ချောက်

မြေလတ်အသံ၊ ဖေဖော်ဝါရီ ၁၊ ၂၀၂၅။

စစ်တပ်ကအာဏာသိမ်းခဲ့တဲ့ ၄ နှစ်မြောက်နေ့ဖြစ်တဲ့ ဖေဖော်ဝါရီ ၁ ရက်နေ့ ဒီနေ့မှာ ချောက်မြို့နယ်က အမျိုးသမီးတွေဟာ အမှောင်ကျ ၄ နှစ်ပြည့်အိမ်တွင်းသပိတ်ပြုလုပ်ခဲ့ကြတယ်လို့ ချောက်မြို့နယ်တော်လှန်အမျိုးသမီးများအဖွဲ့ဆီက သိရပါတယ်။

ချောက်မြို့နယ်ဟာ စစ်ကောင်စီသတင်းပေးတွေရှိနေပြီး ပေါ်ပေါ်ထင်ထင်သပိတ်လုပ်ဖို့ခက်ခဲတာကြောင့် အိမ်တွင်းသပိတ်ကိုသာ ပြုလုပ်ခဲ့ကြကာ ချောက်မြို့နယ်အတွင်းက တော်လှန်အမျိုးသမီးတွေဟာ နေ့ထူးနေ့မြတ်တွေ၊ လူ့အခွင့်အရေးဆိုင်ရာနေ့တွေ့မှာ ရရင် ရသလို ဆန္ဒပြလှုပ်ရှားမှုတွေကို ပြုလုပ်လေ့ရှိတယ်လို့ တော်လှန်အမျိုးသမီးများအဖွဲ့ဝင်တဦးက ပြောပါတယ်။

“အဖွဲ့ကမြို့ပေါ်မှာ ပရဟိတတွေလုပ်ကြပြီး အာဏာရှင်စနစ်ဆန့်ကျင်တဲ့အလုပ်တွေကို လုပ်ဖြစ်ကြတာပါ။ အခွင့်သာသလောက်လုပ်ဖို့အားခဲထားပါတယ်” လို့ သူကပြောပါတယ်။

ပြည်သူတွေအမှောင်ကျတာ ၄ နှစ်ရှိခဲ့ပြီဖြစ်ပြီး ချောက်မြို့ခံတွေအနေနဲ့ မြို့မှာ စစ်ကောင်စီသတင်းပေးတွေ၊ စစ်ကောင်စီကိုထောက်ခံသူတွေရှိတဲ့အတွက်ကြောက်ရွံ့ကြတာမျိုးရှိပေမယ့် နေသာသလိုနေတာတွေကိုတော့ လျှော့ချကာ ချောက်မြို့ကြီးကိုပြောင်းလဲပေးသင့်တယ်လို့ သူကဆိုပါတယ်။

တော်လှန်အမျိုးသမီးများအဖွဲ့ကို ၂၀၂၁ သြဂုတ် ၂၄ ရက်မှာ စတင်ဖွဲ့စည်းခဲ့ပြီး လူအခွင့်အရေးလှုပ်ရှားမှု၊ သန်းခေါင်စာရင်းဆန့်ကျင်ရေးလှုပ်ရှားမှုအပါအဝင် လူ့အခွင့်အရေးဆိုင်ရာနေ့တွေမှာ သပိတ်လှုပ်ရှားမှုတွေကို အဓိက လုပ်ဖြစ်တယ်လို့လည်း သိရပါတယ်။

ချောက်၊ ဧပြီ ၁၄၊ ၂၀၂၃။

မကွေးတိုင်း၊ ချောက်မြို့နယ်၊ အမှတ် ၇ အုတ်ဖိုရပ်ကွက် သင်္ကြန်မဏ္ဍပ်မှာ ဧပြီလ ၁၄ ရက် ဒီနေ့မနက်ပိုင်းမှာ ဗုံးတလုံးတွေ့ပြီး ရဲတွေက ဝါးလုံးနဲ့ထိုးဆွလို့ ကွဲသွားတယ်လို့ ချောက်မြို့ခံတွေဆီက သိရပါတယ်။

