စလင်း၊ ဧပြီ ၁၉၊ ၂၀၂၅။

မကွေးတိုင်း၊ မင်းဘူးခရိုင်၊ စလင်းမြို့နယ်ထဲမှာ စစ်ကောင်စီတပ်ဖွဲ့ဝင် ၁ ဦးရဲ့အလောင်းကို ဧပြီ ၁၉ ရက်ဒီမနက်ပိုင်းမှာတွေ့ရှိခဲ့ပြီး မီးသင်္ဂြိုဟ်ပေးခဲ့တယ်လို့ ဒေါင်းညီနောင် မြို့ပြပြောက်ကျားတပ်ဖွဲ့ ဆီက သိရပါတယ်။

အဆိုပါစစ်ကောင်စီတပ်ဖွဲ့ဝင်အလောင်းကို စလင်းမြို့နယ်၊ လင်းဇင်းတိုက်နယ်နဲ့ သစ်ခေါက်တောင်ရွာ အကြားမှာတွေ့ရှိခဲ့ပြီး အဲ့ဒီနေရာမှာတင်မီးသင်္ဂြိုဟ်ပေးခဲ့တာလို့ ဆိုပါတယ်။

“ကျနော်တို့က လင်းဇင်းတိုက်နယ်နဲ့ သစ်ခေါက်တောင်ရွာ ကြားထဲကတောထဲမှာ မိုင်းခင်းထားတာ၊ အဲ့ဒီမိုင်းကွင်းအတွင်းမှာ တွေ့ခဲ့ရတာ၊ မိုင်းကွဲတဲ့နေရာက ဖုန်း ၁ လုံး ကျနော်တို့တွေ့ရှိခဲ့တယ်၊”လို့ ဒေါင်းညီနောင်မြို့ပြပြောက်ကျားတပ်ဖွဲ့ ခေါင်းဆောင် ဗိုလ်သတ္တိက ပြောပါတယ်။

အလောင်းနဲ့အတူတွေ့ရှိတဲ့ ဖုန်းကိုစစ်ဆေးကြည့်ပြီး အဆိုပါစစ်ကောင်စီတပ်သားဟာ ပခုက္ကူ အခြေစိုက် တပ်မ ၁၀၁ လက်အောက်ခံ ခလရ ၂၃၅ ကဖြစ်ကြောင်းအတည်ပြုနိုင်ခဲ့တယ်လို့ ဆိုပါတယ်။

အလောင်းတွေကိုတွေ့ရှိချိန်မှာ ခြေထောက်နဲ့ လက် ၁ ဖက်စီပြတ်ထွက်နေပြီး ပြီးခဲ့တဲ့ဧပြီ ၁၄ ရက်လောက်က မိုင်းထိသေဆုံးခဲ့တာဖြစ်နိုင်တယ်လို့ သူက ခန့်မှန်းပါတယ်။

ပြီးခဲ့တဲ့ ဧပြီ ၁၄ ရက်ကလည်း ပခုက္ကူတပ်မ ၁၀၁ လက်အောက်ခံ ခလရ ၂၃၅ တပ် စစ်ကြောင်းက ထွက်ပြေးလာတဲ့ စစ်ကောင်စီတပ်သားတဦးကို ဒေါင်းညီနောင် မြို့ပြပြောက်ကျားတပ်ဖွဲ့က ဖမ်းဆီးမိခဲ့ပါသေးတယ်။

စာတည်း – လင်း

မကွေး၊ ဖေဖော်ဝါရီ ၁၁၊ ၂၀၂၅။

မကွေးတိုင်း၊ ပခုက္ကုမြို့နယ်၊ ကမ္မမြို့ရဲစခန်းအရှေ့မှာ ပခုက္ကူခရိုင်တပ်ရင်း ၁၈ ရဲ့ စစ်ရေးနည်းပြ ၁ ဦး ကိုစစ်ကောင်စီရဲတပ်ဖွဲ့ဝင်တွေကပစ်သတ်ခဲ့တယ်လို့ အဲ့ဒီတပ်ရင်းဆီက သိရပါတယ်။

ဖေဖော်ဝါရီ ၉ ရက် မနက် ၉ နာရီခန့်မှာ ပခုက္ကူခရိုင်တပ်ရင်း ၁၈ က စစ်ရေးနည်းပြ ၁ ဦးဖြစ်တဲ့ အသက် ၂၃ နှစ်အရွယ်ကိုရှောင်လင်ဟာ ဆိုင်ကယ်နဲ့ တပ်ရင်းကနေမြိုင်မြို့နယ်ဘက်ကို စစ်သင်တန်းပေးဖို့သွားချိန် ကမ္မမြို့ရဲစခန်းရှေ့က ရဲစခန်းစစ်ဆေးရေးဂိတ်အရောက်မှာ ပစ်ခတ်ခံခဲ့ရတာလို့ ဆိုပါတယ်။

