စစ်ကောင်စီ

စစ်ကိုင်း၊ ဖေဖော်ဝါရီ ၁၅၊ ၂၀၂၃။

စစ်ကိုင်းတိုင်း၊ အရာတော်မြို့မှာ PDF တွေရဲ့ တိုက်ခိုက်မှုကြောင့် သေဆုံးခံရတဲ့ အရာရှိ ၆ ဦး နဲ့ပျူ ၃ ဦးတို့ကို ဖေဖော်ဝါရီ ၁၄ ရက်နေ့ မနက်အချိန်မှာ မီးသင်္ဂြိုဟ်ခဲ့ရာက အနီးအနားရှိ ကြာဇံစက်ရုံကို မီးကူးစက်လောင်သွားခဲ့တယ်လို့ သိရပါတယ်။

သေဆုံးခဲ့တဲ့ စစ်ကောင်စီအရာရှိတွေနဲ့ ပျူတပ်သားတွေဟာ အရာတော်မြို့အခြေစိုက် လေ့ကျင့်ရေး (၁၀) တပ်ကဖြစ်ပြီး၊ သူတို့ကို အရာတော်သုသာန်မှာ တိတ်တဆိတ် မီးသင်္ဂြိုလ်နေချိန် မီးအားအလွန်ပြင်းတာကြောင့် သုသာန်အနီးမှာရှိတဲ့ ကြာဇံစက်ရုံရဲ့ ခြံစည်းရိုးတွေကို မီးကူးစက် လောင်သွားခဲ့တာဖြစ်တယ်လို့ Danger Force LPDF မှ ပြန်ကြားရေးတာဝန်ခံ ကိုမာန်ဟုန်က ပြောပါတယ်။

“မီးသင်္ဂြိုလ်တာက စက်နဲ့မဟုတ်ဘူး။ အလောင်းတွေကို ထင်းပုံပြီးတော့ မီးရှို့တာ။ အဲဒီအချိန်မှာ လေက တအားတိုက်နေတော့ မီးကစက်ရုံရဲ့ ခြံစည်းရိုးတွေကို ကူးစက်လောင်ကျွမ်းသွားတာ။ အဲဒီအချိန်မှာဘဲ မီးသတ်ကားတွေကို ခေါ်ပြီးတော့ မီးငြှိမ်းသတ်ခဲ့ရ​တယ်။ မီးသတ်ကားတွေ ရောက်လာခဲ့လို့ စက်ရုံအထဲကိုတော့ မီးကမရောက်ခဲ့ဘူး” လို့ ဆိုပါတယ်။

လေ့ကျင့်ရေး(၁၀)တပ်ကို PDF တွေက ဖေဖော်ဝါရီ ၁၂ ရက်နေ့ညနေ ၅ နာရီကျော်မှာ ၈၀ မမနဲ့ ၅ လုံး ပစ်ခတ်တိုက်ခိုက်ခဲ့တာကြောင့် လက်နက်ကြီးကျည်တွေမှာ တပ်တွင်းထဲကို ကျရောက်ပေါက်ကွဲခဲ့ကာ အရာရှိ ၆ ဦး၊ ပျူ ၃ ဦး သေဆုံးခဲ့သလို မိမိတို့ဘက်ကလည်း ရဲဘော်တဦးမှာ မစိုးရိမ်ရ ဒဏ်ရာရရှိခဲ့တယ်လို့ ကိုမာန်ဟုန်က ဆိုပါတယ်။

အဲဒီတိုက်ခိုက်မှုကိုတော့ Danger Force LPDF၊ ကြယ်နီတပ်ဦး၊ ပင်လယ်ပျော်သိမ်းငှက်(SF2)၊ People’s Revolution Force (PRF)၊ တမန်တော်ပျောက်ကြားတပ်ဖွဲ့ (APOSTLE) တို့က ပူးပေါင်းလုပ်ဆောင်ခဲ့တာ ဖြစ်ပါတယ်။

