PDF

ဆားလင်းကြီး၊ ဖေဖော်ဝါရီ ၂၀၊ ၂၀၂၃။

စစ်ကိုင်းတိုင်း၊ ဆားလင်းကြီးမြို့နယ်ထဲက ကျေးရွာတရွာမှာ နယ်မြေခံကာကွယ်ရေးအဖွဲ့တွေ လုံခြုံရေးယူပေးပြီး လူထုအင်အားရာချီနဲ့ သပိတ်စစ်ကြောင်းထွက်ခဲ့တယ်လို့ သိရပါတယ်။

ဖေဖော်ဝါရီလ ၂၀ ရက်ဒီကနေ့နေ့လည်က “ငါတို့သည်ပြာပုံကိုမကြောက် စစ်ဖိနပ်အောက် ဒူးမထောက်”ဆိုတဲ့ ဘန်နာကိုင်စွဲပြီး၊ ကျေးရွာအကြီးအကဲတွေနဲ့ သပိတ်ကော်မတီဝင်၂ ဦးက သပိတ်တရားဟော‌ပြောကာ သွေးသစ္စာသီချင်းနဲ့ သပိတ်သိမ်းခဲ့တယ်လို့ ဆိုပါတယ်။

အဆိုပါ သပိတ်စစ်ကြောင်းကို ကျေးရွာပအဖ၊ ပကဖနဲ့ Salingyi People Defence Force-SPDFတို့က လုံခြုံရေးယူပေးခဲ့တယ်လို့ သိရပါတယ်။

မကွေး၊ ဖေဖော်ဝါရီ ၁၅၊ ၂၀၂၃။

မကွေးတိုင်း၊ ဆိပ်ဖြူမြို့နယ်မှာရှိတဲ့ ဆိပ်ဖြူမြို့နယ် ပြည်သူ့ကာကွယ်ရေးတပ်ဖွဲ့ (ဗိုလ်မထားတပ်ဖွဲ့)ရဲ့ စခန်းငယ်တခုကို စစ်ကောင်စီအင်အား ၂၀၀ လောက်နဲ့ ဝိုင်းပစ်ခံခဲ့ရတယ်လို့ သိရပါတယ်။

ဖေဖော်ဝါရီ ၁၄ ရက် မနေ့က မနက် ၅ နာရီလောက်က လက်နက်ကြီးတွေနဲ့ ပစ်ကာ ရုတ်တရက် ဝင်စီးခဲ့တာဖြစ်ပြီး အရေးကြီးတဲ့ ပစ္စည်းအနည်းငယ်ကိုသာယူပြီး ကိုယ်လွတ်ရုန်း ပြေးခဲ့ရတယ်လို့ ဆိုပါတယ်။

“စစ်ကြောင်းက လာမှန်းကို မသိရတာ။ စခန်းနားကို ညကပ်တာ။ ကင်းပုန်းယူပြီး လက်နက်ကြီးနဲ့ ပထမတချက်ထုတော့ ရဲဘော်တွေက အသံမိုင်း Error တက်ပြီး ကွဲတယ်ထင်တာ။ နောက်တချက်ကျ စခန်းဘေးကိုကျတာ။ အဲ့ချိန်မှ ကိုယ့်အနီးနားရှိတဲ့ပစ္စည်းလေးတွေ ဆွဲပြီးပြေးရတာ။ လုံးဝ စခန်းကိုကောင်တာထောက်ပြီးပစ်တာ။ ရွာတွေကိုလည်း မဝင်ဘူး။ စခန်းကိုတိုက်ရိုက်လာတာ။” လို့ ရဲဘော်တဦးက ပြောပါတယ်။

ယာယီစခန်းငယ် စီးနင်းခံရလို့ ဖုန်းတချို့နဲ့ ပစ္စည်းအနည်းငယ်ဆုံးရှုံးခဲ့ပေမယ့် ရဲဘော်တွေကတော့ လွတ်မြောက်ခဲ့ပြီး လမ်းပြဒလန်ပါလာတယ်လို့ ကနဦး ယူဆထားကြကာ အသေးစိတ်ကတော့ စုံစမ်းဆဲဖြစ်တယ်လို့ သိရပါတယ်။

