စစ်ကောင်စီ

ပဲခူး၊ မတ် ၁၈၊ ၂၀၂၂။

ပဲခူးတိုင်း၊ သာယာဝတီခရိုင်၊ သာယာဝတီမြို့က သူနာပြုဆရာမတဦး ဒီနေ့ မနက်ပိုင်း နေအိမ်မှာ လာပြီးဖမ်း‌ခေါ်သွားတယ်လို့ ဒေသခံတွေ ဆီက သိရပါတယ်။

သာယာဝတီခရိုင်ဆေးရုံက အသက်၄၀ ဝန်းကျင် သူနာပြုဆရာမကြီး ဒေါ်ဥမ္မာကြည်ကို မတ်လ ၁၈ရက် ဒီနေ့ မနက် ၇နာရီ ဝန်းကျင်က ဒလံသတင်းပေးမှုကြောင့် ဓမ္မရိပ်သာလမ်းက အိမ်မှာ ဖမ်းခံလိုက်ရတာဖြစ်တယ်လို့ ဒေသခံတဦးက ပြောပါတယ်။

” အိမ်ပြန်‌ရောက်တာ ၂ရက်လောက်ပဲ ရှိသေးတာကို ဒလံသတင်းပေးမှုကြောင့် ရဲနဲ့ စစ်သား ၁၅ယောက်ဝန်းကျင်နဲ့ လာဖမ်းသွားတာ၊ လမ်းပိတ်ဖမ်းတာ သူ့အမျိုးသားကို ဆိုင်ကယ်မောင်းခိုင်းပြီး ခေါ်သွားတာ ” လို့ ဒေသခံတဦးက ပြောပါတယ်။

အမျိုးသားဖြစ်သူကတော့ နေအိမ်မှာ ပြန်ရောက်နေပြီး သူနာပြုဆရာမကိုတော့ သာယာဝတီရဲစခန်းမှာဖမ်းဆီးထားတယ်လို့ သိရပါတယ်။

ပဲခူး၊ မတ် ၁၄၊ ၂၀၂၂။

ပဲခူးတိုင်း၊ ပြည်မြို့မှာ စစ်ကောင်စီက သေနတ်နဲ့ ပစ်ခတ်ဖြိုခွင်းခဲ့လို့ ကျဆုံးခဲ့တဲ့ လူငယ်၂ဦးရဲ့ ၁နှစ် အထိမ်းအမှတ် ပန်းခွေ ချတာနဲ့ ပတ်သက်ပြီး ‌အေးငြိမ်းရာ သုဿန်က မီးသင်္ဂြိုဟ်စက်ဝန်ထမ်းကို စစ်ကောင်စီက ခေါ်သွားပြီး ပြန်လွှတ်မပေးသေးဘူးလို့ သိရပါတယ်။

မတ်လ ၁၃ရက် မနေ့က မနက်ပိုင်း ပန်းခွေချပြီးနောက်ပိုင်းမှာ အရပ်ဝတ်နဲ့ ခြံကြည့်ဖို့ ဆိုပြီးလာခေါ်သွားတာဖြစ်ပြီး ဆိုင်ကယ်အယူမခံပဲ ပြန်ပို့ပေးမယ်ပြောကာ ကားပေါ်တင်ခေါ်သွားခဲ့တာဖြစ်တယ်လို့ ဒေသခံတဦးက ပြောပါတယ်။

ဘယ်ကိုဖမ်းခေါ်သွားတယ်ဆိုတာ မသိရသေးပဲ ပြည်မြို့ ဒကစ မှာလို့ ပြောဆိုနေကြပေမယ့် မြေလတ်အသံအနေနဲ့ သီးခြား အတည်ပြုနိုင်ခြင်း မရှိသေးပါဘူး။

မနေ့က စစ်ကောင်စီ ဖမ်းခေါ်သွားတဲ့ မီးသင်္ဂြိုလ်စက် စည်ပင်ဝန်ထမ်း ကိုထွန်းထွန်းဟာ လွန်ခဲ့တဲ့ ၂၀၂၀ ခုနှစ် ဧပြီလ ၉ရက်က ပြည်မြို့မှာ ကိုဗစ် ၁၉ကြောင့် သေဆုံးခဲ့တဲ့ လူနာအမှတ် ၁၇ ကို ကူညီမီးသင်္ဂြိုလ်ပေးခဲ့သူ တဦးလည်း ဖြစ်ပါတယ်။

