စစ်ကိုင်း၊ ဇန်နဝါရီ ၂၃၊ ၂၀၂၃။
စစ်ကိုင်းတိုင်း၊ ဆားလင်းကြီးမြို့နယ်မှာ ဇန်နဝါရီလ ၂၃ ရက်ဒီနေ့မနက်အစောပိုင်း အညာပစ်တိုင်းထောင်လေးများအဖွဲ့က ဆိတ်ခေါင်းချိတ်ပြီး ခွေးသားရောင်းတဲ့ ရွေးကောက်ပွဲ စာတန်းနဲ့အတူ မြန်မာတနိုင်ငံလုံးဆိုင်ရာ သပိတ်အင်အားစုများပေါင်းစပ်ညှိနှိုင်းရေးကော်မတီ (GSCB) က ထုတ်ဝေတဲ့ ရွေးကောက်ပွဲဆန့်ကျင်ရေး လက်ကမ်းစာစောင်တွေကို ဖြန့်ဝေခဲ့ကြတယ်လို့ သိရပါတယ်။
စစ်ကိုင်း၊ ဇန်နဝါရီ ၂၁၊ ၂၀၂၃။
စစ်ကိုင်းတိုင်း၊ ခင်ဦးမြို့နယ်နဲ့ ရေဦးမြို့နယ်ကို ဆက်သွယ်ထားပြီး စစ်ရှောင်များ ဖြတ်ကူးရာ ကိုယ်ထူကိုယ်ထ တံတားကို စစ်ကောင်စီတပ်သားတွေက ယနေ့ဇန်နဝါရီ ၂၁ ရက် မနက် ၁၀ နာရီကျော်လောက်မှာ မီးရှို့ဖျက်ဆီးသွားခဲ့တယ်လို့ သိရပါတယ်။
အဆိုပါတံတားမှာ ခင်ဦးနယ်၊ ရွာသစ်ကျေးရွာအနောက်ဘက်နဲ့ ရေဦးနယ်၊ မူးသာကုန်းကျေးရွာ အနောက်ဘက်ကို ဆက်သွယ်ထားတာဖြစ်ပြီး တံတားကို သစ်တွေ၊ ဝါးတွေနဲ့ ပြီးခဲ့တဲ့ ၂၀၂၂ ခုနှစ် နိုဝင်ဘာလကမှ ဆောက်လုပ်ပြီးစီးခဲ့တာဖြစ်တယ်လို့ KDK- Khin U Dog Killers မှ ပြန်ကြားရေးတာဝန်ခံက ပြောပါတယ်။
“မီးရှို့ခံရတဲ့ တံတားအဖျားက ၄ ခန်းလောက် ပါသွားတာဗျ။ ဒီတံတားက စစ်ဘေးရှောင်တွေအတွက် ပြေးရင် အဆင်ပြေအောင်လုပ်ထားတဲ့ မူးကူးတံတားပါဗျ။ တံတားလုပ်ပြီးတာက နှစ်လလောက်ပဲ ရှိသေးတယ်” လို့ဆိုပါတယ်။
ဒါ့အပြင် တံတားကိုဖျက်ဆီးတဲ့ စစ်ကောင်စီတွေက မူးသာကုန်းရွာက ကျွဲကျောင်းသားတွေ ကျွဲကျောင်းရင်း နားခိုဖို့ ဆောက်ထားတဲ့ တဲဆောင် ၄ လုံးကိုပါ မီးရှို့ဖျက်ဆီးခဲ့သလို ရွာသစ်ကျေးရွာဘက်ကိုလည်း လက်နက်ကြီး၊ လက်နက်ငယ်တွေနဲ့ပါ ပစ်ခတ်ခဲ့သေးတယ်လို့ အထက်ပါတာဝန်ခံက ပြောပါတယ်။
“တဲတွေကို မီးအရင်ရှို့ပြီးမှ လက်နက်ကြီး ၂ လုံး ပစ်တယ်ဗျ။ ပြီးတော့ လက်နက်ငယ်တွေနဲ့ ပစ်တယ်။ လက်နက်ကြီးတလုံးက ရွာသစ်ရွာထဲကို ကျရောက်ခဲ့လို့ နေအိမ် ၁ လုံးပျက်စီးသွားတယ်။ ကျွဲတကောင် ထိတယ်။ လူတွေတော့ အထိအခိုက်မရှိခဲ့ဘူး” လို့ဆိုပါတယ်။
