PDF

မြင်းမူ၊ ဖေဖော်ဝါရီ ၁၀၊ ၂၀၂၆။

စစ်ကိုင်းတိုင်း၊ မြင်းမူမြို့နယ်၊ ထီးဆောင်းကျေးရွာနဲ့ ကန်ပြားကျေးရွာကြားရှိ PDF စခန်း ၁ ခု စီးနင်း ခံရပြီး တပ်ဖွဲ့ဝင် ၄ ဦးဒဏ်ရာရကာ စခန်းရှိပစ္စည်းအချို့ဆုံးရှုံးခဲ့တယ်လို့ ဖြစ်စဥ်ကိုသိထားတဲ့ ဒေသကာကွယ်ရေးအဖွဲ့တာဝန်ရှိသူတဦးက ပြောပါတယ်။

ဖေဖော်ဝါရီ ၈ ရက်မနက် ၂ နာရီခန့်မှာ ထီးဆောင်းကျေးရွာရှိ စစ်ကော်မရှင်အထိုင်စခန်းကနေလာတဲ့ အင်အား ၁၀၀ ကျော်ပါ စစ်ကော်မရှင်တပ်ဖွဲ့ဝင်တွေက ၂ မိုင်ဝန်းကျင်အကွာရှိ အထက်ပါစခန်းကိုဝင်စီးချိန် ပစ်ခတ်မှုဖြစ်ပြီးနောက် စခန်းကနေဆုတ်ခွာသွားခဲ့ကြတာလို့ ဆိုပါတယ်။

“ထီးဆောင်းက **ကဝင်စီးတာပေါ့။ အပြန်အလှန်ပစ်ခတ်မှုတော့ ဖြစ်သေးတယ်။ တိုက်ပွဲဖြစ်ချိန်ကတော့ ၁၀ မိနစ် ၁၅ မိနစ်လောက်ပဲဖြစ်တယ်။ သိသလောက်က ၄ ဦးထိတာရှိတယ်။ စခန်းထဲက ပစ္စည်းတွေလည်း ပါသွားတယ်။”လို့ ဖြစ်စဥ်ကိုသိထားတဲ့ ဒေသကာကွယ်ရေးအဖွဲ့တာဝန်ရှိသူတဦးက ပြောပါတယ်။

တိုက်ခိုက်ခံရတဲ့ စခန်းဟာ စစ်ကိုင်းခရိုင်တပ်ရင်း ၆ ရဲ့ ရှေ့တန်းစခန်းဖြစ်ပြီး တိုက်ပွဲအတွင်းတပ်ဖွဲ့ဝင် ၄ ဦးဒဏ်ရာရကာ ဒဏ်ရာရသူတွေထဲက ၁ ဦးက စိုးရိမ်ရတယ်လို့ သူကဆက်ပြောပါတယ်။

ဒါ့အပြင် ကား ၁ စီး၊ စစ်လက်နက်ပစ္စည်းအချို့၊ ယူနီဖောင်းတွေဆုံးရှုံးပြီး ကာလတန်ဖိုး ကျပ်သိန်းရာချီဆုံးရှုံးမှုရှိနိုင်ကာ စစ်ကော်မရှင်တပ်တွေကတော့ ပစ္စည်းတွေသိမ်းယူကာ အဲ့ဒီနေ့မနက် ၈ နာရီလောက်မှာ ထီးဆောင်းရွာကို ပြန်လည်ဆုတ်ခွာသွားတယ်လို့ သိရပါတယ်။

အဆိုပါ စခန်းစီးနင်းခံရမှုနဲ့ပတ်သက်ပြီး စစ်ကိုင်းခရိုင်တပ်ရင်း ၆ ဒုတပ်ရင်းမှူးထံ မြေလတ်အသံ ကဆက်သွယ်မေးမြန်းခဲ့ပေမယ့် လတ်တလောဖြေကြားပေးဖို့အဆင်မပြေသေးကြောင်း ပြန်လည်ပြောကြားခဲ့ပါတယ်။

ဇန်နဝါရီ ၂၂ ရက်ကလည်း စစ်ကိုင်းတိုင်း၊ ချောင်းဦးမြို့နယ်၊ နတ်ရေကန်နဲ့ မြင်းမူမြို့နယ်၊ အလ္လကပကျေးရွာကြား ရေပိုးစာရေကန်အနီး မုံရွာ-မန္တလေးလမ်းပေါ်မှာ PDF အချို့ တိုက်ခိုက်ခံရပြီး ၂ ဦးကျဆုံးတယ်လို့ သိရပါတယ်။

