စစ်ကိုင်း

ကန့်ဘလူ၊ ဧပြီ ၂၅၊ ၂၀၂၃။

စစ်ကိုင်းတိုင်း၊ ကန့်ဘလူမြို့နယ်အတွင်းမှာ ဧပြီလ ၂၄ ရက်မနေ့ညပိုင်းက စစ်ကောင်စီတပ်တွေနဲ့ ဒေသခံကာကွယ်ရေးတပ်တို့ အပြန်အလှန်ပစ်ခတ်မှုဖြစ်ပြီး စစ်ကောင်စီဘက်ကပစ်လိုက်တဲ့ လက်နက်ကြီးကျည်တွေက ချပ်သင်းကျေးရွာကို ကျရောက်ခဲ့တာကြောင့် နေအိမ်တွေ မီးလောင်ပျက်စီးခဲ့တယ်လို့ သိရပါတယ်။

ချပ်ကြီးရွာမှာ အထိုင်ချတပ်စွဲနေတဲ့ စစ်ကောင်စီအဖွဲ့တွေနဲ့ ကျေးရွာအနီးမှာ မနေ့ည ၇ နာရီလောက်က ပစ်ခတ်မှုဖြစ်ချိန် စစ်ကောင်စီဘက်ကပစ်လိုက်တဲ့ လက်နက်ကြီးကျည်က ရွာနဲ့ ၂ နိုင်သာသာဝေးတဲ့ ချပ်သင်းရွာကို ကျရောက်ပေါက်ကွဲခဲ့ရာမှာ အိမ်ခြေ ၅၀ မီးလောင်ပျက်စီးခဲ့တာပါ။

“မနေ့မနက်က ချပ်ကြီးက ပျူနဲ့စကစတွေက တပ်ကုန်းဘက်ကနေ လက်နက်ကြီးတွေနဲ့ရမ်းသမ်းပစ်လို့ လက်နက်ကြီးတွေက ပင့်သာကြီးရွာထဲကို ကျပြီး လူထိခိုက်သေဆုံးတာရှိတယ်။ ညဘက်လည်းကျကော သူတို့ဘက်က လက်နက်ကြီးတွေနဲ့ထပ်ပြီး ရမ်းသမ်းပစ်နေလို့ ဒီဘက်က အဖွဲ့တွေကလည်း သွားပစ်တာ။ အဲဒီချိန်မှာ စကစ ဘက်ကပစ်တဲ့ လက်နက်ကြီးအချို့က ချပ်သင်းရွာထဲကျပြီး နေအိမ်အချို့ မီးလောင်ရာကနေ မီးတွေကူးပြီး တော်တော်များများလောင်သွားတာ”လို့ တိုက်ခိုက်မှုမှာပါဝင်တဲ့ ရဲဘော်တဦးက ပြောပါတယ်။

အပြန်အလှန်ပစ်ခတ်ချိန် ၁ နာရီခန့်ကြာပြီးနောက် ဒေသကာကွယ်ရေးအဖွဲ့တွေဘက်က ထိခိုက်ကျဆုံးတာမရှိဘဲ စစ်ကောင်စီနဲ့ပျူဘက်က ထိခိုက်သေဆုံးရှိနိုင်ကာ စာရင်းအတိအကျကိုတော့ မသိရှိရသေးဘူးလို့ ဆိုပါတယ်။

ဒါ့အပြင် “ချပ်ကြီးမှာရှိနေတဲ့ စစ်ကောင်စီတပ်ကို ဒေသကာကွယ်ရေးအဖွဲ့တွေက မျက်နှာမူပြီးတိုက်တာ၊ စကစ ဘက်ကတော့ ချပ်ကြီးဘက်ကနေ ချပ်သင်းဘက်ကိုပစ်တာဆိုတော့ ဘယ်သူပစ်လို့ ရွာမီးလောင်တယ်ဆိုတာ သိသာပါတယ်”လို့ အထက်ပါရဲဘော်က ဆက်ပြောပါတယ်

ချပ်သင်းကျေးရွာဟာ ပြီးခဲ့တဲ့ မတ်လ ဒုတိယအပတ်ကတည်းက စစ်ကောင်စီတပ်တွေရဲ့ စစ်ကြောင်းထိုးမှုကြောင့် ဒေသခံအများစုက နေအိမ်တွေမှာမနေရဲဘဲ ထွက်ပြေးနေရပြီး အနည်းစုသာ ရွာမှာကျန်နေခဲ့တာကြောင့် ခုဖြစ်စဥ်မှာ ဒေသခံအတွေအနေနဲ့ ထိခိုက်သေဆုံးမှုတွေ မရှိခဲ့ဘူးလို့လည်း ဆိုပါတယ်။

