စစ်ကိုင်း

ကလေး၊ ဧပြီ ၆၊ ၂၀၂၃။

စစ်ကိုင်းတိုင်း၊ ကလေးမြို့နယ်၊ ပျဉ်းတော်ဦးကျေးရွာအနီး နယ်မြေရှင်းလင်းရေးလုပ်ချိန် အသတ်ခံထားရတဲ့ အလောင်း ၃ လောင်း တွေ့ခဲ့ရပြီး အဲ့ဒီထဲမှာ PDF ရဲဘော်တဦးလည်း ပါဝင်တယ်လို့ သိရပါတယ်။

ဧပြီလ ၆ ရက် ဒီကနေ့မနက်ပိုင်းက တိုက်ပွဲတွေ ရပ်နားထားတဲ့အတွက် နယ်မြေခံကာကွယ်ရေးအဖွဲ့တွေက ရှင်းလင်းရေးဝင်ရောက်ခဲ့ရာ ပျဉ်းတော်ဦးနဲ့ နန်းစောင်းပုရွာကြားက လမ်းပိုင်းတနေရာမှာ တွေ့ခဲ့တာဖြစ်တာလို့ ကလေးဒေသခံတဦးက ဆိုပါတယ်။

“၂ ယောက်က ပြည်သူ၊ ၁ ယောက်က PDF၊ လူတွေပိတ်မိနေလို့သွားခေါ်တာကို သူပါအသတ်ခံလိုက်ရတာ။ ဝေဟင်ပစ်တဲ့နေ့က နှိပ်စက်ခံရပြီးမှ ပစ်သတ်ထားခဲ့တာ” လို့ ပြောပါတယ်။

အသက် ၃၀ ဝန်းကျင် နန်းချောင်းရွာသား ပြည်သူ ၂ ဦးနဲ့ ကလေးအခြေစိုက်တပ်ဖွဲ့တခုက ရဲဘော်တဦး ဖြစ်တယ်လို့ ကနဦးသိထားရပြီး မြေပြင်အခြေနေတွေကြောင့် ရဲဘော်နဲ့ပတ်သက်တဲ့ အသေးစိတ်အချက်လက်တွေတော့ မထုတ်ပြန်သေးဘူးလို့ သိရပါတယ်။

စစ်ကောင်စီက လေကြောင်းနဲ့ပစ်ခတ်တဲ့ ဧပြီလ ၂ ရက်နေ့က စစ်ကြောင်းနဲ့ထိပ်တိုက်တိုးပြီး အသတ်ခံရတာဖြစ်နိုင်တယ်လို့ ယူဆရပြီး၊ တွေ့ရှိချိန်မှာ အလောင်းတချို့က ပုတ်ပွပျက်စီးနေလို့ ဘယ်သူဘယ်ဝါဆိုတာ သိရဖို့ ကြန့်ကြာနေတယ်လို့လည်း ဆိုပါတယ်။

ကလေးမြို့မှာ မတ်လ ၃၀ ရက်ကနေ ဧပြီလ ၅ ရက်နေ့ထိ စစ်ကောင်စီနဲ့ နယ်မြေခံကာကွယ်ရေးအဖွဲ့ပေါင်းစုံ တိုက်ပွဲဖြစ်ပွားခဲ့ပြီး ၇ ရက်တာတိုက်ပွဲအတွင်း ရဲဘော် ၂ ဦး ကျည်ထိမှန်ကာ မစိုးရိမ်ရ ဒဏ်ရာရထားပြီး စစ်ကောင်စီဘက်ကလည်း သေဆုံးမှုတွေ ရှိခဲ့ပါသေးတယ်။

စာတည်း – လင်း

ချောင်းဦး၊ ဧပြီ ၆၊ ၂၀၂၃။

စစ်ကိုင်းတိုင်းဒေသကြီး၊ ချောင်းဦးမြို့နယ်၊ ပဲပြစ်တောကျေးရွာမှာ PDF ထောက်ပို့ ၁ ဦး ဖမ်းဆီးသတ်ဖြတ်ခံရပြီး သုံးမရတဲ့လက်နက်တွေ သိမ်းဆည်းခံလိုက်ရတယ်လို့ သိရပါတယ်။

ဧပြီလ ၅ ရက်နေ့ နေ့လည် ၁ နာရီခန့်မှာ မုံရွာ နမခကနေ ထွက်လာတဲ့ အင်အား ၇၀ ခန့်ပါတဲ့ စစ်ကြောင်းနဲ့တိုးပြီး ဖမ်းဆီးသတ်ဖြတ်ခံလိုက်ရတာ ဖြစ်တယ်လို့ Chaung U Revolution အဖွဲ့ဝင်တဦးက ပြောပါတယ်။

