စစ်ကိုင်း

ကန့်ဘလူ၊ မတ် ၁၂၊ ၂၀၂၃။

စစ်ကိုင်းတိုင်းဒေသကြီး၊ ကန့်ဘလူမြို့နယ်၊ နဂါးပေါ်ကျေးရွာက အုပ်ချုပ်ရေးမှူးအပါအဝင် ပျူစောထီး ၂ ဦး စုစုပေါင်း ၃ ဦး ပစ်ခတ်ရှင်းလင်းခံရတယ်လို့ သိရပါတယ်။

မတ်လ ၁၀ ရက်နေ့ည ၉ နာရီကျော်ခန့်မှာ နဂါးပေါ်ရွာနေ ပျူစောထီး ထွန်းညွှန့် (၃၂ နှစ်) နဲ့အတူ နေအိမ်မှာရှိနေတဲ့ ပျူစောထီး ဦးအုန်းကြိုင် (၅၂ နှစ်) နဲ့ အုပ်ကြီး ဇော်အောင် (၅၀ နှစ်) ကို ဝင်ရောက်ပစ်ခတ်ရှင်းလင်းခဲ့တာ ဖြစ်တယ်လို့ ကန့်ဘလူ ပကဖ အဖွဲ့ဝင်တဦးက ပြောပါတယ်။

“သွားရှင်းတုန်းကတော့ ထွန်းညွန့်နဲ့ အုန်းကြိုင်ကို ဝင်ရှင်းတာ။ ဖြစ်ချင်တော့ အုပ်ကြီးကလည်း ရှိနေတာ။ အုပ်ကြီးက ရွာကိုတော့ နည်းနည်းငဲ့တယ်။ ပျူရွာဖွဲ့ခိုင်းတာကို သူက မလုပ်တာ။ ၃ ယောက်စလုံးက သေနတ်ကိုင်တာ။ သူက စကစခန့်အုပ်ကြီးဆိုတော့ ပါသွားတာပေါ့” လို့ ပြောပါတယ်။

ပစ်ခတ်ရှင်းလင်းချိန်မှာ အုန်းကြိုင် ဆိုသူဟာ ထွက်ပြေးတာကြောင့် ကျေးရွာသုသာန်အနီးမှာ ထပ်မံပစ်ခတ်ရှင်းလင်းလိုက်ရတယ်လို့ ဆိုပါတယ်။

သေနတ်နဲ့ ပစ်ခတ်ရှင်းလင်းခံရလို့ ထွန်းညွန့်နဲ့ အုပ်ကြီးဇော်အောင်ဟာ ထွန်းညွန့်နေအိမ်မှာ သေဆုံးသွားပြီး အုန်းကြိုင်ဆိုသူကတော့ ရွာသုသာန်နားမှာ သေဆုံးသွားတယ်လို့ သိရပါတယ်။

အုပ်ချုပ်ရေးနဲ့အဖွဲ့ ရှင်းခံရပြီးနောက် မတ်လ ၁၁ ရက်နေ့မနက်မှာ စစ်ကောင်စီတပ်ဖွဲ့ဟာ ကျေးရွာထဲကို ရောက်လာပြီး ဒေသခံတွေကို စစ်ဆေးမေးမြန်းတာ PDF မိသားစုဝင်တွေလို့ ထင်တဲ့ ပြည်သူတွေကို စာရင်းမှတ်သွားတယ်လို့ သိရပါတယ်။

၂၀၂၂ ခုနှစ် စက်တင်ဘာလ ၅ ရက်နေ့ကလည်း ကန့်ဘလူမြို့နယ်၊ အင်ကြင်းစုကျေးရွာက စစ်ကောင်စီခန့်အုပ်ချုပ်ရေးမှူး ဦးကြည်လွင်နဲ့ သတင်းပေး ခင်မောင်သိန်းဆိုသူဟာလည်း ရှင်းလင်းခံရလို့ သေဆုံးခဲ့သေးတယ်လို့ သိရပါတယ်။

