စစ်ကောင်စီ

ရေစကြို၊ ဇန်နဝါရီ ၂၉၊ ၂၀၂၃။

မကွေးတိုင်း၊ ရေစကြိုမြို့နယ်မှာ တောင်ပေါ်က ဆင်းလာတဲ့စစ်ကောင်စီယာဥ်တန်းကို ဇန်နဝါရီလ ၂၈ ရက် မနေ့က မနက်ပိုင်း ကြားဖြတ်တိုက်ခိုက်ခဲ့လို့ စစ်သား ၆ ဦးသေဆုံးခဲ့တယ်လို့ ပြည်သူ့ကာကွယ်ရေးတပ်ဖွဲ့ ရေစကြို (ပကဖ)က ပြောပါတယ်။

ရှင်မတောင် တောင်ပေါ်မှာ တပ်စွဲထားတဲ့ စစ်ကောင်စီတပ်ဖွဲ့က ဒီနေ့မနက်ပိုင်း ၁၁ နာရီလောက်မှာ အင်အား ၆၀ လောက်နဲ့ ဆင်းလာချိန် ထန်းတိုကျေးရွာနဲ့ဘောင်ဘဲ့တန်းကျေးရွာကြားမှာလက်နက်ကြီးလက်နက်ငယ်တွေနဲ့ ကြားဖြတ်တိုက်ခိုက်ခဲ့တာလို့ဆိုပါတယ်။

“သူတို့ကတောင်ပေါ်ကနေထော်လာဂျီအကြီးနဲ့ဆင်းလာတာ။ ကျနော်တို့ရဲဘော်တွေကပျောက်ကြားစနစ်နဲ့ကြားဖြတ်တိုက်ခိုက်ခဲ့တာပါ။ သူတို့ဘက်က ၆ ယောက်သေတယ်။တိုက်ပွဲကြာချိန်က နာရီဝက်လောက်ရှိတယ်”လို့ ရေစကြို (ပကဖ)တာဝန်ရှိသူက ပြောပါတယ်။

တိုက်ခိုက်အပြီးမှာ စစ်ကောင်စီဘက် ပြန်လည်ပစ်ခတ်ခဲ့တဲ့အတွက် ပူးပေါင်းအဖွဲ့တွေ ပြန်လည်ဆုတ်ခွာခဲ့တယ်လို့ သူကဆက်ပြောပါတယ်။

စစ်ကောင်စီဘက်က သေဆုံးမှုတွေနဲ့ပတ်သက်ပြီး မြေလတ်အသံအနေနဲ့ သီးခြားအတည်ပြုချက်မရရှိသေးပါဘူး။

အဲဒီစစ်ဆင်မှုမှာ ပြည်သူကာကွယ်ရေတပ်ဖွဲ့-ရေစကြို(ပ.က.ဖ)နဲ့အတူ ပခုက္ကူခရိုင်တပ်ရင်းအမှတ် ၉ ၊ ပြည်သူ့ကာကွယ်ရေးတပ်ဖွဲ့မြိုင် တပ်ရင်း ၂ ၊လျှပ်စီးပျောက်ကြားတပ်ဖွဲ့ နဲ့ သံမဏိသိန်းငှက်ပျောက်ကြားတပ်ဖွဲ့ တို့ဖြင့်ပူပေါင်းတိုက်ခိုက်ခဲ့တယ်လို့ သိရပါတယ်။

ဇန်နဝါရီလ ၁၉ရက်ကလည်း ရေစကြိုမြို့နယ် ကြီးကန်ကျေးရွာကို ကင်းပုန်းလာဝပ်တဲ့ အင်အား ၁၅ ဦးပါတဲ့ စစ်သားတွေကို ပြည်သူ့ကာကွယ်ရေးတပ်ဖွဲ့-ရေစကြိုမြို့နယ် (ပ.က.ဖ) ရဲဘော်တွေက Drone နဲ့ ဗုံးကြဲတိုက်ခိုက်ခဲ့ကြပါသေးတယ်။