စစ်ကိုင်း၊ မတ် ၁၃၊ ၂၀၂၂။

စစ်ကိုင်းတိုင်း၊ တန့်ဆည်မြို့နယ် ချောင်းရိုးရွာနဲ့ စိမ်းစားရွာတွေကို မတ်လ ၁၂ရက် မနေ့က နေ့လည်ပိုင်းမှာ စစ်ကောင်စီက PDF တွေရှိတယ် အထင်နဲ့ ဝင်မီးရှို့ခဲ့ပြီး ထွက်ပြေးသူတွေကို သေနတ်နဲ့ ပစ်ခတ်ခဲ့လို့ ပြည်သူ ၃ဦး သေဆုံးခဲ့ပါတယ်။

စစ်ကောင်စီတပ်သားတွေက စိမ်းစားရွာကို အရင်မီးဝင်ရှို့ခဲ့ပြီး အမျိုးသမီးငယ်တဦးကို သေနတ်နဲ့ ပစ်ခဲ့သလို ချောင်းရိုးရွာကိုလည်း မီးဝင်ရှို့ခဲ့တာဖြစ်တယ်လို့ ဒေသခံတဦးက ပြောပါတယ်။

” စိမ်းစားရွာက ကောင်မလေးကို အရင်ပစ်ခဲ့တာ မီးရှို့ခဲ့ပြီး ချောင်းရိုးကို ထပ်လာရှို့တာ အဲ့ဒီမှာ ကြောက်ပြီး ထွက်ပြေးတဲ့ ချောင်းရိုးရွာက သားအဖနှစ်ယောက်ကို ထပ်ပစ်သတ်လိုက်တာ” လို့ ဒေသခံက ပြောပါတယ်။

စိမ်းစားရွာက အမျိုးသမီးငယ်ရဲ့ လက်မောင်းနဲ့ ရင်အုံကို ထိမှန်သေဆုံးခဲ့ပြီး ချောင်းရိုးရွာက သားအဖနှစ်ဦးကတော့
ခေါင်း နဲ့ ရင်အုံတို့ကို ထိမှန်သေဆုံးနေတာ ဖြစ်တယ်လို့ ပြောပါတယ်။

” ဒီနေ့မနက် အလောင်းဝင်ကောက်တော့ လက်နက်ကြီးနဲ့ ၃ချက်လှမ်းပစ်တယ်၊ သူတို့က ဟိုဘက်တရွာမှာ တပ်စွဲထားတာ လူတွေမြင်တော့ လက်နက်ကြီးနဲ့ လှမ်းပစ်တာ” လို့ ‌‌ဒေသခံတဦးက ပြောပါတယ်။

စိမ်းစားရွာမှာတော့ အိမ်ခြေ ၂၇လုံးနီးပါး မီးလောင်ဆုံးရှုံးခဲ့ပြီး ၁ဦးသေဆုံးခဲ့သလို ချောင်းရိုးရွာက ကြက်ခြံ၅ လုံးနဲ့ နေအိမ် ၁၅လုံးနီးပါး မီးလောင်ဆုံးရှုံးခဲ့ပါတယ်။

” ဘုရားကျောင်းကိုလည်း ရှို့တယ် မီးတို့ခဲ့တာ သီလရှင် ၃ပါးက မီးသတ်နိုင်လိုက်တယ် လောင်တော့ မလောင်သွားဘူး၊ အခုရွာထဲမှာ မီးတွေကတော့ ငွေ့ငွေ့လေးတော့ လောင်နေတယ် ဘေးအိမ်တွေတော့ မကူးတော့ပါဘူး” လို့ ပြောပါတယ်။

