စစ်ကိုင်း

စစ်ကိုင်း၊ ဇန်နဝါရီ ၂၆၊ ၂၀၂၃။

စစ်ကိုင်းတိုင်း၊ အင်းတော်မြို့နယ်၊ အောင်မင်္ဂလာရပ်ကွက်မှာရှိတဲ့ ဒေါ်သစ်ဆုံစားသောက်ဆိုင်က ပိုင်ရှင်လင်မယားကို PDF တွေနဲ့ ဆက်နွယ်နေတယ်ဆိုပြီး စစ်ကောင်စီက လာရောက်ဖမ်းဆီးသွားတယ်လို့ ဆိုပါတယ်။

ဇန်နဝါရီလ ၂‌၄ ရက်နေ့ မနက် ၉ နာရီလောက်က ဒေါ်သစ်ဆုံစားသောက်ဆိုင်မှာ ထမင်းဝယ်နေတဲ့ ဒလန်တဦးကို လက်နက်ကိုင်အဖွဲ့အစည်းတခုက ဝင်ရောက်ဖမ်းဆီးပြီး ခဏအကြာစစ်ကောင်စီဘက်ကရောက်လာကာ ဆိုင်ရှင်လင်မယားကို ဖမ်းသွားတာဖြစ်တယ်လို့ ဆိုပါတယ်။

“သူက(ဒလန်) မြို့နယ်မှူးအတွက် ထမင်းဝယ်ပြီးထမင်းဆိုင်ကအထွက်ကို လက်နက်ကိုင်အဖွဲ့စည်းကဖမ်းတာ၊ အဲ့နောက်မှာ စစ်ကောင်စီလက်အောက်ခံ ရဲတပ်ဖွဲ့တွေက ဆိုင်ကိုလာသောင်းကျန်းပြီး အဲ့ဆိုင်က လင်မယားကိုဖမ်းသွားတာ။” လို့ မျက်မြင်တွေ့ခဲ့တဲ့ ပြည်သူတဦးက ပြောပါတယ်။

အခုလက်ရှိ ဒေါ်သစ်ဆုံစားသောက်ဆိုင်ပိုင်ရှင် ဦးမြဝင်းနဲ့ ဇနီးဖြစ်သူ ဒေါ်သစ်ဆုံတို့ကို အင်းတော်ရဲစခန်းထဲမှာဖမ်းထားကာ PDF နဲ့ဆက်နွယ်တယ်ဆိုပြီး စွဲချက်တင်ဖို့လုပ်နေတယ်လို့ သိရပါတယ်။

ပြီးခဲ့တဲ့ ဇန်နဝါရီလ ၂၃ ရက်နေ့ မနက် ၇ နာရီလောက်ကလည်း အောင်မေတ္တာရပ်ကွက်မှာရှိတဲ့ သားချောစာရေးကိရိယာဆိုင်ပိုင်ရှင် ဦးချစ်ကိုကို(ခ)ဦးဖိုးစီကို NUG စာသင်ကျောင်းတွေကို စာရေးကိရိယာတွေလှူတန်းတယ်ဆိုပြီး ဖမ်းဆီးခဲ့ပါသေးတယ်။

စစ်ကိုင်း၊ ဇန်နဝါရီ ၂၅၊ ၂၀၂၃။

စစ်ကိုင်းတိုင်း၊ မုံရွာမြို့နယ်၊ ညောင်ကိုင်းရပ်ရှိ ခရိုင်လဝကရုံး မီးရှို့ခံလိုက်ရတာကြောင့် ပျက်စီးမှုရှိခဲ့တယ်လို့ သိရပါတယ်။

ဇန်နဝါရီလ ၂၄ ရက်မနေ့ကမနက် ၇ နာရီဝန်းကျင်မှာ ညောင်ကိုင်းရပ်၊ အမြင့်လမ်းခွဲရှိ ခရိုင် လဝကရုံးကို လူတစုက မီးရှို့ခဲ့တာလို့ ဒေသခံတဦးကပြောပါတယ်။