“မနက်က ဗုံးတွေ့တာလည်း ဟုတ်တယ်။ ဗုံးကွဲတာလည်း ဟုတ်တယ်။ အထုပ်တွေ့လို့ဆိုပြီးတော့ ရဲတွေကို လှမ်းခေါ်တာ။ အထုပ်တွေ့တော့ လမ်းကိုရှင်းထားပြီး စခန်းလှမ်းခေါ်တာ။ ရဲ ၅ ယောက် ၆ ယောက်လောက် လာတယ်။ ပထမ ရဲတွေက သေနက်နဲ့ဖောက်မယ်ဆိုပြီး လုပ်တာ။ ရဲတွေက ဗုံးကိုဝါးလုံးနဲ့ဆွတာမှာ ဗုံးကထကွဲတာ။ ဘယ်သူ့မှမရှိတဲ့အချိန်ကွဲတာ၊ထိခိုက်ဒဏ်ရာရရှိသူတော့မရှိဘူး။ အဲဒီပတ်ဝန်းကျင်က ဆိုင်ခန်းတံခါးတွေ မှန်တာတော့ရှိတယ်” လို့ ချောက်မြို့ခံ အမျိုးသမီးတဦးက ပြောပါတယ်။

ဗုံးတွေ့ခဲ့တဲ့ မဏ္ဍပ်မှာ မဏ္ဍပ်ကြီးတခုဖြစ်ပြီး ယခင်နှစ်တွေက ယိမ်းတွေပါ ထည့်သွင်းခဲ့တယ်လို့ မြို့ခံတွေဆီက သိရပါတယ်။

ချောက်မြို့မှာ ရေကစားသူတွေမရှိသလောက် ဖြစ်နေပြီး ဗိုလ်အိမ်နံပါတ် ၆၀ မှာ မဏ္ဍပ်တခု အမှတ် ၈ ထဲမှာ ဗဟိုမဏ္ဍပ်တို့ရှိပြီး ဗဟိုမဏ္ဍပ်ထိပ်မှာ ဟိုဘက်ဒီဘက်ပိတ်ထားသလို ဆိုင်ကယ် အမျိုးသား ၂ ယောက်စီးတာတွေကို လိုက်ဖမ်းနေတယ်လို့ သိရပါတယ်။

စာတည်း – 007

မကွေး၊ ဖေဖော်ဝါရီ ၁၇၊ ၂၀၂၃။

မကွေးတိုင်း၊ ချောက်မြို့နယ်အတွင်းမှာ အမည်မသိအမျိုးသားတဦးက ချောက်မြို့နယ် ပြောက်ကျားတပ်ဖွဲ့ အဖွဲ့အမည်သုံးပြီး လုပ်ငန်းရှင် အချို့နဲ့ ပြည်သူတွေဆီကနေ ငွေလိမ်တောင်းခံ‌နေမှုတွေ ပြုလုပ်နေတယ်လို့ သိရပါတယ်။

ဖေဖော်ဝါရီ လဆန်းကစပြီး အမျိုးသားတဦးက CGF ပြောက်ကျားအဖွဲ့အမည်ကို အသုံးချကာ ချောက်မြို့နယ်အတွင်းက လုပ်ငန်းရှင်အချို့ကို အလှူခံတာတွေ၊ ခြိမ်းခြောက်ငွေ တောင်းခံတာတွေ ပြုလုပ်နေတာကြောင့် မနေ့က ဖေဖော်ဝါရီလ ၁၆ ရက်နေ့မှာ စာထုတ်ပြီး စုံစမ်းစစ်ဆေးမှုတွေ လုပ်နေတယ်လို့ ချောက်မြို့နယ်ပြောက်ကျားတပ်ဖွဲ့ C.G.F တာဝန်ရှိသူတဦးက ပြောပါတယ်။

“ကျနော်တို့အဖွဲ့နာမည်ကို အလွဲသုံးစားလုပ်ပြီး ငွေတောင်းနေတာ၊ တောက်လျှောက် အဲ့လိုတွေ လုပ်တယ်လို့ ကြားရတယ်ဗျ။ တချို့ကို အလှူခံတယ်။ တချို့လုပ်ငန်းရှင်တွေကို ခြိမ်းခြောက်ပြီး ငွေတောင်းတယ်။ တယ်လီနောနဲ့ လိုက်ဆက်တာ ပြီးရင် ကဒ်ပိတ်လိုက်တယ်။ အသံအရတော့ အရွယ်က လူငယ်ပိုင်းထဲကပဲ” လို့ သူက ဆက်ပြောပါတယ်။

