စစ်ကိုင်း

ရေဦး၊ မေ ၄၊ ၂၀၂၃။

စစ်ကိုင်းတိုင်း၊ ရေဦးမြို့နယ်၊ ချမ်းသာရွာက အထက်တန်းကျောင်းကို ထိတွေ့ပစ်ခတ်မှုမရှိပဲ စစ်ကောင်စီစစ်တပ်ဖွဲ့တွေက မိုင်းခွဲပြီး မီးရှို့ဖျက်ဆီးခဲ့တယ်လို့ သိရပါတယ်။

အင်အား ၁၀၀ ကျော်ရှိတဲ့ စစ်ကောင်စီစစ်ကြောင်းဟာ ထန်းပင်ကုန်းရွာကနေတဆင့် ချမ်းသာရွာထဲကို ဝင်ရောက်လာခဲ့ပြီး မေလ ၄ ရက် ဒီနေ့မနက် ၇ နာရီလောက်မှ ရွာမှာရှိတဲ့ ၂ ထပ်ဆောင် အထက်တန်း ကျောင်းကို မိုင်းခွဲမီးရှို့ပြီ ကျေးရွာထဲမှာတပ်စွဲထားတယ် လို့ People’s Defense Comrade က ပြန်ကြားရေးတာဝန်ခံ အမေ့သားက ပြောပါတယ်။

“စာသင်ကျောင်းက ပိတ်ထားတာတော့ ကြာပြီ။ ဒီစာသင်ကျောင်းဟာ ဘေးရွာက စစ်ရှောင်တွေလာရင်လည်း အဲဒီစာသင်ကျောင်းထဲမှာပဲ လက်ခံကျွေးမွေးတာတွေ လုပ်တယ်။ စစ်ကြောင်းက စာသင်ကျောင်းထဲဝင်ပြီတော့ မိုင်းခွဲပြီးမီးရှို့တယ်။ ကျောင်းဝန်းထဲမှာရှိတဲ့ သူငယ်တန်းကနေ ၅ တန်း ၆ တန်းအထိရှိတဲ့ ကျောင်းဆောင်လေးကတော့ သူတို့မီးရှို့မရှို့တာတော့ အတည်မပြုနိုင်သေးဘူး” လို့ ဆိုပါတယ်။

အဲဒီစာသင်ကျောင်းဟာ ၁၀ တန်းအထိတက်ရောက်နိုင်တဲ့ အထက်တန်းအဆင့်ရှိ ကျောင်းဖြစ်သလို စစ်ရှောင်တွေလာတဲ့အခါမှာလည်း ကျွေးမွေးခိုလှုံတာတွေ လုပ်နေတဲ့ကျောင်းလို့ ဆိုပါတယ်။

လက်ရှိအချိန်မှာ အဲဒီစစ်ကြောင်းဟာ ကျေးရွာထဲကနေအိမ်တွေကို မီးရှို့ဖျက်ဆီးတာမျိုး လုပ်ဆောင်ခြင်းမရှိသေးပေမဲ့လည်း စစ်ကြောင်းသုံးကြောင်းဖြန့်ပြီး ထန်းပင်ကုန်းရွာ၊ ချမ်းသာရွာနဲ့ ရွာသစ်ရွာမှာ တပ်စွဲထားတယ်လို့ တာဝန်ခံက ဆက်ပြောပါတယ်။

“နေအိမ်တွေကိုတော့ လက်ရှိမှာ မီးမရှို့သေးဘူး။ ရှို့စရာလည်းမရှိတော့ဘူးလေ။ အခုအကြိမ်နဲ့ဆို မီးရှို့ခံရတာ ၅ ကြိမ်ရှိပြီ။ အခုလည်း မြေပြင်ဘာတိုက်ပွဲမရှိပဲနဲ့ ရည်ရွယ်ချက်ရှိရှိနဲ့ မီးရှို့တာ။ အခုလက်ရှိသူတို့က ချမ်းသာရွာကြီးအတွင်းမှာရော ချမ်းသာရွာမြောက်ဘက်ပိုင်း တောနေကျောင်းတိုက်ထဲ၊ ချမ်းသာတောင်ဘက်ခြမ်း သုခါရာမကျောင်းထဲမှာကော ရွာသစ်ရွာနဲ့ ကုန်းသာရွာထဲမှာပါ ရှိနေတယ်” လို့ ဆိုပါတယ်။