ပြီးခဲ့တဲ့ ဖေဖော်ဝါရီလ (၁) ရက်နေ့ကလည်း အရာတော်မြို့နယ်၊ သစ်ကြင်းကြီးတပ်စခန်းကို Droneနဲ့ (၄) ကြိမ်၊ ရှော့ဒုန်းနဲ့(၃) ကြိမ်တိုက်ခိုက်ခဲ့တာကြောင့် စစ်ကောင်စီတပ်သား (၂) ဦးသေဆုံးပြီး (၂) ဦး အပြင်းအထန်ဒဏ်ရာရရှိတယ်လို့ သိရပါတယ်။

စစ်ကိုင်း၊ ဖေဖော်ဝါရီ ၁၅၊ ၂၀၂၃။

စစ်ကိုင်းတိုင်း၊ ကန့်ဘလူမြို့နယ်၊ ကမ်းဖြူအုပ်စု၊ စိန်နားရွာကို ဒေသခံကာကွယ်ရေးတပ်တွေက ဝင်ရောက်စီးနင်းခဲ့တာကြောင့် ကျေးရွာအတွင်းက ပြောင်းရွှေ့လိုတဲ့ ပျူစောထီးအဖွဲ့ဝင်တွေကိုပါ စစ်ကောင်စီကခွင့်မပြုပဲ လူသားဒိုင်းသဖွယ်အသုံးပြုနေတယ်လို့ သိရပါတယ်။

အိမ်ခြေ ၇၀ နဲ့ လူဦးရေ ၂၅၀ ဦးလောက်ရှိပြီး ပျူစောထီးအများစုနေထိုင်တဲ့ စိန်နားရွာကို ဖေဖော်ဝါရီလ ၉ ရက်ညမှာ ပြည်သူ့ကာကွယ်ရေးတပ်မတော် တပ်ရင်း – ၁၆ ရွှေဘိုခရိုင် -TRF နဲ့ ပြည်သူ့ကာကွယ်ရေးတပ်မတော် – တပ်ရင်း ၁ ကန့်ဘလူခရိုင်တို့က စီးနင်းတိုက်ခိုက်အပြီး ပြောင်းရွှေ့ခွင့်မပြုတာလို့ ဒေသခံတဦးက ပြောပါတယ်။

“ဖေဖေါ်ဝါရီလ ၉ ရက်ညက တိုက်ခိုက်ခံရပြီးကတည်းက စိန်နားက ပျူတွေက မနေရဲတော့လို့ တခြားကိုရွှေ့မယ်ပြောတာကို စစ်သားနဲ့ ကျေးရွာခေါင်းဆောင်လည်းဖြစ် ပျူစောထီးခေါင်းဆောင်က မပြောင်းခိုင်းဘူး။ ပြည်သူကိုမပြောနဲ့ သူတို့လူ သူတို့ လူသားဒိုင်းလုပ်ပြီး ချနင်းနေကြတာ” လို့ ပြောပါတယ်။

လက်ရှိမှာတော့ စိန်နားရွာသားအားလုံးကို ဖုန်းကိုင်ဆောင်ခွင့်မပေးပဲ ဆေးဝါးကုသဖို့ သွားပါကလည်း အခြားရွာမှာ ညအိပ်ခွင့်မပြုသလို ရွာခံအမျိုးသမီးတွေကအစ ကင်းစောင့်နေရတယ်လို့ သူက ဆက်ပြောပါတယ်။

ဒါအပြင်စစ်သားနဲ့ ပျူစောထီးတွေဟာ စိန်နားရွာအနီးကပ်လျက်က ရွာသားတဦး စိုက်ပျိုးထားတဲ့ ၃ ဧကရှိ ဌက်ပျောခြံကိုလည်း အကြောင်းမဲ့ ဖျက်ဆီးပစ်တယ်လို့ ဆိုပါတယ်။

စိန်နားရွာမှာ ကန့်ဘလူအခြေစိုက် ၆၀၀၆ တင့်ကားတပ်က တပ်ကြပ်အဆင့်ပါ စစ်သား ၂ ဦးလောက်နဲ့ ပျူစောထီးတွေခေါင်းဆောင် အောင်ခင် ဆိုသူတို့ ဦးဆောင်နေတာလို့ သိရပါတယ်။

