စစ်ကိုင်း

မုံရွာ၊ ဧပြီ ၈၊ ၂၀၂၃။

စစ်ကိုင်းတိုင်း၊ မုံရွာခရိုင်အတွင်း ချင်းတွင်းမြစ်ကမ်းဘေးကျေးရွာများသပိတ်စစ်ကြောင်းက ဧပြီလ ၇ ရက်နေ့ ညနေပိုင်းမှာ “ပြည်သူရှိနေသရွေ့ ပါတီရှိနေမယ်” စာသားကိုင်ဆောင်ပြီး စစ်အာဏာရှင်ဆန့်ကျင်ဆန္ဒပြကာ လူထုသပိတ်ဖော်ဆောင်ခဲ့တယ်လို့သိရပါတယ်။

မုံရွာ၊ ဧပြီ ၇၊ ၂၀၂၃။

စစ်ကိုင်းတိုင်း၊ မုံရွာမြို့နယ်၊ ကံသာဦးရပ်ကွက်မှာ ပြုလုပ်မယ့် ကန်သာယာသင်္ကြန်မှာ ရုပ်ရှင်သရုပ်ဆောင် အယောက် ၂၀ ဖိတ်ထားပြီး လမ်းလျှောက်သင်္ကြန်ကျင်းပဖို့ ကြိုးစားနေတယ်လို့ ဒေသခံတွေကတဆင့် သိရပါတယ်။

အရှေ့ကန်သာယာနဲ့ အနောက်ကန်သာယာကြားမှာ ဗဟိုမဏ္ဍပ်တခု ဆောက်လုပ်နေပြီး၊ ဘေးလျှောက်လမ်းတွေမှာတော့ လမ်းလျှောက်သင်္ကြန်နဲ့ စတုဒီသာအတွက် မဏ္ဍပ် ၂ ခုဆောက်လုပ်နေကာ သင်္ကြန်ကိုလာရောက်မယ့် သရုပ်ဆောင်တွေကိုတော့ မသိရသေးဘူးလို့ ဆိုပါတယ်။

“ကျတော်တို့ကြားတာတော့ ရန်အောင်က အကြိုနေ့လာမယ် ကြားတာပဲ။ ကျန်တဲ့အနုပညာရှင်တွေတော့ မကြားမိဘူး။ ဒါကလည်း အတိကျတော့ ပြောလို့မရဘူး။ ထွက်လာတဲ့သတင်းတွေအရပေါ့။ သင်္ကြန်လူစည်အောင်ဆိုရင်တော့ သူတို့တပ်မိသားစုတွေ၊ ဌာနဆိုင်ရာဝန်ထမ်းတွေကို ထုတ်လာပြီးမှပဲ စည်ကားအောင် လုပ်လိမ့်မယ်။ ပြည်သူတွေကတော့ လည်ဖို့ မဖြစ်နိုင်ဘူး။” လို့ မုံရွာဒေသခံတဦးက ပြောပါတယ်။

ဒါ့အပြင် မုံရွာမြို့ပေါ်မှာရှိတဲ့ လုပ်ငန်းရှင်တွေကို သင်္ကြန်မဏ္ဍပ်နဲ့ အစီစဉ်တွေအတွက်ဆိုပြီး ၃ သိန်းကနေ ၅ သိန်းအထိ ငွေကြေးကောက်ခံတာတွေ လုပ်နေတယ်လို့ ဆိုပါတယ်။

“အခုလက်ရှိ မဏ္ဍပ်အဆောက်အဦး ၃ ခု ဆောက်နေတယ်။ ဝင်းယူနတီဟော်တယ်ရှေ့နဲ့ တင်ဝင်းထွန်းဟော်တယ်ရှေ့မှာ၊ အနုပညာရှင်တွေက အဲ့ hotel တွေမှာပဲ နေဖို့များတယ်။” လို့ မုံရွာဒေသခံတဦးက ပြောပါတယ်။

