ပန်းတောင်း၊ ဧပြီ ၂၊ ၂၀၂၅။

ပဲခူးတိုင်းအနောက်ခြမ်း၊ ပန်းတောင်းမြို့နယ်၊ ပန်းတောင်း-တောင်ကုတ်လမ်း ရခိုင်ရိုးမပေါ် ရှိ ညောင်ကျိုးရွာနဲ့အနီးတဝိုက်ကို စစ်ကောင်စီတပ်က လေကြောင်းကနေဗုံးကြဲပြီး လက်နက်ကြီးတွေနဲ့ပစ်ခတ်တိုက်ခိုက်နေတယ်လို့ ဒေသခံတွေထံက သိရပါတယ်။

ဧပြီ ၂ ရက် ဒီကနေ့မနက်ပိုင်းမှာ ညောင်ကျိုးကျေးရွာနဲ့ အနီးပတ်ဝန်းကျင်တဝိုက်ကို တိုက်လေယာဥ် ၁ စီးနဲ့ ဗုံးကြဲတိုက်ခိုက်ခဲ့တဲ့အပြင် စစ်ကောင်စီတပ်ရဲ့ ၂၇ မိုင်စခန်းဘက်ကနေ လက်နက်ကြီးတွေနဲ့ အလုံးရေ အမြောက်အများပစ်ခတ်နေပြီး ညောင်ကျိုးရွာအပေါ်ဝေဟင်မှာလည်း စက်တပ်လေထီးတွေ အဆက်မပြတ်ပျံသန်းနေတယ်လို့ ဆိုပါတယ်။

” ဒီကနေ့(ဧပြီ ၂ရက်) မနက်လုံးလက်နက်ကြီးသံ အကြိမ်စိပ်စိပ်ထုသံကြားရတယ်။ လေယာဥ်နဲ့ဗုံးကြဲသံလည်းကြားရတယ်။ စစ်တပ်က ထုနေတာ။ ခုလည်း ဆက်ပြီးတချက်တချက် ထုနေတယ်။ လေထီး (paramotor)ကလည်း ပတ်သလားမမေးနဲ့ တချိန်လုံးပျံနေတာပဲ”လို့ မြေပြင်အခြေအနေသိရှိထားတဲ့ ပန်းတောင်းဒေသခံ အမျိုးသားတဦးက မြေလတ်အသံကို ပြောပါတယ်။

အာရက္ခတပ်တော် – AAနဲ့တော်လှန်ရေးပူးပေါင်းအဖွဲ့တွေဟာ ပန်တောင်း-တောင်ကုတ်လမ်းပိုင်း ရခိုင်ရိုးမပေါ်ရှိ မိုးထိတောင်၊ပန်းကန်ကွဲ၊ တောင်ပုံကြီး၊ နတ်တောင်ကုန်းစတဲ့ စစ်ကောင်စီစခန်းတွေကို သိမ်းပိုက်ထားနိုင်ပြီး မတ်လဒုတိယအပတ်အတွင်းမှာ ညောင်ကျိုးပင်မစခန်းနဲ့ ကာကင်းစခန်းတွေကို ထိန်းချုပ်ထားနိုင်ကာ လက်ရှိငလျင်ဘေးဒဏ်သင့်ကာလမှာ ထိုးစစ်တွေကို ယာယီတဖက်သတ်ရပ်တန့်လိုက်တာပါ။

မတ် ၂၈ ရက်မှာ လှုပ်ခတ်ခဲ့တဲ့ အင်အားပြင်းငလျင်ကြီးကြောင့် ပျက်စီးဆုံးရှုံးမှုတွေအပေါ် ကူညီကယ်ဆယ်ရေးလုပ်ငန်းတွေဆောင်ရွက်နိုင်ဖို့ တိုက်ပွဲဖြစ်ပွားရာနေရာတွေက ၎င်းတို့ရဲ့ ထိုးစစ်အားလုံးကို ဧပြီ ၃၀ ရက်အထိ ၁ လတာရပ်စဲထားမယ်လို့ အာရက္ခတပ်တော်-AA အပါ ညီနောင်မဟာမိတ် ၃ ဖွဲ့က ဧပြီ ၁ ရက် မနေ့ကထုတ်ပြန်ပါတယ်။

စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်ကတော့ တိုင်းရင်းသားလက်နက်ကိုင်တွေအနေနဲ့ ၎င်းတို့ရဲ့ထိုးစစ်တွေရပ်တန့်တယ်ဆိုပေမယ့်လေ့ကျင့်မှု၊ တပ်စုဖွဲ့မှုတွေရှိနေကာ အဲ့ဒီပြင်ဆင်မှုတွေကို တိုက်ခိုက်မှုလို့ သဘောထားပြီး လိုအပ်တဲ့ကာကွယ်ရေးဆိုင်ရာလုပ်ငန်းတွေကို ဆက်လက်လုပ်ဆောင်သွားမယ်လို့ ယမန်နေ့မှာပဲ ပြောကြားခဲ့ပါတယ်။

စာတည်း – ဟိန်းစံ

ဆင်ဖြူကျွန်း၊ မတ် ၁၄၊ ၂၀၂၅။

မကွေးတိုင်း၊ စလင်းမြို့နယ်၊ ဆင်ဖြူကျွန်းမြို့နယ်အတွင်း လှည့်ပတ်စစ်ကြောင်းထိုးနေတဲ့ စစ်ကောင်စီတပ်ဖွဲ့က ကုက္ကိုတန်းကျေးရွာကို မီးလောင်ဗုံး၊လက်နက်ကြီးတွေနဲ့ပစ်ခတ်လို့ နေအိမ် ၃၀၀ ခန့် မီးလောင်ခဲ့တယ်လို့ ဒေသခံတွေထံက သိရပါတယ်။

မတ် ၁၃ ရက် မနေ့ည ၉ နာရီ ၄၅ မိနစ်လောက်မှာ ကျပင်းကျေးရွာအနီး ကြက်ရိုးတောင်ပေါ်မှာ ယာယီတပ်စွဲနေတဲ့ အဆိုပါစစ်ကောင်စီစစ်ကြောင်းက ကုက္ကိုတန်းကျေးရွာကို လက်နက်ကြီး၊ မီးလောင်ဗုံးတွေနဲ့ပစ်ခတ်ခဲတာလို့ဆိုပါတယ်။

“ အခုကတော့ တရွာလုံးကုန်ပြီလို့ သိရတယ်၊ မီးကတော်တော်ပြင်းတယ်” လို့ ကုက္ကိုတန်းရွာခံအမျိုးသမီးတဦးက မြေလတ်အသံကို ပြောပါတယ်။

မီးလောင်ဗုံးကြောင့် အိမ်ခြေ ၃၀၀ ဝန်းကျင် လူဦးရေ ၁,၅၀၀ ခန့်ရှိ ကုက္ကိုတန်းကျေးရွာမှာ ရွာလုံးကျွတ်နီးပါးနေအိမ်တွေ မီးလောင်ဆုံးရှုံးခဲ့ပြီး ဒေသခံတွေက စစ်ကောင်စီစစ်ကြောင်းစတင်ဝင်ရောက်တဲ့ မတ် ၈ ရက်က စတင်ကာ ရိက္ခာနဲ့ပစ္စည်းတချို့ယူဆောင်ကာ နီးစပ်ရာတောစပ်တွေမှာ စစ်ရှောင်နေကြရတယ်လို့ ဆိုပါတယ်။

မတ်လဒုတိယအပတ်က စတင်ကာ စစ်ကောင်စီတပ်ဖွဲ့က ဆင်ဖြူကျွန်းနယ်အတွင်း စစ်ကြောင်းထိုးမီးရှို့တာနေတာကြောင့် ကုက္ကိုတန်းရွာအပါအဝင် ကျေးရွာ ၂၀ ခန့်က ဒေသခံ ၁၀,၀၀၀ ကျော်ဟာ ဘေးလွတ်ရာကို အရေးပေါ်စစ်ရှောင်နေကြရတာပါ။

အဆိုပါစစ်ကောင်စီတပ်ဟာ ပခုက္ကူအခြေစိုက် တပ်မ ၁၀၁ နဲ့ စလင်း ခလရ ၂၅၃၊ ခလရ ၂၅၄၊ ခလရ ၂၅၅ တပ်တွေက စစ်ကောင်စီတပ်ဖွဲ့ဝင် ၃၀၀ ကျော်ပါ ပူးပေါင်းစစ်ကြောင်းဖြစ်ပြီး လက်ရှိမှာ ကျပင်းကျေးရွာအနီးမှာပဲ ယာယီတပ်စွဲထားတယ်လို့ သိရပါတယ်။

