မြေလတ်အသံ၊ ဇူလိုင် ၁၃၊ ၂၀၂၅။

နေပြည်တော်၊ ဇေယျာသီိရိမြို့နယ်အခြေစိုက် အမှတ် ၂ အဆင့်မြင့်ဆက်သွယ်မှုတပ်ရင်း (အဆရ ၂) က စစ်ကောင်စီတပ်ဖွဲ့ဝင် ၁ ဦး ဘက်ပြောင်းခိုလှုံလာခဲ့တယ်လို့ ဝက်လက်မြို့နယ်ပကဖထံက သိရပါတယ်။

ခိုလှုံလာသူမှာ အဆရ ၂ မှ အသက် ၂၄ နှစ်အရွယ် တပ်သား မိုးကောင်း ဖြစ်ပြီး သူဟာ ဇွန် ၃၀ ရက်မှာ ဝက်လက်ပကဖထံချိတ်ဆက်ကာ နေပြည်တော်တပ်ကနေ စွန့်ခွာထွက်ပြေးလာခဲ့ပြီးနောက် ဇူလိုင် ၁ ရက်မှာ ရောက်ရှိလာခဲ့တာလို့ ဆိုပါတယ်။

” သူ့မိသားစုတွေက ဝက်လက်မြို့နယ်မှာ နေထိုင်ပါတယ်။ သူ့မိသားစုကနေတဆင့် ကျနော်တို့ ဝက်လက်မြို့နယ်ပကဖကို ချိတ်ဆက်ပြီးတော့ သူအလင်းဝင်မယ်ဆိုတဲ့အကြောင်းကို ချိတ်ဆက်ပြီးတော့ လုပ်ဆောင်တာပါ” လို့ ဝက်လက်မြို့နယ်ပကဖသတင်းတာဝန်ခံ အလင်းရောင်က မြေလတ်အသံကို ပြောပါတယ်။

တပ်သား မိုးကောင်း ဟာ ဝက်လက်မြို့နယ်ဇာတိဖြစ်ပြီး ပြီးခဲ့တဲ့ ၂၀၁၉ မှာ ဝက်လက်ကနေ လားရှိုးမြို့ကိုသွားရောက် အလုပ်လုပ်ကိုင်နေချိန် သူနေထိုင်တဲ့ မန်ဆူဘုန်းကြီးကျောင်းမှာ စစ်ကောင်စီတပ်သားတွေရဲ့ ခေါ်ဆောင်သွားမှုခံရပြီးနောက် စစ်ကောင်စီတပ်အတွင်းရောက်ရှိသွားခဲ့ကာ ၂၀၂၀ မှာ သပိတ်ကျင်းစု ဆောင်းရေးတပ်ကတဆင့် စစ်သင်တန်းကျောင်းကို ပို့ဆောင်ခံခဲ့ရတာဖြစ်တယ်လို့ ၎င်းရဲ့ပြောဆိုမှုတွေကိုကိုးကားပြီး အထက်ပါသတင်းတာဝန်ခံက ပြောပါတယ်။

လက်ရှိမှာ တပ်သား မိုးကောင်းကို စစ်ဆေးမှုတွေဆက်လက်လုပ်ဆောင်နေပြီး မိသားစုနဲ့အတူ လူအခွင့်အရေးနဲ့အညီ ဘေးကင်းလုံခြုံစွာထားရှိထားတယ်လို့ ကိုအလင်းရောင်က ဆိုပါတယ်။

၂၀၂၄ ဒီဇင်ဘာ ၁၂ ရက်ကလည်း ကချင်ပြည်နယ်၊ ကာမိုင်းမြို့မှာ တိုက်ခိုက်ရေးဝင်ရောက်နေတဲ့ စစ်ကိုင်းအခြေစိုက် တပ်မ ၃၃ လက်အောက် နည်းဗျူဟာ ၃၃၂ က ရဲမာန်အောင်စစ်ဆင်ရေးမှာ တာဝန်ထမ်းဆောင်ခဲ့တဲ့ အသက် ၃၀ အရွယ် စစ်ကောင်စီတပ်သားတဦး ဘက်ပြောင်းခိုလှုံလာခဲ့တယ်လို့ သိရပါတယ်။

