စစ်ကောင်စီ

ပဲခူး၊ ဇွန် ၁၁၊ ၂၀၂၂။

ပဲခူးတိုင်းအနောက်ခြမ်း၊ ပြည်မြို့မှာ စစ်ကောင်စီက ကျောင်းစောင့်ရာထူးအတွက် ဝန်ထမ်းခေါ်ခဲ့ပြီး လာလျှောက်သူကို စစ်ယူနီဖောင်းဝတ်စေပြီး ကျည်မပါတဲ့ သေနတ်ကိုင်ခိုင်းကာ လုံခြုံရေးတာဝန်ကို ပေးထားတယ်လို့ ဒေသခံတွေ ဆီကသိရပါတယ်။

တလ ၃သိန်းနဲ့ ကျောင်းစောင့်လုပ်ရမယ်ဆိုတဲ့ အချက်နဲ့ ဝန်ထမ်းခေါ်ခဲ့တာကြောင့် အလုပ်လျှောက်ခဲ့ပြီး အလုပ်ဝင်ဝင်ချင်းမှာပဲ ယူနီးဖောင်းဝတ်ခိုင်းပြီး ပြည်မြို့ အမှတ် ၅ ကျောင်း အလယ်ပေါက်မှာ လုံခြုံရေးဂိတ်စောင့် လုပ်နေရတာဖြစ်တယ်လို့ ဒေသခံတဦးက ပြောပါတယ်။

” အဲ့ဒီလို မလုပ်ပါရစေနဲ့ ပိုက်ဆံလည်း မပေးပါနဲ့တော့၊ တောင်းပန်ပြီး ထွက်ခွင့်တောင်းတာ မရဘူး၊ တလပြည့်အောင် လုပ်ရမယ် ရှေ့တန်းခေါ်ရင်လည်း လိုက်ရမယ်လို့ ပြောတယ်” လို့ ပြည်မြို့က ဒေသခံတဦးက ပြောပါတယ်။

ပြည်မြို့ အမှတ်၅ ကျောင်းရှေ့လမ်းကို စစ်ကောင်စီက ဖြတ်သန်းသွားလာခွင့်ပိတ်ထားတာဖြစ်ပေမယ့် ကျောင်းကြိုပို့ လုပ်နေတဲ့ မိဘတွေကတော့ အလယ်ပေါက်မှာ ယူနီဖောင်းနဲ့ စောင့်နေတာကို မြင်ရတယ်လို့ လည်း ပြောပါတယ်။

အဲ့ဒီလိုစောင့်နေတဲ့ ယူနီဖောင်းနဲ့ လုံခြုံရေးဝန်ထမ်းကို တွေ့တာ တပတ်ကျော်လောက်သာ ရှိသေးပြီး အရင်က အဲ့လိုစောင့်တာမျိုး မရှိဘူးလို့ နောက်ထပ် ‌ဒေသခံအမျိုးသမီးတဦးက ပြောပါတယ်။

” ဟုတ်တယ် စစ်ဝတ်စုံနဲ့ အဝမှာတွေ့တယ် တပတ်အတွင်းလောက်ပေါ့၊ အရင်ကဆို လမ်းထိပ်က ဂိတ်မှာပဲ တွေ့တာ”လို့ ပြောပါတယ်။

အဲ့ဒီလို ဝန်ထမ်း ဘယ်နှစ်ယောက်ရှိနေတယ်ဆိုတာနဲ့ အမှတ်၅ ကျောင်းအပြင် ပြည်မြို့က ဘယ်ကျောင်းတွေမှာ အခုလိုမျိုး ကျောင်းစောင့်ခေါပြီး လုံခြုံရေးတာဝန်ကို ပေးထားသေးလဲဆိုတာကိုတော့ မြေလတ်အသံအနေနဲ့ အတည်ပြုနိုင်ဖို့ စုံစမ်းနေဆဲဖြစ်ပါတယ်။

