မြေလတ်အသံ၊ ဇန်နဝါရီ ၃၀၊ ၂၀၂၅။

အရာတော်မြို့နယ်၊ ငွေတွင်းကျေးရွာအခြေစိုက် ပျူစောထီး(ပြည်သူ့စစ်)စခန်းက ပစ်လိုက်တဲ့ ၈၁ မမ လက်နက်ကြီးကျည်စထိမှန်ပြီး ကလေး ၁ ဦးနဲ့ အမျိုးသမီး ၂ ဦး ထိခိုက်ဒဏ်ရာရှိခဲ့ပါတယ်။

ဇန်နဝါရီ ၂၈ ရက် ညနေ ၄ နာရီလောက်က ငွေတွင်းကျေးရွာကနေ ၁ မိုင်ခန့်အကွာ မြေနက်ကျေးရွာကို စစ်ရေးလှုပ်ရှားမှုမရှိဘဲ ၈၁ မမလက်နက်ကြီး ၂ လုံးနဲ့ ပစ်ခတ်ခဲ့တာလို့ အရာတော်မြို့နယ် ဒေသခံပြည်သူ့ကာကွယ်ရေးတပ်ဖွဲ့က တာဝန်ရှိသူတစ်ဦးက မြေလတ်အသံကို ပြောပြပါတယ်။

စစ်ရေးလှုပ်ရှားမှုမရှိတဲ့အတွက် နေ့စဥ်ပုံမှန်သွားလာနေကြတဲ့ မြေနက်ကျေးရွာက အသက် ၉ နှစ်အရွယ် ကလေးငယ် ၁ ဦးနဲ့ အသက် ၅၀ ကျော်အရွယ် အမျိုးသမီး ၂ ဦးတို့ ဒဏ်ရာရရှိခဲ့ပြီး ဆေးကုသမှုခံယူနေရတယ်လို့ ပြောပါတယ်။

“ခြေထောက်တွေထိသွားတာ။ နောက်တယောက်ကတော့ ခါးဖောက်ဝင်သွားတာ။ အငယ်ဆုံးတယောက်ကတော့ ပါးမှာ အရေပြားကြီး လန်သွားတယ်။” လို့ အရာတော်မြို့နယ် ဒေသခံပြည်သူ့ကာကွယ်ရေးတပ်ဖွဲ့က တာဝန်ရှိသူတစ်ဦးက ပြောပါတယ်။

အရင်ကလည်း ငွေတွင်းကျေးရွာဘက်က လက်နက်ကြီးတွေနဲ့ ပစ်လေ့ရှိတဲ့အတွက် အရပ်သားတွေ ထိခိုက်ဒဏ်ရာရခဲ့ဖူးပါတယ်။

ငွေတွင်းကျေးရွာမှာ စစ်ကောင်စီတပ်ဖွဲ့ဝင်တွေနဲ့ ပျူစောထီးတွေက ခံစစ်စခန်းနဲ့ အခိုင်အမာတပ်စွဲထားတာဖြစ်ပြီး သူတို့စခန်းထဲကနေ လက်နက်ကြီးနဲ့ အကြောင်းမဲ့ ပစ်ခတ်တာဖြစ်တယ်လို့ ပြောပါတယ်။

ငွေတွင်းကျေးရွာက ပျူစောထီးအဖွဲ့ဝင်တွေနဲ့ စစ်ကောင်စီတပ်ဖွဲ့တွေကို တော်လှန်ရေးအင်အားစုတွေက ဝိုင်းဝန်းပြီးတော့ ပိတ်ဆို့ဖြတ်တောက်မှုတွေ လုပ်ဆောင်နေကြတာရှိပါတယ်။

၂၀၂၅ နှစ်စအထိ ငွေတွင်းကျေးရွာက ပျူစောထီးတွေရဲ့ ဖိနှိပ်မှုဒဏ်တွေကြောင့် ထွက်ပြေးခိုလုံလာသူ အရပ်သားပြည်သူ စုစုပေါင်း ၃,၀၀၀ ဝန်းကျင်ရှိပါတယ်။

သတင်း – ငြိမ်းချမ်းမေ၊ စာတည်း – ဈာန်မြင့်

ကျော်စွာ၊ သိုက်ထွန်း။

စစ်ကိုင်း၊ ဇန်နဝါရီ ၂၂၊ ၂၀၂၅။

စစ်ကိုင်းတိုင်း၊ ဘုတလင်မြို့နယ်၊ ရွာရှည်ကျေးရွာမှာ မုံရွာ-နမခကနေပစ်တဲ့ လက်နက်ကြီးကျည် ကျရောက်ပေါက်ကွဲလို့ ၆ နှစ်အရွယ်ကလေးငယ် ၁ ဦးအပါ ၃ ဦး ဒဏ်ရာရပြီး နွား ၂ ကောင် သေဆုံးခဲ့တယ်လို့ ဒေသခံတွေဆီက သိရပါတယ်။