စာတည်း – ဟိန်းစံ

မုံရွာ၊ မေ ၂၉၊ ၂၀၂၅။

စစ်ကိုင်းတိုင်း၊ မုံရွာမြို့အခြေစိုက် အနောက်မြောက်တိုင်းစစ်ဌာနချုပ် – နမခ က စစ်ကောင်စီတပ်သား ၂ ဦး မေ ၂၇ ရက်မှာ ပြည်သူ့ကာကွယ်ရေးအဖွဲ့ထံ လက်နက်နဲ့အတူဘက်ပြောင်းခိုလှုံလာတယ်လို့ CDM တွေကိုကူညီမှုပေးနေတဲ့ ဒို့အရေးချန်နယ်အဖွဲ့ဆီက ပြောပါတယ်။

အဆိုပါစစ်ကောင်စီတပ်သား ၂ ဦးဟာ ဒို့အရေးချန်နယ်အတွင်းရေးမှူးဆီချိတ်ဆက်ကာ ဘက်ပြောင်းလာကြသူတွေဖြစ်ပြီး သူတို့နဲ့ပတ်သက်တဲ့ အသေးစိတ်အချက်အလက်တွေကို လုံခြုံရေးအရထုတ်ပြောလို့မရသေးဘူးလို့ ဆိုပါတယ်။

“သူတို့က အကြိမ်ကြိမ် စကစ အလစ်ကိုချောင်းပြီး ကျနော်တို့ ချန်နယ်နဲ့ချန်နယ်ရဲ့ အတွင်းရေးမှုး ရွေဂျူး ထံ ချိတ်ဆက်အလင်းဝင်လာခဲ့တာပါ။ ကျနော်တို့က သူတို့ကိုရပ်/ကျေးပကဖ အဖွဲ့နဲ့ချိတ်ဆက် ဆောင်ရွက်ပေးခဲ့တာပါ”လို့ ဒို့အရေးချန်နယ်မှ ဥက္ကဋ္ဌ ဦးလှမြင့်(ခ)ငြိမ်းချမ်းအောင်က ပြောပါတယ်။

အဲ့ဒီတပ်သား ၂ ဦးဟာ တာဝန်ကျနေတဲ့ နမခ ကနေထွက်ပြေးလာချိန် ရပ်/ကျေးပြည်သူ့ ကာကွယ်ရေး အဖွဲ့တဖွဲ့ကသွားရောက်ခေါ်ဆောင်ခဲ့ကြတာလို့ ဦးလှမြင့်က ဆက်ပြောပါတယ်။

ဒါ့အပြင် သူတို့နဲ့အတူ MA1 အမျိုးအစားသေနတ် ၂ လက်၊ ၃၆ ခွင်းဗုံး ၂ လုံး၊ နင်းမိုင်း ၂ လုံး၊ ၅ ဒသမ ၅၆ ကျည် အတောင့် ၂၀၀ တို့ပါရှိလာခဲ့တယ်လို့ သိရပါတယ်။

သူတို့တွေဟာ စစ်ကောင်စီတပ်ရဲ့အဓမ္မဖမ်းဆီးခံရပြီးနောက် ရန်ကုန်မှာ စစ်မှုထမ်းအပတ်စဥ် (၈) တက်ရောက်ခဲ့ကာ အဲ့ဒီနောက်မှာ နမခကိုတာဝန်ကျပို့ဆောင်ခံခဲ့ရတာလို့ ဦးလှမြင့်က ပြောပါတယ်။

ဒို့အရေးချန်နယ်ဟာ CDM တွေကို တတ်နိုင်သလောက်ကူညီထောက်ပံ့ပေးဖို့ လုပ်ဆောင်ထားတဲ့ အဖွဲ့အစည်းတခုဖြစ်ပြီး အဖွဲ့သူ/သားတွေအားလုံးဟာလည်း CDM ဝန်ထမ်းတွေဖြစ်ကြတယ်လို့ ဦးလှမြင့်က ပြောပါတယ်။

