ဒေသခံ

သာယာ၀တီ၊ ဖေဖော်ဝါရီ ၂‌၇၊ ၂၀၂၃။

ပဲခူးတိုင်း(အနောက်ခြမ်း)၊ သာယာဝတီခရိုင်၊ နတ်တလင်းမြို့နယ်၊ ညောင်လေးပင်ရွာဟောင်းက ဒေသခံတွေကို စစ်ကောင်စီတပ်က ဖမ်းဆီးသွားတယ်လို့ နတ်စစ်သည်အဖွဲ့ခေါင်းဆောင် ကိုအောင်က ပြောပါတယ်။

ဖမ်းဆီးခံရသူတွေဟာ ပဲခူးရိုးမအစပ်၊ တောင်ညိုဆည်အထက်ပိုင်းမှာရှိတဲ့ အဲ့ဒီရွာဟောင်းက ကိုတင်အောင်၊ ကိုဝင်းနိုင်စိုး၊ ကိုလှမိုး၊ ကိုဇော်ထိုက်နဲ့ ကိုကျော်မျိုးအောင် စတဲ့သူတွေအပြင် အမျိုးသမီးတချို့နဲ့ ကလေးငယ်တွေအပါ ၁၄ ဦး ဖြစ်ပြီး ဖေဖော်ဝါရီလ ၂၀ ရက်ဝန်းကျင်မှာ အင်အား ၁၀၀ လောက်ပါတဲ့ စစ်ကောင်စီစစ်ကြောင်းက ဝင်ရောက်ဖမ်းဆီးခဲ့ကာ သူတို့ကို တောင်ညိုဆည်မှာ စစ်ဆေးမှုတွေ ပြုလုပ်နေတယ်လို့ ဆိုပါတယ်။

“တောင်ယာလုပ်ပြီး ယာခုတ်စားနေတဲ့ အစုလေးကို ဖမ်းသွားတာပါ။ ကျနော်တို့သွားကြည့်တော့မှ အဲ့နေရာမှာ လူမရှိတော့ဘူး။ ဘာအဆက်အသွယ်မှ မရဘူး။ လူတွေမရှိတော့ဘူးဆိုတာ သိရလို့ စုံစမ်းမှ ပဲခူးရိုးမထဲက စစ်ကြောင်းနဲ့ တောင်ညိုဆည်မှာ တပ်စွဲနေတဲ့ စစ်ကြောင်းက ဖမ်းသွားတာပါ” လို့ နတ်တလင်း PDF နတ်စစ်သည်အဖွဲ့ခေါင်းဆောင် ဗိုလ်အောင်က မြေလတ်အသံကို ပြောပါတယ်။

ဖမ်းဆီးခံရသူတွေဟာ ဖမ်းဆီးခံရပြီး တပတ်ကျော်အကြာ ဒီကနေ့အထိ အဆက်အသွယ် ပြတ်တောက်နေတယ်လို့လည်း သူက ဆက်ပြောပါတယ်။

ဖမ်းဆီးခံရသူတွေဟာ ပဲခူးရိုးမအစပ်မှာ တောင်ယာ လုပ်ကိုင်နေကြတဲ့သူတွေ ဖြစ်ပြီး သူတို့နေထိုင်တဲ့ ဝါးတဲတွေအတွင်း ဆန်အပါအဝင် စားသောက်ကုန်တွေကို စစ်ကောင်စီတပ်သားတွေက ဖျက်ဆီးခဲ့ကြသလို လူနေတဲတွေအနီးမှာလည်း စစ်ကောင်စီတပ်ဘက်က နင်းမိုင်းတွေ ထောင်ထားတယ်လို့ ပြောပါတယ်။

အဲဒီစစ်ကြောင်းဟာ ပေါက်ခေါင်းဘက်က လာတာဖြစ်ပြီး နတ်တလင်း တောင်ညိုဆည်က စစ်သားတွေနဲ့ ပေါင်းကာ လက်ရှိမှာ တောင်ညိုဆည်ဘောင်မှာ တပ်စွဲထားတယ်လို့ ဆိုပါတယ်။

တောင်ညိုဆည်အထက်က ဒေသခံတွေဟာ ဆည်အတွင်း သွားလာစဥ် စစ်ကောင်စီတပ်ဂိတ်မှာ မှတ်ပုံတင်နဲ့ ဝယ်ယူလာတဲ့ စားသောက်ကုန်တွေကို စစ်ဆေးတာတွေလည်း ပြုလုပ်လေ့ရှိတယ်လို့လည်း ဒေသခံတဦးဆီက သိရပါတယ်။

