အမျိုးသား ၁ ဦးကိုလည်း စစ်ကောင်စီတပ်ကသတ်ခဲ့

မြေလတ်အသံ၊ ဇွန် ၂၆၊ ၂၀၂၅။

ပဲခူးတိုင်း၊ မင်းလှမြို့နယ်ကို စစ်ကြောင်းထိုးနေတဲ့ စစ်ကောင်စီစစ်ကြောင်းဟာ တပတ်အတွင်း ကျေးရွာ ၁၂ ရွာကိုမီးရှို့ပြီးဒေသခံတွေကိုလည်းဖမ်းဆီးသတ်ဖြတ်ခဲ့တယ်လို့ ဒေသခံတော်လှန်ရေး အင်အားစုတွေဆီက သိရပါတယ်။

ဇွန် ၂၆ ရက်ဒီကနေ့မနက်မှာ အိမ်ခြေ ၁၀၀ ကျော်ရှိတဲ့ ကျွဲမကိုင်းနဲ့ ခွက်မကျေးရွာကို မီးရှို့ခဲ့တာကြောင့် ၇ ရက်အတွင်းမီးရှို့ခံရတဲ့ကျေးရွာ ၁၂ ရွာအထိရှိလာခဲ့တာလို့ ဆိုပါတယ်။

“အဲ့ ၂ ရွာက ရွာနီးစပ်တွေပေါ့။ သူတို့ (စကစ)က မနေ့ကတည်းကမီးရှို့တာ။ မီးမလောင်ခဲ့တော့ ဒီနေ့ ပြန်လာပြီးမီးရှို့တာပါ။ အိမ်ဘယ်လောက်လောင်သွားလည်းဆိုတာတော့ မသိရဘူး။ စကစတွေ ကင်းပုန်းတွေချထားတော့မသွားရဲကြသေးဘူး”လို့ မြေပြင်အခြေအနေကိုသိရှိတဲ့ PDF တပ်ဖွဲ့ဝင်တဦးက ပြောပါတယ်။

စစ်ကြောင်းစထိုးတဲ့ဇွန် ၂၀ ရက်ကနေ ဇွန် ၂၆ ရက်အထိ မင်းလှမြို့နယ်ထဲက တောင်ပြတ်၊ ဦးတိုကျွဲလမ်းစု၊ ဗိုလ်တထောင်၊ ဆားချောင်း၊ ဆင်အိုင်ချောင်းပေါက်၊ ဂန့်ဂေါပင်၊ ငလှစမ်း၊ ကျွဲမကိုင်း၊ ခွက်မ၊ စမ်းဘုတ်၊ ရွေးကုန်း၊ ဘန့်ဘွေးပင်စတဲ့ ကျေးရွာတွေကို မီးရှို့ခဲ့တာလို့ ဆိုပါတယ်။

ဒါ့အပြင် ဇွန် ၂၃ ရက်မှာ ငလှစမ်းရွာက အမျိုးသား ၁၀ ဦး၊ ဇွန် ၂၄ ရက်မှာ ဘန့်ဘွေးပင်ရွာက အမျိုးသား ၁ ဦးနဲ့ အမျိုးသမီး ၁ ဦးတို့ကိုဖမ်းဆီးခဲ့ပြီး အဲဒီထဲက ငလှစမ်းရွာနေ အသက် ၃၅ နှစ်အရွယ် ကိုသန်းဇော်ဝင်း ကိုတော့သတ်ဖြတ်ခဲ့တယ်လို့ ဆိုပါတယ်။

“ကိုသန်းဇော်ဝင်းအလောင်းကို ရွာထဲက ဗုံးခိုကျင်းထဲမှာတွေ့ခဲ့ရတာ။ အလောင်းမှာ လက်တွေ၊ ခြေတွေကို ကြိုးတုပ်ထားတာတွေ့ရတယ်။ သူနဲ့အတူဖမ်းခံရတဲ့သူတွေကိုတော့ စစ်ကြောင်းထိုးရာ ဖမ်းခေါ်သွားတယ် ထင်တာပဲ။ ဘန့်ဘွေးပင်က ၂ ယောက်တော့ မောင်နှမတွေတဲ့”လို့ မျက်မြင်ဒေသခံ ပြောပြချက်ကို တပ်ဖွဲ့ဝင်ကပြန်ပြောပါတယ်။

