မကွေး၊ ဇန်နဝါရီ ၉၊ ၂၀၂၂။

စစ်ကောင်စီတပ်သားတွေရဲ့ ရိုက်နှက်တဲ့ဒဏ်ရာကြောင့် နှမ်းခါးရွာက စိတ်ဝေဒနာရှင်တဦး ဇန်နဝါရီ ၈ ရက် မနေ့ကသေဆုံးသွားခဲ့တယ်လို့ နှမ်းခါးလူငယ်အဖွဲ့ဆီကသိရပါတယ်။

ဒီဇင်ဘာ ၂၉ ရက် ညက စစ်ကောင်စီတပ်သားတွေရဲ့ ရိုက်နှက်မှုကို ခံခဲ့ရတဲ့ မကွေးတိုင်း၊ နှမ်းခါးရွာက အသက် ၆၃ နှစ်အရွယ် ဦးပေတုံးကို ရွာသားတွေက တတ်နိုင်သလောက် ဆေးကုသမှုတွေပေးနေရင်းနဲ့ပဲ သေဆုံးသွားတာဖြစ်တယ်လို့ နှမ်းခါးလူငယ်အဖွဲ့ဝင် ကိုစိုးလေးကပြောပါတယ်။

“ နှမ်းခါးရွာကိုညအိပ်တပ်စွဲလာပြီးမှ စိတ်ဝေဒနာရှင်တဦးကို ဖမ်းဆီးရိုက်နှက်သွားတယ်၊သူတို့အဖွဲ့တွေ ၃၀ ရက်နေ့မှာပြန်ပြီးထွက်သွားတဲ့အချိန်မှာ ကျနော်တို့လူငယ်အဖွဲ့တွေ တွေ့လို့ သူ့ကိုဆေးကုသမှုပေးနေရင်းနဲ့ပဲ သေဆုံးသွားတယ်၊ ခေါင်းမှာ ၁ ချက် လည်ပင်းနားလောက်မှာ ၁ ချက်ရိုက်ခံရတာ၊ “ လို့ သူကပြောပါတယ်။

နှမ်းခါးရွာကို စစ်တပ်က မကြာခဏဆိုသလို ဝင်ရောက်စီးနင်းပြီး မီးရှို့ဖျက်စီးတာတွေလုပ်တာကြောင့် ရွာလုံးကျွတ်နီးပါး ဘေးလွတ်ရာဒေသတွေဆီကို ရှောင်နေကြရတယ်လို့လည်း ဒေသခံတွေကပြောပါတယ်။

“ခုကတော့တောထဲမှာ လူဦးရေ ၁ သောင်းဝန်းကျင်လောက်ရှောင်နေရတယ်၊ ရွာထဲမှာမနေရဲကြဘူး၊အိမ်ခြေက ၁ ထောင်နဲ့ ၅အိမ်ရှိတယ်၊ရွာကိုဒုက္ခလာပေးနေတာက စစ်ကောင်စီအဖွဲ့ကစစ်သားတွေကပါ၊ အရင်ကလည်း ရွာမီးရှို့ခံရတယ်၊ ရွာမီးရှို့ခံရတာ ၄ ကြိမ်ရှိသွားပြီ၊ အိမ် ၆၄ အိမ်အရှို့ခံရတယ် “ လို့ ဒေသခံတဦးကပြောပါတယ်။

ဒါ့အပြင် ဒီဇင်ဘာ ၂၉ ရက်ညမှာပဲ အသက် ၄၆ နှစ်အရွယ် ဦးထွားမောင်ကို စစ်ကောင်စီက မီးရှို့သတ်ခဲ့တယ်လို့သိရပြီး လက်ရှိအချိန်ထိ နှမ်းခါးရွာမှာ စစ်ကောင်စီလက်ချက်နဲ့သေဆုံးသူ ၆ ဦးရှိပြီလို့လည်း နှမ်းခါးလူငယ်အဖွဲ့က သတင်းထုတ်ပြန်ထားပါတယ်။

ပဲခူး၊ ဇန်နဝါရီ ၉၊ ၂၀၂၂။

ပဲခူးတိုင်းအနောက်ခြမ်း၊ နတ်တလင်းမြို့နယ်၊ သက်ငယ်ပြင်ကျေးရွာမှာ မနေ့ညက ကြွက်ထိုးပြီးပြန်လာတဲ့ ရွာသားတဦးကို စစ်ကောင်စီတပ်တွေက သေနတ်နဲ့ပစ်သတ်ပြီး အလောင်းကို ငွေကျပ် ၆ သိန်းဖြင့်လာရွေးဖို့ မိသားစုကို ပြောဆိုခဲ့တယ်လို့ ဒေသခံတဦးထံမှ သိရပါတယ်။