ပြီးခဲ့တဲ့ ဖေဖော်ဝါရီလ ၁၀ ရက်ကတော့ စစ်ကောင်စီတပ် တောင်ပိုင်းတိုင်း စစ်ဌာနချုပ် (တပခ) တိုင်းမှူး ဗိုလ်ချုပ်ထိန်ဝင်း နတ်တလင်းကို လာရောက်ပြီး PDFတွေကို ထောက်ပံ့ရင်မြို့နာမယ်ဟုဆိုကာ နတ်တလင်းက လုပ်ငန်းရှင်တွေကို ကြိမ်းမောင်းခဲ့ပါသေးတယ်။

ယင်းမာပင်၊ ဖေဖော်ဝါရီ ၂၃၊ ၂၀၂၃။

စစ်ကိုင်းတိုင်း၊ ယင်းမာပင်ခရိုင်၊ ဆားလင်းကြီးမြို့နယ်ရှိ စစ်တပ်က မီးရှို့ဖျက်ဆီးခဲ့တဲ့ ကျေးရွာ ၈ ရွာက ဒေသခံပြည်သူ ၃၀၀ ကျော်ကို မနေ့က ဖေဖော်ဝါရီလ ၂၂ ရက်မှာ အိမ်အသုံးအဆောင်ပစ္စည်းတွေ ကူညီထောက်ပံ့ပေးခဲ့တယ်လို့ သိရပါတယ်။

“မနေ့က သွားရောက် လှူဒါန်းခဲ့တာပါ။ ဆားလင်းကြီးမြို့နယ် ကျေးရွာ ၈ ရွာအတွင်းက မီးဘေးသင့်ပြည်သူ ၃၀၇ ဦးအတွက် လူသားချင်း စာနာမှုအနေနဲ့ သွားရောက်တွေ့ဆုံပြီး ကူညီထောက်ပံ့ပေးခဲ့တာပါ” လို့ ယင်းမာပင် – ဆားလင်းကြီးရွာပေါင်းစုံသပိတ် ဦးဆောင်ကော်မတီဝင် တဦးက ပြောပါတယ်။

ယင်းမာပင် – ဆားလင်းကြီးရွာပေါင်းစုံသပိတ် ဦးဆောင်ကော်မတီနဲ့ ပြည်သူမှပြည်သူသို့ ပရဟိတအဖွဲ့တို့ ပူးပေါင်းကာ သွားရောက်လှူဒါန်းခဲ့တာဖြစ်ပြီး၊ လှူဒါန်းခဲ့တဲ့ ကျေးရွာအမည်တွေကိုတော့ လုံခြုံရေးအရ ပြောကြားခဲ့ခြင်း မရှိပါဘူး။

အဆိုပါအဖွဲ့တွေဟာ ဖေဖော်ဝါရီလ ၂၀ ရက်ကလည်း ယင်းမာပင်မြို့နယ် မီးဘေးသင့် လူဦးရေ ၂၁၀ အတွက် သွားရောက်ထောက်ပံမှုတွေ ပြုလုပ်ခဲ့သလို မီးရှို့ခံရမှုအတွက် အားမငယ်ဖို့၊ ဆက်လက်အားမွေးပြီး တောင့်ခံတော်လှန်ပေးကြပါဖို့ အားပေးစကားပြော၊ တောင်းဆိုတာတွေ ပြုလုပ်ခဲ့ကြတယ်လို့ သိရပါတယ်။

မကွေး၊ ဖေဖော်ဝါရီ ၁၈၊ ၂၀၂၃။

မကွေးတိုင်း၊ ပခုက္ကူမြို့နယ်၊ ယာချောင်းဘက်ကနေ ကျွန်းချောင်း လျှပ်စစ်ဓာတ်အားပေးစက်ရုံရဲ့ ပတ်ဝန်းကျင်ရှိကျေးရွာတွေဆီကို ဖေဖော်ဝါရီလ ၁၈ ရက်ဒီမနက် ၁၀ နာရီဝန်းကျင်မှာ စစ်ကောင်စီတပ်သား ၁၅၀ ကျော်လောက်က စစ်ကြောင်းထိုးဝင်ရောက်လာခဲ့တယ်လို့ ဒေသခံတွေက ပြောပါတယ်။

