စစ်ကိုင်း

စစ်ကိုင်း၊‌ ဧပြီ ၄၊ ၂၀၂၂။

စစ်ကိုင်းတိုင်း မုံရွာအကျဥ်းထောင်မှာ မနေ့က ထောင်တွင်းဖိနှိပ်ခံရမှုတွေကို မကျေနပ်လို့ နိုင်ငံရေးအကျဥ်းသားတွေ ထောင်တွင်းလှုပ်ရှားမှုပြုလုပ်ခဲ့ချိန်မှာ စစ်ကောင်စီက ပစ်ခတ်ဖြိုခွင်းခဲ့လို့ အကျဥ်းသားတဦး သေဆုံးပြီး ၅ဦး ဒဏ်ရာရရှိခဲ့တယ်လို့ မုံရွာဒေသခံတဦးဆီက သိရပါတယ်။

ဧပြီလ ၃ရက်မနေ့က ညနေ ၅နာရီဝန်းကျင်လောက်ကစလို့ ဆူပူမှုဖြစ်နေခဲ့ပြီး အစပိုင်းမှာ သေနတ်ပစ်ဖောက်သတိပေးခဲ့ပေမယ့် ကြွေးကြော်သံတွေဟာ ပိုပြီး ဟိန်းထွက်လာခဲ့လို့ နောက်ထပ် မီးသတ်ကား၂စီး၊ စစ်ကားကြီး ၂စီးနဲ့ အိမ်စီးကားတွေ ဝင်သွားပြီးနောက်ပိုင်းမှာ သေနတ်သံ အချက် ၃၀ကျော် ထပ်ပြီးကြားခဲ့ရတယ်ဆိုတဲ့ အကြောင်းကို မုံရွာဒေသခံ ကိုအာကူးက ပြောပါတယ်။

“ထောင်ကမြို့လယ်ခေါင်မှာရှိတာဆိုတော့ တို့ပြည်သူတွေညီရဲ့လားဟေ့ဆိုတဲ့ အသံက ၁၅မိနစ်လောက်အထိ ဟိန်းထွက်သွားတယ်၊ အဲ့အချိန်မှာပဲ ရိုက်နှက်သံတွေ ဖြိုခွင်းသံတွေ အတိုင်းသားကြားရတယ်လို့ ကျနော်တို့သိရတယ်။အဲ့နောက်မှာ ၁ယောက်ကျတယ် ၅ယောက်ဒဏ်ရာရတယ်၊ ထောင်ကလည်း မီးနည်းနည်းလောင်သွားတယ်လို့ အကြမ်းဖျင်းသိထားတယ် ၊ ဓါတ်ပုံတွေအရကတော့ ဆုံးသွားတဲ့ တယောက်က ရင်ညွန့်ကို ထိသွားတာဗျ ” လို့ ကိုအာကူးက ပြောပါတယ်။

ဒဏ်ရာရရှိသူတွေကတော့ ဖြိုခွင်းခံရချိန်ပစ်ခံရတဲ့ ရာဘာကျည်တို့ ဘက်ခွ( လောက်လေးခွ) ဒဏ်ရာတွေ ရရှိထားပြီး ၂ဦးကတော့ ဒဏ်ရာပြင်းထန်တယ်လို့ သိရပါတယ်။

” ၂ယောက်ပဲ အခြေအနေဆိုးတယ်ဗျ၊ အသက်ကြီးကြီး အဖိုးကြီးတယောက်ကတော့ ခြေထောက်တွေ ဒူးတွေထိသွားတယ်ဗျ၊ သွေးတွေရဲလို့၊ နောက်ညီလေးတယောက်ကတော့ လက်တွေနဲ့ တစ်ကိုယ်လုံးထိထားတယ်” လို့ ဆက်ပြောပါတယ်။