မတ်လ ၃ ရက်မနက်အစောပိုင်းက ချပ်ကြီးရွာမှာရှိနေတဲ့ စစ်ကောင်စီတပ်ကို KB2 တပ်ရင်း၊ ချပ်သင်းတိုက်နယ် ပကဖအဖွဲ့တွေအပြင် ပူးပေါင်းအဖွဲ့တွေက တိုက်ခိုက်လို့ စစ်သားနဲ့ပျူ ၄၀ ကျော်သေဆုံးခဲ့ပြီး လက်နက် ၁၅ လက်အပါမဝင် ဆက်စပ်ပစ္စည်းတွေ သိမ်းဆည်းရမိခဲ့တယ်လို့လည်း တိုက်ခိုက်ရေးမှာပါဝင်တဲ့ ရဲဘော်တွေဆီက သိရပါတယ်။

စာတည်း – လင်း

ဆားလင်းကြီး၊ ဧပြီ ၂၅၊ ၂၀၂၃။

စစ်ကိုင်းတိုင်း၊ ဆားလင်းကြီးမြို့နယ်၊ မန်ကျည်းတန်းရွာအရှေ့ဘက်ရှိ ထန်းတောထဲမှာ ဓားစားခံအဖြစ် ဖမ်းဆီးခေါ်လာတဲ့ အမျိုးသား ၃ ဦးအပါအဝင် ၄ ဦးကို စစ်ကောင်စီတပ်ဖွဲ့တွေက သေနတ်နဲ့ ပစ်သတ်သွားတယ်လို့သိရပါတယ်။

ဧပြီလ ၂၅ ရက်ဒီမနက် ၈ နာရီလောက်မှာ စစ်ကောင်စီစစ်ကြောင်းဟာ မုံရွာမြို့တဖက်ကမ်းရှိ ညောင်ပင်ကြီးကျေးရွာကနေ မန်ကျည်းတန်းရွာထဲကိုဝင်ရောက်လာပြီးနောက် ဖမ်းဆီးလာတဲ့ အမည်မသိ အမျိုးသား ၃ ဦးရဲ့ နံဖူး၊ ကျောနဲ့ ရင်ဘတ်တွေကို သေနတ်နဲ့ပစ်သတ်သွားတာလို့ ဆားလင်းကြီးဒေသခံတဦးက ပြောပါတယ်။

“သူတို့တွေက ညောင်ပင်ကြီးတောက်လျှောက်ရွာတွေကို သေနတ်တွေဖောက်ပြီး စစ်ကြောင်းထိုးတယ်။ အဲဒီကနေထွက်လာပြီး ဆားလင်းကြီးနယ်ထဲကို ဝင်တယ်။ လမ်းရိုးအတိုင်းမသွားပဲနဲ့ လယ်ကွင်းတွေဘက်ကနေ သူတို့အရင်သွားနေကျ လမ်းကြောင်းအတိုင်း သွားကြတယ်။ ဖောင်းကတာနဲ့ မန်ကျည်းတန်းကြားထဲမှာ အဲဒီ ၃ ယောက်ကို သတ်ပစ်ခဲ့တယ်။ အဲဒီ ၃ ယောက်က တခြားနယ်ဘက်ကနေ ဖမ်းခေါ်လာတဲ့သူတွေ ဖြစ်မယ်ဗျ၊ ကျနော်တို့ဘက်ကတော့ မဟုတ်ဘူး”လို့ ဆိုပါတယ်။

အသတ်ခံရသူတွေဟာ အသက် ၃၀ ဝန်းကျင်ရှိပြီး၊ အလောင်းတွေကိုတော့ ဒီနေ့လယ် ၁ နာရီ ၁၅ မိနစ်လောက်မှာ ဒေသခံတွေက တွေ့ရှိခဲ့တာဖြစ်သလို သူတို့နဲ့ပက်သက်တဲ့ အသေးစိတ် အချက်အလက်တွေကိုတော့ မြေလတ်အသံက သီးခြားအတည်မပြုနိုင်သေးပါဘူး။

