PDF

မြေလတ်အသံ၊ ဒီဇင်ဘာ ၉၊ ၂၀၂၅။

မကွေးတိုင်း၊ မင်းဘူး(စကု)မြို့နယ်မှာ စစ်ကော်မရှင်တပ်က စစ်ကြောင်းထိုးပြီး ဖမ်းဆီးသတ်ဖြတ်တာတွေလုပ်ဆောင်နေတဲ့စစ်ကြောင်းကို ဒေသတော်လှန်ရေးပူးပေါင်းတပ်ဖွဲ့တွေက တိုက်ခိုက်ခဲ့တယ်လို့ မင်းဘူးခရိုင်အမှတ် ၆ တပ်ရင်းက ပြောပါတယ်။

ဒီဇင်ဘာ ၃ ရက်မှာ ခံကုန်းကျေးရွာကနေ အင်အား ၁၂၀ ခန့်နဲ့ ရွှေစက်တော်ဘုရားအနီးဝန်းကျင်ကို စစ်ကြောင်းထိုးလာတဲ့ စစ်ကော်မရှင်တပ်သားတွေက ဒီဇင်ဘာ ၄ ရက် နေ့လယ်ပိုင်းမှာ ရွှေကြောင်းရွာကို ဝင်ရောက်လာပြီး အသက် ၄၀ ကျော်အမျိုးသား ၁ ဦးကို သေနတ်နဲ့ပစ်သတ်ခဲ့တယ်လို့ ဆိုပါတယ်။

” သူတို့ကရွှေကြောင်းရွာကိုဝင်တဲ့အချိန်မှာ လယ်ကွင်းမှာရိတ်နေတဲ့အမျိုးသားကိုလှမ်းပစ်တာ။ PDF ဆိုပြီးလှမ်းပစ်တော့ အဲ့အမျိုးသားကို မသေမရှင်ဖြစ်နေတဲ့အချိန်မှာ ရိုက်နှက်ပြီးတော့ သေအောင်သတ်သွားတာ။ အဲ့တာကို အတူတူပုန်းနေတဲ့ ပြည်သူတွေကလည်း မြင်တယ်။ ပြီးတော့ မိသားစုကိုသင်္ဂြိုဟ်ခွင့် မပေးဘဲနဲ့ သူတို့သင်္ဂြိုဟ်သွားတယ်”လို့ မင်းဘူးခရိုင်အမှတ် ၆ တပ်ရင်းတာဝန်ရှိသူက မြေလတ်အသံကို ပြောပါတယ်။

ဒီဇင်ဘာ ၅ ရက် မနက်ပိုင်းမှာတော့ အဲ့ဒီစစ်ကြောင်းဟာ ရွှေကြောင်းရွာကနေ ကူရွာကို ဆက်လက်ဝင်ရောက်လာပြီး အသက် ၅၀ ခန့်အရွယ်ရှိ အမျိုးသား ၁ ဦးကို PDF ဆိုကာ ထပ်မံသတ်ဖြတ်ခဲ့တယ်လို့ သိရပါတယ်။

“ကူရွာက အမျိုးသားကို ပစ်သတ်တဲ့အချိန်မှာ သူ့သားလေးက ဘေးနားမှာကျန်ခဲ့တယ်ဗျ။ သူ့ရဲ့ညီနဲ့အမျိုးတွေကလည်း ဘေးနားမှာရှိတယ်ဗျ။ အဲ့လိုအခြေအနေမှာ လှမ်းပစ်လိုက်တာ ထုတ်ချင်းဖောက်သွားတယ်ဗျ” လို့ အထက်ပါတာဝန်ရှိသူက ပြောပါတယ်။

ကူရွာကနေ ထွက်ခွာလာတဲ့ အထက်ပါစစ်ကြောင်းကို အဲ့ဒီနေ့ နေ့လယ်ပိုင်းမှာပဲ ကုတင်ကုန်းရွာအနီးမှာ ​မိနစ် ၃၀ ကြာ ကြားဖြတ်တိုက်ခိုက်ခဲ့ရာ စစ်ကော်မရှင်တပ်ဖွဲ့ဝင် ၄ ဦးသေဆုံးပြီး အများအပြား ဒဏ်ရာရရှိခဲ့တယ်လို့ သူကဆက်ပြောပါတယ်။

