ညောင်ဦး

ညောင်ဦး၊ ဇူလိုင် ၁၄၊ ၂၀၂၅။

မန္တလေးတိုင်း၊ ညောင်ဦးမြို့နယ်၊ လက်ထုပ်ကျေးရွာမှာ အမျိုးသား ၁ ဦးပစ်သတ်ခံရတယ်လို့ ညောင်ဦးမြို့နယ်ပြည်သူ့ကာကွယ်ရေးအဖွဲ့ဆီက သိရပါတယ်။

ပစ်သတ်ခံရသူဟာ ရွာလှည့်စျေးရောင်းသူ အသက် ၅၃ နှစ်အရွယ် ဦးမျိုးမြင့်ဝင်းဖြစ်ပြီး ဇူလိုင် ၁၃ ရက်မနက် ၉ နာရီကျော်က နေအိမ်မှာရှိနေချိန်ပစ်သတ်ခံရတာလို့ ဆိုပါတယ်။

“အဲ့ဘက်ခြမ်းက ရှင်းခံရတယ်လို့ သိရတယ်။ ဘယ်အဖွဲ့အစည်းက ရှင်းခဲ့တယ်ဆိုတာမသိရသေးဘူး။ လောလောဆယ်တော့ သာမန်လူလို့တော့သိရတယ်။ ပြစ်မှုကျူးလွန်ထားတာ ဘာမှမရှိဘူးလို့တော့ စုံစမ်းထားရတယ်။ “လို့ ညောင်ဦးမြို့နယ်ပကဖ တာဝန်ခံ ကိုဇီးကပြောပါတယ်။

ပစ်ခတ်ခံရတာကြောင့် ဦးမျိုးမြင့်ဝင်းရဲ့ ဝမ်းဗိုက်နဲ့လက်တွေမှာ ကျည်ထိဒဏ်ရာတွေနဲ့ သေဆုံးခဲ့တယ်လို့ သိရပြီး ဒီပစ်ခတ်မှုကိုတော့ ဘယ်အဖွဲ့ကလုပ်ခဲ့တယ်တယ်ဆိုတာ ဇူလိုင် ၁၄ ရက်အထိ သက်ဆိုင်ရာအဖွဲ့တွေဘက်က သတင်းထုတ်ပြန်တာမျိုးမရှိသေးပါဘူး။

ပြီးခဲ့တဲ့ ဇွန် ၁၉ ရက်ကလည်း ညောင်ဦးမြို့နယ်၊ လက်ပံခြေပေါ်ကျေးရွာအုပ်စု၊ တောင်ဖက်တန်းကျေးရွာနေ အုပ်ချုပ်ရေးရွာခွဲတာဝန်ခံ ၁ ဦးနေအိမ်မှာ ရှိနေချိန် သေနတ်သမားတွေကလာရောက်ပစ်သတ်လို့ သေဆုံးသွားသေးတယ်လို့ သိရပါတယ်။

စာတည်း – လင်း

ညောင်ဦး၊ ဇူလိူင် ၁၃၊ ၂၀၂၅။

မန္တလေးတိုင်း၊ ညောင်ဦးမြို့နယ်မှာ စစ်ကောင်စီစစ်ကြောင်းက ကျေးရွာ ၃ ရွာကို မီးဝင်ရှို့လို့ နေအိမ် ၂၀၀ ခန့်မီးလောင်ပျက်စီးသွားတယ်လို့ ဒေသကာကွယ်ရေးအဖွဲ့ဝင်တွေဆီက သိရပါတယ်။

ဇူလိုင် ၁၂ ရက်မနက် ၉ နာရီခန့်မှာ ရွာမကျေးရွာဘက်ကနေလာတဲ့ အင်အား ၁၅၀ ခန့်ပါ စစ်ကြောင်းဟာ မီးလောင်ဖျားတောင်ရွာကို ဝင်ရောက်မီးရှို့ပြီးနောက် မီးလောင်ဖျားမြောက်ရွာ၊ ရွာသစ်ဥယျာဥ်ကျေးရွာတွေကို ဆက်တိုက်မီးရှို့ခဲ့တယ်လို့ ဆိုပါတယ်။

