စစ်ကောင်စီ

စစ်ကိုင်း၊ ဧပြီ ၁၀၊ ၂၀၂၃။

စစ်ကိုင်းတိုင်း၊ ကျွန်းလှမြို့ပေါ်ရှိ စစ်သားနဲ့ ပျူစောထီးအဖွဲ့တွေက အမျိုးသား ၂ ဦးစီး ဆိုင်ကယ်တွေကို ဖမ်းဆီးပြီး၊ ရိုက်နှက်ငွေတောင်းတာတွေကို လုပ်နေတယ်လို့ သိရပါတယ်။

ဧပြီလ ၉ ရက် မနေ့ကမနက်ပိုင်းမှာစတင်ကာ ဖမ်းဆီးနေတာဖြစ်ပြီး၊ ကျွန်းလှမြို့အနီး ကျေးရွာတွေကနေ ကျွန်းလှမြို့ပေါ်ကို လာသူအများစု ဖမ်းဆီးခံခဲ့ရတယ်လို့ ကျွန်းလှတက်ကြွလှုပ်ရှားသူများအဖွဲ့မှ တာဝန်ရှိသူက ပြောပါတယ်။

“ဒီနေ့ (ဧပြီ ၁၀)မနက်တော့ အဖမ်းခံရတဲ့ အနီးအနားဝန်းကျင်ရွာက လူတွေအများကြီးလို့ လှမ်းပြောကြတယ်။ မြို့ပေါ်လူထုအနေနဲ့လည်း ဖုန်းလက်ခံပြောဖို့ကို လန့်နေကြတာဆိုတော့ အသေးစိတ်မေးဖို့ မရဘူး” လို့ ဆိုပါတယ်။

စစ်သားနဲ့ ပျူစောထီးတွေက မြို့ပေါ်မှာ နေရာခွဲ၊ ဂိတ်ချပြီး ဖမ်းဆီးစစ်ဆေးနေတာလို့ အထက်ပါတာဝန်ခံက ဆက်ပြောပါတယ်။

“ဂိတ်တွေက မြို့ရဲ့မြောက်အဝင်မှာ တဂိတ်၊ မြို့အနောက် သစ်ရာမြိုင်စျေးအနီးမှာ တဂိတ်၊ တောင်ဘက်မြို့အဝင်မှာ တဂိတ် ပေါင်းသုံးခုရှိတယ်လို့ သိရတယ်။ မနေ့ကတော့ ဒီဂိတ်တွေအပြင် ဘူတာကြီးရှေ့မှာကော တဂိတ်ချထားတယ်လို့ သိရတယ်” လို့ ဆိုပါတယ်။

ဖမ်းဆီးရမိထားတဲ့ ဆိုင်ကယ်တွေကို အပိုင်သိမ်းပြီး၊ ဆိုင်ကယ်မောင်းနှင်သူနဲ့ လိုက်ပါလာသူ‌‌တွေကို ငွေနဲ့ ပြန်လည်ရွေးယူခိုင်းတဲ့အပြင် ရိုက်နှက်စစ်ဆေးမှုတွေကိုပါ ပြုလုပ်နေတာလို့ သိရပါတယ်။

ကျွန်းလှမြို့ပေါ်မှာ စစ်ကောင်စီလက်အောက်ခံ ရုံးနဲ့ ကင်းစခန်းတွေ တိုက်ခိုက်ခံရပြီးနောက် အခုလို အမျိုးသားတဦးထက်ပိုပြီး ဆိုင်ကယ်မစီးရအမိန့်ကို ထုတ်ပြန်လိုက်တာလို့လည်း ဆိုပါတယ်။

ပြီးခဲ့တဲ့နှစ် နိုဝင်ဘာလကလည်း ကျွန်းလှမြို့ပေါ်မှာ အမျိုးသားဆိုရင် တဦးထက်ပိုပြီး ဆိုင်ကယ်စီးနင်းခွင့်မရှိ‌ဟုဆိုပြီး စစ်ကောင်စီလက်အောက်ခံ ကျွန်းလှမြို့နယ် အထွေထွေ အုပ်ချုပ်ရေးဦးစီးဌာနက အမိန့်ထုတ်ပြန်ခဲ့ပြီးနောက် ခုလိုဖမ်းဆီးမှုမျိုးကို ရက်ပိုင်းသာ လုပ်ဆောင်ခဲ့သေးတယ်လို့ သိရပါတယ်။

စာတည်း – လင်း

ပဲခူး၊ ဧပြီ ၁၀၊ ၂၀၂၃။

ပဲခူးတိုင်း(အနောက်ခြမ်း)၊ ပြည်ခရိုင်၊ ပေါင်းတည်မြို့က စစ်ကောင်စီရဲ့ ဆောက်လုပ်ဆဲ သင်္ကြန်မဏ္ဍပ် ဗုံးခွဲခံလိုက်ရပြီးနောက် လမ်းကိုပိတ်လိုက်တယ်လို့ မြို့ခံတွေဆီက သိရပါတယ်။