မြေလတ်အသံ၊ ဇွန် ၁၀၊ ၂၀၂၂။

ရခိုင်ပြည်နယ်၊ အမ်းမြို့ လေယာဥ်ကွင်းရပ်ကွက်ရှိ နေအိမ် ၁၀လုံးကျော်ကို စစ်ကောင်စီက ကျူးကျော်နေထိုင်သည့်အိမ်များ ဟုဆိုကာ လာမည့်ဇွန်လ ၁၂ရက်နေ့ကို နောက်ဆုံးထားဖြိုဖျက်ပေးရမည်ဟု အကြောင်းကြားစာပေးလာကြောင်း ကာယကံရှင်များထံက သိရသည်။

လက်ရှိနေအိမ်များ ဖြိုဖျက်ရမည့်သူများမှာ ၎င်းနေရာ၌နေထိုင်လာသည်မှာ နှစ်ပေါင်း ၂၀ကျော်ရှိပြီဖြစ်ကြောင်းနှင့် မြေကွက်များကိုလည်း ငွေပေးပြီးဝယ်ယူထားကြရခြင်းဖြစ်သည်ဟု ဒေါ်ငယ်ချေက ပြောသည်။

“ကျွန်မတို့ အခုတော့မဖြိုရသေးဘူး။ သွားစရာနေရာမရှိလို့။ လျော်ကြေးပေးရမယ်။ လျော်ကြေးပေးမှဖြိုဖျက်လို့ ရမှာ။ ဒီနေရာကထွက်သွား ရရင် ကျွန်မတို့မှာနေစရာနေရာတွေမရှိတော့ဘူး။ မိုးရာသီလည်းဖြစ်နေပြီ။ မဖြိုပေးရင်လည်းသူတို့က ပြဿနာ ရှာဦးမှာ။ကြောက်လန့်လို့နေနေရတယ်။”ဟု ဆိုသည်။

ယင်းအပြင် နေအိမ်ဖြိုဖျက်လိုက်ပြီဖြစ်သည့် နောက်ထပ်ဒေသခံတစ်ဦးက ယခုလိုနေအိမ်၊ ဆိုင်ခန်းများကို ဖြိုဖျက် ရသည့်အတွက် နေထိုင်ရေး၊ စားသောက်ရေးများ အခက်အခဲဖြစ်နေသည်ဟုဆိုသည်။

“အခုကျွန်တော်တို့က ဆွေမျိုးတွေအိမ်တစ်အိမ်မှာ ခိုလှုံနေရပါတယ်။ ဘယ်နေရာကို သွားမလဲဆိုတာကို စဥ်စားလို့ တောင်မရဘူး။ လျော်ကြေးလည်း မရတော့ငတ်သေဖို့ပဲရှိတယ်။ ဘယ်ဘဝကဝဋ်ကြွေးတွေလည်း မသိဘူး။”ဟုဆိုသည်။

အကြောင်းကြားလာသည့်စာတွင် အမ်းမြို့လေယာဥ်ကွင်းရပ်ကွက်ရှိ မြန်မာ့ဆက်သွယ်ရေးလုပ်ငန်း အော်တိုအိတ် ချိန်းပိုင် မြေဧရိယာအတွင်း တရားမဝင်ကျူးကျော်နေထိုင်လျှက်ရှိသူများသည် မကြာမီကာလအတွင်း ခရိုင်ဆက် သွယ်ရေးရုံး ဖွင့်လှစ်မည်ဖြစ်ပါသောကြောင့် ဇွန်လ ၆ရက်နေ့မှ ၁၂ရက်အတွင်း နေအိမ်များအား အပြီးဖျက်သိမ်း ဖယ်ရှားရှင်းလင်းပါရန် ဟုပါရှိသည်။

