ရေတာရှည်၊ ဇူလိုင် ၁၂၊ ၂၀၂၅။

ပဲခူးတိုင်း၊ ရေတာရှည်မြို့နယ်မှာ သိုင်းချောင်း တောင်ကျရေကြောင့် နေအိမ် ၅၀ ကျော်ရေထဲမျောပါပြီး ဒေသခံပြည်သူ ၅၀၀ ကျော်ရေဘေးရှောင်နေရတယ်လို့ ကူညီကယ်ဆယ်ရေး လုပ်ဆောင်ပေးနေသူတွေဆီက သိရပါတယ်။

မိုးသည်းထန်စွာရွာသွန်းပြီး သိုင်းချောင်းတောင်ကျရေ စီးဆင်းလာတာကြောင့် ရန်ကုန်-မန္တလေးအမြန်လမ်းဟောင်း မိုင်တိုင် ၁၆၇ နဲ့ ၁၆၉ မိုင်အကြားရှိ ၆ မိုင်၊ ၇ မိုင်နဲ့ ဇီးဖြူပင်ရွာတွေက နေအိမ်တွေ ဇူလိုင် ၁၂ ရက် မနက်ပိုင်းမှာ ရေထဲမျောပါကုန်တယ်လို့ ဆိုပါတယ်။

“တောင်ကျရေပေါ့ သာဂရအနောက်ဘက် အမြန်လမ်းအနောက်ဘက်က တောင်တွေကိုး။ မနေ့က ညကတည်းက မိုးအရမ်းရွာလိုက်တော့ တောင်ကျရေတွေစီးလာတာကိုး။ ရွာတွေမှာရှိတဲ့အိမ်တွေက ရေစီးတအားသန်တော့ ပါကုန်တာ။”လို့ ကူညီကယ်ဆယ်ရေးလုပ်ဆောင်ပေးနေသူတဦးက ပြောပါတယ်။

ရေစီးသန်တာကြောင့် ၆ မိုင်ရွာက နေအိမ် ၂၀ ကျော်၊ ၇ မိုင်ရွာက နေအိမ် ၈ လုံး၊ ဇီးဖြူပင်ရွာက နေအိမ် ၂၅ လုံးကျော် မျောပါသွားသလို အိမ်တွင်းပစ္စည်းတွေလည်း ပါကုန်တယ်လို့ ဆိုပါတယ်။

မျောပါသွားတဲ့နေအိမ်အများစုဟာ ဖက်မိုး၊ ထရံကာနေအိမ်တွေဖြစ်ပြီး လူတွေကတော့ အချိန်မီ ရွှေ့ပြောင်းနိုင်လိုက်တာကြောင့် လူထိခိုက်သေဆုံးတာမရှိခဲ့ဘူးလို့ အထက်ပါကူညီပေးနေသူက ဆက်ပြောပါတယ်။

၆ မိုင်ရွာမှာ အိမ်ခြေ ၄၀ ခန့်၊ ၇ မိုင်ရွာမှာ အိမ်ခြေ ၃၀ ကျော်၊ ဇီးဖြူပင်ရွာမှာ အိမ် ၅၀ ကျော်ရှိကာ လက်ရှိမှာ ရေဘေးရှောင်တွေအတွက်က စားသောက်စရာတွေနဲ့ နေအိမ်တွေမျောပါသွားတာကြောင့် နေအိမ်တွေပြန်ဆောက်ဖို့ အကူအညီတွေလိုအပ်နေတယ်လို့ သိရပါတယ်။

လက်ရှိအချိန်ထိ တောင်ကျရေက ဆက်လက်စီးဆင်းနေတာကြောင့် ကျေးရွာအနိမ့်ပိုင်းတွေမှာ ရေအမြင့် ၆ ပေ၊ အမြင့်ပိုင်းတွေမှာတော့ ၂ ပေကျော်ရေတက်နေပြီး ဒေသခံ ၅၀၀ ကျော်လောက်ကတော့ ၆ မိုင်ကျေးရွာဘုန်းကြီးကျောင်းမှာဖွင့်လှစ်ထားတဲ့ ရေဘေးကယ်ဆယ်ရေးစခန်းမှာ ပြောင်းရွှေ့နေကြရတယ်လို့ ဆိုပါတယ်။

