မြေလတ်အသံ၊ သြဂုတ် ၁၅၊ ၂၀၂၅။

မကွေးတိုင်း၊ ဂန့်ဂေါမြို့အခြေစိုက် ခလရ ၅၀ တပ်ရင်းမှ ဒုတပ်ကြပ် ၁ ဦး ဘက်ပြောင်းခိုလှုံလာခဲ့တယ်လို့ သြဂုတ် ၁၅ ရက်ဒီကနေ့မှာ ယောကာကွယ်ရေးတပ် စစ်ဒေသရုံးဦးဆောင်ကော်မတီ -YDF က ထုတ်ပြန်ပါတယ်။

စစ်မှုထမ်းသက် ၆ နှစ်ရှိသူ အသက် ၂၈ နှစ်အရွယ် ဒုတပ်ကြပ်ဟာ သြဂုတ် ၈ ရက် မနက် ၁၁ နာရီမှာ လက်နက်၊ ခဲယမ်းတွေနဲ့အတူ ဘက်ပြောင်းလာခဲ့တာလို့ ဆိုပါတယ်။

“အလင်းဝင်ရောက်လာတဲ့ တပ်သားအမည်က ပြောကြားလို့အဆင်မပြေသေးလို့ပါဗျ။ ကျန်ခဲ့တဲ့ မိသားစုတွေ ထိခိုက်နိုင်လို့ပါ။ ကျနော်တို့ ထောက်လှန်းရေးဌာနက ရဲဘော်တွေနဲ့ ချိတ်ဆက်မိပြီး အလင်းဝင်ရောက်လာတာပါဗျ”လို့ ယောကာကွယ်ရေးတပ် စစ်ဒေသရုံးဦးဆောင်ကော်မတီ -YDF မှ ပြန်ကြားရေးတာဝန်ခံ ကိုနေကပြောပါတယ်။

အထက်ပါ ဒုတပ်ကြပ်ဟာ MA-11 မောင်းပြန်ရိုင်ဖယ် ၁ လက်၊ ကျည်ဘောက် ၃ ခု၊ ကျည် ၇၁ တောင့်၊ စကားပြောစက် ၂ လုံးတို့ရရှိထားတယ်လို့ ကိုနေက ဆက်ပြောပါတယ်။

ခလရ ၅၀ တပ်ကနေ YDF ဆီကို အခုလိုဘက်ပြောင်းခိုလှုံလာတာဟာ ပထမဆုံးဖြစ်ပြီး သူ့ရဲ့စိတ်ဆန္ဒရှိတဲ့အတိုင်း ဆောင်ရွက်ပေးသွားမှာဖြစ်တယ်လို့လည်း ကိုနေက ဆိုပါတယ်။

ဒါ့အပြင် ဆုကြေးငွေအနေနဲ့ ငွေကျပ်သိန်း ၃၀ သတ်မှတ်ထားပြီး တခြားလိုအပ်တာတွေကိုပါ ကူညီပေးသွားဖို့ စီစဥ်ဆောင်ရွက်နေဆဲဖြစ်တာကြောင့် လက်ရှိမှာဆုချီးမြှင့်ပွဲ မပြုလုပ်နိုင်သေးဘူးလို့ သိရပါတယ်။

စာတည်း – လင်း

ဆော၊ မေ ၁၊ ၂၀၂၅။

မကွေးတိုင်း၊ ဂန့်ဂေါခရိုင်၊ ဆောမြို့နယ်၊ အညာကတင်းကျေးရွာကို စစ်ကောင်စီတပ်က မေ ၁ ရက်ဒီကနေ့မနက် ၁၁ နာရီခန့်မှာ လေကြောင်းကနေ ဗုံးကြဲတိုက်ခိုက်ခဲ့တာကြောင့် ကလေး ၁ ဦးအပါအဝင် အမျိုးသမီး ၄ ဦးသေဆုံးခဲ့တယ်လို့ ဒေသခံတွေဆီကသိရပါတယ်။

တိုက်ခိုက်ရေးလေယာဥ် ၁ စီးနဲ့ အညာကတင်းကျေးရွာရဲ့ အလယ်တန်းစာသင်ကျောင်းအနီးကို ပေါင် ၂၅၀ ဗုံးသီး ၂လုံး ကြဲချခဲ့တာလို့ ဆိုပါတယ်။

