စလင်း၊ ဇူလိုင် ၂၁၊ ၂၀၂၅။

မကွေးတိုင်း၊ စလင်းမြို့နယ်၊ ရွာသစ်ကလေးရွာကို ဇူလိုင် ၂၁ ရက် ဒီမနက် ၇ နာရီခွဲလောက်မှာ စစ်ကောင်စီစစ်ကြောင်းက ဝင်ရောက်မီးရှို့ခဲ့တယ်လို့ စလင်းမြို့ခံတွေဆီက သိရပါတယ်။

ဆုတ်လေဦးဘက်ကလာတဲ့ အင်အား ၁၀၀ ဝန်းကျင်ပါစစ်ကောင်စီစစ်ကြောင်းက အိမ်ခြေ ၆၅ လုံး၊ လူဦးရေ ၃၃၀ ဝန်းကျင်နေထိုင်တဲ့ ရွာသစ်ကလေးရွာကို မီးရှို့ဖျက်ဆီးခဲ့တဲ့အတွက် နေအိမ် ၄ လုံးပျက်စီးခဲ့တယ်လို့ ဆိုပါတယ်။

“အကြမ်းဖက် စစ်ကောင်စီစစ်ကြောင်းက မနက်က ဆုတ်လှေဦးဘက်မှာ တော်လှန်ရေးတပ်ဖွဲ့ဝင်တွေနဲ့ အပြန်အလှန်ပစ်ခတ်မှုဖြစ်ကြတယ်၊ ရှေ့တိုးလာပြီး ရွာသစ်ကလေးရွာကို မီးရှို့တာ၊ အခုလတ်တလောတော့ ၄ အိမ်မီးရှို့ခံလိုက်ရတယ်၊ လောလောဆယ် ဒေသခံတွေကတော့ စစ်ဘေးရှောင်နေရပါတယ်”လို့ စလင်းမြို့ခံအမျိုးသမီးတဦးက ပြောပါတယ်။

ဇူလိုင် ၂၀ ရက်မနေ့က စလင်းမြို့ပေါ်ကတဆင့် ဆင်ဖြူကျွန်းမြို့ဘက်ကိုလာတဲ့ အင်အား ၂၀၀ ဝန်းကျင် ပါစစ်ကြောင်းက ဒီမနက် ၃ နာရီလောက်မှာ စစ်ကြောင်း ၂ ကြောင်းခွဲပြီး ညောင်ကုန်းကျေးရွာဘက်ကို အင်အား ၈၀ ကျော်၊ ဆုတ်လေဦးဘက်ကို အင်အား ၁၀၀ ကျော်ဝင်ရောက်လာခဲ့တာလို့ ဆိုပါတယ်။

အဲ့ဒီနောက် ဆုတ်လေဦးဘက်ကိုလာတဲ့ စစ်ကြောင်းကဒေသခံကာကွယ်ရေးတပ်တွေနဲ့အပြန်အလှန် ပစ်ခတ်မှုဖြစ်ပြီး ပစ်ခတ်မှုအတွင်းဒေသခံကာကွယ်ရေးတပ်ဖွဲ့ဝင်တဦး ထိခိုက်ဒဏ်ရာရခဲ့တယ်လို့ သိရပါတယ်။

စစ်ကြောင်းကတော့ ရွာသစ်ကလေးရွာကိုမီးရှိ့ပြီးနောက် နွယ်တမယ်ရွာဘက်ကို ပြန်ဆုတ်ခွာသွားတယ်လို့ သိရပါတယ်။

ခုလိုစစ်ကြောင်းထိုးနေတာကြောင့် ရွာသစ်ကလေးရွာ၊ မြောက်ချောင်းဖြူရွာ၊ တောင်ပိုရွာ၊ အမှူးရွာ၊ မြောင်းဂွရွာ၊ ပန်းတောရွာ စတဲ့စစ်ကြောင်းသွားတဲ့ လမ်းတလျှောက်ရွာတွေက ဒေသခံ ၂,၀၀၀ ကျော်လည်း ဘေးလွတ်ရာတိမ်းနေကြရတယ်လို့ အထက်ပါအမျိုးသမီးက ဆက်ပြောပါတယ်။

ဇူလိုင် ၄ ရက် မနက် ၈ နာရီခွဲလောက်မှာလည်း မိုးဝန်းရွာကနေထွက်လာတဲ့ အင်အား ၁၀၀ ပါစစ်ကောင်စီစစ်ကြောင်းက ကညှပ်ရွာကိုဝင်ရောက်လာချိန်မှာ ထမင်းစားနေတဲ့ ကျေးရွာပကဖအဖွဲ့ဝင်တွေကိုတွေ့ပြီး ဝင်ရောက်ပစ်ခတ်လို့ ၁ ဦးသေဆုံးပြီး ဒေသခံတွေလည်း ဖမ်းဆီးခံလိုက်ရပါသေးတယ်။