လက်ရှိချောင်းရိုးရွာ တရွာလုံး ဘေးလွတ်ရာကို ပြေးနေကြပြီး သေဆုံးသွားတဲ့ သားအဖနှစ်ဦးကို သင်္ဂြိုဟ်ဖို့ ပြင်ဆင်နေကြတယ်လို့ သိရပါတယ်။

မတ်လ ၁၂ရက် မနေ့က မနက် ၁၁နာရီဝန်းကျင်မှာ စစ်ကောင်စီနဲ့ PDF နှစ်ဖွဲ့ တည်ဆည်မြို့နဲ့ ရေဦးမြို့အကြားမှာ တိုက်ပွဲဖြစ်ခဲ့ပြီး စစ်ကောင်စီဘက်က ၃ဦး သေဆုံးပြီး ၁ဦး အရှင်ဖမ်းဆီးခံခဲ့ရပါတယ်။

စစ်ကိုင်း၊ မတ် ၁၂၊ ၂၀၂၂။

စစ်ကိုင်းတိုင်း၊ တန့်ဆည်မြို့နယ်က ရွာ ၂ရွာကို စစ်ကောင်စီက PDFတွေ ရှိတယ် အထင်နဲ့ ဒီနေ့ နေ့လည်ပိုင်းကစပြီး မီးနဲ့ရှို့နေတယ်လို့ ဒေသခံတွေ ဆီက သိရပါတယ်။

မတ်လ ၁၂ရက် ဒီနေ့ မနက်ပိုင်း ဒေသခံ PDF တွေနဲ့ တိုက်ပွဲဖြစ်ခဲ့ပြီး နေ့လည် ၁၂နာရီ ဝန်းကျင်ကစလို့ အနီးနားက ချောင်းရိုးရွာနဲ့ စိမ်းစားရွာ ၂ရွာကို မီးရှို့ခဲ့တာ ဖြစ်တယ်လို့ ဒေသခံတဦးက ပြောပါတယ်။

” ချောင်းရိုးရွာ မြောက်ပိုင်းက ကြက်ခြံတွေနဲ့ အိမ် ၇လုံးလောက် အခုလောလောဆယ် မီးထဲပါသွားပြီ၊ ရွာရဲ့ မြောက်ဘက် ၂မိုင်နီးပါးလောက်မှာ တိုက်ပွဲဖြစ်တာကို PDFတွေ ရွာထဲကို ဝင်ပြေးလာတယ်ထင်ပြီး ရွာတွေကို မီးရှို့တာပါ” လို့ ဒေသခံတးဦးက ပြောပါတယ်။

မီးရှို့ခံလိုက်ရတဲ့ စိမ်းစားရွာက ဗုဒ္ဓဘာသာရွာဖြစ်ပြီး ချောင်းရိုးရွာကတော့ ခရစ်ယာန်ရွာ ဖြစ်ပြီး ချောင်းရိုးရွာဘုရားကျောင်းက ဆိုင်ကယ်တစီးကိုလည်း မီးရှို့ဖျက်ဆီးသွားတယ်လို့ သိရပါတယ်။

စိမ်းစားရွာမှာလည်း စစ်ကောင်စီမီးရှို့ထားပြီး ရွာနားကို ကပ်ခွင့်မပေးဘူးလို့ ပြောပါတယ်။

” ဘယ်သူမှရွာနား ကပ်လို့ မရဘူး ရွာထဲရှိတဲ့ သူတွေကိုလည်း သေနတ်နဲ့ထောက်ပြီး ရွာပြင်ထွက်ခိုင်းပြီး ရွာကို မီးရှို့နေတာပါ” လို့ ဒေသခံတဦးက ပြောပါတယ်။

လက်ရှိအချိန်အထိ ချောင်းရိုးရွာမှာ ကြက်ခြံ ၁၀ လုံးနဲ့ အိမ်ခြေ အနည်းဆုံး ၇လုံး ‌မီး‌လောင်ထားပြီး စစ်ကောင်စီ တပ်သားတွေ ရွာနားဝန်းကျင်းမှာပဲ ရှိသေးတာကြောင့် ပြည်သူတွေ မီးဝင်ငြှိမ်းသတ်ခွင့်မရသေးဘူးလို့သိရပါတယ်။