ဇန်နဝါရီ ၂၀ ရက် ညနေ ၇ နာရီဝန်းကျင်မှာ မုံရွာ-နမခနဲ့ ၅ မိုင်အကွာမှာရှိတဲ့ ရွာရှည်ကျေးရွာထဲကို စစ်ကောင်စီတပ်ဖွဲ့ဝင်တွေ ပစ်ခတ်တဲ့ လက်နက်ကြီးကျည် ၂ လုံး ကျရောက်ပေါက်ကွဲခဲ့တယ်လို့ ဆိုပါတယ်။

“လက်နက်ကြီးက ရှပ်ပြေးတောင်ပေါ်ကနေ နေ့တိုင်းပစ်နေတာ။ ၁ ပတ် ၁၀ ရက်လောက်ရှိပြီ။ (ဇန်နဝါရီ ၂၀ ရက်က) ရွာရှည်ရွာပေါ် လက်နက်ကြီး ၂ လုံးကျတယ်။ နမခနဲ့နီးတဲ့ ကျေးရွာတွေကတော့ လောလောဆယ် ရှောင်တိမ်းနေကြရတယ်။” လို့ ဒေသခံတဦးက ပြောပါတယ်။

ကျည် ထိမှန်လို့ ရွာရှည်ရွာက အသက် ၆ နှစ်အရွယ် ကလေးငယ် ၁ ဦး ဘယ်ဘက်လက် တံတောင်ဆစ်ထိ ကြေမွဒဏ်ရာ၊ အသက် ၃၀ အရွယ် အမျိုးသား ၁ ဦးနဲ့ အသက် ၄၀ အရွယ် အမျိုးသမီး ၁ ဦး မစိုးရိမ်ရ ဒဏ်ရာရပြီး နွား ၂ ကောင်သေကာ နွား ၂ ကောင် ထိခိုက်ခဲ့တယ်လို့ သိရပါတယ်။

မုံရွာ နမခထဲကနေ လက်နက်ကြီးပစ်ခတ်ချိန် ၁ ကြိမ်ကို ၃ လုံးကနေ ၈ လုံးထိ ပစ်ခတ်လေ့ရှိပြီး ဘုတလင်၊ ယင်းမာပင်နဲ့ ကနီမြို့နယ်တွေထဲကို ကျရောက်ပေါက်ကွဲကာ လူထိခိုက်သေဆုံးမှုတွေ မကြာခဏဖြစ်တယ်လို့ ဆိုပါတယ်။

ပြီးခဲ့တဲ့ ဇန်နဝါရီ ၁၉ ရက်ကလည်း မုံရွာ နမခနဲ့ ၃ မိုင်ကျော်ဝေးတဲ့ ကျောက်မှော်ကျေးရွာမှာ စစ်ကောင်စီတပ်ဖွဲ့ဝင်တွေကပစ်တဲ့ လက်နက်ကြီးကျည် ကျရောက်ပေါက်ကွဲခဲ့ပြီး စားသုံးဆီစက်ဂိုထောင် ၁ လုံး မီးလောင်ခဲ့တယ်လို့ သိရပါတယ်။

စာတည်း – ချယ်ရီ

စစ်ကိုင်း၊ ဇန်နဝါရီ ၁၆၊ ၂၀၂၅။

စစ်ကိုင်းတိုင်း၊ ယင်းမာပင်မြို့နယ်၊ ကျောက်မှော်ကျေးရွာမှာ ၁၂၀ မမ လက်နက်ကြီး ပစ်ခတ်ခံရလို့ ပြည်သူ ၂ ဦး ထိခိုက်ကာ အိမ် ၅ လုံးပျက်စီးခဲ့တယ်လို့ ဒေသခံတွေဆီက သိရပါတယ်။

ဇန်နဝါရီ ၁၅ ရက် မနေ့ နေ့လည် ၂ နာရီကျော်က မုံရွာ နမခကနေ ထွက်လာတဲ့ စစ်ကြောင်းဟာ ချင်းတွင်းမြစ်တဖက်ကမ်းက ဦးသာပုံကိုင်းကျေးရွာကို ရောက်ချိန် ၁၂၀ မမ လက်နက်ကြီး ၃ လုံး ပစ်ခတ်ခဲ့တာလို့ ဆိုပါတယ်။