အခုလို စစ်ကြောင်းထိုးလာတာကြောင့် ငွေသောင်၊ အိုင်ကြီး၊ ညောင်လှ စတဲ့ကျေးရွာ ၃ ရွာက ဒေသခံ ၅၀ ကျော်ဟာ ရွာပြင်ကငရုတ်ခင်းတွေထဲ ဝင်ရောက်တိမ်းရှောင်နေကြရင်း စစ်ကောင်စီတပ်သားတွေရဲ့ ဖမ်းဆီးတာကိုခံလိုက်ရတာလို့ အမည်မဖော်လို့တဲ့မျက်မြင် အမျိုးသားတဦးက ပြောပါတယ်။

“ဖမ်းမိခံရတဲ့အထဲမှာ အမျိုးသမီးနဲ့ ကလေးငယ်တွေများတယ်။ စုစုပေါင်းကတော့ ၅၀ ကျော်ရှိပါတယ်။ သူတို့အကုန်လုံးကို ငရုတ်ခင်းထဲကပဲ ဖမ်းမိသွားတာ။ အခုသူတို့ကို ငွေသောင် ဘုန်းကြီးကျောင်းထဲကို ခေါ်သွားပြီးစစ်ဆေးနေကြတယ်။ အခုအချိန်ထိတော့ တယောက်မှ လွတ်မလာသေးဘူး“လို့ ဆိုပါတယ်။

ဒေသခံတွေကိုဖမ်းဆီးစစ်ဆေးထားတဲ့ စစ်ကောင်စီတပ်တွေဟာ ပြီးခဲ့တဲ့ဖေဖော်ဝါရီလ ၁၀ ရက်က PDF တွေတိုက်ခိုက်တာကို ခံလိုက်ရတဲ့ တိရိစ္တာန်မွေးမြူရေးနဲ့ လေ့ကျင့်ရေးတပ် အမှတ်(၁) − BPI ကို အင်အားဖြည့်ရောက်နေကြတဲ့ ပခုက္ကူမြို့ပေါ်က တပ်သားတွေဖြစ်တယ်လို့ သိရပါတယ်။

“BPI တပ် တိုက်ခိုက်ခံရပြီးနောက်ပိုင်းမှာ အင်အားဖြည့်တင်းပြီး တန့်ကြည့်တောင် တောင်ရိုးတခုလုံး နယ်မြေရှင်လင်းရေး လုပ်နေတာ။ ယောချောင်းဘက်က အရှေ့ကမ်းရွာနဲ့ ဥယာဥ်စုရွာကနေ ကျွန်းချောင်း စျေးချောင်ထဲက ရေနံမှော်ထဲကလာပြီး ကျွန်းချောင်းဓါတ်အားပေးစက်ရုံအနီးက. ရုပ်ရှင်ရုံနားညအိပ်ပြီး ခုမနက် စစ်ကြောင်းထိုးတာဘဲ”လို့ ဆိုပါတယ်။

ဒါ့အပြင် ငွေသောင်လှေဆိပ်မှာလည်း ဒေသခံအချို့ အဖမ်းခံရတယ်လို့ သိရပြီး ဘယ်နဦးအဖမ်းခံလိုက်ရလဲ ဆိုတာကိုတော့ မြေလတ်အသံက ဆက်လက်စုံစမ်းနေဆဲပါ။

အဆိုပါစစ်ကောင်စီတပ်သားတွေဟာ တိုက်ပွဲ ဖြစ်ပွားမှုမရှိဘဲ ကျေးရွာတွေကို ဆက်တိုက်ဆို သလိုဝင်ရောက်မီးရှို့ပြီး ဒေသခံတွေကိုဖမ်းဆီး နေတာကြောင့် သိမ်တော်ရွာ၊ ညောင်နီပင်ရွာ၊ ကံကြီးစုရွာ၊ ပေါက်တောရွာ၊ မြို့စိုးရွာ၊ သီရိလေးရွာ၊ ငှက်ပျောတောရွာ၊ ချမ်းသာကြီးရွာ၊ ဆယ်လံရွာစတဲ့ ကျေးရွာတွေက ဒေသခံတွေဟာ ဘေးလွတ်ရာကို တိမ်းရှောင်နေကြရဆဲဖြစ်ပါတယ်။