“သူက ရွာထဲကနေ သူ့ယာထဲမှာ သိုးတွေဝင်ဖျက်နေတယ်လို့ သတင်းရလို့ မောင်းထုတ်ဖို့ဆိုပြီး သွားတာ။ အဲဒီမှာ စကစ စစ်ကြောင်းနဲ့တိုးလို့ သူယာခင်းဘက်ကို ထွက်ပြေးရာမှာ သူအခင်းထဲမှာ စကစတွေက ကြိုရောက်နေပြီး ဖမ်းဆီးခံလိုက်ရတာ။ သူက တခါတလေတော့ CHU အတွက် ထောက်ပို့လုပ်ပေးတာ ရှိတယ်။ သူ့ကို ဖမ်းမိပြီး မကြာဘူး စကစဘက်က ပစ်သတ်လိုက်တာ” လို့ ပြောပါတယ်။

စစ်ကောင်စီတပ်က ပစ်ခတ်သတ်ဖြတ်တာခံလိုက်ရသူဟာ ပဲပြစ်ရွာနေ ကိုကျော်ဆန်း အသက် ၃၀ ကျော်ဆိုသူဖြစ်ပြီး ဦးခေါင်းပွင့်ထွက်ဒဏ်ရာနဲ့ သေဆုံးသွားတယ်လို့ ဆိုပါတယ်။

ဒါ့အပြင် သူပိုင်တဲထဲကနေ အသုံးမပြုဘဲ ထားထားတဲ့ လက်လုပ်သေနတ်အချို့၊ ပျက်စီးနေတဲ့ လက်လုပ်မိုင်းအချို့နဲ့ လက်ပစ်ဗုံးအချို့ကို စစ်ကောင်စီဘက်က သိမ်းဆည်းသွားတယ်လို့ သိရပါတယ်။

ထောက်ပို့ ကိုကျော်ဆန်းကို ပစ်သတ်ပြီးနောက်မှာတော့ စစ်ကောင်စီအဖွဲ့ဟာ ခင်မွန်ကျေးရွာဘက်ကို စစ်ကြောင်းဆက်ထိုးဖို့ ထွက်သွားတယ်လို့ ဆိုပါတယ်။

မတ်လ ၃ ရက်နေ့က ချောင်းဦးမြို့နယ်၊ ခင်မွန်ကျေးရွာမှာ စစ်ကြောင်းထိုးလာတဲ့ စစ်ကောင်စီတပ်က လက်နက်ကြီးရမ်းသမ်းပစ်လို့ ကလေးငယ်တဦးနဲ့ အမျိုးသမီးတဦး လက်နက်ကြီးထိ သေဆုံးသွားသေးတယ်လို့ သိရပါတယ်။

စာတည်း – 007

ကန့်ဘလူ၊ ဧပြီ ၅၊ ၂၀၂၃။

စစ်ကိုင်းတိုင်း၊ ကန့်ဘလူခရိုင်၊ ထန်းကုန်းတိုက်နယ်၊ အင်းလယ်ကြီးရွာက နေအိမ် ၇၀ ကျော်ကို စစ်ကောင်စီတပ်တွေက မီးရှို့သွားတဲ့အပြင် ရွာသား ၂ ဦးကိုလည်း သတ်သွားတယ်လို့ ဒေသခံတွေဆီက သိရပါတယ်။

အင်အား ၁၀၀ ကျော်ရှိတဲ့ စစ်အုပ်စုဟာ ဧပြီလ ၃ ရက် ညနေ ၄ နာရီလောက်မှာ လက်နက်တွေပစ်ဖောက်ဝင်ရောက်လာပြီးနောက် စိတ်ကျန်းမာရေးချို့တဲ့သူ အသက် ၂၅ နှစ်အရွယ် ကိုဝလီနဲ့ အသက် ၇၀ အရွယ် ဦးဌေး‌မောင် တို့ကို သတ်သွားတာလို့ ဒေသခံတဦးက ပြောပါတယ်။

“ကိုဝလီက မွေးရာပါ စိတ်မမှန်တဲ့သူပါ၊ ရွာထဲမှာ သူသွားချင်သလိုသွားနေတာ။ စစ်သားတွေလားလည်းသူမသိဘူး၊ သူသွားချင်သလိုသွားနေတယ်။ ကျနော်တို့မနေ့က (ဧပြီလ ၄) ရွာထဲကို မီးဝင်ငြိမ်းတဲ့အချိန် အူတွေထွက်နေတဲ့ သူ့အလောင်းကို သူ့အိမ်ရှေ့မှာတွေ့တယ်။ ဦးဌေးမောင်အလောင်းကိုတော့ ဒီမနက်မှ သူ့အိမ်ပေါ်မှာတွေ့တယ်”လို့ ဆိုပါတယ်။