စာတည်း – လင်း

ချောက် ၊ ဇွန် ၂၈၊ ၂၀၂၅။

မကွေးတိုင်း၊ ချောက်မြို့နယ်အတွင်း စစ်ကောင်စီတပ်က စစ်ကြောင်းထိုးဝင်ရောက်နေလို့ ဒေသခံ ၅,၀၀၀ ကျော် ဘေးလွတ်ရာတိမ်းရှောင်နေရတယ်လို့ ချောက်မြို့ခံတွေဆီက သိရပါတယ်။

စလေ ခမရ ၄၁၆ တပ်က အင်အား ၇၀ ပါစစ်ကြောင်း ၂ ကြောင်းဟာ မေ ၂၈ ရက်၊ ဒီနေ့ မနက် ၇ နာရီခွဲမှာ ချောက်မြို့နယ်ထဲကို စစ်ကြောင်းထိုးဝင်ရောက်လာတာလို့ သိရပါတယ်။

စစ်ကြောင်း‌တွေနဲ့နီးတဲ့ ကံဆောင်ရွာ၊ ထောက်ရှည်ကန်ရွာ၊ ဥယျာဉ်ရွာ၊ ညောင်ကွရွာ၊ သစ်ချိုကုန်းရွာ၊ ကျောက်စုရွာ၊ လွင်ကြယ်ထိန်ကန်ရွာ၊ မင်းကန်ရွာ၊ ခပေါင်းတဲရွာ၊ ကြိတ်စုရွာ၊ ဇောင်းတော်ကန်ရွာ တွေက ဒေသခံ ၅,၀၀၀ ကျော် တိမ်းရှောင်‌နေရတာလို့ သိရပါတယ်။

“သူတို့ မြို့နယ်မှူးဆိုလား၊ စခန်းမှူးဆိုလား မြစ်အနောက်ဘက်ကနေ လာဖို့ရာအတွက်ကို လုံခြုံရေးကင်းယူတာလိုလို ဒါမှမဟုတ် သူတို့တခြား ဘာသတင်းရလို့လည်းတော့ မသိဘူး။အဲ့ဒါကို အခုအချိန်မှာ စစ်‌ကြောင်း ၂ ကြောင်းခွဲပြီးတော့ လာကြတယ်လို့ပဲ ကျွန်တော်တို့ထင်မိတာပဲဗျ”လို့ ဒေသခံတဦး က ပြောပါတယ်။

စစ်ကြောင်းတွေဟာ စလေတပ်ထဲကနေ ၁ ကြောင်းလာပြီး ရှင်ပင်စာကြိုဘုရားဘက်က ၁ ကြောင်းလာတယ်လို့ သိရပါတယ်။

ဒီနေ့ နေ့လည်ခင်းအထိတော့ ဒီစစ်ကြောင်းတွေဟာ ကျေးရွာတွေထဲ ကို ဝင်ရောက်ခြင်းမရှိသေးဘဲ တောင်သာလမ်းခွဲမှာ လုံခြုံရေး ယူထားတာကို တွေ့ရတယ်လို့လည်းဆိုပါတယ်။

ပြီးခဲ့တဲ့ ဇွန် ၁၉ ရက်ကလည်း စလေ ခမရ ၄၁၆ တပ်ကစစ်ကောင်စီတပ်ဖွဲ့ဝင်တွေဟာ ချောက်မြို့နယ်၊ လွန်ကြယ်ထိန်ကန်ရွာကို ဝင်ရောက် မီးရှို့ကာ ပစ္စည်းတွေယူခဲ့သလို နွားတွေကိုပါသတ်ဖြတ်ခဲ့တယ်လို့ သိရပါတယ်။

စာတည်း – ဆောင်း

ဆားလင်းကြီး၊ ဇွန် ၁၆၊ ၂၀၂၅။

စစ်ကိုင်းတိုင်း၊ ဆားလင်းကြီးမြို့နယ်မှာ စစ်ကောင်စီစစ်ကြောင်းဝင်လာလို့ ဒေသခံ ၈,၀၀၀ ခန့်ထွက်ပြေးနေရတယ်လို့ ညောင်ပင်ကြီးရွာခံတွေဆီက သိရပါတယ်။

ဇွန် ၁၅ ရက်ညနေ ၃ နာရီခန့်မှာ ဆားလင်းကြီးဘက်ကနေ အင်အား ၁၀၀ ကျော်ပါစစ်ကြောင်းဟာ ညောင်ပင်ကြီးကျေးရွာရဲစခန်းကိုစတင်ဝင်ရောက်လာတာလို့ ဆိုပါတယ်။