ကိုသန်းဇော်ဝင်းရဲ့ရုပ်အလောင်းကိုတော့ ဇွန် ၂၅ ရက်မနက်ပိုင်းမှာ ငလှစမ်းရွာကို တော်လှန်ရေးတပ်ဖွဲ့တချို့က ရှင်းလင်းရေးဝင်ရောက်ခဲ့ချိန်တွေ့ရှိခဲ့ကြတာလို့ သူကဆက်ပြောပါတယ်။

စစ်ကောင်စီစစ်ကြောင်းဟာ စစ်ကွင်းတာဇုံရဲကင်းစခန်းကနေ မင်းလှမြို့နယ်ရှိကျေးရွာတွေကို ဇွန် ၂၀ ရက်ကစတင်ပြီး အင်အား ၅၀၀ ခန့်နဲ့ စစ်ကြောင်း ၃ ကြောင်းခွဲဖြန့်ကာ စစ်ကြောင်းထိုးဝင်ရောက်လာခဲ့တာလည်းဖြစ်ပါတယ်။

စစ်အာဏာသိမ်းချိန်ကနေ အခုနှစ် ဇွန် ၂၅ ရက်ထိ စစ်ကောင်စီနဲ့ ၎င်းတို့ရဲ့လက်ပါးစေတွေကြောင့် သေဆုံးခဲ့တဲ့ပြည်သူစုစုပေါင်း ၆,၈၁၉ ဦးရှိပြီလို့ နိုင်ငံရေးအကျဥ်းသားများ ကူညီစောင့်ရှောက်ရေးအသင်း – AAPP ရဲ့အစီရင်ခံစာအရ သိရပါတယ်။

စာတည်း – လင်း

နွားထိုးကြီး၊ မတ် ၂၄၊ ၂၀၂၅။

မန္တလေးတိုင်း၊ နွားထိုးကြီးမြို့နယ်၊ လက်ဝဲမြင်းနီကျေးရွာကို စစ်ကောင်စီဘက်က လေကြောင်းကနေ ဗုံးကြဲလို့ ဒေသခံ ၂ ဦးဒဏ်ရာရပြီး နေအိမ် ၂၃ လုံးပျက်စီးသွားတယ်လို့ မြေပြင်ကူညီရေးလုပ်ဆောင်ပေးခဲ့သူတွေထံက သိရပါတယ်။

မတ် ၂၃ ရက် မနေ့မနက်အစော ၁ နာရီခန့်မှာ စစ်ကောင်စီတပ်ဘက်က တိုက်လေယာဥ် ၁ စီးနဲ့ဗုံး ၂ လုံး၊ Y 12 လေယာဥ်နဲ့ဗုံး ၅ လုံးထက်မနည်းကြဲချခဲ့တာလို့ဆိုပါတယ်။

“ကျေးရွာရဲ့ လူနေအိမ်တွေကိုပေါ်အဓိကထားပြီး ချတာဆိုတော့ ရွာအလယ်ကြောနဲ့ အနောက်ပိုင်းကြားကိုကျတာ။ ရွာထဲမှာက လူတွေသိပ်မရှိလို့ ထိခိုက်မှုနည်းသွားတာ။ ခုထိတဲ့ သူတွေကလည်း ရွာထဲညအိပ်ပြန်တဲ့သူတွေထိတာ”လို့ မြေပြင်ကူညီရေးလုပ်ဆောင်ပေးနေသူတဦးက မြေလတ်အသံကို ပြောပါတယ်။

ဗုံးကျရောက်ပေါက်ကွဲတာကြောင့် လက်ဝဲမြင်းနီရွာခံ ဦးမောင်ကြိုင် အသက် ၆၅ နှစ်မှာ (စိုးရိမ်ရ) ဒဏ်ရာနဲ့ မနှင်းမြတ်နွယ် အသက် ၁၃ နှစ်မှာ (မစိုးရိမ်ရ ) ဒဏ်ရာတွေရရှိခဲ့ပြီး နေအိမ် ၇ လုံးမှာ ဗုံးစထိမှန်ပျက်စီးခဲ့ကာ၊ ၁၆ လုံးမှာ မီးလောင်ပျက်စီးခဲ့တယ်လို့ ဆိုပါတယ်။

လက်ဝဲမြင်းနီကျေးရွာဟာ ၂၀၂၄ အတွင်းမှာ စစ်ကောင်စီစစ်ကြောင်းရဲ့ ၂ ကြိမ် ဝင်ရောက်မီးရှို့တာကိုခံထားရပြီး မြင်းခြံအခြေစိုက် ခမရ ၁၅ တပ်ကလည်း မကြာခဏ လက်နက်ကြီးနဲ့ပစ်ခတ်နေတာကြောင့် ဒေသခံတွေမှာ ကျေးရွာတွင်းအတည်တကျ နေထိုင်နိုင်ခြင်းမရှိဘူးလို့ သိရပါတယ်။