အလားတူပြီးခဲ့သည့် ဧပြီလအတွင်းကလည်း အမ်းမြို့ပေါ်ရှိ နတ်စင်ကုန်း၊ အောက်ရွာနီး ကျော်ဇံဆီဆိုင်ကုန်း၊ ခမရ ၃၇၁ အနီး မော်ဆီဆိုင်ကုန်းတို့မှ စာသင်ကျောင်းတစ်ကျောင်းအပါအဝင် စျေးဆိုင်ခန်းများနှင့် လူနေအိမ် စုစုပေါင်း ၂၀၀ကျော် ဖြိုဖျက်ပေးလိုက်ရပြီဟုသိရသည်။

မြင်းမူ၊ ဇွန် ၈၊ ၂၀၂၂။

မြင်းမူမြို့နယ်၊ ကံဖျားရွာနှင့် ဂုံညှင်းဆိပ်ကျေးရွာများကို စစ်ကြောင်းထိုးလာသော စစ်ကောင်စီစစ်ကြောင်း က အရပ်သား ၇ ဦးကို သေနတ်နဲ့ပစ်သတ်သွားပြီး ဓါးစာခံ ၁၁ ဦးကိုလည်းဖမ်းဆီးသွားတယ်လို့ People’s Army to Fight Dictatorship(PAFD) အဖွဲ့ထံကသိရသည်။

ဇွန်လ ၅ ရက်နေ့က မိုင်းဆွဲတိုက်ခိုက်ခံလိုက်ရတဲ့ စစ်ကောင်စီတပ်တွေက ဖမ်းဆီးခေါ်သွားခြင်းဖြစ်ပြီး PAFD တပ်တွေဖွဲ့တွေ ဒရုန်းနဲ့ လိုက်လံကြည့်ရှုစဉ် ဓါးစာခံ ၁ ဦး ထွက်ပြေးလွတ်မြောက်ခဲ့ပြီး ဓါးနဲ့လှီးဖြတ်ခံရခြင်း၊ မျက်နှာတခုလုံးကို ရိုက်နှက်ထားခြင်းတို့ကို ခံခဲ့ရကြောင်း သိရသည်။

“ဓါးစာခံတွေဖမ်းခေါ်သွားတယ်၊ သူတို့ထွက်သွားပြီးလားဆိုပြီး ကျနော်တို့ကံပြားအထိအောင် ဒရုန်းနဲ့လိုက်ကြည့်တယ်၊ သူတို့ဖမ်းသွားတဲ့ ဓါးစာခံတယောက်ပြန်တွေ့တယ်၊ ပြန်ခေါ်လာတယ်၊ သူ့နားလည်းဓါးနဲ့ဖြတ်ထားတယ်၊မျက်နှာကြီးကပျားတုပ်ထားသလိုပဲ တအားရိုက်နှက်ထားတာ၊ သူကတော့အသက်ရှင်လျက်ပြန်လွတ်လာတယ်၊ ၁၁ ယောက်ကတော့ ဓါးစာခံအဖြစ်ခေါ်သွားတယ်၊ ရွာသူရွာသား ၇ ယောက်ကိုရှေ့ကပြေးခိုင်းပြီး သေနတ်နဲ့သတ်ကြတယ်၊” ဟု PAFD တာဝန်ခံက မြေလတ်အသံကိုပြောသည်။

ပစ်သတ်ခံရသူများမှာ အမျိုးတွေဖြစ်ပြီး ဖမ်းဆီးခေါ်ဆောင်သွားခြင်းခံရသူတွေလည်း အသက်ရှင်မရှင် သေချာမသိရသေးကြောင်း ဆိုသည်။

ဆုတ်ခွါသွားတဲ့ စစ်ကောင်စီစစ်ကြောင်း က ကျေးရွာနေအိမ်တွေနဲ့ ဆိုင်ကယ် အစီး ၁၀၀ လောက်ကိုလည်း မီးရှို့သွားကြကြောင်း PAFD အဖွဲ့ထံကသိရသည်။