ဒဏ်ရာရတဲ့ သူတွေကို စစ်ဆေးရုံနဲ့ ထောင်တွင်းဆေးရုံတခုခုမှာ ဆေးကုပေးနေပေမယ့် သေဆုံးသွားသူကတော့ ဘယ်သူဘယ်ဝါဆိုတာ မသိရသေးသလို သင်္ဂြိုလ်လိုက်တယ်လို့လည်းသတင်းမရသေးဘူးလို့ ပြောပါတယ်။

ထောင်တွင်းက နိုင်ငံရေးအကျဥ်းသားတွေက ထောင်တွင်းမှာဖြစ်ပျက်နေတာကို အပြင်က ပြည်သူတွေကို သိစေချင်တာရယ် ဘယ်တော့မှ သွေးအေးမသွားဘူးဆိုတာ ပြသတဲ့ အနေနဲ့ အခုလို ထောင်တွင်းလှုပ်ရှားမှုတွေကို လုပ်နေတာဖြစ်တယ်လို့ ကိုအာကူးကပဲ ဆက်ပြောပါတယ်။

” ထောင်ထဲက ရဲဘော်တွေက အကြောင်းမဲ့ ပြုလုပ်တာမဟုတ်ဘူးဗျ၊ သူတို့ ထောင်ထဲမှာ ဖိနှိပ်ခံရမှု ရက်စက်မှုတွေကို မခံနိုင်တဲ့ အဆုံးမှာ ကြွေးကြော်သံနဲ့ အတူ ပြည်သူလူထုကို အသိပေးခြင်းဖြစ်တယ်၊ အပြင်ကပြည်သူတွေလည်း သွေးမအေးကြဖို့ လှုံ့ဆော်တယ်လို့ ကောက်ချက်ချတယ်၊ ဒါကလည်းရဲဘော်တွေရဲ့ စိတ်နဲ့ ကျနော်နဲ့ တသားတည်းကျမှာပါ” လို့ ပြောပါတယ်။

အဲ့ဒီလို ဖြစ်နေတဲ့ အချိန်မှာ ပြည်သူတွေကလည်း သတင်းတုသတင်းမှားတွေ မတင်ဖို့နဲ့ မယုံကြဖို့ နဲ့ မနေ့က ၄၀ မမနဲ့ ပစ်တယ်ဆိုတဲ့ သတင်းတွေက မဟုတ်ဘူးဆိုတဲ့ အကြောင်းအပြင် အဲ့တာတွေက ထောင်ထဲမှာရှိတဲ့ ရဲဘော်တွေရဲ့လုံခြုံရေးကို အများကြီး ထိခိုက်စေနိုင်တယ်လို့ ပြောပါတယ်။

မနေ့ကညပိုင်းမှာ ဖြိုခွင်းခံရမှုကို လက်တုံ့ပြန်တဲ့ အနေနဲ့ မုံရွာမြို့အနှံ့မှာ ပေါက်ကွဲသံတွေထွက်ပေါ်ခဲ့ပြီး လက်ရှိမှာတော့ မုံရွာအကျဥ်းထောင်မှာ စစ်တပ်က တပ်စွဲထားပါတယ်။

စစ်ကိုင်း၊‌ မတ် ၂၈၊ ၂၀၂၂။

စစ်ကိုင်းတိုင်း၊ မြောင်မြို့နယ်အတွင်း မတ်လ ၂၇ ရက် မနေ့ကညနေပိုင်းမှာ စစ်ကောင်စီတပ်ဖွဲ့ဝင်တွေစီးလာတဲ့ ကားတစီး မိုင်းဆွဲတိုက်ခိုက် ခံခဲ့ရပါတယ်။

မြောင်မြို့ကနေထွက်လာတဲ့ အဲ့ဒီကားကို မြောင်မြို့တောင်ဘက်အထွက် ဆီဆိုင် ၂ ဆိုင်ကြားမှာ PDF သုံးဖွဲ့က ဆီးကြိုပြီး ပဒေသာမိုင်းနဲ့တိုက်ခိုက်ခဲ့တာလို့ မြောင်မြို့နယ်တော်လှန်ရေးတပ် – MRA တာဝန်ခံက ပြောပါတယ်။