အဲဒီ မဏ္ဍပ်ဟာ ယမန်နေ့ ဧပြီလ ၉ ရက်နေ့ နံနက်ပိုင်းက ဗုံးခွဲတိုက်ခိုက်ခံရပြီးနောက်ပိုင်း ယင်းနေ့ညနေပိုင်းမှာပဲ လမ်းကိုပိတ်လိုက်တာလို့ ဆိုပါတယ်။

“ဘယ်အချိန် လမ်းပိတ်မှန်းတောင် မသိဘူး။ ကြိုပြီးအသိပေးတာလည်း မရှိဘူး။ ပိတ်ချင်ရင် ပိတ်လိုက်တာပဲ။ စည်းမဲ့ကမ်းမဲ့ လုပ်နေတာ။ ထပ်ပြီးဗုံးခွဲခံရမှာ ကြောက်လို့လေ” လို့ မြို့ခံတဦးက ပြောပါတယ်။

ပေါင်းတည်မြို့ပေါ် စျေး ၂ ရပ်ကွက်က စစ်ကောင်စီသင်္ကြန်မဏ္ဍပ်ရှိတဲ့ ဘုရားကြီးလမ်းကို ဘယ်ရီဂိတ်တွေချပြီး လမ်းပိတ်ခဲ့တာဖြစ်ပြီး အဲဒီလမ်းမဟာ ပေါင်းတည်မြို့ရဲ့တောင်ဘက်နဲ့မြောက်ဘက်ကို အဓိကဆက်သွယ်ထားလမ်းဖြစ်လို့ ခရီးသွားလာသူတွေက ၄ လမ်းနဲ့ ၂ လမ်းတို့ကနေ ကွေ့ရှောင်သွားနေရတယ်လို့ ဆက်ပြောပါတယ်။

ခြေလျင်သွားလာခွင့်သာရပြီး ဆိုင်ကယ်နဲ့ ကားသွားလာခွင့်ကို ပိတ်ထားတာ​ကြောင့် အဲဒီလမ်းက စျေးဆိုင်တွေ စျေးရောင်းချရမှု နည်းပါးသွားတယ်လို့လည်း ဆိုပါတယ်။

ပေါင်းတည်မှာ စစ်ကောင်စီသင်္ကြန်မဏ္ဍပ် ဗုံးခွဲသတိပေးခံရတဲ့အတွက် မြို့ချင်းဆက်စပ်နေတဲ့ နတ်တလင်းစစ်ကောင်စီက မနေ့ညကစလို့ သင်္ကြန်မဏ္ဍပ်မှာ ရဲ ၆ ဦးကို ညအိပ်စောင့် ခိုင်းခဲ့သလို အနီးဝန်းကျင်မှာလည်း ကင်းပုန်းတွေ ချထားတယ်လို့ မြို့ခံတဦးဆီက သိရပါတယ်။

ပြီးခဲ့တဲ့နှစ်သင်္ကြန်ရက်မတိုင်မီကလည်း ပေါင်းတည်မြို့မဏ္ဍပ်အနီးနဲ့ မြို့ပေါ်ရပ်ကွက်တခုမှာ ဗုံးပေါက်ကွဲခဲ့သလို ဧပြီလ ၁၆ ရက် သင်္ကြန်အတက်နေ့ ညနေကလည်း မဏ္ဍပ်အနီးပေါက်ကွဲတဲ့ဗုံးကြောင့် ရေကစားလာတဲ့ အမျိုးသမီးတဦး သေဆုံးခဲ့ပါသေးတယ်။

စာတည်း – 007

နတ်တလင်း၊ ဧပြီ ၁၀၊ ၂၀၂၃။

ပဲခူးတိုင်းအနောက်ခြမ်း၊ သာယာဝတီခရိုင်၊ နတ်တလင်းမြို့မှာ သင်္ကြန်ပွဲကျင်းပဖို့အတွက် စစ်ကောင်စီက လောင်းကစားဒိုင်တွေနဲ့ လုပ်ငန်းရှင်တွေဆီကနေ ငွေကြေးတောင်းခံနေတယ်လို့ သိရပါတယ်။

ဧပြီလ ပထမအပတ်ကစတင်ကာ နတ်တလင်းမြို့က ဘောလုံးဒိုင်၊ ၂ လုံးဒိုင်နဲ့ ချဲဒိုင်တွေအပြင် လုပ်ငန်းရှင်တွေဆီကနေ စစ်ကောင်စီလက်အောက်ခံ ထွေအုပ်စာရေးတွေက တောင်းခံခဲ့တာလို့ မြို့နယ်ထွေအုပ်ရုံးနဲ့ နီးစပ်သူတဦးက ပြောပါတယ်။