ပဲခူး၊ မတ် ၁၀၊ ၂၀၂၂။

ပဲခူးတိုင်းအနောက်ခြမ်း၊ သာယာဝတီခရိုင်၊ နတ်တလင်းမြို့နယ် NLD ပါတီက ၂၀၂၀ ရွေးကောက်ပွဲအနိုင်ရ တိုင်းလွတ်တော်ကိုယ်စားလှယ်နှစ်ဦးရဲ့ နေအိမ်တွေကို စစ်ကောင်စီက ဒီကနေ့ မတ်လ ၁၀ ရက်နေ့ နေ့လည်ပိုင်းက ချိတ်ပိတ်ခဲ့ကြပါတယ်။

နတ်တလင်းမြို့က ဦးမောင်မောင်ဦးရဲ့ တာပွန်လမ်းက နေအိမ်နဲ့ အရှေ့ခြမ်း ပဲဲမခမ်းရွာက ဦးကျော်ကျော်နိုင်တို့ရဲ့ နေအိမ်တွေကိုချိတ်ပိတ်ခဲ့တာလို့ သိရပါတယ်။

“နတ်တလင်းအနောက်ခြမ်းတိုင်း ၁ ကိုယ်စားလှယ် ဦးမောင်မောင်ဦးရဲ့ တာပွန်လမ်းအိမ်နဲ့ တိုင်း ၂ က နတ်တလင်းအရှေ့ခြမ်း၊ ပဲမခမ်းရွာက ဦးကျော်ကျော်နိုင်ရဲ့ အိမ်တွေကို ဒီနေ့နေ့လည် ၂ နာရီလောက်မှာ စစ်ကောင်စီက ချိတ်ပိတ်လိုက်ပါတယ်” လို့ မြို့ခံတဦးက ပြောပါတယ်။

ပြီးခဲ့တဲ့ရက်တွေက စစ်ကောင်စီက တရားစွဲဆိုထားတဲ့ ကိုမောင်မောင်ဦးနေအိမ်အပါအဝင်၊ တရားစွဲခံရတဲ့ အခြားအိမ်တွေကိုလည်း ဝရမ်းတွေ လိုက်ကပ်ခဲ့တယ်လို့ ဒေသခံတဦးဆီက သိရပါတယ်။

ဒါ့အပြင် စစ်ကောင်စီဟာ ပဲခူးတိုင်းအနောက်ခြမ်း သာယာဝတီခရိုင် သာယာဝတီမြို့က NLD ရွေးချယ်ခံကိုယ်စားလှယ် ဦးကျော်ကိုကိုစိန်ကို ပုဒ်မ ၅၀၅(က)နဲ့ အမူဖွင့်ဖမ်းဆီးပြီး ရွေးကောက်ပွဲမှာမဲလိမ်ခဲ့ကြောင်း လက်မှတ်ရေးထိုးဖို့ညှိနိူင်းခဲ့ပေမယ့် ငြင်းဆန်ခဲ့တာကြောင့် မတ်လ ၈ ရက်နေ့ကထောင် ၃ နှစ်ချမှတ်ခဲ့ပါသေးတယ်။

ပဲခူး၊ မတ် ၉၊ ၂၀၂၂။

ပဲခူးတိုင်း၊ ပြည်မြို့က နေအိမ် ၄၀၀ နီးပါးနဲ့ လမ်းနယ်နဲ့ မလွတ်တဲ့ ဆိုင်နေရာတွေကို မနက်ဖြန်အပြီးဖျက်သိမ်းပေးရမယ်လို့ စစ်ကောင်စီက ဖိအားပေးခြိမ်းခြောက်ထားပါတယ်။

မတ်လ ၁၀ရက် မနက်ဖြန် အပြီးကိုယ်တိုင်ဖျက်ပေးရမှာ ဖြစ်ပြီး မဖျက်ပေးရင် အင်အားသုံးဖျက်ဆီးမှာ ဖြစ်သလို နောက်ဆုံး ဘူဒိုဇာနဲ့ ထိုးပြီး ဖျက်ဆီးမယ်လို့ ခြိမ်းခြောက်ခဲ့တယ်လို့ ဒေသခံတွေဆီက သိရပါတယ်။