“ ကျနော်တို့မိုင်းဆွဲတိုက်ခိုက်လိုက်တာပါ၊ မြောင်မြို့တောင်ဘက်အထွက် ဆီဆိုင် ၂ ဆိုင်ကြားထဲမှာ မိုင်းခွဲတိုက်ခိုက်လိုက်တာပါ၊ သူတို့က မြောင်ကနေ တောင်ဘက်ထွက်အလာ ညနေ ၄ နာရီလောက်မှာ ကျနော်တို့ တိုက်ခိုက်လိုက်တာပါ၊” လို့ သူကပြောပါတယ်။

တိုက်ခိုက်လိုက်တဲ့အချိန်မှာ ကားမှန်တွေလည်းကြေမွသွားပြီး၊ ကားထဲလိုက်ပါလာတဲ့ စစ်ကောင်စီတပ်ဖွဲ့ဝင် ၂ ဦးလည်း သေဆုံးခဲ့တယ်လို့ MRA တာဝန်ခံက ဆက်ပြောပြပါတယ်။

ဒီတိုက်ခိုက်မှုကို မြောင်မြို့နယ်တော်လှန်ရေးတပ် – MRA ၊ စစ်ကိုင်းခရိုင်တပ်ရင်း ၁ အရန်တပ်ခွဲ ၁ နဲ့ Zarmani Revolution Force ပြောက်ကျားတပ်ဖွဲ့တို့က ပူးပေါင်းတိုက်ခိုက်တာလို့ MRA ရဲ့ ထုတ်ပြန်ချက်မှာ ဆိုထားပါတယ်။

ဒါ့အပြင် မြောင်မြို့နယ်အတွင်း ပြောက်ကျားစစ်ဆင်ရေးတွေကို အရှိန်အဟုန်မြင့်လုပ်ဆောင်နေပြီး၊ အဲ့လိုလုပ်ဆောင်ရာမှာလည်း ပြည်သူတွေကို အထိအခိုက်မရှိအောင် ဂရုတစိုက်ဆောင်ရွက်နေတာဖြစ်သလို ပြည်သူတွေအနေနဲ့ကတော့ စစ်ကောင်စီတပ်တွေရဲ့ လှုပ်ရှားမှုတွေကို သတိကြီးကြီးထားပြီး ဂရုတစိုက်သွားလာကြဖို့ MRA က သတိပေး ပြောကြားထားပါသေးတယ်။

ဒီဖြစ်စဥ်မတိုင်ခင် ပြီးခဲ့တဲ့ မတ်လ ၂၄ ရက် ညပိုင်းမှာလည်း မြင်းမူမြို့နယ်အတွင်း ပတ်ကင်းလှည့်နေတဲ့ စစ်ကောင်စီအင်အား ၄၀ ကျော်ကို MRA အပါအဝင် မဟာမိတ် ၄ ဖွဲ့က မိုင်းဆွဲတိုက်ခိုက်ခဲ့တာကြောင့် စစ်သား ၂ ဦးသေဆုံးပြီး၊ ၈ ဦး ဒဏ်ရာပြင်းထန်ရရှိခဲ့တယ်လို့ မြေပြင်တိုက်ခိုက်သူ ရဲဘော်တွေရဲ့ပြောဆိုချက်အရ သိရပါတယ်။

စစ်ကိုင်း၊ မတ် ၂၆၊ ၂၀၂၂။

စစ်ကိုင်းတိုင်း၊ ကလေးမြို့မှာ မတ်လ ၂၅ ရက်မနေ့က CDM လှုပ်ရှားမှုပါဝင်တဲ့အလယ်တန်းပြ ကျောင်းဆရာမတဦးကို စစ်ကောင်စီက ဖမ်းဆီးသွားတယ်လို့ ဒေသခံတွေဆီက သိရပါတယ်။