မကွေး၊ ဇွန် ၆၊ ၂၀၂၂။

မ‌ကွေးတိုင်း၊ မင်းဘူး (စကု) မြို့နယ်ကျောင်းသားများသမဂ္ဂ ဗကသများ အဖွဲ့ချုပ် အလုပ်အမှုဆောင် ၂ဦးကို ပြီးခဲ့တဲ့နှစ်ဒီဇင်ဘာလမှာ စစ်ကောင်စီက ဖမ်းဆီးခဲ့ပြီး ဒီကနေ့မှာ မင်းဘူးတရားရုံးက ထောင်ဒဏ် ၃နှစ်စီ ချမှတ်လိုက်ပါတယ်။

၂၀၂၁ ခုနှစ်ဒီဇင်ဘာ လအလယ်လောက်မှာ စစ်ကောင်စီက အစီစဥ်တကျနဲ့ ကျောင်းသားများရှိနေတဲ့ နေရာကို ဝင်ရောက်ဖမ်းဆီးခဲ့ချိန်မှာ ဒီနေ့အမိန့်ချခံလိုက်ရတဲ့ ကိုပိုင်ခွန်းသာနှင့် ကိုသူရသက်ဘုန်းသျှံတို့ နှစ်ဦး ဖမ်းဆီးခံလိုက်ရတာဖြစ်တယ်လို့ မင်းဘူး(စကု)မြို့နယ်ကျောင်းသားများသမဂ္ဂ ဥက္ကဌက ပြောပါတယ်။

” ကျန်တဲ့လူတွေကတော့ ရှောင်တိမ်းနိုင်လိုက်တယ်၊ သူတို့ကိုဖမ်းပြီးတော့မှ ၅၀၅ တွေနဲ့တရားစွဲတယ်၊စွဲပြီးတော့ ၇ လလောက်အချိန်ယူပြီးစစ်တယ်၊ စစ်ပြီးတော့မှ ဒီနေ့ဇွန်လ ၆ ရက်နေ့မှာ ထောင်ဒဏ် ၃ နှစ်စီအပြီးသပ်အမိန့်ချလိုက်တယ်” လို့ ပြောပါတယ်။

ဖမ်းဆီး ထောင်ချခံလိုက်ရသူ ၂ဦးဟာ မင်းဘူးမြို့က ၁၀ တန်းကျောင်းသားတွေ ဖြစ်ကာ ဖမ်းဆီးခံရပြီး ၆လကျော် အကြာမှာ ထောင် ၃နှစ်စီချမှတ်ခံလိုက်ရတာဖြစ်ပါတယ်။

လက်ရှိ မင်းဘူးမြို့နယ် ကျောင်းသားများသမဂ္ဂအဖွဲ့က( ဗကသ) ကျောင်းသားတွေ အနေနဲ့ အနယ်နယ် အရပ်ရပ်မှာ လက်နက်ကိုင်တိုက်ပွဲဝင်နေကြတယ်လို့ သိရပါတယ်။

မြေလတ်အသံ၊ မေ ၂၇၊ ၂၀၂၂။

ရခိုင်ပြည်နယ်၊ ကျောက်ဖြူမြို့၊ စေတီတောင်ရပ်ကွက်တွင်နေထိုင်သည့် ဒေသခံ ၂ ဦးမှာ ရက္ခိုင့်တပ်တော်(AA)ကို ရိက္ခာကောက်ပေးနေသည်ဟုဆိုကာ ယမန်နေ့ မေလ ၂၆ ရက်၊ ညနေ ၄ နာရီခန့်တွင် စစ်ကောင်စီက ဖမ်းဆီးသွားကြောင်း မိသားစုဝင်များထံမှသိရသည်။

ဖမ်းဆီးခံရသူများမှာ ဦးသန်းလှိုင်(၄၁ နှစ်)နှင့် ဒေါ်ခင်အုန်းနွဲ့ (၅၆နှစ်)တို့ဖြစ်ကြပြီး ၎င်းတို့ကို ရွှေဥထမင်းဆိုင်အနီးတွင် ကျောက်ဖြူအခြေစိုက် ခလရ(၃၄)တပ်ရင်းမှ စစ်ကောင်စီတပ်သားများ ကဖမ်းခေါ်သွားခြင်းဖြစ်ပြီး လက်ရှိတွင်၎င်းတို့ ၂ ဦးကို ရဲစခန်း၌ အမှုဖွင့်ထားသည်ဟု ဒေါ်ခင်အုန်းနွဲ့၏ ခင်ပွန်းဦးမြအောင်စံက ပြောသည်။