“သင်္ကြန်မဏ္ဍပ်မှာ ကုန်မယ့်ငွေကို သက်ဆိုင်ရာထွေအုပ်စာရေးတွေက အုပ်ကြီးတွေဆီမှာ လောင်းကစားဒိုင်စာရင်းနဲ့ လုပ်ငန်းရှင်စာရင်းယူပြီး သူ့ရပ်ကွက်ကျေးရွာအလိုက် လိုက်တောင်းပေးရတာ” လို့ ပြောပါတယ်။

လောင်းကစားဒိုင်တွေကို အကြီးအသေးအလိုက် ကျပ် ၅ ထောင်ကနေ ကျပ်၂ သိန်းအထိတောင်းပြီး၊ ရွှေလုပ်ငန်းရှင်နဲ့ တခြားလုပ်ငန်းရှင်တွေကို ကျပ် ၂ သောင်းကနေ ကျပ် ၅ သိန်းအထိ တောင်းတယ်လို့ သူကဆက်ပြောပါတယ်။

လက်ရှိမှာတော့ နတ်တလင်းမြို့၊ ဇီးကုန်းကလေးရပ်ကွက်၊ ရန်ကုန်-ပြည်လမ်း ဘုရားကြီးရှေ့မှာ သင်္ကြန်မဏ္ဍပ် ဆောက်လုပ်ထားပြီး၊ ခုလို စစ်ကောင်စီက ကျင်းပမယ့် သင်္ကြန်ပွဲမှာ မြို့ခံပြည်သူတွေအနေနဲ့ စိတ်ဝင်စားမှုရှိမှာ မဟုတ်သလို စစ်တပ်ထောက်ခံသူတွေသာ ပါဝင်နိုင်တယ်လို့ နတ်တလင်း ဒေသခံတဦးက သုံးသပ်ပါတယ်။

“မနှစ်ကလည်း ရေကစားတာသိပ်မရှိဘူး။ အခုနှစ်လည်း ပြည်သူ လုံးဝ စိတ်မဝင်စားဘူး။ သင်္ကြန်သီချင်းတောင် ဖွင့်သံမကြားဘူး။ သင်္ကြန်အတွက်လည်း အစိမ်းနဲ့ဘောမ ဝန်ထမ်းတွေပဲ လုပ်မဲ့ကိုင်မဲ့သူရှိတယ်။ သာမန်ပြည်သူက သင်္ကြန်ရက်မထွက်ဖို့ များတယ်” လို့ ပြောပါတယ်။

နတ်တလင်းမြို့နယ် ပြည်သူ့ကာကွယ်ရေးတပ်ဖွဲ့ကလည်း စစ်ကောင်စီက ပြုလုပ်မယ့် သင်္ကြန်ပွဲတော်အပါအဝင် ဘယ်လိုပျော်ပွဲရွှင်ပွဲမဆို ဒေသခံပြည်သူတွေအနေနဲ့ မပါဝင်ကြဖို့ ပြီးခဲ့တဲ့ဧပြီလ ၆ ရက်က ထုတ်ပြန်တိုက်တွန်းထားပါတယ်။

ဒါ့အပြင် နတ်တလင်းမြို့နဲ့ မြို့ချင်းကပ်လျက် ပေါင်းတည်မြို့မှာလည်း စစ်ကောင်စီက သင်္ကြန်မှာ စည်ကားဖို့အတွက် မဏ္ဍပ်တွေဆောက်လုပ်လျှက်ရှိရာ၊ ဧပြီလ ၉ ရက်မနေ့က မနက် ၅ နာရီလောက်မှာတော့ ပေါင်းတည်မြို့၊ စျေး ၂ ရပ်ကွက်၊ ဘုရားကြီးလမ်းပေါ်က ဆောက်လုပ်ဆဲမဏ္ဍပ်ကို ပေါင်းတည်မြို့နယ် ပြည်သူ့ကာကွယ်ရေးတပ်ဖွဲ့ တပ်ရင်း-၃၆၀၁ တပ်ခွဲ – ၅ နွေဦးတပ်ဖွဲ့က ဗုံးခွဲသတိပေးခဲ့ပါသေးတယ်။