လက်ဝဲမြင်းနီကျေးရွာမှဦ အိမ်ခြေ ၁၀၀၀ ဝန်းကျင်ရှိတဲ့ရွာဖြစ်ပြီး မီးရှို့ခံရတာ၊ လက်နက်ကြီးနဲ့လေကြောင်းကနေ ဗုံးကြဲခံထားရတာတွေကြောင့် နေအိမ် ၂၅၀ ကျော်ပျက်စီးထားပြီး ဒေသခံ ၅,၀၀၀ ခန့်မှာလည်း မကြာခဏစစ်ဘေးရှောင်နေရတယ်လို့ သိရပါတယ်။

ပုံစာ – လက်ဝဲမြင်းနီကျေးရွာ လေကြောင်းဗုံးကြဲခံရပြီး နေအိမ်တွေမီးလောင်နေမှုမြင်ကွင်း။

စာတည်း – ဟိန်းစံ

ပေါင်းတည်၊ ဧပြီ ၁၂၊ ၂၀၂၃။

ကျေးလက်မြို့ပြ လူထုသပိတ်တိုက်ပွဲတွေ ဖော်ဆောင်နိုင်ဖို့အတွက် ပဲခူးတိုင်း(အနောက်ခြမ်း)၊ ပြည်ခရိုင်၊ ပေါင်းတည်မြို့နယ်ထဲက ကျေးရွာတွေမှာ စည်းရုံးဟောပြောမှုတွေ ပြုလုပ်ခဲ့တယ်လို့ ပေါင်းတည် ၇/ အဖွဲ့လူငယ်တွေ က ယနေ့ ဧပြီလ ၁၂ ရက်နေ့မှာ ပြောပါတယ်။

ဟောပြောပွဲတွေကို ယခုရက်ပိုင်းတွေမှာ ပြုလုပ်နေတာဖြစ်ပြီး ကျေးရွာ ၅ ရွာက ဒေသခံတွေကို စည်းရုံးဟောပြောခဲ့ပြီး ကျေးရွာလုံခြုံရေးအရ ဘယ်ရွာတွေဆိုတာ မပြောနိုင်ဘူးလို့ အဲဒီအဖွဲ့က ဆိုပါတယ်။

“သူတို့ဘယ်လောက်ပဲ အကြောက်တရားတွေကို ရိုက်ထည့်ပါစေ ကျနော်တို့မြို့ပြကျေးလက် ပြည်သူလူထုကြီးနဲ့အတူ အဝေးတနေရာရောက်နေတဲ့ တော်လှန်ရေးအင်အားစုတွေနဲ့အတူ ညီညီညွတ်ညွတ် အတူတကွ တွန်းလှန်ကြဖို့ပါပဲ။ ရတဲ့နည်းနဲ့တော်လှန်ပုန်ကန်ကြပါ။ မြေပြင်သပိတ်တိုက်ပွဲတွေအတွက်လည်း လူထုကိုကျေးလက်ဒေသတွေမှာလည်း အချင်းချင်း သတင်းစကားပါး စည်းရုံးကြပါ” လို့ ၇/ အဖွဲ့ဝင်ရဲဘော် လူပျော်ကြီးက ပြောပါတယ်။

ဟောပြောရာမှာ စစ်အာဏာရှင်စနစ်အပြီးတိုင် ဖျက်သိမ်းရေး၊ ဖက်ဒရယ်ဒီမိုကရေစီနိုင်ငံဖော်ဆောင်နိုင်ရေး ဆိုတဲ့ အချက်နှစ်ချက်ကို အဓိကထား ဟောပြောခဲ့ကြတယ်လို့ သိရပါတယ်။