ရဲစခန်းစစ်ဆေးရေးဂိတ်ကိုအဖြတ်မှာ တာဝန်ကျရဲတွေဘက်က ကိုရှောင်လင်ကို သေနတ်နဲ့ ၅ ချက်လောက်ပစ်ခတ်ခဲ့တာလို့ ဖြစ်စဥ်ကိုသိရှိတဲ့ဒေသခံတွေရဲ့ပြောပြချက်ကို ကိုးကားပြီး ပခုက္ကုခရိုင်တပ်ရင်း ၁၈ တာဝန်ခံက ပြောပါတယ်။

“ဒီကနေသွားတုန်းက အရပ်ဝတ်နဲ့သူနောက်ကျောမှာပါတဲ့ ကျောပိုးလွယ်အိတ်မှာ ပွိုင့်ဖိနပ်ကို တွေ့သွားတဲ့အချိန်မှာ အဲ့လိုဖြစ်သွားတာ။ ပွိုင့်ဖိနပ်ကို မြင်တော့ PDF ဆိုပြီးတန်းပစ်တဲ့ သဘော။ ပစ်ပြီးမှစစ်တော့ ယူနီဖောင်းတွေလည်းတွေ့ရတာမျိုး”လို့ သူကပြောပါတယ်။

ကိုရှောင်လင်ဟာ နယ်မြေမကျွမ်းသူတဦးဖြစ်တာကြောင့် လမ်းညွှန်ပေးလိုက်ပေမယ့် ကမ္မမြို့ပေါ် အရောက်မှာလမ်းမှားပြီး ရဲစခန်းစစ်ဆေးရေးဂိတ်ဘက်ကို ရောက်သွားတာလို့ ဆိုပါတယ်။

“သူစဖြစ်တဲ့နေ့က ကျနော်တို့ကမ္မထိသွားပြီးတော့ ရဲစခန်းကိုလှမ်းပြီးတော့ သူရဲ့ဘော်ဒီရအောင် လှမ်းတောင်းတယ်။ သူတို့(ရဲစခန်း)ဘက်က မပေးနိုင်ဘူး။ မင်းတို့မကျေနပ်ရင်တော့ တိုက်ချင်တိုက်လို့ ရတယ်ဆိုပြီး စခန်းထဲကပြန်ပြောတယ်။ ရဲဘော်အလောင်းကိုလည်း သူတို့ကမြေမြှုပ်လိုက်ပြီလို့ သိရတယ်”လို့ ပခုက္ကုခရိုင်တပ်ရင်း ၁၈ တာဝန်ခံကပြောပါတယ်။

အလောင်းကိုပြန်မပေးတာကြောင့် အလောင်းသွားတောင်းတဲ့ ဖေဖော်ဝါရီ ၉ ရက်မှာပဲ ရဲစခန်းကို ဒရုန်းနဲ့ဗုံးချတိုက်ခိုက်ခဲ့ပြီး ရဲတွေဘက်ကထိခိုက်မှုအခြေအနေတွေကိုတော့ မသိရသေးဘူးလို့ သူကဆက်ပြောပါတယ်။

ကိုရှောင်လင်ဆီမှာပါသွားတဲ့ တပ်ရင်းပိုင် ဆိုင်ကယ် ၁ စီး၊ ယူနီဖောင်း ၂ စုံ၊ အရပ်ဝတ်နဲ့ ပွိုင့်ဖိနပ် ၁ ရံတို့ကိုလည်း ရဲစခန်းဘက်က သိမ်းဆည်းသွားတယ်လို့ ဆိုပါတယ်။

ပြီးခဲ့တဲ့နှစ်မတ် ၂၈ ရက်ကလည်း ပခုက္ကူမြို့နယ်၊ ကမ္မမြို့၊ ဆားကျင်းကုန်းပိုင်းမှာ မြို့ပေါ်တက် ဖုန်းဝယ်တဲ့ တော်လှန်ရေးထောက်ပို့တပ်ဖွဲ့ဝင် ၂ ဦး စစ်ကောင်စီတပ်ဖွဲ့ဝင်တွေနဲ့တွေ့ပြီး ပစ်ခတ်ခံရလို့ ၁ ဦးသေဆုံးပြီး ၁ ဦးဒဏ်ရာရတယ်လို့ သိရပါတယ်။