“ရွာပတ်မီးရှို့နေတဲ့ စစ်ကြောင်းက မုန်းတိုင်းကနေတဆင့် စဥ့်ကူး၊ အဲ့ကနေတဆင့် ရွာမဘက်ကနေ မီးလောင်ဖျားတောင်ရွာကို စဝင်တာ။ တောင်ဘက်ရွာတခုတည်းက ၁၅၀ ကျော်တယ်။ မြောက်ဘက်ရွာလည်း ၅၀ ထက်မနည်းဘူး။ ရွာသစ်ဥယျာဥ်ရွာက လူတွေဆွဲသွားပြီးပြန်လွှတ်ပေးခဲ့တယ်။ မီးရှို့တာတော့ မသိရသေးဘူး”လို့ ဒေသကာကွယ်ရေးအဖွဲ့ဝင်တဦးက ပြောပါတယ်။

ကျေးရွာတွေကို မီးရှို့ပြီးနောက် စစ်ကောင်စီစစ်ကြောင်းဟာ ညောင်ဦးမြို့ထံရှိ ခလရ ၄၁၅ ထဲ ပြန်ဝင်သွားတယ်လို့ သိရပါတယ်။

အဆိုပါ စစ်ကောင်စီစစ်ကြောင်းဟာ ကျေးရွာတွေကို မီးပတ်ရှို့နေတဲ့ စစ်ကြောင်းဖြစ်ပြီး ဇူလိုင် ၈ ရက်က ချောင်းရှည်၊ အနောက်အုံ၊ ယာတောကြီးကျေးရွာ၊ ဇူလိုင် ၉ ရက်နေ့မှာ ကျောက်ပြင်ကန်၊ ဇီးစမြင်၊ မြောင်ကျေးရွာတွေက နေအိမ် ၅၀ ကျော်ကို မီးရှို့ဖျက်ဆီးခဲ့ပါသေးတယ်။

ကျေးရွာတွေကို စစ်ကောင်စီစစ်ကြောင်းက မီးဝင်ရှို့နေတာကြောင့် အိမ်ခြေ ၁၀၀ ကျော်ကနေ ၅၀၀ ခန့်ရှိတဲ့ ရွာတွေဖြစ်တဲ့ ချောင်းရှည်၊ ယာတောကြီး၊ ဇီးစမြင်၊ ကျောက်ပြင်ကန်၊ ဂျိုးကန်၊ စခါး၊ မြောင်၊ ရွှေကဖြူ၊ ကြအို၊ မြေသန့်တောင်၊ မအူပင်၊ ပျော်ဘွယ်၊ ရွာသာ၊ ညောင်လှ၊ ပြင်းချောင်း၊ လယ်ကန်၊ ကန်သာ၊ ကံကြီးကုန်းရွာ တွေအပါအဝင် ကျေးရွာပေါင်း ၂၀ ကျော်က ဒေသခံ ၂၀,၀၀၀ ကျော်လောက်ထွက်ပြေးနေရပြီး အများစုကတော့ နေရပ်မပြန်ကြရသေးဘူးလို့ သိရပါတယ်။

စာတည်း – လင်း

ညောင်ဦး၊ ဇူလိုင် ၁၀၊ ၂၀၂၅။

မန္တလေးတိုင်း၊ ညောင်ဦးမြို့နယ်ထဲက ကျေးရွာ ၆ ရွာကို စစ်ကောင်စီစစ်ကြောင်းက မီးရှို့ပြီး နေအိမ်တွေကိုဖျက်ဆီးနေတာကြောင့် ဒေသခံ ၂ သောင်းကျော် ထွက်ပြေးနေရတယ်လို့ ဒေသခံတွေဆီက သိရပါတယ်။