ပဲခူး၊ ဧပြီ ၈၊ ၂၀၂၃။

ပဲခူးတိုင်း၊ ဘုရားကြီးမြို့၊ ရန်ကုန်-မော်လမြိုင်လမ်းပိုင်းရှိ ဘုရားကြီးတိုးဂိတ်မှာ စစ်ကောင်စီစစ်ဆေးရေးအဖွဲ့တွေက ရန်ကုန်-မြဝတီ ကိုသွားလာနေကြတဲ့ မော်တော်ယာဉ်တွေဆီကနေ ဂိတ်ကြေးကို ကျပ်သိန်းချီတဲ့အထိ ကောက်ခံနေတယ်လို့ သိရပါတယ်။

မတ်လ ၂၅ ရက်မှစတင်ပြီး မြဝတီမြို့အနီးဝန်းကျင်မှာ တိုက်ပွဲတွေ ဆက်တိုက်ဖြစ်ပွားနေတဲ့အတွက် လုံခြုံရေးယူတာဆိုတဲ့အကြောင်းပြချက်နဲ့ ဂိတ်ထိုင်ကာ ငွေကြေးကောက်ခံနေတာဖြစ်ပြီး ကားအဝင်အထွက်များတဲ့ အချိန်တွေကိုရွေးကာ ကင်းစောင့်ကောက်ခံနေကြတာလို့ ရန်ကုန်-မြဝတီ ကုန်သွယ်ရေးလမ်းကြောင်းမှာ ခရီးသည်နဲ့ ကုန်ပစ္စည်းတွေကို သယ်ယူပေးနေတဲ့ အဌားယာဉ်မောင်းတဦးက ဆိုပါတယ်။

“ရန်ကုန်-မြဝတီသွားရင် ဂိတ်ကြေးအနေနဲ့ အသွား ၁၂၀၀၀၊ အပြန် ၁၂၀၀၀ ပေးရတယ်။ အခုနောက်ပိုင်း အသွား ၄၅၀၀၀၊ အပြန် တသိန်းနီးပါး ပေးနေရတဲ့အတွက် ကားသမားတွေအနေနဲ့ အခက်အခဲတွေကြုံနေရတယ်” လို့ သူကဆက်ရှင်းပြပါတယ်။

အစပိုင်းမှာ မြဝတီသွားမယ့်မော်တော်ယာဉ်တွေကို တစီး ၁၀၀၀ ကျပ်ကောက်နေရာမှ နောက်ပိုင်းတွင် ၅၀၀၀၊ ၁၀၀၀၀ အထိ တိုးမြှင့်ကောက်ခံရာက အခုလို အဆမတန်တိုးကောက်လာတာဖြစ်ပါတယ်။

စစ်ကောင်စီတပ်သားတွေက မော်တော်ယာဉ်တွေဆီကနေ အခုလိုကောက်ခံတာမျိုးတွေလုပ်သလို စစ်ကိုင်း၊ မကွေး၊ မန္တလေး၊ ရခိုင် စတဲ့ဒေသရဲ့ မှတ်ပုံတင်ကိုင်ဆောင်တဲ့သူတွေကိုလည်း ဒဏ်ကြေးရိုက်တယ်ဆိုပြီး ကျပ် ၁၀၀၀၀ အထိကောက်ခံတယ်လို့ အထက်ပါယာဉ်မောင်းက ဆိုပါတယ်။

“ယာဉ်ဂိတ်ကြေးကောက်တဲ့အပြင် အသက် ၁၈ နှစ်ကနေ ၃၀အတွင်း (မှတ်ပုံတင်)မလဲရသေးတဲ့ မှတ်ပုံတင်ကိုင်ဆောင်တဲ့သူတွေဆို ဒဏ်ကြေး ၅၀၀၀၊ ၅မျဉ်းစောင်း၊ ၈ မျဉ်းစောင်း၊ ၁၁မျဉ်းစောင်းကိုင်တဲ့သူတွေဆို ၁၀၀၀၀ အထိကောက်တယ်” လို့ သူက ဆက်ပြောပါတယ်။

ဂိတ်ကြေးကောက်ခံတဲ့အချိန်ကိုလည်း ကားအသွားလာများတဲ့ ညနေပိုင်းဆိုရောက်လာပြီး ညနေ ၅ နာရီကနေ ည ၁၂ နာရီ မော်လမြိုင်သွားတဲ့ လမ်းကြောဘက်မှာ တောင်းပြီး၊ မနက် ၄ နာရီကနေ ၆ နာရီထိကတော့ ရန်ကုန်ဘက်ဆင်းတဲ့ စုပေါင်းဂိတ်နားမှာ တောင်းတာတွေလုပ်တယ်လို့ ဆိုပါတယ်။