“သေဆုံးသူတွေက မိသားစု၀င်တွေတော့မဟုတ်ပါဘူးခင်ဗျ။ စာသင်ကျောင်အနီးမှာရှိတဲ့ အိမ်တွေက ပြည်သူတွေပါ။ အမျိုးသမီးကြီး ၃ ယောက်က ပွဲချင်းပြီးသေတာ။ ကလေးမလေးကတော့ ဆေးခန်းပို့တဲ့လမ်းမှာသေသွားတာ”လို့ ယောအလင်းတန်းမှတာဝန်ရှိသူ အမျိုးသားတဦးက ပြောပါတယ်။

သေဆုံးသူ ၄ ဦးမှာ ဒေါ်မကြည်လေး ၆၅ နှစ်၊ ဒေါ်တင်တင်ခိုင် ၅၂ နှစ်၊ မပြားသာ ၃၈ နှစ်နဲ့ မခွန်းဆက်ချို ၈ နှစ်တို့ဖြစ်ကြပါတယ်။

ဒါ့အပြင် ဗုံးကြဲမှုကြောင့် စာသင်ကျောင်းအဆောက်အဦအပါအဝင် လူနေအိမ် ၅ လုံး ပြိုကျပျက်စီးခဲ့တယ်လို့ သိရပါတယ်။

ပြီးခဲ့တဲ့ ၂၀၂၄၊ မေ ၁၄ ရက်ကလည်း ဆောမြို့နယ်၊ ကျင်းလိန်ကျေးရွာအုပ်စု၊ တောမကျေးရွာကို စစ်ကောင်စီက လေကြောင်းကနေ ဗုံးကြဲတိုက်ခိုက်ခဲ့တာကြောင့် အမျိုးသား ၃ ဦး၊ အမျိုးသမီး ၄ ဦးသေဆုံးခဲ့တယ်လို့သိရပါတယ်။

စာတည်း – လင်း

ကလေး၊ မတ် ၂၅၊ ၂၀၂၅။

မကွေးတိုင်း၊ ဂန့်ဂေါမြို့နယ်၊ နှမ်းခါးကျေးရွာကို စစ်ကောင်စီရဲ့ဗုံးကြဲတိုက်ခိုက်မှုအတွင်း သေဆုံးသွားတဲ့ CDM ဆရာဝန် ဒေါက်တာမြစိုးအောင်မိသားစုသေဆုံးခဲ့ရမှုအတွက် ဝမ်းနည်းခြင်းသပိတ်တခုကို ကလေးမြို့နယ်တနေရာမှာ ပြုလုပ်ခဲ့ကြတယ်လို့ ကလေးမြို့လူထုတိုက်ပွဲဦးဆောင်ကာ်မတီဆီက သိရပါတယ်။

မတ် ၂၄ ရက်ညပိုင်းမှာ ကလေးမြို့လူထုတိုက်ပွဲဦးဆောင်ကာ်မတီက ဦးဆောင်းပြီး ညသပိတ် ပြုလုပ်ခဲ့တာဖြစ်တယ်လို့ ကော်မတီတာဝန်ရှိသူအမျိုးသမီးတဦးကဆိုပါတယ်။

မတ် ၂၂ ရက်မှာ နှမ်းခါးရွာဆေးပေးခန်းဗုံးကြဲခံရလို့ သေဆုံးသူ ၁၁ ဦးအထဲမှာ ဒေါက်တာ မြစိုးအောင်၊ ကိုယ်ဝန်လေးလရှိနေတဲ့ ဇနီးဖြစ်သူ အထက်တန်းသူနာပြု ဒေါ် ခိုင်နှင်းဝေ၊ သားဖြစ်သူ ၅ နှစ်အရွယ် ကလေးငယ်တို့ တနေရာတည်းမှာပဲ သေဆုံးခဲ့ကြတာပါ။

အကြမ်းမဖက်အာဏာဖီဆန်ကြရင်း အကြမ်းဖက်သတ်ဖြတ်ခံရသူတွေ၊ တပါးသူရဲ့အသက်ကို ကယ်တင်ရင်း အသက်ပေးဆပ်ခဲ့ကြရသူတွေအားလုံးရဲ့ ရဲစွမ်းသတ္တိနဲ့ပြတ်သားခိုင်မာတဲ့ စိတ်ဓါတ်၊ ခံယူချက်နဲ့ လုပ်ရပ်တွေအပေါ် CDM အားလုံးနဲ့ထပ်တူလေးစားဂုဏ်ယူကြောင်းကိုလည်း ကလေးမြို့ လူထုတိုက်ပွဲဦးဆောင်ကော်မတီက ဆိုထားပါတယ်။

