စစ်ကိုင်း

စစ်ကိုင်း၊ ဒီဇင်ဘာ ၂၆၊ ၂၀၂၂။

စစ်ကိုင်းတိုင်း၊ မုံရွာမြို့၊ ဘုရားကြီးရပ်ကွက် သီရိရတနာဈေးက စျေးခေါင်းအမျိုးသားတဦး သေနတ်နဲ့ပစ်၊ ဓားနဲ့ခုတ်ခံရပြီး သေဆုံးသွားတယ်လို့ သိရပါတယ်။

ဒီဇင်ဘာလ ၂၅ ရက်မနေ့ကနေ့လည် ၁၂ နာရီဝန်းကျင်မှာ စျေးခေါင်း ဦးအောင်ဇော်ဝင်း ၅၀ နှစ်ဟာ သီရိရတနာဈေး အပေါ်ထပ်ရှိ ဈေးရုံးခန်းမှာရှိနေချိန် အမျိုးသား ၂ ဦး ဝင်ရောက်လာပြီး သေနတ်နဲ့ပစ်၊ ဓားနဲ့ခုတ်ခဲ့တာလို့ ဒေသခံတဦးကပြောပါတယ်။

“သူက Non-CDM ဝန်ထမ်း ၁ ယောက်ပဲ။ ဖြစ်တဲ့အချိန်က စျေးခေါင်းရုံးပေါ်မှာ သူတယောက်တည်း ရှိနေချိန်လို့တော့ သိရတယ်။ အဲဒါကို သေနတ်နဲ့ပစ်တာကော ဓားနဲ့ပါထိုးခဲ့တာ။ နေရာမှာပဲ သေသွားတယ်”လို့ ပြောပါတယ်။

ဦးအောင်ဇော်ဝင်းဟာ ဝဲရင်ညွန့်ကျည်ဖောက်ဝင်ဒဏ်ရာ ၁ ချက်၊ ယာနားရွက် ပြတ်ရှဒဏ်ရာ ၁ ချက်၊ ယာလက်မောင်း ထိုးသွင်းဒဏ်ရာ ၁ ချက်၊ နောက်ကျောယာဘက် ထိုးသွင်းဒဏ်ရာ ၁ ချက် (စုစုပေါင်း ဒဏ်ရာ၄ ချက်)ရရှိပြီး သေဆုံးသွားတယ်လို့ သိရပါတယ်။

သေဆုံးသွားတဲ့ ဦးအောင်ဇော်ဝင်းအလောင်းကိုတော့ စစ်ကောင်စီတပ်သားတွေ လာရောက်စစ်ဆေးပြီး မုံရွာပြည်သူ့ဆေးရုံကို ပို့ထားတယ်လို့ ဆိုပါတယ်။

သူ့ကိုဘယ်အဖွဲ့အစည်းက ဘာကြောင့်သတ်သွားလဲဆိုတာကိုတော့ ထုတ်ပြန်ထားတာမရှိသေးပါဘူး။

ခုနောက်ပိုင်း မုံရွာမြို့ပေါ်မှာ စစ်ကောင်စီတပ်စွဲတဲ့နေရာတွေ မကြာခဏတိုက်ခိုက်ခံနေရပြီး၊ စစ်ကောင်စီလက်အောက်ခံဝန်ထမ်းတွေ၊ ထောက်ခံသူတွေနဲ့ သတင်းပေးဒလန်ဆိုသူတွေလည်း ပစ်ခတ်ရှင်းလင်းခံနေရပါတယ်။

ဒါ့အပြင်ဒီမနက် ၇ နာရီဝန်းကျင်မှာလည်း မုံရွာမြို့၊ အမှတ် ၂ ရဲစခန်းက စခန်းမှူးအပါအဝင် ၇ ဦးလိုက်လာတဲ့ကားကို မုံရွာမြို့၊ နန္ဒရပ်ကွက်၊ သမစိတ္တလမ်း၊ အင်ကြင်းခိုင်ဟိုတယ်အနီးမှာ ဒေသခံကာကွယ်ရေးတပ်ဖွဲ့ဝင်တွေက တိုက်ခိုက်ခဲ့ရာ စခန်းမှူးအပါအဝင် ၃ ဦးသေဆုံးခဲ့တယ်လို့ သိရပါတယ်။