ရွှေဘို၊ ဇန်နဝါရီ ၂၉၊ ၂၀၂၃။

စစ်ကိုင်းတိုင်း၊ ဆားလင်းကြီးမြို့နယ်၊ မြန်မာဝမ်ပေါင်ကုမ္မဏီကိုလာတဲ့ စစ်ကောင်စီအရာရှိကားကို ဒေသခံကာကွယ်ရေးတပ်တွေက ယမားတံတားပေါ်မှာ ဇန်နဝါရီလ ၂၈ ရက်နေ့လယ်ပိုင်းက မိုင်းဆွဲခဲ့ပြီး ဒဏ်ရာရသူတွေလာသယ်တဲ့ကားကိုပါ မိုင်းထပ်ဆွဲခဲ့တယ်လို့ သိရပါတယ်။

နေ့လယ် ၁၁ နာရီ နဲ့ ၁၂ နာရီလောက်မှာ တိုက်ခိုက်ခဲ့တာဖြစ်ပြီး၊ တိုက်ခိုက်မှုကြောင့် စစ်တပ်အရာရှိ ၁ ဦးအပါ ၅ ဦး ထိခိုက်ဒဏ်ရာရရှိခဲ့တယ်လို့ Regional Friend Fighters − RFF တာဝန်ခံက ပြောပါတယ်။

“နေ့လယ် ၁၁ နာရီမှာက ရှေ့ထွက်ပြောင်းတွေနဲ့ချလိုက်တဲ့အပြင် မိုင်းလည်းဆွဲလိုက်တယ်၊ ထိခိုက်ဒဏ်ရာရပြီး ကားလည်းမီးစွဲတယ်၊ ထိခိုက်တဲ့သူတွေကို ပြန်သယ်အပို့မှာလည်း ယမားတံတားပေါ်မှာ ထပ်ပြီး ပတ်လည်မိုင်းနဲ့ ထပ်ခွဲလိုက်တယ်၊ အဲဒါကတော့ ၁၂ နာရီလောက်မှာမိုင်းခွဲလိုက်တာ၊ မိုင်း ၂ ကြိမ်ဆွဲခဲ့တာပါ၊ ထိခိုက်ဒဏ်ရာရသူ ၅ ဦးရှိပြီး ၁ ဦးက သေနိုင်တယ်” လို့ ပြောပါတယ်။

ဒီတိုက်ခိုက်မှုကို Regional Friend Fighters – RFF နဲ့ ညီနောင်မဟာမိတ် Revolution Youth Group – RYG တို့ ပူးပေါင်းတိုက်ခိုက် ခဲ့တာလည်း ဖြစ်ပါတယ်။

ဒါ့အပြင် အဆိုပါစစ်ကောင်စီစစ်ကြောင်းဟာ မုံရွာ နမခ တပ်ကထွက်လာတာဖြစ်ပြီး ဒဏ်ရာရသူတွေရှိခဲ့တဲ့အပြင် ကန်ဒါကား ၁ စီး နဲ့ အံစာတုံးကား ၃ စီးလည်း ထိခိုက်ပျက်စီးသွားခဲ့ပါသေးတယ်။

ပြီးခဲ့တဲ့ ဒီဇင်ဘာလ ၂၇ ရက်ကလည်း စစ်ကောင်စီတပ်တွေမီးရှို့သွားတဲ့ ယင်းမာပင်မြို့နယ်၊ မြရိပ်ကျေးရွာက မီးလောင်ပြင်ကို Regional Friend Fighters − RFF အဖွဲ့က ရှင်းလင်းရေးလုပ်ဆောင်ပေးခဲ့တယ်လို့ သိရပါတယ်။

မန္တလေး၊ ဇန်နဝါရီ ၂၇၊ ၂၀၂၃။

မကွေးတိုင်း၊ ပေါက်မြို့နယ်အတွင်းမှာ ဇန်နဝါရီလ ၂၇ ရက်ဒီနေ့လယ်ပိုင်းက စစ်ကောင်စီတပ်သားတွေနဲ့ ဒေသခံကာကွယ်ရေးတပ်တို့ ထိတွေ့တိုက်ပွဲဖြစ်ခဲ့ပါတယ်။