“လူထုသပိတ်တိုက်ပွဲတွေ လုပ်ခဲ့စဉ် ၂၀၂၁ ပေါင်းတည်လမ်းမတွေပေါ်မှာ ကျနော်တို့ကြွေးကြော်ခဲ့ကြတဲ့ ကြွေးကြော်သံတွေက လူကြားကောင်းရုံ အော်ခဲ့ကြတာ မဟုတ်ပါဘူး။ကျနော်တို့ ရင်ထဲက ယုံကြည်ချက်ခံယူချက်တွေနဲ့ ကြွေးကြော်ခဲ့ကြတာပါ။ သူတို့ဘယ်လောက်ပဲ ကြောက်အောင် ရက်စက်ပြပါစေ ကျနော်တို့ ပန်းတိုင်ထိရောက်အောင် သွားဖို့ ဆုံးဖြတ်တိုက်ပွဲဝင်သွားမှာပါ” လို့ ၇/ အဖွဲ့ဝင်ရဲဘော် လူပျော်ကြီးက ဆက်ပြောပါတယ်။

ပြီးခဲ့တဲ့ ၂၀၂၃ ခုနှစ်၊ ဖေဖော်ဝါရီလ ၂ ရက်နေ့မှာ စစ်ကောင်စီက စစ်အုပ်ချုပ်ရေးကြေညာခဲ့ရာ မြို့နယ်တွေထဲမှာ ပေါင်းတည်မြို့နယ်ဟာလည်း ပါဝင်ခဲ့ပါတယ်။

လက်ရှိမှာတော့ ပေါင်းတည်မြို့နယ်နဲ့ နတ္တလင်းမြို့နယ်အစပ် ပဲခူးရိုးမထဲကို စစ်ကောင်စီက စစ်ကြောင်းထိုးတာတွေရှိနေတာကြောင့် စစ်ရှောင်နေရသူတွေ ရှိနေသလို၊ မြို့ပြပြောက်ကျား လှုပ်ရှားမှုတွေ ရှိနေသလို ၇/ အဖွဲ့ဝင်တွေကလည်း စစ်အာဏာရှင်ဆန့်ကျင်ရေး ဗီနိုင်းပိုစတာကပ်တာနဲ့ အခြားကမ်ပိန်းတွေကိုလည်း ပြုလုပ်နေပါတယ်။

အလားတူ ပြီးခဲ့တဲ့ ဧပြီလ ၉ ရက်နေ့ နံနက်ပိုင်းကလည်း စစ်ကောင်စီရဲ့ ဆောက်လက်စပေါင်းတည်ဗဟိုမဏ္ဍုပ်ကို သတိပေးဗုံးခွဲတိုက်ခိုက်ခံရတာကြောင့် လုံခြုံရေးတိုးမြှင့်ထားသလို မဏ္ဍုပ်တည်ဆောက်ထားရာ လမ်းမကိုလည်း ဘယ်ရီဂီတ်တွေနဲ့ ပိတ်ဆို့တားဆီးထားတယ်လို့ မြို့ခံတွေဆီက သိရပါတယ်။

စစ်ကိုင်း၊ ဖေဖော်ဝါရီ ၈၊ ၂၀၂၃။

စစ်ကိုင်းတိုင်း၊ ရွှေဘိုမြို့နယ်ရှိ စစ်ကောင်စီတပ်တွေ မီးရှို့ဖျက်ဆီးခဲ့တဲ့ သရက်ပင်၀န်းကျေးရွာက ဒေသခံတွေအတွက် အကူအညီတွေ လိုအပ်နေတယ်လို့ ShweBo People Defence Force အဖွဲ့က သတင်းထုတ်ပြန်ထားပါတယ်။

အဲ့ဒီရွာကို ပြီးခဲ့တဲ့ ဇန်နဝါရီလ ၃၀ ရက်မှာ ရေဦးမြို့နယ်က လာရောက်တဲ့ အင်အား ၅၀ ပါစစ်သားတွေက မီးရှို့သွားခဲ့တာပါ။

“သရက်ပင်ဝန်းရွာက အိမ်ခြေ ၄၀၀ လောက်ရှိတဲ့ရွာကို အိမ်ခြေ ၅၀ လောက် မီးရှို့ခံရတာ။ ဟိုတစု သည်တစု မီးရှို့ခံရတာ။ ပထမ တရက် နှစ်ရက်လောက်ကိုတော့ ရွာသားချင်း ကူညီကြတာ။ ထမင်းထုပ်တွေ ပို့ပေးတာပေါ့။ တခြားရွာတွေကို အကူအညီတောင်းရအောင်လည်း သူတို့လည်း မီးရှို့ခံထားရတာဆိုတော့ အဆင်မပြေဘူး” လို့ ShweBo People Defence Force ရဲ့ တာဝန်ရှိသူက ပြောပါတယ်။

