မြေလတ်အသံ၊ စက်တင်ဘာ ၂၈၊ ၂၀၂၅။

စစ်ကိုင်းတိုင်းအခြေစိုက် တမူးခရိုင်အမှတ် ၂ တပ်ရင်းမှ အပတ်စဥ် ၁ စစ်သင်တန်းဆင်းပွဲကို တပ်ရင်းဌာနချုပ်မှာ အောင်မြင်စွာပြုလုပ်ပေးခဲ့တယ်လို့ အဲ့ဒီတပ်ရင်းက စက်တင်ဘာ ၂၇ ရက်မှာ ထုတ်ပြန်ပါတယ်။

အဲ့ဒီသင်တန်းဆင်းပွဲအခမ်းအနားကို စက်တင်ဘာ ၂၆ ရက် မနက် ၆ နာရီခွဲကနေ မနက် ၁၀ နာရီထိ ၄ နာရီကြာ ပြုလုပ်ခဲ့တယ်လို့လည်း သိရပါတယ်။

ဩဂုတ်လဒုတိယပတ်ကစတင်ခဲ့တဲ့ဒီသင်တန်းကို ၄၅ ရက်ကြာ ပြုလုပ်ခဲ့ပြီး တိုက်ခိုက်ရေးတပ်ဖွဲ့၀င် အမျိုးသား ၅၂ ဦး၊ အမျိုးသမီး ၁၄ ဦး စုစုပေါင်း တပ်ဖွဲ့၀င် ၆၆ ဦးတို့ပါ၀င်ခဲ့တယ်လို့ တမူးခရိုင်အမှတ် ၂ တပ်ရင်းမှ တပ်ရင်းမှူးက ပြောပါတယ်။

တန့်ဆည်၊ စက်တင်ဘာ ၂၇၊ ၂၀၂၅။

စစ်ကိုင်းတိုင်း၊ တန့်ဆည်မြို့နယ်၊ ကံထူးမရွာ လေကြောင်းတိုက်ခိုက်ခံရမှုမှာ သေဆုံးသူ ၃ ဦးထပ်တိုးလာပြီးစုစုပေါင်း ၁၁ ဦးအထိရှိလာပြီး ဒဏ်ရာရသူတွေထဲမှာ စိုးရိမ်ဒဏ်ရာရထားသူတွေလည်းရှိတယ်လို့ ဒေသခံတွေဆီက သိရပါတယ်။

ကံထူးမရွာက ‘နိုဘယ်ဝမ်း’ ဆီပန့်ဆိုင်နဲ့ ‘ဇွဲထက်’ အအေးဆိုင်အနီး လူစည်ကားတဲ့ နေရာကို စက်တင်ဘာ ၂၆ ရက် မနေ့ကနေ့လယ် ၁၁ နာရီခွဲမှာ စစ်ကော်မရှင်တပ်က ဗုံးကြဲတိုက်ခိုက်ခဲ့တာပါ။

လေကြောင်းတိုက်ခံရမှုမှာ ကနဦး အသက်၂၀ အရွယ် ဆီဆိုင်ပိုင်ရှင်ရဲ့သမီး ကိုယ်ဝန်သည် မစံထိပ်ထားဝေ၊ ကုန်စိမ်းရောင်းသူ ၂၁ နှစ်အရွယ် မမိထက်၊ ၂၇ နှစ်အရွယ်ကိုသက်အောင်၊ ပန်းရံလုပ်ကိုင်နေတဲ့ အသက် ၄၃ နှစ် ကိုဖိုးထွန်း၊ အသက် ၂၀ ကျော်အရွယ် ကိုတူးနိုင်၊ ထထူး၊ နေအောင်၊ စိုးကို တို့ သေဆုံးခဲ့ပါတယ်။

“ညနေပိုင်း ထပ်ရှာတော့ ဆီဆိုင်ပိုင်ရှင် ကိုပြူးစိန်ကို ရှာမတွေ့တော့ဘူး။ သေဆုံးတဲ့အထဲပါသွားတယ်လို့ ယူဆရတယ်။ ဆောက်လက်စနှစ်ထပ်တိုက်ပိုင်ရှင်ပါ”လို့ မြို့နယ်ပြည်သူ့လုံခြုံရေးအဖွဲ့တာဝန်ခံက ပြောပါတယ်။