တိုက်ပွဲဖြစ်ပွားခဲ့ပြီးနောက် စစ်ကော်မရှင်တပ်သားတွေက ကုတင်ကုန်းရွာထဲကို လက်နက်ကြီး၊ လက်နက်ငယ်တွေနဲ့ ပစ်ခတ်ခဲ့တာကြောင့်နေအိမ်အချို့ပျက်စီးခဲ့သလို ကျေးရွာတွင်းရှိ အသက် ၂၀ ကျော် အမျိုးသား ၂ ဦးကို လက်ပံတောရွာရဲစခန်းကို ဖမ်းဆီးခေါ်ဆောင်သွားခဲ့တယ်လို့ သိရပါတယ်။

ဒီဇင်ဘာ ၆ ရက် နေ့လယ်ပိုင်းမှာ လက်ပံတောရဲစခန်းကို မင်းဘူးခရိုင်၊ အမှတ် ၆ တပ်ရင်း၊ မင်းဘူးခရိုင်၊ အမှတ် ၄ တပ်ရင်း၊ မင်းဘူးမြို့နယ်ပြည်သူ့ကာကွယ်ရေးအဖွဲ့(ပကဖ)တို့က ဒရုန်းဗုံးသီး ၆ လုံးနဲ့ တိုက်ခိုက်ခဲ့ရာ စစ်ကော်မရှင်တပ်သား ၄ ဦး ထိခိုက်ဒဏ်ရာ ရရှိခဲ့တယ်လို့ သိရပါတယ်။

စာတည်း – ဟိန်းစံ

မြေလတ်အသံ၊ ဒီဇင်ဘာ ၉၊ ၂၀၂၅။

မကွေးတိုင်း၊ ကံမ၊ သရက်နဲ့ မင်းဘူး(စကု)မြို့နယ်တွေမှာ စစ်ကြောင်းထိုးလာတဲ့ စစ်ကော်မရှင်တပ်တွေနဲ့ ဒေသကာကွယ်ရေးတပ်တွေအကြား တိုက်ပွဲဖြစ်ပွားခဲ့ပြီး စစ်ကော်မရှင်တပ်ဖက်မှ သေဆုံးမှုရှိခဲ့တယ်လို့ PDF တာဝန်ရှိသူတွေထံက သိရပါတယ်။

ဒီဇင်ဘာ ၈ ရက်မနက် ၉ နာရီမှာ ကံမမြို့နယ်၊ ရေနံ့သာရဲကင်းစခန်းကနေ အင်အား ၄၀ ခန့်နဲ့ထွက်ခွာလာတဲ့ စစ်ကြောင်းကို နတ်မီးတောက်ကျေးရွာအနီးမှာ မိုင်းခွဲတိုက်ခိုက်ပြီးတဲ့နောက် ထိတွေ့တိုက်ပွဲတွေဖြစ်ခဲ့တာလို့ သရက်ခရိုင်အမှတ် ၄ တပ်ရင်းမှ သတင်းနဲ့ပြန်ကြားရေးတာဝန်ခံ ကိုမြတ်က ပြောပါတယ်။

” အသင့်ထောင်ထားတဲ့မိုင်းက ၃ လုံးပါ ကွင်းမိုင်း။ ၆ ဦးသေဆုံးတာကို သူတို့စစ်ကြောင်းက ရှေ့ပွိုင့် ၆ ယောက်က မိုင်းကွင်းထဲဝင်လာတဲ့အချိန်မှာ မိုင်းဆွဲလိုက်တာ။ သူတို့အဲ့နေရာမှာတင် တုံးလုံးလဲကျသွားပြီးတော့ ကျနော်တို့ရဲဘော်တွေက နောက်မှာပါလာတဲ့ နောက်ချန်စစ်ကြောင်းကို ပစ်ခတ်တိုက်ခိုက်တာပါ” လို့ ဆိုပါတယ်။

တိုက်ခိုက်ခံရပြီးတဲ့နောက် ဆက်ထွက်လာတဲ့အဲ့ဒီစစ်ကြောင်းဟာ ကံမမြို့နယ်ကတဆင့် မွန်းလွဲ ၁၂ နာရီမှာ သရက်မြို့နယ်၊ စက်တောင်ကျေးရွာ ရောက်ရှိလာချိန် အနီးကပ် ပစ်ခတ်တိုက်ခိုက်ခဲ့တယ်လို့ သိရပါတယ်။