“သူတို့ကို နိုင်ငံတော်အကြည်ညိုပျက်စေမှုပုဒ်မ ၅၀(က)နဲ့ ကျောက်ဖြူမြို့မရဲစခန်းမှာ အမှုဖွင့်ထားပါတယ်။ ဒီနေ့တော့ သူတို့ကို စတင်စစ်ဆေးပါတယ်။ ပြီးတော့သူတို့ကို ကျောက်ဖြူအကျဉ်းထောင်ကို ပို့လိုက်ကြတယ်” ဟု သူကဆိုသည်။

ဖမ်းဆီးခံရသူ ဦးသန်းလှိုင်၏ ဇနီးဖြစ်သူဒေါ်ချိုချိုသိန်းက ၎င်း၏ခင်ပွန်းဖြစ်သူမှာ မိသားစုကို ဘေးတွဲဆိုင်ကယ်မောင်းကာ ရှာကျွေးနေသူဖြစ်ပြီး ရက္ခိုင့်တပ်တော် (AA)အတွက်ရိက္ခာကောက်ပေးနေသူမဟုတ်ကြောင်းနှင့် ယခုလိုဖမ်းဆီးခံထားရခြင်းကြောင်း မိသားစုစားဝတ်နေရေးအတွက် အခက်အခဲဖြစ်သွားရသည်ဟု ပြောသည်။

“ကျမအမျိုးသားက နိုင်ငံရေးအကြောင်းတွေ၊ နိုင်ငံရေးနဲ့ပတ်သက်တာတွေကို ဘာမှမလုပ်ပါဘူး။ တရက်လုပ်မှ တရက်စားနေရတဲ့အခြေအနေပါ။ ဒီလိုစွပ်စွဲပြီးတော့ ဖမ်းသွားတာတော့ အရမ်းဝမ်းနည်းရပါတယ်။ ဒီလိုမတရား မလုပ်သင့်ပါဘူး။ အမြန်ဆုံးပြန်လွှတ်ပေးစေချင်ပါတယ်” ဟု ဒေါ်ချိုချိုသိန်းက မြေလတ်အသံကို ပြောသည်။

ရခိုင်ပြည်နယ်တွင် လက်ရှိအချိန်၌ စစ်ကောင်စီက မြို့နယ်တချို့သို့ဝင်ရောက်ကာ ULA/AA အဖွဲ့များနှင့် ဆက်စပ်မှုရှိနေသူများကို ဖမ်းဆီးလိုက်လှံရှာဖွေနေမှုများ တရပ်စပ်လုပ်ဆောင်နေလျှက်ရှိသည်။

ယမန်နေ့ မေလ ၂၆ ရက်နေ့ကလည်း ရမ်းဗြဲမြို့နယ်၊ လေးတောင်မြို့ပေါ်ရှိ ULA တိုက်နယ်မှူးနေအိမ်နှင့် CSO အဖွဲ့အစည်းတွင်လုပ်ကိုင်နေသည့် ကိုမောင်မောင်ကြီးနေအိမ်တို့ကို စစ်ကောင်စီက အင်အားအလုံးအရင်းဖြင့် ဝင်ရောက်စီးနင်းခဲ့သည်ဟု ဒေသများကပြောသည်။

စစ်ကိုင်း၊ မေ ၁၅၊ ၂၀၂၂။

စစ်ကိုင်းတိုင်း၊ ပုလဲမြို့နယ်၊ ချောင်းဦးရွာကို မေလ ၁၄ ရက် မနေ့ကမနက်ပိုင်းမှာ စစ်ကောင်စီတပ်တွေက ဝင်ရောက်မီးရှို့သွားတယ်လို့ ဒေသခံတွေဆီက သိရပါတယ်။