“မနက်ပိုင်းလောက်မှာ မီးရှို့ခံရတာ။ ပထမက ကညနရုံးဆိုပြီးကြားတာ။ မီးသတ်ကားတွေလည်း သွားတာ တွေ့ရတယ်။ နောက်မှ ခရိုင်လဝကရုံး မီးရှို့ခံရတယ်လို့ သိရတယ်။ ရုံးတခုလုံးတော့ မကုန်သွားဘူး”လို့ ပြောပါတယ်။

လဝကရုံး မီးရှို့ခံရလို့ မီးသတ်တပ်ဖွဲ့က မီးသတ်ယာဥ်၊ ရေသယ်ယာဥ်တွေအသုံးပြု မီးငြိမ်းသတ်ခဲ့ရပြီး မနက် ၉ နာရီကျော်မှ မီးငြိမ်းခဲ့တယ်လို့ သိရပါတယ်။

“လဝကရုံး မီးရှို့ခံရတာ ဟုတယ်။ ဘယ်အဖွဲ့ကလုပ်လဲဆိုတာ ထုတ်ပြန်ထားတာမရှိသေးဘူး။ ကညနရုံး ဒရုန်းနဲ့ပစ်တာနဲ့ လဝကရုံးမီးရှို့တာက တဖွဲ့တည်းဖြစ်နိုင်တယ်။ ဘာကြောင့်မထုတ်ပြန်သေးတယ်ဆိုတာတော့ မသိရသေးဘူး။ လုပ်တဲ့အဖွဲ့က လုံခြုံတဲ့နေရာရောက်ရင် ထုတ်ပြန်ပါလိမ့်မယ်”လို့ ဒေသကာကွယ်ရေးအဖွဲ့ဝင်တဦးက ပြောပါတယ်။

မီးရှို့ခံရလို့ ခရိုင်လဝကရုံးအပေါ်ထပ်က စာရွက်စာတမ်းတွေနဲ့ ကြမ်းခင်းမီးလောင်ပျက်စီးသွားပြီး ရုံးတခုလုံး မကုန်သွားဘူးလို့ ဆိုပါတယ်။

စစ်ကောင်စီက အများပြည်သူလက်မခံတဲ့ ရွေးကောက်ပွဲလုပ်ဖို့ အိမ်ထောင်စုစာရင်းတွေကောက်ယူနေတဲ့အတွက် စစ်ကောင်စီကပြုလုပ်မယ့် ရွေးကောက်ပွဲကို အလိုမရှိတာကြောင့် မှတ်တမ်းတွေကို မုံရွာ UG အဖွဲ့ ၅ ခုလောက်က ပူးပေါင်းလုပ်ဆောင်ခဲ့တာလို့သိရပြီး အဖွဲ့နာမည်တွေကိုတော့ လုံခြုံရေးအရ ထုတ်ဖော်ပြောဆိုခြင်းမရှိခဲ့ပါဘူး၊

ဇန်နဝါရီလ ၂၃ ရက်နေ့လည်ပိုင်းကလည်း မုံရွာမြို့က စစ်ကောင်စီလက်အောက်ခံ ကညနရုံး ဒရုန်းနဲ့တိုက်ခိုက်ခံရပြီး ဝန်ထမ်းတဦး ထိခိုက်ဒဏ်ရာရသွားခဲ့ပါသေးတယ်။

စစ်ကိုင်း၊ ဇန်နဝါရီ ၂၅၊ ၂၀၂၃။

စစ်ကိုင်းတိုင်း၊ ဝက်လက်မြို့နယ်၊ ပင်းဇင်းကျေးရွာကို စစ်ကောင်စီတပ်သားတွေက ဇန်နဝါရီ၂၄ ရက် မနေ့က မနက်ပိုင်းအချိန်ကနေ ညအချိန်အထိ မီးရှို့တဲ့အပြင် လူငယ်၃ဦးကိုပါ သတ်သွားခဲ့တယ်လို့ သိရပါတယ်။