” ကျနော်တို့ရဲဘော်တွေက ကတ္တရာလမ်းရဲ့ ဘေး၊ မြောင်တွေကနေ ရန်သူကိုအနီးကပ် တိုက်ခိုက်တာပါ။ မီတာ ၁၅၊ ၂၀လောက် အကွာကနေ။ အဲ့ဒီမှာအနီးကပ်တိုက်ခိုက်မှုကြောင့် သူတို့ထိခိုက်၊ လဲကျ၊ သေဆုံးတာကို မြင်ရသလို ဒဏ်ရာရတွေကို သရက်ဆေးရုံကိုရောက်ရှိလာတာရှိပါတယ်။ အဲ့ကနေမှ ၁၀ ဦးသေဆုံးတာကိုအတည်ပြုခဲ့တာပါ”လို့ အထက်ပါတာဝန်ခံက ပြောပါတယ်။

၂ ကြိမ်တိုက်ခိုက်မှုအတွင်း စစ်ကော်မရှင်တပ်သား ၁၆ ဦးခန့် သေဆုံးမှုရှိခဲ့တယ်လို့ ပြောဆိုပေမယ့် မြေလတ်အသံက သီးခြားအတည်မပြုနိုင်ပါဘူး။

လက်ရှိမှာ တိုက်ခိုက်ခံရတဲ့ အထက်ပါစစ်ကြောင်းဟာ သရက်မြို့ပေါ်ကနေ ထွက်ခွာလာတဲ့ အင်အား ၃၀ ခန့်ပါစစ်ကြောင်းနဲ့ စက်တောင်ကျေးရွာမှာ ပူးပေါင်းပြီးကျေးရွာအတွင်း အထိုင်ချတပ်စွဲကာ တိုက်ပွဲဖြစ်ပွားခဲ့တဲ့နေရာတွေကို လက်နက်ကြီးတွေနဲ့ပစ်ခတ်ခဲ့တယ်လို့ ကိုမြတ်က ဆိုပါတယ်။

ကံမမြို့နဲ့သရက်မြို့နယ်အတွင်းမှာတိုက်ပွဲတွေ ထပ်မံဖြစ်ပွားလာနိုင်တာကြောင့် သရက်-ကံမလမ်းပိုင်းကို အသုံးပြုသွားလာကြမယ့် ခရီးသွားပြည်သူတွေအနေနဲ့ သတိပြုသွားလာကြဖို့ကိုလည်း သရက်ခရိုင်အမှတ် ၄ တပ်ရင်းက အသိပေးထားပါတယ်။

ငါန်းဇွန်၊ နိုဝင်ဘာ ၅၊ ၂၀၂၅။

မန္တလေးတိုင်း၊ ငါန်းဇွန်မြို့နယ်၊ မြို့သာမြို့ စျေးကပြန်လာတဲ့စစ်ကော်မရှင်တပ်ဖွဲ့ဝင် ၃ ဦးကို ပစ်ခတ်တိုက်ခိုက်ခဲ့ရာ ၂ ဦးသေဆုံးခဲ့တယ်လို့ Special Task Force Nagazun ဆီက သိရပါတယ်။

အဆိုပါစစ်ကော်မရှင်တပ်ဖွဲ့ဝင်တွေဟာ မြို့သာရဲစခန်းကဖြစ်ပြီး နိုဝင်ဘာ ၄ ရက် မနက် ၁၁ နာရီခွဲဝန်းကျင်မှာ စျေးကနေပြန်ချိန် လမ်းပိုင်းတနေရာမှာ စောင့်ကြိုပစ်ခတ်ခဲ့တာလို့ ဆိုပါတယ်။