“ဦးခေါင်းထိသွားတဲ့လူက ကျောင်းဆရာ၊ သူ့အိမ်ကို ကျောင်းကနေ ခဏဆိုပြီး ပြန်သွားတုန်း အိမ်ရောက်တော့ ထိသွားတာ၊ ကျောင်းမှာလည်း ကလေးတွေက လက်နက်ကြီးသံကြားတော့ ဗုံးခိုကျင်းတွေထဲ အလုအယက်ဝင်ပုန်းကြရတယ်၊ အကြောက်လွန်ပြီး ငိုတဲ့ကလေးတွေကတော့ ငိုနေကြတာပေါ့” လို့ ကျောင်းဆရာမတဦးက ပြောပါတယ်။

ကျောက်မှော်ရွာက အသက် ၃၀ အရွယ် အမျိုးသား ၁ ဦးကတော့ ဦးခေါင်းကို လက်နက်ကြီးစ ထိမှန်ကာ စိုးရိမ်ရပြီး အသက် ၃၅ နှစ်အရွယ် အမျိုးသား ၁ ဦးကတော့ ညာဘက်လက်မှာ မစိုးရိမ်ရ ဒဏ်ရာရခဲ့တယ်လို့ ဆိုပါတယ်။

ဒါ့အပြင် ကျေးရွာထဲက နေအိမ် ၅ လုံးလည်း ပျက်စီးခဲ့ပြီး ဒဏ်ရာပြင်းထန်တဲ့ အမျိုးသားကတော့ နီးစပ်ရာဆေးရုံမှာ ကုသမှုခံယူနေတယ်လို့ သိရပါတယ်။

ဒေသခံတွေနဲ့ ဆက်သွယ်ကာ သတင်းမေးမြန်းနေတဲ့ မနေ့ ညနေ ၅ နာရီခန့်မှာပဲ မုံရွာ နမခရဲ့ ကာကင်းစခန်းတခုဖြစ်တဲ့ ရှပ်ပြေးတောင်ကနေ လက်နက်ကြီးနဲ့ ၂ ကြိမ် ပစ်ခတ်ခဲ့ကာ ကျောက်မှော်ကျေးရွာရဲ့ တရွာကျော်မှာ ကျရောက်ပေါက်ကွဲခဲ့ပြီး ထိခိုက်မှုကတော့ မသိရသေးပါဘူး။

ပြီးခဲ့တဲ့ ဇန်နဝါရီ ၃ ရက်နေ့ကလည်း ကျောက်မှော်ကျေးရွာထဲကို လက်နက်ကြီး ကျရောက်ပေါက်ကွဲလို့ ၄ ဦး ထိခိုက်ကာ ၈၉ နှစ်အရွယ် အဖွားအို ၁ ဦးကတော့ ဘယ်လက် ၁ ဖက် ပြတ်တောက်ခဲ့တယ်လို့ သိရပါတယ်။

စာတည်း – ချယ်ရီ

စစ်ကိုင်း၊ ဇန်နဝါရီ ၁၅၊ ၂၀၂၅။

စစ်ကိုင်းတိုင်း၊ ယင်းမာပင်ခရိုင်၊ ကနီမြို့နယ် ၊ နွားခြံကုန်းရွာမှာ ဒရုန်းဗုံးကျရောက်ပေါက်ကွဲခဲ့လို့ အသက် ၈ နှစ်ဝန်းကျင်ယောက်ျားလေး ၁ ဦး ဒဏ်ရာရရှိကာ နေအိမ် ၁ လုံး ပျက်စီးသွားတယ်လို့ ဒေသခံတဦးထံက သိရပါတယ်။

ဇန်နဝါရီ ၁၄ ရက် မနေ့ညနေ ၄ နာရီလောက်မှာ နွားခြံကုန်းရွာအစပ်၊ သာယာကုန်းဘုရားအနီး ဒရုန်းဗုံးကျရောက်ပေါက်ကွဲခဲ့ပြီး အဆိုပါနေရာအနီးရောက်ရှိနေတဲ့ စက်ပြင်မိသားစုဝင် ၃ ဦးအနက် ၈ နှစ်အရွယ် သားဖြစ်သူကို ဗုံးသီးအစထိမှန်သွားတာလို့ ဆိုပါတယ်။