မကွေး၊ ဖေဖော်ဝါရီ ၁၅၊ ၂၀၂၃။

မကွေးတိုင်း၊ မြိုင်မြို့နယ်၊ ဝက်ပုတ်ကျေးရွာမှာ အခြေချတပ်စွဲထားတဲ့ စစ်သားနဲ့ပျူတွေက မိုင်ဝက်သာသာဝေးတဲ့ ကျွဲတွင်းကျေးရွာကို တိုက်ပွဲမဖြစ်ပဲ လက်နက်ကြီးနဲ့ပစ်ခတ်လို့ တိရိစ္ဆာန်အချို့ထိမှန် သေဆုံးခဲ့သလို ရွာသားတွေလည်း ထွက်ပြေးတိမ်းရှောင်ခဲ့ရပါတယ်။

ဖေဖော်ဝါရီလ ၁၄ ရက်မနေ့ကညနေ ၅ နာရီကျော်လောက်မှာ လက်နက်ကြီးနဲ့ ၈ ချက်ခန့်ပစ်ခတ်ခဲ့ရာ ဒေသခံတွေကိုတော့ မထိခိုက်ပဲ နွား ၂ ကေင်ကတော့ ကျည်ထိမှန်သေဆုံးခဲ့တယ်လို့ ပြည်သူ့ကာကွယ်ရေးတပ်ဖွဲ့ – မြိုင်မြို့နယ်မှ ဗိုလ်လက်ယာက ပြောပါတယ်။

“ဒေသခံတွေ ထွက်ပြေးတိမ်းရှောင်နေရတယ်လို့ သိရပါတယ်။ စစ်ကောင်စီတပ်သားတွေက တိုက်ပွဲမဖြစ်ပဲ ၆၀ မမ လက်နက်ကြီးနဲ့ ၈ ချက်ပစ်ခတ်တာ၊ အသံကြားလို့ ပြည်သူကတော့ တိမ်းရှောင်နိုင်ပြီး တိရစ္ဆာန်တွေ ထိသွားတယ်။ ပစ်ခတ်ခဲ့တာကြောင့် နွား ၂ ကောင်သေပြီး ၁ ကောင် ဒဏ်ရာရတယ်” လို့ ပြောပါတယ်။

ပခုက္ကူအခြေစိုက် တမခ ၁၀၁၊ ရေစကြိုအခြေစိုက် ခလရ ၂၅၈ က စစ်သားတွေနဲ့ ဝက်ပုတ်ရွာက ပျူစောထီးတွေ ပူးပေါင်းပြီး ခုလိုပစ်ခတ်ခဲ့တာဖြစ်သလို ခုလိုပစ်ခတ်လို့ အိမ်ခြေ ၂၀၀ ဝန်းကျင်ရှိတဲ့ ကျွဲတွင်းရွာက ဒေသခံ ၄၀၀ လောက်က ရွာကနေထွက်ပြေးနေရတယ်လို့ ဆိုပါတယ်။

ခုလက်ရှိမှာလည်း အဆိုပါစစ်အုပ်စုဟာ မြိုင်နယ်အတွင်း စစ်ကြောင်းထိုးဖို့ ပြင်ဆင်နေတယ်လို့ သိရပါတယ်။

မကွေး၊ ဖေဖော်ဝါရီ ၁၃၊ ၂၀၂၃။

မကွေးတိုင်း၊ ပခုက္ကူမြို့နယ်၊ စံပြကျေးရွာက ဒေသခံနေအိမ် ၁၀၀ နီးပါးကို စစ်ကောင်စီတပ်တွေက မီးရှို့ဖျက်ဆီးသွားတယ်လို့ သိရပါတယ်။

ဖေဖော်ဝါရီလ ၁၂ ရက် မနေ့ကမနက် ၉ နာရီလောက်မှာ မြစ်ခြေဘက်ကို စစ်ကြောင်းထိုးလာတဲ့ စစ်ကောင်စီအင်အား ၁၀၀ ကျော်ဟာ စံပြကျေးရွာကိုရောက်လာပြီး နေအိမ်တွေကို မီးတင်ရှို့ခဲ့တာလို့ ဒေသခံတဦးက ပြောပါတယ်။

“ပြီးခဲ့ရက်ပိုင်းက မြစ်ချေက စကစ မွေးမြူရေးတပ် တိုက်ခိုက်ခံရလို့ သေဆုံးတာတွေရှိတာကို မကျေနပ်လို့ ရွာတွေဘက်ကို စစ်ကြောင်းထိုးလာတာ။ မနေ့ကဆို လာတာက အင်အား ၃၀၀ ကျော်လောက်က ကျေးရွာတွေဘက်ကို စစ်ကြောင်းတွေခွဲပြီးလာကြတာ။ သူတို့တွေလာမယ်ဆိုတာသိလို့ ရွာသားတွေက ကြိုရှောင်နေကြတာ။ အဲဒါကို အိမ်တွေ မီးရှို့သွားတယ်” လို့ ပြောပါတယ်။