သေဆုံးသူမှာ သက်ငယ်ပြင်ကျေးရွာက ကိုစန်းထူးဆိုသူဖြစ်ပြီး၊ မနေ့ကည ၇ နာရီခန့်လောက်က သူနဲ့အတူ တခြားကြွက်ထိုးပြီး ပြန်လာတဲ့ သူငယ်ချင်းတဦးတို့ဟာ စစ်ကောင်စီတပ်တွေကိုတွေ့လို့ ကြောက်လန့်ထွက်ပြေးခဲ့ရာ နောက်မှသေနတ်နဲ့ ပစ်ခတ်ခဲ့လို့ ကိုစန်းထူးသေဆုံးခဲ့ပြီး၊ တဦးမှာ ထွက်ပြေးလွတ်မြောက်ခဲ့ တာဖြစ်တယ်လို့ ဒေသခံတဦးက ပြောပါတယ်။

“သေနတ်သံနှစ်ချက်ကြားလိုက်ရတယ်။ ဘယ်သူမှတော့ သွားမကြည့်ရဲကြဘူး။ အိမ်ထဲကအိမ်ပြင်တောင် မထွက်ရဲကြဘူး။ စစ်သားတွေ၊ လူသတ်သမားတွေကို ကြောက်နေကြတယ်။ အားလုံးက ည ၇ နာရီလောက်မှာ ပစ်သတ်သွားပြီး နောက်နေ့မနက်မှာဘဲ အလောင်းကိုပြန်မပေးဘဲ မြို့မှာပဲ သင်္ဂြိုလ်လိုက်ကြတယ်။ အလောင်းကို ၆ သိန်းနဲ့ ရွေးခိုင်းတယ်လို့လဲ ပြောကြတယ်။” လို့ သူကဆက် ပြောပါတယ်။

ကိုစန်းထူးမှာ သူနေထိုင်ရာ သက်ငယ်ပြင်ရွာကို ကြွက်ထောင်ပြီး ပြန်လာစဉ် သေနတ်နဲ့ပစ်သတ်ခံရတာကြောင့် နေရာမှာ ပွဲချင်းပြီး သေဆုံးကာ အလောင်းကို နတ်တလင်းမြို့ပေါ်ကို စစ်ကောင်စီတပ်ဖွဲ့ဝင်တွေက သင်္ဂြိုလ်လိုက်ကြတာဖြစ်ပြီး သူ့မှာ ၇ နှစ်အရွယ် သမီးတဦးကျန်ခဲ့တယ်လို့ ဒေသခံတွေကပြောပါတယ်။

မြေလတ်အသံ၊ ဇန်နဝါရီ ၇၊ ၂၀၂၂။

မကွေးတိုင်းဒေသကြီး စစ်ကောင်စီ က မြို့နယ်အချို့တွင် စစ်သင်တန်းပေးရန် မဲနှိုက်လူစုမှုများပြုလုပ်နေခြင်းကြောင့် လူငယ်အများစု ရှောင်တိမ်းနေရကြောင်း ဒေသခံများကပြောသည်။

မဲနှိုက်လူစုမှုကို ဇန်နဝါရီလဆန်း ၄ ရက်နေ့နှင့် ၅ ရက်နေ့များက မင်းလှမြို့နယ်၊ ရှမ်းတပ်ကြီး၊ ကိုင်းငယ်ကြီး၊ ကိုင်းငယ်လေး၊ ကျေးရွာများနှင့် မင်းတုန်းမြို့နယ်မြောက်ခြမ်းဖြစ်သည့် ဥယျဥ်မှူးရွာ၊ မလိုင်စန်းရွာ တို့တွင် ပြုလုပ်ခဲ့ကြောင်း ဒေသခံများကဆိုသည်။

“လောလောဆယ်တော့ နှစ်ရွာကို မဲတွေခွဲတာပေါ့။ စစ်သားတွေလာတာတော့ မဟုတ်ဘူး သူတို့ခန့်ထားတဲ့ ရွာလူကြီးကခွဲတာ။ တချို့ရွာလူကြီးတွေကတော့ သူတို့ခွဲမပေးနိုင်ဘူး ကိုယ်ဘာသာလာခွဲချင်ခွဲလို့ ပြောထားကြတယ်။ မင်းလှနယ်မှာလည်း ရွာအများစုမှာခွဲနေပြီ။” ဟု ဒေသခံတဦး ကပြောသည်။

