ကနီ၊ မတ် ၁၃၊ ၂၀၂၃။

စစ်ကိုင်းတိုင်း၊ ကနီမြို့နယ်ရှိ ပြည်သူ့အခြေပြုကျောင်း ၂ ကျောင်းက ကလေးတွေကို မတ်လ ၁၂ ရက်မနေ့က သံချဆေးတိုက်ကျွေးခဲ့တယ်လို့ သိရပါတယ်။

အသက် ၂ နှစ်ကနေ ၁၂ နှစ်ထိကလေးပေါင်း ၃၅၀ ကို ကနီသပိတ်အင်အားစုဝင်တွေက တိုက်ကျွေးခဲ့တာဖြစ်ပြီး၊ ဆေးတိုက်ဖို့ကျန်နေသေးတဲ့ ကျေးရွာတချို့က ကလေးတွေကိုလည်း ထပ်ပြီးတိုက်သွားမယ်လို့ ကနီသပိတ်အင်အားစုမှာပါဝင်သူတဦးက အခုလိုပြောပါတယ်။

“နောက်ထပ်လည်း စစ်ရှောင်ရွာတွေကို ဆေးတိုက်ဖို့အစီအစဉ်တွေရှိနေပါသေးတယ်။ ဆေးတိုက်ဖို့ကျန်တဲ့ရွာတွေတောင် သိပ်မကျန်တော့ဘူး။ နောက် ၆ လနေရင် ကျနော်တို့သပိတ်အင်အားစုက အခု ဆေးတိုက်ခဲ့တဲ့ရွာကျောင်းမှာရှိတဲ့ကလေးတွေကို ဆေးဆက်ပြီးတိုက်သွားဦးမှာပါ။ ပြည်သူနဲ့အတူ အလှူရှင်၊ စေတနာရှင်တော့ ရှာရအုံးမှာပေါ့”လို့ ဆိုပါတယ်။

အခုလိုတိုက်တာဟာ ကိုးဗစ်ကာလကနေ အာဏာသိမ်းပြီးတဲ့နောက်မှာ ကလေးတွေရဲ့ကျန်းမာရေးစောင့်ရှောက်မှု မရရှိတော့တဲ့အတွက် မိမိတို့ကနီသပိတ်အင်အားစုအနေနဲ့ အခုလို ကျန်းမာရေးစောင့်ရှောက်မှုတွေ ပေးရတာဖြစ်တယ်လို့လည်း သူကဆက်ပြောပါတယ်။

“ကလေးတွေ ကျန်းမာရေးဖွံ့ဖြိုးဖို့အတွက် ဆေးတိုက်ရတာ၊ ပြည်သူ့အခြေပြုကျောင်းတက်ပြီး ဘာစောင့်ရှောက်မှုမှမရဘူးဆိုတာ မဖြစ်စေချင်ဘူး။ ကျနော်တို့တွေ ကူမှရမယ်လေ”လို့ ဆိုပါတယ်။

ပြီးခဲ့တဲ့ ၂၀၂၂ ခုနှစ်၊ ဒီဇင်ဘာလ ၁၀ ရက်ကလည်း ကနီနယ်အတွင်းက ကလေး ၅၀၀၀ ကျော်ကို ကနီသပိတ်အင်အားစုက သံချဆေးတိုက်ခဲ့ပါသေးတယ်။

စာတည်း – လင်း

ကနီ၊ မတ် ၆၊ ၂၀၂၃။

စစ်ကိုင်းတိုင်း၊ ကနီမြို့နယ်က ကျေးရွာတရွာမှာ မတ်လ ၅ ရက် မနေ့ကမနက်ပိုင်းက ဒေသတွင်းတော်လှန်ရေး အင်အားစုဝင်တွေ ဦးဆောင်ပြီး ကလေးသူငယ်အခွင့်အရေးဆိုင်ရာ ဟောပြောပွဲကို ပြုလုပ်ခဲ့ကြပါတယ်။

ပဋိပက္ခတွေကြားမှာ ကလေးသူငယ်တွေအနေနဲ့ စိတ်ဓာတ်ကျမသွားဖို့၊ ဒီလိုအခက်အခဲအကြပ်အတည်းကြားမှာ တော်လှန်ကြရေးနဲ့ ကြားကာလအခြေပြုပညာရေးတွေကို သင်ကြားတဲ့နေရာမှာ စိတ်ဓာတ်မကျဘဲ နိုးကြားပါဝင်ကြဖို့အတွက် ရည်ရွယ်တယ်လို့ နွေဦးတော်လှန်ရေးသပိတ်အင်အားစု (ကနီမြို့နယ်)မှ တာဝန်ရှိသူတဦးက ပြောပါတယ်။

“ဟောပြောပွဲ ကြာချိန်ကတော့ ၆ နာရီလောက် ကြာမြင့်ခဲ့တယ်။ ကလေးသူငယ်တွေ၊ မိဘတွေ စုစုပေါင်း ငါးရာလောက် တက်ခဲ့ကြတယ်။ ဖက်ဒရယ်ဒီမိုကရေစီစနစ်ကို သွားတဲ့အချိန်မှာ ကလေးသူငယ်အခွင့်အရေးက ရသင့်တယ်ဗျ။ စစ်ပွဲကြားနဲ့ ပဋိပက္ခကြားမှာ ကလေးသူငယ်အခွင့်အရေးတွေ မရတာရှိတယ်။ ကလေးတွေအနေနဲ့လည်း ဒီလိုအခြေအနေမှာ ငါတို့ရသင့်တဲ့ အခွင့်အရေးတွေ ရှိပါလားဆိုတာကို သိဖို့ လိုတယ်” လို့ ပြောပါတယ်။