CGF ပြောက်ကျားတပ်ဖွဲ့အနေနဲ့ ငွေလိမ်လည်တောင်းခံမှု ပြုလုပ်နေသူတွေကို စုံစမ်းနေပြီး ခုလိုလုပ်ဆောင်တာမျိုး မိမိတို့အဖွဲ့အနေနဲ့ လုပ်မှာမဟုတ်သလို အလှူငွေတွေကို မတရားတောင်းခံတာ၊ ခြိမ်းခြောက်တာမျိုးလုပ်ပြီး လိမ်လည်နေသူတွေကို စုံစမ်းဖော်ထုတ် အရေးယူသွားမယ်လို့ ဆိုပါတယ်။

ဒါ့အပြင် လက်ရှိမှာလည်း စစ်ကိုင်းတိုင်း၊ မကွေးတိုင်းမြို့နယ် အချို့မှာ ဒေသခံပြည်သူတွေကို PDF ထောက်ပံ့နေတယ်ဆိုပြီး ဆက်သွယ်ခြိမ်းခြောက် ငွေညှစ်တာတွေများလာတာကြောင့် ပြည်သူတွေ သတိထားကြဖို့ ထည့်သွင်းပြောထားပါတယ်။

ချောက်၊ ဖေဖော်ဝါရီ ၉၊ ၂၀၂၃။

မကွေးတိုင်း၊ ချောက်မြို့နယ်၊ အမှတ်(၇) ရပ်ကွက်မှာ လမ်းဘေးတွေ့တဲ့အထုပ်ကို ဖွင့်ကြည့်ရာမှ မိုင်းပေါက်ကွဲမှုဖြစ်ပြီး ကလေး ၂ ဦးသေဆုံးခဲ့တယ်လို့ သိရပါတယ်။

အဲ့ဒီကလေးတွေဟာ ဖေဖော်ဝါရီလ ၈ ရက်မနေ့ညနေ ၃ နာရီဝန်းကျင်မှာ ဘောလုံးကွင်းနဲ့ရေနံလျှပ်စစ်ရုံးထောင့်နားမှာ မိုင်းပေါက်ကွဲမှုဖြစ်ပြီး သေဆုံးသွားတာလို့ ဒေသခံတဦးကပြောပါတယ်။

“ကလေးတွေကတော့ လမ်းဘေးတွေ့တဲ့အထုပ်ကို ဘာအထုပ်မှန်းမသိ စပ်စုချင်တဲ့သဘောနဲ့ ကောက်ဖွင့်လိုက်တာလို့တော့ သိရတယ်။ အထုပ်ကလည်း ကျွတ်ကျွတ်အိတ်နဲ့ထုတ်ထားတာဆိုတော့။ ကလေးတွေက ရပ်ကွက်ထဲအမှိုက်လိုက်ကောက်နေတဲ့ ကလေးတွေတော့ မဟုတ်ဘူး။ ဒီအတိုင်း သူလိုငါလိုနေတဲ့ ကလေးတွေပါ”လို့ ပြောပါတယ်။

လမ်းဘေးထားထားတဲ့ အထုပ်ကနေပေါက်ကွဲမှုဖြစ်လို့ ရွာဟောင်းကျေးရွာနေ အသက် ၁၁ နှစ်အရွယ် မောင်မိုးယံကိုနဲ့ မောင်ဝင်းနိုင်မင်းဆိုသူ ၂ ဦးဟာ နေရာမှာဘဲ သေဆုံးသွားတယ်လို့ ဆိုပါတယ်။

အဲဒီမိုင်းထုပ်ကို ဘယ်အဖွဲ့ကဘာကြောင့်ထားခဲ့တယ်လိုတာ ထုတ်ပြန်ထားတာမရှိသေးသလို သေဆုံးသွားတဲ့ ကလေး ၂ ဦးကိုတော့ ဒေသခံတွေရဲ့အကူအညီနဲ့ နေ့ချင်းပြီးနာရေးကိစ္စကို ဆောင်ရွက်လိုက်ရတယ်လို့ဆိုပါတယ်။