စစ်ကောင်စီတပ်သားတွေ မီးရှို့ခဲ့တာကြောင့် အိမ်ခြေ၇၀၀ခန့်ရှိတဲ့ ပင်းဇင်းကျေးရွာမှာ နေအိမ်၆၀၀ခန့်ပြာကျ ပျက်စီးသွားခဲ့သလို အသတ်ခံလိုက်ရတဲ့ လူငယ်၃ဦးရဲ့ကိုယ်ရေးအကျဥ်းကို မသိရှိရသေးဘူးလို့ မြေပြင်ကင်းထောက်တဦးက ပြောပါတယ်။

“စကစတွေက ကောက်ရိုးနဲ့ ဓာတ်ဆီနဲ့လောင်းပြီးတော့ ရှို့တာ။ မနက်ကတည်းကနေ ညလုံး ပေါက်ရှို့တာ။ စကစတွေက ရွာထဲမှာညအိပ်ပြီးတော့ မနက်အချိန်မှထွက်သွားတယ်။လူငယ် သုံးယောက်ကိုလည်း မီးရှို့ထားတဲ့အလောင်းပဲ တွေ့ရတယ်။ဒီလူငယ်တွေက ဘယ်လိုအသတ်ခံလိုက်ရတယ်ဆိုတာတော့ မသိရဘူး”လို့ ဆိုပါတယ်။

ဒါ့အပြင် စစ်ကောင်စီတပ်သားတွေက ပင်းဇင်း ကျေးရွာကနေ မနက်ပိုင်းအချိန်ထွက်သွားပြီး မူးကြီးကျေးရွာကို မီးထပ်ရှို့နေတယ်လို့ဆိုပါတယ်။

“မူးကြီးရွာကို မီးရှို့တဲ့အချိန်မှာဘဲ PDFတွေနဲ့ တိုက်ပွဲဖြစ်နေကြတယ်။ အခုအချိန်မှာတော့ တိုက်ပွဲကငြိမ်သွားပြီ။ အခုလည်း စစ်ကြောင်းက မထွက်သေးဘူး”လို့ ကင်းထောက်ကပဲ ဆက်ပြောပါတယ်။

အလားတူ အဲ့ဒီ စစ်ကြောင်းမှာ ဇန်နဝါရီ၂၃ ရက်ကလည်း မကျီးတုံကျေးရွာကို မီးရှို့ဖျက်စီးခဲ့ပြီး ဒီစစ်ကြောင်းဟာ အင်အား၁၀၀ခန့်ရှိပြီး ရွှေဘိုမြို့နယ်ဘက်က ရောက်ရှိလာခဲ့တာဖြစ် တယ်လို့သိရပါတယ်။

စစ်ကောင်စီက အခုလို တရွာဝင်တရွာထွက်မီးရှို့နေတာကြောင့် မူးကြီး၊ ဝက်လက်၊ မကျီးတုံ၊ပင်းဇင်း၊ လှတော၊ ရွှေကျင်၊ ကျီးကံ၊ ရေထွက် ၊ဥယျာဥ်မစတဲ့ကျေးရွာတွေက ဒေသခံတွေအကုန်လုံး ထွက်ပြေးတိမ်းရှောင်နေကြရတယ်လို့သိရပါတယ်။

စစ်ကိုင်း၊ ဇန်နဝါရီ ၂၅၊ ၂၀၂၃။

စစ်ကိုင်းတိုင်း၊ ကန့်ဘလူနယ်အခြေစိုက် ကန့်ဘလူ လင်းယုန်နီအဖွဲ့ဟာ တနှစ်ကျော်ကြာသည်အထိ လက်လုပ်သေနတ်တွေနဲ့သာ စစ်ကောင်စီတပ်တွေကိုတိုက်ခိုက်နေရတယ်လို့ တပ်ဖွဲ့တာဝန်ရှိသူက ပြောပါတယ်။

ပြီးခဲ့တဲ့နှစ်နိုဝင်ဘာလ ၆ ရက်မှာ ကန့်ဘလူမြို့နယ်၊ လွှဲဆိပ်ကျေးရွာက မိုင်တဲတာဝါတိုင်ကို မိုင်းဆွဲတိုက်ခိုက်ခဲ့တာနဲ့ စတင်ခဲ့တာလို့သိရပါတယ်။