အဲဒီစစ်ကောင်စီစစ်ကြောင်းဟာ ဒီနေ့မနက်ပိုင်းပဲမှာ မြိုင်မြို့နယ်သားတဦးဖြစ်တဲ့ အသက် ၂၉ နှစ်အရွယ် ကိုဝင်းနောင်ဆိုသူနဲ့ ဆားလင်းကြီးမြို့နယ်၊ ရွှေလှေရွာတံတားထိပ်မှာ ထိပ်တိုက်တွေ့ချိန် သေနတ်နဲ့ ပစ်သတ်ခဲ့သေးတယ်လို့လည်း ဆိုပါတယ်။

လက်ရှိမှာတော့ အဲဒီစစ်ကောင်စီတပ်ဖွဲ့ဟာ စစ်ကြောင်း ၂ ကြောင်းခွဲပြီး ဆားလင်းကြီးမြို့နယ်ထဲက ရေခါးရွာထဲကို ဝင်ရောက်သွားကာ လက်နက်ပစ်ဖောက်သံတွေနဲ့ မိုင်းပေါက်ကွဲသံတွေလည်း ကြားနေရတယ်လို့ ဒေသခံတွေဆီက သိရပါတယ်။

ပြီးခဲ့တဲ့ မတ်လ ၂၉ ရက်ကလည်း ဆားလင်းကြီးနယ်ထဲကို စစ်ကောင်စီတပ်က စစ်ကြောင်းထိုးလာလို့ ရွာ ၁၄ ရွာက ဒေသခံသောင်းနဲ့ချီ ထွက်ပြေးတိမ်းရှောင်ခဲ့ရပါသေးတယ်။

စာတည်း – လင်း

ရွှေဘို၊ ဧပြီ ၂၅၊ ၂၀၂၃။

စစ်ကိုင်းတိုင်း၊ ရွှေဘိုမြို့၊ အမှတ် ၅ ရပ်ကွက်က အမျိုးသား ၆ ဦးအပါအဝင် ဒေသခံ ၁၆ ဦးကို ဧပြီလ ၂၂ ရက်နေ့မှာ စစ်ကောင်စီတပ်ကရိုက်နှက်ဖမ်းဆီးသွားတယ်လို့ သိရပါတယ်။

ဧပြီလ ၂၂ ရက်နေ့ မနက်ပိုင်းက စည်ပင်သာယာရေးရုံးထဲမှာတပ်စွဲထားတဲ့စစ်အုပ်စု ဗုံးပစ်တိုက်ခိုက်ခံရပြီးတဲ့နောက် စည်ပင်ရုံးအနီးဈေးရောင်းနေတဲ့ ဈေးသည်တွေအပါအဝင် အရပ်သား ၁၆ ဦး ကို စစ်ကောင်စီတပ်က ဖမ်းဆီးသွားခဲ့တာလို့ Shwdbo District Battalion 23 တာဝန်ခံက မြေလတ်အသံကို ပြောပါတယ်။

“ဗုံးသွားပစ်တာကကျနော်တို့အဖွဲ့ပါ။အဲ့ဒီတိုက်ခိုက်မှုမှာထိခိုက်သေဆုံးတွေရှိတယ်။အဲတာကြောင့် စကစတွေကကားတစီးနဲ့ ချက်ချင်းရောက်လာပြီးတော့ရုံးနားမှာ အလုပ်လုပ်နေတဲ့အရပ်သားတွေကို ရိုက်နှက်ပြီးတော့ ဖမ်းခေါ်သွားတာ။ တချို့ဆိုရင် ရိုက်နှက်ခံရတာများလို့ PDFဆိုပြီးဝန်ခံခိုင်းတာ ဝန်ခံရတယ်တဲ့။ ကျနော်တို့အဖွဲ့ကတဦးတယောက်မှ အဖမ်းမခံခဲ့ရပါ” လို့ ဆိုပါတယ်။

ဖမ်းဆီးခံရသူတွေဟာ အမှတ် ၅ ရပ်ကွက်က အမျိုးသား ၆ ဦး၊ နေရပ်နဲ့ အမည်တွေကိုမသိရသေးတဲ့ အမျိုး သမီး ၃ ဦး နဲ့ အမျိုးသား ၇ ဦး တို့ဖြစ်တယ်လို့ ရွှေဘိုအခြေစိုက် PDF တပ်ဖွဲ့တွေနဲ့နီးစပ်သူ တဦးက ပြောပါတယ်။