အခုလို တံတား၊ တဲဆောင်တွေကို မီးရှို့ဖျက်ဆီးပြီး ကျေးရွာဘက်ကို လက်နက်ကြီးလှမ်းပစ်ခဲ့ကြတဲ့ စစ်ကောင်စီတပ်သားတွေဟာ ရေဦးမြို့နယ်မှာ စစ်ကြောင်းထိုးနေတဲ့ မော်လိုက်အခြေစိုက် ခမရ(၃၆၄)နဲ့ မှော်ဘီအခြေစိုက် ခလရ(၇၀၁)မှ တပ်ဖြန့်ထားတဲ့တပ်သား အင်အား ၄၀ ခန့်က ဖြစ်တယ်လို့ သိရပါတယ်။
စစ်ကိုင်း၊ ဇန်နဝါရီ ၁၉၊ ၂၀၂၃။
စစ်ကိုင်းတိုင်း(အထက်ပိုင်း)၊ တမူးမြို့က စစ်ကောင်စီလက်အောက်ခံ တမူးမြို့နယ် ရွေးကောက်ပွဲကော်မရှင်ရုံးမှာ ဒီကနေ့ ဇန်နဝါရီလ ၁၉ ရက်မနက် ၁၀ နာရီခန့်က မီးလောင်မှုဖြစ်ပွားခဲ့ပါတယ်။
အာရှလမ်း၊ စော်ဘွားရပ်ကွက်မှာရှိတဲ့ စစ်ကောင်စီလက်အောက်ခံရွေးကော်ရုံးကို တော်လှန်ရေးအင်အားစုတွေဘက်က စီးနင်း မီးရှို့ခဲ့တာဖြစ်ပြီး နာရီဝက်နီးပါးအကြာ မီးလောင်ကျွမ်းခဲ့လို့ ရုံးတွင်းစာရွက်စာတမ်းတွေနဲ့ ရုံးအဆောက်အဦမီးလောင်ပျက်ဆီးခဲ့တယ်လို့ တမူး ABSDF တပ်ရင်း ၅ မှတာဝန်ရှိသူတဦးက မြေလတ်အသံကိုပြောပါတယ်။
”စစ်ကောင်စီရဲ့အတုအယောင်ရွေးကောက်ပွဲစာရွက် စာတမ်းတွေကို မီးရှို့ဖျက်ဆီးခဲ့တာဖြစ်ပါတယ်။ လောင်တာ နာရီဝက်လောက်ကြာတယ်။ စာရွက် စာတမ်းတွေအကုန်မီးလောင်ပြီး ရုံးအဆောက်အဦလည်းပျက်စီးတယ်” လို့ ပြောပါတယ်။
စစ်ကောင်စီရွေးကော်ရုံးမီးရှို့ဖျက်ဆီးတာကို တမူး ABSDF တပ်ရင်း ၅ နဲ့ တမူးပကဖတို့ ပူးပေါင်းလုပ်ဆောင်ခဲ့တာလို့ ပြည်သူ့ကာကွယ်ရေးတပ်ဖွဲ့-တမူးက ဒီကနေ့မနက်ပိုင်းမှာ ထုတ်ပြန်ထားပြီး ဒီဖြစ်စဉ်နဲ့ပက်သက်တဲ့ နောက်ဆက်တွဲအခြေအနေတွေကိုတော့ မြေလတ်အသံက ဆက်လက်စုံစမ်းနေဆဲဖြစ်ပါတယ်။
စစ်ကိုင်း၊ ဇန်နဝါရီ ၁၈၊ ၂၀၂၃။
စစ်ကိုင်းတိုင်း၊ ဒီပဲယင်းမြို့နယ်၊ ချောင်းနားကျေးရွာမှာ စစ်ကောင်စီကဖမ်းဆီးခေါ်ဆောင်သွားပြီး နှိပ်စက်ခံရကာ ပြန်လွတ်လာတဲ့ ပြည်သူတဦးဟာ ယမန်နေ့ ဇန်နဝါရီလ ၁၇ ရက်နေ့က ဆုံးပါးသွားခဲ့တယ်လို့ ဒီပဲယင်းမြို့နယ်ညီနောင်များအဖွဲ့ ဆီက သိရပါတယ်။
ချောင်းနားကျေးရွာမှာ ဇန်နဝါရီလ ၉ ရက်နေ့က ခမရ-၃၆၄နဲ့ ခလရ-၇၀၁ တပ်ရင်းပူးပေါင်းစစ်ကြောင်းဝင်ကာ နေအိမ်တွေကို မီးရှို့ဖျက်စီးပြီးနောက် ဦးသိန်းထွန်းနဲ့ ဦးမြင့်ဆွေတို့ ၂ ဦးကို ဖမ်းဆီးခေါ်ဆောင်သွားခဲ့တာ လို့ဆိုပါတယ်။