၂၀၂ ခုနှစ် ဩဂုတ်လ ၁၁ ရက် ညနေပိုင်းကလည်း ချောက်မြို့၊ အမှတ် ၁၂ ရပ်ကွက်က ဌာနဆိုင်ရာနဲ့ဝန်ထမ်းအများစု လာရောက်စားသောက်လေ့ရှိတဲ့ ဦးချစ်ထမင်းဆိုင်မှာ လက်လုပ်မိုင်းပေါက်ကွဲမှုဖြစ်ခဲ့သေးပြီး လူထိခိုက်တာတော့မရှိဘူးလို့ သိရပါတယ်။

မကွေး၊ ဇန်နဝါရီ ၂၇၊ ၂၀၂၃။

မကွေးတိုင်း၊ ချောက်မြို့ပေါ်နေ မွတ်စလင်အမျိုးသားတွေအပါအဝင် ၄ ဦးဟာ ပခုက္ကူဘက်ကို ကားနဲ့ခရီးသွားချိန် ၃ ဦးကလမ်းမှာအသတ်ခံခဲ့ရပြီး စီးသွားတဲ့ကားနဲ့ ကျန် ၁ ဦးကတော့ ပျောက်ဆုံးနေတယ်လို့ သိရပါတယ်။

ချောက်မြို့၊ စျေးတန်းရပ်ကွက်ရှိ သမာဓိ ဆိုင်ကယ်အရောင်းဆိုင်ပိုင်ရှင် ဦးအောင်ကျော်ဦး (ခ) ဦးဟာကင်းမ်၊ ဆွေမျိုးတော်စပ်သူ ဦးဟာစင်၊ သူငယ်ချင်းဖြစ်သူ ဦးဟာဗင်နဲ့ ယာဥ်မောင်းသူ ဦးမြင့်ဌေးတို့ ၄ ဦးဟာ ပြီးခဲ့တဲ့ဇန်နဝါရီလ ၂၅ ရက်မှာ ပခုက္ကူကိုသွားချိန် အသတ်ခံခဲ့ရတာလို့ ချောက်မြို့နယ်ပြည်သူ့ကာကွယ်‌ရေးအဖွဲ့ တာဝန်ရှိသူ ကိုပြူးကြီးကမြေလတ်အသံကို ပြောပါတယ်။

“သူနဲ့အတူတူ သိန်း ၃ ထောင်အထက်ပါသွားတယ်၊ ကား ၁ စီးလည်းပြန်မရပါဘူး၊ အလောင်းက ၃ လောင်းပဲပြန်ရတယ်၊ ၁ ယောက်ကတော့ ဘယ်သူပျောက်နေတယ်ဆိုတာမသိရပါဘူး” လို့ ပြောပါတယ်။

ဦးအောင်ကျော်ဦးနဲ့ ဦးမြင့်ဌေးတို့မှာတော့ လည်ပင်းပြတ်ရှဒဏ်ရာနဲ့ သေနတ်ဒဏ်ရာတွေရရှိထားပြီး၊ ကျန် ၁ ဦးကတော့ ရုပ်ပျက်ဆင်းပျက်ဖြစ်နေတာကြောင့် ဘယ်သူလဲဆိုတာကို အတည်ပြုလို့မရသေးဘူးလို့လည်း ဆိုပါတယ်။

သူတို့ကို ပခုက္ကူတံတားထိပ်မှာ အထိုင်ချတပ်စွဲနေတဲ့ တမခ ၁၀၁ မှ စစ်သားတွေက ပခုက္ကူမြို့ရှောင်လမ်းအလွန်မှာ ဖမ်းဆီးသတ်လိုက်တာလို့လည်း သိရပြီး ဘယ်နေ့မှာ သတ်လိုက်တယ်ဆိုတာကိုတော့ သီးခြားအတည်မပြုနိုင်သေးပါဘူး။ အဲ့ဒီ‌နောက်အလောင်းတွေကို ပခုက္ကူရင်ခွဲရုံမှာထားရှိပြီး စစ်ကောင်စီတပ်သားတွေဟာဇန်နဝါရီလ ၂၆ ရက်မှ သေဆုံးသူတွေရဲ့မိသားစုကို အကြောင်းကြာကာ ချောက်မြို့ကိုပြန်သယ်ပြီး သင်္ဂြိုဟ်ခိုင်းခဲ့တယ်လို့ သိရပါတယ်။