ကိုဝလီကိုတော့ စစ်အုပ်စုက လမ်းမှာတင်သေနတ်နဲ့ပစ်သတ်ခဲ့ပြီး ဦးဌေးမောင်ကိုတော့ လက်ပြန်ကြိုးတုပ်ပြီးမီးရှို့သတ်ခဲ့တာလို့လည်း ဆိုပါတယ်။

ဦးဌေးမောင်ကို ကျေးရွာကာကွယ်ရေးပကဖတပ်ဖွဲ့တွေက ကျေးရွာထဲကနေ ထွက်ဖို့ခေါ်ခဲ့ပေမယ့် မလိုက်ပဲ ရွာထဲမှာကျန်နေခဲ့ရာမှာ အခုလို အသတ်ခံလိုက်ရတာလို့ ကျေးရွာပကဖ တပ်ဖွဲ့ဝင်တဦးက ပြောပါတယ်။

“အရင်စစ်ကြောင်းတွေလာတိုင်း ဦးဌေးမောင်ကို ဘာမှမလုပ်ဘူး။ သူက အသက်ကြီးပြီဆိုတော့ အိမ်မှာပဲနေခဲ့တာများတယ်။ ဒီတခေါက်စစ်ကြောင်းလာတော့ သူ့ကိုသွားခေါ်တယ်၊ သူမလိုက်ဘူး အိမ်မှာပဲနေခဲ့မယ်ဆိုပြီး နေခဲ့လိုက်တာ၊ အခုလိုဖြစ်သွားတယ်”လို့ ဆိုပါတယ်။

သေဆုံးသွားတဲ့ ကိုဝလီရဲ့ အလောင်းကိုတော့ ဧပြီလ ၄ ရက်မနေ့က သင်္ဂြုဟ်ပေးလိုက်ပြီး ဦးဌေးမောင်ရဲ့ရုပ်အလောင်းကိုတော့ ဒီမနက်မှ သဂြိုလ်ပေးလိုက်တယ်လို့ သိရပါတယ်။

အိမ်ခြေ ၈၀၀ ကျော်ရှိတဲ့ အင်းလယ်ကြီးရွာဟာ အခုလိုမီးရှို့ခံရတာ ဒုတိယအကြိမ်ရှိပြီဖြစ်ပြီး၊ ပြီးခဲ့တဲ့ ၂၀၂၂ ခုနှစ်၊ အောက်တိုဘာလတုန်းကလည်း စစ်ကောင်စီတပ်ဖွဲ့တွေက အိမ်ခြေ ၁၃၆ လုံးကို မီးရှို့ဖျက်ဆီးသွားခဲ့ပါသေးတယ်။

စာတည်း – လင်း

ဆားလင်းကြီး၊ ဧပြီ ၄၊ ၂၀၂၃။

စစ်ကိုင်းတိုင်း၊ ဆားလင်းကြီးမြို့နယ်ထဲက မီးဘေးသင့်ပြည်သူတွေကို ဧပြီလ ၄ ရက် ဒီကနေ့ နေ့လယ်စာအတွက် အညာပစ်တိုင်းထောင်လေးများအဖွဲ့ကဦးဆောင်ပြီး ခေါက်ဆွဲကြော်လှူဒါန်းခဲ့ကြတယ်လို့ သိရပါတယ်။

အိမ်ထောင်စု ၁၂၈ စုက ဒေသခံတွေကို ၁ ဦးလျှင် ၁ ဗူးနူန်းနဲ့ ဗူး ၆၀၀ ကို Mi Mi Lay Lin Family (Australia )ရဲ့ကူညီမှုနဲ့ လှူဒါန်းခဲ့တာလို့ အညာပစ်တိုင်းထောင်လေးများ အဖွဲ့တာဝန်ရှိသူတဦးက ပြောပါတယ်။

အညာပစ်တိုင်းထောင်လေးများအဖွဲ့ဟာ အဟာရကျွေးမွေးလှူဒါန်းတာတွေအပြင် မီးဘေးသင့်ပြည်သူတွေကို မီးဖိုဆောင်သုံးပစ္စည်းတွေ၊ ဆန်နဲ့ဆီတွေကိုလည်း အလှူရှင်တွေကိုယ်စား လှူဒါန်းပေးနေတာလည်းဖြစ်ပါတယ်။

စာတည်း – ရင်ငြိမ်း