ဇူလိုင် ၈ ရက်မနက် ၉ နာရီကျော်မှာ တောင်ဇင်းကျေးရွာရဲစခန်းကနေ အင်အား ၁၅၀ ခန့်ပါ စစ်ကြောင်းက ချောင်းရှည်၊ အနောက်အုံ၊ ယာတောကြီးကျေးရွာတွေကို မီးရှို့ခဲ့ပြီး ယာတောကြီးရွာမှာ စခန်းချညအိပ်ခဲ့တယ်လို့ ဆိုပါတယ်။

အဲဒီနောက် ဇူလိုင် ၉ ရက်မနက်မှာ ကျောက်ပြင်ကန်၊ ဇီးစမြင်၊ မြောင်ကျေးရွာတွေကို ဆက်လက်မီးရှို့ခဲ့ပြီး မြောင်ကျေးရွာမှာတပ်စွဲထားကာ ဇူလိုင် ၁၀ ရက်မနက် ၈ နာရီခန့်မှာ မြောင်ကနေတဆင့် ကန်သာရွာဘက်ကို ဆက်လက်ထွက်ခွာသွားတယ်လို့ ဆိုပါတယ်။

“ဒီနားမှာက ဆိုးဆိုးဝါးဝါး တိုက်ပွဲကြီးဘာညာဆိုတာလည်း မရှိဘူး။ အဲဒီရွာဘက်တွေမှာ သူတို့(စကစ) ရဲဘော်တွေ အများကြီးကျတာမရှိဘူး။ ပစ်ပြေးနဲ့ မိုင်းဆွဲတာလောက်ပဲ ရှိတာ။ အဲဒါကို သက်သက်လာ ရှို့တာ”လို့ ဒေသခံတဦးက ပြောပါတယ်။

မီးရှို့ခံရလို့ ချောင်းရှည်ရွာက နေအိမ် ၁၂ လုံးနဲ့ စာသင်ကျောင်း ၂ ကျောင်း၊ အနောက်အုံရွာက နေအိမ် ၁ လုံး၊ ကျောက်ပြင်ကန်ရွာက အိမ် ၁၀ လုံး၊ ယာတောကြီးရွာက အိမ် ၁၀ လုံးခန့်၊ ဇီးစမြင်ရွာက ၁၅ လုံးခန်နဲ့ မြောင်ရွာက အခြေနေကိုတော့ စုံစမ်းနေဆဲဖြစ်တယ်လို့ ဆိုပါတယ်။

စစ်ကြောင်းဝင်မီးရှို့နေလို့ အိမ်ခြေ ၁၀၀ ကျော်ကနေ ၅၀၀ ခန့်ရှိတဲ့ ရွာတွေဖြစ်တဲ့ ချောင်းရှည်၊ ယာတောကြီး၊ ဇီးစမြင်၊ ကျောက်ပြင်ကန်၊ ဂျိုးကန်၊ စခါး၊ မြောင်၊ ရွှေကဖြူ၊ ကြအို၊ မြေသန့်တောင်၊ မအူပင်၊ ပျော်ဘွယ်၊ ရွာသာ၊ ညောင်လှ၊ ပြင်းချောင်း၊ လယ်ကန်၊ ကန်သာ၊ ကံကြီးကုန်းရွာတွေအပါအဝင် ဒေသခံ ၂ သောင်းကျော်လောက် ထွက်ပြေးနေရတယ်လို့ သိရပါတယ်။

ပြီးခဲ့တဲ့ ဇူလိုင် ၁ ရက်ကလည်း စစ်ကောင်စီစစ်ကြောင်းက မောင်းဂွက်တောနဲ့ ရွာပုလဲ ကျေးရွာတို့ကိုမီးရှို့ခဲ့ရာ နေအိမ် ၃၀ ကျော်မီးလောင်ပျက်စီးခဲ့ပြီး ဒေသခံ ၁,၅၀၀၀ ကျော် ထွက်ပြေးခဲ့ရပါသေးတယ်။