၎င်းစစ်ကြောင်းကပဲ မတ် ၁၁ နဲ့ ၁၂ ရက်တွေမှာလည်း ကျပင်းရွာနဲ့ နေပူကန်ရွာက နေအိမ်တွေကို မီးရှို့ခဲ့လို့ နေအိမ် ၈၀ ကျော်မီးလောင်ဆုံးရှုံးခဲ့ပါသေးတယ်။

စာတည်း – ဟိန်းစံ

မန္တလေး၊ ဇူလိုင် ၁၂၊ ၂၀၂၄။

မန္တလေးမြို့က မြို့အဝင်အထွက်နဲ့ နန်းတွင်းအနီးပတ်လည်နေရာတွေကို စစ်တပ် ထပ်မံတပ်စွဲနေပြီး အများစုဟာ အိမ်စီးကားအသုံးပြု၊ အရပ်ဝတ်တွေ ဝတ်ဆင်ထားပြီးသွားလာနေကြတယ်လို့ မန္တလေးမြို့ခံတွေက ပြောပါ တယ်။

မန္တလေးမြို့မြောက်ဘက်အဝင် မန္တလေးတောင်တော်၊ ဘုန်းတော်တိုးရပ်ကွက်မှ စက်ရုံအပေါ်ဆုံးထပ်၊ မြို့အလယ်က စျေးချိုတော်၊ မန်းမြန်မာပလာဇာ၊ ရတနာပုံစျေး၊ မြို့အနောက်ဘက်အဝင်က ၁၉ လမ်း၊ လမ်း ၉၀ အနီး၊ ကျုံးအနောက်ဘက် ၁၉ လမ်း၊ လမ်း ၈၀ အပေါ်ထပ်၊ မြို့အရှေ့ဘက်အဝင် မြရည်နန္ဒာအိမ်ယာအနီးတို့မှာ တပ်စွဲထားတယ်လို့သိရပါတယ်။

ဒါ့အပြင် ပုသိမ်ကြီးမြို့နယ်ထဲက စာသင်ကျောင်းတချို့နဲ့ မန္တလေးမြို့တွင်းက စာသင်ကျောင်းတွေမှာလည်း တပ်စွဲထားသလို မြို့ဝင်၊ မြို့ထွက်စစ်ဆေးတာတွေလည်း တင်းတင်းကျပ်ကျပ်လုပ်ဆောင်နေတယ်လို့ မြို့ခံတွေက ပြောပါတယ်။

“မန္တလေးဆိပ်ကမ်းမှာ ခရီးသည်တင်နဲ့ ကုန်တင်မော်တော်တွေကို ပြန်ပြီး စစ်ဆေးနေပြီ။ မှတ်ပုံတင်စစ်တယ်။ ဘယ်သွား၊ ဘာလုပ်မှာလဲမေးတယ်။ မသင်္ကာရင် ဖုန်းတောင်းစစ်တယ်။ စစ်သားတွေကို မဲလို့ ကြောက်စရာဗျာ” လို့ စစ်ဆေးခံရတဲ့ပြည်သူတဦးက ပြောပါတယ်။

ဒါ့အပြင် မန္တလေးမြို့ကို ပုသိမ်ကြီးမြို့ဘက်ကနေဝင်တဲ့ ၁၉ လမ်း၊ မြို့ပတ်လမ်းအနီးမှာလည်း ရဲနဲ့ အရပ်ဝတ် အင်အား ၃၀ လောက်က နေ့စဥ် စစ်ဆေးနေတယ်လို့ ဒေသခံတွေကပြောပါတယ်။

မန္တလေးမြို့ကို စစ်ကောင်စီတပ်သားတွေ စောင့်ကြပ်တဲ့နေရာမှာ ပြည်သူ့စစ်ယူနီဖောင်းဝတ်တွေကို နေရာ အများစုမှာ ပြောင်းလဲထားပြီး ရဲနဲ့ စစ်သားတွေကတော့ အိမ်စီးကားတွေ အသုံးပြုပြီး အရပ်ဝတ်တွေနဲ့ သွားလာနေကြတာကို တွေ့ရတယ်လို့ မြို့ခံတွေက ပြောပါတယ်။