စစ်ကောင်စီဘက်က မဟာသင်္ကြန်ဖြစ်မြောက်ရေးကော်မတီဝင်တွေကတော့ မုံရွာသင်္ကြန်ကို လာရောက်လည်ပတ်ဖို့နဲ့ ရေကစားမယ့်သူတွေအတွက် စတုဒီသာမဏ္ဍပ်တွေလည်း ဆောက်လုပ်ထားပြီး ယိမ်းအကယှဉ်ပြိုင်ပွဲတွေ၊ ဆုချီးမြှင့်ပွဲတွေ ကျင်းပဖို့လည်း စီစဉ်ထားတယ်လို့ ဆိုပါတယ်။

ပြည်သူတွေအနေနဲ့ သင်္ကြန်မှာ အပျော်မလွန်ကြဖို့၊ စစ်ကောင်စီက ကျင်းပတဲ့သင်္ကြန်ကို မပါဝင်ကြဖို့ ပြည်သူ့ကာကွယ်ရေးအဖွဲ့တွေက တားမြစ်ထားတာတွေလည်းရှိလို့ လည်ပတ်မယ့်အခြေနေက‌ နည်းပါးတယ်လို့ သိရပါတယ်။

စာတည်း – 007

ပုလဲ၊ ဧပြီ ၇၊ ၂၀၂၃။

စစ်ကိုင်းတိုင်း၊ ပုလဲမြို့နယ်၊ ပန်းရွာကျေးရွာအနီးက M7 PDF စခန်း လေကြောင်းနဲ့ ပစ်ခတ်စီးနင်းခံရချိန် ပျောက်ဆုံးခဲ့တဲ့ ရဲဘော် ၇ ဦးကို ရုပ်အလောင်းတွေ မီးရှို့ခံထားရတဲ့ ပြာပုံအနေအထားနဲ့ ပြန်တွေ့ခဲ့ရတယ်လို့ သိရပါတယ်။

ဧပြီလ ၆ ရက် မနေ့ ညနေ ၅ နာရီဝန်းကျင်မှာ စခန်းအနီးကလျှိုအတွင်း ရဲဘော်တွေရဲ့ရုပ်အလောင်းတချို့ကို ဆိုင်ကယ်တွေနဲ့အတူ မီးပုံရှို့ထားခဲ့တာကို စတင်တွေ့ရှိခဲ့တာဖြစ်ပြီး ဒီကနေ့ နေ့လည်ပိုင်းအထိ ဆက်လက်ရှာဖွေခဲ့ပေမယ့် မတွေ့ရှိတဲ့အတွက် ၇ ဦးစလုံး ကျဆုံးသွားပြီလို့ပဲ သတ်မှတ်လိုက်တာလို့ M 7 People’s Defense Army အဖွဲ့တာဝန်ခံက မြေလတ်အသံကို ပြောပါတယ်။

“ပြာပုံမှာက လူအယောက်ရယ် မသိရဘူး။ အရိုးကို ပြာကျအောင် ရှို့ထားတာဆိုတော့ ခန့်မှန်း ၄၊ ၅ ယောက် လောက်ပေါ့။ ၂ယောက်လောက်ကတော့ လွတ်နိုင်တဲ့အနေထား ရှိသေးတယ်ဆိုပြီး စခန်းနဲ့ တော်တော်ဝေးတဲ့ နေရာတွေအထိ လိုက်ရှာပြီးပြီ။ မတွေ့တော့လို့ ၇ ယောက်လုံး အသက်ပေးလိုက်ရပြီလို့ သတ်မှတ်လိုက်ပါပြီ” လို့ ပြောပါတယ်။

ဧပြီလ ၅ ရက်နေ့ မနက်ပိုင်းက စစ်ကောင်စီတပ် လေယာဉ်နဲ့စီးနင်းပစ်ခတ်ချိန် ရဲဘော် ၂ ဦးဟာ ကျည်ထိမှန် သေဆုံးခဲ့တာဖြစ်ပြီး ကျန် ရဲဘော် ၅ ဦးက ဖမ်းဆီးရိုက်နှက်ပြီးမှ သတ်ဖြတ်ကာ မီးရှို့ထားခဲ့တာလို့ သူကဆက်ပြောပါတယ်။