“ဆန္ဒပြပွဲတွေ ရပ်နားပြီးကတည်းက လက်နက်ကိုင်တော်လှန်ရေးကို စတင်ခဲ့တာပါ။ အခုအချိန်အထိတော့ လက်လုပ်တတောင့်ထိုး၊ လက်နက်ကြီးမိုင်းတွေနဲ့သာ တိုက်ပွဲဝင်ခဲ့တာပါ။ မောင်းပြန်အစစ်သာရရင်တော့ ဒီထက်ပိုပြီး တိုက်ပွဲတွေဖော်ဆောင်နိုင်မှာဖြစ်တယ်လို့” လင်းယုန်နီကန့်ဘလူအဖွဲ့မှ ဗိုလ်လင်းယုန်ကပြောပါတယ်။

ပြည်သူလူထုရဲ့လှူဒါန်းမှုနဲ့ ရပ်တည်လာတာဖြစ်ပြီး၊ ဒီထက်ပိုပြီး အဖွဲ့အစည်းတခုခုက အကူအညီရပါက စစ်ဆင်ရေးတွေကို ပိုပြီးလုပ်နိုင်မှာဖြစ်တယ်လို့ သူကဆက်ပြောပါတယ်။

သူတို့အဖွဲ့ဟာ လက်နက်တွေမိုင်းတွေကို ကိုယ်တိုင်ထုတ်လုပ်ခဲ့တာဖြစ်ပြီး အဓိကအားဖြင့်မိုင်းတွေနဲ့သာ တိုက်ပွဲဖော်ဆောင်နေတာလို့ သိရပါတယ်။
ဒါ့အပြင် စတင်ဖွဲ့စည်းချိန်ကတည်းက အခုအချိန်ထိ ဆယ်နဲ့ချီတဲ့စစ်ဆင်ရေးတွေကိုလုပ်ခဲ့ပြီး၊ အခုနှစ်ဇန်နဝါရီလ ၁ ရက်ကနေ ၂၃ ရက်အတွင်းမှာလည်း စစ်တပ်ကြံစိုက်ခင်း ကွင်းအမှတ် − ၉ က စစ်ဆေးရေးဂိတ်နဲ့ ကန့်ဘလူမြို့နယ်က ပျူစောထီးအများစုနေထိုင်တဲ့ ယောရွာ၊ ငါတို့ရွာ၊ ဇာဒီရွာ၊ ချောင်းကန်ရွာ၊ နတ်အင်းရွာ၊ ညောင်းကိုင်းရွာ၊ စပါယ်နံ့သာရွာနဲ့ ညောင်ဇင်လေးရွာတို့ကို စုစုပေါင်း ၁၀ ကြိမ်တိုက်ခိုက်ခဲ့တယ်လို့ သိရပါတယ်။

စစ်ကိုင်း၊ ဇန်နဝါရီ ၂၄၊ ၂၀၂၃။

စစ်ကိုင်းတိုင်း၊ ယင်းမာပင်မြို့နယ်က ကျေးရွာ ၅ ရွာကို စစ်ကောင်စီတပ်သားတွေက ဇန်နဝါရီလ ၂၃ ရက်မနေ့ကနေ့လယ်ပိုင်းမှာ ဆက်တိုက်မီးရှို့ခဲ့တဲ့အပြင် ရွာသားတဦးကိုလည်း သတ်သွားတယ်လို့ သိရပါတယ်။

ကျောက်မှော်ရွာ၊ ကျောက်ကုန်းရွာ၊ အင်းဖက်ရွာ၊ ကြက်လျှာနဲ့ ပန်းတိမ်ပြင်ရွာတွေက နေအိမ်တွေကို မီးရှို့ခဲ့တာဖြစ်ပြီး သံပရာပင်ရိုးတဲတိုက်က အသက် ၃၀ နှစ်အရွယ် ကိုနေထွန်းဆိုသူကိုပါ သတ်ပြီး ဦးခေါင်းနဲ့လက်တဖက်ကို ဖြတ်သွားတယ်လို့ ယင်းမာပင်မြောက်ခြမ်းသပိတ်အင်အားစုမှ တာဝန်ရှိသူတဦးက ပြောပါတယ်။