စာတည်း – လင်း

ညောင်ဦး၊ ဇွန် ၁၆၊ ၂၀၂၅။

မန္တလေးတိုင်း၊ ညောင်ဦးမြို့နယ်၊ ညောင်ပင်ကန်ကျေးရွာမှာ ကျောင်းအုပ်ဆရာမနဲ့ ခင်ပွန်းဖြစ်သူတို့ ပစ်သတ်ခံရတယ်လို့ ညောင်ဦးမြို့နယ်ပြည်သူ့ကာကွယ်ရေးက သိရပါတယ်။

ပစ်သတ်ခံရသူတွေက ညောင်ပင်ကန် အထက်တန်းကျောင်းခွဲ ကျောင်းအုပ်ဆရာမ အသက် ၄၂ နှစ်အရွယ်ရှိ ဒေါ်နီလာဝင်း၊ ခင်ပွန်းဖြစ်သူ အသက် ၄၅ နှစ်အရွယ်ရှိ ဦးဇော်လတ်တို့ဖြစ်ပြီး ဇွန် ၁၅ ရက် မနက် ၉ နာရီခန့်မှာ ကျောင်းဝင်းအတွင်းရှိ ဝန်ထမ်းလိုင်းခန်းအရှေ့မှာ ပစ်သတ်ခံရတာလို့ဆိုပါတယ်။

” **တွေနဲ့ပေါင်းပြီး ရွာကိုလည်း ဘယ်သူမှဂရုမစိုက်ဘူးဆိုတဲ့သဘော။ သူ့ရဲ့ဆွေမျိုးတွေကလည်း အရာရှိပိုင်းတွေထဲကဆိုတော့ နည်းနည်း ကျောင်းကသူဖွင့်ချင်ဖွင့်မယ်ဆိုပြီး အာချောင်နေတာ။ အဲ့လိုကြောင့်ဝင်ရှင်းလိုက်တာလို့တော့ သိရတယ်”လို ညောင်ဦးမြို့နယ်ပကဖတာဝန်ခံ ကိုဇီးက ပြောပါတယ်။

ပစ်သတ်ခံရသူ ဆရာမက စစ်ကောင်စီတပ်ဖွဲ့ဝင်တွေကို ကျောင်းကိုမကြာခဏခေါ်တတ်တယ်လို့ သိရပြီး ဒီပစ်ခတ်မှုကိုဘယ်အဖွဲ့အစည်းကလုပ်တယ်ဆိုတာမသိရသေးဘူးလို့ သူကဆက်ပြောပါတယ်။

သေနတ်နဲ့ပစ်ခတ်ခံရတာကြောင့် ကျောင်းအုပ်ဆရာမလင်မယားမှာ ဦးခေါင်းကျည်ထိဒဏ်ရာတွေနဲ့ နေရာမှာတင်သေဆုံးခဲ့တာလို့ သိရပါတယ်။

ဇွန် ၉ ရက်ကလည်း ညောင်ဦးမြို့နယ်၊ ဒဟတ်ကန်ကျေးရွာမှ ရာအိမ်မှူး ၁ ဦး၊ ကြံ့ခိုင်ရေးပါတီဝင် ၂ ဦး စုစုပေါင်း ၃ ဦးနေအိမ်တွေမှာရှိနေချိန် ပစ်သတ်ခံရလို့ သေဆုံးသွားတယ်လို့ ဒေသကာကွယ်ရေး အဖွဲ့ဝင်တွေဆီက သိရပါတယ်။

စာတည်း – လင်း

ညောင်ဦး၊ ဇွန် ၁၀၊ ၂၀၂၅။

မန္တလေးတိုင်း၊ ညောင်ဦးမြို့နယ်၊ ဒဟတ်ကန်ကျေးရွာမှာ ကျေးရွာရာအိမ်မှူး ၁ ဦးနဲ့ ကြံ့ခိုင်ရေးပါတီဝင် ၂ ဦး သေနတ်နဲ့ပစ်သတ်ခံခဲ့ရတယ်လို့ ဒေသကာကွယ်ရေးအဖွဲ့ဝင်တွေထံက သိရပါတယ်။