အဆိုပါစစ်ကြောင်းဟာ ပခုက္ကူက BPI စစ်တပ်မြင်းမွေးမြူရေးစခန်း တိုက်ခိုက်ခံရပြီးနောက် ရွာစဉ်ပတ်စစ်ကြောင်းထိုးနေတဲ့အဖွဲ့ဖြစ်ပြီး ပခုက္ကူကနေ ဆိပ်ဖြူဘက်ကိုကူးကာ စခန်းကိုဝင်စီးခဲ့တာဖြစ်တယ်လို့ ပြောပါတယ်။

အခုလက်ရှိ စခန်းနားက ရွာတွေမှာပဲ ရှိနေသေးတဲ့အတွက် စခန်းကို ပြန်မကပ်နိုင်သေးသလို၊ ပျက်စီးဆုံးရှုံးမှု အတိကျကိုလည်း မသိရသေးဘူးလို့ ဆိုပါတယ်။

ဖေဖော်ဝါရီ ၁၂ ရက် ၁၀ နာရီဝန်းကျင်ကလည်း ထမ္မကောက်ရွာ အ.ထ.က စာသင်ကျောင်းနားမှာ တပ်စွဲနေတဲ့ စစ်ကောင်စီကင်းပုန်းတွေနဲ့ ဘန်ကာတွေနားကို ဗုံးသီး ၈ လုံးကြဲချခဲ့ပြီး စစ်ကောင်စီဘက်က သေဆုံးဒဏ်ရာရတွေများခဲ့တယ်လို့ မျက်မြင်တွေတဲ့ ပြည်သူတွေရဲ့ ပြောစကားအရ သိရပါတယ်။

ပဲခူး၊ ဖေဖော်ဝါရီ ၁၀၊ ၂၀၂၃။

ပဲခူးတိုင်းအနောက်ပိုင်း၊ သာသာဝတီခရိုင်၊ ကြို့ပင်ကောက်မြို့နယ်၊ သင်္ခရိုင်ရွာမှာ နေထိုင်တဲ့ ပျူခေါင်းဆောင်ဖြစ်သူနဲ့သမက်ဖြစ်သူတို့ကို သွားရောက်ပစ်ခတ်ခဲ့ပေမဲ့လည်း ထွက်ပြေးလွတ်မြောက်သွားတယ်လို့ PDF တပ်ဖွဲ့ထံက သိရပါတယ်။

ဖေဖော်ဝါရီ ၉ ရက် မနေ့က ည ၈ နာရီခွဲချိန်မှာ GBK PDF ပူးပေါင်းတပ်ဖွဲ့က အဖွဲ့ခွဲပြီး သွားရောက်ပစ်ခတ်ချိန်မှာ ခွေးဟောင်သံကြောင့် ပျုခေါင်းဆောင် ဦးဝင်းထွန်း၊ သားမက်ဖြစ်သူ မျိုးမင်းထွန်းနဲ့ အပေါင်းအပါတချို့ဟာ ထွက်ပြေးလွတ်‌မြောက်သွားတယ်လို့ Black dragon (GBK PDF) တပ်ဖွဲ့ဝင်တဦးက မြေလတ်အသံကို ပြောပါတယ်။

“အဓိကဝင်စီးတာက ဝင်းထွန်းနဲ့ မျိုးမင်းထွန်း အိမ်ကိုပါ။ အဖွဲ့ခွဲပြီး ဝင်ကြတာပါ။ သူတို့က အဖွဲ့ဖွဲ့ပြီး ဆည်ဘောင်နဲ့ဗျူဟာလမ်းတွေ ကင်းပတ်တယ်။ အင်အားက ၂၀ ကျော်တယ်။ ကျနော်တို့အဖွဲ့ ဝင်သွားတော့ ခွေးဟောင်သံကြားပြီး ထွက်ပြေးပါတယ်။ ကျနော်တို့ လိုက်ပစ်ခတ်ပေမယ့် ထိခိုက်သတင်း သေချာမရသေးပါဘူး” လို့ ဆိုပါတယ်။