ကာကွယ်ရေးတပ်တွေက ဖေဖေါ်ဝါရီလ ၉ ရက်ည စိန်နားရွာကို ဝင်ရောက်စီးနင်းချိန်မှာ ဘန်ကာထဲမှာရှိတဲ့ စစ်သား ၂ ဦးရဲ့ အလောင်းကိုတွေ့ခဲ့ပြီး သူတို့ကိုင်ထားတဲ့ ကာဘိုင်တလက်၊ MA1 တလက်၊ ကျည်ဘောက်နဲ့ ကျည်ဆံတချို့ကို ယူနိုင်ခဲ့တယ်လို့ သိရပါတယ်။

မကွေး၊ ဖေဖော်ဝါရီ ၁၅၊ ၂၀၂၃။

မကွေးတိုင်း၊ မြိုင်မြို့နယ်၊ ဝက်ပုတ်ကျေးရွာမှာ အခြေချတပ်စွဲထားတဲ့ စစ်သားနဲ့ပျူတွေက မိုင်ဝက်သာသာဝေးတဲ့ ကျွဲတွင်းကျေးရွာကို တိုက်ပွဲမဖြစ်ပဲ လက်နက်ကြီးနဲ့ပစ်ခတ်လို့ တိရိစ္ဆာန်အချို့ထိမှန် သေဆုံးခဲ့သလို ရွာသားတွေလည်း ထွက်ပြေးတိမ်းရှောင်ခဲ့ရပါတယ်။

ဖေဖော်ဝါရီလ ၁၄ ရက်မနေ့ကညနေ ၅ နာရီကျော်လောက်မှာ လက်နက်ကြီးနဲ့ ၈ ချက်ခန့်ပစ်ခတ်ခဲ့ရာ ဒေသခံတွေကိုတော့ မထိခိုက်ပဲ နွား ၂ ကေင်ကတော့ ကျည်ထိမှန်သေဆုံးခဲ့တယ်လို့ ပြည်သူ့ကာကွယ်ရေးတပ်ဖွဲ့ – မြိုင်မြို့နယ်မှ ဗိုလ်လက်ယာက ပြောပါတယ်။

“ဒေသခံတွေ ထွက်ပြေးတိမ်းရှောင်နေရတယ်လို့ သိရပါတယ်။ စစ်ကောင်စီတပ်သားတွေက တိုက်ပွဲမဖြစ်ပဲ ၆၀ မမ လက်နက်ကြီးနဲ့ ၈ ချက်ပစ်ခတ်တာ၊ အသံကြားလို့ ပြည်သူကတော့ တိမ်းရှောင်နိုင်ပြီး တိရစ္ဆာန်တွေ ထိသွားတယ်။ ပစ်ခတ်ခဲ့တာကြောင့် နွား ၂ ကောင်သေပြီး ၁ ကောင် ဒဏ်ရာရတယ်” လို့ ပြောပါတယ်။

ပခုက္ကူအခြေစိုက် တမခ ၁၀၁၊ ရေစကြိုအခြေစိုက် ခလရ ၂၅၈ က စစ်သားတွေနဲ့ ဝက်ပုတ်ရွာက ပျူစောထီးတွေ ပူးပေါင်းပြီး ခုလိုပစ်ခတ်ခဲ့တာဖြစ်သလို ခုလိုပစ်ခတ်လို့ အိမ်ခြေ ၂၀၀ ဝန်းကျင်ရှိတဲ့ ကျွဲတွင်းရွာက ဒေသခံ ၄၀၀ လောက်က ရွာကနေထွက်ပြေးနေရတယ်လို့ ဆိုပါတယ်။

ခုလက်ရှိမှာလည်း အဆိုပါစစ်အုပ်စုဟာ မြိုင်နယ်အတွင်း စစ်ကြောင်းထိုးဖို့ ပြင်ဆင်နေတယ်လို့ သိရပါတယ်။

စစ်ကိုင်း၊ ဖေဖော်ဝါရီ ၁၄၊ ၂၀၂၃။

စစ်ကိုင်းတိုင်း၊ ရွှေဘိုမြို့နယ်၊ တင့်တယ်ရွာကို စစ်ကောင်စီတပ်က ဖေဖေါ်ဝါရီလ ၁၂ ရက်မှာ မီးရှို့ခဲ့တဲ့အပြင် ဘုန်းကြီးတပါးနဲ့ ရွာသား ၂ ဦးကိုပါ သတ်ခဲ့တယ်လို့ သိရပါတယ်။