စစ်ကိုင်း၊ ဒီဇင်ဘာ ၂၆၊ ၂၀၂၂။

စစ်ကိုင်းတိုင်း၊ မြောင်မြို့နယ်၊ ကျောက်ရစ်စခန်းကနေထွက်လာတဲ့ စစ်ကောင်စီစစ်ကြောင်းဟာ ဒီဇင်ဘာ၂၄ ရက်နေ့ည ၈ နာရီလောက်မှာ မိုင်းဆွဲခံခဲ့ရပြီးနောက် မိုင်းသံထပ်မံကြားရရင် အနီးနားက ရွာတွေကို မီးရှို့ဖျက်ဆီးပစ်မယ်လို့ ခြိမ်းခြောက်ပြောဆိုခဲ့ပါတယ်။

ကျောက်ရစ်စခန်းကနေ ခြေလျင်ထွက်လာတဲ့ အင်အား ၅၀ ရှိစစ်ကောင်စီ စစ်ကြောင်းကို ဗိုလ်တောက်ထွန်း ပြည်သူ့ကာကွယ်ရေးပူးပေါင်းတပ်ဖွဲ့တို့က ကျောက်ရစ်နဲ့သဲတောင်ရွာကြားအရောက်မှာ မိုင်း ၂ လုံးဆွဲလိုက်တာကြောင့် စစ်ကောင်စီတပ်ဖွဲ့ဝင် ၃ ဦးသေဆုံးပြီ ၂ ဦးထိခိုက်ဒဏ်ရာရရှိခဲ့တယ်လို့ ဆိုပါတယ်။

“အဲဒီစစ်**တွေက မုံရွာ နမခကပါ။ ကျောက်ရစ်မှာ အထိုင်ချထားတာ ကြာနေပါပြီ။ သူတို့က ညဘက်ပိုင်းတွေဆို အမြဲခြေလျင်နဲ့ရွာတွေထဲကို စစ်ကြောင်းထိုးတယ်။ ကျွန်တော်တို့ တလုံးမိုင်းဆွဲလိုက်လို့ သေဆုံးသွားတဲ့သူတွေထဲမှာ အကြီးတကောင်ပါတယ်လို့ သိရတယ်။ သူတို့ကို နောက်တခါ မိုင်းဆွဲရင် ရွာတွေကို မီးရှို့မယ်ဆိုပြီး ပြောထားတော့ ရွာသားတွေကတော့ ကြောက်လန့်နေတယ်။ လောလောဆယ် ထွက်ပြေးတိမ်းရှောင်တာတွေတော့ မရှိသေးဘူး” လို့ ဗိုလ်တောက်ထွန်းက ပြောပါတယ်။

စစ်ကောင်စီတပ်ဖွဲ့တွေက ပြောဆိုခြိမ်းခြောက်နေပေမဲ့လည်း မိမိတို့ ဒေသကာကွယ်ရေးတပ်ဖွဲ့ဝင်တွေအနေနဲ့လည်း စစ်ကောင်စီစစ်ကြောင်းတွေကို မိုင်းဆွဲမှုတွေ ထပ်မံလုပ်ဆောင်သွားမှာဖြစ်ကြောင်းကိုလည်း အထက်ပါလူက ဆိုပါတယ်။

မိုင်းဆွဲပြီးတဲ့နောက် စစ်ကောင်စီစစ်ကြောင်းမှ လက်နက်တွေနဲ့ပြန်လည်ပစ်ခတ်ခဲ့ပေမဲ့လည်း မိမိတို့ပူးပေါင်းတပ်ဖွဲ့တွေက အထိအခိုက်မရှိ ပြန်လည်ဆုတ်ခွာနိုင်ခဲ့တယ်လို့ သိရပါတယ်။