ယာကြီးပြင်ကျေးရွာကနေ ပေါက်မြို့ဘက်ကိုလာတဲ့ ကပစ ၂၄ ကစစ်သားတွေနဲ့ အုန်းတောရွာအနီး စစ်ဆေးရေးလုပ်နေတဲ့ PDF တို့ ဒီနေ့လယ် ၂ နာရီ ၄၅ မိနစ်လောက်မှာတိုက်ခိုက်ခဲ့တာလို့ ပြည်သူ့ကာကွယ်ရေးတပ်ဖွဲ့ – မြိုင်မြို့နယ်မှ ဗိုလ်လက်ယာက ပြောပါတယ်။

“အုန်းတောရွာအနီးမှာ စစ်ဆေးရေးလုပ်နေတဲ့အချိန် စစ်သားတွေက Mark-2 ကားနဲ့လာပြီး ကျနော်တို့ စစ်ဆေးနေတာမြင်တော့ သူတို့ဘက်ကအရင်ဆုံးပစ်တယ်၊ ကျနော်တို့အဖွဲ့တွေကလည်း အကုန်ဝိုင်းပြီး ပြန်ပစ်တယ်” လို့ ပြောပါတယ်။

တိုက်ခိုက်မှုအတွင်း စစ်ကောင်စီဘက်က ဗိုလ်ကြီး ၁ ဦးနဲ့ တပ်ကြပ် ၁ ဦးသေဆုံးကာ ဗိုလ် ၁ ဦးကတော့ လက်ရှိမှာဆေးရုံတက် ကုသနေရတဲ့အပြင် Ma-3 ၁ လက်၊ ကျည်ဘောက် ၁ ခု၊ ကျည် ၆၈ ထောင့်၊ စကားပြောစက် ၁ လုံး နဲ့ အင်္ကျီ ၁ ထည် တို့ကိုလည်းသိမ်းဆည်းနိုင်ခဲ့တယ်လို့ ဗိုလ်လက်ယာက ဆက်ပြောပါတယ်။

သေဆုံးသူနဲ့ ဒဏ်ရာရသူတွေကိုတော့ တပ်တွင်းသတင်းပေး (ဖရဲသီး)တွေရဲ့ သတင်းပေးချက်အရ အတည်ပြုနိုင်ခဲ့တာလို့ ဆိုပါတယ်။

ဒီတိုက်ခိုက်မှုကို ပြည်သူ့ကာကွယ်ရေးတပ်ဖွဲ့ – မြိုင်မြို့နယ်၊ မြိုင် ပကဖ ရင်း ( ၁ )၊ ပေါက် ဗိုလ်တစ္ဆေအဖွဲ့၊ ပေါက်ကျေးရွာ ကာကွယ်ရေးအဖွဲ့တွေနဲ့ YDF တပ်ရင်းတို့က ပူးပေါင်းလုပ်ဆောင်ခဲ့တာဖြစ်ပြီး တိုက်ခိုက် ခံရပြီးနောက် PDF ရဲဘော် ၁ ဦး ပေါင် နဲ့ ခြေဖ‌နောင့်ကို ထိမှန်ခဲ့ပေမယ့် စိုးရိမ်ရတဲ့အခြေအနေမဟုတ်ဘူးလို့လည်း သိရပါတယ်။

ပြီးခဲ့တဲ့ဒီဇင်ဘာလ ၂၆ ရက်ကလည်း မြိုင်မြို့နယ် Well-2 ရေနံမြေစခန်းက မိုင်းရှင်းဖို့ထွက်လာတဲ့ စစ်သားနဲ့ပျူတွေကို တဲကြီးရွာအနီးမှာ ပြည်သူ့ကာကွယ်ရေးတပ်ဖွဲ့ – မြိုင်မြို့နယ်အဖွဲ့က မိုင်းဆွဲတိုက်ခိုက်ခဲ့ရာ စစ်သား ၂ ဦး ပျူ ၁ ဦး သေဆုံးခဲ့ပါသေးတယ်။