စစ်တပ်က အခုလိုတပ်စွဲထားတာမျိုးကို အရင် ၁၀၂၇ ပထမလှိုင်းမှာလည်း ပြုလုပ်ခဲ့ပြီး ဒုတိယလှိုင်းမှာလည်း ထပ်မံပြုလုပ်နေတာလို့ မြို့ခံတွေက ပြောပါတယ်။

လက်ရှိမှာ စစ်တပ်က မတ္တရာမြို့အဝင် ရွှေကျင်တိုးဂိတ်ကို အဓိကထားစစ်ဆေးတာတွေပြုလုပ်နေပြီး အဲဒီအနီးနားက ကွန်ပျူတာတက္ကသိုလ်နဲ့ ကြာနီကန်ကျေးရွာတွေဘက်ကို တပ်အင်အားထပ်တိုးတာတွေ လုပ်နေတယ်လို့ သိရပါတယ်။

သတင်း – N၊ စာတည်း – လင်းဇေ

စစ်ကိုင်း၊ မတ် ၂၉၊ ၂၀၂၃။

စစ်ကိုင်းတိုင်း၊ ဘုတလင်မြို့နယ်က အမျိုးသား ၆ ဦးကို စစ်ကောင်စီတပ်သားတွေက မတ်လ ၂၉ ရက်ဒီနေ့လယ် ၁၂ နာရီလောက်မှာ ကြိုးတုပ်ပြီးဖမ်းခေါ်လာတာကို တွေ့လိုက်ရတယ်လို့ ဒေသခံတွေက ပြောပါတယ်။

အင်အား ၄၀ ကျော်ပါတဲ့ စစ်ကောင်စီတပ်သားတွေဟာ သပြေကန်၊ ရွှေတောင်၊ ရှမ်းတဲ၊ လွဲတဲ၊ မျောက်တောကြီး၊ မျောက်ကျီ စတဲ့ကျေးရွာတွေ ကို စစ်ကြောင်းထိုးခဲ့ပြီးနောက် အမျိုးသား ၆ ဦးကို ဖမ်းဆီးလာပြီး ဘုတလင်မြို့ထဲကို ခေါ်သွားတယ်လို့ ဘုတလင်မြို့နယ်သတင်းမှန်ပြန်ကြားရေးမှ တာဝန်ခံက ပြောပါတယ်။

“စကစတွေ စစ်ကြောင်းထိုးခဲ့တဲ့ရွာတွေက မြို့ရဲ့တောင်ဖက်မှာ ရှိတာ။ မြို့နဲ့ သိပ်မဝေးပါဘူး။ ဖမ်းလာတဲ့အမျိုးသား ၆ ယောက်ကိုတော့ ၂ ယောက်တတွဲစီ ကြိုးတုပ်ပြီးတော့ မြို့ထဲကို ခေါ်သွားတာ။ သူတို့ဘယ်ရွာက ဆိုတာကိုတော့ မသိရှိရသေးဘူး” လို့ ဆိုပါတယ်။

အဖမ်းခံရသူတွေဟာ အသက် ၂၀ နဲ့ ၃၀ နှစ်အရွယ်တွေဖြစ်ပြီး၊ သူတို့နဲ့ပတ်သက်တဲ့ အသေးစိတ်အချက်အလက်တွေကို မသိရှိရသေးပေမယ့် စစ်ကြောင်းထိုးခံရတဲ့ ကျေးရွာတွေက ဒေသခံတွေ ဖြစ်နိုင်တယ်လို့ အထက်ပါတာဝန်ရှိသူက ခန့်မှန်းပါတယ်။

“ဒီနေ့မှာ တိုက်ပွဲလည်း မရှိဘူးဗျ။ စကစတွေက ရွာတွေကို ဝင်ပြီးစစ်ဆေးတာတွေ နေ့တိုင်းလိုလိုလုပ်နေတာ။ ဒီနေ့အဖမ်းခံရသူတွေကလည်း စကစတွေ ဝင်စစ်ခဲ့တဲ့ ရွာခံသားတွေ ဖြစ်နိုင်တယ်” လို့ ဆိုပါတယ်။