မြောင်၊ မတ် ၁၁၊ ၂၀၂၃။

စစ်ကိုင်းတိုင်း၊ မြောင်မြို့နယ်၊ ကင်းကျေးရွာထဲကို စစ်ကောင်စီတပ်သားတွေက မတ်လ ၁၁ ရက် ဒီမနက် ၆ နာရီလောက်မှာ ဝင်ရောက်လာကာ အမျိုးသားတဦးကို သေနတ်နဲ့ ပစ်သတ်သွားတဲ့အပြင် ရွာထဲက ပစ္စည်းတွေကိုလည်း ယူသွားခဲ့တယ်လို့ သိရပါတယ်။

ကျောက်ရစ်ရွာစခန်းက ထွက်လာတဲ့ အင်အား ၄၀ ဝန်းကျင်ပါ စစ်သားတွေဟာ ကင်းကျေးရွာထဲကို ဝင်ရောက်ချိန် အထက်ပါအမျိုးသားနဲ့ ထိပ်တိုက်တွေ့ပြီး ပစ်သတ်ခဲ့တာလို့ Myaung Union Army-003 အဖွဲ့မှ တာဝန်ရှိသူတဦးက ပြောပါတယ်။

“အင်အားကတော့ ၄၀ လောက်ပါတယ်။ ရွာထဲကို သေနတ်တွေ ပစ်ဖောက်ပြီးဝင်လာတာ။ အဲ့မှာ ပြည်သူတဦးက သူတို့နဲ့ ထိပ်တိုက်တွေ့လိုက်တော့ ပြေးတာပေါ့။ အဲ့မှာ လှမ်းပစ်လိုက်တာ ကျသွားတယ်။ သူတို့ဘက်ကလည်း ထွက်လာတုန်းက ၄၀ (အင်အား)၊ ပြန်ဝင်တော့ ၄၀ လုံး မဝင်နိုင်ဘူး” လို့ ပြောပါတယ်။

သေဆုံးသူဟာ မကွေးမြို့ကနေ ကင်းရွာမှာ အခြေချနေထိုင်နေတဲ့သူလို့သာ သိရပြီး၊ သူနဲ့ပတ်သက်တဲ့ အသေးစိတ်အချက်အလက်ကိုတော့ မသိရှိရသေးပေမယ့် အလောင်းကိုတော့ စစ်ကောင်စီတပ်တွေက ပစ်တဲ့နေရာမှာပဲ ထားခဲ့တယ်လို့ ဆိုပါတယ်။

အဲ့ဒီနောက် ရွာထဲက ပစ္စည်းတွေကိုပါ ယူလာတဲ့ အဆိုပါစစ်သားတွေကို မနက် ၇ နာရီလောက်မှာ ကျေးရွာ Local တပ်ပေါင်းစုတွေနဲ့ နယ်မြေခံတပ်ရင်းတပ်ဖွဲ့တွေက ကျောက်ရစ်စခန်းကို ပြန်တဲ့လမ်းပိုင်းမှာ မိုင်းဆွဲတိုက်ခိုက်ခဲ့ရာ စစ်သား ၃ ဦး ဒဏ်ရာရခဲ့တယ်လို့ Myaung Union Army-003 အဖွဲ့မှ တာဝန်ရှိသူတဦးက ပြောပါတယ်။

ကျောက်ရစ်စခန်းက စစ်သားတွေဟာ နယ်မြေစိုးမိုးမှုရဖို့အတွက် မကြာခဏဆိုသလို အနီးနားကျေးရွာတွေကို စစ်ကြောင်းထိုးကာ ဝင်ရောက်ဖျက်ဆီးလေ့ရှိသလို ကာကွယ်ရေးအဖွဲ့တွေက လက်နက်ကြီး၊ လက်နက်ငယ်တွေ အဲ့ဒီစခန်းကို တိုက်ခိုက်လေ့ရှိတယ်လို့ သိရပါတယ်။

စစ်ကိုင်း၊ မတ် ၁၁၊ ၂၀၂၃။

စစ်ကိုင်းတိုင်း၊ စစ်ကိုင်းမြို့နယ်မှာ PDF တွေကို မထောက်ပံ့ဖို့ ပြောဆိုတဲ့ ပျူစောထီးသင်တန်းဆင်းလို့ လူသိများသူ တဦးကို မတ်လ ၁၁ ရက် ဒီမနက်မှာ ရှင်းလင်းခဲ့တယ်လို့ Truth Keeping Force – AMA အဖွဲ့က သတင်းထုတ်ပြန်ထားပါတယ်။