ဒါ့အပြင် စစ်ရေးပစ်မှတ်မဟုတ်တဲ့ နှမ်းခါးရွာဆေးပေးခန်းကို စစ်ကောင်စီက လေကြောင်းကနေ ဗုံးကြဲတိုက်ခိုက်ခဲ့တဲ့ဖြစ်စဉ်အပေါ် ပြည်သူလူထုက နည်းလမ်းပေါင်းစုံနဲ့ ဝိုင်းဝန်းရှုတ်ချကြဖို့လည်း တိုက်တွန်းထားပါသေးတယ်။

စာတည်း – လင်း

ဂန့်ဂေါ၊ ဖေဖော်ဝါရီ ၂၄၊ ၂၀၂၃။

မကွေးတိုင်း၊ ဂန့်ဂေါခရိုင်၊ ဂန့်ဂေါမြို့နယ်အတွင်း စစ်ကောင်စီတပ်တွေရဲ့မီးရှို့ဖျက်ဆီးမှုကို ကာကွယ်နိုင်ဖို့အတွက် မီးငြှိမ်းသတ်ရေးနဲ့ ရှာဖွေကယ်ဆယ်ရေး လုပ်ငန်းတွေကို လုပ်ဆောင်ဖို့ မီးဘေးလုံခြုံရေးအဖွဲ့ ဖွဲ့စည်းခဲ့တယ်လို့ ဂန့်ဂေါမြို့နယ်-ပြည်သူ့အုပ်ချုပ်ရေးအဖွဲ့ဆီက သိရပါတယ်။

ဖေဖော်ဝါရီလ ၂၃ ရက် မနေ့ကစတင်ကာ မြို့နယ်အဆင့် အင်အား ၁၅ ဦးနဲ့ ဖွဲ့စည်းခဲ့တာလို့ ဂန့်ဂေါမြို့နယ်-ပြည်သူ့အုပ်ချုပ်ရေးအဖွဲ့ တာဝန်ခံက ပြောပါတယ်။

“မီးဘေးလုံခြုံရေးတွေ ပြင်ဆင်ဖို့၊ ကြိုတင်ကာကွယ်နိုင်ဖို့၊ အချိန်မှီကာကွယ်တာတို့ ငြိမ်းသတ်တာတို့ လုပ်နိုင်ဖို့အတွက် မြို့နယ်အဆင့် ၁၅ ယောက်နဲ့ ဖွဲ့စည်းထားတာ၊ မီးရှို့ခံရပြီဆိုရင် မီးသတ်တာတွေ အချိန်နဲ့တပြေးညီ လုပ်သွားမယ်” လို့ ဂန့်ဂေါမြို့နယ်-ပြည်သူ့အုပ်ချုပ်ရေးအဖွဲ့ တာဝန်ခံက ပြောပါတယ်။

ဒါ့အပြင် ရှေ့ဆက်ပြီးတော့လည်း ကျေးရွာတွေမှာ အရံမီးသတ်တွေ ထပ်ဖွဲ့သွားဖို့ အစီအစဉ် ရှိတယ်လို့ ဆိုပါတယ်။

ဂန့်ဂေါမြို့နယ်မှာ စစ်ကောင်စီတပ်တွေ မီးရှို့ခဲ့လို့ ၂ နှစ်တာ ကာလအတွင်း အိမ်ခြေ ၈၂၀ မီးလောင်ဆုံးရှုံးခဲ့ပြီး ဒေသခံပြည်သူ ၃ ထောင်ကျော် မီးဘေးသင့်ပြီး အခက်အခဲတွေနဲ့ ကြုံနေရတာလို့ သိရပါတယ်။

မကွေး၊ ဧပြီ ၃၊ ၂၀၂၃။

မကွေးတိုင်း၊ ဂန့်ဂေါမြို့နယ်၊ ကန်ရွာ နယ်မြေခံရဲစခန်းသိမ်းတိုက်ပွဲမှာ စခန်းရဲ့အဆောက်အဦးတွေကို မီးရှို့နိုင်ခဲ့ပြီး စစ်ကောင်စီတပ်သား ၄၅ ဦး သေဆုံးခဲ့သလို PDF ဘက်ကလည်း ရဲဘော် ၂ ဦး သေဆုံးခဲ့တယ်လို့ သိရပါတယ်။