ခုလို မီးရှို့သွားလို့ အိမ်ခြေ ၁၀၀ ကျော်ရှိတဲ့ စံပြရွာဟာ ဘုန်းကြီးကျောင်းတွေ အပါအဝင် အားလုံးနီးပါး မီးလောင်သွားပြီး နေအိမ် ၅ လုံးသာ ကျန်ခဲ့တယ်လို့ ဆိုပါတယ်။

စစ်ကောင်စီတပ်တွေ လာမယ်ဆိုတဲ့ သတင်းအရ စံပြကျေးရွာခံ ၆၀၀ ကျော်ဟာ ဘေးလွတ်ရာကို ကြိုတင်တိမ်းရှောင်နေရတယ်လို့ သိရပါတယ်။

စစ်ကောင်စီအဖွဲ့ဟာ စံပြရွာကို မီးရှို့ပြီးနောက် ရေချိုကျေးရွာဘက်ကို ဆက်ထွက်သွားပြီး ညနေပိုင်းမှာ ကျေးရွာအနီးက PDF စခန်းတခုကို ဝင်ရောက်မီးရှို့သွားတယ်လို့ ဆိုပါတယ်။

PDF စခန်းကို ဝင်ရောက်မီးရှို့ချိန်မှာ စခန်းက ဆိုင်ကယ်တွေနဲ့အသုံးအဆောင်ပစ္စည်းတွေကို သိမ်းဆည်းသွားပြီး တဲတွေကိုတော့ မီးရှို့သွားတယ်လို့ ဒေသခံတွေကပြောပေမယ့် ဒီဖြစ်စဥ်နဲ့ပက်သက်ပြီး မြေလတ်အသံက သီးခြားအတည်မပြုနိုင်သေးပါဘူး။

ဖေဖော်ဝါရီလ ၁၁ ရက်ကလည်း မြစ်ခြေ မွေးမြူရေးတပ်စခန်းကို PDF ပူးပေါင်းတပ်တွေက ဝင်ရောက်တိုက်ခိုက်လို့ စစ်ကောင်စီဘက်က အရာရှိတွေအပါအဝင် ၇ ဦး သေဆုံးပြီး ၃ ဦး ဖမ်းမိခဲ့တယ်လို့ သိရပါတယ်။

အဲဒီနောက်ပိုင်းမှာ စစ်ကောင်စီဘက်က အင်အား ၃၀၀ ကျော်နဲ့ မြစ်ခြေဘက်က ကျေးရွာတွေကို အခုလို စစ်ကြောင်းထိုးနေတာလည်း ဖြစ်ပါတယ်။

မကွေး၊ ဖေဖော်ဝါရီ ၁၂၊ ၂၀၂၃။

မကွေးတိုင်း၊ ပခုက္ကူမြို့နယ်က မြစ်ခြေမွေးမြူရေးတပ်စခန်းကို ဒေသခံကာကွယ်ရေးတပ်တွေက တိုက်ခိုက်လို့ အထိနာသွားတဲ့စစ်တပ်ဟာ ဖေဖေါ်ဝါရီလ ၁၂ ရက် ဒီနေ့မနက်မှာ ဒေသခံပြည်သူ ၈ ဦးထက်မနည်းကို ဖမ်းဆီးခဲ့တယ်လို့ ဒေသခံတဦးက ပြောပါတယ်။

မြစ်ခြေမြို့က ပန်းခြံ၊ စျေးလမ်းထိပ်နဲ့ မြစ်ခြေ – ကမ္မ လမ်းစုံတွေမှာ ကားနဲ့ ဆိုင်ကယ်တွေကိုပါ စစ်ဆေးတဲ့အပြင် ဖုန်းတွေကိုပါ စစ်ဆေးကာ ဖမ်းဆီးနေတာလို့ ဆိုပါတယ်။

“ဒီနေ့မနက်အစောကြီးကတည်းက ပျူတွေ၊ ရဲတွေ စစ်သားတွေ စစ်ဆေးနေတာ အင်အားကတော့ မသိရဘူး။ မနက် ၁၀ နာရီသလောက်ကစပြီး အပြင်မထွက်ရဘူး။ မာရှယ်လောလို့လည်း ပြောသေးတယ်။ ပြည်သူ ၈ ဦးကိုလည်း ဖမ်းသွားတယ်။ အဓိကကတော့ စစ်တပ်က PDFကို မနိုင်လို့ ပြည်သူကို မဲတာပဲ” လို့ ဒေသခံတဦးက ပြောပါတယ်။