“အဖမ်းခံရတာကတော့ အတည်ပြုလို့ရတယ်။ ဘယ်သူတွေဆိုတာကိုတော့ ကျနော်တို့ လည်း PDF အဖွဲ့တွေကို လိုက်မေးနေတာ တိတိကျကျ မသိကြဘူးဖြစ်နေတယ်။ဒီ ၁၆ ယောက်က စည်ပင်ရုံးတိုက် ခိုက်ခံရတာနဲ့ပတ်သက်လို့အဖမ်းခံရတာလို့သိရတယ်” လို့ ဆိုပါတယ်။

စစ်တပ်ထောက်ခံတဲ့တယ်လီဂရမ်ချန်နယ်တွေမှာတော့ ရွှေဘိုမြို့နယ်၊ စည်ပင်ရုံးကို ဖောက်ခွဲတိုက်ခိုက်ခဲ့ သူ ၄ ဦးနဲ့ အားပေးထောက်ပံ့သူ ၁၂ ဦးကို ဖမ်းဆီးရမိထားပြီး အကြမ်းဖက်တိုက်ဖျက်ရေး ဥပဒေတွေနဲ့ အမှုဖွင့်ထားတယ်လို့ ဖော်ပြထားပါတယ်။

ဧပြီလ ၄ ရက်နေ့မှာလည်း ရွှေဘိုမြို့နယ်၊ချီပါရွာက လမ်းသွားလမ်းလာ ဆိုင်ကယ်စီးနင်းသူ အမျိုးသား ၂ ဦးကို စစ်ကောင်စီတပ်က လက်ပြန်ကြိုးတုတ်ဖမ်းဆီးပြီးနောက် သတ်ဖြတ်ခဲ့သေးတယ်လို့ သိရပါတယ်။

စာတည်း – ရင်ငြိမ်း

ဆားလင်းကြီး၊ ဧပြီ ၂၅၊ ၂၀၂၃။

စစ်ကိုင်းတိုင်း၊ ဆားလင်းကြီးမြို့နယ်၊ ရွှေလှေကျေးရွာကိုစစ်ကြောင်းထိုးလာတဲ့ စစ်ကောင်စီတပ်က လမ်းသွားလမ်းလာ ပြည်သူတဦးကို ဧပြီလ ၂၅ ရက် ဒီနေ့ မနက် ၉ နာရီလောက်မှာ ပစ်သတ်သွားတယ်လို့ သိရပါတယ်။

အသတ်ခံရသူဟာ မြိုင်မြို့နယ်တွင် နေထိုင်သူ အသက် ၂၉ နှစ်အရွယ် ကိုဝင်းနောင် ဆိုသူဖြစ်ပြီး ညောင်ပင်ကြီး − ဆားလင်းကြီးလမ်းပိုင်းအတိုင်း ဆိုင်ကယ်မောင်းနှင်လာစဉ် ရွှေလှေရွာတံတားထိပ်မှာ အင်အား ၁၀၀ ခန့်ရှိ စစ်ကောင်စီစစ်ကြောင်းနဲ့တွေ့ပြီး သေနတ်နဲ့ပစ်ခတ်ခံခဲ့ရတာလို့ ဒေသခံတဦးက မြေလတ်အသံကို ပြောပါတယ်။

“ကိုဝင်းနောင်က မြိုင်နယ်ကလို့ပဲ သိတယ်။ သူက စစ်ကြောင်းထိုးလာတာကို မသိဘူး။ အဲဒါနဲ့ ဆိုင်ကယ်ကို ဒီအတိုင်း စီးလာတာ၊ စစ်ကြောင်းနဲ့တွေ့တော့ အပစ်ခံရတာ။ သေနတ်ထိတော့ ဆိုင်ကယ်ရော လူရော လဲကျသွားတယ်။ အဲဒီအချိန် စကစတပ်တွေက အနားလာပြီး ဓားတွေနဲ့ သူရဲ့ဗိုက်ကို မွန်းပြီးသတ်သွားတယ်” လို့ ပြောပါတယ်။

စစ်ကောင်စီတပ်က ပစ်ခတ်လို့ ဆိုင်ကယ်မောင်းနှင်သူ ကိုဝင်းနောင် သေဆုံးခဲ့ပြီး သူနဲ့အတူ စီးနင်းလိုက်ပါလာတဲ့ အမျိုးသားတဦးကတော့ ထွက်ပြေးလွတ်မြောက်သွားတယ်လို့ သူကဆက်ပြောပါတယ်။