မြောင် ဗိုလ်တောက်ထွန်းအထူးတပ်ဖွဲ့ (MBTT)၊ Blood Brothers၊ Hero ပျောက်ကြားတပ်ဖွဲ့ နဲ့ နတ်စစ်သည်တော်များဖောက်ခွဲရေး Local တပ်ပေါင်းစုတို့ ပူးပေါင်းတိုက်ခိုက်ခဲ့ပါတယ်။

ပြီးခဲ့တဲ့ ဒီဇင်ဘာ ၂၁ ရက်နေ့ကလည်း ကျောက်ရစ်အနောက်ရွာကနေ သရက်သာရွာဘက်ကို ဖြတ်ဆင်းလာတဲ့ အဆိုပါစစ်ကောင်စီစစ်ကြောင်းကိုပဲ ဗိုလ်တောက်ထွန်း မဟာမိတ်ပူးပေါင်းတပ်ဖွဲ့တွေက မိုင်းဆွဲတိုက်ခိုက်ခဲ့လို့ စစ်ကောင်စီတပ်ဖွဲ့ဝင်တဦးသေဆုံးသွားခဲ့သေးတယ်လို့ ဆိုပါတယ်။

စစ်ကိုင်း၊ ဒီဇင်ဘာ ၂၆၊ ၂၀၂၂။

စစ်ကိုင်းတိုင်း၊ မုံရွာမြို့၊ အမှတ် ၂ ရဲစခန်းက စခန်းမှူးနဲ့ရဲတပ်သားတွေလိုက်ပါလာတဲ့ကား ဒီဇင်ဘာလ ၂၆ ရက်ဒီမနက်ပိုင်းမှာ ပစ်ခတ်တိုက်ခိုက်ခံခဲ့ရပါတယ်။

စခန်းမှူးအပါအဝင် ၇ ဦးလိုက်လာတဲ့ကားကို မုံရွာမြို့၊ နန္ဒရပ်ကွက်၊ သမစိတ္တလမ်း၊ အင်ကြင်းခိုင်ဟိုတယ်အနီးမှာ ဒေသခံကာကွယ်ရေးတပ်ဖွဲ့ဝင်တွေက တိုက်ခိုက်ခဲ့တာဖြစ်ပြီး တိုက်ခိုက်မှုကြောင့် စခန်းမှူးနဲ့ ရဲ ၂ ဦး နေရာတင်သေဆုံးခဲ့တယ်လို့ မုံရွာခရိုင်တပ်ရင်း(၇) – Lightning People Defence Force တာဝန်ခံကပြောပါတယ်။

“မုံရွာမြို့ပေါ်က နန္ဒဝန်ရပ်ကွက်၊ အင်းကြင်းခိုင်ဟိုတယ်နားက ပစ်တိုင်းထောင်ကွမ်းယာဆိုင်ရှေ့မှာ ကွမ်းယာဝယ်ကြတာ၊ ကားပေါ်မှာအမှတ် ၂ စခန်းမှူးအပါအဝင် ၆ ယောက်နဲ့ စခန်းမှူးရဲ့မိန်းမလည်း ပါတယ်။ အဲဒီအမျိုးသမီးကလည်း ကွမ်းယာဆိုင်ဘေးမှာထိုင်စောင့်နေတာ။ သေတဲ့အထဲမှာ စခန်းမှူးတယောက်အပြင် သူ့ရဲ့ဘော်ဒီကပ် ၂ ယောက်ပါတယ်။ အောက်ကို ဆင်းပစ်တဲ့ ၂ ယောက်လည်းစုတ်ပြတ်နေပြီး သွေးအိုင်ထဲမှာပါ” လို့ ပြောပါတယ်။

အပြန်အလှန်ပစ်ခတ်ချိန် ၂ မိနစ်ဝန်းကျင်သာကြာခဲ့ပြီး အဆိုပါရဲတွေဘက်က ကား ၂ စီးနဲ့အင်အားထပ်ရောက်လာလို့ ပြန်ဆုတ်ခွာလာခဲ့ရတယ်လို့ ဆိုပါတယ်။