ဘုရားကြီးစစ်ဆေးရေးဂိတ်ဟာ ပြီးခဲ့တဲ့နှစ် ၂ လပိုင်းတုန်းက ဖျက်သိမ်းထားတဲ့ဂိတ် ဖြစ်ပေမယ့် အခုနှစ် မတ်လ ၂၇ရက်ကမှ အသစ်ပြန်ဖွင့်ပြီး ဘောနက်ကြီးအခြေစိုက် ခလရ ၅၉ကတပ်သားတွေဦးဆောင်ကာ ပြည်သူတွေဆီက ငွေကြေးအဆမတန်တောင်းနေတာဖြစ်တယ်လို့ သိရပါတယ်။

ပုလဲ၊ ဧပြီ ၈၊ ၂၀၂၃။

စစ်ကိုင်းတိုင်း၊ ပုလဲမြို့နယ်ထဲက ချောင်းနားတောတိုက်က စစ်ရှောင်စခန်းနဲ့ နောကန်ရွာကို စစ်ကောင်စီတပ်ဖွဲ့တွေက ဧပြီလ ပထမပတ်အတွင်းမှာ မီးရှို့ခဲ့တာကြောင့် လူနေအိမ်ခြေ ၁၀၀ ကျော် မီးလောင်ပြီး အသက်ကြီး အမျိုးသမီးတစ်ဦး မီးလောင်သေဆုံးခဲ့ပါတယ်။

မှော်ဘီမြို့နယ်၊ ဖူးကြီးအခြေစိုက် ခမရ ၇၀၄ က စစ်သားတွေဟာ ပုလဲမြို့နယ်၊ ကန်ဒေါင့်ရွာမှာ တပ်စွဲထားပြီး ဧပြီလ ၂ ရက်မှာ ပုလဲမြို့နယ်၊ နှောကန်ကျေးရွာက အိမ်ခြေ ၁၁၄ လုံးကို မီးရှို့ခဲ့သလို ဧပြီလ ၆ ရက်မှာလည်း ပုလဲမြို့နယ်ထဲက ချောင်းနားတောတိုက်မှာရှိတဲ့ စစ်ရှောင်တဲ ၅ လုံးကိုလည်း မီးရှို့ခဲ့တယ်လို့ ပုလဲမြို့နယ် (ပကဖ) မှ သတင်းနဲ့ထောက်လှမ်းရေးတပ်တာဝန်ခံ ကိုလွင်ကြီးက ဆိုပါတယ်။

နှောကန်ကျေးရွာကို စစ်ကောင်စီတပ်ဖွဲ့တွေ ဝင်ရောက်မီးရှို့တဲ့အချိန် လေဖြတ်လို့ ထွက်မပြေးနိုင်ဘဲ အိမ်ထဲမှာကျန်ခဲ့တဲ့ အသက် ၆၀ အရွယ်အမျိုးသမီးတဦးကတော့ မီးလောင်သေဆုံးခဲ့ပါတယ်။

မီးရှို့ခံလိုက်ရတဲ့ နှောကန်ကျေးရွာမှာ ဒေသခံ ၅၇၆ ဦး အိုးအိမ်မဲ့ဖြစ်ပြီး၊ လျှပ်စစ်မီတာဘောက် ၅၂ လုံး ဆုံးရှုံးကာ၊ ဓာတ်မီးတိုင် ၃ တိုင်လည်း ပျက်စီးခဲ့တယ်လို့ ပုလဲမြို့နယ်ပြည်သူ့ကာကွယ်ရေးတပ်ဖွဲ့က ထုတ်ပြန်ပါတယ်။

“စစ်ကြောင်းမှာ စစ်ယူနီဖောင်းဝတ် အမျိုးသမီးစစ်သည် ၂ ဦးလောက်ပါလာတာ သေချာမြင်လိုက်ရတယ်။ နှောကန်ရွာကို မီးရှို့တာလည်း သူတို့စစ်ကြောင်းပဲ။ ချောင်းနားတောတိုက်ထဲက စစ်ရှောင်တဲကိုလည်း သူတို့ပဲ မီးရှို့ရင်း ရမ်းသမ်းပစ်လို့ အမျိုးသမီး ၃ ဦးဒဏ်ရာရခဲ့သေးတယ်” လို့ ကိုလွင်ကြီးက ဆက်ပြောပါတယ်။

ချောင်းနားတောတိုက်ထဲက စစ်ရှောင်တဲ ၅ လုံးကို မီးဝင်ရှို့ခဲ့တဲ့အချိန်မှာလည်း စစ်ကောင်စီတပ်ဖွဲ့တွေ ရမ်းသမ်းပစ်ခတ်တာကြောင့် အသက် ၄၀ အရွယ် အမျိုးသမီးတဦး၊ အသက် ၂၀ အရွယ် အမျိုးသားတဦးနဲ့ အသက် ၈ နှစ်အရွယ် ကလေးငယ်တဦး ကျည်ထိမှန်ကာ ဒဏ်ရာရခဲ့တယ်လို့ သူကဆက်ပြောပါတယ်။