“ကိုနေထွန်းကို ဇန်နဝါရီ ၂၃ ရက်မနေ့က သတ်သွားတာပါ။ အလောင်းကိုတော့ အင်ဖျားရွာမှာ တွေ့တာ။ ဒီနေ့ပဲ သဂြိုဟ်ပြီးပါပြီ။ မီးလောင်တဲ့အိမ်ခြေစာရင်းတော့ မသိရသေးဘူး။ ရွာသားတွေလည်း ရွာထဲအကုန်မဝင်ကြသေးဘူး” လို့ ပြောပါတယ်။

ဒါ့အပြင် အင်းဖျားရွာက အမျိုးသား ၂ ဦးနဲ့ စုန်းချောင်းရွာက အမျိုးသား ၂ ဦးကိုလည်း ဖမ်းဆီး ခေါ်ဆောင်သွားတယ်လို့ သူကဆက်ပြောပါတယ်။

အဲဒီစစ်အုပ်စုဟာ ဇန်နဝါရီလ ၁၉ ရက်ကတည်းက ချင်းတွင်းမြစ်ကြောင်းတလျှောက်စုန်ဆင်းလာကာ ကျောက်မှော်ရွာမှာ ၄ ရက်ကြာ တပ်စွဲခဲ့တာဖြစ်ပြီး၊ လက်ရှိမှာ စစ်ကြောင်းဘယ်ကို ဦးတည်နေတယ်ဆိုတာ မသိရှိရသေးပဲ မြစ်ကမ်းဘေးတလျောက်မှာရှိတဲ့ သံဘို၊ ကျောက်မှော်နဲ့ စေသူရွာ ဒေသခံတွေကတော့ ပုန်းရှောင်နေကြရတယ်လို့ သိရပါတယ်။

စစ်ကိုင်း၊ ဇန်နဝါရီ ၂၄၊ ၂၀၂၃။

စစ်ကိုင်းတိုင်း၊ ယင်းမာပင်မြို့နယ်၊ ဘန့်ဘွေးရွာမှာ အထိုင်ချနေတဲ့ စစ်အုပ်စုရဲ့ ဖမ်းဆီးခံရသူ ၂ ဦးဟာ ယနေ့ ဇန်နဝါရီလ ၂၄ ရက်အထိမိသားစုနဲ့ အဆက်အသွယ်ပြတ်တောက်နေတယ်လို့ ဒေသခံတဦးက ပြောပါတယ်။

ပြီးခဲ့တဲ့ ဇန်နဝါရီလ ၁၇ ရက်ကဖမ်းဆီးခံရတဲ့ ဘန့်ဘွေးရွာသားအသက် ၂၅ နှစ်အရွယ်ကိုခင်မောင်ဌေးနဲ့ တူဖြစ်သူအသက် ၁၆ နှစ်အရွယ်မောင်နိုင်လင်းအောင်တို့ ၂ ဦးဖြစ်တယ်လို့ ဆိုပါတယ်။

“သူတို့နှစ်ဦးက ဘာအဆက်အသွယ်မှမရဘူး စုံစမ်းလို့လည်းမရဘူး၊ မရှိလောက်တော့ဘူးလို့တော့ထင်တယ်။ သူတို့နဲ့အတူအဖမ်းခံရတဲ့သူတွေကတော့ တချို့ရိုက်နှက်ခံရ ဖုန်းတွေသိမ်းတာလုပ်ပြီး အဲဒီနေ့ပဲပြန်လွှတ်ပေးလိုက်တယ်” လို့ ဘန့်ဘွေးရွာသားတဦးက ပြောပါတယ်။

သူတို့နှစ်ဦးဟာဘန့်ဘွေးရွာကို ကွင်းရှောင်ဖောက်ထားတဲ့လမ်းမှာ အခြားခရီးသွားပြည်သူ ၃၀ ဦးခန့်နဲ့အတူဖမ်းဆီးခံခဲ့ရတာလို့ သိရပါတယ်။