ဒီဟောပြောပွဲမှာ ကလေးသူငယ်အခွင့်အရေး တက်ကြွလှုပ်ရှားသူများ၊ Committee Representative Sagaing Region Hluttaw – CRSH လွှတ်တော်၊ ကနီမြို့နယ် ပြည်သူ့လုံခြုံရေးအဖွဲ့၊ ကနီမြို့နယ် နွေဦးတော်လှန်ရေး သပိတ်အင်အားစုတွေရှိ ကလေးသူငယ်အခွင့်အရေး ကျွမ်းကျင်သူတွေက ကလေးသူငယ်တွေရဲ့ အခွင့်အရေးအကြောင်း အသီးသီးကို ဟောပြောခဲ့ကြပြီး၊ ဟောပြောပွဲကို ဒေသခံပြည်သူ ၅၀၀ ဝန်းကျင် တက်ရောက်ခဲ့တယ်လို့ ဆိုပါတယ်။

ဒါ့အပြင် ကလေးသူငယ်အခွင့်အရေး မိဘ၊ ဆရာဝန်းရံပေး၊ ဖက်ဒရယ်ပညာရေးရရှိရေး ဒို့အရေးစတဲ့ ကြွေးကြော်သံတွေနဲ့အတူ ကလေးသူငယ်တွေက မြန်မာ့ယဥ်ကျေးမှု အကတွေနဲ့ ကပြဖျော်ဖြေခဲ့ကြပါတယ်။

အလားတူ တော်လှန်လူငယ်တေးဂီတအဖွဲ့ကလည်း တော်လှန်တေးသီချင်းတွေ တီးခတ်စည်းရုံးလှုံ့ဆော်ခဲ့ကာ NUG ကာကွယ်ရေးအလံကို အလေးပြုခြင်း၊ ခေတ်အဆက်ဆက်နဲ့ မြန်မာ့နွေဦးတော်လှန်ရေး ကာလတလျှောက် ကြွေလွင်ခဲ့တဲ့ အာဇာနည်သူရဲကောင်းတွေကို ဦးညွှတ်အလေးပြုခြင်း စတဲ့အစီအစဥ်တွေ ပြုလုပ်ပြီး အခမ်းအနားကို ရုတ်သိမ်းခဲ့ကြတယ်လို့ သိရပါတယ်။

စာတည်း – လင်း

စစ်ကိုင်း၊ ဖေဖော်ဝါရီ ၁၆၊ ၂၀၂၃။

စစ်ကိုင်းတိုင်း၊ ကနီမြို့ပေါ်မှာ စစ်ကောင်စီတပ်သား ၂ ဦး ကင်းလှည့်ချိန် ရန်ဖြစ်စကားများရာမှ အချင်းချင်းပစ်ခတ်မှုဖြစ်ပြီး တပ်သားတဦး သေဆုံးသွားတယ်လို့ ‌ဒေသခံတွေဆီက သိရပါတယ်။

ဖေဖော်ဝါရီလ ၁၅ ရက်ည ၇ နာရီလောက်မှာ စစ်ကောင်စီတပ်သား ၂ ဦးဟာ ကင်းလှည့်နေရင်း ကနီမြို့ အမှတ်(၃)ရပ်ကွက် မြန်မာစီးပွားရေးဘဏ်အနီးက အစိုးရသစ်စက်ဝန်းအတွင်းမှာ အချင်းချင်း ပစ်ခတ်မှု ဖြစ်ပွားခဲ့တယ်လို့ ကနီမြို့ခံ အမျိုးသမီးတဦးက မြေလတ်အသံကို ပြောပါတယ်။

“အာဏာသိမ်းချိန်ကစလို့ မြို့ကိုအစောင့်ယူထားတဲ့ သူတွေပါရှင့်၊ အချင်းချင်း ကင်းလှည့်ရင်း နောက်ကနေ ပစ်တာပါ။ သူတို့က ကနီထွေအုပ်ရုံးမှာ အထိုင်ထားပါတယ်” လို့ ဆိုပါတယ်။

ပစ်ခတ်ခံရသူ အသက် ၃၀ နှစ်အရွယ် တပ်သား ဖိုးကြယ် (ခေါ်) အောင်တိုးထွန်းဟာ ဖေဖော်ဝါရီလ ၁၆ ရက် ဒီကနေ့မနက်ပိုင်းက ကနီပြည်သူ့‌ဆေးရုံမှာ ဆေးကုသမှုခံနေရင်း သေဆုံးသွားခဲ့ပြီး၊ ကျန်တပ်သားတဦးကတော့ လက်နတ်ယူပြီး ထွက်ပြေးသွားတယ်လို့ အထက်ပါ ဒေသခံအမျိုးသမီးက ဆက်ပြောပါတယ်။

“သေဆုံးတာက ကနီဆေးရုံမှာ ဆေးကုသရင်း ဒီနေ့မနက်ခင်း ၄ နာရီက သေဆုံးသွားတယ်။ နေ့လည် ၁ နာရီလောက်သင်္ဂြိုဟ်တယ်။ သေဆုံးမှုကို မြို့ပေါ်ကနေ စုံစမ်းသိရှိရတာပါ” လို့ ဆိုပါတယ်။

စစ်ကောင်စီတပ်သား ဖိုးကြယ် (ခေါ်) အောင်တိုးထွန်း သေဆုံးမှုနဲ့ပတ်သက်ပြီး ကနီမြို့ထဲမှာ စစ်ဆေးမှုတွေ ပြုလုပ်နေကြောင်းနဲ့ ထွက်ပြေးလွတ်မြောက်နေတဲ့ တပ်သားတဦးကိုလည်း အခုချိန်ထိ ပြန်လည်ဖမ်းဆီးလို့ မရသေးဘူးလို့လည်း သိရပါတယ်။