စစ်ကောင်စီက တပ်စွဲထားတဲ့အတွက် ထန်းပင်ကုန်း၊ ချမ်းသာ၊ ရွာသစ်၊ ကုန်းသာ၊ တောင်စွယ်၊ မရိုးကုန်း နဲ့ ညောင်လှရွာ တို့က ဒေသခံပြည်သူ ၃ ထောင်ကျော်ဟာ ထွက်ပြေးတိမ်းရှောင်နေရတယ်လို့ ဒေသခံတွေဆီက သိရပါတယ်။

ချမ်းသာရွာဟာ ၂၀၂၂ ခုနှစ် မေလမှာ တကြိမ်၊ ဇွန်လမှာ တကြိမ်၊ ဒီဇင်ဘာလမှာ တကြိမ်၊ ၂၀၂၃ ဇန်နဝါရီလမှာ သက်တမ်း ၁၂၅ နှစ်ကျော်တိုင်တိုင်ရှိတဲ့ ရှေးဟောင်းတမိုင်းဝင် ကက်သလစ် ဘုရားကြောင်းနဲ့ ယနေ့ မေလ ၄ ရက်မှာတကြိမ် စုစုပေါင်း ၅ ကြိမ်တိတိ မီးရှို့ဖျက်ဆီး ခံထားရပါတယ်။

စာတည်း – 007

တန့်ဆည်၊ မေ ၄၊ ၂၀၂၃။

စစ်ကိုင်းတိုင်း၊ တန့်ဆည်မြို့နယ်တနေရာမှာ အခက်ခဲတွေရှိနေတဲ့ကြားက တန့်ဆည်ပင်မသပိတ်က ဦးဆောင်ပြီး ကျေးရွာပြည်သူတွေနဲ့အတူ သပိတ်စစ်ကြောင်းထွက်ခဲ့တယ်လို့ သိရပါတယ်။

မေလ ၄ ရက် ဒီကနေ့မနက်ပိုင်းက “ဖိရင်ကြွထိရင်ချ နိုင်ငံသစ်ကိုတည်ဆောက်ကြ၊ လွတ်မြောက်မှုဟူသည် အလကားမရ” စတဲ့ စာသားပါ ဘန်နာတွေကိုင်ဆောင်ပြီး စစ်အာဏာရှင်ဆန့်ကျင်ရေး ချီတက်ဆန္ဒပြခဲ့ကြတယ်လို့ ဆိုပါတယ်။

“စစ်ကောင်စီတပ်က ထောက်လှမ်းရေးတွေနဲ့ လိုက်နေတယ်၊ အဓိက စစ်ရေးအခြေအနေကိုပေါ့၊ သူတို့ ခံရတာများတော့ သပိတ်ကိုလည်း အာရုံစိုက်လာတယ်၊ အင်အားလည်း ကောင်းတယ်လေ။ ဒါကြောင့် အခုတလော သပိတ်ကိုအာရုံပြောင်းလာကြတာ၊ ခုထိတော့ အဆင်ပြေပါသေးတယ်”လို့ တန့်ဆည်ပင်မသပိတ် တာဝန်ရှိသူတဦးက ပြောပါတယ်။

သပိတ်စစ်ကြောင်းမှာ ကြွေးကြော်သံတွေနဲ့အတူ ရွာလှည့်သပိတ်၊ ထိုင်သပိတ်တွေပြုလုပ်ခဲ့ပြီး သပိတ်ဦးဆောင်သူတွေက သပိတ်တရားဟောပြောတာတွေ လုပ်ခဲ့တယ်လို့လည်း သိရပါတယ်။