ဒါ့အပြင် မနေ့ညနေပိုင်းမှာဆေးကုသမှုခံယူနေတဲ့ ကိုအောင်ကိုဝင်း၊ စက်တင်ဘာ ၂၇ ရက် ဒီနေ့မနက်ပိုင်းမှာ ကိုကျော်ကိုလင်း သေဆုံးခဲ့ပြီး ပျောက်ဆုံးနေတဲ့ကိုပြူးစိန်ဆိုသူကိုလည်း သေဆုံးပြီလို့ ယူဆထားတယ်လို့ ဆိုပါတယ်။

“ကိုအောင်ကိုဝင်းက ဈေးလာဝယ်တဲ့သူ ကားဖြတ်မောင်းတဲ့အချိန် အချခံလိုက်တာ မနေ့ညနေက ဆုံးတာ။ ကိုကျော်ကိုလင်းက ချောင်းဆုံရွာက ဒီဘက်ရောက်နေတဲ့အချိန်နဲ့ တွေ့သွားတာ”လို့ မြို့နယ်ပလဖတာဝန်ခံက ပြောပါတယ်။

ကနဦးသေဆုံးသူတွေဟာ ရုပ်အလောင်း ၅ လောင်းသာရခဲ့ပြီး ကျန်တဲ့သူတွေဟာ အပိုင်းပိုင်းပြတ်နေတဲ့ ခန္ဓာကိုယ်တွေကို လိုက်လံကောက်ယူခဲ့ရတာလို့ သိရပါတယ်။

စစ်ကော်မရှင်က ရွေးကောက်ပွဲ‌ကြေညာပြီးနောက် စစ်ကိုင်းနဲ့မကွေးတိုင်းအပါ တိုင်းနဲ့ပြည်နယ်အများစုက ပြည်သူတွေရှိတဲ့နေရာတွေကို ဆက်တိုက်ဆိုသလို လေကြောင်းတိုက်ခိုက်မှုတွေ လုပ်ဆောင်လျှက်ရှိနေတာလည်း ဖြစ်ပါတယ်။

သတင်း – မြတ်

ရေဦး၊ စက်တင်ဘာ ၂၇၊ ၂၀၂၅။

စစ်ကိုင်းတိုင်း၊ ရေဦးမြို့နယ်အခြေစိုက် ရေဦးပြည်သူ့ကာကွယ်ရေးအဖွဲ့မှ လက်ရုံးတပ်ဖွဲ့ဝင် ၁ ဦး အပါအဝင်ထွက်ပြေးသွားသူ ၆ ဦး ပျူစောထီးတွေဆီမှာ ဖမ်းဆီးနှိပ်စက်ခံနေရတယ်လို့ ရေဦးမြို့နယ်ပကဖ တာဝန်ခံဆီက သိရပါတယ်။

စက်တင်ဘာ ၂၁ ရက်ညနေပိုင်းမှာ မြောက်ပိုင်းဇုံမှာတာဝန်ကျနေတဲ့ ရေဦးပကဖ လက်ရုံးတပ်ဖွဲ့ဝင် အောင်သူဝင်း၊ ရေဦးမြို့နယ်၊ ပန်းကုန်းရွာသားတွေဖြစ်တဲ့ ထွန်းအောင်ကျော်၊ ဇော်ဦး၊ ချိုတာဘီး၊ ကန့်ဘလူမြို့နယ်၊ ကာဘိုးရွာသား ၁ ဦးနဲ့ ထန်းပင်ရွာသား ၁ ဦးတို့က စခန်းကထွက်ပြေးပြီးနောက် စက်တင်ဘာ ၂၂ ရက်က ကာဘိုးပျူရွာအနီးမှာ ဖမ်းဆီးခံလိုက်ရတာလို့ဆိုပါတယ်။

“သူတို့ပြေးပြီးနောက် မနက်ကျတော့ ကျနော်တို့ဆီ သတင်းဝင်လာတယ်။ ကာဘိုးဂိတ်မှာ အဖမ်းခံထားရတဲ့အကြောင်း၊ လက်ပြန်ကြိုးတုပ်ပြီးဖမ်းခံထားရတယ်။ လူ ၆ ယောက်ပေါ့။ ဒီကပျောက်တဲ့ ၆ ယောက်ကလည်းဖြစ်နေတော့ ကျနော်တို့ရဲဘော်နဲ့လူတွေဆိုတာ သိရတယ်။ ဆိုလိုချင်တာက အလင်းဝင်ဖို့သွားတာမဟုတ်ဘဲ ထွက်ပြေးတာ။ သူတို့မိသားစုဆီသွားကြမယ့်အနေအထားမှာ ပျူနဲ့ သွားမိတာ”လို့ ရေဦးမြို့နယ်ပကဖ တာဝန်ခံကပြောပါတယ်။