“မြို့သာရဲစခန်းကနေ အရက်ဝယ်ထွက်လာတဲ့ စစ်ကော်မရှင်တပ်ဖွဲ့ဝင် ၃ ဦးကို စောင့်ကြို တိုက်ခိုက်ခဲ့တာ၊ (စစ်ကော်မရှင်တပ်တွေနဲ့) မီတာ ၂၀ အကွာအဝေးလောက်ကနေ ထွက်လာတဲ့ ၃ ကောင်ကို ပစ်ခတ်ခဲ့တာ၊ ၂ ကောင်ကတော့ နေရာမှာတင် သေဆုံးသွားတယ်၊ ၁ ကောင်ကတော့ ဒဏ်ရာတွေနဲ့ ပြန်ဆုတ်သွားတာ”လို့ Special Task Force Nagazun တာဝန်ရှိသူတဦးက ပြောပါတယ်။

ပစ်ခတ်ပြီးနောက် မြို့သာရဲစခန်းထဲကနေ ၆၀ မမနဲ့ပြန်လည်ပစ်ခတ်ခဲ့ပြီး ဒရုန်းတွေနဲ့လည်း ဗုံးသီးချ ပြန်လည်တိုက်ခိုက်ခဲ့တာကြောင့် လက်နက်ခဲယမ်းတွေမသိမ်းဆည်းနိုင်ခဲ့ဘူးလို့ ဆိုပါတယ်။

“စခန်းထဲမှာ ရောနေတော့ ရဲလား၊ စစ်သားလား၊ အတိအကျမသိရဘူး။ ၃ ဦးလုံး‌ သေနက်တွေပါတယ်၊ လက်နက်ခဲယမ်းတော့ မရခဲ့ဘူး၊ ‌သူတို့က ဘေးပတ်ချာလည်ကနေ ပြန်ပစ်တာ၊ ကျနော်တို့ တော်လှန်ရေးတပ်ဖွဲ့ဝင်တွေဘက်ကတော့ အထိအခိုက်မရှိပြန်လည်ဆုတ်ခွာနိုင်ခဲ့တယ်”လို့ သူက ဆက်ပြောပါတယ်။

ပြီးခဲ့တဲ့ အောက်တိုဘာ ၁၀ ရက်ကလည်း မြို့သာရဲစခန်းကနေ မြို့သာဈေးထောင့်မှာ လမ်းသွားပြည်သူတွေကို ဆက်ကြေးကောက်နေတဲ့ စစ်ကော်မရှင် တပ်ဖွဲ့ဝင်တွေကို Special Task Force Nagazun က ပစ်ခတ်ခဲ့ရာ စစ်သား ၃ ဦးသေဆုံးပြီး ၂ ဦးဒဏ်ရာရခဲ့ပါသေးတယ်။

စာတည်း – လင်း

◼ ဒုဗိုလ်မှူးကြီးအပါ ၁၅ ဦးသေဆုံးပြီး လက်နက်ခဲယမ်းတွေနဲ့ ၂ ဦးအရှင်ဖမ်းမိ

ရေတာရှည်၊ အောက်တိုဘာ ၂၂၊ ၂၀၂၅။

ပဲခူးတိုင်း၊ ရေတာရှည်မြို့နယ်၊ ရွာသစ်ကျေးရွာရှိ အင်အား ၆၀ ကျော်နဲ့ ၁ နှစ်ကြာတပ်စွဲထားတဲ့ စစ်ကော်မရှင်စခန်းကို နာရီပိုင်းအတွင်းသိမ်းပိုက်နိုင်ခဲ့တယ်လို့ နေပြည်တော်တိုင်းစစ်ဌာန တာဝန်ရှိသူတွေဆီက သိရပါတယ်။

အောက်တိုဘာ ၂၀ ရက် နေ့လယ် ၁ နာရီ ၅၀ မိနစ်ခန့်မှာ ဘန်ကာ ၄ ခု၊ ပင်မစခန်း ၁ ခု ရှိနေတဲ့ စစ်ကော်မရှင်စခန်းကို ဝင်ရောက်တိုက်ခိုက်ရာ ညနေ ၃ နာရီမထိုးခင်အချိန်မှာ နေရာအားလုံးကို သိမ်းယူနိုင်ခဲ့တယ်လို့ ဆိုပါတယ်။