” မြို့ထဲက အိမ်နဲ့ ဆိုင်တွေကတော့ လမ်း နယ်နမိတ်နဲ့မလွတ်တာတွေကို ရွေ့ပြောင်းခိုင်းတာ မဖယ်ဘူးဆိုရင် တအိမ်ကို တပေ ၁၀၀၀ ကျပ်နဲ့လဲ ဒဏ်ရိုက်မယ်၊ဘူရိုဇာနဲ့လဲအထိုးခံရမယ်၊အဲ့ဒိအချိန်ကျ ဘာပစ္စည်းမှပြန်မရတော့ဘူးလို့ စခ တွေက ခြိမ်းခြောက်ပြောဆိုသွားပါတယ်” လို့ ဒေသခံတဦးက ပြောပါတယ်။

ပြည်မြို့နယ်အတွင်းဖျက်ပေးရမယ့် အိမ်တွေက ရွှေတံခါးကွက်သစ် ၃၁၆ လုံး၊ မှုတ်ရှည်ရွာက ၄၁လုံး နဲ့ မှော်ဇာရွာ ၁၆ ၊ မု‌ဌောရွာက ၁၅ လုံး စုစုပေါင်း ၃၈၈ လုံး နဲ့ ပြည်မြို့တွင်း လမ်းနယ်နမိတ်က နေအိမ်နဲ့ ဆိုင်ခန်းတွေလည်း ပါဝင်ပါတယ်။

မတ်လ ၄ရက်က ရွှေတံခါးဘူနားအနီးက ‌နေအိမ်အချို့ကို ဖျက်ဆီးခဲ့ပြီး မတ်လ၈ရက် မနေ့က နဝဒေးလမ်း ငွေစံအိမ်နဲ့ ရွှေပေါက်ပင်အနီးက ဆိုင်တွေ ကို ဘက်ဟိုးကားနဲ့ ဖျက်ဆီးခဲ့တယ်လို့ သိရပါတယ်။

“ရတနာမာန်အောင် ကွက်သစ် ဓမ္မဝါဒီကျောင်းရှေ့က အိမ်တွေရောပဲဖျက်ရမယ်တဲ့၊ အဲ့မှာ ဖယ်ရမဲ့ အထဲ Beauty Saloon တခုတောင် ပါသေးတယ် ပြီးခဲ့တဲ့ ရက်တွေ တုန်းက နေ့တိုင်း မဟုတ်ပေမယ့် သုံးလေးခါရှိပြီတဲ့ မြေကြီးတွေ လာလာကြည့်တာ”လို့ နောက်ထပ်ဒေသခံတဦးက ပြောပါတယ်။

ပြည်မြို့မှာ လမ်းနယ်နမိတ်နဲ့ မလွတ်သူတွေနဲ့ ကျူးကျော်နေထိုင်သူတွေရဲ့ နေအိမ်တွေအပါအဝင် အားလုံးပေါင်းဖျက်သိမ်းပေးရမဲ့ အရေအတွက် ၄၀၀ ကျော် ၅၀၀ နီးပါးအထိရှိနေပါတယ်။

မကွေး၊ မတ် ၈၊ ၂၀၂၂။

မကွေးတိုင်း၊ ပေါက်မြို့နယ်၊ အင်းဒေါင့်ငယ်ရွာက မိခင်ဖြစ်သူကို အဓမ္မပြုကျင့်ပြီး အသက် ၂ နှစ်အရွယ်ကလေးငယ်အပါအဝင် သားအမိ ၂ ဦးစလုံးကို ပြီးခဲ့တဲ့ မတ်လ ၆ ရက်နေ့က စစ်ကောင်စီက သတ်ဖြတ်သွားတယ်လို့ ဒေသခံတွေဆီက သိရပါတယ်။