စစ်ကိုင်း၊ မေ ၄၊ ၂၀၂၃။

စစ်ကိုင်းတိုင်းဒေသကြီး၊ ချောင်းဦးမြို့နယ်၊ မုံရွာ-မန္တလေးလမ်းပိုင်းထဲက ငါးယှန်ကျေးရွာနဲ့ နတ်ရေကန် ကျေးရွာအကြားမှာ စစ်ကောင်စီက ခရီးသွားတွေကို လူသားဒိုင်းလုပ်ပြီး မိုင်းဖော်သွားလို့ မိုင်းအလုံးရေ ၁၀၀ ကျော်ဆုံးရှုံးသွားတယ်လို့ CHU PDF တပ်ခွဲ ၈၊ လျှပ်တပြက်စွန်ညို တာဝန်ခံမောင်ကျန်က ပြောပါတယ်။

မေလ ၁ ရက်မှ ၃ ရက်အတွင်း နေရာ ၃ ခုကနေ စစ်ကောာင်စီအတွက် ထောင်ထားတဲ့ မိုင်းတွေ ဆုံးရှုံးခဲ့တာလို့ သူက ဆက်ပြောပါတယ်။

ဒီလမ်းပိုင်းဟာ စစ်ကောင်စီတပ်ဖွဲ့ယာဉ်တွေအသုံးများတဲ့ လမ်းဖြစ်ပြီး မကြာခဏမိုင်းဆွဲခံရတဲ့အတွက် စစ်ကောင်စီတပ်ဖွဲ့တွေအနေနဲ့ မိုင်းရှင်းလင်းပြီးမှ လမ်းကိုအသုံးပြုကြသလို လူကြီးလမ်းကြောင်း ရှိနေတဲ့အခါမျိုးဆို မိုင်းရှင်းလင်းရေးကို ပိုလုပ်ကြတယ်လို့ ဆိုပါတယ်။

“(မိုင်း)ရှာတဲ့နေရာမှာ အရင်ကတော့ အနီးအနားရွာက လူတွေကို ဓားစာခံအနေနဲ့ ခေါ်လာပြီးရှာတယ်။ နောက်ပိုင်းကျတော့ သူတို့မိုင်းရှာတော့မယ်ဆိုရင် ခရီးသွားကားတွေ ရပ်ခိုင်းတယ်။ လူတွေကိုဆင်းခိုင်းပြီးမှ မိုင်းရှာတာ။ အခြားပြည်သူတွေ ရှိနေတော့ ကျနော်တို့ဘက်က ဒီအတိုင်းမြင်နေရပြီး မလုပ်လိုက်ရဘူး ဖြစ်နေတာ”လို့ လျှပ်တပြက်စွန်ညို တာဝန်ခံမောင်ကျန်က ပြောပါတယ်။

စစ်ကောင်စီဘက်က မိုင်းတွေသိမ်းသွားလို့ ဆုံးရှုံးနစ်နာသွားတာတွေရှိပေမယ့် မိုင်းမစ်ရှင်တွေကို ဆက်လက် အကောင်အထည်ဖော်သွားဦးမှာဖြစ်ပြီး ပြည်သူတွေဘက်က ကူညီပေးကြဖို့ တောင်းဆိုတယ်လို့ ဆိုပါတယ်။

စစ်ကောင်စီအဖွဲ့က သိမ်းဆည်းသွားတဲ့ မိုင်းတွေဟာ အဖွဲ့အစည်းတခုတည်းက မိုင်းတွေမဟုတ်ဘဲ အဖွဲ့ ၃ ဖွဲ့ထက်မနည်းပိုင်တဲ့ မိုင်းတွေဖြစ်တယ်လို့ သိရပါတယ်။ မိုင်းတလုံးကို တန်ဖိုး ကျပ် ၂ သိန်းနီးပါး ရှိတာကြောင့် စုစုပေါင်း ကျပ်သိန်း ၂၀၀ ကျော် ဆုံးရှုံးနစ်နာသွားတာပါ။