အောင်သစ္စာရပ်ကွက် အမှတ် ၂ အလယ်တန်းကျောင်းခွဲ မှာ တာ ဝန်ထမ်းဆောင်ခဲ့တဲ့ အသက် ၅၅ နှစ်အရွယ် အလယ်တန်းပြဆရာမ ဒေါ်အေးမွန်ဖြစ်ပြီး၊ မနေ့က ညနေ ၅ နာရီလောက်မှာ အဲ့ဒီကျောင်းအနီးက သူနေတဲ့နေရာမှာပဲ အဖမ်းခံလိုက်ရတာလို့ ဒေသခံတဦးက ပြောပါတယ်။

“မနေ့ကညနေ ၅ နာရီလောက်က ဖမ်းသွားတာ၊ သတင်းပေး အတိအကျရှိလို့ ဖြစ်မယ်၊ အင်အားက ကား ၄ စီးနဲ့လာတာ၊ အမျိုးသမီးတွေရောပါတယ်” လို့ သူကပြောပါတယ်။

ဆရာမ ဒေါ်အေးမွန်ဟာ အခြားဒေသကနေ တာဝန်အရ အောင်သစ္စာရပ်ကွက်အမှတ် ၂ အလယ်တန်းကျောင်းခွဲအနီးက အဆောင်မှာ အာဏာမသိမ်းခင်ကတည်းက နေထိုင်နေတာလို့ သိရပြီး၊ သူ့ကို စစ်ကောင်စီက ဒေသကွပ်ကဲမှုစစ်ဌာနချုပ် – ဒကစ ( ကလေး) ကို ဖမ်းဆီး ခေါ်ဆောင်သွား တယ်လို့လည်း ဒေသခံတဦးက ဆက်ပြောပါတယ်။

ဒီဖြစ်စဥ်နဲ့ ပတ်သက်တဲ့ နောက်ဆက်တွဲအခြေအနေတွေကိုတော့ မြေလတ်အသံက ဆက်လက်စုံစမ်းနေဆဲပါ။ စစ်တပ်ကအာဏာသိမ်းလိုက်တဲ့အချိန်ကစပြီး လက်ရှိအချိန်ထိ ကလေးမြို့အတွင်းက စစ်ကောင်စီရဲ့ဖမ်းဆီးခံထားရသူ ၄၀၀ ကျော်ရှိတယ်လို့လည်း ကလေးမြို့ပင်မသပိတ်အင်အားစု တာဝန်ခံက မြေလတ်အသံကို ပြောပါတယ်။

စစ်ကိုင်း၊ မတ် ၂၂၊ ၂၀၂၂။

စစ်ကိုင်းတိုင်း၊ ကသာခရိုင် ထီးချိုင့်မြို့နယ်မှာ စစ်ကောင်စီဆရာဝန်ရဲ့ကားကို PDF က မိုင်းဆွဲ တိုက်ခိုက်ခဲ့ပြီး အဲ့ဒီဖြစ်စဥ်ကို လာကြည့်တဲ့ စစ်အုပ်စု မိုင်းထပ်ဆွဲခံရလို့ ၄ဦး‌သေဆုံးပြီး ၅ဦး ဒဏ်ရာပြင်းထန်ခဲ့တယ်လို့ သိရပါတယ်။

မတ်လ ၂၁ရက် မနေ့က ည ၈နာရီဝန်းကျင်မှာ စစ်ဆရာဝန်ကားကို ထီးချိုင့်မြို့နယ် မောင်းကုန်းကျေးရွာအနီး ဆွဲမိုင်း ၄လုံးနဲ့ တိုက်ခိုက်ခဲ့ပြီး ဆရာဝန်ဖြစ်သူ နေရာမှာပဲ သေဆုံးခဲ့သလို ဒီကနေ့ မနက်ပိုင်းမှာ ဒုတပ်ကြပ်လို့ယူဆရသူတဦး သေဆုံးခဲ့တယ်လို့ Special 9-HPDF တာဝန်ခံတဦးက ပြောပါတယ်။