“သူတို့လာတဲ့ အဓိကအကြောင်းအရင်းက စစ်ကြောင်းမဟုတ်ဘဲ တော်လှန်ရေးအင်အားစုက မိုင်းခွဲလိုက်တဲ့ ယန်စီ-ဝမ်ပေါင် ကုမ္ပဏီ နှစ်ခုကို ဆက်သွယ်ထားတဲ့ မီးတိုင်ကိုပြန်ထောင်ဖို့လာကြတာ”လို့ ညောင်ပင်ကြီးရွာခံတဦးကပြောပါတယ်။

အဲ့ဒီနောက် ဇွန် ၁၆ ရက် ဒီမနက် ၇ နာရီခန့်မှာ အောင်ချမ်းစည်ရွာထဲကိုဝင်ကာ ညောင်ပင်ကြီးရွာနဲ့ အေးကုန်းရွာကြားမှာ လမ်းကင်းလုံခြုံရေးယူထားကြတယ်လို့ ဆိုပါတယ်။

စစ်ကြောင်းဝင်လာလို့ အိမ်ခြေ ၂၀၀ ကနေ ၃၀၀ ကျော်ကြားရှိတဲ့ ညောင်ပင်ကြီး၊ သာယာကုန်း၊ ထနောင်းကုန်း၊ အေးကုန်း၊ အောင်ချမ်းစည်၊ ထန်းတောကြီး၊ ရုံးပင်ရိုးကျေးရွာတွေက ဒေသခံ ၈,၀၀၀ ခန့်ဘေးလွတ်ရာကို ထွက်ပြေးတိမ်းရှောင်နေရပြီး ဒေသခံကာကွယ်ရေးတပ်တွေနဲ့ တိုက်ပွဲဖြစ်တာတော့မရှိသေးဘူးလို့ ဆိုပါတယ်။

ပြီးခဲ့တဲ့ ဇွန် ၁၄ ရက်က အေးကုန်းကျေးရွာအနီးရှိ ဝမ်ပေါင်နဲ့ယန်စီကုမ္ပဏီကို ဆက်သွယ်ထားတဲ့ မီးတိုင်ကို တော်လှန်ရေးအဖွဲ့ကမိုင်းခွဲလိုက်လို့ မီးတိုင် ၁ တိုင်နဲ့ ရေပိုက်လိုင်းပျက်စီးခဲ့တယ်လို့ သိရပါတယ်။

ဒါ့အပြင် မတ် ၂၇ ရက်မှာလည်း ဆားလင်းကြီးမြို့နယ်၊ ထန်းပုကျေးရွာမှာ စက်တပ်လေထီးနဲ့ ဗုံးကြဲခံရလို့ အမျိုးသမီး ၁ ဦးသေဆုံးပြီး သံဃာတော်တွေနဲ့ ကလေးငယ်တွေအပါအဝင် ၉ ဦးဒဏ်ရာရတယ်လို့သိရပါတယ်။

စာတည်း – လင်း

ညောင်ဦး၊ ဧပြီ ၂၊ ၂၀၂၅။

မန္တလေးတိုင်း၊ ညောင်းဦးမြို့နယ်မှာ စစ်ကောင်စီအင်အား ၆၀၀ ကျော်နဲ့စစ်ကြောင်းထိုးနေလို့ ဒေသခံ ၂၀,၀၀၀ ကျော်ထွက်ပြေးနေရတယ်လို့ ဒေသကာကွယ်ရေးအဖွဲ့တာဝန်ရှိသူတွေထံက သိရပါတယ်။

မတ် ၃၁ ရက်ကစတင်ကာ ဒီကနေ့ ဧပြီ ၂ ရက်အထိ ညောင်ဦးမြို့နယ်အတွင်းက ကျေးရွာ ၂၆ ရွာကို စစ်ကြောင်း ၈ ကြောင်းခွဲကာ အင်အားအလုံးအရင်းနဲ့ လှည့်ပတ်စစ်ကြောင်း ထိုးနေတာလို့ ဆိုပါတယ်။

” ဒီနေ့ထိ စစ်ကြောင်းထိုးနေတုန်း။ တိုက်ပွဲဖြစ်တာတော့မရှိသေးဘူး။ မိုင်းကွဲသံတွေတော့ ကြားရတာရှိတယ်။ သူတို့စစ်ကြောင်းကများတော့ တော်လှန်ရေးအဖွဲ့တွေ အကုန်နောက် ဆုတ်နေရတယ်။ စစ်ကြောင်းက ၈ ကြောင်းတောင်ပတ်ထိုးနေတော့ ဘယ်သူမှဝင်မတိုက် နိုင်ကြဘူး။ မိုင်းတွေလောက်ဘဲ ခွဲနိုင်ကြတယ်”လို့ ညောင်ဦးမြို့နယ်အခြေပြု ဒေသကာ ကွယ်ရေးတပ်ဖွဲ့တာဝန်ရှိသူက မြေလတ်အသံကို ပြောပါတယ်။