၁၁ရက်နေ့က ပြန်လည်လွတ်မြောက်လာပြီး ဦးသိန်းထွန်းဟာ ဖမ်းဆီးထားစဉ်ကရခဲ့တဲ့ ဒဏ်ရာတွေကြောင့် ဆုံးပါးသွားခဲ့တယ်ဖြစ်ပါတယ်။
“သူက ပြန်ရောက်လာချိန်ထဲက စကားတောင်ကောင်းကောင်းပြောနိုင်တော့တဲ့ အခြေအနေမျိုးမဟုတ်ဘူး၊ ရိုက်နှက်ထားတဲ့ဒဏ်ရာတွေရှိတယ်၊ ခေါင်းတွေမှာပေါက်ပြဲထားတဲ့ဒဏ်ရာတွေရှိတယ် အဲ့ဒဏ်ရာတွေနဲ့ပဲဆုံးသွားတယ်။” လို့ ဒီပဲယင်းမြို့နယ်ညီနောင်များအဖွဲ့ တာဝန်ရှိသူက ပြောပါတယ်။
တဦးကတော့ ပြန်လည်လွတ်မြောက်လာပြီး ကျန်းမာရေးကောင်းမွန်တယ်လို့ ဆိုပါတယ်။
အဲဒီစစ်ကြောင်းဟာ ချောင်းနားရွာက အိမ်ခြေ ၁၄ လုံးကိုမီးရှို့ကာ ရေဦးနယ်ဘက်ကိုထွက်ခွာသွားပြီး၊ ရေဦးနယ် ချမ်းသာရွာက နှစ် ၁၀၀ ကျော်သက်တမ်းရှိ ခရစ်ယာန်ဘုရားကျောင်းကိုမီးရှို့ဖျက်စီးပြီး ရေဦးမြို့စခန်းထဲကို ဝင်ရောက်သွားတယ်လို့ သိရပါတယ်။
ဒီပဲယင်းဟာ တနိုင်ငံလုံးမှာ မီးရှို့ဖျက်စီးခံရတဲ့ အရေတွက် အများဆုံးမြို့နယ်တခုဖြစ်ပြီး၊ အာဏာသိမ်းပြီးနောက်ပိုင်းကစလို့ လက်ရှိအချိန်ထိ ရွာပေါင်း ၄၀ ဝန်းကျင်နဲ့ နေအိမ်အလုံးပေါင်း ၄၈၂၄ လုံး မီးရှို့ဖျက်ဆီးခံထားရတာလည်း ဖြစ်ပါတယ်။
စစ်ကိုင်း၊ ဇန်နဝါရီ ၁၈၊ ၂၀၂၃။
စစ်ကိုင်းမြို့နယ်၊ မင်းကွန်းတိုက်နယ်၊ ထုံးဘိုရွာကို ဇန်နဝါရီ ၁၇ ရက်နေ့မှာ တပ်စွဲဖို့လာတဲ့ စစ်ကောင်စီတွေ တိုက်ခိုက်ခံရလို့ တပ်မစွဲခဲ့ရတာကြောင့် ပြည်သူ ၁ ဦးကိုသတ်ပြီး နေအိမ်တွေကို မီးရှို့သွားခဲ့တယ်လို့ သိရပါတယ်။
အင်အား ၁၀၀ ခန့်ရှိတဲ့စစ်ကောင်စီတပ်သားတွေက အိမ်ခြေ ၅၀၀ ခန့်ရှိတဲ့ ထုံးဘိုရွာကို ပစ်ခတ်ဝင်လာချိန် ကာကွယ်ရေးတပ်ဖွဲ့တွေက ခုခံပြန်တိုက်ခဲ့တာကြောင့် ကျေးရွာသားတွေ ထွက်ပြေးချိန်ရခဲ့ပေမယ့် ဘုန်းကြီးကျောင်းကို ဆွမ်းဂျိုင့်ပို့ဖို့သွားနေသူ ၁ ဦးကို သတ်ပြီး ဘုန်းကြီးကျောင်းအပါအဝင် လူနေအိမ် ၁၀ လုံးကျော်မီးရှို့ ထွက်သွားတယ်လို့ မတ္တရာမြို့နယ်နဂါးနီပြောက်ကျားတပ်ဖွဲ့ တာဝန်ခံကိုသားငယ် ကပြောပါတယ်။