တမခ ၃၃ က စစ်သားတွေနဲ့ပျူအင်အား ၁၀၀ လောက်ဟာ တင့်တယ်ရွာကို ၁၂ ရက်မနက်ပိုင်းက ဝင်ရောက်မီးရှို့ခဲ့တာကြောင့် စပါးတင်း ၁ သိန်းကျော်နဲ့ နေအိမ် ၂၀၀ ဝန်းကျင် မီးလောင် ပျက်ဆီးခဲ့တယ်လို့ ဒေသခံတဦးက ပြောပါတယ်။

“တင့်တယ်ရွာက နေအိမ် ၂၀၀ လောက်နဲ့ စပါးတင်း ၁ သိန်းလောက်ကို မီးရှို့သွားတာဗျ။ စပါးဖိုး သိန်း ၂ သောင်းလောက်ရှိမယ်။ ဘုန်းကြီးတပါး၊ အမျိုးသမီးတဦးနဲ့ အမျိုးသားတဦးကိုလည်း သတ်သွားတယ်။ မီးလောင်ထားတော့ အသက်ကခန့်မှန်းရခက်တယ်”လို့ ဒေသခံတဦးကပြောပါတယ်။

သေဆုံးသူတွေဟာ ဘယ်သူဘယ်ဝါဆိုတာကို မသိရသေးပေမယ့် သူတို့ရဲ့အလောင်းကို ဖေဖေါ်ဝါရီလ ၁၃ ရက်မနေ့ကမနက်မှာသဂြိုလ်ခဲ့ပြီး စစ်အုပ်စုက တင့်တယ်ရွာအနီးဝန်းကျင်မှာပဲရှိနေတာကြောင့် ဗုဒ္ဓဘာသာဓလေ့အရ သရဏဂုဏ်တင်ပေးနိုင်ခြင်းမရှိခဲ့ဘူးလို့လည်း ဆိုပါတယ်။

စပါးတင်း ၁ သိန်းကျော်မှာ ကျေးရွာသားတွေရဲ့ လယ်ထွက်စပါးတွေအပြင် ကုန်သည်အချို့ဝယ်ယူသိုလှောင်ထားတဲ့ စပါးတွေပါဝင်ပြီး တင်း ၁၀၀ လျင် ကျပ်သိန်း ၂၀ ပေါက်စျေးရှိတဲ့ ရွှေဘိုဒေသထွက် ပေါ်ဆန်းဘေးကြားစပါးတွေဖြစ်တယ်လို့လည်း ဆိုပါတယ်။

အလားတူ ဖေဖေါ်ဝါရီ ၁၂ ရက်မနက်ပိုင်းမှာပဲ အဲဒီစစ်တပ်ဟာ တင့်တယ်ရွာအနီးရှိ ကျောက်မြင့်ရွာက နေအိမ် ၁၀ လုံးလောက်ကိုလည်း မီးရှို့ခဲ့ပါသေးတယ်။

ဒါ့အပြင် ဖေဖေါ်ဝါရီလ ၁၃ ရက်မနေ့ကနေ့လယ် ၁၂ နာရီလောက်မှာလည်း မဲတောရွာကို ဆက်လက်မီးရိူ့ခဲ့ပြီး ညနေ ၃ နာရီခန့်အထိ အဲဒီရွာထဲမှာပဲရှိနေသေးတယ်လို့ အဲဒီဒေသခံဆီက သိရပါတယ်။

အခုနှစ်စပါးရိတ်သိမ်းချိန်ကလည်း စစ်အုပ်စုဟာ ဒေသခံစိုက်ပျိုးထားတဲ့စပါးတွေကို ခိုးယူရိတ်သိမ်းခဲ့တဲ့အပြင် စပါးရိတ်နေတဲ့ ရိတ်ခြွေစက် ၁ စီးနဲ့ထော်လာဂျီတစီးကို သိမ်းယူခဲ့လို့ ဒေသခံလယ်သမားတွေ စပါးမရိတ်သိမ်းရဲတာကြောင့် ရွှေဘိုမြို့နယ်၊ သီးလုံးရွာနဲ့ ဇီဖြူကုန်းရွာဝန်ကျင်က စပါးစိုက်ဧက ၁၀၀ နီးပါး အကျိုးမဲ့ပျက်စီးခဲ့ရပါသေးတယ်။