လူစုမှုကို ဒေသအလိုက် တရွာလျှင် ၂၀၊ တအုပ်စုလျှင် ၄၀ အစရှိသဖြင့် ရွာအကြီးအသေးလိုက် တောင်း‌နေသည့်အတွက် လူငယ်များမှာ အခြားမြို့နယ်များ ဆွေးမျိုးများထံ တိမ်း‌ရှောင်သွားကြပြီဖြစ်ကြောင်း ဒေခံများက ဆိုသည်။

“ရှမ်းတပ်ကြီးမှာကျတော့ စစ်တပ်အထိုင်ရှိတယ်လေ မနေ့ကဆိုခွဲမယ်ဆိုတဲ့ရွာ ကလူတွေ အကုန်ရှောင်နေကြပြီ။ ငယ်ရွယ်တဲ့လူငယ်တွေ အကုန်ပြေးပြီ။ ရွာတွေမှာက သက်ကြီးရွယ်အို၊ ကလေးနဲ့ မိန်းမတွေပဲအများစုကျန်တော့တယ်။ ရွာတွေမှာက ကြောက်တယ်ဆို ဖိခြောက်တော့တာ။ အခုရက်ပိုင်းလောက်မှာကို ရှောင်နေကြရတော့တာ။” ဟု မင်းလှဒေသခံတဦး ကပြောသည်။

အလားတူ ဒီဇင်ဘာလအတွင်းကလည်း ကံမမြို့နယ် ကျေးရွာများတွင် ကြံ့ခိုင်ရေးပါတီဝင်အများစု ပါဝင်သည့် စစ်သင်တန်းများပေးရန် တရွာလျှင် ပထမအကြိမ် လူ ၂၀ ဦး နှင့် ဒုတိယအကြိမ် လူ ၂၀ ဦး တို့ကို စာရင်းကောက်ယူမှုများပြုလုပ်ခဲ့သည်။

ပဲခူး၊ ဇန်နဝါရီ ၄၊ ၂၀၂၂။

ပဲခူးတိုင်း၊ ပဲခူးမြို့ရှိ ဗကသခေါင်းဆောင်တဦးဖြစ်တဲ့ ကိုမျိုးကိုရဲ့နေအိမ်ကို စစ်ကောင်စီတပ်တွေက ဇန်နဝါရီ ၃ ရက်နေ့ ဒီကနေ့မှာ ချိတ်ပိတ်ခဲ့တယ်လို့ ဒေသခံတွေဆီက သိရပါတယ်။

“နှစ်သစ်မှာတော့ အိမ်ကိုသော့ခတ်တာကနေ ချိတ်ပိတ်တဲ့အဆင့်ကို တဆင့်တိုးသွားတယ်။ တော်လှန်ရေးမှာပါဝင်နေတဲ့သူတိုင်းဟာ ပေးဆပ်မှုပေါင်းစုံနဲ့ ပေးဆပ်ပြီး၊ ဒီပွဲကိုတိုက်ယူနေကြတာပါ။ အောင်ပွဲကိုလည်းတန်းတူခံစားချင်မိပါတယ်” လို့ ကိုမျိုးကိုကိုက သူရဲ့လူမူ့ကွန်ယက်စာမျက်နှာမှာရေးသားဖော်ပြထားပါတယ်။

ပြီးခဲ့တဲ့ ဧပြီလ ၁၀ ရက်နေ့ကစတင်ပြီး သူရဲ့နေအိမ်ကို စစ်ကောင်စီတပ်တွေက အင်အား ၁၀၀ ကျော်နဲ့ လာရောက်ရှာဖွေပြီး အိမ်ထဲမှာရှိတဲ့ ရွှေထည်ပစ္စည်းတချို့နဲ့ အိမ်ထဲက တန်ဖိုးကြီးတဲ့အရာတွေကို သိမ်းယူသွားခဲ့တယ်လို့လည်း သိရပါတယ်။