ဒီတိုက်ခိုက်မှုကို မုံရွာခရိုင်တပ်ရင်း(၇) – Lightning People Defence Force၊ Black Falcon မြို့ပြပျောက်ကြားအဖွဲ့တို့ ပူးပေါင်းလုပ်ဆောင်ခဲ့တာဖြစ်ပြီး ကာကွယ်ရေးရဲဘော်တဦးလည်း ထိခိုက်ဒဏ်ရာရရှိခဲ့တယ်လို့ သိရပါတယ်။

ပြီးခဲ့တဲ့ဒီဇင်ဘာလ ၂၁ ရက်ကလည်း မုံရွာမြို့နယ်၊ တောပုကျေးရွာအနောက်ဘက်ခြမ်းရှိ တောဝါကျောင်းအနီးမှာ ကင်းပုန်းဝတ်နေတဲ့ပျူစောထီးတွေကို မုံရွာခရိုင်တပ်ရင်း(၇) – Lightning People Defence Force အဖွဲ့က လက်နက်ကြီးနဲ့ပစ်ခတ်တိုက်ခိုက်ခဲ့ရာ ပျူစောထီး ၅ ဦးသေဆုံးခဲ့ပါသေးတယ်။

စစ်ကိုင်း၊ ဒီဇင်ဘာ ၂၆၊ ၂၀၂၂။

စစ်ကိုင်းတိုင်း၊ အင်းတော်မြို့နယ်၊ နတ်မဟုတ်ကြီးက ဖမ်းဆီးခံလိုက်ရတဲ့ပြည်သူ ၈ ဦးဟာသတင်းအစနပျောက်နေပြီးနောက် ရက်ရက်စက်စက်အသတ်ခံထားရတဲ့ အလောင်းတွေအဖြစ် ပြန်တွေ့ခဲ့တယ်လို့ ဆိုပါတယ်။

နိုဝင်ဘာလ ၂၈ ရက်မှာ စစ်ကောင်စီ ခမရ ၃၀၁ နဲ့ ခမရ ၄၁၆ ပေါင်းထားတဲ့ စစ်ကြောင်းကဖမ်းဆီးသွားတာဖြစ်ပြီး ဒီဇင်ဘာလ၂၅ ရက်မနေ့ကမှ ကမ်းနီးရွာအနီးမှာ ပြန်ရှာတွေ့ခဲ့တာဖြစ်တယ်လို့ ဆိုပါတယ်။

“အဲ့ဒီနားမှာမြှပ်ထားတယ်လို့ သတင်းရလို့ရှာတာ၊ အလောင်းတွေက တော်တော်များများပုပ်နေပြီ၊ သူတို့ကပျူစောထီးတိုင်တာခံရတာ၊ နတ်မဟုတ်ကြီးရွာသား ပျူစောထီးကိုယ်တိုင် စစ်ကြောင်းနဲ့လိုက်တာပြီး သူကတော့ထောက်ပံ့တယ်၊ သူက နိုင်ငံရေးလုပ်တယ်ဆိုပြီး လက်ညှိုးထိုးတိုင်တာ။” လို့ အင်းတော်ဒေသခံတဦးက ပြောပါတယ်။

ဓားစာခံတွေဖြစ်တဲ့ ဦးမင်းနိုင် အသက် ၅၀၊ ဦးကျော်သန်း အသက် ၆၀၊ သားဖြစ်သူ ဦးဘိုဘိုဝေ ၃၃နှစ်၊ ဦးကျော်ဌေး အသက် ၅၀၊ ဦးကျော်ထွန်း အသက် ၅၀၊ ဦးထွန်းနိုင် ၃၈နှစ်၊ ဦးမြင့်ဖေ အသက် ၆၀၊ ဦးသာပြူး ၆၈နှစ်တို့အသတ်ခံခဲ့ရပြီး ၂ဦးကတော့ ခေါင်းဖြတ်ခံထားရကာ ၆ ဦးကတော့ တုတ်နဲ့ရိုက်သတ်ခံထားရတယ်လို့ ဆိုပါတယ်။