လက်ရှိမှာ မြစ်ခြေဒေသဝန်းကျင်ကို တောင်သာနဲ့ ပခုက္ကူဘက်က ရောက်ရှိလာတဲ့ စစ်သား၊ ရဲနဲ့ ပျူစောထီးအင်အား ၄၀၀ လောက်နဲ့ စစ်ကြောင်းတွေ ခွဲကာ လှုပ်ရှားနေတယ်လို့လည်း သူကဆက်ပြောပါတယ်။

ဖေဖော်ဝါရီ ၁၁ ရက်မနေ့ မနက်ပိုင်းက မြစ်ခြေမွေးမြူရေး တပ်စခန်းကို ဒေသခံ PDF တွေက ဝင်ရောက်စီးနင်း တိုက်ခိုက်ခဲ့လို့ အရာရှိ ၂ ဦးအပါ ၇ ဦး သေဆုံးပြီး ၃ ဦး အရှင်ဖမ်းမိကာ လက်နက်အချို့ သိမ်းဆည်းနိုင်ခဲ့တဲ့ ဖြစ်စဉ်ဖြစ်ခဲ့ပါတယ်။

စစ်ကိုင်း၊ ဖေဖော်ဝါရီ ၁၂၊ ၂၀၂၃။

စစ်ကိုင်းတိုင်း၊ ကျွန်းလှမြို့နယ်၊ ကြာတကန်ကျေးရွာအနီးမှာ သုံးဘီးနဲ့လာတဲ့ဒေသခံတွေ မိုင်းထိပြီး ၅ ဦးဒဏ်ရာရခဲ့တယ်လို့ သိရပါတယ်။

ဖေဖော်ဝါရီလ ၁၀ ရက်မနက် ၈ နာရီခန့်မှာ ထန်းပင်ကုန်း- ကြာတကန်- ကျွန်းလှသွားလမ်းပေါ်မှာ သုံးဘီးဆိုင်ကယ်တစီး မိုင်းထိပြီး သုံးဘီးပေါ်ပါသူတွေ ထိခိုက်ဒဏ်ရာရသွားတာလို့ ဒေသခံတဦးက ပြောပါတယ်။

“သိရတာက သူတို့က ကျွန်းလှဘက်ကနေ ထန်းပင်ကုန်းဘက်ကို သုံးဘီးနဲ့လာတာ၊ ကြာတကန်အနီးမှာ မိုင်းထိတာလို့ သိရတယ်။ အဲ့နားမှာလည်း ပြီးခဲ့တဲ့ ရှေ့ရက်တွေက တခါဖြစ်သေးတယ်။ ဘယ်သူထောင်တဲ့ မိုင်းလဲတော့ မသိရဘူး”လို့ ပြောပါတယ်။

မိုင်းပေါက်ကွဲမှုကြောင့် သုံးဘီးဆိုင်ကယ်ပေါ်ပါ ကျွန်းလှမြို့နယ်၊ ပျဉ်းမနားမြိုင်ရပ်ကွက်နေ ကိုပြည့်ဖြိုးခိုင် ၃၁ နှစ်၊ ဦးဝေလင်း ၄၉ နှစ်၊ ဦးဝင်းမင်းထွန်း ၄၂ နှစ်၊ ဒေါ်မေသန်းထွန်း ၄၀ နှစ်နဲ့ မဖြိုးဖြိုးဝင်း ၂၀ နှစ် တို့ ထိခိုက်ဒဏ်ရာရခဲ့ပြီး သူတို့ကို ဒေသခံတွေရဲ့အကူအညီနဲ့ ကျွန်းလှဆေးရုံကို ပို့ပေးခဲ့ရတယ်လို့ သိရပါတယ်။

အဲ့ဒီလမ်းပိုင်းမှာ စစ်ကောင်စီနဲ့ ဒေသခံကာကွယ်ရေးတပ်တို့ ထိတွေ့မှု ဖြစ်လေ့ရှိတာကြောင့် ဒီမိုင်းကို ဘယ်အဖွဲ့အစည်းက ထောင်ထားခဲ့လဲ ဆိုတာကိုတော့ သီးခြားအတည်မပြုနိုင်သေးပါဘူး။
ဒါ့အပြင် ကျွန်းလှနယ်ထဲမှာ မကြာခဏဆိုသလို လမ်းသွားဒေသခံပြည်သူတွေဟာ အခုလိုပဲမိုင်းနင်းမိပြီး ထိခိုက်ဒဏ်ရာရတာတွေလည်း ရှိနေပါတယ်။