ဒရုန်းဗုံးသီးစထိမှန်တာကြောင့် အသက် ၈ နှစ်ကလေးရဲ့ ပါးမှာ ဗုံးစထိမှန်ဒဏ်ရာ(မစိုးရိမ်ရ) ရရှိခဲ့ပြီး ဆေးဝါးကုသမှုခံယူနေတယ်လို့ သိရပါတယ်။

အဆိုပါဒရုန်းကို စစ်ကောင်စီတပ်ရဲ့ ရှပ်ပြေးတောင်ကာကင်းစခန်းဘက်က လွှတ်တင်ခဲ့တာလို့ ဒေသခံတွေကပြောပေမယ့် မြေလတ်အသံက သီးခြားအတည်မပြုနိုင်သေးပါဘူး။

“ထွက်တိုင်း (စစ်ကောင်စီတပ်) တိုက်ခိုက်ခံနေရတဲ့အခါကျတော့ အဓိက မကျေနပ်လို့ သတင်းလိုက်ရှာရင်းနဲ့ ဟုတ်ဟုတ်၊ မဟုတ် လိုက်ချနေတာပဲ။ နမခ ကနေထွက်တိုင်း တိုက်ခိုက်ခံနေရတာ တောက်လျှောက် အဲဒါတွေကို သူတို့ကိုယ်တိုင်လည်း စစ်ကြောင်းမထိုးရဲဘူး၊ အတွင်းထဲကနေ ဒီလိုပုံစံပဲလုပ်တော့တာလေ။ အဲ့လိုလုပ်တိုင်း ပြည်သူတွေပဲ ထိတာများတယ်။” လို့ အထက်ပါဒေသခံက ပြောပါတယ် ။

ပြီးခဲ့တဲ့နှစ် ဒီဇင်ဘာ ၁၈ ရက်ကလည်း ကနီမြို့နယ်၊ ကျောက်လှေကားရွာကို စစ်ကောင်စီတပ်က လေကြောင်းတိုက်ခိုက်မှုပြုလုပ်သွားလို့ နေအိမ် ၁၇ လုံး ပျက်စီးကာ တိရစ္ဆာန်သေဆုံးမှုတွေလည်း ရှိခဲ့ပါတယ်။

စာတည်း – ဟိန်းစံ

မကွေး၊ မေ ၁၃၊ ၂၀၂၃။

မကွေးတိုင်း၊ ပခုက္ကူမြို့နယ်မှာ စစ်ကောင်စီယာဥ်တန်းနဲ့ ရိက္ခာကား ကန်တော်ရွာနဲ့ ညောင်လေးပင်ရွာကြား မိုင်းဆွဲခံရလို့ ထိခိုက်ဒဏ်ရာရသူ ၆ ဦး ရှိတယ်လို့ ပခုက္ကူပြည်သူ့ကာကွယ်ရေးတပ်ဖွဲ့ PPDF အဖွဲ့ဆီက သိရပါတယ်။

မေလ ၁၂ရက် နေ့လယ် ၁၂နာရီမှာ ပခုက္ကူကနေ ပေါက်မြို့နယ်ဘက်ကိုသွားတဲ့ Alphad ၂ စီး၊ ဖောကား ၂ စီးကို မိုင်းဆွဲခဲ့ပြီး ဒုတိယအကြိမ်အနေနဲ့ ညနေ ၃နာရီမှာ ရေပြာကနေ ပခုက္ကူဘက်ကိုပြန်လာတဲ့ ရိက္ခာကား ၆ စီးကို မိုင်းဆွဲတိုက်ခိုက်ခဲ့တာဖြစ်တယ်လို့ PPDF ရဲဘော်တဦးက ပြောပါတယ်။

“ပထမက ဖောကားနဲ့ ခွေးတွေပါလာတယ်ပေါ့နော်။ နောက်တခေါက်က ရိက္ခာကား။ ပထမတခေါက်က လူရော ကားရောထိတာပဲ။ နောက်တခေါက်ဆွဲတာ ကားထိတယ်။ ထိခိုက်တာက ၆ယောက်ပဲ၊ သေဆုံးကတော့ စုံစမ်းဆဲပဲ” လို့ ပြောပါတယ်။

ပထမအကြိမ် အင်အား ၇၀ ဝန်းကျင်ပါတဲ့ ကား ၄စီးကို မိုင်းဆွဲချိန်မှာ စစ်သား ၆ဦးထိခိုက်ဒဏ်ရာရခဲ့ပြီး ဒုတိယအကြိမ် ရိက္ခာပို့ပြီးပြန်လာတဲ့ ကား ၆စီး မိုင်းဆွဲခံရချိန်မှာ လူထိခိုက်မှုမရှိဘဲ ကား ၂စီး ပျက်စီးတယ်လို့ ပြောပါတယ်။