စာတည်း – လင်းဇေ

စစ်ကိုင်း၊ မေ ၃၊ ၂၀၂၃။

စစ်ကိုင်းတိုင်း၊ ကျေးရွာတရွာက ဘုန်းကြီးကျောင်း ဓမ္မရုံဆောက်လုပ်နေတာကို ဓားမဆိုင်းတပ်ဖွဲ့တွေက မေလ ၃ ရက် ဒီနေ့မနက်မှာ သွားရောက်ဝိုင်းကူတဲ့အပြင် အလှူငွေတချို့ပါလှူဒါန်းခဲ့တယ်လို့ သိရပါတယ်။

ဒီနေ့ ကဆုန်လပြည့်နေ့မှာ ယင်းမာပင်ခရိုင်တပ်ရင်း (၂၈) ကဓားမဆိုင်းတပ်ဖွဲ့တွေဟာ လူအင်အား ၈၀ ကျော်နဲ့ ကျောက်လောင်းတာကို ကူညီခဲ့ကြတယ်လို့ ဆိုပါတယ်။

ဒါ့အပြင် ဓမ္မရုံဆောက်လုပ်ဖို့အတွက် အလှူငွေ ၇ သိန်းကိုလည်း လှူဒါန်းခဲ့တယ်လို့ ဓားမဆိုင်းတပ်ဖွဲ့ရဲ့ ခေါင်းဆောင်ဖြစ်သူ ကိုစွမ်းသူမောင်က ပြောပါတယ်။

“ရဲဘော် ရဲမေ ၈၀ ကျော်လောက်က သွားကူပေးကြတာ။ ဒီနေ့သွားရောက်ကူတာက တိုက်ပွဲမရှိလို့ မဟုတ်ပါဘူး။ မအားတဲ့ကြားက သွားရောက်ကုသိုလ်ပြုလုပ်ကြတာပါ။ စခန်းထဲက ရဲဘော်တွေကို ဘယ်နေ့ဘယ်ရက်မှာ ငါတို့ကျောက်လောင်းကုသိုလ် လုပ်ရအောင်လို့ ကြိုပြောထားပြီး သွားရောက်ကူညီကြတာ သူတို့လေးတွေကိုလည်း ကုသိုလ်ရစေချင်တာရယ်။ လူလိမ္မာလေးတွေ ဖြစ်စေချင်တာကြောင့်ရယ်ပါ” လို့ ဆိုပါတယ်။

အဲဒီ ဓားမဆိုင်းတပ်ဖွဲ့ဟာ ပြီးခဲ့တဲ့ ဧပြီလ ၂၉ ရက်နေ့ကလည်း မုံရွာမြို့နယ် ကညနရုံး နဲ့ စိုက်ပျိုးရေးရုံးကို လက်နက်ကြီးတွေနဲ့ သွားရောက်ပစ်ခတ်ခဲ့လို့ စစ်ကောင်စီဘက်က ထိခိုက်သေဆုံးသူများစွာ ရှိခဲ့တယ်လို့လည်း ဆိုပါတယ်။

စာတည်း – 007

စစ်ကိုင်း၊ မေ ၃၊ ၂၀၂၃။

နေ့စဥ်လျှပ်စစ်မီး ပုံမှန်မလာတာ၊ ရေတင်မရတာတွေတာကြောင့် စစ်ကိုင်းမြို့၊ စစ်ကိုင်းတံတားအောက် ဧရာဝတီမြစ်အတွင်းမှာ နေ့စဥ်ရေချိုး၊ ရေစိမ်လာသူ ရာချီရှိနေတယ်လို့ သိရပါတယ်။