သူတို့ထွက်ပြေးသွားချိန် အိမ်မှာကျန်ခဲ့တဲ့ အမျိုးသမီးတွေနဲ့ ကလေးငယ်တွေကို Black dragon ပူးပေါင်းတပ်ဖွဲ့က ရိုက်နက်မှု တစုံတရာ မလုပ်ပဲ ပျူခေါင်းဆောင်း ဦးဝင်းထွန်းကို စစ်ကောင်စီ သတင်းပေးခြင်း မလုပ်ဖို့ ၊ ရွာသားများကို ဖိနှိပ်ခြင်းမလုပ်ဖို့ နဲ့ ပျူစောထီးအဖွဲ့က နုတ်ထွက်ပေးဖို့ကို မှာကြားခဲ့တယ်လို့ အထက်ပါ တပ်ဖွဲ့ဝင်က ဆက်ပြောပါတယ်။

“သူတို့ကြောင့် ဖမ်းခံရတာ နှိပ်စက်ခံရတဲ့ ပြည်သူတွေ ရှိပါတယ်။ အိမ်မှာကျန်ခဲ့တဲ့ သူတို့ရဲ့မိသားစုတွေကို ထိခိုက်စေတာမျိုး မလုပ်ခဲ့ပါဖူး။ တခုပဲ မှာခဲ့တယ်။ သူတို့ရဲ့ မိမိခင်ပွန်းဖြစ်စေ သားဖြစ်စေ ပျူအဖွဲ့မှာ ရှိနေရင် နုတ်ထွက်ဖို့နဲ့ ပျူစာရင်းနဲ့တိုင်ထားတယ်။ ပြည်သူကို ဒုက္ခပေးတာမျိုး မလုပ်ဘဲ အေးဆေးနေဖို့ သတိပေးတာမျိုး လုပ်ခဲ့တယ်” လို့ ဆိုပါတယ်။

ပျုစောထီးခေါင်းဆောင် ဝင်းထွန်းနဲ့အဖွဲ့ဟာ နေ့စဥ်သေနတ်ဖောက်ပြီး ရွာမှာ သူတို့နဲ့မသင့်မြတ်တဲ့ ပြည်သူတွေကို ခြိမ်းခြောက်သလို စစ်ကောင်စီကို သတင်းပေးပြီး ထင်ရာစိုင်းနေတယ်လို့ ပြည်သူတွေက တိုင်ကြားလာလို့ Black dragon (GBK PDF) အဖွဲ့က စီးနင်း တိုက်ခိုက်ခဲ့တာလို့ ဆိုပါတယ်။

သွားရောက်ပစ်ခတ်မှုကို Black dragon(GBK PDF) ပြည်သူ့ကာကွယ်ရေးတပ်ဖွဲ့ နဲ့ ရိုးမနဂါးတို့က ပူးပေါင်းတိုက်ခိုက်ခဲ့ကြတယ်လို့ ထုတ်ပြန်ထားပါတယ်။

Black Dragon (GBK PDF) တပ်ဖွဲ့ဟာ အခု (page အသစ် အနေနဲ့) ပျူစောထီး တပ်ဖွဲ့တွေကို သွားရောက်ပစ်ခတ်တာဟာ ပထမအကြိမ် ဖြစ်တယ်လို့လည်း တပ်ဖွဲ့ဝင်တဦးက ပြောပါတယ်။