အဲ့ဒီတပ်သားတွေဟာ ချောင်းဦးရွာနဲ့ တမိုင်ခန့်ဝေးတဲ့ ဇီဖြူကုန်းရွာမှာတပ်စွဲနေတာဖြစ်ပြီး၊ မနေ့ကမနက်ပိုင်း ချောင်းဦးရွာဘက်ကို အင်အား ၅၀ လောက်နဲ့ စစ်ကြောင်းထိုးလာချိန် လမ်းမှာဒေသခံကာကွယ်ရေးတပ်တွေနဲ့ ခဏတာ ထိတွေ့မှုဖြစ်ပြီးနောက် မနက် ၁၀ နာရီလောက်မှာ ရွာကိုစတင် မီးရှို့တာလို့ ဒေသခံအမျိုးသားတဦးက ပြောပါတယ်။

“ဇီးဖြူကုန်းရွာမှာ တပ်စွဲထားတဲ့အဖွဲ့က ချောင်းဦးရွာဘက်ကို စစ်ကြောင်းထိုးလာတာ၊ ထိတွေ့မှုအနည်းငယ်ဖြစ်တယ်။ ကာကွယ်ရေးတပ်ဖွဲ့တွေ ပြန်အဆုတ် ရွာကိုမီးတင်ရှို့တာ၊ အရင်တခါလည်းရှို့ခံထားရတာ၊ ခုလက်ကျန်အိမ်တွေကိုရှို့တာ၊ မီးမငြှိမ်းနိုင်ဘူး။ အကုန်လောင်ပြီး သူ့ဘာသာငြိမ်းသွားတာ။” လို့ ပြောပါတယ်။

ဒီတကြိမ် စစ်တပ်ကမီးရှို့တာဟာ ဒုတိယအကြိမ်ဖြစ်ပြီး၊ အိမ်ခြေ ၃၀၀ ကျော်ရှိတဲ့အနက် ပထမ တကြိမ်မီးရှို့ချိန်မှာ အိမ်ခြေ နှစ်ရာကျော်မီးလောင်ဆုံးရှုံးခဲ့ရပြီး၊ ဒီတကြိမ်မှာတော့ ကျန်ရှိနေတဲ့အိမ်တွေအားလုံးမီးထဲပါသွားတာလို့ ဒေသခံတဦးက ဆက်ပြောပါတယ်။

“အိမ်ခြေ ၃၀၀ ကျော်၊ အရင်တခါရှို့တာက နှစ်ရာကျော်ပါ။ ကျန်တရာကျော်ကို မနေ့ကဆက်ရှို့တယ်၊ လူဦးရေ ၂ ထောင်ဝန်းကျင်ရှိတယ်။ ဒေသခံတွေ အကုန်ပြေးနေကြရတယ်။ မီးလောင်ချိန်ခန့်မှန်း ၂ နာရီခန့်ကြာတယ်။ တရွာလုံးပြာကျသွားပြီ၊ စာသင်ကျောင်းနဲ့ စာရွက်စာတန်း၊ သင်ထောက်ကူပစ္စည်းတွေ အကုန်ပါသွားတယ်။ ” လို့ ဆိုပါတယ်။

ချောင်းဦးရွာကို ပြီးခဲ့တဲ့ ဖေဖော်ဝါရီ ၁၈ ရက် မနက်ပိုင်းမှာ စစ်ကောင်စီနဲ့ ပျူစောထီးအဖွဲ့ဝင် ၂၀ ကျော်လောက်က ပထမအကြိမ် မီးရှို့ဖျက်ဆီးခဲ့တာဖြစ်ပါတယ်။ ဒါ့အပြင် အိမ်နီးချင်းရွာတွေဖြစ်တဲ့ ပန်းရွာ၊ လှော်ကား၊ ဇီးဖြူကုန်းနဲ့ အင်မထီရွာတို့ကိုလည်း ဖေဖော်ဝါလအတွင်းမှာပဲ စစ်ကောင်စီက ရွာလုံးကျွတ်နီးပါး မီးရှို့ဖျက်ဆီးခဲ့တယ်လို့ ဒေသခံတွေဆီက သိရပါတယ်။