မကြာခဏဆိုသလို စစ်ကောင်စီတပ်တွေက နေအိမ်ကို လာရာက်စစ်ဆေးမှု‌တွေ ၁၀ ကြိမ်ထက်မနည်း ပြုလုပ်လေ့ခဲ့ပြီး၊ အိမ်ကိုသော့ခတ်ခဲ့တယ်လို့လည်း မိသားစုနဲ နီးစပ်သူတွေ
ကပြောပါတယ်။

ကိုမျိုးကိုကိုဟာ မြန်မာအစ္စလာရ် လူငယ်တဦးဖြစ်ပြီး သူရဲ့အကိုဝမ်းကွဲတဦးမှာလည်း ဧပြီလ ၉ ရက်နေ့က သူတို့အိမ်ရဲ့ လမ်းထိပ်မှာပဲစစ်တပ်ရဲ့အနီးကပ်ပစ်သတ်ခြင်းကြောင့် ကျဆုံးခဲ့ရပါတယ်။

မြေလတ်အသံ၊ ဇန်နဝါရီ ၂၊ ၂၀၂၂။

မနေ့က ညနေပိုင်း တန့်ဆည်မြို့နယ်၊ ကပေါင်းကျ ဒေသခံကာကွယ်ရေးတပ်ဖွဲ့တွေနဲ့ ပစ်ခတ်မှုဖြစ်ခဲ့တဲ့ အာဏာသိမ်း စစ်ကောင်စီဟာ ဒီနေ့ မနက် ၁၁ နာရီ ဝန်းကျင်မှာ ကပေါင်းကျရွာ အရှေ့ဘက်ကို စပြီး မီးရှို့နေတယ်လို့ ဒေသတဦးဆီက သိရပါတယ်။

“နေအိမ်၂လုံးနဲ့ ဆန်စက်၁လုံးလို့ ကနဦးသိထားတယ် ဆန်စက်ကတော့ မသေချာသေးဘူး” လို့ ကပေါင်းကျရွာခံ တဦးက ပြောပါတယ်။

စစ်ကောင်စီတပ်တွေ မနေ့က ‌ညနေပိုင်း ကပေါင်းကျကျေးရွာမှာ ၁၀ကြိမ်မြောက်တပ်လာစွဲခဲ့လို့ ညနေ ၆နာရီဝန်းကျင်က ဒေသခံကာကွယ်ရေးတပ်တွေနဲ့ အပြန်အလှန် ပစ်ခတ်မှုရှိခဲ့တယ်လို့ ဒေသခံတဦးက ပြောပါတယ်။

“စစ်ခွေး ဘက်မှာလည်းအသေအပျောက်ရှိနိုင်တယ်၊ ကပေါင်းကျအရှေ့ရွာက ဖမ်းမိသူတယောက်ပစ်ခတ်နေတုန်းထွက်ပြေးလွတ်မြောက်လာသူပြောတာက သူရှေ့မှာပဲ လေးငါးယောက်လောက်လဲကျတာမြင်တယ်ပြောတယ်” လို့ ဒေသခံတဦးက ပြောပါတယ်။

ကပေါင်းကျ PDF နဲ့ တန့်ဆည် PDF တို့ ပူးပေါင်းပြီး စစ်အုပ်စုကို မိုင်းခွဲတိုက်ခိုက်ခဲ့တဲ့ အပြင် ၄၅မိနစ်နီးပါး အပြန်အလှန် ပစ်ခတ်ခဲ့လို့ စစ်ကောင်စီဘက်က ၁၀ ဦးနီးပါး သေဆုံးခဲ့သလို PDF ရဲဘော် ၁ဦး ကျဆုံးခဲ့တယ်လို့ Guerrilla Warfare – K.P.K က ထုတ်ပြန်ထားပါတယ်။

ကပေါင်းကျရွာဟာ တန့်ဆည်မြို့နယ်ထဲက ရွာကြီးတရွာ ဖြစ်ပြီး အဲ့ဒီရွာက အချက်အချာ ကျလို့ စစ်ကောင်စီတပ်တွေ ခဏခဏ တပ်လာစွဲတာ အခုတခေါက်နဲ့ ဆို ၁၀ကြိမ်ရှိခဲ့ပြီ လို့ သိရပါတယ်။