“ရွာမှာ ပကဖ တွေပြောက်ကျားတပ်ဖွဲ့တွေရှိတော့ လမ်းအတိုင်းမလာပဲ တောထဲကနေ အလစ်၀င်ပြီး ပစ်၀င်၀င်လာပါတယ်ဗျ။ ဒါကိုကျနော်တို့တွေက လက်နက်ငယ်တွေ၊လက်နက်ကြီးတွေနဲ့တိုက်ခိုက်ခဲ့တယ်။ မနက်ကနေညနေအထိတိုက်ခိုက်ခဲ့လို့ စကစတွေရွာမှာ မနေနိုင်ခဲ့ဘဲပြန်ထွက်သွားခဲ့တယ်။ ကျနော်တို့က ရွာမှာရှင်းလင်းရေးတွေလုပ်နိုင်ခဲ့တယ်” လို့ဆိုပါတယ်။
အသတ်ခံရသူမှာ အသက် ၄၀ ကျော်အရွယ် အမျိုးသားဖြစ်ပြီး စစ်ကောင်စီတွေကသူ့ကို ပစ်သတ်ပြီး ဘုန်းကြီးကျောင်းဆောင်တွေနဲ့အတူ မီးရှို့ထားခဲ့ကြတာဖြစ်တယ်လို့ ကိုသားငယ်က ဆက်ပြောပါတယ်။
“သူတို့သတ်သွားတာက ခြေတွေလက်တွေအရင်ဖြတ်ပြီးမှ မီးရှို့သတ်တယ်လို့ ယူဆရပါတယ်ဗျ။ ဘုန်းကြီးကျောင်းကို ဆွမ်းဂျိုင့်ပို့သွားတဲ့လူပါ သူကဆိုင်ကယ်နဲ့ပါဗျ။ သူ့ဆိုင်ကယ်နေရာကနေ မီးရှို့တဲ့နေရာကို ဝါယာကြိုးနဲ့ချည်ပီးဆွဲသွားပါတယ် သွေးတွေက အတန်းလိုက်ကြီးဗျ ပြီးမှ ဘုန်းကြီးကျောင်းကိုရော မီးရှို့ပစ်ခဲ့တာပါ” လို့ ဆိုပါတယ်။
ဒီစစ်ကောင်စီတွေက ကျေးရွာထဲမှာတပ်စွဲဖို့လာခဲ့တဲ့ ရည်ရွယ်ချက်က မင်းကွန်းမှာ ဘုရားထီးတင်ပွဲကို စစ်ကောင်စီအကြီးကဲတွေလာရောက်မှာဖြစ်လို့ နယ်မြေရှင်းလင်းတဲ့သဘောနဲ့ ဝင်ရောက်လာခဲ့ကြတာဖြစ်ပြီး ကာကွယ်ရေးပူးပေါင်းတပ်ဖွဲ့တွေက ရွာမှာတပ်မစွဲနိုင်အောင် ပြန်လည်ခုံခံတိုက်ခိုက်ခဲ့တာ ဖြစ်တယ်လို့သိရပါတယ်။
စစ်ကိုင်း၊ ဒီဇင်ဘာ ၃၁၊ ၂၀၂၂။
စစ်ကိုင်းတိုင်း၊ ရွှေဘိုမြို့နယ်၊ ရွှေဘို – မြစ်ကြီးနားလမ်းဆုံအနီးက စစ်ကောင်စီစစ်ဆေးရေးဂိတ်ကို ဒီဇင်ဘာလ ၃၁ ရက် ဒီနေ့မနက်ပိုင်းက တိုက်ခိုက်ခဲ့လို့ စစ်သား၂ ဦးပြင်းထန်ဒဏ်ရာရရှိသွားတယ်လို့ Black Wolf Armyအဖွဲ့ဆီက သိရပါတယ်။
အင်အား ၁၅ ဦးလောက်နဲ့ စစ်ဆေးနေတဲ့ စစ်ကောင်စီဂိတ်ကို ဒီနေ့မနက် ၉ နာရီခွဲလောက်မှာ ၄၀ မမ ၃လုံးနဲ့ ပစ်ခတ်ခဲ့တာလို့ ဆိုပါတယ်။