စာတည်း – လင်း

နတ်တလင်း၊ ဖေဖော်ဝါရီ ၉၊ ၂၀၂၆။

ပဲခူးတိုင်း၊ နတ်တလင်းမြို့နယ် ကျေးရွာ ၁ ရွာရှိ PDF ကင်းစခန်းပေါ် ဒရုန်းဗုံးကျရောက်ပေါက်ကွဲပြီး PDF တပ်ဖွဲ့ဝင် ၆ ဦးသေဆုံးခဲ့တယ်လို့ သာယာဝတီခရိုင် တပ်ရင်း ၁ တာဝန်ရှိသူတွေဆီက သိရပါတယ်။

ဖေဖော်ဝါရီ ၆ ရက်မနက် ၈ နာရီခန့်မှာ ရွာအပြင်ဘက်ရှိ ကင်းစခန်းအဖြစ်ပြုလုပ်ထားတဲ့နေအိမ်ပေါ်ကို စစ်ကော်မရှင်တပ်တွေပစ်ခတ်တဲ့ ဒရုန်းဗုံးတွေကျရောက်ပေါက်ကွဲခဲ့တာလို့ ဆိုပါတယ်။

“ဂေါင်ဆုံး(ပထမဆုံး)အလုံးလာချတဲ့အချက်မှာပဲ ကလေးတွေကိုထိတာ။ ၁ ချက်တည်းနဲ့ အိမ်ပေါ်ကျတာ။ လာချတာကတော့အများကြီးပဲ။ ဂေါင်ဆုံးအလုံးမှာတင် ၆ ယောက်စလုံးကျတာ။ ၁ ချက်တည်း ၁ နေရာတည်းကို အကုန်လုံး ၁ ယောက်မှ အကောင်းမကျန်တာ။ “လို့ သာယာဝတီခရိုင် တပ်ရင်း ၁ တာဝန်ရှိသူကပြောပါတယ်။

ဒရုန်းဗုံးထိမှန်လို့ ကျဆုံးသူတွေဟာ သာယာဝတီခရိုင်တပ်ရင်း ၁၊ တပ်ခွဲ ၄ က အသက် ၂၀ ကနေ ၃၀ ကြားအရွယ်ရှိ နေကြီး၊ ရှိုင်းလေး၊ မဲလုံး၊ ကြွက်နီ၊ မိုးဆက်၊ နောက်တိုးတို့ဖြစ်တယ်လို့ ဆိုပါတယ်။

ဒရုန်းဗုံးထိမှန်ကျဆုံးခဲ့တဲ့ တပ်ဖွဲ့ဝင်တွေရဲ့ စျာပနကို ဖေဖော်ဝါရီ ၇ ရက်မှာပြုလုပ်ခဲ့တယ်လို့သိရပြီး စစ်အာဏာသိမ်း ၅ နှစ်တာကာလမှာ သာယာဝတီခရိုင်တပ်ရင်း ၁ က တပ်ဖွဲ့ဝင် ၁၅ ဦးကျဆုံးထားတယ်လို့ သိရပါတယ်။

အလားတူ ဖေဖော်ဝါရီ ၇ ရက်ည ၁၁ နာရီခွဲမှာလည်း နတ်တလင်းမြို့နယ်၊ သခွတ်ကုန်းကျေးရွာကို စစ်ကော်မရှင်ဘက်က ဒရုန်းနဲ့ဗုံးကြဲရာ နေအိမ် ၂ လုံးထိခိုက်ပျက်စီးခဲ့သေးတယ်လို့ သိရပါတယ်။

စာတည်း – လင်း

ကြို့ပင်ကောက်၊ ဇန်နဝါရီ ၁၃၊ ၂၀၂၆။

ပဲခူးတိုင်း၊ ကြို့ပင်ကောက်မြို့နယ်၊ ရှမ်းလမ်းကွင်းကျေးရွာ ရန်ကုန်-ပြည်လမ်းအနီး ပစ်ခတ်မှုဖြစ်ပြီး ကာကွယ်ရေးတပ်ဖွဲ့ဝင် ၃ ဦးသေဆုံးခဲ့တယ်လို့ ဖြစ်စဥ်ကိုသိရှိတဲ့ ပဲခူးတိုင်းအနောက်ခြမ်းမှာလှုပ်ရှားနေတဲ့ ကာကွယ်ရေးတပ်ဖွဲ့ဝင်တဦးက ပြောပါတယ်။