ပြီးခဲ့တဲ့ ဇန်နဝါရီလ ၂၉ ရက်ညနေပိုင်းကလည်း ကျွန်းလှမြို့၊ သစ်ရာမြိုင်ရပ်ကွက်ကနေ ရွာဘက်တွေကို သုံးဘီးနဲ့ကုန်စိမ်းလိုက်ရောင်းတဲ့ မိသားစု ၁ စု မိုင်းထိပြီး အသက် ၄ လအရွယ်ကလေးငယ် အပါအဝင် မိသားစုဝင် ၃ ဦးဒဏ်ရာရခဲ့သေးတယ်လို့ သိရပါတယ်။

စစ်ကိုင်း၊ ဖေဖော်ဝါရီ ၁၁၊ ၂၀၂၃။

စစ်အုပ်ချုပ်ရေး ကြေညာထားတဲ့ စစ်ကိုင်းတိုင်းထဲက မြို့နယ်တွေမှာ စစ်ကောင်စီက ပြီးခဲ့တဲ့ ဖေဖော်ဝါရီလ ၄ ရက်နောက်ပိုင်းကစပြီး ညနေ ၆ နာရီကနေ နောက်တနေ့မနက် ၆ နာရီအထိ အပြင်မထွက်ရ အမိန့်ထုတ်ပြန်လိုက်တာကြောင့် ဒေသခံတွေ အခက်အခဲဖြစ်နေတယ်လို့ သိရပါတယ်။

စစ်ကိုင်းတိုင်းထဲက အင်းတော်၊ ဗန်းမောက်၊ ကောလင်း၊ ပင်လယ်ဘူး၊ မြောင်၊ ဆားလင်းကြီး၊ ပုလဲ၊ ယင်းမာပင်၊ ခင်ဦး၊ တန့်ဆည်နဲ့ ရေဦးမြို့နယ်တွေမှာ စစ်အုပ်ချုပ်ရေးအပြင် အခုလိုညမထွက်ရအမိန့်ပါ ထပ်တိုးထုတ်ပြန်ထားတာလည်း ဖြစ်ပါတယ်။

“စစ်အုပ်ချုပ်ရေး ကြေညာချက်နဲ့အတူ ခု ညမထွက်ရဆိုပြီး တင်းကျပ်မှုတွေ လုပ်လာတာပါ။ ဒေသခံတွေမှာ တနေ့တနေ့ထိတွေ့တိုက်ပွဲတွေ မီးလောင် ဆုံးရှုံးတာတွေအပြင် ခုဆို ညရေးညတာတောင် သွားမရထွက်မရဖြစ်နေပြီ။ သူတို့က စစ်ကိုင်းကို ရည်ရွယ်ချက်ရှိရှိ တင်းကျပ်မှုတွေလုပ်နေတာ” လို့ ခင်ဦး PDF တာဝန်ရှိသူတဦးက ပြောပါတယ်။

ဒေသကာကွယ်ရေးတပ်တွေနဲ့ စစ်ကောင်စီတပ်ဖွဲ့တွေကြား တိုက်ပွဲ ပြင်းထန်နေတဲ့ စစ်ကိုင်းတိုင်း၊ မကွေးတိုင်း၊ တနင်္သာရီတိုင်း၊ ပဲခူးတိုင်း၊ ချင်းပြည်နယ်၊ မွန်ပြည်နယ်၊ ကရင်ပြည်နယ် နဲ့ ကယားပြည်နယ်ထဲက မြို့နယ် ၃၇ မြို့နယ်ကို ၂၀၂၃ ခုနှစ်၊ ဖေဖော်ဝါရီလ ၂ ရက်ကစပြီး စစ်ကောင်စီက စစ်အုပ်ချုပ်ရေး ကြေညာလိုက်တာပါ။