စစ်ကောင်စီနဲ့ရဲအင်အား ၁၀၀ ကျော်ရှိတဲ့ အဲဒီရဲစခန်းကို မတ်လ ၃၁ ရက်မနက်ပိုင်းကစလို့ ကာကွယ်ရေးပူးပေါင်းတပ်ဖွဲ့တွေက ဝင်ရောက်တိုက်ခိုက်ခဲ့တာဖြစ်ပြီး၊ တိုက်ပွဲအတွင်း စစ်ကောင်းစီဘက်က လေယာဥ်နဲ့ ၇ ကြိမ်အထိ ပစ်ခတ်ခဲ့လို့ အဲဒီနေ့နေ့လည် ၂ နာရီကျော်မှာ ပြန်လည်ဆုတ်ခွာခဲ့ရတယ်လို့ ဂန့်ဂေါခရိုင်အမှတ် (၁) တပ်ရင်းမှ သတင်းနဲ့ပြန်ကြားရေးတာဝန်ခံ ကိုစတီဗင်က ပြောပါတယ်။

“ကျနော်တို့ပြန်ဆုတ်လာတဲ့အချိန်မှာ ရဲစခန်းရဲ့ ၇၅ ရာခိုင်နှုန်းအထိ မီးရှို့ဖျက်ဆီးနိုင်ခဲ့တယ်။ သေဆုံးနေတဲ့ စကစအလောင်း ၄၅ လောင်းကို တွေ့ခဲ့ရတယ်။ ၁၀ ကောင်လောက်ဒဏ်ရာရသွားတယ်။ လက်နက်တွေပါ ရရှိခဲ့တယ်။ ဒီတိုက်ပွဲမှာ လေယာဥ်နဲ့ပစ်ခတ်တာ၊ စစ်ကူချပေးတာတွေကြောင့် ပြန်ဆုတ်ခဲ့ရတယ်။ စခန်းတခုလုံးကိုတော့ မသိမ်းနိုင်ခဲ့ဘူး” လို့ ဆိုပါတယ်။

ရဲစခန်းမှပြန်ဆုတ်ခွာလာချိန် စစ်ကောင်စီတပ်သားတွေရဲ့ G3 (၄) လက်၊ G4 (၁) လက်၊ G3 မောင်းတုံး(၁)ခု၊ ကျည်ဘောက် (၄)ခု၊ လက်ပစ်ဗုံး(၂)လုံး၊ စကားပြောစက် (၂) လုံး၊ ဖုန်း (၇) လုံး၊ Laptop (၁) လုံး၊ ဓား (၁) လက်၊ ငွေ (၆၀၈၀၀) ကျပ်နဲ့ အခြားအသုံးအဆောင်ပစ္စည်းတွေ အများအပြား သိမ်းဆည်းရမိခဲ့တယ်လို့ ကိုစတီဗင်က ပြောပါတယ်။

“လေကြောင်းနဲ့တိုက်ခိုက်ခံနေရတဲ့ကြားက ကျနော်တို့တွေ နောက်မဆုတ်ဘဲနဲ့ စခန်းထဲကို ဝင်တိုက်နိုင်ခဲ့တယ်။ အကြီးစားဘန်ကာတခုနဲ့ အဆောက်အအုံတွေ မီးရှို့နိုင်ခဲ့တယ်။ စကစ လေယာဥ်သုံးတာ ဒီတိုက်ပွဲလောက် တခုမှာမှမရှိဘူးလို့ ထင်တယ်။ စခန်းကိုမသိမ်းနိုင်ခဲ့တာကလည်း သတင်းတွေပေါက်ကြားသွားတာလည်း ပါတယ်ပေါ့” လို့ ဆိုပါတယ်။

ဒါ့အပြင် PDF တွေဘက်ကလည်း တိုက်ပွဲအတွင်း ရဲဘော် ၂ ဦး သေဆုံးခဲ့သလို နောက်ထပ် ရဲဘော် ၉ ဦးမှာလည်း ထိခိုက်ဒဏ်ရာရရှိခဲ့တယ်လို့ ဆိုပါတယ်။