မကွေး၊ ဖေဖော်ဝါရီ ၁၀၊ ၂၀၂၃။

မကွေးတိုင်း၊ ချောက်မြို့နယ်၊ အမှတ် – ၃ နယ်မြေအတွင်းရှိ ရပ်ကွက်ရွေးကောက်ပွဲ ကော်မရှင်ရုံးကို ဖေဖော်ဝါရီလ ၈ ရက်ညက ရွေးကောက်ပွဲ မကျင်းပနိုင်ဖို့ ရည်ရွယ်ပြီး အသိပေး ဖောက်ခွဲဖျက်ဆီးမှု ပြုလုပ်ခဲ့တယ်လို့ သိရပါတယ်။ ‌‌

ည ၉ နာရီ ၁၅ မိနစ်မှာ မိုင်း ၃ လုံးသုံး ဖောက်ခွဲခဲ့တာဖြစ်ပြီး၊ လူထိခိုက်မှုတွေမရှိခဲ့ပဲ အဆောက်အဦးကတော့ အနည်းငယ် ထိခိုက်သွားတယ်လို့ ချောက်မြို့နယ် ပြောက်ကျားတပ်ဖွဲ့ (C.G.F) ပြန်ကြားရေးတာဝန်ခံက ပြောပါတယ်။

“စစ်ကောင်စီက ထပ်ပြီးကျင်းပဖို့ မလိုတဲ့ ရွေးကောက်ပွဲကို ပြည်သူလူထုတရပ်လုံး တခဲနက် ဆန့်ကျင်ကန့်ကွက်နေတဲ့ ကြားက မရမက ဇွတ်အတင်း ရွေးကောက်ပွဲကျင်းပဖို့ ပြုလုပ်နေတာကြောင့် သတိပေးတဲ့အနေနဲ့ ဖောက်ခွဲဖျက်ဆီးတာဖြစ်ပြီး နောက်နောင်မှာလည်း ရွေးကောက်ပွဲကျင်းပဖို့ ပြုလုပ်အားထုတ်တဲ့၊ ပူးပေါင်းဆောင်ရွက်နေတဲ့ ဘယ်သူ့ကိုမဆို သုတ်သင်ရှင်းလင်းသွားမယ်လို့ သတိပေးလိုက်တာ” လို့ ပြောပါတယ်။

တိုက်ပွဲဝင်တွေရဲ့ လုံခြုံရေးကြောင့် ဖေဖော်ဝါရီလ ၉ ရက်မနေ့ကမှ ဖြစ်စဉ်ကို ထုတ်ပြန်နိုင်ခဲ့သလို ဒီတိုက်ခိုက်မှုကို Chauk Guerrilla Force ချောက်မြို့နယ်ပြောက်ကျား တပ်ဖွဲ့ (C.G.F) နဲ့ ချောက်ပကဖ မဟာမိတ်ပူးပေါင်းတပ်ဖွဲ့တို့နဲ့အတူ Hanter Dragon Group ၊ KF. People Defience Force (တပ်ခွဲ – ၂)၊ Nway Oo FM Online ထောက်ပို့တို့က ပူးပေါင်းဆောင်ရွက်ခဲ့တာလို့လည်း သိရပါတယ်။

စလင်း၊ ဖေဖော်ဝါရီ ၉၊ ၂၀၂၃။

မကွေးတိုင်း၊ စလင်းမြို့နယ်၊ ကံပြားရဲစခန်းဝင်စီးချိန် ထိတွေ့ပစ်ခတ်မှုဖြစ်ပြီး ရဲစခန်းဘားတိုက် တချို့ကိုလည်း မီးရှို့ဖျက်ဆီးခဲ့တယ်လို့ pdf တပ်ဖွဲ့ထံက သိရပါတယ်။