သေဆုံးသွားတဲ့ရဲဘော်တွေဟာ အသက် ၂၀ ဝန်းကျင် ရဲဘော် ၃ ဦး နဲ့ ၂၅ နှစ်ဝန်းကျင် ရဲဘော် ၄ ဦး ဖြစ်ပြီး၊ သက်ဆိုင်တဲ့မိသားစုတွေကိုလည်း လက်လှမ်းမီသလောက်အကြောင်းကြားထားပြီးဖြစ်ကာ သေဆုံးသွားသူတွေအတွက် အမိန့်ပြန်တမ်းဖတ်ပြီး သက်ပျောက်ဆွမ်းကပ်သဂြိုလ်ခဲ့တယ်လို့ ဆိုပါတယ်။

စခန်းစီးနင်းခံရမှုအတွင်း ရဲဘော် ၇ ဦးသေဆုံးခဲ့တဲ့အပြင် M4 ၁ လက်၊ AK ၁ လက်၊ ၉ မမ ပစ္စတို ၁ လက်၊ လက်လုပ်သေနတ် ၆ လက်၊ ၆၀ မမစိန်ပြောင်း ၁ လက်နဲ့ ဗုံးသီးတွေ၊ မီးစက်၊ ဆိုင်ကယ် ၄ စီးနဲ့ ရဲဘော်တွေ ကိုင်ဆောင်တဲ့ဖုန်းတွေ ဆုံးရှုံးသွားခဲ့တယ်လို့ သိရပါတယ်။

အခုလို စခန်းနေရာအတိကျကို လေကြောင်းကနေ စီးနင်းခံရတာဟာ စခန်းကိုရောက်ဖူးတဲ့ သတင်းပေးဒလန်တဦးကြောင့် ဖြစ်နိုင်တယ်လို့ သုံးသပ်ထားပြီး ဘယ်သူဘယ်ဝါဖြစ်တယ်ဆိုတာကိုတော့ စုံစမ်းနေဆဲဖြစ်တယ်လို့ သိရပါတယ်။

စာတည်း – ရင်ငြိမ်း

ယင်းမာပင်၊ ဧပြီ ၇၊ ၂၀၂၃။

စစ်ကိုင်းတိုင်း၊ ယင်းမာပင်ခရိုင်၊ ပုလဲမြို့နယ်အတွင်း ကျေးရွာတရွာက မိုင်းမတော်တဆမှုကြောင့် ခြေထောက် ၂ ဖက်လုံးပြတ်သွားတဲ့ အသက် ၁၁ နှစ်အရွယ် မောင်ရှင်းသန့်မောင်ကို ဧပြီလ ၆ ရက်နေ့က ငွေကျပ် ၂၅၀၀၀၀ သွားရောက်လှူဒါန်းခဲ့တယ်လို့ အညာပစ်တိုင်းထောင်လေးများအဖွဲ့ဆီက သိရပါတယ်။

မောင်ရှင်းသန့်မောင်ဟာ နွားကျောင်းသွားရင်း မိုင်းနင်းမိတာ‌ကြောင့် ဒူးခေါင်းအောက်ကနေခြေထောက် ၂ ဖက်လုံး ပြတ်သွားခဲ့တာဖြစ်ပြီး ကူညီသူနည်းပါးနေတာကြောင့် သွားရောက်ကူညီခဲ့တာလို့ အဖွဲ့တာဝန်ရှိသူက မြေလတ်အသံကို ပြောပါတယ်။

“ဒေသခံတွေက ဆက်သွယ်လာတာရယ်၊ ကလေးကိုလှူမဲ့သူတွေမရှိတာတွေရယ်ကြောင့် သွားလှူခဲ့တာပါ။ အခုလိုမိုင်းနင်းမိလို့ ဒဏ်ရာရသူတွေကို လှူဒါန်းတာ ၂ ကြိမ်ရှိပါပြီ။ ပထမက မိုင်းနင်းမိလို့ အရေပြားပျက်သွားတဲ့ ရဲဘော်ပါ။ အခုက မောင်ရှင်းသန့်မောင်ပါ။ နောက်ထပ်လည်း အဆင်ပြေရင် ပြေသလို လှူဒါန်းဖို့ရှိပါတယ်” လို့ ဆိုပါတယ်။