ပဲခူး၊ ဒီဇင်ဘာ ၂၇၊ ၂၀၂၁။

ပဲခူးတိုင်း၊ သာယာဝတီအကျဉ်းထောင်မှာ ဖမ်းဆီးထိန်းသိမ်းခံထားရတဲ့ သတင်းထောက် ကိုငြိမ်းချမ်းဝေရဲ့ ဒီကနေ့ရုံးချိန်းကို လာရောက်ခဲ့တဲ့ သူရဲ့ဇနီးသည်ကို သာယာဝတီခရိုင်တရားရုံးမှာပဲ စစ်ကောင်စီက ဖမ်းဆီးလိုက်တယ် ဒေသခံတွေဆီက သိရပါတယ်။

ဖမ်းဆီးခံရသူမှာ Bago Weekly ဂျာနယ် သတင်းထောက် ကိုငြိမ်းချမ်းဝေရဲ့ဇနီး မဝေဝေလွင်ဖြစ်ပြီး၊ ပုဒ်မ ၁၂၃(ဂ) နဲ့ သာယာဝတီခရိုင်တရားရုံးမှာ ရုံးထုတ်မှာဖြစ်လို့ အကြော်အလှော်တွေလာပို့ပေးစဉ် ဖမ်းဆီးခံရကာ၊ ဘာကြောင့် ဖမ်းဆီးတယ်ဆိုတာကိုတော့ မသိရသေးဘူးလို့ မိသားစုနဲ့ နီးစပ်သူတဦးကပြောပါတယ်။

“ဖမ်းတာက (သာယာဝတီခရိုင်) တရားရုံးထဲမှာပဲ ဖမ်းလိုက်တာ။ လက်ရှိ ထိန်းသိမ်းထားတယ်ပဲ သိရသေးတယ်။ ဘာနဲ့ ဆွဲထားတယ် ပုဒ်မ ဘယ်လောက်လဲ မသိရသေးဘူး၊ ဖမ်းသွားတာ သူနဲ့အတူ ရုံးချိန်းလိုက်သွားတဲ့ အသိတွေက လှမ်းပြောတယ်။” လို့ မိသားစုနဲ့ နီးစပ်သူတဦးက ပြောပါတယ်။

ကိုငြိမ်းချမ်းဝေဟာ ပဲခူးတိုင်းဒေသကြီးအနောက်ခြမ်း၊ သာယာဝတီခရိုင်၊ လက်ပံတန်းမြို့နယ်မှာနေထိုင်တဲ့ သတင်းထောက် တဦးဖြစ်ပြီး၊ စစ်ကောင်စီက ပြီးခဲ့တဲ့ ဒီဇင်ဘာ ၁၆ ရက်နေ့က သာယာဝတီထောင်ရုံးချိန်းမှာ ပုဒ်မ ၅၀၅(က) အမှုအတွက် ထောင်ဒဏ် ၃ နှစ်အမိန့်ချမှတ်ခံထားရကာ၊ နောက်ထပ် ပုဒ်မ ၁၂၃ (ဂ) နဲ့ ထပ်မံအဖွင့်ခံထားရပြီး ဒီကနေ့ သာယာဝတီခရိုင် တရားရုံးမှာ သူရဲ့ ဇနီးသည်ကို ထပ်မံဖမ်းဆီးခဲ့တာ ဖြစ်ပါတယ်။

ကိုငြိမ်းချမ်းဝေကို လက်ပံတန်းမြို့နယ်၊ ခမုံကျေးရွာက နေအိမ်မှာ မတ်လ ၁၉ ရက်နေ့ ညပိုင်းမှာ ဝင်ရောက်ဖမ်းဆီးခဲ့တာဖြစ်ပြီး၊ သူ့ရဲ့ဇနီးသည်ကို ဒီကနေ့မှာဖမ်းဆီးခံလိုက်ရတာဖြစ်ပါတယ်။ သူတို့ဇနီးမောင်နှံ ၂ ဦးမှာ နှစ်အရွယ်သမီး ၁ ဦးကျန်ခဲ့ပြီး အဖွားဖြစ်သူက ခေါ်ယူစောင့်ရှောက်ထားရတယ်လို့ သိရပါတယ်။

ကိုငြိမ်းချမ်းဝေဟာ ပဲခူးမြို့အခြေစိုက် Bago Weekly Journal မှာ နယ်မြေခံသတင်းထောက်အနေနဲ့ သတင်းတွေရေးသားပြီး သူရဲ့ ဂျာနယ်တိုက်ကို မတ်လထဲမှာ စစ်ကောင်စီက ဝင်ရောက်ဖျက်ဆီးခဲ့ကာ၊ သတင်းဌာနရဲ့ Facebook လူမှုကွန်ရက်စာမျက်နှာကိုပါ နည်းပညာအရ ပိတ်ခံထားရတဲ့ သတင်းဌာနတခုဖြစ်ကြောင်း သိရပါတယ်။