ဒါ့အပြင် ရန်ကုန်-မန္တလေး လမ်းဟောင်း မိုင်တိုင် ၁၆၇ မှ ၁၆၉ အကြားကားလမ်းပေါ်မှာ ရေ ၂ ပေခန့်ကျော်နေကာ ကားတွေကတော့ပုံမှန်သွားလာနေကြတယ်လို့ သိရပါတယ်။

စာတည်း – လင်း

တောင်ငူ၊ ဇွန် ၂၀၊ ၂၀၂၅။

ပဲခူးတိုင်း၊ တောင်ငူမြို့နယ်မှာ ခပေါင်းချောင်းရေလျှံလာတဲ့အတွက် ဒေသခံရာချီ‌ရွှေ့ပြောင်းနေရတယ်လို့ ကူညီကယ်ဆယ်ရေးပြုလုပ်ပေးနေသူတွေဆီက သိရပါတယ်။

မိုးသည်းထန်စွာရွာသွန်းတဲ့အတွက် ဆည်ရေလွှတ်ပြီး ချောင်းရေလည်းလျှံလာတာကြောင့် ဇွန် ၂၀ ရက် ဒီမနက် ၁ နာရီ မထိုးခင်ကတည်းက ရေတက်လာတာကြောင့် တောင်ငူ-ကင်းဆိပ်ကျေးရွာ သွားလမ်းဘေးက ဒေသခံတွေ နေရာရွှေ့ပြောင်းနေရတာလို့ ဆိုပါတယ်။

“ယာယီရေကြီးတာပါ။ လောလောဆယ်တော့နည်းနည်းပြန်ကျနေပြီး။ အဲဒီရေက အနိမ့်ပိုင်းတွေ စီးနေတယ်။ ရွှေ့ပြောင်းရတာက ရွှေဝါဆီပန့်ကနေ ကင်းဆိပ်ဘက်သွားတဲ့ လမ်းဘေးအနိမ့်ပိုင်းက လူတွေက အရေးကြီးစာရွက်စာတမ်းတွေ၊ သက်ကြီးကလေးတွေ ယာယီရွှေ့တာပါ။ အရမ်းကြီးစိုးရိမ်စရာမရှိသေးဘူး။ နောက်တကြိမ်ထပ်တက်ရင်တော့မပြောတတ်ဘူး။”လို့ ကူညီကယ်ဆယ်ရေး လုပ်ဆောင်ပေးနေသူတဦးက ပြောပါတယ်။

ရေကြီးရေလျှံတာတွေဖြစ်လာလို့ အနိမ့်ပိုင်းကျေးရွာတွေမှာ ရေအမြင့်ပေ ၃ ကျော်လောက်ထိ မြင့်တက်လာနေပြီး ကလေးငယ်တွေနဲ့သက်ကြီးပိုင်းတွေက နီးစပ်ရာကုန်းမြင့်ပိုင်းတွေဘက်ကို ပြောင်းရွေ့နေရတယ်လို့ ဆိုပါတယ်။

လက်ရှိမှာ အိမ်ခြေ ၂၀၀ ကနေ ၄၀၀ ကြားရှိ ကင်းဆိပ်၊ ဇီးပင်သာ၊ ဆင်ဆိပ်၊ အုန်းပင်စု၊ သျှားယာကုန်း၊ ပွတ်စု၊ ကုက္ကိုင်ပင်စုရွာက ဒေသခံ ၇၀၀ ဝန်းကျင်ရွေ့ပြောင်းနေကြရတယ်လို့ သိရပါတယ်။

ရေဝင်တဲ့ကျေးရွာတွေက ဒေသခံတွေကို လူမှုကူညီရေးအသင်းတွေနဲ့ မီးသတ်တပ်ဖွဲ့ဝင်တွေက နေရာရွေ့ပြောင်းဖို့ကူညီဆောင်ရွက်ပေးနေကြတယ်လို့ ဆိုပါတယ်။

ပြီးခဲ့နှစ်ကလည်း တောင်ငူမြို့နယ်မှာ စစ်တောင်းမြစ်ရေတက်တဲ့အတွက် ရေဘေးသင့်မှု ၄ ကြိမ်ဖြစ်ခဲ့ပြီး ဒေသခံပြည်သူသောင်းချီရေဘေးသင့်ခဲ့ရပါသေးတယ်။

စာတည်း – လင်း