ညနေ ၃ နာရီလောက်ကနေ ည ၇ နာရီလောက်ထိ တာဝါတိုင်၊ တကောင်း၊ ထုံးဘိုအပါအဝင် ကမ်းနားနဲ့နီးတဲ့ ရပ်ကွက်တွေက မြစ်ဆိပ်တွေမှာ ရေဆင်းချိုးသူ၊ ကမ်းနားအပန်းဖြေသူတွေနဲ့ စည်ကားနေတယ်လို့ ဒေသခံတဦးက ပြောပါတယ်။

“ဧပြီလလောက်ကတည်းက မီးကမမှန် ရေကမရတာနဲ့ အပူကလည်း ပြင်းတာနဲ့ ညနေလောက်ဆို မြစ်ဆိပ်ကို လာကြပြီ။ မီးဆိုတာလည်း တနေ့ကို သုံးလေးနာရီလောက်ပဲ လာတာဆိုတော့။ နေ့စဥ် မြစ်ဆိပ်ရေဆင်းချိုးတဲ့သူနဲ့ အပန်းဖြေသူတွေဆိုရင် ၅၀၀ အထက်လောက်ရှိမယ်။ လူတွေကတော့ ညနေဆိုရင် လာနေကြတုန်းပဲ” လို့ ပြောပါတယ်။

ယခင်နှစ်တွေက စစ်ကိုင်းတံတားအောက် ဧရာဝတီမြစ်အတွင်း ကမ်းနားတွေမှာ ရေချိုးသူ အပန်းဖြေသူတွေဟာ အနည်းငယ်သာရှိခဲ့ပြီး ယခုနှစ်မှာတော့ ပွဲတော်နီးပါး စည်ကားနေတာလို့ ဆိုပါတယ်။

မြစ်အတွင်း ရေချိုး၊ ရေကူးသူတွေ များလာလို့ ရေနစ်သေဆုံးတာတွေ မဖြစ်ဖို့၊ ဖြစ်ပေါ်လာပါက အမြန်ဆုံးကယ်ဆယ်နိုင်ဖို့ ဒေသလူမှုကူညီရေးအဖွဲ့တွေနဲ့ ကယ်ဆယ်ရေးအဖွဲ့တွေက နေ့စဥ် အသင့်စောင့်ဆိုင်းနေရတယ်လို့ သိရပါတယ်။

ဧပြီလ ၂၉ ရက်နေ့ နေ့လည် ၁၂ နာရီကျော်ခန့်က စစ်ကိုင်းတံတားအောက် တကောင်းဆိပ်ကနေ အမျိုးသား ၅ ဦး မြစ်အတွင်း ရေဆင်းကူးချိန် ၁ ဦးရေနစ်သေဆုံးသွားခဲ့ပါသေးတယ်။

ဒါ့အပြင် မတ်လ ၅ ရက်နေ့ကလည်း စစ်ကိုင်းတံတားအောက် ဧရာဝတီမြစ်အတွင်းမှာ စစ်ကိုင်းမြို့၊ ဝါဆိုကျောင်းက ကိုရင် ၃ ပါး ရေဆင်းကူးချိန် အသက် ၁၂ နှစ်အရွယ် ကိုရင် ၁ ပါး ရေနစ်သေဆုံးခဲ့သေးတယ်လို့ မြို့ခံတွေဆီက သိရပါတယ်။

စာတည်း – 007

စစ်ကိုင်း၊ မေ ၂၊ ၂၀၂၃။

စစ်ကိုင်းတိုင်း၊ စစ်ကိုင်းမြို့နယ်၊ ရွာမကျေးရွာကို စစ်ကောင်စီတပ်သားတွေက ဧပြီလ ၃၀ ရက် မနက် ၈ နာရီလောက်မှာ ပစ်ခတ်ဝင်ရာက်စီးနင်းခဲ့ပြီး ကျေးရွာ ပကဖ ရဲဘော်တဦးကိုလည်း သတ်ခဲ့တယ်လို့ သိရပါတယ်။