အဆိုပါစစ်ကြောင်းဟာ ဓားစာခံတွေကို ဖမ်းဆီးခေါ်ဆောင်သွားပြီးနောက် ထီးချိုင့်ထဲကိုဝင်ကာ ရွာစဉ်ပတ်မီးရှို့နေတာဖြစ်ပြီး ခုလက်ရှိ အင်းတော်ဘက်ကိုပြန်ထွက်လာကာ ခရမ်းစပ်ကုန်းရွာနားမှာရှိနေတယ်လို့ သိရပါတယ်။

စစ်ကိုင်း၊ ဒီဇင်ဘာ ၂၅၊ ၂၀၂၂။

စစ်ကိုင်းတိုင်း၊ စစ်ကိုင်းမြို့နယ်၊ ညောင်ပင်ဝန်း ရဲစခန်းကနေ မြင်းမူနယ်ဖက်ကို အင်အားဖြည့်ဖို့သွားတဲ့ စစ်ကောင်စီတပ်သားတွေ ဒီဇင်ဘာလ ၂၃ ရက်နေ့လည်ပိုင်းလောက်မှာ မိုင်းဆွဲတိုက်ခိုက်ခံရတာကြောင့် ၃ ဦးသေဆုံးကာ အများအပြားဒဏ်ရာရရှိသွားခဲ့တယ်လို့ သိရပါတယ်။

အင်အား ၃၀ ကျော်ပါတဲ့စစ်ကောင်စီစစ်ကြောင်းက မြင်းမူမြို့နယ်၊ ထီးဆောင်းရွာကို အင်အားဖြည့်ဖို့သွားချိန် ညောင်ပင်ဝန်းရွာနဲ့ပျော့ရွာအကြားကိုအရောက်မှာ အသင့်ထောင် ထားတဲ့ပဒေသာမိုင်း ၁၆ လုံးနဲ့ တိုက်ခိုက်ခဲ့တာလို့ Demon King Defence Force မှ ပြန်ကြားရေးတာဝန်ခံက ပြောပါတယ်။

“စစ်ကောင်စီတွေက ခြေကျင်သွားတာ။ အဲဒီနောက်က ကားတစီးက လိုက်ပါလာတယ်။ ကားပေါ်ကကောင်တွေနဲ့ ခြေကျင်သွားတဲ့ကောင်တွေ စုစုပေါင်းကတော့ သုံးဆယ်ကျော်လောက်ရှိတယ်။ ကျနော်တို့က မိုင်းတွေကို ခွဲလိုက်တဲ့အခါမှာ သုံးကောင်က နေရာမှာတင်သေတယ်ဗျ။ နောက်ထပ်လည်း တော်တော်များများ ဒဏ်ရာရသွားတယ်” လို့ ဆိုပါတယ်။

အခုလို မိုင်းဆွဲတိုက်ခိုက်တိုက်ခံရပြီးနောက် စစ်ကောင်စီဘက်က သေဆုံးသူ ၃ ဦးနဲ့ ထိခိုက်ဒဏ်ရာရရှိသွားသူတွေများတဲ့အတွက် ထီးဆောင်းကျေးရွာကို ဆက်မသွားတော့ဘဲ ညောင်ပင်ဝန်း ရဲစခန်းကို ပြန်လည်ဆုတ်ခွာသွားခဲ့တယ်လို့ အထက်ပါတာဝန်ခံက ဆိုပါတယ်။

“ကျနော်တို့မိုင်းဆွဲပြီးတဲ့အခါမှာလည်း သူတို့ဘက်က ပြန်လည်ပစ်ခတ်ချိန်တောင် မရခဲ့ဘူးဗျ။ ချက်ချင်းပဲ ရဲစခန်းကို ပြန်ဆုတ်သွားခဲ့တယ်။ ကျနော်တို့ဘက်ကတော့ အထိအခိုက်တစုံတရာ မရှိခဲ့ဘူး”လို့ဆိုပါတယ်။