“အခုတိုက်ခိုက်ခဲ့တဲ့ စစ်ဆေးရေးဂိတ်က လုပ်နေတာကြာပြီ။ သူတို့က ခရီးသွားကားတွေ သာမန်သွားလာနေတဲ့ ဒေသတွင်းက ပြည်သူတွေရော အကုန်စစ်တာဗျ။ ငွေတောင်းတာတွေလည်း ရှိတယ်။ ဒဏ်ရာရသူ ၂ ဦးကိုအိမ်စီးကားနဲ့ ပြန်တင်သွားတယ်ဗျ။ ဒဏ်ရာကသေနိုင်တယ် စစ်ကောင်စီအတွက် ခရစ္စမတ်နဲ့ နှစ်သစ်ကူးလက်ဆောင်ပေးလိုက်တာပါ” လို့ Black Wolf Army တာဝန်ရှိသူက ပြောပါတယ်။
ပစ်ခတ်အပြီးအမြန်ဆုတ်ခွာခဲ့တာကြောင့် ဒဏ်ရာရတာကိုသာမြင်ရပြီး အိမ်စီးကားနဲ့ ဘယ်ကိုသယ်သွားတယ်ဆိုကိုတော့ သေချာမသိရဘူးလို့ သူက ဆက်ပြောပါတယ်။
အဲဒီတိုက်ခိုက်မှုကို BLACK WOLF – ARMY နဲ့ Who am I အဖွဲ့က ပူးပေါင်းတိုက်ခိုက်ခဲ့တာလို့ သိရပြီး တိုက်ခိုက်ရေးရဲဘော်တွေ အန္တရာယ်ကင်းခဲ့တယ်လို့ ဆိုပါတယ်။
BLACK WOLF-အဖွဲ့ဟာ ပြီးခဲ့တဲ့ နိုဝင်ဘာလ ၂၃ ရက်ကလည်း မဟာမိတ်တွေနဲ့ပူးပေါင်းကာ ရွှေဘိုမြို့နယ် လှတောရွာက ထွက်လာတဲ့ စစ်ကောင်စီနဲ့ပျူစောထီးအဖွဲ့ကို ပြင်းအားမြင့်မိုင်း ၂ လုံးနဲ့ ဖောက်ခွဲတိုက်ခိုက်ခဲ့ပါသေးတယ်။
စစ်ကိုင်း၊ ဒီဇင်ဘာ ၃၁၊ ၂၀၂၂။
စစ်ကိုင်းတိုင်း၊ မုံရွာခရိုင်ထဲကလမ်းပိုင်းအချို့ကို ဒီဇင်ဘာလ ၃၁ ရက်ဒီမနက် ၂ နာရီ ၅၀ မိနစ် ကစပြီး လမ်းအသုံးပြုခွင့်ကို ယာယီပိတ်ပင်ထားကြောင်း မုံရွာ- အမြင့်လမ်း တင်းမှန်ပြန်ကြားရေးက သတင်းထုတ်ပြန်ထားပါတယ်။
မုံရွာ – ချောင်းဦးလမ်းပိုင်း၊ မြေနဲ – ဗောဓိတစ်ထောင်လမ်းပိုင်း၊ မုံရွေး – ရွေမြင်တင်လမ်းပိုင်းတွေကိုပိတ်ခဲ့တာလို့ မုံရွာ – အမြင့်လမ်းသတင်းမှန်ပြန်ကြားရေးတာဝန်ရှိသူက ပြောပါတယ်။
“အမြင့်မြို့ဟောင်းက စစ်ကောင်စီတပ်သားတွေကို ဗောဓိတထောင်တောင်ကြောက တောင်ခမောက်တောင်ကို မနေ့ ညနေက Mi-35,Mi-17 ရဟတ်ယာဥ်တွေနဲ့ ပို့လို့ လမ်းပိတ်ထားတာပါ”လို့ ပြောပါတယ်။
ချောင်းဦးမြို့နယ်၊ အမြင့်စခန်းကစစ်ကောင်စီတပ်ဖွဲ့ဝင်တွေကို မနေ့ညနေ ၄ နာရီခွဲလောက်က လေယာဥ် ၂ စီးနဲ့ ၂ ကြိမ်ခွဲပြီး လာခေါ်သွားတာကိုတွေ့ခဲ့ရတယ်လို့ ချောင်းဦး Eagle Brother Revolution Force.KUG – တပ်ခွဲ ၂ တပ်ဖွဲ့ရဲ့ တာဝန်ရှိသူကလည်း ပြောပါတယ်။