“စစ်ဆရာဝန်တယောက်နဲ့ စစ်အရာရှိတယောက်ရောက်နေတယ်လို့သတင်းရထားတာရှိတာပါ၊ သူကနီကယ်အနားလေးကိုအရောက်မှာ ကြားကနေဖြတ်ပြီးမိုင်းခွဲပြီးတိုက်ခိုက်တာပေါ့၊သေဆုံးမှုကတော့ စစ်ဆရာဝန်ကတော့ နေရာမှာတင် ပွဲချင်းပြီးသေတယ်” လို့ ပြောပါတယ်။

ဆရာဝန်ကား ဖောက်ခွဲခံရပြီး နာရီဝက်အကြာမှာ ရဲနဲ့ စစ်သား‌တွေ ဆိုင်ကယ် ၃စီးနဲ့ ထပ်ရောက်လာခဲ့လို့ နောက်ထပ် မိုင်း၄ လုံးကို ခွဲပြီးတိုက်ခိုက်ခဲ့တာဖြစ်တယ်လို့ Special 9-HPDF တာဝန်ခံက ဆက်ပြောပါတယ်။

” အဲဒီလူနာတွေကိုလာခေါ်မယ့်စစ်ခွေး ရဲတွေခွေးတွေရောက်လာတယ်၊ဆိုင်ကယ် ၃ စီးနဲ့ထပ်ရောက်လာတာ၊အဲဒါကိုတကြိမ်ထပ်ပြီးတော့ ကျန်တဲ့မိုင်း ၄ လုံးကိုထပ်ခွဲလိုက်တယ် အဲဒီလိုထပ်ခွဲတာ ၂ ယောက်ထပ်သေပြီး ၅ ယောက်ကတော့ တကောင်းဆေးရုံမှာရောက်နေတယ်လို့သိရပါတယ်” လို့ အဲ့ဒီတာဝန်ခံကပဲ ပြောပါတယ်။

အဲ့ဒီနေ့က စုစုပေါင်း မိုင်း ၈လုံး ဆွဲတိုက်ခိုက်ခဲ့ပြီး တကြိမ်မှာ ၂ယောက်စီ သေဆုံးကာ စုစုပေါင်း ၄ဦး သေဆုံးခဲ့တဲ့ အပြင် ၅ဦးက ဒဏ်ရာပြင်းထန်လို့ တကောင်းဆေးရုံမှာ ဆေးကုသနေရတယ်လို့ သိရပါတယ်။

စစ်ကိုင်း၊ မတ် ၁၆၊ ၂၀၂၂။

စစ်ကိုင်းတိုင်း၊ ကလေးမြို့ အကျဉ်းထောင်မှာ မနေ့က နိုင်ငံရေးအကျဉ်းသားတွေနဲ့ ထောင်ပိုင်စကားများပြီး၊ ဆူပူမှုများဖြစ်ပွားပြီးခဲ့ရာ စစ်တပ်က လာရောက်ပစ်ခတ်ပစ်ခတ်ခဲ့လို့ အကျဉ်းသား ၇ ဦးသေဆုံးခဲ့တယ်လို့ ထောင်နဲ့နီးစပ်တဲ့ ဒေသခံတဦးထံက သိရပါတယ်။

“နိုင်ငံရေးအကျဉ်းသားကို ထောင်ပိုင်က မချေမငံပြောတာကို နိုင်ငံရေးအကျဉ်းသားက မကျေနပ်လို့ အချွန်နဲ့ ထောင်ပိုင်ရဲ့လည်ပင်းကို ထိုးလိုက်တယ်။ ပစ်ခတ်မှုတွေလည်းဖြစ်တယ်။ ပစ်ခတ်မှုဖြစ်တာက ကလေးအကျဥ်းထောင်ကို စစ်တပ်ကသွားဝိုင်းတယ်။ မြို့ထဲက ရဲတွေ‌ကော အင်အား ၃၀ နဲ့ ၄၀ လောက် ထောင်ကို အရေးပေါ်သွားကြတယ်။ ကျနော်တို့ ပထမဆုံးသိရတာက ကျဆုံးမှု (အကျဉ်းသား) ၇ ဦးလောက်လို့ သိရပါတယ်” လို့ ဒေသခံတဦးက ပြောပါတယ်။

