စစ်ကောင်စီ

စစ်ကိုင်း၊ မတ် ၃၀၊ ၂၀၂၃။

စစ်ကိုင်းတိုင်း၊ ယင်းမာပင်မြို့လယ် ဝါတိုင်အဆောက်အဦး၊ လရိပ်သာတည်းခိုဆောင်အနီးမှာ ယာယီတပ်စွဲထားတဲ့ စစ်ကောင်စီနေရာ ဒရုန်းနဲ့ဗုံးချတိုက်ခိုက်ခံရလို့ ၄ ဦး သေဆုံးတယ်လို့ သိရပါတယ်။

မတ်လ ၂၈ ရက် ညနေ ၃ နာရီခန့်မှာ အင်အား ၁၀၀ ခန့်နဲ့ ယာယီတပ်စွဲထားတဲ့နေရာကို ဒရုန်းနဲ့ M 9 ဗုံးသီး ၆ လုံးချ တိုက်ခိုက်ခဲ့တယ်လို့ Myingyan District Drone Strike အဖွဲ့တာဝန်ရှိသူက ပြောပါတယ်။

“ကျနော်တို့အဖွဲ့က နယ်မြေခံမဟုတ်တော့ မဟာမိတ်အဖွဲ့တွေရဲ့ ဖိတ်ခေါ်တဲ့အတွက် သူတို့နဲ့အတူ ပူးပေါင်းပြီး မစ်ရှင်ဖော်ဆောင်ခဲ့တာပါ။ ဒီမစ်ရှင်ကိုတော့ ခက်ခက်ခဲခဲ လုပ်ဆောင်ခဲ့ရတယ်။ ဒရုန်းတွေ သယ်ယူဖို့ ခက်ခဲတာပေါ့။ ဒရုန်းဗုံးကတော့ ၆ လုံး ချခဲ့တယ်။ ထိခိုက်သေဆုံးကတော့ မျက်မြင်အခြေနေကြည့်ပေးတဲ့သူတွေက သတင်းပြန်ပေးလို့ သိရတာပါ။ သူတို့တပ်က စစ်ကြောင်းထိုးပြီး ယာယီဝင်နားတဲ့အဖွဲ့လို့တော့ သိရတယ်” လို့ ပြောပါတယ်။

စစ်ကောင်စီတပ်စွဲထားတဲ့နေရာ ဒရုန်းနဲ့တိုက်ခိုက်ခံရလို့ စစ်ကောင်စီတပ်သား ၄ ဦး သေဆုံးခဲ့တာကြောင့် ထိခိုက်သေဆုံးသွားတဲ့ စစ်ကောင်စီတပ်ဖွဲ့ဝင်တွေကို လူနာတင်ယာဥ်တွေနဲ့ဆေးရုံဘက်ကို သယ်သွားကြတယ်လို့ သိရပါတယ်။

ဒရုန်းနဲ့တိုက်ခိုက်ခံရပြီးနောက်မှာတော့ စစ်ကောင်စီအဖွဲ့ဟာ လမ်းပိတ်ဆို့ စစ်ဆေးတာ၊ ကင်းပုန်းချတာတွေ ဆက်တိုက်လုပ်ဆောင်ခဲ့ပြီး မတ်လ ၃၀ ရက်ဒီကနေ့အထိ စစ်ကြောင်းပြန်မထွက်နိုင်သေးဘူးလို့ သိရပါတယ်။

အဲ့ဒီတိုက်ခိုက်မှုကို Myingyan District Drone strike MDDS အဖွဲ့၊ 27 revolution forces၊ မြင်းခြံခရိုင် အမှတ်(၃)တပ်ရင်း၊ အမှတ်(၄)တပ်ရင်း၊ MRDA၊ Urban Underground revolution force YSO အဖွဲ့တို့က ပူးပေါင်းတိုက်ခိုက်ခဲ့တာ ဖြစ်ပါတယ်။