မြေလတ်အသံ၊ မေ ၁၂၊ ၂၀၂၂။

ရခိုင်ပြည်နယ်၊ ကျောက်တော်မြို့နယ်ရှိ မဟာမြတ်မုနိ တိုက်ပွဲရှောင်စခန်း မီးဘေးသင့်ပြည်သူ များ ပြန်လည်ထူထောင်ရေးလုပ်ငန်း ကော်မတီဖွဲ့စည်းရာတွင် မြောက်ဦးခရိုင်စီမံအုပ်ချုပ်ရေးအဖွဲ့ ဥက္ကဌနှင့် ကျောက်တော်မြို့နယ် စီမံအုပ်ချုပ်ရေးအဖွဲ့တို့ဖြင့် မေလ ၉ ရက်နေ့တွင် ဖွဲ့စည်းလိုက်သည်။

အဆိုပါကော်မတီကို ရခိုင်ပြည်နယ်မှ ပရဟိတသမားများမပါဝင်ဘဲ ဖွဲ့စည်းလိုက်ခြင်းကြောင့် ပြည်တွင်း၊ ပြည်ပအလှူရှင်များအနေဖြင့် မလှူဒါန်းဘဲနောက်ဆုတ်သွားနိုင်ကြောင်းနှင့် ယခုလိုကိစ္စရပ်များမှာမှု ပရဟိတသမားပြည်သူများကသာ ဆောင်ရွက်ရမည့်ကိစ္စဖြစ်သည်ဟု အမည်မဖော်လိုသည့် စစ်ဘေးရှောင်အရေးကူညီပေးနေသူတဦးက ပြောသည်။

“ဖွဲ့စည်းပုံနဲ့ပတ်သက်လို့ အခုပရဟိတအသင်း လုပ်တဲ့အလှူရှင်တွေ နောက်ဆုတ်သွားနိုင်တယ်။ အခုတောင် နောက်ဆုတ်ဖို့စကား ပြောနေကြပြီ။ စစ်ကောင်စီက နေရာတကာမှာ သူတို့အစိုးရတရပ် အနေနဲ့ဝင်လုပ်နေတာက နေရာမကျဘူး။ ဒီကိစ္စတွေက ပြည်သူတွေလုပ်ရမယ့်ကိစ္စတွေ ဟာတွေဖြစ်တယ်။ စစ်ကောင်စီကလုပ်ချင်လို့ရှိရင်တောင် စစ်ဘေးရှောင်အဖွဲ့အစည်းတွေကို ပုဒ်ဖြတ်အနေနဲ့ တတ်နိုင်သလောက် ကူညီပေးရင်ပြီးတဲ့ကိစ္စကို ဒီလောက်အထိဝင်လို့ လုပ်ဖို့မသင့်တော်ဘူး”ဟု သူကဆက်ပြောသည်။

ယခုဖွဲ့စည်းခဲ့သည့်ကော်မတီတွင် ကျောက်​တော်မြို့နယ်၊ မြို့နယ်စီမံအုပ်ချုပ်​ရေးအဖွဲ့ဝင် ဦး​​မောင်ဝင်းမှာ ဥက္ကဌနှင့် စစ်ကောင်စီ စစ်တပ်မှ ဗိုလ်မှူး​အောင်​ဇေယျသိန်းအပါအဝင် ၁၅ ဦးတို့ ပါဝင်ကြေင်း သိရသည်။

မဟာမြတ်မုနိစစ်ဘေးရှောင်စခန်းမှာ ပြီးခဲ့သည့် မေလ ၈ ရက် ည ၁၂ နာရီကျော် အချိန်ခန့်တွင် မီးလောင်မှုဖြစ်ပွားခဲ့ရာ တဲဆောင် ၂၆၂ ဆောင် ပြကျသွားခဲ့သည်။