လက်ရှိမှာ မီးရှို့ခံလိုက်ရတဲ့ နှောကန်ကျေးရွာနဲ့ ချောင်းနားတောတိုက်မှ စစ်ကောင်စီတပ်တွေ ပြန်လည် ထွက်ခွာသွားပြီးဖြစ်တာကြောင့် ဒေသခံတွေအနေနဲ့ ကျေးရွာထဲသို့ ပြန်လာကြပြီး မီးလောင်ခံထားရတာတွေကို ရှင်းလင်းရေးတွေ လုပ်နေကြရတယ်လို့ သိရပါတယ်။

မြေလတ်အသံ၊ ဧပြီ ၇၊ ၂၀၂၃။

စစ်ကောင်စီက ကျင်းပမယ့်သင်္ကြန်ပွဲမှာ ပြည်သူတွေမပါဝင်ဖို့ ပဲခူးတိုင်း၊ သာယာဝတီခရိုင်၊ နတ်တလင်း ပြည်သူ့ကာကွယ်ရေးတပ်ဖွဲ့က ကြေညာချက်အမှတ် ၄/၂၀၂၃နဲ့ ဧပြီလ ၆ ရက်မနေ့က ထုတ်ပြန်ပါတယ်။

ခုလို စစ်ကောင်စီက သင်္ကြန်ကို စည်ကားအောင် လုပ်နေတာဟာ ပြည်သူတွေကို သတ်ဖြတ်၊ နှိပ်စက်ထားတာတွေကို ဖုံးအုပ်ဖို့ ကြံရွယ်နေတာဖြစ်တယ်လို့ နတ်တလင်းပြည်သူ့ကာကွယ်ရေးတပ်ဖွဲ့မှ တာဝန်ရှိသူတဦးက ပြောပါတယ်။

“အဓိကတော့ နတ်တလင်းက ပြည်သူတွေကို ကိုယ့်အရပ်ကိုယ့်ဒေသမှာ အေးချမ်းနေတယ်ဆိုတိုင်း နေချင်သလို ပျော်ချင်သလို မနေကြဖို့ ပြောချင်တာ ဖြစ်ပါတယ်။ အကြမ်းဖက်စစ်တပ်ဆိုတာ တရားဝင်တဲ့ အဖွဲ့အစည်း မဟုတ်ဘူး။ ဒီလို တရားမဝင် စစ်ရာဇဝတ်ကောင်တွေက လုပ်မယ့် သင်္ကြန်ဆိုတာ ပြည်သူတွေကို သတ်ဖြတ်၊ နှိပ်စက်ထားတဲ့ လုပ်ရပ်တွေကို ဖုံးအုပ်မယ့် အကြံပဲ။” လို့ ပြောပါတယ်။

ဒါ့အပြင် စစ်ကောင်စီက အုပ်ချုပ်နေချိန်အတွင်း ပြည်တွင်းမှာ အေးချမ်းတည်ငြိမ်မှုရှိပြီး ပြည်သူတွေအနေနဲ့လည်း ပျော်ရွှင်နေကြတယ်ဆိုတာကို လိမ်လည်ပြသလိုတဲ့အတွက် သင်္ကြန်ကို စည်ကားအောင်ကျင်းပဖို့ ဆောင်ရွက်နေတာလို့လည်း ထုတ်ပြန်ချက်မှာ ဆိုထားပါတယ်။

အခုကာလဟာ ပြည်သူလူထုအပေါ် နည်းမျိုးစုံနဲ့ ယုတ်မာအကြမ်းဖက်နေတဲ့ အာဏာလုစစ်တပ်ကို အမြစ်ပြုတ်တိုက်နေတဲ့ တော်လှန်ရေးကာလဖြစ်ပြီး အသက်ပေးခဲ့ရတဲ့ ပြည်သူတွေ၊ ရဲဘော်တွေနဲ့ အိုးအိမ်စည်းစိမ်ဖျက်ဆီးခံရတဲ့ပြည်သူတွေ၊ အာဏာဖီဆန်တဲ့ပြည်သူ့ဝန်ထမ်းတွေ၊ ဒေသအသီးသီးက စစ်ရှောင်ပြည်သူတွေအပါအဝင် ဒုက္ခမျိုးစုံခံစားနေရတဲ့ ပြည်သူတွေကို ငဲ့ညှာတဲ့အနေနဲ့ အခု သင်္ကြန်လို ပျော်ပွဲရွှင်ပွဲတွေမှာ မပါဝင်ဖို့ကိုလည်း တိုက်တွန်းထားပါသေးတယ်။