ဒီဖြစ်စဥ်နဲ့ပတ်သက်ပြီး နောက်ဆက်တွဲအချက်အလက်တွေကိုတော့ မြေလတ်အသံက ဆက်လက်စုံစမ်းနေဆဲပါ။

အဲ့ဒီစစ်ကြောင်းဟာ ပြီးခဲ့တဲ့မတ်လ ၂၅ ရက်မှာလည်း အိမ်ခြေ ၃၀၀ ခန့်ရှိတဲ့ ဆုံကုန်းကျေးရွာကို ဝင်ရောက်မီးရှို့ခဲ့ပြီး၊ ကျေးရွာထဲ ပိတ်ကျန်ခဲ့တဲ့ မျက်မမြင် အဘွားအို ၂ ဦးနဲ့ လေဖြတ်နေတဲ့ အဘွားအို ၂ ဦးအပါအဝင် ၇ ဦး မီးလောင်သေဆုံးခဲ့ကာ အိမ်ခြေ ၁၇၅ လုံးလည်း ပြာကျပျက်စီးခဲ့တယ်လို့ ဒေသခံဆီက သိရပါတယ်။

စာတည်း – လင်း

ခင်ဦး၊ မတ် ၂၃၊ ၂၀၂၃။

စစ်ကိုင်းတိုင်း၊ ခင်ဦးမြို့နယ် အနောက်ခြမ်း၊ အင်းပတ်ကွေ့ဈေးမှာ အထိုင်ချနေတဲ့ စစ်ကောင်စီတပ်ဖွဲ့နဲ့ ရွာသစ်ကုန်းရွာက ပျူစောထီးအဖွဲ့တို့ပေါင်းကာ ရွာသားတွေကို လိုက်လံပစ်ခတ်ပြီး အနီးနားက ကျေးရွာတရွာကိုပါ မီးတင်ရှို့နေတယ်လို့ သိရပါတယ်။

မတ်လ ၂၃ ရက်ဒီကနေ့ မနက် ၇ နာရီခွဲလောက်က အင်အား ၄၀ လောက်ပါတဲ့ စစ်အုပ်စုဟာ ကင်းပုန်းဝပ်ပြီး လမ်းသွားလမ်းလာပြည်သူတွေကို လိုက်လံပစ်ခတ်ပြီးနောက် ၈ နာရီခွဲလောက်မှာ မြကန်ကျေးရွာကို စတင်မီးရှို့နေတာလို့ ဆိုပါတယ်။

“မနေ့ကလည်း ကင်းပုန်းတွေဝပ်ပြီး လမ်းသွားလမ်းလာတွေကို စစ်တယ်။ ပါလာတဲ့ ဖုန်းတွေ၊ ပိုက်ဆံတွေ သူတို့ဆီပေးခဲ့ရတယ်။ ဒီနေ့မနက်လည်း လာတဲ့ပြည်သူတွေကို အလာမခံဘဲ ပစ်လွှတ်တယ်။ လက်နက်ငယ်တွေနဲ့ လိုက်ပစ်တယ်။ ရေဦး တိုင်းရင်းဆေးရုံကနေ ပြည်သူတွေ ပြေးတဲ့နေရာတွေဆီ လက်နက်ကြီး ၆ လုံး ဆက်တိုက်ပစ်တယ်” လို့ ခင်ဦးသတင်းမှန်ပြန်ကြားရေးအဖွဲ့ တာဝန်ရှိသူတဦးက ပြောပါတယ်။

လက်နက်ကြီး ကျရောက်ပေါက်ကွဲလို့ တိရိစ္ဆာန်တွေထိမှန်ခဲ့ပြီး၊ ဒေသခံတွေ ထိခိုက်မှုကိုတော့ ဆက်လက်စုံစမ်းနေဆဲဖြစ်ကာ မီးရှို့ခံနေရတဲ့ မြကန်ကျေးရွာမှာလည်း တိမ်းရှောင်ဖို့အချိန်မရတော့တဲ့ သက်ကြီးရွယ်အိုတွေနဲ့ အမျိုးသမီးတချို့ ပိတ်မိကျန်ခဲ့တယ်လို့ ဆိုပါတယ်။