စာတည်း – ရင်ငြိမ်း

အုတ်ဖို၊ မတ် ၂၅၊ ၂၀၂၃။

ပဲခူးတိုင်း(အနောက်ခြမ်း)၊ သာယာဝတီခရိုင်၊ အုတ်ဖိုမြို့နယ်၊ ဝိုင်းကျေးရွာအုပ်စု၊ တာဝါတိုင်ရွာအနီးမှာ စစ်ကြောင်းထိုးလာတဲ့ စစ်ကောင်စီတပ်ကြားဖြတ်တိုက်ခိုက်ခံရလို့ ၆ ဦး သေဆုံးတယ်လို့ သိရပါတယ်။

အုတ်ဖိုဘက်ကနေ ဂမုန်းဆည်အနီးက တာဝါတိုင်ရွာဘက်ကို မတ်လ ၂၄ ရက် မနက် ၁၀ နာရီခန့်မှာ အင်အား ၃၀ ခန့်နဲ့ စစ်ကြောင်းထိုးလာတဲ့ စစ်ကောင်စီတပ်ကို တာဝါတိုင်ရွာအနီးမှာ ကြားဖြတ်မိုင်းဆွဲ တိုက်ခိုက်ပစ်ခတ်ခဲ့တယ်လို့ ပဲခူးတိုင်း ပြည်သူ့ကာကွယ်ရေးတပ်ဖွဲ့-Bago Region PDF ပြန်ကြားရေးတာဝန်ရှိသူက မြေလတ်အသံကို ပြောပါတယ်။

“ဒီကောင်တွေက ရိုးမအစပ်မှာ ရှိနေတဲ့အဖွဲ့တွေပါ။ ခုလည်း ရိုးမပေါ်ကို လှုပ်ရှားစစ်ကြောင်းထွက်လာတာကို ဒေသခံအဖွဲ့တွေက တိုက်ခိုက်ခဲ့တာ။ တိုက်ပွဲဖြစ်တာကတော့ တစ်နာရီလောက်ကြာမှာပေါ့။ သူတို့ဘက်က ထိခိုက်သေဆုံးတာများတော့ တာဝါတိုင်ကျေးရွာကိုတောင် မီးရှို့သွားသေးတယ်” လို့ ပြောပါတယ်။

အဆိုပါ မိုင်းဆွဲတိုက်ခိုက်မှုနဲ့ ထိတွေ့တိုက်ပွဲမှာ စစ်ကောင်စီတပ်ဖွဲ့ဝင် ၆ ဦး သေဆုံးပြီး အများအပြား ဒဏ်ရာရရှိခဲ့ပေမယ့် တော်လှန်ရေးပူးပေါင်းတပ်ဖွဲ့ဝင်တွေဘက်က အထိအခိုက်မရှိခဲ့ဘူးလို့ ဆိုပါတယ်။

တာဝါတိုင်ကျေးရွာဟာ အိမ်ခြေ ၅၀ နီးပါးခန့်သာရှိပြီး စစ်ကောင်စီတပ်က မီးရှို့သွားလို့ အိမ်ခြေအားလုံးနီးပါး မီးလောင်ပျက်စီးနိုင်ကာ အသေးစိတ်အခြေနေကိုတော့ မသိရသေးဘူးလို့ သူက ဆက်ပြောပါတယ်။

စစ်ကောင်စီတပ် အထိနာတာကြောင့် မတ်လ ၂၅ ရက်နေ့ ဒီကနေ့မနက်ပိုင်းမှာ အင်အား ၄၀ ခန့်နဲ့ ဝိုင်းကျေးရွာဘက်ကို စစ်ကူဖြည့်ထားပြီး လက်နက်ကြီးတွေနဲ့ ရွာတွေဘက်ကို ဆက်တိုက်ပစ်ခတ်နေကာ တိုက်ပွဲတွေဖြစ်ပွားနေလို့ ဝိုင်း၊ တာဝါတိုင်၊ ချောင်းစောက်ကျေးရွာတွေက ဒေသခံ ၇၀၀ ကျော်ဟာလည်း ဘေးလွတ်ရာကို တိမ်းရှောင်ထွက်ပြေးနေရတယ်လို့ ဆိုပါတယ်။