တော်လှန်ရေးကာလဖြစ်တဲ့အတွက် ပြည်သူ့ကာကွယ်ရေးတပ်ဖွဲ့ (နတ်တလင်း) အနေနဲ့ ရန်သူအကြမ်းဖက်စစ်တပ်ကို အခါအခွင့်သင့်သလို ချေမှုန်းတိုက်ခိုက်သွားမှာလို့လည်း ဆိုပါတယ်။

နတ်တလင်း စစ်ကောင်စီအဖွဲ့ဝင်တွေကတော့ သင်္ကြန်ပွဲစည်ကားဖို့အတွက် ရန်ကုန် – ပြည်လမ်းရှိ ဘုရားကြီးရှေ့မှာ သင်္ကြန်ရေကစားမဏ္ဍပ်ကို ဆောက်လုပ်နေတယ်လို့ သိရပါတယ်။

ဒါ့အပြင် ပဲခူးတိုင်းအနောက်ခြမ်းက ပြည်မြို့နဲ့ ပေါင်းတည်မြို့တွေမှာလည်း စစ်ကောင်စီက သင်္ကြန်မှာ မဏ္ဏပ်တွေဆောက်လုပ်ဖို့အတွက် ဒေသခံတွေနဲ့ လောင်းကစားဝိုင်းဒိုင်တွေဆီကို မဲလက်မှတ်ရောင်းပြီး ရန်ပုံရှာတာတွေ လုပ်ဆောင်လျှက် ရှိနေပါတယ်။

စာတည်း – လင်း

အရာတော်၊ ဧပြီ ၇၊ ၂၀၂၃။

စစ်ကိုင်းတိုင်း၊ အရာတော်မြို့က ပြည်သူတွေကို နိမ့်ချရေးထားတဲ့ ဝါဒဖြန့်စာရွက်တွေကို ဧပြီ ၆ ရက်မနေ့ညနေပိုင်းမှာ စစ်ကောင်စီတပ်တွေက လိုက်ဖြန့်နေတယ်လို့ ဒေသခံတဦးကပြောပါတယ်။

အရာတော်မြို့မစျေး၊ မြို့လယ်ဓမ္မာရုံတို့မှာ စစ်သား ၁၀ ဦးလောက်နဲ့ မနေ့ညနေ ၃ နာရီဝန်းကျင်မှာ ကား ၁ စီးပေါ်က ဖြန့်ကြဲသွားတာလို့ ဆိုပါတယ်။

“သူတို့စာက ၂ ရွက်၊ စာမှာဘယ်အဖွဲ့အစည်းက ရေးတယ်ဆိုတာ တိတိကျကျမပါဘူး။ ကျနော်တို့ အရာတော်သားတွေကို နိမ့်ချတဲ့ စာတွေရေးထားတာ စစ်တပ်က သူ့ဟာသူရေးပြီးဖြန့်နေတာ၊ ဘယ်သူမှမယုံဘူး” လို့ မြို့ခံတဦးက ပြောပါတယ်။

ပြည်သူလူထုကိုနှိပ်စက်သတ်ဖြတ်ကာ ပြည့်သူ့ပစ္စည်းခိုးယူဖျက်ဆီးနေတဲ့ စစ်တပ်အပေါ် ဘယ်တော့မှ ကမ္ဘာမကျေဘူးလို့လည်း အထက်ပါဒေသခံက ဆက်ပြောပါတယ်။

စစ်ကောင်စီတပ်တွေ ကြဲချခဲ့တဲ့စာထဲမှာ “ရိုးသားဖြူစင်တဲ့ အညာသူအညာသားတွေကို အခွင့်ကောင်းယူပြီး ဖိနှိပ်ခံအဖြစ် အသုံးချ၊ နိုင်ငံရေးအမြတ်ထုတ်ကာ ဘာသာသာသနာကိုစော်ကားနေတယ်။ အကြမ်းဖက်သူတွေက ခေါင်းစဥ်လှလှတပ်ပြီး ပြည်သူနဲ့ရဟန်းသံဃာကို သတ်ဖြတ်ပြီး KIA နဲ့ PDF အကြမ်းဖက်တွေက စစ်တလင်းဖြစ်အောင် ဖိတ်ခေါ်နေတဲ့အတွက် ရပ်ရွာအေးချမ်းသာယာရေးကို လိုလားသူတွေက ဆန့်ကျင်တွန်းလှန်ကြဖို့” စတဲ့ စာတွေရေးသားထားတာလည်း ဖြစ်ပါတယ်။