လက်ရှိမှာ မီးလောင်ကျွမ်းရာက ကျန်ရှိတဲ့ သွပ်ပြား မီးလောင်သစ်သားအချို့နဲ့ ထန်းရွက်တွေကို အသုံးပြုပြီး ယာယီတဲအိမ်တွေ ဆောက်လုပ်နေထိုင်ရတယ်လို့ သူကဆက်ပြောပါတယ်။

သူတို့တွေအတွက် နေထိုင်စရာ၊ စားနပ်ရိက္ခာ၊ အဝတ်အထည်၊ စောင်နဲ့ ဆေးဝါးပစ္စည်းတွေ လိုအပ်နေပြီး ဆက်သွယ်လှူဒါန်းလိုသူတွေ အနေနဲ့ ShweBo People Defence Force လူမူကွန်ယက်စာမျက်နှာကနေ ဆက်သွယ်လှူဒါန်းနိုင်တယ်လို့လည်း ဆိုပါတယ်။

ဒါအပြင် အခြားစစ်ကောင်စီတပ်ဖွဲ့တွေကလည်း သရက်ပင်ဝန်းကျေးရွာနဲ့အတူ ဇန်နဝါရီလ ၃၀ ရက် အဲဒီနေ့မှာပဲ ရွှေဘိုမြို့နယ်ထဲက ရုံးစုရွာ၊ ညောင်ပင်ကြီးစုရွာနဲ့ ဗျိုင်းကြိုင်ရွာက အိမ်ခြေ ၄၀၀ ကျော်ကို မီးရှို့ခဲ့သေးတယ်လို့ဆိုပါတယ်။

စစ်ကိုင်း၊ ဇန်နဝါရီ ၂၄၊ ၂၀၂၃။

စစ်ကိုင်းတိုင်း၊ ယင်းမာပင်မြို့နယ်က ကျေးရွာ ၅ ရွာကို စစ်ကောင်စီတပ်သားတွေက ဇန်နဝါရီလ ၂၃ ရက်မနေ့ကနေ့လယ်ပိုင်းမှာ ဆက်တိုက်မီးရှို့ခဲ့တဲ့အပြင် ရွာသားတဦးကိုလည်း သတ်သွားတယ်လို့ သိရပါတယ်။

ကျောက်မှော်ရွာ၊ ကျောက်ကုန်းရွာ၊ အင်းဖက်ရွာ၊ ကြက်လျှာနဲ့ ပန်းတိမ်ပြင်ရွာတွေက နေအိမ်တွေကို မီးရှို့ခဲ့တာဖြစ်ပြီး သံပရာပင်ရိုးတဲတိုက်က အသက် ၃၀ နှစ်အရွယ် ကိုနေထွန်းဆိုသူကိုပါ သတ်ပြီး ဦးခေါင်းနဲ့လက်တဖက်ကို ဖြတ်သွားတယ်လို့ ယင်းမာပင်မြောက်ခြမ်းသပိတ်အင်အားစုမှ တာဝန်ရှိသူတဦးက ပြောပါတယ်။

“ကိုနေထွန်းကို ဇန်နဝါရီ ၂၃ ရက်မနေ့က သတ်သွားတာပါ။ အလောင်းကိုတော့ အင်ဖျားရွာမှာ တွေ့တာ။ ဒီနေ့ပဲ သဂြိုဟ်ပြီးပါပြီ။ မီးလောင်တဲ့အိမ်ခြေစာရင်းတော့ မသိရသေးဘူး။ ရွာသားတွေလည်း ရွာထဲအကုန်မဝင်ကြသေးဘူး” လို့ ပြောပါတယ်။

ဒါ့အပြင် အင်းဖျားရွာက အမျိုးသား ၂ ဦးနဲ့ စုန်းချောင်းရွာက အမျိုးသား ၂ ဦးကိုလည်း ဖမ်းဆီး ခေါ်ဆောင်သွားတယ်လို့ သူကဆက်ပြောပါတယ်။

အဲဒီစစ်အုပ်စုဟာ ဇန်နဝါရီလ ၁၉ ရက်ကတည်းက ချင်းတွင်းမြစ်ကြောင်းတလျှောက်စုန်ဆင်းလာကာ ကျောက်မှော်ရွာမှာ ၄ ရက်ကြာ တပ်စွဲခဲ့တာဖြစ်ပြီး၊ လက်ရှိမှာ စစ်ကြောင်းဘယ်ကို ဦးတည်နေတယ်ဆိုတာ မသိရှိရသေးပဲ မြစ်ကမ်းဘေးတလျောက်မှာရှိတဲ့ သံဘို၊ ကျောက်မှော်နဲ့ စေသူရွာ ဒေသခံတွေကတော့ ပုန်းရှောင်နေကြရတယ်လို့ သိရပါတယ်။