ကိုဝင်းနောင်ရဲ့ ရုပ်အလောင်းကိုတော့ မြိုင်မြို့နယ်ထဲက မိသားစုဝင်တွေက နာရေးကားနဲ့ လာရောက်ယူဆောင်သွားကာ လက်ရှိအချိန်မှာ အဲ့ဒီစစ်ကောင်စီစစ်ကြောင်းဟာ ဆားလင်းကြီးမြို့ပေါ်ကို ပြန်လည်ထွက်ခွာသွားတယ်လို့ သိရပါတယ်။

ပြီးခဲ့တဲ့ မတ်လ ၂၉ ရက်နေ့ကလည်း ဆားလင်းကြီးနယ်ထဲကို စစ်ကောင်စီတပ်က စစ်ကြောင်းထိုးလာလို့ ရွာ ၁၄ ရွာက ဒေသခံသောင်းနဲ့ချီ ထွက်ပြေးတိမ်းရှောင်ခဲ့ရတယ်လို့ သိရပါတယ်။

စာတည်း – ရင်ငြိမ်း

ပုလဲ၊ ဧပြီ ၂၄၊ ၂၀၂၃။

စစ်ကိုင်တိုင်း၊ ပုလဲမြို့နယ်က စစ်ကောင်စီတပ်တွေ မီးရှို့သွားတဲ့ နှောကန်ကျေးရွာကို ဧပြီလ ၂၄ ရက် ဒီကနေ့မနက်ပိုင်းမှာ ပုလဲမြို့နယ် ပြည်သူ့အုပ်ချုပ်ရေးအဖွဲ့ဝင်တွေက ငွေကျပ် ၂၇ သိန်းနဲ့ စားနပ်ရိက္ခာတွေ လှူဒါန်းထောက်ပံ့ပေးခဲ့တယ်လို့ သိရပါတယ်။

ပုလဲမြို့နယ်၊ နှောကန်ကျေးရွာက မီးဘေးသင့်နေတဲ့ အိမ်ထောင်စု ၁၀၄ စုအတွက် သံဃသမဂ္ဂအဖွဲ့ နဲ့ တခြားအလှူရှင်အချို့တို့ ပူးပေါင်းပြီး လှူဒါန်းခဲ့တာလို့ ပုလဲမြို့နယ် ပြည့်သူ့အုပ်ချုပ်ရေးအဖွဲ့ခေါင်းဆောင် ကိုဇော်ထက်က ပြောပါတယ်။

“စစ်ကောင်စီက နှောကန်ကျေးရွာကို ၄ လ ပိုင်း ၂ ရက်နေ့က မီးရှို့သွားတာကို သွားလှူဒါန်းတာ ၊မီးရှို့ခံရတာက ၁၀၄ အိမ်ပေါ့၊ ရွာမှာရှိတာက စုစုပေါင်း အိမ်ထောင်စု ၁၃၆ စုရှိတာ၊ ရွာလုံးကျွတ်လို့‌ ပြောလို့ရတာပေါ့။ သံဃသမဂ္ဂအဖွဲ့ နဲ့ တခြားအလှူရှင်အချို့တို့လှူဒါန်းတဲ့ ငွေ ၂၇ သိန်းကို မြို့နယ်အုပ်ချုပ်ရေးကျနော်တို့အဖွဲ့က ကြားကနေ သွားလှူပေးရတာ၊ စားနပ်ရိက္ခာကတော့ ဆန်တို့ ဆီတို့လည်း ပါတယ်” လို့ ပြောပါတယ်။

လက်ရှိအချိန်ထိ ပုလဲမြို့နယ်အတွင်းမှာ မီးရှို့ခံရတဲ့ ရွာပေါင်း ၃၀ ကျော်ရှိပြီး အိမ်ထောင်စု ၂၃၀၀ ကျော်ရှိကာ ဒေသခံတွေအနေနဲ့ နီးစပ်ရာတောတွေ၊ ကျေးရွာစာသင်ကျောင်းတွေနဲ့ ဘုန်းကြီးကျောင်းတွေမှာ ဖြစ်သလို စုပေါင်းပြီး နေထိုင်ရတယ်လို့ ဆိုပါတယ်။

စာတည်း – လင်း