ပစ်သတ်ခံရသူတွေက ဒဟတ်ကန်ကျေးရွာ ရာအိမ်မှူး အသက် ၅၈ နှစ်အရွယ် ဦးတင်စိုး၊ အဆိုပါကျေးရွာနေ ရပ်ကျေးကြံ့ခိုင်ရေးပါတီဝင်တွေဖြစ်တဲ့ ၅၂ နှစ်အရွယ် ဦးဝင်းနိုင်၊ ၃၃ နှစ်အရွယ် ဦးချမ်းသာတို့ဖြစ်ပြီး ဇွန် ၉ ရက် ယမန်နေ့မနက် ၉ နာရီကျော်မှာ နေအိမ်တွေမှာရှိနေချိန် ပစ်သတ်ခံရတာလို့ ဆိုပါတယ်။

” အဲ့ဘက်ခြမ်းမှာ စခန်းတွေဝင်စီးခံရတာကော သေနတ်တွေ ဆုံးရှုံးခံရတာတွေအရင်ကရှိခဲ့တယ်။ ခုဟာ အရင်ကတိုင်တဲ့ ဒလန်တွေ၊ ပျုတွေကို ရှင်းတာလို့တော့ သိရတယ်”လို့ ဒေသအခြေစိုက်ကာကွယ်ရေးအဖွဲ့တာဝန်ရှိသူတဦးက မြေလတ်အသံကို ပြောပါတယ်။

သေနတ်နဲ့ပစ်ခံရတာတွေကြောင့် ရာအိမ်မှူးနဲ့ကြံ့ခိုင်ရေးပါတီဝင် ၂ ဦးတို့မှာ ဦးခေါင်းနဲ့ရင်ဘတ်တွေမှာ ကျည်ထိဒဏ်ရာတွေနဲ့နေရာမှာပဲ သေဆုံးသွားကြတယ်လို့ သိရပါတယ်။

အဆိုပါ ပစ်ခတ်မှုနဲ့ပတ်သက်ပြီး ညောင်ဦးမြို့နယ်ပကဖတာဝန်ခံထံ မြေလတ်အသံက ဆက်သွယ်ခဲ့ရာ ၎င်းမှာ ခရီးထွက်နေတာကြောင့် အခြေအနေကို မသိရှိသေးဘူးလို့ ဆိုပါတယ်။

စစ်ကောင်စီထောက်ခံတယ်လီဂရမ်တွေမှာတော့ ရာအိမ်မှူးနဲ့ကြံ့ခိုင်ရေးပါတီဝင်တွေကို PDF ၈ ဦးက လာရောက်ပစ်သတ်ခဲ့လို့ သေဆုံးခဲ့ရပြီး ဦးဝင်းနိုင်ပိုင်ဆိုင်တဲ့ ကား ၂ စီးကိုလည်း ယူဆောင်သွားကြတယ်လို့ ရေးသားဖော်ပြထားကြပါတယ်။

ဇွန် ၁ ရက်ကလည်း ညောင်ဦးမြို့နယ်၊ ပုဂံမြို့သစ်၊ ဂန့်ဂါရပ်ကွက် ဇရပ်မှာရှိနေတဲ့ အုပ်ချုပ်ရေးမှူးအဖွဲ့ကို ထနောင်းမြေစစ်ကြောင်းအဖွဲ့ဝင်တွေက ဝင်ရောက်ပစ်ခတ်ခဲ့လို့ အုပ်ချုပ်ရေးမှူးအပါအဝင် ၈ ဦး သေဆုံးခဲ့ပြီး လက်နက်အချို့ သိမ်းဆည်းရမိခဲ့တယ်လို့ သိရပါတယ်။

စာတည်း – ဟိန်းစံ