NLD အစိုးရလက်ထက် ပြီးခဲ့တဲ့ ၂၀၁၉၊ မေလ ၈ ရက်နေ့ကလည်း စစ်ကိုင်းတိုင်း၊ ကလေးနဲ့ ရွှေဘိုက အကျဉ်းထောင်တွေမှာ နိုင်ငံတော်သမ္မတရဲ့ လွတ်ငြိမ်းချမ်းသာခွင့်က တန်းတူညီမျှမှုမရှိဘူးဆိုပြီး ထောင်တွင်းဆန္ဒပြတောင်းဆိုမှုတွေ ပြုလုပ်ခဲ့ပြီး၊ စစ်တပ်က အာဏာသိမ်းပြီးနောက်ပိုင်း ကလေးမြို့က အကျဉ်းထောင်မှာ ထောင်အာဏာပိုင်တွေနဲ့ နိုင်ငံရေးအကျဉ်းသားတွေ ပြဿနာတက်တာ ပထမဆုံးလို့ သိရပါတယ်။

စစ်ကိုင်း၊ မတ် ၁၃၊ ၂၀၂၂။

စစ်ကိုင်းတိုင်း၊ ရွှေဘိုမြို့နယ်၊ ဆိပ်ခွန်ရဲစခန်းရဲ့အနောက်ဘက်က လယ်ကွင်းထဲ သေနတ်ကျည်ဆံထိမှန်ထားလို့ သေဆုံးနေတဲ့ လူငယ်ရုပ်အလောင်း ၃ လောင်းကို မတ်လ ၁၃ ရက် ဒီကနေ့မနက် ၇ နာရီခန့်က တွေ့ရှိခဲ့တယ်လို့ သိရပါတယ်။

အသက် ၁၈ နှစ်ဝန်းကျင်အရွယ် ၂ ယောက်နဲ့ အသက် ၂၀ ကျော်တဦးအပါ အမျိုးသား ၃ ဦးဖြစ်ပြီးသေနတ်မှန်ထားတဲ့ ဒဏ်ရာတွေနဲ့ သေဆုံးနေတာလို့ သိရပါတယ်။

“မနေ့ကမုံရွာ-ရွှေဘိုကားလမ်းမကြီးပေါ်မှာ စစ်ကောင်စီက စစ်ဆေးတာတွေ လုပ်ကြတယ်။ လူတွေလည်းဖမ်းတယ်။ ညကျတော့ သေနတ်သံတွေကြားတယ်။ ပစ်သတ်ပြီးမှပဲ လာပစ်သလား အဲနေရာရောက်မှ ပစ်သတ်သလားတော့ မသိဘူး။ ဘယ်သူမှလည်း ထွက်မကြည့်ကြဘူး။ အလောင်းတွေ့တဲ့နေရာနဲ့ ရဲစခန်းကနီးနီးလေးရယ် သေတဲ့သူတွေက ဆိတ်ခွန်ရွာကတော့ မဟုတ်ဘူး အသက် ၁၇ နှစ် ၁၈ နှစ်အရွယ်က နှစ်ယောက် တယောက်က ၂၀ ကျော်လောက်အရွယ်တွေပါ” လို့ ဒေသခံတဦးကပြောပါတယ်။

သေဆုံးသူတွေဟာ ဘယ်သူ၊ ဘယ်ဝါဖြစ်တယ်ဆိုတာ မသိရသေးသလို၊ အလောင်းတွေကို လာသယ်မယ့်သူမရှိသေးတာကြောင့် အခုအချိန်အထိ အဲဒီနေရာမှာပဲ ရှိနေသေးတယ်လို့ ဒေသခံတွေက ပြောပါတယ်။