ဇန်နဝါရီ ၁၃ ရက်မနက် ၃ နာရီခန့်မှာ စစ်ကော်မရှင်ကင်းအဖွဲ့နဲ့ ဒေသကာကွယ်ရေးလှုပ်ရှားအဖွဲ့တို့ ၁၅ မိနစ်ကြာပစ်ခတ်မှုဖြစ်ခဲ့တာလို့ ဆိုပါတယ်။

“ရဲဘော်တွေက အရှင်ဖမ်းမိပြီး ပစ်သတ်ခံရတယ်။ ခုလောလောဆယ်မှာ ကားလမ်းဘေးမှာပဲ အလောင်းတွေကို ဒီအတိုင်းချထားတယ်။ ဘယ်သူမှမကောက်ရသေးဘူး။ သတင်းပေါက်ကြားမှုပေါ့။” လို့ ဖြစ်စဥ်ကိုသိထားတဲ့ ကာကွယ်ရေးတပ်ဖွဲ့ဝင်တဦးက ပြောပါတယ်။

ဒီပစ်ခတ်မှုအတွင်း နှစ်ဖက်ထိခိုက်ကျဆုံးရှိတယ်လို့သိရပြီး စစ်ကော်မရှင်တပ်တွေဘက်က အခြေအနေကိုတော့ လတ်တလောအတည်မပြုနိုင်သေးဘူးလို့ ဆိုပါတယ်။

ဒါ့အပြင် စစ်ကောာ်မရှင်ထောက်ခံတယ်လီဂရမ်တွေမှာလည်း စစ်ကော်မရှင်အဖွဲ့ဝင်တွေ ကင်းပုန်းဝပ်နေချိန် PDF အဖွဲ့ဝင်တွေကိုတွေ့ပြီး ပစ်ခတ်ရာမှာ ၃ ဦးသေဆုံးပြီး သေနတ် ၁ လက် သိမ်းဆည်းရမိခဲ့တယ်လို့ ဓါတ်ပုံနဲ့တကွ ရေးသားဖော်ပြထားပြီး ပုံတွေကလည်းမှန်ကန်ကြောင်း အထက်ပါတပ်ဖွဲ့ဝင်က အတည်ပြုပါတယ်။

ဒီဖြစ်စဥ်နဲ့ပက်သက်ပြီး ကျဆုံးတပ်ဖွဲ့ဝင်တွေက ဘယ်အဖွဲ့ကလဲဆိုတာနဲ့ သက်ဆိုင်ရာအဖွဲ့အစည်းတွေဘက်ကတော့ ထုတ်ပြန်ကြေညာလာတာ မတွေ့ရသေးပါဘူး။

နိုဝင်ဘာ ၂၃ ရက်ကလည်း ကြို့ပင်ကောက်မြို့နယ်၊ ကြည်စုရွာအနီးရှိ စစ်ကော်မရှင် သဲကုန်းစစ်ဆေးရေးဂိတ် တိုက်ခိုက်ခံရပြီး ၅ ဦးသေဆုံးတယ်လို့ သိရပါတယ်။

စာတည်း – လင်း

စစ်တပ်ကစစ်ကြောင်းထိုးမီးရှို့လို့ နေအိမ် ၂၃၀ ကျော်ပျက်စီး

ယင်းမာပင်၊ ဒီဇင်ဘာ ၂၂၊ ၂၀၂၅။

စစ်ကိုင်းတိုင်း၊ ယင်းမာပင်မြို့နယ်၊ ကျောက်မှော်ရွာအနီးမှာ ဒီဇင်ဘာ ၁၇ ရက်က တိုက်ပွဲဖြစ်ပြီး နှစ်ဖက်ထိခိုက်သေဆုံးရှိခဲ့တယ်လို့ တော်လှန်ရေးတပ်ဖွဲ့ဝင်တွေဆီက သိရပါတယ်။