အဆိုပါ ၆ ဦးမှာ ပျူစောထီးတွေဆီ အလင်းဝင်သွားတာမှန်ကန်ပါက လက်ပြန်ကြိုးတုပ် ရိုက်နှက် စစ်ဆေးတာ လုပ်စရာမလိုဘဲ ကောင်းမွန်စွာထားရမှာဖြစ်သလို စက်တင်ဘာ ၂၆ ရက်အထိ ရိုက်နှက်ခံနေရပြီး ၂ ဦးက ဒဏ်ရာပြင်းထန်ရထားတယ်ဆိုတာကို အတွင်းသတင်းအရ သိထားရတယ်လို့ဆိုပါတယ်။

စက်တင်ဘာ ၂၁ ရက်မနက်ပိုင်းမှာ လေတိုက်လို့ ပြိုကျပျက်စီးသွားတဲ့ မြောက်ပိုင်းဇုံအနီးက ပကဖ လှုပ်ရှားစခန်းတစ်ခုကိုပြင်ဖို့ အထက်ပါ ၆ ဦးကို သုံးဘီး ၁ စီးနဲ့အတူလွှတ်လိုက်ရာ နေ့လယ်ပိုင်း ထမင်းစားပြန်လာပြီးနောက် ညနေပိုင်းထပ်သွားချိန်မှာစခန်းကထွက်ပြေးသွားကြတာလို့ ဆိုပါတယ်။

တပ်ဖွဲ့ဝင်အောင်သူဝင်းဟာ ၂၀၂၂ ကတည်းက ရေဦးပကဖထဲကို ဝင်ရောက်ခဲ့သူဖြစ်သလိုတပ်ဖွဲ့မှာ နေထိုင်ချိန် စည်းကမ်းဖောက်တာမျိုးမရှိဘဲ တာဝန်ကျေပွန်စွာနေခဲ့သူဖြစ်ပေမယ့် အခုနှစ် စက်တင်ဘာ ၁၀ ရက်လောက်မှာ တပ်ဖွဲ့ပိုင်ကျည်ဆံအချို့ရောင်းစားမှုနဲ့ တပ်ဖွဲ့ကနေယာယီထုတ်ပယ်ထားကာ အကျယ်ချုပ်အနေနဲ့ မြောက်ပိုင်းဇုံစခန်းမှာ စောင့်ကြည့်ခံထားရသူဖြစ်ပါတယ်။

ဒါ့အပြင် ကန့်ဘလူဒေသခံ ၂ ဦးကတော့ သူတို့ရွာတွေမှာ ပျူစောထီးတွေက သေနတ်ကိုင်ကင်းစောင့် ခိုင်းလို့ ဇွန်လမှာ ပကဖ မြောက်ပိုင်းဇုံဘက်ကို ထွက်ပြေးလာသူတွေဖြစ်ပြီး ရေဦးဒေသခံ ၃ ဦးကတော့ PDF တပ်ဖွဲ့ဝင်တွေကို မူးယစ်ပြီးဆဲဆိုလို့ ထိန်းသိမ်းထားသူ ၁ ဦးနဲ့ စစ်မှုထမ်းဥပဒေကြောင့် ထွက်ပြေးလာသူ ၂ ဦးဖြစ်ကာ သူတို့အားလုံးက စခန်းမှာ စောင့်ကြည့်ခံထားရသူတွေဖြစ်တယ်လို့ အထက်ပါတာဝန်ခံကပြောပါတယ်။

အဆိုပါ ၆ ဦးဖမ်းဆီးခံရပြီးနောက်ပိုင်း ရေဦးနယ်ထဲက ပကဖစခန်းတွေကို စစ်ကော်မရှင်ဘက်ကစစ်ကြောင်းထိုးတာ လေကြောင်းကနေ ကင်းထောက်တာမျိုးတွေတော့မရှိသေးဘူးလို့ သိရပါတယ်။

စာတည်း – လင်း