စစ်ကိုင်း၊ မတ် ၁၃၊ ၂၀၂၂။

စစ်ကိုင်းတိုင်း၊ တန့်ဆည်မြို့နယ် ချောင်းရိုးရွာနဲ့ စိမ်းစားရွာတွေကို မတ်လ ၁၂ရက် မနေ့က နေ့လည်ပိုင်းမှာ စစ်ကောင်စီက PDF တွေရှိတယ် အထင်နဲ့ ဝင်မီးရှို့ခဲ့ပြီး ထွက်ပြေးသူတွေကို သေနတ်နဲ့ ပစ်ခတ်ခဲ့လို့ ပြည်သူ ၃ဦး သေဆုံးခဲ့ပါတယ်။

စစ်ကောင်စီတပ်သားတွေက စိမ်းစားရွာကို အရင်မီးဝင်ရှို့ခဲ့ပြီး အမျိုးသမီးငယ်တဦးကို သေနတ်နဲ့ ပစ်ခဲ့သလို ချောင်းရိုးရွာကိုလည်း မီးဝင်ရှို့ခဲ့တာဖြစ်တယ်လို့ ဒေသခံတဦးက ပြောပါတယ်။

” စိမ်းစားရွာက ကောင်မလေးကို အရင်ပစ်ခဲ့တာ မီးရှို့ခဲ့ပြီး ချောင်းရိုးကို ထပ်လာရှို့တာ အဲ့ဒီမှာ ကြောက်ပြီး ထွက်ပြေးတဲ့ ချောင်းရိုးရွာက သားအဖနှစ်ယောက်ကို ထပ်ပစ်သတ်လိုက်တာ” လို့ ဒေသခံက ပြောပါတယ်။

စိမ်းစားရွာက အမျိုးသမီးငယ်ရဲ့ လက်မောင်းနဲ့ ရင်အုံကို ထိမှန်သေဆုံးခဲ့ပြီး ချောင်းရိုးရွာက သားအဖနှစ်ဦးကတော့
ခေါင်း နဲ့ ရင်အုံတို့ကို ထိမှန်သေဆုံးနေတာ ဖြစ်တယ်လို့ ပြောပါတယ်။

” ဒီနေ့မနက် အလောင်းဝင်ကောက်တော့ လက်နက်ကြီးနဲ့ ၃ချက်လှမ်းပစ်တယ်၊ သူတို့က ဟိုဘက်တရွာမှာ တပ်စွဲထားတာ လူတွေမြင်တော့ လက်နက်ကြီးနဲ့ လှမ်းပစ်တာ” လို့ ‌‌ဒေသခံတဦးက ပြောပါတယ်။

စိမ်းစားရွာမှာတော့ အိမ်ခြေ ၂၇လုံးနီးပါး မီးလောင်ဆုံးရှုံးခဲ့ပြီး ၁ဦးသေဆုံးခဲ့သလို ချောင်းရိုးရွာက ကြက်ခြံ၅ လုံးနဲ့ နေအိမ် ၁၅လုံးနီးပါး မီးလောင်ဆုံးရှုံးခဲ့ပါတယ်။

” ဘုရားကျောင်းကိုလည်း ရှို့တယ် မီးတို့ခဲ့တာ သီလရှင် ၃ပါးက မီးသတ်နိုင်လိုက်တယ် လောင်တော့ မလောင်သွားဘူး၊ အခုရွာထဲမှာ မီးတွေကတော့ ငွေ့ငွေ့လေးတော့ လောင်နေတယ် ဘေးအိမ်တွေတော့ မကူးတော့ပါဘူး” လို့ ပြောပါတယ်။

လက်ရှိချောင်းရိုးရွာ တရွာလုံး ဘေးလွတ်ရာကို ပြေးနေကြပြီး သေဆုံးသွားတဲ့ သားအဖနှစ်ဦးကို သင်္ဂြိုဟ်ဖို့ ပြင်ဆင်နေကြတယ်လို့ သိရပါတယ်။