စစ်သားအင်အား ၈၀ ကျော်လောက်က ရွာထဲကို ပစ်ခတ်ဝင်ရောက်လာချိန် အသက် ၂၇ နှစ်အရွယ် ရဲဘော်ကိုထုရှည်မှာ ဖမ်းဆီးခံခဲ့ရပြီး၊ အဲ့ဒီနောက်မှ အသတ်ခံခဲ့ရတာလည်း ဖြစ်ပါတယ်။

“ကျနော့် တပည့်တယောက်ကတော့ အဖမ်းခံရပြီး ရက်ရက်စက်စက် သတ်ဖြတ်သွားတဲ့ ရုပ်အလောင်းကို ရွာသုဿန်မှာ တွေ့ရတယ်။ လက်နက်စတွေ မှန်သွားတဲ့ နောက်ထပ် တပည့် ၂ ယောက်ကိုတော့ ဆေးကုသပေးထားတယ်” လို့ ဆိုပါတယ်။

မေလ ၁ ရက်နေ့ မနက် ၈ နာရီလောက်မှာမှ လက်နှစ်ဖက်ကိုကြိုးတုပ် နှိပ်စက်ပြီး၊ ပစ်သတ်ခံထားရတဲ့ ကိုထုရှည်ရဲ့ ရုပ်အလောင်းကို ကျေးရွာသုဿန်အနီးမှာ တွေ့ရှိခဲ့တာလို့ ရွာမရွာရဲ့ ကျေးရွာကာကွယ်ရေးအဖွဲ့ ခေါင်းဆောင်က ပြောပါတယ်။

ဒါ့အပြင် ရွာမကျေးရွာက ဒေသခံ ၁၀၀ လောက်ကိုလည်း စစ်ကြောင်းဝင်တဲ့နေ့မှာတင် ဖမ်းဆီးခဲ့ပြီး ကျေးရွာဘုန်းကြီးကျောင်းမှာ စစ်ဆေးမေးမြန်းတာတွေ လုပ်ခဲ့ပါတယ်။

အဲ့ဒီနောက် မေလ ၁ ရက်နေ့ စစ်ကြောင်းပြန်ထွက်ချိန်မှာတော့ ဓါးစာခံအဖြစ် ရွာသားအချို့ကို ဖမ်းဆီးသွားပြီး ရွာမရွာနဲ့ ၄ မိုင်ကျော်ဝေးတဲ့ ရထောင်ရွာကို ခေါ်သွားခဲ့တယ်လို့ အထက်ပါ တာဝန်ရှိသူက ဆက်ပြောပါတယ်။

“ရွာခံ ၁၀၀ ကျော်လောက်ကို ဖမ်းစစ်ပြီးတော့ ရွာကအထွက်မှာ ၁၅ ယောက်ကို ခေါ်သွားတယ်။ အဲ့အထဲက ၁၁ ယောက်ကို ပြန်လွှတ်တယ်။ ၄ ယောက်ကို ဆက်ခေါ်သွားတယ်။ ဒီနေ့ (မေ ၂) မှာတော့ ၄ ယောက်ထဲက ၃ ယောက် ပြန်လွတ်လာပြီး ၁ ယောက်ကတော့ ပြန်မလွတ်လာဘူး” လို့ ဆိုပါတယ်။

အဲ့ဒီစစ်ကြောင်းဟာ ဧပြီလ ၂၉ ရက်ကလည်း မောင်းထောင်၊ မြိုင်လယ်၊ သဖန်းသာ၊ တအိမ်တဲ စတဲ့ ကျေးရွာတွေကို ဝင်ရောက်မွှေနှောက်ခဲ့ပါတယ်။

အလားတူ မတ်လ ၁ ရက်ကလည်း စစ်ကိုင်းမြို့နယ်၊ တအိမ်တဲရွာက လူနေအိမ် ၈ လုံးကို စစ်အုပ်စုက မီးရှို့ကာ အမည်မသိရသေးတဲ့ အမျိုးသားတဦးလည်း ခေါင်းဖြတ်သတ်ခံခဲ့ရသေးတယ်လို့ သိရပါတယ်။

စာတည်း – လင်း