စစ်ကိုင်း၊ ဖေဖော်ဝါရီ ၁၃၊ ၂၀၂၃။

စစ်ကိုင်းတိုင်း၊ အရာတော်မြို့နယ်မှာရှိတဲ့ စစ်ကောင်စီရဲ့ အမှတ် ၁၀ လေ့ကျင့်ရေးတပ် စခန်းကို ဖေဖော်ဝါရီ ၁၂ ရက်ညနေ ၅ နာရီကျော်မှာ တိုက်ခိုက်ခံရတာကြောင့် ၉ဦး ဒဏ်ရာအပြင်းအထန် ရသွားခဲ့တယ်လို့ သိရပါတယ်။

အမှတ် ၁၀ လေ့ကျင့်ရေးတပ် (အရပ်အခေါ် အရှေ့တပ်)ကို ကာကွယ်ရေးတပ် ၅ဖွဲ့က ၈၀မမနဲ့ ၅လုံးပစ်ခတ်တိုက်ခိုက်ခဲ့ချိန်မှာ ပြောင်းမတော်တဆကွဲထွက်ခဲ့တာကြောင့် ရဲဘော်တဦး ဒဏ်ရာအနည်းငယ်ရသွားခဲ့တယ်လို့ Danger Force LPDF ပြန်ကြားရေး တာဝန်ခံ ကိုမာန်ဟုန်က ပြောပါတယ်။

“စကစ ကိုးယောက်လုံးက ဆေးရုံမှာ အရေးပေါ် ကုသမှုခံယူနေတယ်လို့ အတွင်းဖရဲသီးပြောလို့ အတည်ပြုနိုင်ခဲ့တာပါ။ ကျနော်တို့ဘက်က ဒဏ်ရာရသွားတာက တပ်ကိုပထမအကြိမ် ပစ်တဲ့အချိန်မှာ ပြောင်းကွဲထွက်သွားလို့ ရသွားတာ။ ဒဏ်ရာကမစိုးရိမ်ရဘူး။ ကျနော်တို့ပစ်ခတ်ခဲ့တဲ့ လက်နက်ကြီးတွေကလည်း တပ်တွင်းထဲကို ကျရောက်ခဲ့တယ်”လို့ ဆိုပါတယ်။

အဲ့ဒီတပ်ကို ပစ်ခတ်တိုက်ခိုက်ခဲ့ချိန်မှာလည်း စစ်ကောင်စီဘက်က ၆၀မမတွေနဲ့ ပြန်လည်ပစ်ခတ်ခဲ့ပေမယ့် အထိအခိုက်မရှိ ပြန်ဆုတ်နိုင်ခဲ့တယ်လို့ ကိုမာန်ဟုန်က ပြောပါတယ်။

ဒီတိုက်ခိုက်မှုကိုတော့ Danger Force LPDF၊ ကြယ်နီတပ်ဦး၊ ပင်လယ်ပျော်သိမ်းငှက်(SF2)၊ People’s Revolution Force (PRF)၊ တမန်တော်ပျောက်ကြားတပ်ဖွဲ့ (APOSTLE)တို့က ပူးပေါင်းလုပ်ဆောင်ခဲ့တာဖြစ်ပါတယ်။

ပြီးခဲ့တဲ့ ဖေဖော်ဝါရီလ ၁ ရက်မှာလည်း အရာတော်မြို့နယ်၊ သစ်ကြင်းကြီးတပ်စခန်းကို Droneနဲ့ ၄ကြိမ်၊ ရှော့ဒုန်းနဲ့ ၃ကြိမ် တိုက်ခိုက်ခဲ့တာကြောင့် စစ်ကောင်စီတပ်သား ၂ ဦးသေဆုံးပြီး ၂ ဦးအပြင်းအထန် ဒဏ်ရာရရှိတယ်လို့ သိရပါတယ်။