မနေ့က ဖေဖော်ဝါရီ ၈ ရက်နေ့ ည ၉ နာရီခွဲလောက်မှာ People’s Defence Force-Salin ပူးပေါင်းတပ်ဖွဲ့ဟာ စလင်းမြို့နယ်ထဲက ကံပြားရဲစခန်းကို သိမ်းပိုက်ဖို့အတွက် သွားရောက်ပစ်ခတ်ခဲ့ပေမဲ့ သတင်းပေါက်ကြားသွားတဲ့အတွက် စခန်းသိမ်းနိုင်ခြင်း မရှိတော့ပဲ ဘားတိုက်တချို့နဲ့ စခန်းတချို့ကိုသာ မီးရှို့နိုင်ခဲ့တယ်လို့ မင်းဘူးခရိုင်တပ်ရင်း ၁ People’s Defence Force-Salin တာဝန်ရှိသူတဦးက မြေလတ်အသံကို ပြောပါတယ်။

“ကျတော်တို့က အဲဒီကို လာတိုက်မယ်ဆိုတာ သတင်းပေါက်နေ‌တော့ သူတို့(စစ်ကောင်စီ) ဘက်က အင်အားထပ်ဖြည့်ထားတယ်။ ကျတော်တို့လည်း လူအင်အားနဲနဲနဲ့ အလစ်ဝင်တိုက်တာ ရဲစခန်းထဲကိုတော့ ဝင်လို့မရဘူး။ သူတို့ စနိုက်ဘာတွေနဲ့ ထောက်ထားတော့ ဒါပေမဲ့ ဘားတိုက်တွေ မီးလောင်သွားတယ်” လို့ ဆိုပါတယ်။

စလင်းကံပြား ရဲစခန်းဝင်စီးချိန် ပစ်ခတ်မှုမှာ ၁ နာရီခွဲနီးပါး ကြာမြင့်ခဲ့ကြောင်းနဲ့ စစ်ကောင်စီတပ်ဖွဲ့ဝင် အယောက် ၂၀ နီးပါး သေဆုံးသွားတယ်လို့ အထက်ပါတာဝန်ခံက ဆက်ပြောပါတယ်။

“ကျတော်တို့ဘက်ကတော့ ထိခိုက်မှုမရှိပါဘူး။ သူတို့(စစ်ကောင်စီ)ဘက်က တော်တော်များများ ထိခိုက်ဒဏ်ရာရတာတွေများတာ့ စလင်းဆေးရုံက လက်မလည်ဘူးလို့ ကြားတယ်” လို့ ဆိုပါတယ်။

အခုလို ထိခိုက်သေဆုံးမှုနဲ့ ပတ်သက်ပြီး မြေလတ်အသံအနေနဲ့ သီးခြားအတည်ပြုနိုင်ခြင်း မရှိသေးပေ။

ပစ်ခတ်မှုကို မင်းဘူးခရိုင် တပ်ရင်း ၁ People’s Defence Force-Salin ၊ မကွေးတပ်ရင်း (၁) ၊ ပွင့်ဖြူ (ပကဖ) နဲ့ မင်းဘူး (ပကဖ) တို့က ပူးပေါင်းတိုက်ခိုက်ခဲ့တယ်လို့ ဆိုပါတယ်။

အလားတူ အဲဒီနေ့ည ၉ နာရီလောက်မှာပဲ စလင်းတပ်က ခလရ (၂၅၃)၊ (၂၅၄)၊ (၂၅၅) ကို ရှော့တိုက်ဒုံးနဲ့ သွားရောက်ပစ်ခတ်ခဲ့လို့ ထိခိုက်သူများစွာရှိတယ်လို့လည်း ဆိုပါတယ်။

အခုလို ပစ်ခတ်မှုတွေ ဖြစ်ပွားနေတဲ့အတွက် စလင်း ၊ စေတုတ္တရာလမ်းပိုင်းကို ခရီးသွားပြည်သူအနေနဲ့ သွားလာခြင်း မပြုဖို့ကိုလည်း ပြောဆိုထားပါသေးတယ်။