ဒီဇင်ဘာ ၁၆ ရက်မှာ ယင်းမာပင်မြို့နယ်၊ အောင်ဇေယျစစ်မှုထမ်းဟောင်းကုန်းကနေ အင်အား ၂၀၀ ပါတဲ့စစ်ကြောင်းက စုန်းချောင်းရွာနဲ့ အင်းဖျားရွာတို့ကိုဖြတ်ပြီးနောက် ပန်းတိမ်ပြင်ရွာနဲ့ ကျောက်မှော်ရွာတို့မှာ စစ်ကြောင်း ၂ ခုခွဲတပ်စွဲနေစဥ် တော်လှန်ရေးပူးပေါင်းတပ်တွေနဲ့ တိုက်ပွဲဖြစ်ခဲ့တာလို့ ယင်းမာပင်မြို့နယ်စစ်ကြောင်း – YMB Column ရဲ့ တိုက်ပွဲထုတ်ပြန်ချက်မှာ ဖော်ပြပါတယ်။

အဆိုပါတိုက်ပွဲမှာ စစ်ကော်မရှင်တပ်သား ၉ ဦး သေဆုံးခဲ့ကာ ၃ ဦးကို ကျောက်မှော်ရွာမှာ အမိန့်ပြန်တမ်းနဲ့အတူ မြှုပ်နှံထားခဲ့ပြီး ကျန်သေဆုံးရုပ်အလောင်းတွေနဲ့ ဒဏ်ရာရ စစ်ကော်မရှင်တပ်သားတွေကို စက်လှေနဲ့ နမခ ဘက်ကမ်းကို ပြန်သယ်သွားတယ်လို့ သိရပါတယ်။

“အလောင်း ၃လောင်းကိုတော့ ကျောက်မှော်ဘုန်းကြီးကျောင်းရဲ့ မြောက်ဘက်မှာ အမိန့်ပြန်တမ်းနဲ့ မြှုပ်ထားခဲ့တာ၊ ပြန်ဖော်တော့ အမိန့်ပြန်တမ်းနဲ့ တွေ့ရတာ။” လို့ YMB Column တာဝန်ရှိသူတဦးက မြေလတ်အသံကို ပြောပါတယ်။

အဆိုပါ ထိတွေ့တိုက်ပွဲဟာ တိုက်ပွဲကြာချိန် ၂ နာရီခန့်ကြာမြင့်ခဲ့ပြီး ယင်းမာပင်မြို့နယ်စစ်ကြောင်း – YMB Column က တပ်ဖွဲ့ဝင်စိုးပိုင်နဲ့ ကနီအခြေစိုက် B21 တပ်ဖွဲ့ဝင် ဖိုးညိုတို့သေဆုံးခဲ့ပြီး အခြားတပ်ဖွဲ့ဝင် ၂ ဦးလည်း ထိခိုက်ဒဏ်ရာရခဲ့တယ်လို့ သိရပါတယ်။

အဆိုပါတိုက်ပွဲကို ယင်းမာပင်မြို့နယ်စစ်ကြောင်း – YMB Column၊ ယင်းမာပင်မြို့နယ် ပကဖလက်ရုံးတပ် – ULF စစ်ကြောင်း၊ ကနီမြို့နယ် 9+စစ်ကြောင်း၊ ယင်းမာပင်ခရိုင် အမှတ် ၉ တပ်ရင်း၊ BNRA၊ ကနီမြို့နယ် ပကဖလက်ရုံးတပ်၊ ဆားလင်းကြီးမြို့နယ် ပကဖ လက်ရုံးတပ်၊ ဘုတလင်တော်လှန်ရေးအင်အားစု၊ ရတနာပုံကျောင်းသားတပ် တို့က ပူးပေါင်းတိုက်ပွဲဝင်ခဲ့ကြတာလို့ YMB Column ရဲ့ တိုက်ပွဲထုတ်ပြန်ချက်မှာ ဖော်ပြပါတယ်။

အဆိုပါတိုက်ပွဲမှာ စစ်ကော်မရှင်တပ်ရဲ့ စစ်ကူရောက်ရှိလာတာ၊ နမကကနေ လက်နက်ကြီး ပစ်ကူပေးတာနဲ့ လေကြောင်းတိုက်ခိုက်တာတွေကြောင့် တော်လှန်ရေးတပ်ဖွဲ့တွေ ပြန်လည် ဆုတ်ခွာခဲ့ရပြီး စစ်ကော်မရှင်တပ်ရဲ့ လက်နက်ကြီးပစ်ခက်မှုတွေက ကျေးရွာတွေထဲကို ကျရောက်ခဲ့ပေမယ့် ပြည်သူနဲ့ တော်လှန်ရေးတပ်ဖွဲ့ဝင်တွေ ထိခိုက်တာမျိုးတော့မရှိဘူးလို့ တိုက်ခိုက်ရေးတပ်ဖွဲ့ဝင်တဦးဆီက သိရပါတယ်။