မန္တလေး၊ ဇန်နဝါရီ ၂၆၊ ၂၀၂၃။

မန္တလေးတိုင်း၊ မြင်းခြံမြို့နယ်မှာ ဆိုင်ကယ်နဲ့ကင်းလှည့်နေတဲ့စစ်အုပ်စုကို ဇန်နဝါရီလ ၂၅ ရက်ညက မိုင်းဆွဲတိုက်ခိုက်ခဲ့တယ်လို့ နောင်ရိုးအထူးပြောက်ကြားတပ်ဖွဲ့ − NYSGF က သတင်းထုတ်ပြန်ထားပါတယ်။

မြင်းခြံမြို့နယ်၊ ဆီးမီးခုံနယ်မြေစာသင်ကျောင်းထဲမှာတပ်စွဲထားတဲ့ စစ်သားနဲ့ရဲ ၁၀ ဦးလောက်က ဆီးမီးခုံ – နဖူးအိုင်လမ်းမှာကင်းလှည့်နေချိန် ည ၈ နာရီခွဲကျော်လောက်မှာ တိုက်ခိုက်ခဲ့တာလို့ သိရပါတယ်။

“ဆီမီးခုံအရှေ့ဘက်ကို ဆိုင်ကယ်နဲ့ကင်းလှည့်လာတာကို မိုင်း ၇ လုံးနဲ့ ဆွဲခဲ့တာ။ ဆိုင်ကယ် ၄ စီးက မိုင်းကွင်းထဲမိသွားတယ်၊ နောက်ဆုံးတစီးကလွတ်တော့ ဆိုင်ကယ်ပေါ်က ၂ ယောက်ဆင်းပြီး ရမ်းပစ်သေးတယ်”လို့ နောင်ရိုးအဖွဲ့ NYSGFမှ သတင်းတာဝန်ခံက ပြောပါတယ်။

အသင့်စောင့်ကြိုမိုင်းဆွဲတဲ့နေရာဟာ ကျေးရွာအနီးမှာဖြစ်ပေမယ့် စစ်အုပ်စုက ရွာသားတွေကို ပြဿနာရှာတာမျိုးတော့မလုပ်ပဲ အလောင်းတွေကိုတော့ ဆီးမီးခုံဘက်ကိုသယ်သွားတယ်လို့ သူက ဆက်ပြောပါတယ်။

တိုက်ခိုက်မှုကြောင့် ရဲသား ၄ ဦးနဲ့ စစ်သား ၂ ဦးသေဆုံးခဲ့ပြီး၊ ည ၁၁ နာရီကျော်လောက်မှာ အလောင်းတွေကို သယ်ဆောင်သွားကြောင်း သူတို့ရဲ့ထုတ်ပြန်ချက်မှာဖော်ပြထားပေမယ့် ဒီသေဆုံးမှုနဲ့ပက်သက်ပြီး မြေလတ်အသံက သီးခြားအတည်ပြုနိုင်ခြင်းမရှိသေးပါဘူး။

အဲဒီတိုက်ခိုက်မှုမှာ နောင်ရိုးအထူးပြောက်ကျားတပ်-NYSGFနဲ့ 27 Revolution Force တို့ ပူးပေါင်းလုပ်ဆောင်ခဲ့တာဖြစ်ပြီး၊ တိုက်ခိုက်ရေးရဲဘော်တွေအန္တရာယ်ကင်းခဲ့တယ်လို့ ဆိုပါတယ်။

ဇန်နဝါရီလ ၇ ရက်ညနေ ၄ နာရီခွဲလောက်ကလည်း မြောင်မြို့နယ်၊ ပန်းညိုရွာကိုစစ်ကြောင်းထိုးလာတဲ့ စစ်ကောင်စီတပ်ကို နောင်ရိုးတပ်ဖွဲ့နဲ့အတူ ပူးပေါင်းမဟာမိတ်တွေကတိုက်ခိုက်ခဲ့လို့ စစ်ကောင်စီဘက်က အထိနာခဲ့တယ်လို့ သိရပါတယ်။