လက်နက်ခဲယမ်းတွေနဲ့အတူ အခုလိုအလင်းဝင်ရောက်ခဲ့တဲ့ စစ်ကောင်စီတပ်သား ၂ ဦးကို ဆုငွေချီးမြှင့်ပေးချင်တာကြောင့် လိုအပ်နေတဲ့ငွေကြေးကိုလည်း ထောက်ပံ့ပေးကြဖို့ ဦးလှမြင့်က တောင်းဆိုထားပါတယ်။

စာတည်း – လင်း

စလင်း၊ ဧပြီ ၅၊ ၂၀၂၅။

မကွေးတိုင်း၊ စလင်းမြို့နယ်မှာဝင်ရောက်နေတဲ့ စစ်ကောင်စီစစ်ကြောင်းကထွက်ပြေးလာတဲ့ စစ်ကောင်စီတပ်သား ၁ ဦးကို ဧပြီ ၅ ရက်မှာဖမ်းမိခဲ့တယ်လို့ ဒေါင်းညီနောင်မြို့ပြပြောက်ကျားတပ်ဖွဲ့ဆီက သိရပါတယ်။

ဖမ်းမိသူဟာ ပခုက္ကူတပ်မ ၁၀၁ လက်အောက်ခံ ခလရ ၂၃၅ ကအသက် ၂၁ နှစ်အရွယ် တပ်သားချစ်ဖွေးဖြစ်ပြီး စလင်းမြို့နယ်၊ ပုသိမ်-မုံရွာလမ်းနဲ့ ကံပြား-ကျွန်းတောလမ်းကြားမှာ ကင်းပုန်းဝပ်ကာကွယ်ရေးတပ်ဖွဲ့ဝင်တွေက ဖမ်းမိခဲ့တာလို့ ဆိုပါတယ်။

“သူကဒီဘက် (စလင်း)ကို စစ်ကူလာရတာ၊ ဒီဘက်ကိုရောက်တာ ၄ ရက်ပဲရှိသေးတယ်၊ လက်နက်ခဲယမ်းတွေ မပါဘူးဗျ၊ လူချည်းပဲဖမ်းဆီးမိတာ” လို့ ဒေါင်းညီနောင်မြို့ပြပြောက်ကျားခေါင်းဆောင်ဗိုလ်သတ္တိက ပြောပါတယ်။

ချစ်ဖွေးဟာ ၂၀၂၄ စက်တင်ဘာ ၈ ရက်က ဟုမ္မလင်းလေယာဥ်ကွင်းမှာ ပေါ်တာဆွဲခံခဲ့ရပြီး စစ်သင်တန်း ၁ လတက်ခဲ့ပြီးနောက် စစ်ကောင်စီတပ်သားဖြစ်လာတာလို့ ဆိုပါတယ်။

“ဟုမ္မလင်းလေယာဉ်ကွင်းမှာ သူပေါ်တာဆွဲခံရတာ၊ ရမည်းသင်းမှာ သင်တန်းတက်ခဲ့ရတာ၊ အပတ်စဉ် ၆ သင်တန်းဆင်းဗျ၊ ၁ လပဲ သင်တန်းတက်ခဲ့ရတယ်” လို့ တပ်သားချစ်ဖွေးရဲ့ပြောပြချက်ကို ဗိုလ်သတ္တိက ပြန်ပြောပါတယ်။

ဒါ့အပြင် သူဟာပေါ်တာဆွဲမခံရခင်က ဒေသခံကာကွယ်ရေးတပ်ဖွဲ့တွေထဲမှာ တာဝန်ထမ်းဆောင်ဖူးတယ်လို့လည်း ဆိုပါတယ်။

လက်ရှိမှာတော့ တပ်သားချစ်ဖွေးကို ဒေါင်းညီနောင်မြို့ပြပြောက်ကျာ်းတပ်ဖွဲ့မှာ စောင့်ရှောက်ထားကာ သူ့ဇာတိကိုပြန်ဖို့တောင်းဆိုထားတယ်လို့လည်း သိရပါတယ်။