ဒါ့အပြင် ဒီဇင်ဘာ ၁၇ ရက်ကနေ ဒီဇင်ဘာ ၁၉ရက်အတွင်း ကျောက်မှော်ရွာက ၂၇ အိမ်၊ ကျောက်ကုန်းရွာက ၆၅ အိမ်၊ အင်းပတ်ရွာက နေအိမ် ၄၇ အိမ်၊ စာကြည့်တိုက်နဲ့ ကျောင်းဆောင် ၁ ဆောင်၊ ကျွန်းပေါ်ရွာက ၃၄ အိမ်၊ နှောပင်ရွာက ၃၆ အိမ်၊ ကြက်လျှာရွာက ၁၆ အိမ်နဲ့ ပန်းတိမ်ပြင်ရွာက နေအိမ် ၂ လုံးတို့ကို စစ်ကော်မရှင်တပ်က စစ်ကြောင်းထိုး မီးရှို့ဖျက်ဆီးခဲ့တယ်လို့ သိရပါတယ်။

ခုလိုစစ်ကြောင်းထိုးမီးရှို့လို့ ထွက်ပြေးတိမ်းရှောင်နေရတဲ့ဒေသခံတွေအတွက် အမိုးအကာ၊ စောင်၊ ဆေးဝါးနဲ့ စားနပ်ရိက္ခာအကူအညီတွေ လိုအပ်နေတယ်လို့ ဒေသခံတွေဆီက သိရပါတယ်။

စာတည်း – လင်း

အောင်လံ၊ ဒီဇင်ဘာ ၁၉၊ ၂၀၂၅ ။

မကွေးတိုင်း၊ အောင်လံမြို့နယ်၊ မြင့်ဦးရွာနဲ့ ညောင်ပင်ဆိပ်ရွာအကြားမှာ စစ်ကော်မရှင်တပ်ဖွဲ့တွေနဲ့ ပြည်သူ့ကာကွယ်ရေးတပ်ဖွဲ့တွေ ပစ်ခတ်မှုဖြစ်ပြီး PDF ၆ ဦးကျဆုံးခဲ့တယ်လို့ အောင်လံအခြေစိုက်ဒေသကာကွယ်ရေးအဖွဲ့ဝင်တဦးထံက သိရပါတယ်။

ဒီဇင်ဘာ ၁၈ ရက် ယမန်နေ့ ညနေ ၅ နာရီခွဲမှာ ကံမ(သရက်)မြို့နယ်ဘက်ကို ဧရာဝတီမြစ်ကူးမယ့်ကာကွယ်ရေးတပ်ဖွဲ့ဝင် ၆ ဦးဟာ မြင့်ဦးကျေးရွာနဲ့ညောင်ပင်ဆိပ်ကျေးရွာအကြားကိုရောက်ရှိစဥ် ကင်းပုန်းဝပ်နေတဲ့ စစ်ကော်မရှင်တပ်ဖွဲ့တွေက ပစ်ခတ်ခဲ့တာလို့ ဆိုပါတယ်။

” နယ်မြေဖြတ်သန်းသွားလာတာ၊ ပုန်းနဲ့တိုးပြီး ထိတွေ့တိုက်ပွဲဖြစ်တာ”လို့ ဖြစ်စဥ်ကိုသိရှိတဲ့ အောင်လံဒေသကာကွယ်ရေးအဖွဲ့ဝင်တဦးက မြေလတ်အသံကို ပြောပါတယ်။

ထိတွေ့ပစ်ခတ်မှုအတွင်း ကာကွယ်ရေးအဖွဲ့ဝင် ၆ ဦးကျဆုံးခဲ့ပြီး ကျဆုံးတပ်ဖွဲ့ဝင်တွေက ဧရာဝတီတိုင်း PDFတွေ ဖြစ်ကြောင်း ကနဦးစုံစမ်းသိရှိထားရပေမယ့် ဘယ်တပ်ရင်း၊ တပ်ဖွဲ့ကဆိုတာ မသိရသေးဘူးလို့ သူက ပြောပါတယ်။