မောင်ရှင်းသန့်မောင်ရဲ့ ရေရှည်ကျန်းမာရေးအတွက် ဆေးဝါးစရိတ်တွေ လိုအပ်နေသလို Wheel Chair တစီးလည်း အရေးပေါ်လိုအပ်နေတယ်လို့ အညာပစ်တိုင်းထောင်လေးများအဖွဲ့က ထုတ်ပြန်ရေးသားထားပါတယ်။

ဧပြီလ ၄ ရက်နေ့ကလည်း အညာပစ်တိုင်းထောင်လေးများအဖွဲ့ဟာ ဆားလင်းကြီးမြို့နယ်အတွင်း မီးရှို့ခံရတဲ့ကျေးရွာက အိမ်ထောင်စု ၁၂၈ စုက လူဦးရေ ၆၀၀ အတွက် ခေါက်ဆွဲကြော်ကို သွားရောက်လှူဒါန်းခဲ့ပါသေးတယ်။

စာတည်း – ရင်ငြိမ်း

အရာတော်၊ ဧပြီ ၇၊ ၂၀၂၃။

စစ်ကိုင်းတိုင်း၊ အရာတော်မြို့က ပြည်သူတွေကို နိမ့်ချရေးထားတဲ့ ဝါဒဖြန့်စာရွက်တွေကို ဧပြီ ၆ ရက်မနေ့ညနေပိုင်းမှာ စစ်ကောင်စီတပ်တွေက လိုက်ဖြန့်နေတယ်လို့ ဒေသခံတဦးကပြောပါတယ်။

အရာတော်မြို့မစျေး၊ မြို့လယ်ဓမ္မာရုံတို့မှာ စစ်သား ၁၀ ဦးလောက်နဲ့ မနေ့ညနေ ၃ နာရီဝန်းကျင်မှာ ကား ၁ စီးပေါ်က ဖြန့်ကြဲသွားတာလို့ ဆိုပါတယ်။

“သူတို့စာက ၂ ရွက်၊ စာမှာဘယ်အဖွဲ့အစည်းက ရေးတယ်ဆိုတာ တိတိကျကျမပါဘူး။ ကျနော်တို့ အရာတော်သားတွေကို နိမ့်ချတဲ့ စာတွေရေးထားတာ စစ်တပ်က သူ့ဟာသူရေးပြီးဖြန့်နေတာ၊ ဘယ်သူမှမယုံဘူး” လို့ မြို့ခံတဦးက ပြောပါတယ်။

ပြည်သူလူထုကိုနှိပ်စက်သတ်ဖြတ်ကာ ပြည့်သူ့ပစ္စည်းခိုးယူဖျက်ဆီးနေတဲ့ စစ်တပ်အပေါ် ဘယ်တော့မှ ကမ္ဘာမကျေဘူးလို့လည်း အထက်ပါဒေသခံက ဆက်ပြောပါတယ်။

စစ်ကောင်စီတပ်တွေ ကြဲချခဲ့တဲ့စာထဲမှာ “ရိုးသားဖြူစင်တဲ့ အညာသူအညာသားတွေကို အခွင့်ကောင်းယူပြီး ဖိနှိပ်ခံအဖြစ် အသုံးချ၊ နိုင်ငံရေးအမြတ်ထုတ်ကာ ဘာသာသာသနာကိုစော်ကားနေတယ်။ အကြမ်းဖက်သူတွေက ခေါင်းစဥ်လှလှတပ်ပြီး ပြည်သူနဲ့ရဟန်းသံဃာကို သတ်ဖြတ်ပြီး KIA နဲ့ PDF အကြမ်းဖက်တွေက စစ်တလင်းဖြစ်အောင် ဖိတ်ခေါ်နေတဲ့အတွက် ရပ်ရွာအေးချမ်းသာယာရေးကို လိုလားသူတွေက ဆန့်ကျင်တွန်းလှန်ကြဖို့” စတဲ့ စာတွေရေးသားထားတာလည်း ဖြစ်ပါတယ်။