သတင်း – ဒိန်းဂျား၊ စာတည်း – လင်း

ပဲခူး၊ ဒီဇင်ဘာ ၂၇၊ ၂၀၂၂။

ပဲခူးတိုင်းအနောက်ခြမ်း၊ ရွှေတောင်မြို့နယ်ထဲက စစ်ကောင်စီစစ်ဆေးရေးဂိတ်ကို ဒီဇင်ဘာလ ၂၇ ရက်ဒီမနက် ၉ နာရီခွဲလောက်က ဗုံးခွဲတိုက်ခိုက်ခဲ့တယ်လို့ Bago Regin PDF က သတင်းထုတ်ပြန်ထားပါတယ်။

ရွှေတောင်မြို့နယ်၊ ရှားတိုင်းအုပ်စု၊ ပွဲသာရွာထိပ်က စစ်ကောင်စီစစ်ဆေးရေးဂိတ်ကို ပြည်ခရိုင်တပ်ရင်း ၃၆၀၁၊ တပ်ခွဲ ၅ နွေဦးအဖွဲ့က နန်းထိုက်အောင်စစ်ဆင်ရေးအဖြစ် တိုက်ခိုက်ခဲ့တယ်လို့ ဆိုပါတယ်။

“ပွဲသာရွာထိပ်က ဆိုင်ကယ်စစ်တဲ့ ရဲလေးယောက်ကို ဗုံးခွဲလိုက်တယ်။ ဗုံး၂ လုံးနဲ့ခွဲလိုက်တာ။ သေဆုံးတယ်လည်းကြားတယ်၊ တော်လှန်ရေးရဲဘော်တွေကတော့ အန္တရာယ်ကင်းတယ်”လို့ နွေဦးတပ်ဖွဲ့ဝင်တဦးကပြောပါတယ်။

အဲဒီစစ်ဆေးရေးဂိတ်ကတပ်သားတွေဟာ ပြည်သူတွေအပေါ်ဆိုင်ကယ်ဖမ်း စစ်ဆေးတာ၊ ငွေတောင်းခံတာ၊ မပေးနိုင်ပါက ဆိုင်ကယ်ကိုသိမ်းဆည်းတဲ့အပြင် လူကိုပါထောင်ချတာတွေကို ပြုလုပ်နေတာကြောင့် ခုလိုတိုက်ခိုက်ခဲ့တာလို့လည်း ဆိုထားပါတယ်။

တိုက်ခိုက်မှုကြောင့် စစ်ကောင်စီတပ်သား ၁ ဦးသေဆုံးခဲ့ပြီး၊ အဲ့ဒီအလောင်းကိုမသယ်သွားခင်မှာ ဂိတ်ထဲကနေ စစ်သားတွေက လက်နက်တွေနဲ့ရမ်းသမ်းပစ်ခတ်တာတွေလုပ်ဆောင်ခဲ့သေးတယ်လို့ ထုတ်ပြန်ချက်မှာဖော်ပြထားပါတယ်။

ဒီသေဆုံးမှုနဲ့ပက်သက်ပြီး မြေလတ်အသံက သီးခြားအတည်ပြုနိုင်ခြင်းမရှိသေးပါဘူး။

အလားတူဒီဇင်ဘာလ ၂၇ ရက်ဒီမနက် ၁၀ နာရီခွဲဝန်းကျင်ကလည်း ပဲခူးတိုင်းအနောက်ခြမ်း၊ သာယာဝတီမြို့နယ်၊ သုံးဆယ်မြို့၊ ဖိုးခေါင်လမ်းမ စိန်သဇင်စက်သုံးဆီအရောင်းဆိုင်အနီးမှာ ဆိုင်ကယ်ဖမ်းပြန်လာတဲ့ ရဲကား ၂ စီးကို သာယာဝတီဂဠုန်တပ်ဖွဲ့က အဝေးထိန်းမိုင်းနဲ့ တိုက်ခိုက်ခဲ့ပါသေးတယ်။