တိုက်ပွဲအတွင်း PDF တွေပါလာတဲ့လက်နက်အချို့လည်း စစ်ကော်မရှင်ဘက်က သိမ်းဆည်းရရှိသွားပြီး အရေအတွက်ကိုတော့ စိစစ်နေတယ်လို့ သိရပါတယ်။

စစ်ကောင်စီကိုထောက်ခံရေးသားနေတဲ့ တယ်လီဂရမ်ချန်နယ်တွေမှာတော့ အောင်လံမြို့နယ်အတွင်းမှာ PDF ၆ ဦးကို စစ်ကော်မရှင်တပ်ဖွဲ့ဝင်တွေက ပစ်ခတ်ရှင်းလင်းနိုင်ခဲ့ပြီး သေနတ် ၄ လက်နဲ့ဆက်စပ်ပစ္စည်းတွေ သိမ်းဆည်းရမိတယ်ဆိုကာ ရေးသားဖော်ပြကြပါတယ်။

စစ်ကော်မရှင်တယ်လီဂရမ်တွေမှာ ဖော်ပြထားတဲ့ ကျဆုံး PDF ရုပ်အလောင်းမှတ်တမ်းဓာတ်ပုံတွေဟာ နယ်မြေဖြတ်သန်းသွားလာရင်း ထိတွေပစ်ခတ်မှုတွေ ဖြစ်ခဲ့တဲ့ PDF တွေမှန်ကန်ကြောင်း အခင်းဖြစ်နေရာအနီးရှိ မြင့်ဦးနဲ့ ညောင်ပင်ဆိပ်ရွာဒေသခံတွေဘက်က အတည်ပြုပြောဆိုတယ်လို့ အထက်ပါဒေသကာကွယ်ရေးတပ်ဖွဲ့ဝင်က ပြောပါတယ်။

စာတည်း – ဟိန်းစံ

မြေလတ်အသံ၊ ဒီဇင်ဘာ ၉၊ ၂၀၂၅။

မကွေးတိုင်း၊ မင်းဘူး(စကု)မြို့နယ်မှာ စစ်ကော်မရှင်တပ်က စစ်ကြောင်းထိုးပြီး ဖမ်းဆီးသတ်ဖြတ်တာတွေလုပ်ဆောင်နေတဲ့စစ်ကြောင်းကို ဒေသတော်လှန်ရေးပူးပေါင်းတပ်ဖွဲ့တွေက တိုက်ခိုက်ခဲ့တယ်လို့ မင်းဘူးခရိုင်အမှတ် ၆ တပ်ရင်းက ပြောပါတယ်။

ဒီဇင်ဘာ ၃ ရက်မှာ ခံကုန်းကျေးရွာကနေ အင်အား ၁၂၀ ခန့်နဲ့ ရွှေစက်တော်ဘုရားအနီးဝန်းကျင်ကို စစ်ကြောင်းထိုးလာတဲ့ စစ်ကော်မရှင်တပ်သားတွေက ဒီဇင်ဘာ ၄ ရက် နေ့လယ်ပိုင်းမှာ ရွှေကြောင်းရွာကို ဝင်ရောက်လာပြီး အသက် ၄၀ ကျော်အမျိုးသား ၁ ဦးကို သေနတ်နဲ့ပစ်သတ်ခဲ့တယ်လို့ ဆိုပါတယ်။

” သူတို့ကရွှေကြောင်းရွာကိုဝင်တဲ့အချိန်မှာ လယ်ကွင်းမှာရိတ်နေတဲ့အမျိုးသားကိုလှမ်းပစ်တာ။ PDF ဆိုပြီးလှမ်းပစ်တော့ အဲ့အမျိုးသားကို မသေမရှင်ဖြစ်နေတဲ့အချိန်မှာ ရိုက်နှက်ပြီးတော့ သေအောင်သတ်သွားတာ။ အဲ့တာကို အတူတူပုန်းနေတဲ့ ပြည်သူတွေကလည်း မြင်တယ်။ ပြီးတော့ မိသားစုကိုသင်္ဂြိုဟ်ခွင့် မပေးဘဲနဲ့ သူတို့သင်္ဂြိုဟ်သွားတယ်”လို့ မင်းဘူးခရိုင်အမှတ် ၆ တပ်ရင်းတာဝန်ရှိသူက မြေလတ်အသံကို ပြောပါတယ်။