ဘန့်ဘွေးရွာဟာ အိမ်ခြေ ၃၅၀ ခန့်ရှိပြီး ပြီးခဲ့တဲ့နှစ် ဇွန်လကတည်းက စစ်တပ်ကအင်အား ၈၀ လောက်နဲ့တပ်ဝင်စွဲကာ နေအိမ် ၂၀ လုံးကိုဝင်ရောက်မီးရိူ့ပြီး အသက်၂၀အရွယ် မမာကြည်ဆိုသူအမျိုးသမီးတဦးကို ပစ်သတ်ပြီးချိန်ကစလို့ စစ်တပ်နဲ့ပူးပေါင်းတဲ့အိမ်ခြေ ၁၀ ကျော်ကလွဲပြီး ကျန်အိမ်ထောင်စု ၃၄၀ ကပြည်သူ ၁၅၀၀ လောက်ဟာ တောစပ်တွေမှာ သွားရောက်နေထိုင်နေကြရတာပါ။

ဘန့်ဘွေးကျေးရွာအတွင်း စစ်တပ်ကဝင်ရောက်တပ်စွဲထားတဲ့ တနှစ်ခွဲတာကာလအတွင်း ခုခံတိုက်ပွဲဝင်ရင်း အသက် ၂၅ နှစ်အရွယ် ပကဖအဖွဲ့ဝင်ကျေးရွာသား ၃ ဦးလည်း ကျဆုံးခဲ့သေးတယ်လို့ ဝင်္ကပါပြောက်ကျားတပ်ဖွဲ့ခေါင်းဆောင်တဦးဆီက သိရပါတယ်။

စစ်ကိုင်း၊ ဇန်နဝါရီ ၂၄၊ ၂၀၂၃။

စစ်ကိုင်းတိုင်း၊ ဆာလင်းကြီးမြို့နယ်အတွင်းက စစ်ကောင်စီတပ်တွေမီးရှို့ခဲ့တဲ့ကျေးရွာ ၃ ရွာကဒေသခံတွေကို ဇန်နဝါရီလ ၂၃ ရက်မနေ့ကညနေပိုင်းမှာ မီးဖိုဆောင်သုံးပစ္စည်းတွေနဲ့အဝတ်အထည်တွေလှူဒါန်းခဲ့တယ်လို့ သိရပါတယ်။

အညာပစ်တိုင်းထောင်လေးများအဖွဲ့၊ ဓားမဆိုင်းဗိုလ်စွမ်းနဲ့ Dhamma Worker Group Singapore) တို့ပူးပေါင်းကာ မီးဘေးသင့်နေအိမ် ၈၇ အိမ်ကိုတအိမ်လျှင် ဒန်အိုးနဲ့ ဒယ်အိုး ၁လုံးစီ၊ ဇလုံ ၂ လုံး၊ဇွန်း ၃ ချောင်း၊ ကြွေအုပ် ၁ လုံး၊ ဆန်၂ ပြည်၊ ဆီ ၅၀ ကျပ်သားနဲ့ အ၀တ်အထည်အချို့ကို လှူဒါန်းခဲ့တာလို့သိရပါတယ်။

စစ်ကိုင်း၊ ဇန်နဝါရီ ၂၃၊ ၂၀၂၃။

စစ်ကိုင်းတိုင်း၊ ကန့်ဘလူမြို့နယ်၊ ဖုတ်ကုန်းကျေးရွာက မြေပဲနုတ်နေတဲ့ ဒေသခံတောင်သူ ၃ ဦးကို ပျူစောထီးအဖွဲ့က ဖမ်းဆီးသွားခဲ့တယ်လို့ သိရပါတယ်။

ဇန်နဝါရီလ ၂၂ ရက်မနေ့မနက် ၉ နာရီခန့်မှာ ဖုတ်ကုန်းရွာ မြေပဲကုန်းမှာ တောင်သူ ၂၀ ဦးခန့်ဟာ မြေပဲနုတ်နေချိန် ရွာနဲ့ ၁ မိုင်ခန့်သာဝေးတဲ့ ဇာဒီကျေးရွာက ပျူစောထီးအဖွဲ့အင်အား ၂၀ ကျော်ကရောက်လာပြီး အကြောင်းမဲ့ ဖမ်းဆီးတာကြောင့် မြေပဲနုတ်နေသူတွေထွက်ပြေးခဲ့ကြရတယ်လို့ ကန့်ဘလူမြို့နယ် ပြည်သူ့ကာကွယ်တပ်ဖွဲ့ စစ်ရေးတာဝန်ခံက ပြောပါတယ်။