ဒီစာရွက်တွေလိုက်ကြဲခဲ့တဲ့ စစ်ကောင်စီတပ်ဟာ ပြီးခဲ့တဲ့မတ်လ ၂၉ ရက်က အရာတော်မြို့နယ်၊ ကြွေပုဂံရွာကို မီးရှို့ခဲ့လို့ ဘုန်းတော်ကြီးကျောင်းအပါ နေအိမ် ၂၀ လုံးထက်မနည်း ပျက်စီးခဲ့ရပါသေးတယ်။

စာတည်း – လင်း

စစ်ကိုင်း၊ ဧပြီ ၇၊ ၂၀၂၃။

စစ်ကိုင်းတိုင်း၊ ကန့်ဘလူခရိုင်ရှိ ကျေးရွာအချို့က နေအိမ် ၁၇၄ လုံးကို စစ်ကောင်စီတပ်ဖွဲ့တွေက ၃ ရက်အတွင်း မီးရှို့ဖျက်ဆီးသွားတယ်လို့ ဒေသခံတွေဆီက သိရပါတယ်။

ကန့်ဘလူခရိုင်၊ ကိုးတောင်ဘို့တိုက်နယ် လျှော်ဖြူကုန်းရွာက နေအိမ်အလုံး ၆၀ ကို ကိုးတောင်ဘို့အထိုင် ခြေလျင်တပ်ရင်း-၁၃၇က စစ်ကြောင်း ၂ ကြောင်းခွဲပြီး ဧပြီလ ၂ ရက်နေ့မှာ ဝင်ရောက်မီးရှို့ခဲ့သလို အဲဒီရက်မှာပဲ နောက်ထပ်စစ်ကြောင်းတကြောင်းက ထန်းကုန်းတိုက်နယ် ဉာဏ်အင်းရွာက အိမ်ခြေ အလုံး ၄၀ ကို မီးရှို့ဖျက်ဆီးသွားခဲ့တယ်လို့ ဆိုပါတယ်။

ယင်းနောက် လျှော်ဖြူကုန်းရွာနဲ့ ဉာဏ်အင်းရွာကို မီးရှို့သွားတဲ့ စစ်ကောင်စီတပ်ဖွဲ့တွေဟာ ဧပြီလ ၃ ရက်နေ့မှာတော့ ထန်းကုန်းတိုက်နယ်၊ အင်းလယ်ကြီးရွာထဲကို ဝင်ရောက်ခဲ့ပြီး နေအိမ် ၇၀ နီးပါးကို မီးရှို့သွားတဲ့အပြင် စိတ်ဝေဒနာရှင်တဦးဖြစ်တဲ့ အသက် (၃၅)နှစ်အရွယ် ကိုဝလီကို ပစ်ခတ်သတ်ဖြတ်သွားတဲ့အပြင် အသက် (၆၅)နှစ်အရွယ် ဦးဌေးမောင်ကိုလည်း လက်ပြန်ကြိုးတုပ်ပြီး မီးရှို့သတ်ဖြတ်သွားခဲ့ပါသေးတယ်။

“ရွာသားတွေက အခုထိ ရွာထဲမဝင်ရသေးဘူး။ တချို့အိမ်တွေကလည်း မီးမငြိမ်းသေးတော့ မီးတွေပြန်ငြိမ်းနေရတယ်။ ရွာသားတွေက ကိုယ့်ယာတောထဲမှာပဲ အဆင်ပြေသလို တဲတွေထိုးပြီး နေနေကြတယ်။ စားဖို့သောက်ဖို့ကကျတော့ တယောက်စီကနေ တယောက်ဝေမျှစားနေရတယ်” လို့ အင်းလယ်ကြီးရွာ ဒေသခံတဦးက ပြောပါတယ်။