ဒီဇင်ဘာ ၅ ရက် မနက်ပိုင်းမှာတော့ အဲ့ဒီစစ်ကြောင်းဟာ ရွှေကြောင်းရွာကနေ ကူရွာကို ဆက်လက်ဝင်ရောက်လာပြီး အသက် ၅၀ ခန့်အရွယ်ရှိ အမျိုးသား ၁ ဦးကို PDF ဆိုကာ ထပ်မံသတ်ဖြတ်ခဲ့တယ်လို့ သိရပါတယ်။

“ကူရွာက အမျိုးသားကို ပစ်သတ်တဲ့အချိန်မှာ သူ့သားလေးက ဘေးနားမှာကျန်ခဲ့တယ်ဗျ။ သူ့ရဲ့ညီနဲ့အမျိုးတွေကလည်း ဘေးနားမှာရှိတယ်ဗျ။ အဲ့လိုအခြေအနေမှာ လှမ်းပစ်လိုက်တာ ထုတ်ချင်းဖောက်သွားတယ်ဗျ” လို့ အထက်ပါတာဝန်ရှိသူက ပြောပါတယ်။

ကူရွာကနေ ထွက်ခွာလာတဲ့ အထက်ပါစစ်ကြောင်းကို အဲ့ဒီနေ့ နေ့လယ်ပိုင်းမှာပဲ ကုတင်ကုန်းရွာအနီးမှာ ​မိနစ် ၃၀ ကြာ ကြားဖြတ်တိုက်ခိုက်ခဲ့ရာ စစ်ကော်မရှင်တပ်ဖွဲ့ဝင် ၄ ဦးသေဆုံးပြီး အများအပြား ဒဏ်ရာရရှိခဲ့တယ်လို့ သူကဆက်ပြောပါတယ်။

တိုက်ပွဲဖြစ်ပွားခဲ့ပြီးနောက် စစ်ကော်မရှင်တပ်သားတွေက ကုတင်ကုန်းရွာထဲကို လက်နက်ကြီး၊ လက်နက်ငယ်တွေနဲ့ ပစ်ခတ်ခဲ့တာကြောင့်နေအိမ်အချို့ပျက်စီးခဲ့သလို ကျေးရွာတွင်းရှိ အသက် ၂၀ ကျော် အမျိုးသား ၂ ဦးကို လက်ပံတောရွာရဲစခန်းကို ဖမ်းဆီးခေါ်ဆောင်သွားခဲ့တယ်လို့ သိရပါတယ်။

ဒီဇင်ဘာ ၆ ရက် နေ့လယ်ပိုင်းမှာ လက်ပံတောရဲစခန်းကို မင်းဘူးခရိုင်၊ အမှတ် ၆ တပ်ရင်း၊ မင်းဘူးခရိုင်၊ အမှတ် ၄ တပ်ရင်း၊ မင်းဘူးမြို့နယ်ပြည်သူ့ကာကွယ်ရေးအဖွဲ့(ပကဖ)တို့က ဒရုန်းဗုံးသီး ၆ လုံးနဲ့ တိုက်ခိုက်ခဲ့ရာ စစ်ကော်မရှင်တပ်သား ၄ ဦး ထိခိုက်ဒဏ်ရာ ရရှိခဲ့တယ်လို့ သိရပါတယ်။

စာတည်း – ဟိန်းစံ

မြေလတ်အသံ၊ ဒီဇင်ဘာ ၉၊ ၂၀၂၅။

မကွေးတိုင်း၊ ကံမ၊ သရက်နဲ့ မင်းဘူး(စကု)မြို့နယ်တွေမှာ စစ်ကြောင်းထိုးလာတဲ့ စစ်ကော်မရှင်တပ်တွေနဲ့ ဒေသကာကွယ်ရေးတပ်တွေအကြား တိုက်ပွဲဖြစ်ပွားခဲ့ပြီး စစ်ကော်မရှင်တပ်ဖက်မှ သေဆုံးမှုရှိခဲ့တယ်လို့ PDF တာဝန်ရှိသူတွေထံက သိရပါတယ်။