မကွေး၊ ဒီဇင်ဘာ ၂၄၊ ၂၀၂၁။

မကွေးတိုင်း၊ အောင်လံမြို့နယ် တိုင်းဒေသကြီးလွှတ်တော်ကိုယ်စားလှယ် ၁ ဦး၊ CDM ပညာရေးဝန်ထမ်းတဦး၊ NLD မြို့နယ် အလုပ်အမှုဆောင်တဦးနဲ့ တက်ကြွလှုပ်ရှားသူတဦး စုစုပေါင်း ၄ ဦးရဲ့ နေအိမ်တွေကို မနေ့က ချိတ်ပိတ်ခဲ့တယ်လို့ ဒေသခံတွေဆီက သိရပါတယ်။

မကွေးတိုင်း၊ အောင်လံမြို့နယ် တိုင်းဒေသကြီးအမှတ်(၁) လွှတ်တော်ကိုယ်စားလှယ် ဦးအေးကျော်၊ CDM ပညာရေးဝန်ထမ်း ဆရာဦးကျော်ကျော်ဦး၊ NLD မြို့နယ် အလုပ်အမှုဆောင် ဒေါ်ဥမ္မာဌေးနဲ့ ကိုသူရနိုင် (ခေါ်) ကိုမိုင်းဆက် တို့ ၄ ဦးရဲ့ နေအိမ်တွေ စစ်ကောင်စီက ချိတ်ပိတ်ခဲ့တာဖြစ်ပါတယ်။

“ဦးအေးကျော်အိမ်ဆို ယောက္ခမပါရှိတယ်။ သက်ကြီးရွယ်အိုပေါ့ အသက်က ၇၀ နီးပါး ရှိနေပြီ၊ မိသားစုတွေနေတဲ့ အိမ်ကို သူတို့အပြင်ခဏသွားတုန်း ဝင်ပြီးချိတ်ပိတ်ပစ်တာ။ အခုတော့ နေစရာမရှိလို့ အမျိုးတွေအိမ်မှာ သွားနေရတယ်။ ကျန်တဲ့သူတွေအိမ်ကတော့ လူမနေတာ ကြာပါပြီ” လို့ အောင်လံမြို့ ဒေသခံတဦးက မြေလတ်အသံကို ပြောပါတယ်။

အခုချိတ်ပိတ်ခံရတဲ့ လွှတ်တော်ကိုယ်စားလှယ် ဦးအေးကျော်မှာ တိုင်းဒေသကြီး အမှတ် (၂) လွှတ်တော်ကိုယ်စားလှယ်ဖြစ်ပြီး၊ အမှတ် (၁) လွှတ်တော်ကိုယ်စားလှယ် ဦးဇော်မင်းမှာ မကွေးတိုင်းဒေသကြီးအစိုးရအဖွဲ့ဝင် ဝန်ကြီးတပါးဖြစ်လို့ အာဏာသိမ်းစဉ်ကာလကတည်းက ဖမ်းဆီးထိန်းသိမ်းခံထားရကာ အခုလို နိုင်ငံရေးနဲ့ပတ်သက်သူတွေရဲ့ နေအိမ်တွေကို ချိတ်ပိတ်တာ အောင်လံမြို့နယ်မှာ ပထမဆုံးဖြစ်ကြောင်း သိရပါတယ်။

အောင်လံမြို့နယ် ပြည်သူ့လွှတ်တော်ကိုယ်စားလှယ်နဲ့ အမျိုးသားလွှတ်တော်ကိုယ်စားလှယ် (၂၀၁၅ အနိုင်ရအမတ် ဟောင်း) ၂ ဦးကတော့ စစ်ကောင်စီထံမှာ ခံဝန်ထိုးပြီး နေထိုင်နေကြောင်းနဲ့ နိုင်ငံအရေးအယူအစမတူသူတွေကို အခုလို မတရားဖမ်းဆီးထောင်ချတဲ့အပြင်၊ ထွက်ပြေးတိမ်းရှောင်နေရသူတွေရဲ့ နေအိမ်တွေကို မတရား ချိတ်ပိတ်တဲ့အပေါ် မြို့ခံလူထုအနေနဲ့ လက်မခံနိုင်ကြဘူးလို့ ဒေသခံတွေက ပြောပါတယ်။