စစ်ကိုင်းမြို့နယ်၊ ကျောက်ဆည်အုပ်စု၊ ကျောက်ဆည်ရွာက အသက် ၅၀ နှစ်အရွယ် ကိုရဲလင်း ဆိုသူဖြစ်ပြီး၊ ဒီမနက် ၆ နာရီလောက်မှာ ပစ္စတိုနဲ့ ၇ ချက် ပစ်ခတ်ရှင်းလင်းခဲ့တာလို့ ဆိုပါတယ်။

“သူက မနက်တိုင်းလမ်းလျှောက်နေကျ။ ဒီနေ့လည်း သူ့အိမ်နားက ဘောလုံးကွင်းမှာ တဦးထဲ လမ်းလျှောက်နေတာကို ရှင်းလင်းခဲ့တာပါ။ ပစ်မှတ်ဖြစ်တဲ့ သူ့ကိုပဲ ပစ်ခဲ့သလို နေရာမှာတင် ပွဲချင်းပြီး သေသွားပါတယ်” လို့ Truth Keeping Force – AMA ရဲ့ သတင်းပြန်ကြားရေးအဖွဲ့ဝင်တဦးက ပြောပါတယ်။

ကိုရဲလင်းဟာ စစ်ကောင်စီကို သတင်းပေးတာ၊ ဆပ်ကြေးကောက်တာ၊ PDF ကိုမထောက်ပံ့ဖို့ ကျေးရွာသားတွေကို ခြိမ်းခြောက်ပြောဆိုတာတွေ ရှိတယ်လို့ သူကဆက်ပြောပါတယ်။

ပြီးခဲ့တဲ့ ဖေဖေါ်ဝါရီလ ၂၀ ရက်ကလည်း Truth Keeping Force – AMA အဖွဲ့ဟာ Kyaukse Apostle Force အဖွဲ့နဲ့ ပူးပေါင်းပြီး မန္တလေးတိုင်း၊ တံတားဦးမြို့နယ်က အမှတ် ၆ ရပ်ကွက် အုပ်ချုပ်ရေးမှူး ကိုအောင်ဆန်းဝင်းနဲ့ အကိုဖြစ်သူ ကိုဘပြုံးတို့ကို ပစ်ခတ်ရှင်းလင်းခဲ့ပါသေးတယ်။

စစ်ကိုင်း၊ မတ် ၁၀၊ ၂၀၂၃။

စစ်ကိုင်းတိုင်းထဲက တောင်သူအများစုဟာ စစ်ကောင်စီရဲ့စစ်ကြောင်းထိုး မီးရှို့ဖျက်ဆီးတာတွေကြောင့် ပိုင်ဆိုင်မှုတွေ မီးထဲပါသွားခဲ့ပြီး နွေစပါးစိုက်ပျိုးဖို့အတွက် ငွေကြေးမတတ်နိုင်ကြတော့ဘဲ လယ်ယာတွေပေါင်ပြီး စိုက်ပျိုးဖို့ အရင်းနှီးရှာနေရတယ်လို့ သိရပါတယ်။

စပါးရောင်းချချိန်တုန်းကတော့ ၁ တင်းကို ၉ ထောင်နဲ့ရောင်းခဲ့ရပြီး အခုမျိုးစပါးပြန်ဝယ်ယူချိန်မှာတော့ ၁ တင်းကို ၂ သောင်းကျော်နဲ့ ဝယ်နေရကာ၊ မီးရှို့ခံထားရတဲ့ အိမ်တွေပြန်ဆောက်ဖို့ ကုန်ကျစရိတ်တွေလည်း ရှိနေသေးတာကြောင့် အရင်းနှီးစိုက်ထုတ်ဖို့ မလုပ်နိုင်ဖြစ်နေတယ်လို့ ဆိုပါတယ်။

