ကျည် ၄၉ တောင့်၊ လက်ပစ်ဗုံး ၃ လုံး၊ မိုဘိုင်းဖုန်း ၂ လုံး၊ ကျောပိုးအိတ် ၁ လုံး၊ မှတ်ပုံတင် ၁ ခု၊ ငွေသား ၄၀,၀၀၀ ကျပ်နဲ့ ခမရ ၆ တပ်ရဲ့ လျှို့ဝှက်စာရွက်စာတမ်းများကို သိမ်းဆည်းရရှိခဲ့တယ်လို့ သိရပါတယ်။

စာတည်း – လင်း