လက်ရှိအချိန်အထိ အဲ့ဒီကျေးရွာအနီးမှာ စစ်ကြောင်းရှိနေသေးတာကြောင့် မီးရှို့ခံရတဲ့အရေအတွက်နဲ့ နောက်ဆက်တွဲအခြေအနေတွေကို မသိရှိရသေးဘူးလို့ အထက်ပါတာဝန်ရှိသူက ဆိုပါတယ်။

အိမ်ခြေ ၂၀၀ ကျော်နဲ့ လူဦးရေ ၂ ထောင်ဝန်းကျင်ရှိတဲ့ မြကန်ကျေးရွာကို ပြီးခဲ့တဲ့ဇန်နဝါရီလ ၂ ရက်ကလည်း စစ်တပ်ကဝင်ရောက်မီးရှို့ခဲ့ပြီး၊ ဒီတကြိမ်နဲ့ဆိုရင် ၂ ကြိမ်မြောက်ရှိပြီလို့ သိရပါတယ်။

အဆိုပါစစ်အုပ်စုဟာ ရေဦး-ခင်ဦး နယ်စပ်ဖြစ်တဲ့ အင်းပတ်၊ ညောင်ပင်ကြီးစု၊ မူးဘောင်လမ်းပိုင်းမှာလည်း ဂိတ်ချနေရာယူထားပြီး အင်းပတ်၊ ချမ်းသာကုန်း၊ မြကန်၊ အင်တိုင်းမြောက်ရွာ၊ မြင်းဒေါင်းစတဲ့ အနီးဝန်းကျင်က ကျေးရွာတွေကို တလကို ၂ ကြိမ်လောက်ဝင်ပြီး ရိက္ခာရှာတာ၊ မီးရှို့တာတွေ လုပ်လေ့ရှိတယ်လို့လည်း သိရပါတယ်။

စာတည်း – လင်း

မတ္တရာ၊ မတ် ၂၂၊ ၂၀၂၃။

မန္တလေးတိုင်း၊ မတ္တရာမြို့နယ်၊ ပိုဝမြောက်ရွာက နေအိမ်တွေကို စစ်ကောင်စီတပ်သားတွေက မတ်လ ၂၂ ရက်ဒီမနက်ပိုင်းမှာ ဝင်ရောက်မီးရှို့ခဲ့တယ်လို့ သိရပါတယ်။

အင်အား ၄၀ ဝန်းကျင်ပါတဲ့စစ်သားတွေက သေနတ်တွေပစ်ဖောက်ကာ ရွာကိုဝင်ရောက်လာပြီး မနက် ၉ နာရီလောက်က စတင်ကာ နေအိမ်တွေကို မီးရှီု့ဖျက်ဆီးခဲ့တာလို့ Wetlet Informational Network မှ ဗိုလ်မြေသြဇာက ပြောပါတယ်။

“ပိုဝမြောက်ရွာက ဒီလထဲမှာပဲ မီးရှို့ခံရတာ ၂ ကြိမ်ရှိပြီ။ လေတွေကလည်း တိုက်နေတော့ မီးငြိမ်းဖို့က တော်တော်ခက်တယ်။ ဖမ်းဆီးခံရတဲ့ ရွာသားတွေတော့ မရှိဘူး။ ရွာသားတွေကတော့ ရွာထဲမရောက်သေးပါဘူး” လို့ ဆိုပါတယ်။

ပိုဝမြောက်ရွာမှာ အိမ်ခြေ ၃၇၀ နီးပါးရှိပြီး၊ ဒီနေ့မီးရှို့ဖျက်ဆီးမှုကြောင့် နေအိမ် ၇၀ ကျော် မီးလောင်ပျက်စီးခဲ့တယ်လို့ ဆိုပါတယ်။

မီးရှို့ခဲ့တဲ့ စစ်ကောင်စီတပ်တွေဟာ မတ္တရာမြို့နယ်အနောက်ဘက်၊ ရွာတော်ကျေးရွာကနေ ဆင်းလာတဲ့ စစ်ကြောင်းဖြစ်ပြီး၊ ပြီးခဲ့တဲ့မတ်လ ၁၈ ရက်ကလည်း ပိုးဝမြောက်ရွာက စာသင်ကျောင်း ၂ ကျောင်းကို မီးရှို့ဖျက်ဆီးခဲ့ပါသေးတယ်။

စာတည်း – လင်း