“တနှစ်ကျော်ကြာပြီး။ ဘန်ကာ၊ ကာကင်းတွေနဲ့အခိုင်အမာတပ်စွဲထားတဲ့နေရာဖြစ်တယ်။ အရင်တခေါက်ကလည်းကြိုးစားခဲ့ဖူးတယ်။ ဒါပေမယ့် အောင်မြင်မှု မရရှိခဲ့ဘူး။ ဝင်တိုက်ခဲ့တဲ့နေရာမှာ တနာရီမတိုင်ခင် တနာရီအတွင်း ကာကင်းတွေ ပင်မသူတို့စခန်းဖြစ်တဲ့ သူတို့ထိုင်တဲ့ဘုန်းကြီးကျောင်းပေါ့။ ဘုန်းကြီးတော့မရှိတော့ဘူး။ ရွာဘုန်းကြီးကျောင်းစခန်းတွေ ကာကင်းစခန်းတွေအကုန်လုံးသိမ်းပိုက်ရရှိခဲ့တယ်”လို့ နေပြည်တော်တိုင်းစစ်ဌာန တိုင်းကွပ်ကဲရေးမှူး ဗိုလ်လက်ျာကပြောပါတယ်။

တိုက်ပွဲအတွင်းမှာ လေကြောင်းရန်ကာကွယ်ရေးတပ်/လကတ-၂၀၂၉ တပ်က ဒုတိယဗိုလ်မှူးကြီး ညီညီနိုင်ကို လက်နက်ချဖို့ပြောပေမယ့် လက်မခံဘဲ ပြန်ပစ်ဖို့ကြိုးစားလာတာကြောင့် အသေပစ်ခတ်ခဲ့ကာ ၎င်းအပါအဝင် စစ်ကော်မရှင်ဘက်က ၁၅ ဦးသေဆုံးပြီး ၂ ဦးအရှင်ဖမ်းမိခဲ့တယ်လို့ ဆိုပါတယ်။

ဒါ့အပြင် စစ်ကော်မရှင်ဘက်က ဂျက်ဖိုက်တာနဲ့ ပေါင် ၅၀၀ ဗုံး ၂ လုံးကြဲခဲ့သလို ပွိုင့် 5 တွေနဲ့ လည်းပစ်ခတ်ပြီး ဆွာရွာမအထိုင်ချ စခန်းကနေလည်း ၁၂၀ မမ လက်နက်ကြီးတွေနဲ့ ပစ်ကူပေးတာတွေ ရှိခဲ့တယ်လို့ သိရပါတယ်။

ဒရုန်းဂျန်ဘာ အထိုင်စက်ကြီး ၁ လုံး၊ MA-11 ၁ လက်၊ MA-3 ၁ လက်၊ G3 ၃ လက်၊ ၆၀ မမ ၁ လက်၊ ပစ္စတို ၁ လက်၊ ၆၀ မမကျည် ၅ လုံး၊ ကျည်ဘောက် ၁၀ ခု၊ ကျည်မျိုးစုံ ၁,၀၀၀ ခန့်နဲ့မီးစက် ၁ လုံးကို တော်လှန်ရေးတပ်တွေက သိမ်းဆည်းခဲ့ပြီး ကျန်စစ်ကော်မရှင်တပ်ဖွဲ့ဝင်တွေက ဆွာရွာမဘက်က ဆုတ်ပြေးသွားတယ်လို့ သိရပါတယ်။

ဒီတိုက်ခိုက်မှုကို နေပြည်တော်တိုင်းစစ်ဌာနလက်အောက်တပ်ဖွဲ့ဝင်တွေက တိုက်ခိုက်ခဲ့တာဖြစ်ပြီး တိုက်ပွဲမှာ တပ်ဖွဲ့ဝင် ၂ ဦး မစိုးရိမ်ရဒဏ်ရာရခဲ့တယ်လို့ ဆိုပါတယ်။

ပြီးခဲ့တဲ့ဇန်နဝါရီ ၂၃ ရက်ကလည်း ရေတာရှည်မြို့နယ်၊ စစ်တောင်းမြစ်အရှေ့ခြမ်း၊ အိုးမြေဒူးကျေးရွာမှာတပ်စွဲထားတဲ့ စစ်ကော်မရှင်အဖွဲ့တိုက်ခိုက်ခံရပြီး ၄ ဦးသေဆုံးခဲ့သေးတယ်လို့ သိရပါတယ်။

စာတည်း – လင်း