စစ်ကိုင်း၊ ဒီဇင်ဘာ ၂၈၊ ၂၀၂၂။

စစ်ကိုင်းတိုင်း၊ စစ်ကိုင်းမြို့နယ်၊ မြင်းဆည်နဲ့ သုံးလင့်ကျေးရွာ ၂ ရွာကို စစ်ကောင်စီတပ်သားတွေက ဒီဇင်ဘာလ ၂၈ ရက်ဒီကနေ့မနက် ၁၂ နာရီလောက်ကစလို့ ညနေ ၇ နာရီလောက်အထိ မီးရှို့ဖျက်စီးနေတယ်လို့သိရပါတယ်။

အဲဒီ၂ ရွာကိုမီးရှို့ဖျက်စီးနေတဲ့ စစ်ကောင်စီတပ်သားတွေဟာ စစ်ကိုင်းအခြေစိုက် တမခ ၃၃ ကဖြစ်ပြီး၊ လက်ရှိအချိန်ထိ မီးရှို့ခံနေရတဲ့ ရွာ ၂ ရွာက ခန့်မှန်းခြေစုစုပေါင်း နေအိမ် ၁၀၀ ကျော် ပျက်စီးပြာကျနေပြီလို့ ဒေသကာကွယ်ရေးတပ်ဖွဲ့ဝင်တဦးက မြေလတ်အသံကိုပြောပါတယ်။

“စကစတွေက ပထမတော့ မြင်းဆည်ရွာကို မီးရှို့တယ်။ ပြီးတော့ အဲဒီရွာနားကသုံးလင့်ရွာကိုရှို့တယ်။ မြင်းဆည်ကရွာတော်တော်လည်း ကြီးတယ်ဗျ။ မီးရှို့သွားတာရွာတခြမ်းလောက်တော့ ပျက်စီးသွားတယ်။ သုံးလင့်ရွာကတော့ အခုအချိန်ထိမီးရှို့နေတုန်းပါ။ စကစတွေက ရွာကမထွက်သေးဘူး” လို့ဆိုပါတယ်။

မီးရှို့ခံရတဲ့ရွာ၂ရွာက ဒေသခံပြည်သူတွေကတော့ မီးမရှို့မီအချိန်ကတည်းက ဘေးလွတ်ရာကိုထွက်ပြေးတိမ်းရှောင်နေခဲ့ကြတယ်လို့သိရကာ နောက်ဆက်တွဲအခြေအနေတွေကိုတော့ မြေလတ်အသံကဆက်လက်စုံစမ်းနေဆဲဖြစ်ပါတယ်။

အလားတူ စစ်ကိုင်းတိုင်း၊ တန့်ဆည်မြို့နယ်နဲ့ ရေဦးမြို့ နယ်ကကျေးရွာ ၁၇ ရွာကိုလည်း စစ်ကောင်စီနဲ့ ဗျူစောထီးအင်အား ၁၀၀ ကျော်လောက်က ဒီဇင်ဘာ ၄ ရက်ကနေ ဒီဇင်ဘာ ၂၂ ရက်အထိ မီးရှို့ဖျက်စီးခဲ့တာကြောင့် နေအိမ် ၈၄၈ လုံးပြာကြပျက်စီးသွားခဲ့တယ်လို့ သိရပါတယ်။

ပြီးခဲ့တဲ့ ၂၀၂၁ ခုနှစ်၊ ဖေဖေါ်ဝါရီလ ၁ ရက်ကစလို့ အခု၂၀၂၂ ခုနှစ်၊ သြဂုတ်လ ၂၅ ရက်အထိ စစ်ကိုင်းတိုင်းက နေအိမ်ပေါင်း ၂၀၁၅၃ လုံး၊ မကွေးတိုင်းက နေအိမ်ပေါင်း ၅၄၁၈ လုံး၊ ချင်းပြည်နယ်က နေအိမ်ပေါင်း ၁၄၁၇ လုံးနဲ့ တခြားမြို့နယ်တွေက နေအိမ်ပေါင်း ၁၄၀၀ လုံးတို့ကို စစ်ကောင်စီတပ်သားတွေက မီးရှို့ဖျက်စီးခဲ့တယ်လို့ Data For Myanmar ရဲ့ အချက်အလက်မှတ်တမ်းအရ သိရပါတယ်။