အသက် ၄၂ နှစ်အရွယ် မအေးအေးဝင်း၊ အသက် ၂ နှစ်အရွယ် မရတီမိုးတို့ ဖြစ်ပြီး၊ စစ်ကောင်စီနဲ့ပျူစောထီးအဖွဲ့တွေဟာ သူတို့အိမ်မှာရှိတဲ့ငွေတွေကို ဝင်လုပြီးတဲ့နောက် မိခင်ဖြစ်သူ မအေးအေးဝင်းကို အဓမ္မပြုကျင့်ပြီးမှ သတ်ပစ်ခဲ့တာလို့ ဒေသခံတဦးက ပြောပါတယ်။

“ပိုက်ဆံ သိန်း ၅၀ ရှိတယ်ဆိုပြီး ဝင်လုတာ၊ သားအမိ ၂ ယောက်ကို သတ်သွားကြတာ၊ မအေနဲ့ သမီးကိုသတ်သွားတာ၊ စစ်သားတွေက မိခင်ကို မဒိန်းကျင့်သွားပြီး သမီးကို ဓါးနဲ့ထိုးပြီး သတ်သွားတာ”လို့ သူကပြောပါတယ်။

အင်အား ၅၀ လောက်ပါတဲ့ စစ်ကောင်စီတပ်တွေဟာ ကျေးရွာအတွင်းက တန်ဖိုးကြီးပစ္စည်းတွေကိုလည်း သယ်သွားပြီး၊ မအေးအေးဝင်းရဲ့ သမီးကြီးဖြစ်သူ အသက် ၁၁ နှစ်အရွယ် မသင်းသင်းမိုးကိုလည်း ဖမ်းဆီးခေါ်သွားကာ လမ်းမှာသတ်ပစ်ခဲ့တယ်လို့ သိရပေမယ့် မြေလတ်အသံက သီးခြားအတည်ပြုနိုင်ခြင်းမရှိသေးပါဘူး။

ခုလို စစ်ကောင်စီက ကလေးငယ်တွေနဲ့ အမျိုးသမီးတွေအပေါ် ရက်စက်စွာ သတ်ဖြတ်တာဟာ စစ်တပ်ရဲ့ကျင့်ဝတ်ပိုင်းအရရော၊ လူ့အခွင့်အရေးအရပါ ကိုက်ညီမှုမရှိပဲ လုံးဝမလုပ်သင့်တဲ့ ကိစ္စတခုဖြစ်တယ်လို့ မကွေးလူထုတိုက်ပွဲကော်မတီမှ ကိုချစ်ဝင်းမောင်က သူရဲ့အမြင်ကို ခုလိုပြောပါတယ်။

“ဒီဖြစ်စဥ်မှာဆိုလည်း ကလေးငယ်အပါအဝင် အမျိုးသမီးတွေကို သတ်ဖြတ်တာဟာ ဘယ်လိုရှုထောင့်ကပဲကြည့်ကြည့်၊ ကျင့်ဝတ်ပိုင်းအရရော၊ လူ့အခွင့်အရေးအရပါ ဘယ်လိုမှမဖြစ်သင့်တဲ့ ကိစ္စတခုလို့ ကျနော်တို့မြင်တယ်၊ စစ်အုပ်စုမှာက ကလေးဆိုတာလည်း မရှိဘူး၊ အမျိုးသမီးဆိုတာလည်းမသိဘူး၊ သူတို့ကိုဆန့်ကျင်တဲ့သူအားလုံးကို ရန်သူလို့သတ်မှတ်ပြီး၊ ပြည်သူတွေကိုလည်း ခုလိုရက်စက်သက်ဖြတ်နေတာပဲဖြစ်တယ်၊” လို့ ပြောပါတယ်။

ဒါ့အပြင် အင်းဒေါင့်ငယ်ရွာသား ၂၉ ဦးကိုလည်း လူသားဒိုင်းကာအဖြစ်ဖမ်းခေါ်သွားတယ်လို့ သိရပြီး၊ အဲ့ဒီဖြစ်စဥ်နဲ့ ပက်သက်တဲ့ နောက်ဆက်တွဲ အခြေအနေတွေကိုတော့ မြေလတ်အသံက ဆက်လက်စုံစမ်းနေဆဲပါ။