ဒီတိုက်ခိုက်မှုကိုတော့ ဂန့်ဂေါခရိုင် အမှတ် ၁၊ ၇၊ ၁၁၊ ၁၂၊ ၁၄၊ ၁၉၊ ABSDF၊ HYPER UAV FORCE၊ ပကဖ ရဲဘော်တွေက ပူးပေါင်းလုပ်ဆောင်ခဲ့တာလို့ သိရပါတယ်။

စာတည်း – 007

ဂန့်ဂေါ၊ မတ် ၁၈၊ ၂၀၂၃။

မကွေးတိုင်း၊ ဂန့်ဂေါခရိုင်၊ ထီးလင်းမြို့နယ်အတွင်း မိုင်းရှင်းဖို့ထွက်လာတဲ့ အင်အား ၆ ဦးပါရှေ့ပြေးပွိုင့်တပ်စိတ်စစ်ကြောင်း မတ်လ ၁၇ ရက် ညနေ ၄ နာရီခန့်မှာ ဆေးမင်းတောရွာမြောက်ဘက်ရှိ အင်းနားလမ်းခွဲမှာ မိုင်းဆွဲတိုက်ခိုက်ခံခဲ့ရတယ်လို့ သိရပါတယ်။

လက်နက်ခဲယမ်းတွေ သယ်ဆောင်လာတဲ့ စစ်ကောင်စီတပ်ယာဉ်တန်းတွေဖြတ်သန်းမယ့် လမ်းပိုင်းကို မိုင်းလာရှင်းတဲ့ တပ်မ ၇၇ လက်အောက်ခံ စစ်ကောင်စီတပ်သားတွေဖြစ်ပြီး ပဒေသာမိုင်းနဲ့ တိုက်ခိုက်ခဲ့လို့ ၄ ဦး သေဆုံးတယ်လို့ Yaw Revolution Army-ထီးလင်းခေါင်းဆောင် သခင်ဇော်က မြေလတ်အသံကို ပြောပါတယ်။

“ယာဉ်တန်းလာမယ့် လမ်းကြောင်းကို မိုင်းရှင်းတဲ့ရှေ့ပြေးပွိုင့်တပ်စိတ် ၆ ယောက်အဖွဲ့တွေက ကျနော်တို့ မိုင်းကွင်းထဲရောက်လာတာ၊ ပဒေသာမိုင်း ၁၂ လုံးနဲ့ဆွဲလိုက်တာ ၄ ယောက်သေတယ်။ သူတို့က ရှေ့ပြေးပွိုင့် နောက်ကစစ်ကြောင်းမှာ ကျန်တာအယောက် ၃၀ လောက်ရှိတယ်” လို့ ပြောပါတယ်။

သေဆုံးခဲ့တဲ့ စစ်ကောင်စီတပ်ဖွဲ့ဝင် ၄ ဦးဟာ ဂန့်ဂေါခရိုင်အတွင်း စစ်ကြောင်းထိုးဝင်ရောက်နေတဲ့ တပ်မ ၇၇ လက်အောက်ခံ တပ်ရင်းတခုရဲ့ တပ်ကြပ်ကြီးအဆင့် ၁ ဦး၊ ဒုတပ်ကြပ်အဆင့် ၁ ဦး နဲ့ တပ်သား ၂ ဦးတို့ဖြစ်တယ်လို့ သိရပါတယ်။

အဲ့ဒီစစ်ကြောင်းဟာ မိုင်းဆွဲခံရပြီးနောက် ထီးလင်း – ဂန့်ဂေါလမ်းမကြီးအတိုင်း ဂန့်ဂေါဘက်ကို ဦးတည်ဆက်သွားနေတယ်လို့ သူကဆက်ပြောပါတယ်။

မတ်လ ၁၅ ရက်နဲ့ မတ်လ ၁၆ ရက်တွေမှာလည်း ပခုက္ကူမြို့နယ်ကနေ ထီးလင်းမြို့နယ်ထဲ လူ၊ လက်နက်၊ ခဲယမ်းတွေ တင်ဆောင်လာတဲ့ တပ်မ ၇၇ စစ်ကောင်စီယာဉ်တန်း ၃၂ စီးကို ထီးလင်းမြို့နယ်အတွင်းမှာ ၅ ကြိမ်တိုက်ခိုက်ခဲ့ရာ စစ်ကောင်စီတပ်ဖွဲ့ဝင် အများအပြားထိခိုက်သေဆုံးတယ်လို့ ဒေသကာကွယ်ရေးတပ်ဖွဲ့ဝင်တွေက ပြောပါတယ်။