အဲဒီတိုက်ခိုက်မှုကိုတော့ သာယာဝတီခရိုင် PDF တပ်ရင်း ၃၈၀၁၊ တပ်ခွဲ၅ (ဗိုလ်မိုးကြိုးအဖွဲ့)က ဦးဆောင် ပြီး ပြည်ခရိုင် PDF တပ်ရင်း ၃၆၀၂၊ တပ်ခွဲ၅ ၊ တပ်စု ၂ နဲ့ ပူးပေါင်းတိုက်ခိုက်ခဲ့တာ ဖြစ်တယ်လို့ သိရပါ တယ်။

အုတ်ဖိုမြို့နယ်ဟာ တော်လှန်ရေးအင်အားစုတွေ အားကောင်းပြီး တိုက်ပွဲတွေမကြာခဏဖြစ်ပွားနေတာကြောင့် စစ်ကောင်စီတပ် စစ်အုပ်ချုပ်ရေးသတ်မှတ်အုပ်ချုပ်နေပေမယ့် တိုက်ပွဲတွေ ဆက်လက်ဖြစ်ပွားနေတာလည်း ဖြစ်ပါတယ်။

မြင်းခြံ၊ မတ် ၂၅၊ ၂၀၂၃။

မန္တလေးတိုင်း၊ မြင်းခြံမြို့နယ်၊ သဲရွာနဲ့ ရွာကြီးရွာသစ်ကြားမှာ အရပ်သားကားနဲ့လာတဲ့ စစ်ကောင်စီအဖွဲ့ မိုင်းဆွဲခံရပြီး ၄ ဦး ဒဏ်ရာရခဲ့တယ်လို့ သိရပါတယ်။

မတ်လ ၂၄ ရက်မနက် ၁၀ နာရီဝန်းကျင်မှာ မြင်းခြံဘက်ကနေ နွားထိုးကြီးဘက်ကို အင်အား ၈ ဦးခန့်ပါတဲ့ စစ်ကောင်စီအဖွဲ့ဟာ အရပ်သားကားနဲ့ထွက်လာချိန် ပဒေသာမိုင်း ၇ လုံးနဲ့ မိုင်းဆွဲတိုက်ခိုက်ခဲ့တာလို့ မြင်းခြံခရိုင်အမှတ် ၁ တပ်ရင်း 27 Revolution Forces တာဝန်ရှိသူကပြောပါတယ်။

“မြင်းခြံက စကစ အဖွဲ့တွေပါ။ သူတို့က စစ်ကားတွေနဲ့လာရင် မကြာခဏမိုင်းဆွဲခံရလို့ အရပ်သားကားတွေ အသုံးပြုသွားလာနေတာကို ကျနော်တို့ဘက်ကသတင်းရလို့ စောင့်ပြီး ပဒေသာမိုင်းနဲ့ တိုက်ခိုက်ခဲ့တာ။ ကားကိုလည်း ထိသွားတယ်။ ကားက အာရဖတ်ကားပါ။ ဖင်ပိုင်းကို ထိသွားတယ်။ စကစဘက်က ထိခိုက်မှုရှိတယ်” လို့ ပြောပါတယ်။

အဲဒီတိုက်ခိုက်မှုကို မြင်းခြံခရိုင်အမှတ် ၁ တပ်ရင်း 27 Revolution Forces တပ်ခွဲ ၁ တပ်ခွဲ ၃ နဲ့အတူ Natogyi Regional Defence Force – NRDFတို့က ပူးပေါင်းတိုက်ခိုက်ခဲ့တာပါ။

ကားမိုင်းဆွဲခံရတာကြောင့် စစ်ကောင်စီဘက်က ၄ ဦးဒဏ်ရာရပြီးနောက် ပတ်ဝန်းကျင်ကို ၁၀ မိနစ်လောက် ရမ်းသမ်းပစ်တာတွေ လုပ်ခဲ့တယ်လို့ ဆိုပါတယ်။

မတ်လ ၉ ရက်ညနေ ၅ နာရီခန့်မှာလည်း မြင်းခြံမြို့ပေါ်ကနေ အိမ်စီးကား ၇ စီးနဲ့ထွက်လာတဲ့ စစ်ကောင်စီအဖွဲ့ တူးရွင်းရွာနဲ့ သစ်ရုံရွာကြားမှာ တိုက်ခိုက်ခံရပြီး စစ်သား ၄ ဦးသေဆုံးကာ ၆ ဦး ဒဏ်ရာရရှိခဲ့ပါသေးတယ်။