မတ်လ ၁၂ရက် မနေ့က မနက် ၁၁နာရီဝန်းကျင်မှာ စစ်ကောင်စီနဲ့ PDF နှစ်ဖွဲ့ တည်ဆည်မြို့နဲ့ ရေဦးမြို့အကြားမှာ တိုက်ပွဲဖြစ်ခဲ့ပြီး စစ်ကောင်စီဘက်က ၃ဦး သေဆုံးပြီး ၁ဦး အရှင်ဖမ်းဆီးခံခဲ့ရပါတယ်။

စစ်ကိုင်း၊ မတ် ၁၂၊ ၂၀၂၂။

စစ်ကိုင်းတိုင်း၊ တန့်ဆည်မြို့နယ်က ရွာ ၂ရွာကို စစ်ကောင်စီက PDFတွေ ရှိတယ် အထင်နဲ့ ဒီနေ့ နေ့လည်ပိုင်းကစပြီး မီးနဲ့ရှို့နေတယ်လို့ ဒေသခံတွေ ဆီက သိရပါတယ်။

မတ်လ ၁၂ရက် ဒီနေ့ မနက်ပိုင်း ဒေသခံ PDF တွေနဲ့ တိုက်ပွဲဖြစ်ခဲ့ပြီး နေ့လည် ၁၂နာရီ ဝန်းကျင်ကစလို့ အနီးနားက ချောင်းရိုးရွာနဲ့ စိမ်းစားရွာ ၂ရွာကို မီးရှို့ခဲ့တာ ဖြစ်တယ်လို့ ဒေသခံတဦးက ပြောပါတယ်။

” ချောင်းရိုးရွာ မြောက်ပိုင်းက ကြက်ခြံတွေနဲ့ အိမ် ၇လုံးလောက် အခုလောလောဆယ် မီးထဲပါသွားပြီ၊ ရွာရဲ့ မြောက်ဘက် ၂မိုင်နီးပါးလောက်မှာ တိုက်ပွဲဖြစ်တာကို PDFတွေ ရွာထဲကို ဝင်ပြေးလာတယ်ထင်ပြီး ရွာတွေကို မီးရှို့တာပါ” လို့ ဒေသခံတးဦးက ပြောပါတယ်။

မီးရှို့ခံလိုက်ရတဲ့ စိမ်းစားရွာက ဗုဒ္ဓဘာသာရွာဖြစ်ပြီး ချောင်းရိုးရွာကတော့ ခရစ်ယာန်ရွာ ဖြစ်ပြီး ချောင်းရိုးရွာဘုရားကျောင်းက ဆိုင်ကယ်တစီးကိုလည်း မီးရှို့ဖျက်ဆီးသွားတယ်လို့ သိရပါတယ်။

စိမ်းစားရွာမှာလည်း စစ်ကောင်စီမီးရှို့ထားပြီး ရွာနားကို ကပ်ခွင့်မပေးဘူးလို့ ပြောပါတယ်။

” ဘယ်သူမှရွာနား ကပ်လို့ မရဘူး ရွာထဲရှိတဲ့ သူတွေကိုလည်း သေနတ်နဲ့ထောက်ပြီး ရွာပြင်ထွက်ခိုင်းပြီး ရွာကို မီးရှို့နေတာပါ” လို့ ဒေသခံတဦးက ပြောပါတယ်။

လက်ရှိအချိန်အထိ ချောင်းရိုးရွာမှာ ကြက်ခြံ ၁၀ လုံးနဲ့ အိမ်ခြေ အနည်းဆုံး ၇လုံး ‌မီး‌လောင်ထားပြီး စစ်ကောင်စီ တပ်သားတွေ ရွာနားဝန်းကျင်းမှာပဲ ရှိသေးတာကြောင့် ပြည်သူတွေ မီးဝင်ငြှိမ်းသတ်ခွင့်မရသေးဘူးလို့သိရပါတယ်။