ဒီဇင်ဘာ ၈ ရက်မနက် ၉ နာရီမှာ ကံမမြို့နယ်၊ ရေနံ့သာရဲကင်းစခန်းကနေ အင်အား ၄၀ ခန့်နဲ့ထွက်ခွာလာတဲ့ စစ်ကြောင်းကို နတ်မီးတောက်ကျေးရွာအနီးမှာ မိုင်းခွဲတိုက်ခိုက်ပြီးတဲ့နောက် ထိတွေ့တိုက်ပွဲတွေဖြစ်ခဲ့တာလို့ သရက်ခရိုင်အမှတ် ၄ တပ်ရင်းမှ သတင်းနဲ့ပြန်ကြားရေးတာဝန်ခံ ကိုမြတ်က ပြောပါတယ်။

” အသင့်ထောင်ထားတဲ့မိုင်းက ၃ လုံးပါ ကွင်းမိုင်း။ ၆ ဦးသေဆုံးတာကို သူတို့စစ်ကြောင်းက ရှေ့ပွိုင့် ၆ ယောက်က မိုင်းကွင်းထဲဝင်လာတဲ့အချိန်မှာ မိုင်းဆွဲလိုက်တာ။ သူတို့အဲ့နေရာမှာတင် တုံးလုံးလဲကျသွားပြီးတော့ ကျနော်တို့ရဲဘော်တွေက နောက်မှာပါလာတဲ့ နောက်ချန်စစ်ကြောင်းကို ပစ်ခတ်တိုက်ခိုက်တာပါ” လို့ ဆိုပါတယ်။

တိုက်ခိုက်ခံရပြီးတဲ့နောက် ဆက်ထွက်လာတဲ့အဲ့ဒီစစ်ကြောင်းဟာ ကံမမြို့နယ်ကတဆင့် မွန်းလွဲ ၁၂ နာရီမှာ သရက်မြို့နယ်၊ စက်တောင်ကျေးရွာ ရောက်ရှိလာချိန် အနီးကပ် ပစ်ခတ်တိုက်ခိုက်ခဲ့တယ်လို့ သိရပါတယ်။

” ကျနော်တို့ရဲဘော်တွေက ကတ္တရာလမ်းရဲ့ ဘေး၊ မြောင်တွေကနေ ရန်သူကိုအနီးကပ် တိုက်ခိုက်တာပါ။ မီတာ ၁၅၊ ၂၀လောက် အကွာကနေ။ အဲ့ဒီမှာအနီးကပ်တိုက်ခိုက်မှုကြောင့် သူတို့ထိခိုက်၊ လဲကျ၊ သေဆုံးတာကို မြင်ရသလို ဒဏ်ရာရတွေကို သရက်ဆေးရုံကိုရောက်ရှိလာတာရှိပါတယ်။ အဲ့ကနေမှ ၁၀ ဦးသေဆုံးတာကိုအတည်ပြုခဲ့တာပါ”လို့ အထက်ပါတာဝန်ခံက ပြောပါတယ်။

၂ ကြိမ်တိုက်ခိုက်မှုအတွင်း စစ်ကော်မရှင်တပ်သား ၁၆ ဦးခန့် သေဆုံးမှုရှိခဲ့တယ်လို့ ပြောဆိုပေမယ့် မြေလတ်အသံက သီးခြားအတည်မပြုနိုင်ပါဘူး။

လက်ရှိမှာ တိုက်ခိုက်ခံရတဲ့ အထက်ပါစစ်ကြောင်းဟာ သရက်မြို့ပေါ်ကနေ ထွက်ခွာလာတဲ့ အင်အား ၃၀ ခန့်ပါစစ်ကြောင်းနဲ့ စက်တောင်ကျေးရွာမှာ ပူးပေါင်းပြီးကျေးရွာအတွင်း အထိုင်ချတပ်စွဲကာ တိုက်ပွဲဖြစ်ပွားခဲ့တဲ့နေရာတွေကို လက်နက်ကြီးတွေနဲ့ပစ်ခတ်ခဲ့တယ်လို့ ကိုမြတ်က ဆိုပါတယ်။

ကံမမြို့နဲ့သရက်မြို့နယ်အတွင်းမှာတိုက်ပွဲတွေ ထပ်မံဖြစ်ပွားလာနိုင်တာကြောင့် သရက်-ကံမလမ်းပိုင်းကို အသုံးပြုသွားလာကြမယ့် ခရီးသွားပြည်သူတွေအနေနဲ့ သတိပြုသွားလာကြဖို့ကိုလည်း သရက်ခရိုင်အမှတ် ၄ တပ်ရင်းက အသိပေးထားပါတယ်။