“တောင်သူတွေ အဖမ်းခံရတာဟုတ်တယ်။ ဇာဒီက ပျူတွေဖမ်းသွားတာ။ မြေပဲနုတ်ချိန်လာဖမ်းတာ။ ပြေးနိုင်တဲ့သူတွေက လွတ်သွားတယ်။ မပြေးနိုင်တဲ့သူတွေ ဖမ်းခံရတယ်။ နေ့လည်ပိုင်းတော့ ဇာဒီရွာကပျူတွေကို ဒီဘက်က အဖွဲ့တွေသွားပစ်ကြသေးတယ်လို့ သိရတယ်။ ထိခိုက်တာကတော့ ပျူရွာထဲဆိုတော့ အတည်ပြုဖို့ ခက်တယ်”လို့ပြောပါတယ်။

ဖမ်းဆီးခံရသူ ၃ ဦးဟာ အသက် ၃၅ နှစ်နဲ့ ၄၅ ဝန်းကျင်ကြားရှိ ဖုတ်ကုန်းရွာသားသုံးဦးဖြစ်ပြီး သူတို့ကို ဇီးကုန်းရွာသကြားစက်မှာအထိုင်ချနေတဲ့ စစ်ကောင်စီတပ်တွေဆီ ခေါ်သွားတယ်လို့လည်းဆိုပါတယ်။

ဖမ်းဆီးခံရပြီးနေုာက် အဲ့ဒီနေ့မနက် ၁၁ နာရီ ၄၅ မိနစ်ခန့်မှာပဲ ဇာဒီကျေးရွာမှာ အစည်းအဝေးလုပ်နေတဲ့ စစ်ကောင်စီနဲ့ပျူတွေကို Kanbalu Underground Warriors၊ ကန့်ဘလူစွန်ရဲ၊ PLGF ၊ မြေပြင်လှုပ်ရှားညီနောင်များနှင့် ဒေသခံ ပြည်သူ့ကာကွယ်ရေးအဖွဲ့ – ပကဖ တွေက ရှော့တိုက်ဒုံးတလုံး၊ ၈၁ မမ ၉ လုံးနဲ့ သွားရောက်တိုက်ခိုက်ခဲ့တယ်လို့ သိရပါတယ်။

တိုက်ခိုက်ချိန်မှာလည်း ပျူစောထီးတွေဘက်က ပြန်လည်ပစ်ခတ်တာတွေရှိခဲ့ပြီး ထိခိုက်သေဆုံးကိုတော့ မသိရသေးဘူးလို့ ဆိုပါတယ်။

ဖမ်းဆီးခံရတဲ့ တောင်သူ ၃ ဦးကတော့ ဇန်နဝါရီလ ၂၃ ရက်ဒီနေ့ ညပိုင်းထိ ပြန်မလွတ်လာသေးဘူးလို့သိရပြီး သူတို့နဲ့ပက်သက်တဲ့ နောက်ဆက်တွဲအခြေအနေတွေကိုတော့ မြေလတ်အသံက ဆက်လက်စုံစမ်းနေဆဲပါ။

ပြီးခဲ့တဲ့ဇန်နဝါရီလ ၁၉ ရက်ညနေ ၃ နာရီ မိနစ် ၄၀ ခန့်မှာလည်း ဇာဒီကျေးရွာက စာသင်ကျောင်းနဲ့ဘုန်းကြီးကျောင်းမှာ တပ်စွဲနေနေတဲ့ အင်အား ၂၀ ကျော်ရှိတဲ့ စစ်သားနဲ့ပျူတွေကို ဒေသခံကာကွယ်ရေးတပ်တွေက လက်နက်ကြီးတွေနဲ့တိုက်ခိုက်ခဲ့ပါသေးတယ်။