မတ္တရာ၊ ဖေဖော်ဝါရီ ၇၊ ၂၀၂၃။

မန္တလေးတိုင်း၊ မတ္တရာမြို့နယ်၊ ဧရာဝတီမြစ်ကြောင်းတလျှောက် ဧရာဝတီလင်းပိုင်နဲ့ ငါးသားပေါက်တွေကို ရှော့တိုက် ဖမ်းဆီးနေတဲ့ ငါးဖမ်းသမားတွေကို ဖေဖော်ဝါရီ ၄ ရက်မှာ ပြည်သူ့ကာကွယ်ရေးတပ်ဖွဲ့ ကင်းလှည့်စစ်ဆေးနေတဲ့အချိန် တွေ့ရှိခဲ့တာကြောင့် ဖမ်းဆီးအရေးယူခဲ့ကာ အသိပညာပေးပြီး ဖေဖော်ဝါရီလ ၇ ရက်ဒီနေ့မှာ ပြန်လွှတ်ခဲ့တယ်လို့ သိရပါတယ်။

“ငါးဖမ်းသမားတွေဆီကနေ ငါးဖမ်းစက်လှေသုံးစီး၊ ရှော့စက်သုံးလုံးနဲ့ ဆက်စပ်ပစ္စည်းတွေဖြစ်တဲ့ ဘက်ထရီအိုးကြီး ၃ လုံး၊ ဘက်ထရီအလတ် ၃ လုံးနဲ့ လူ ၆ ယောက်ကို ထိန်းသိမ်းခဲ့ပြီး ငါးဖမ်းပစ္စည်းနဲ့ ဆက်စပ်ပစ္စည်းတွေကို သိမ်းယူခဲ့သလို ငါးဖမ်းသမား ၆ ယောက်ကိုတော့ စုံစမ်းစစ်ဆေးပြီး နောက်ဆုံးအကြိမ်အဖြစ် ပြန်လွှတ်ပေးခဲ့တယ်” လို့ Peacock warriors force အဖွဲ့ တာဝန်ရှိသူက ပြောပါတယ်။

ဒေသခံ ပြည်သူ့ကာကွယ်ရေးတပ်ဖွဲ့အနေနဲ့ ဧရာဝတီမြစ်ကြောင်းတလျှောက် ဧရာဝတီလင်းပိုင်နဲ့ ရေချိုငါးမျိုးစိတ် အန္တရာယ်ကင်းလွတ်‌စေဖို့ ရှော့တိုက်ငါးဖမ်းသမားတွေကို အသိပညာပေးတာ၊ အရေးယူတာနဲ့ ပြစ်ဒဏ်ပေးတာဆိုပြီး အပိုင်း ၃ ပိုင်းခွဲပြီး လုပ်ဆောင်နေတယ်လို့လည်း ဆိုပါတယ်။

ရှော့တိုက်ငါးဖမ်းမှု အန္တရာယ်ကြောင့် ဧရာဝတီလင်းပိုင် မျိုးပွားနှုန်းကျဆင်းတာ၊ ငါးသားပေါက်မှုနှုန်း နည်းတာတွေအပြင် ရေချိုငါးရှားပါးမှု အန္တရာယ်တွေနဲ့ ကြုံတွေ့နေရတာတွေကြောင့် ခုလိုအရေးယူတာတွေ တောက်လျှောက်လုပ်ဆောင်နေတာလို့ သူကဆက်ပြောပါတယ်။

အာဏာသိမ်းပြီး ၂ နှစ်ကျော်ကာလအတွင်း ဧရာဝတီမြစ်ကြောင်းတလျှောက် ရှော့တိုက်ငါးဖမ်းတဲ့ဖြစ်စဉ် ၁၀ ကြိမ် ထက်မနည်း ဖြစ်ပွားခဲ့ပြီး ပြည်သူ့ကာကွယ်ရေးတပ်ဖွဲ့ဝင်တွေအနေနဲ့ ရှော့တိုက်ငါးဖမ်းလှေ အစီးရေ ၂၀ ကျော် ဖမ်းဆီးရမိခဲ့တယ်လို့ ဆိုပါတယ်။