အခုလမ်းပိတ်ထားတာဟာ နောက်ထပ်ကြေညာချက်မထုတ်ပြန်ခင်အထိ ဖြစ်ပြီး၊ လမ်းအသုံးပြုခဲ့လို့ အကြောင်းတစုံတရာဖြစ်ပေါ်ခဲ့ပါက အသုံးပြုသူရဲ့တာဝန်သာဖြစ်တယ်လို့ ကြေညာချက်မှာဖော်ပြထားပါတယ်။
မုံရွာခရိုင်အတွင်းမှာ ပြည့်သူ့ကာကွယ်ရေးတပ်ဖွဲ့ဝင်တွေရဲ့ ခုခံတိုက်ခိုက်မှုတွေကြောင့် စစ်ကောင်စီတပ်တွေ သေဆုံးမှုတွေရှိနေသလို မကြာခဏဆိုသလိုလည်း ထိတွေ့တိုက်ပွဲတွေ ဖြစ်ပွားလျှက်ရှိနေတာပါ။
ပြီးခဲ့တဲ့ဒီဇင်ဘာလ ၂၄ ရက်လည်း မုံရွာမြို့ကနေ ပြည်သူပိုင်ကျောက်စုပ်မော်တော်ကို ခိုးယူမောင်းနှင်လာတဲ့ စစ်အုပ်စုကို ချင်းတွင်းမြစ်ကြောင်းတနေရာမှာ ဒေသခံကာကွယ်ရေးတပ်တွေက မိုင်းခွဲတိုက်ခိုက်ခဲ့ရာ စစ်ကောင်စီဘက်က ၇ ဦးသေဆုံးပြီး ၄ ဦးဒဏ်ရာပြင်းထန်ရရှိခဲ့ပါသေးတယ်။
စစ်ကိုင်း၊ ဒီဇင်ဘာ ၃၁၊ ၂၀၂၂။
စစ်ကိုင်းတိုင်း၊ ကန့်ဘလူမြို့နယ်၊ ကိုးတောင်ဘို့တိုက်နယ်က စစ်ရှောင်အမျိုးသမီးတဦး ဒီဇင်ဘာလ ၃၀ ရက်မနေ့ညနေက မြွေကိုက်ခံရကြောင်း ဒေသခံတဦးဆီက သိရပါတယ်။
အသက်၂၄ နှစ်အရွယ် စစ်ရှောင်အမျိုးသမီးတဦးဖြစ်ပြီး ဒီဇင်ဘာလ ၃၀ ရက်ညနေ ၇ နာရီလောက်မှာ မြွေကိုက်ခံရတာလို့ သိရပါတယ်။
“သူကကျွဲကိုအရင်နေရာကနေ တခြားနေရာကို ရွှေ့ဖို့သွားတာမှာ မှောင်နေပြီ၊ နေတဲ့တဲနဲ့လည်း ဝေးလှတာတော့မဟုတ်ဘူး၊ အဲလိုသွားတုန်းဘယ်ဘက်ခြေကို ပိုးထိတာလို့” ဒေခံတဦးကပြောပါတယ်။
လက်ရှိမှာ မြွေကိုက်ခံထားရတဲ့ အမျိုးသမီးငယ်ကို လိုအပ်တဲ့မြွေဆိပ်ဖြေဆေးထိုးပေးတာပြီး စိုးရိမ်စရာမရှိဘူးလို့ သူကဆက်ပြောပါတယ်။
ကန့်ဘလူမြို့နယ်၊ ကိုးတောင်ဘို့တိုက်နယ်အတွင်းနဲ့ အနီးဝန်းကျင်တွေမှာ မကြာခဏဆိုသလို မြွေကိုက်ခံရမှုတွေရှိနေပြီး စစ်ရှောင်ကာလ ၈ လအတွင်း မြွေကိုက်ခံရသူ အမျိုးသား ၃၃ ဦးနဲ့အမျိုးသမီး ၈ ဦးရှိကာ အဲဒီအထဲက အမျိုးသား ၃ ဦးနဲ့ ၈ နှစ်အရွယ်မိန်းကလေးငယ်တဦးသေဆုံးခဲ့ပါတယ်။
သေဆုံးသူ ၄ ဦးမှာမှ ကိုင်းရိုးရွာနေ အသက်၆၁ နှစ်အရွယ် ဦးဝင်းညွှန့်ဟာ စစ်ကောင်စီရဲ့ ညမထွက်ရအမိန်ကြောင့် လုံလောက်တဲ့ဆေးကုသခွင့်မရပဲ ဒီဇင်ဘာလ ၁၇ ရက်မှာ သေဆုံးခဲ့ရတာလို့ ဒေသခံတဦးဆီက သိရပါတယ်။