“ကျနော်လည်း လေးဧကပေါင်ထားရတာ။ ရှိတဲ့လယ်လေးကို ပေါင်နှံပြီး နွေလယ်လေးလုပ်ဖို့ ဖြစ်သလို ရုန်းကန်ရတာပေါ့။ မိသားစုကလည်း များတယ်။ လုပ်ကိုင်နိုင်တာလည်း ကျတော်ပဲ ရှိတာဆိုတော့၊ ကြဲပဲ ကြဲနိုင်တော့တယ်။ စပါးက စိုက်သာစိုက်တာ သေချာပေါက်ရိတ်ရမယ် မပြောနိုင်ဘူးလေ။ ကိုယ်စိုက်တဲ့စပါးက ကံသင့်မှစားရမှာကို၊ ကိုယ့်အသက်ကိုယ်တောင် ဘယ်ချိန်သေမလဲဆိုတာ ရင်လေးနေရတာ။” လို့ လယ်ပေါင်ပြီး နွေစပါးစိုက်နေရတဲ့ တောင်သူတဦးက ပြောပါတယ်။

လယ်မြေ အပေါင်လက်ခံတဲ့သူဆီကနေ ၁ ဧကကို ၂၅ သိန်းလောက် ထုတ်ယူနိုင်ပြီး စပါးပေါ်ချိန်ရောက်ရင်တော့ စပါးတင်း ၃၀ ပေးရမယ်ဆိုတဲ့ သဘောတူညီချက်နဲ့ အတိုးမဲ့ချေးငွေတွေ ထုတ်ယူရပြီး၊ စိုက်ပျိုးချိန်မှာလည်း စရိတ်သက်သာအောင် စပါးကိုမစိုက်တော့ဘဲ ကျဲချထားကာ စိုက်တာလောက် ဖြစ်ထွန်းမှု မသေချာပေမယ့် စိုက်ပျိုးစရိတ်က
ကောက်စိုက်သမငှားခ၊ စက်သုံးဆီခ၊ စက်ခုတ်ခတွေနဲ့တင် ၁ ဧကကို ၃ သိန်းလောက် ကုန်ကျနေတဲ့အတွက် ကြံဖန်ပြီးလုပ်ကြရတယ်လို့ ဆိုပါတယ်။

တချို့ တောင်သူတွေကတော့ ရှိတဲ့လယ်လေးကို အပြတ်ရောင်းလိုက်ရတဲ့အတွက် လယ်ပိုင်တဲ့ တောင်သူဘဝကနေ အငှားလိုက်ရတဲ့ဘဝ ရောက်သွားကြပြီး စီးပွားရေး ပြန်လည် ဦးမမော့နိုင်တဲ့ တောင်သူတွေလည်း ရှိနေတယ်လို့ သိရပါတယ်။

“ကျတော်တို့ပတ်ဝန်းကျင်မှာကို ၄ ဦးလောက် ရှိတယ်။ ထွန်စက်လည်း မီးထဲပါ၊ အိမ်လည်းပါ။ သူတို့ရှိတာမှ လယ်က ၁ ဧက၊ ၂ ဧကလောက်ပဲ ရှိတာ။ စားရအောင်လည်း ရှာရတယ်။ အိမ်နေဖို့ရာလည်း လုပ်ရတယ်။ ပိုက်ဆံက အတိုးနဲ့ယူရင်လည်း တဖြည်းဖြည်းနဲ့ဆုံးမှာဆိုတော့ ရှိတာလေး ရောင်းချပြီး အိမ်လေးပြင်ဆောက်ပေါ့။ စောစောကတော့ တောင်သူပေမယ့် ခုကျ လက်လုပ်လက်စား ပြန်ဖြစ်သွားတာပေါ့။” လို့ တောင်သူတဦးက ပြောပါတယ်။

တောင်သူတွေဖြစ်တဲ့အတွက် နွေစပါးရာသီ ရောက်လာလို့သာ စပါးပြန်စိုက်ပျိုးကြရပေမယ့် စစ်ကြောင်းထပ်ရောက်လာပြီး မီးရှို့ဖျက်ဆီးမှာ ကြောက်နေရတယ်လို့လည်း ဆိုကြပါတယ်။

ရွာတွေကို စစ်ကြောင်းခဏခဏထိုးကာ မီးရှို့ဖျက်ဆီးခံနေရတာတွေကြောင့် တချို့တောင်သူ မိသားစုတွေကတော့ ရွာမှာ ဆက်နေချင်စိတ်မရှိတော့ဘဲ မိသားစုလိုက် ရွာကထွက်သွားကြတာတွေလည်း ရှိနေတယ်လို့ သိရပါတယ်။

စာတည်း – 007