မကွေး၊ ဖေဖော်ဝါရီ ၁၃၊ ၂၀၂၃။

မကွေးတိုင်း၊ ပခုက္ကူမြို့နယ်၊ စံပြကျေးရွာက ဒေသခံနေအိမ် ၁၀၀ နီးပါးကို စစ်ကောင်စီတပ်တွေက မီးရှို့ဖျက်ဆီးသွားတယ်လို့ သိရပါတယ်။

ဖေဖော်ဝါရီလ ၁၂ ရက် မနေ့ကမနက် ၉ နာရီလောက်မှာ မြစ်ခြေဘက်ကို စစ်ကြောင်းထိုးလာတဲ့ စစ်ကောင်စီအင်အား ၁၀၀ ကျော်ဟာ စံပြကျေးရွာကိုရောက်လာပြီး နေအိမ်တွေကို မီးတင်ရှို့ခဲ့တာလို့ ဒေသခံတဦးက ပြောပါတယ်။

“ပြီးခဲ့ရက်ပိုင်းက မြစ်ချေက စကစ မွေးမြူရေးတပ် တိုက်ခိုက်ခံရလို့ သေဆုံးတာတွေရှိတာကို မကျေနပ်လို့ ရွာတွေဘက်ကို စစ်ကြောင်းထိုးလာတာ။ မနေ့ကဆို လာတာက အင်အား ၃၀၀ ကျော်လောက်က ကျေးရွာတွေဘက်ကို စစ်ကြောင်းတွေခွဲပြီးလာကြတာ။ သူတို့တွေလာမယ်ဆိုတာသိလို့ ရွာသားတွေက ကြိုရှောင်နေကြတာ။ အဲဒါကို အိမ်တွေ မီးရှို့သွားတယ်” လို့ ပြောပါတယ်။

ခုလို မီးရှို့သွားလို့ အိမ်ခြေ ၁၀၀ ကျော်ရှိတဲ့ စံပြရွာဟာ ဘုန်းကြီးကျောင်းတွေ အပါအဝင် အားလုံးနီးပါး မီးလောင်သွားပြီး နေအိမ် ၅ လုံးသာ ကျန်ခဲ့တယ်လို့ ဆိုပါတယ်။

စစ်ကောင်စီတပ်တွေ လာမယ်ဆိုတဲ့ သတင်းအရ စံပြကျေးရွာခံ ၆၀၀ ကျော်ဟာ ဘေးလွတ်ရာကို ကြိုတင်တိမ်းရှောင်နေရတယ်လို့ သိရပါတယ်။

စစ်ကောင်စီအဖွဲ့ဟာ စံပြရွာကို မီးရှို့ပြီးနောက် ရေချိုကျေးရွာဘက်ကို ဆက်ထွက်သွားပြီး ညနေပိုင်းမှာ ကျေးရွာအနီးက PDF စခန်းတခုကို ဝင်ရောက်မီးရှို့သွားတယ်လို့ ဆိုပါတယ်။

PDF စခန်းကို ဝင်ရောက်မီးရှို့ချိန်မှာ စခန်းက ဆိုင်ကယ်တွေနဲ့အသုံးအဆောင်ပစ္စည်းတွေကို သိမ်းဆည်းသွားပြီး တဲတွေကိုတော့ မီးရှို့သွားတယ်လို့ ဒေသခံတွေကပြောပေမယ့် ဒီဖြစ်စဥ်နဲ့ပက်သက်ပြီး မြေလတ်အသံက သီးခြားအတည်မပြုနိုင်သေးပါဘူး။

ဖေဖော်ဝါရီလ ၁၁ ရက်ကလည်း မြစ်ခြေ မွေးမြူရေးတပ်စခန်းကို PDF ပူးပေါင်းတပ်တွေက ဝင်ရောက်တိုက်ခိုက်လို့ စစ်ကောင်စီဘက်က အရာရှိတွေအပါအဝင် ၇ ဦး သေဆုံးပြီး ၃ ဦး ဖမ်းမိခဲ့တယ်လို့ သိရပါတယ်။

အဲဒီနောက်ပိုင်းမှာ စစ်ကောင်စီဘက်က အင်အား ၃၀၀ ကျော်နဲ့ မြစ်ခြေဘက်က ကျေးရွာတွေကို အခုလို စစ်ကြောင်းထိုးနေတာလည်း ဖြစ်ပါတယ်။