စစ်ကိုင်း၊ ဒီဇင်ဘာ ၃၁၊ ၂၀၂၂။
ပြီးခဲ့တဲ့ဒီဇင်ဘာလ ၂၈ ရက်မှာ စစ်ကိုင်းတိုင်း၊ ခင်ဦးမြို့နယ်၊ အလယ်ရှိုကျေးရွာကိုဝင်ရောက်ခဲ့တဲ့ စစ်ကောင်စီတပ်သားတွေက ဒေသခံ ၈ ဦးကိုပစ်သတ်ပြီးတော့ ၂၀ ဦးထက်မနည်းကိုလည်း ဖမ်းဆီးခဲ့တယ်လို့ သိရပါတယ်။
ဒေသခံတွေကိုပစ်သတ်၊ ဖမ်းဆီးထားတဲ့စစ်ကောင်စီတပ်သားတွေဟာ ရွှေဘိုမြို့နယ်မှာရှိတဲ့ စစ်ကောင်စီရဲ့လေ့ကျင့်ရေးစခန်း အမှတ်(၈) ကဖြစ်ပြီး ကန့်ဘလူမြို့နယ်၊ ဇီးကုန်းသကြားစက်မှတပ်သားတွေနဲ့ ပူးပေါင်းကာ အင်အား ၁၀၀ ဝန်းကျင်နဲ့ အလယ်ရှိုကျေးရွာကို စစ်ကြောင်းထိုးဝင်ရောက်လာခဲ့တာလို့ ခင်ဦးမြို့နယ်သတင်းမှန်ပြန်ကြားရေးအဖွဲ့မှ တာဝန်ရှိသူက ပြောပါတယ်။
“စကစတွေက ရွာထဲကိုဝင်တဲ့အချိန် မနက် ၅ နာရီလောက်ကဝင်တာ။ ကျောက်တွေတင်တဲ့ ကားနဲ့ဝင်တာ။ ဝင်တဲ့အချိန်ကမနက်ခင်းဆိုတော့ ပြင်ဆင်ချိန်မရလိုက်ဘူး။ ဝင်တာကလည်း သူတို့(စကစ)ကားနဲ့မဟုတ်ဘူး။ ကျောက်တင်တဲ့ကားနဲ့ဝင်လာတာ။ ဝင်ပြီးတော့ ကင်းစောင့်နေသူတွေကိုပစ်သတ်တာ” လို့ ပြောပါတယ်။
အလယ်ရှို့ရွာဒေသခံ ၈ ဦးကို ရွာထဲဝင်ဝင်ချင်းမှာပဲ သေနတ်နဲ့ပစ်သတ်ခဲ့တာဖြစ်ပြီး၊ အဲ့ဒီတပ်တွေဟာ ဒီဇင်ဘာလ ၃၁ ရက်ဒီကနေ့ထိ ရွာထဲမှာရှိနေသေးတာကြောင့် အသတ်ခံရသူတွေနဲ့ ဖမ်းဆီးခံရသူတွေရဲ့ အသေးစိတ် အချက်အလက်တွေကို မသိရှိရသေးဘူးလို့လည်းဆိုပါတယ်။
အလယ်ရှိုရွာမှာ အိမ်ခြေ ၈၀၀ ခန့်ရှိပြီး၊ ရွာထဲမှာ စစ်ကောင်စီအင်အား ၁၀၀ ဝန်းကျင်က တပ်စွဲနေဖို့ လုပ်ဆောင်နေတာကြောင့် ထောင်ချီတဲ့ရွာခံတွေလည်း ထွက်ပြေးတိမ်းရှောင်နေရပြီး တောထဲတွေမှာ ဖြစ်သလို ခိုလှုံနေကြရတယ်လို့ အထက်ပါတာဝန်ရှိသူကပြောပါတယ်။
“ဒီရွာကို ကန့်ဘလူက ဝါသဝ ရောက်မယ်လို့သိရတယ်။ ပျူသင်တန်းတက်ဖို့အတွက်ပေါ့။ စကစတွေက ဒီနေ့အချိန်ထိ ရွာထဲကလုံးဝမထွက်သေးဘူး။ အဲဒီရွာကဒေသခံတွေနဲ့ အနီးအနားကရွာသားတွေအကုန်လုံးမှာ ထွက်ပြေးပြီးတော့ အခုတောထဲမှာ ခိုလှုံနေရတယ်။ သူတို့အကူအညီအရေးပေါ်လိုအပ်နေပါတယ်”လို့ ဆိုပါတယ်။