ပြီးခဲ့တဲ့ ဒီဇင်ဘာလ ၂၀ ရက်မှာလည်း ညောင်ပင်ဝန်းရဲစခန်းရှေ့လမ်းမပေါ်မှာ ကင်းစောင့်နေတဲ့ စစ်ကောင်စီတပ်သား ၁၀ ဦးကို Demon King Defence Force အပါအဝင် ကာကွယ်ရေးတပ်ဖွဲ့ ၆ ဖွဲ့က ၄၀ မမ ပရိန်ကျည် ၃ လုံး၊ ဖို့တီး ၂ လုံးတို့နဲ့ ပစ်ခတ်တိုက်ခိုက်ခဲ့သေးတယ်လို့ သိရပါတယ်။

စစ်ကိုင်း၊ ဒီဇင်ဘာ ၂၄၊ ၂၀၂၂။

စစ်ကိုင်းတိုင်း၊ ရွှေဘိုမြို့နယ်၊ မြင်းစီးရွာက ပြည်သူပိုင်စပါးတွေကို ခိုးရိတ်နေတဲ့ စစ်ကောင်စီတပ်သားတွေနဲ့ ပျူစောထီးတွေကို ဒီဇင်ဘာလ ၂၄ ရက်ဒီနေ့မနက် ၁၁ နာရီလောက်မှာ ဗုံးကြဲတိုက်ခိုက်ခဲ့ပါတယ်။

မြင်းစီးရွာက ပျူစောထီးတွေနဲ့ စစ်ကောင်စီတပ်သား စုစုပေါင်းအင်အား ၁၅ ဦးလောက်ကို သေနတ်နဲ့အရင်ပစ်ခတ်ပြီးမှ ဒရုန်းသုံးပြီး ဗုံးသီး ၃ လုံးနဲ့ပစ်ချတိုက်ခိုက်ခဲ့တာလို့ FIRE Dragon (KU) တာဝန်ခံ ဗိုလ်ထူးက ပြောပါတယ်။

“အင်အားကတော့ ကင်းဝတ်နေတာရောဆိုရင် ၁၅ ကောင်လောက်ရှိတယ်။ ၁၁ နာရီကျော်လောက်မှာ ဗုံးသီး ၃ လုံး ချခဲ့တယ်။ အသေအပျောက်စာရင်းကတော့ နယ်မြေခံတွေပြောမှသိရမှာဖြစ်လို့ မသိရသေးပါဘူး။ ဗုံးမချခင်မှာ ၇ မိနစ်ခန့် အပြန်အလှန်ပစ်ခတ်မှု ဖြစ်ခဲ့သေးတယ်” လို့ ပြောပါတယ်။

အဲ့ဒီစစ်ကောင်စီတပ်တွေဘက်က လက်နက်ကြီးတွေနဲ့ ပြန်လည်ပစ်ခတ်ခဲ့ပေမယ့် ကာကွယ်ရေးရဲဘော်တွေ အထိခိုက်မရှိခဲ့ဘူးလို့လည်း ဆိုပါတယ်။

FIRE Dragon (KU)၊ Northern Tigers Group (NTG)၊ D.U.G.F (KU Dragon)၊ Wolf Guerrilla (Ye-U)နဲ့ နယ်မြေခံ ကာကွယ်ရေးအဖွဲ့တွေက တိုက်ခိုက်ခဲ့တာဖြစ်ပြီး၊ ပြီးခဲ့တဲ့ ဒီဇင်ဘာလ ၃ ရက်ကလည်း ရွှေဘိုမြို့နယ်၊ ထညှင်းကုန်းရွာကနေအိမ်တွေကိုမီးဝင်ရှို့တဲ့ စစ်သားနဲ့ပျူစောထီးတွေကို FIRE Dragon (KU) အဖွဲ့က ဒရုန်းနဲ့ဗုံးကြဲတိုက်ခိုက်ခဲ့ရာ စစ်ကောင်စီဘက်က ၅ ဦးခန့် သေဆုံးခဲ့ပါသေးတယ်။