စာတည်း – လင်း

စစ်ကိုင်း၊ ဖေဖော်ဝါရီ ၁၀၊ ၂၀၂၅။

စစ်ကိုင်းတိုင်း၊ ဝက်လက်မြို့နယ်၊ ရှိန်းမကားကျေးရွာအုပ်စု၊ ရွာသစ်ရွာအနီးက ဒေသကာကွယ်ရေးတပ်ဖွဲ့ကင်းစခန်းတိုက်ခိုက်ခံရပြီး တပ်ဖွဲ့ဝင် ၁ ဦးကျဆုံးကာ ၁ ဦးဒဏ်ရာနဲ့လွတ်မြောက်ခဲ့တယ်လို့ ဝက်လက်မြို့နယ်ဒေသကာကွယ်ရေးတပ်ဖွဲ့ဝင်တွေထံက သိရပါတယ်။

ဖေဖော်ဝါရီ ၉ ရက် ညနေ ၃ နာရီခန့်မှာ ရှိန်းမကားကျေးရွာမှာတပ်စွဲထားတဲ့ စစ်ကောင်စီတပ်အင်အား ၃၀ ကျော်ဟာ မီတာ ၁,၀၀၀ ကျော်အကွာရှိ ရွာသစ်ရွာအနီးက ဒေသကာကွယ်ရေးတပ်ဖွဲ့ကင်းစခန်းတခုကို ဝင်ရောက်စီးနင်းတိုက်ခိုက်ခဲ့တာလို့ဆိုပါတယ်။

” ကင်းကို အလစ်အငိုက်ဝင်စီးတာ။ အပြန်အလှန်ပစ်ခတ်မှုဖြစ်တာ။ ကင်းက လူနည်းနေတဲ့အချိန်မှာဝင်စီးခံရတာ။ ဒီဘက်တောင်ကုန်း(ကာကွယ်ရေးအဖွဲ့ဝင်တွေရှိတဲ့ကုန်း)က မြင့်တာဆိုတော့ စကစဘက်က လျှိုဘက်ကနေပတ်ဝင်လာပြီး စီးတာ။ ကျန်ကလေးတွေက ရေချိူးဆင်းနေချိန် ကင်းမှာလူနည်းနေတာ” လို့ မြေပြင်ကာကွယ်ရေးအဖွဲ့ဝင်တဦးက မြေလတ်အသံကို ပြောပါတယ်။

အဆိုပါကင်းစခန်းဟာ ရွှေဘိုခရိုင်တပ်ရင်း ၁၇ ရဲ့ကင်းစခန်းဖြစ်ကြောင်းသိရှိရပြီး စီးနင်းတိုက်ခိုက်ခံရမှုအတွင်း တပ်ဖွဲ့ဝင် ၁ ဦးနေရာမှာကျဆုံး၊ ၁ ဦးဒဏ်ရာနဲ့ ထွက်ပြေးလွတ်မြောက်လာခဲ့ကာ အခြေအနေအသေးစိတ်ကိုသိရှိနိုင်ရေး တပ်ရင်း ၁၇ ထံဖုန်းနဲ့ဆက်သွယ်ခဲ့ပေမယ့် ဆက်သွယ်မရသေးပါဘူး။

ဒါ့အပြင် တိုက်ခိုက်ခံရပြီးနောက် သေဆုံး၊ ဒဏ်ရာရ PDF တပ်ဖွဲ့ဝင်တွေကိုင်ဆောင်တဲ့သေနတ် ၂ လက်နဲ့ ကျည်အချို့ ကို စစ်ကောင်စီတပ်ကသိမ်းယူသွားကာ ရှိန်းမကားကျေးရွာဘက်ကို ပြန်ဆုတ်သွားတယ်လို့ သိရပါတယ်။

တိုက်ပွဲအတွင်း သေဆုံးသွားတဲ့ ဒေသကာကွယ်ရေးအဖွဲ့ဝင်ရဲ့အလောင်းကိုတော့ သက်ဆိုင်ရာတပ်ဖွဲ့ဘက်က ပြန်ကောက်သွားပြီး နာရေးပြုလုပ်လိုက်ပြီလို့ ဆိုပါတယ်။

စစ်ကောင်စီထောက်ခံတယ်လီဂရမ်တွေမှာတော့ ရွာသစ်ရွာအနီးတိုက်ပွဲမှာ PDF အလောင်း ၁ လောင်း၊ ကျည်အိမ် ၁ ခု၊ ၅.၅၆ မမ ကျည် ၃၉ တောင့်၊ အိုင်ကွန် ၁ လုံး၊ ကျည်ကာအင်္ကျီ ၁ ထည် သိမ်းဆည်းရမိထားတယ်လို့ ဖော်ပြရေးသားထားပါတယ်။

စာတည်း – ဟိန်းစံ