မိုင်းဆွဲတိုက်ခိုက်မှုကို ပေပါမိုင်း အမျိုးအစားနဲ့ ရိုးရိုးမိုင်း ၂လုံးသုံးကာ တိုက်ခိုက်ခဲ့ပြီး အဲဒီယာဉ်တန်းတွေကို တိုက်ခိုက်ဖို့အတွက် အချိန် ၅ ရက်ဝန်းကျင်ကြာ ပြင်ဆင်ခဲ့ရတယ်လို့ သူကဆက်ပြောပါတယ်။

ပြီးခဲ့တဲ့မတ်လ ၉ ရက်နေ့ကလည်း ပခုက္ကူပြည်သူ့ကာကွယ်ရေးတပ်ဖွဲ့ဟာ မြိုင်မြို့နယ် Well-2 ရေနံမြေအခြေပြု စစ်ကောင်စီစခန်းကို ဒေသတွင်း PDF အဖွဲ့တွေနဲ့ပေါင်းကာ တိုက်ခိုက်ခဲ့ပါသေးတယ်။

စာတည်း- ဇို

မကွေး၊ မေ ၁၂၊ ၂၀၂၃။

စစ်ကောင်စီအရာရှိကားဖြတ်ဖို့ ကင်းပုန်းစောင့်ပေးနေတဲ့ စစ်အုပ်စုကို ဒရုန်းနဲ့ ဗုံးသီးချတိုက်ခိုက်ခဲ့လို့ ပျူ၁ ဦး သေပြီး စစ်သား ၂ ဦး ဒဏ်ရာရတယ်လို့ မြိုင်ပကဖ ဆီက သိရပါတယ်။

မကွေးတိုင်း၊ ပခုက္ကူမြို့နယ် ကန်တော်ရွာအနီးမှာ စောင့်နေတဲ့ ကင်းသမားတွေကို မေလ ၁၁ရက် မနေ့ကမနက်ပိုင်းမှာ ဒေသကာကွယ်ရေးပူးပေါင်းအဖွဲ့တွေက ဒရုန်းနဲ့တိုက်ခိုက်ခဲ့တာဖြစ်တယ်လို့ မြိုင်ပကဖ ခေါင်းဆောင် ဗိုလ်လက်ယာက ပြောပါတယ်။

“ဒရုန်းသုံးပြီး အီနာဂါဗုံးသီး ၃ လုံးနဲ့ မနက် ၈ နာရီကျော်လောက်မှာ ချတာ။ လမ်းမှာ အရာရှိကား ၂ စီးဖြတ်မှာကို ကန်တော်ရွာအနားမှာ ကင်းပုန်းယူကြတာ၊ ပျူ ၁ ကောင်သေပြီး စစ်** ၂ ကောင်ဒဏ်ရာရတယ်” လို့ ဗိုလ်လက်ယာက ပြောပါတယ်။

တပ်မ ၁၀၁ က စစ်သား ၁၀ ဦးကျော်နဲ့ ပျူ ၂၀ နီးပါး စုစုပေါင်း အင်အား ၃၀ ဝန်းကျင် ကင်းပုန်ဝပ်နေတဲ့နေရာကို တိုက်ခိုက်ခဲ့တာဖြစ်ပြီး တိုက်ခိုက်ခံရတဲ့ စစ်အုပ်စုဘက်က ပြန်ပစ်ခဲ့လို့ အနီးနားမှာရှိတဲ့ ရေလာလေးရွာသား အသက် ၂၃နှစ်အရွယ် အမျိုးသားတဦး သေဆုံးခဲ့တယ်လို့ ဆိုပါတယ်။

နောက်ဆုံးမှာ နှစ်ဖွဲ့ခွဲပြီး ရေလာလေးရွာဘက်ကို တဖွဲ့က ထွက်သွားပြီး ဒဏ်ရာရသူတွေပါတဲ့ တဖွဲ့က ပခုက္ကူဘက်ကို ဆက်သွားတယ်လို့ သိရပါတယ်။

ဒီတိုက်ခိုက်မှုကို ပြည်သူ့ကာကွယ်ရေးတပ်ဖွဲ့ – မြိုင်မြို့နယ် ပကဖ၊ PKU Thurain Black Crbra အဖွဲ့တို့ ပူးပေါင်းတိုက်ခိုက်ခဲ့တာလည်း ဖြစ်ပါတယ်။

စာတည်း- ဇို