ဒီစာရွက်တွေလိုက်ကြဲခဲ့တဲ့ စစ်ကောင်စီတပ်ဟာ ပြီးခဲ့တဲ့မတ်လ ၂၉ ရက်က အရာတော်မြို့နယ်၊ ကြွေပုဂံရွာကို မီးရှို့ခဲ့လို့ ဘုန်းတော်ကြီးကျောင်းအပါ နေအိမ် ၂၀ လုံးထက်မနည်း ပျက်စီးခဲ့ရပါသေးတယ်။

စာတည်း – လင်း

ပခုက္ကူ၊ ဧပြီ ၇၊ ၂၀၂၃။

မကွေးတိုင်း၊ ပခုက္ကူမြို့၊ အမှတ် ၃ ရပ်ကွက်နဲ့ စက်မှုဇုန်ရပ်ကွက်က နေအိမ်၊အဆာက်အဦးတချို့ကို PDF နဲ့ဆက်စပ်တယ်ဆိုပြီး ဧပြီလ ၅ ရက်နေ့ ညနေပိုင်းမှာ စစ်ကောင်စီဘက်က ချိတ်ပိတ်သွားတယ်လို့ သိရပါတယ်။

ပခုက္ကူမြို့၊ စက်မှုဇုံရပ်ကွက်မှာရှိတဲ့ ကိုသန့်မွန်ထက်အောင် ပိုင်ဆိုင်တဲ့ ဂိုထောင်အဆောက်အဦးနဲ့ အမှတ် ၃ ရပ်ကွက်နေ ကိုရာဇာဖြိုး(ခ)အာကြီးရဲ့နေအိမ်တွေကို ချိတ်ပိတ်သွားခဲ့တာလို့ ဒေသခံတဦးက မြေလတ်အသံကို ပြောပါတယ်။

“၅ ရက်နေ့ ညနေပိုင်းမှာ စကစ အဖွဲ့တွေ လာပိတ်သွားတာ။ ကိုအာကြီးကျတော့ အိမ်မှာဗုံးလုပ်ရင်းကွဲလို့ အိမ်ကိုချိတ်ပိတ်သွားတာ။ ကိုသန့်မွန်ထက်အောင် ကြတော့ လူက အမှတ် ၈ မှာ နေတာ။ အပိတ်ခံရတာက သူ့ဂိုထောင် ဟိုတလောက PDF တွေဖမ်းခံရချိန် သူပိုင် အဆောက်အဦးမှာ လက်ခံနေစရာပေးတယ်ဆိုပြီး ချိတ်ပိတ်သွားတာ” လို့ ပြောပါတယ်။

ဧပြီလ ၃ ရက်နေ့ ညပိုင်းက ရာဇာဖြိုး (ခ)အာကြီးနဲ့ သားဖြစ်သူ ကျော်ဇင်ထွဋ်တို့ဟာ အမှတ် ၃ ရပ်ကွက်၊ အောင်သပြေကွက်သစ် ၁ လမ်းက နေအိမ်မှာ ဗုံးလုပ်ရင်း ပေါက်ကွဲမှုဖြစ်ပွားရာက နေရာမှာပဲ သေဆုံးသွားခဲ့ပြီးနောက် စစ်ကောင်စီတပ်က ၎င်းရဲ့ဇနီးနဲ့သမီးဖြစ်သူကိုပါ ဖမ်းဆီးစစ်ဆေးကာ နေအိမ်ကို ချိတ်ပိတ်ခဲ့တာဖြစ်ပြီး ဇနီးနဲ့သမီးကိုတော့ ပြန်လွှတ်ပေးခဲ့တယ်လို့ သိရပါတယ်။

အလားတူ မတ်လ ပထမအပတ်က ပခုက္ကူမြို့အတွင်း PDF အဖွဲ့ဝင်အချို့ ဖမ်းဆီးခံရချိန် ကိုသန့်မွန်ထက်အောင်က PDFတွေကို ကူညီပေးနေသူလို့ စစ်ကောင်စီက စွပ်စွဲဖမ်းဆီးခဲ့ပြီးနောက် သူပိုင် ဂိုထောင်အဆောက်အဦးပါ ချိတ်ပိတ်ခံခဲ့ရတာပါ။

ပခုက္ကူမြို့မှာ NLD ပါတီလွှတ်တော်အမတ်တွေဖြစ်တဲ့ ဦးသက်ကြူ၊ ဦးပိုက်ကို၊ ဒေါ်ဇင်နီနီဝင်းတို့ရဲ့ နေအိမ်တွေ ချိတ်ပိတ်ခံထားရမှုတွေ အပါအဝင် PDF တွေနဲ့ ဆက်စပ်တယ်ဆိုကာ စစ်ကောင်စီက ချိတ်ပိတ်ထားတဲ့နေအိမ် ၁၅ လုံးထက်မနည်း ရှိပြီဖြစ်တယ်လို့ သိရပါတယ်။

စာတည်း – ရင်ငြိမ်း