စစ်ကောင်စီစစ်ကြောင်းတွေကြောင့် ညောင်ဦးနဲ့ချောက်မြို့နယ်အကြားက ကျေးရွာတွေဖြစ် တဲ့ အနောက်အုံ၊ ချောင်းရှည်၊ ဇီးစမြင်မြောက်၊ ဇီးစမြင် အလယ်၊ ဇီးစမြင်တော၊ ကျောက် ပြင်ကန်၊ ယာတောကြီး၊ သချင်ကန်၊ စကား၊ မြောင်၊ ရွှေသဖြူ၊ ကန်သာ၊ လည်ကန်၊ မီးလောင်ဖျား( မြောက်)၊ မီးလောင်ဖျား(တောင်)၊ ကြအိုကျွန်း၊ ရွာသစ်၊ ဥယျာဥ်၊ ကျွန်းချောင်း၊ ကံစပ်တော၊ သပွတ်စုအပါအဝင် ကျေးရွာ ၂၆ ရွာက ဒေသခံ ၂၀,၀၀၀ ကျော်ဟာ ကျေးရွာတွေအနီးက တောစပ်၊ ယာခင်းတွေနဲ့ ဆွေမျိုးတွေရှိရာ အခြားမြို့ရွာတွေမှာ သွားရောက်ရှောင်တိမ်းနေထိုင်နေကြရတယ်လို့ သိရပါတယ်။

ဒါ့အပြင် ချောင်းရှည်ရွာ ၊ ဇီးတမြင်ရွာ၊ ကန်သာရွာတွေအပါ စစ်ကြောင်းထိုး ဝင်ရောက်ရာ လမ်းကြောင်းတလျှောက်ကျေးရွာတွေက ဒေသခံ အမျိုးသား၊ အမျိုးသမီး ၇၀ ခန့် ဖမ်းဆီးခံခဲ့ရပြီး ပြန်လည်လွတ်မြောက်လာသူတွေလည်းရှိတယ်လို့ ၎င်းက ဆက်ပြောပါတယ်။

၎င်းစစ်ကြောင်းတွေဟာ မတ် ၂၀ ရက်ကစတင်ကာ ကြအို၊ မြေသန့်တောင်၊ တက်မရေနံ မှော်၊ မုန်တိုင်း၊ ပြင်းချောင်းကျေးရွာတွေကို စစ်ကြောင်းထိုးဝင်ရောက်ခဲ့သေးပြီး မတ် ၃၀ ရက်မှာ မြေသန့်တောင်ကျေးရွာအနီးဝင်ရောက်ချိန် ဒေသကာကွယ်ရေးအဖွဲ့တွေက မိုင်းဆွဲ တိုက်ခိုက်ခဲ့ရာ စစ်ကောင်စီတပ်ဖွဲ့ဝင် ၈ ဦးထိခိုက်ပြီး ကား ၁ စီး ပျက်စီးခဲ့ပါသေးတယ်။

စစ်ကောင်စီအဖွဲ့တွေက ကျေးရွာတွေကို စစ်ကြောင်းထိုးဝင်ရောက်စဥ် မတ် ၃၁ ရက်မှာ အရှေ့ကျောက်ပြင်ကန်ကျေးရွာက နေအိမ် ၂ လုံးမီးရှို့ခံရပြီး ကြက်၊ ဘဲ၊ ဝက်တွေအပါအဝင် စားသောက်ကုန်တွေနဲ့ တန်ဖိုးရှိပစ္စည်းအချို့တွေယူဆောငိတာတော့ရှိတယ်လို့ သိရပါတယ်။

ဧပြီ ၂ ရက် ဒီကနေ့အထိ အဆိုပါ စစ်ကြောင်းတွေဟာ မြေသန့်တောင်၊ ကြအို၊ မုန်တိုင်၊ ကျောက်ပြင်ကန်၊ ကဒိုင်း၊ စက၊ ဇီးတမြင်ရွာတွေမှာ ဆက်လက်တပ်စွဲနေထိုင်နေပြီး စစ် ကြောင်းထိုးနေဆဲဖြစ်တယ်လို့ သိရပါတယ်။

ပုံစာ – ဒီပဲယင်းမြို့နယ်က ကျေးရွာတွေ ၂၀၂၂ အတွင်း စစ်ကြောင်းထိုးခံရလို့ ဒေသခံတွေထွက်ပြေးရစဥ် ( ဓာတ်ပုံ – ဒီပဲယင်းစစ်ရှောင်ထောက်ပံ့ရေး)။

သတင်း – ကျော်ကြီး၊ စာတည်း – ဟိန်းစံ