ဒါ့အပြင်ဒီဇင်ဘာလ ၂၇ ရက် နဲ့ ၂၈ ရက်မှာလည်း ရွှေဘိုမြို့နယ်မှာရှိတဲ့ စစ်ကောင်စီရဲ့လေ့ကျင့်ရေးစခန်း အမှတ် ၈ ကနေ တိုက်ပွဲမဖြစ်ပဲ လက်နက်ကြီးတွေနဲ့ပစ်ခတ်ခဲ့တာကြောင့် ရေးကုန်းရွာကအမျိုးသားတဦး၊ ဝါးရုံကုန်းရွာက အမျိုးသမီး ၃ ဦးနဲ့ အမျိုးသား ၁ဦးတို့ အသီးသီးဒဏ်ရာရရှိသွားခဲ့ကြတယ်လို့ သိရပါတယ်။
စစ်ကိုင်း၊ ဒီဇင်ဘာ ၃၁၊ ၂၀၂၂။
စစ်ကိုင်းတိုင်း၊ မြောင်မြို့နယ်အတွင်းက အောက်တိုဘာလအတွင်း မီးရှို့ဖျက်ဆီးခံလိုက်ရတဲ့ ညောင်ကားယားရွာကဒေသခံ ၇၀၀ ကျော် နှစ်လကျာ်ကြာတဲ့အထိတောတွေထဲ ရှောင်နေရပြီး အခက်အခဲတွေဖြစ်နေတယ်လို့ မြောင်စစ်ဘေးရှောင်ကူညီစောင့်ရှောက်နေတဲ့ တာဝန်ခံတဦးက ပြောပါတယ်။
မြောင်မြို့နယ်အတွင်းက ညောင်ကားယားရွာကို အောက်တိုဘာလ ၈ ရက်နဲ့ ၉ ရက်နှစ်ရက်ဆက်တိုက် စစ်ကောင်စီတပ်တွေရဲ့မီးရှို့ခံခဲ့ရပြီး နေအိမ်အားလုံးနီးပါးမီးလောင်ပြာကျခဲ့တာလို့ ဆိုပါတယ်။
“ခုချိန်ထိကိုမီးရှို့ခံရတဲ့ နေရာတွေလဲမပြန်နိုင်ဘူး။ ရွာနားနီးစပ်တောတွေထဲမှာပဲ နေနေရတယ်။ မြစ်နားနီးတဲ့ရွာတွေဆိုလဲညညဆို ကြောက်နေရတယ်။ အီနာဂါတွေနဲ့ ညဆိုပစ်တော့။ ခုကနှစ်လလောက်ရှိပြီညောင်ကားယားက ၇၀၀ ကျော် ၈၀၀ နီးပါး မီးဘေးရှောင်နေရတာ။ နေစရာအမိုးအကာရော အစားအသောက်အကုန်လိုအပ်နေပြီး အကူအညီတွေလိုနေတယ်” လို့ သူကဆက်ပြောပါတယ်။
ညောင်ကားယားရွာမှာ အိမ်ခြေ ၃၀၀ နီးပါးရှိပြီးလူဦးရေ ၇၀၀ ကျော် ၈၀၀ နီးပါးဘေးလွတ်ရာကို ထွက်ပြေးတိမ်း ရှောင်နေကြရပြီး ခုချိန်ထိအိမ်မပြန်နိုင်သေးသလို တောထဲတွေမှာ အဆင်ပြေသလို နေထိုင်ရင်း အခက်အခဲတွေဖြစ်နေ တယ်လို့ ဒေသခံတွေထံကသိရပါတယ်။
ပြည်တွင်းမှာ စစ်အာဏာသိမ်းပြီးနောက်ပိုင်းစစ်ကောင်စီတပ်က မီးရှို့လို့ စစ်ကိုင်းတိုင်းထဲက နေအိမ်ပေါင်း ၃ သောင်းနီးပါး မီးရှို့ခံခဲ့ရပြီး စစ်ကိုင်းတိုင်းအတွင်းမှာ စစ်ဘေးရှောင်ဦးရေ တသိန်းဝန်းကျင်အထိရှိလာနေတယ်လို့ ကုလသမဂ္ဂလူသားချင်းစာနာမှုဆိုင်ရာညှိနှိုင်းရေးရုံး (UNOCHA) သုတေသနအဖွဲ့အစည်းရဲ့ မှတ်တမ်းတွေက ထုတ်ပြန်ထားပါတယ်။