ကန့်ဘလူခရိုင်ထဲက မီးရှို့ခံရတဲ့ အဆိုပါကျေးရွာသုံးရွာထဲမှ လျှော်ဖြူကုန်းရွာဟာ အခုအကြိမ်နဲ့ဆို မီးရှို့ခံရတာ ၃ ကြိမ်မြောက်ရှိပြီးဖြစ်တယ်လို့လည်း ကျွန်းလှတက်ကြွလှုပ်ရှားသူများအဖွဲ့က ထုတ်ပြန်ထားပါတယ်။

စာတည်း – 007

စစ်ကိုင်း၊ ဧပြီ ၇၊ ၂၀၂၃။

စစ်ကိုင်းတိုင်းထဲက မီးဘေးသင့်ပြီး နေစရာအိမ်မရှိတော့တဲ့ ပြည်သူတွေအတွက် အိမ်လှူဒါန်းနေတာ ဒီကနေ့ဆို အလုံးရေ ၆၀၀ ပြည့်သွားပြီလို့ သိရပါတယ်။

ပြီးခဲ့တဲ့နှစ် ဒီဇင်ဘာလထဲက လှူတန်းနေတာဖြစ်ပြီး အိမ်အလုံးရေ ၁၀၀၀ ဆောက်လုပ်ဖို့ ရည်ရွယ်ထားကာ အခုဆိုရင် အရာတော်၊ ဒီပဲယင်း၊ ရွှေဘို၊ ရေဦး ၄ မြို့နယ်မှာ အိမ်အလုံးရေ ၆၀၀ ဆောက်နိုင်ခဲ့ပြီလို့ ဆိုပါတယ်။

“တအိမ်ကို ၂ ခန်းပါလို့ လူ ၅ ယောက်ကတော့ ကျယ်ကျယ်ဝန်းဝန်း နေလို့ရတယ်။ မိသားစုဦးရေကိုကြည့်ပြီး ၃ ခန်းမှလောက်တယ်ဆို ၁ ခန်းကတော့ သူတို့စိုက်ပေါ့။ ကျတော်တို့ကတော့ အခန်း၂ ခန်းနဲ့ အိမ်တလုံး အခမဲ့ဆောက်ပေးတယ်။” လို့ S&C တာဝန်ခံက ပြောပါတယ်။

အိမ်တလုံးကို ဆောက်လုပ်စက ၂ သိန်းကုန်ကျပေမယ့် အခုနောက်ပိုင်းမှာတော့ ဝါးဈေးတွေတက်လာတဲ့အပြင် လမ်းခရီးစရိတ်နဲ့ ကုန်ဈေးနှုန်းတက်လာတာတွေကြောင့် ၂ သိန်း ၃ သောင်းထိ ကုန်ကျလာတယ်လို့ ဆိုပါတယ်။

အိမ်အမိုးအဖြစ်သုံးတဲ့ ထန်းလက်ရှားပါးမှု အခက်ခဲလည်း ကြုံနေရကာ ရပ်ဝေးက ရွာတွေအထိပါ သွားရောက်ခုတ်ယူနေရတဲ့အတွက် အချိန်ကြာပြီး အိမ်ဆောက်လုပ်မှုမှာတော့ ကြန့်ကြာသွားတယ်လို့လည်း သူကဆက်ပြောပါတယ်။

ဒါ့အပြင် သင်္ကြန်တွင်းမှာလည်း အဆိုပါမြို့နယ်ထဲက အသက် ၇၀ ကနေ ၁၀၀ ကျော်ရှိတဲ့ အဖိုးဖွားတွေအတွက် သက်ကြီးပူဇော်ပွဲတွေ ကျင်းပဖို့စီစဉ်နေပြီး အသက် ၁၀၀ ကျော် အဖိုးဖွားကတော့ ၆ ဦးလောက် ပါဝင်တယ်လို့လည်း သိရပါတယ်။

စာတည်း – 007