“ကျနော်တို့ဆီမှာတော့ နေ့တိုင်းနီးပါး ထိတွေ့တိုက်ပွဲ ဖြစ်နေတုန်းပဲ။ အရေးအကြောင်းဆို ညအချိန်တွေလည်း ထပြေးနေရတုန်းပဲ။ ခုက စစ်အုပ်ချုပ်ရေးတွေ ညမထွက်ရတွေ လုပ်ထားတော့ ဘာတွေဆက်ဖြစ်မလဲကို မသိတော့ဘူး။ စစ်*တွေကြောင့် ဒေသခံတွေပဲ အမြဲအခက်အခဲ ဖြစ်နေရတာ” လို့ စစ်ကိုင်းတိုင်းအတွင်းက ဒေသခံတဦးက ဆိုပါတယ်။

အလားတူ စစ်ကိုင်းတိုင်း အပါအဝင် မကွေးတိုင်း၊ ချင်းပြည်နယ်တို့က မြို့နယ် ပေါင်း ၂၀ ကျော်မှာလည်း ဖေဖော်ဝါရီလ ၄ ရက် နောက်ပိုင်းကစပြီး စစ်ကောင်စီက ညနေ ၆ နာရီကနေ နောက်တနေ့ မနက် ၆ နာရီအထိ ညမထွက်ရအမိန့်ကို ထုတ်ပြန်ထားတယ်လို့ သိရပါတယ်။

စစ်ကိုင်း၊ ဖေဖော်ဝါရီ ၁၀၊ ၂၀၂၃။

စစ်ကိုင်းတိုင်း၊ ကောလင်းမြို့၊ မြို့မရဲစခန်းနဲ့ ထွေအုပ်ရုံးထဲမှာ တပ်စွဲထားတဲ့ စစ်ကောင်စီတပ်သားတွေက ဖေဖော်ဝါရီလ ၈ ရက်ည ၉ နာရီဝန်းကျင်မှာ လက်နက်ကြီးတွေနဲ့ ပစ်ခတ်ခဲ့တာကြောင့် အမျိုးသား ၃ ဦးနဲ့ အမျိုးသမီး ၁ ဦးတို့ ဒဏ်ရာရရှိသွားခဲ့တယ်လို့ သိရပါတယ်။

ဒဏ်ရရှိသူတွေမှာ ကျော်ဇေယျရပ်ကွက်မှ တအိမ်တည်းနေသူ အမေ ဒေါ်စန်းမြင့် ၅၆ နှစ်၊ သားဖြစ်သူ ဦးဖိုးထူး ၃၀ နှစ်၊ မြေးဖြစ်သူ မောင်မင်းမင်းနွှဲ့ ၇ နှစ်နဲ့ ပြင်ဦးလွင်ရပ်ကွက်မှ ဦးထင်ကျော် ၅၀ နှစ် တို့ဖြစ်ကြတယ်လို့ မြို့ခံတဦးက ပြောပါတယ်။

“အမေမှာက ဦးခေါင်းကို ထိတယ်။ သားမှာ ကျောကုန်း ထိတယ်။ မြေးမှာတော့ ပေါင်တဘက် ထိတယ်။ ဦးထင်ကျော်မှာတော့ မသိရသေးဘူး။ သူတို့အကုန်းလုံးကတော့ ဆေးကုသမှု ခံယူလိုက်ကြပြီဖြစ်လို့ အသက်အန္တရာယ် မစိုးရိမ်ရတော့ပါ” လို့ ဆိုပါတယ်။

လက်ရှိမှာ ဒဏ်ရာရရှိသွားသူ ၄ ဦးအနေနဲ့ ပုဂ္ဂလိက ဆေးခန်းတခုမှာ ဆေးကုသမှုခံယူပြီး မိမိတို့နေအိမ်ကို ပြန်လည်ရောက်ရှိနေကြပြီလို့ သိရပါတယ်။

“မနေ့က ထွေအုပ်ရုံးကို ပကဖတွေက တိုက်ခိုက်ခဲ့တယ်လို့ သိရတယ်။ အဲဒီနောက် စကစတွေက လက်နက်ကြီးတွေ ရမ်းသမ်းပစ်ခတ်ခဲ့တာ။ ဒီလက်နက်ကြီးကျည်တွေနဲ့ နေအိမ်ဝန်းထဲကို ကျရောက်ပေါက်ကွဲခဲ့ကြလို့ ဒဏ်ရာရသွားကြတာ” လို့ ဆိုပါတယ်။

အလားတူ ဖေဖော်ဝါရီလ ၉ ရက်မနေ့ည ၇ နာရီလောက်မှာလည်း မြို့မရဲစခန်းထဲကနေ လက်နက်ကြီး ပစ်ခတ်သံတွေ ထွက်ပေါ်ခဲ့တယ်လို့ မြို့ခံတွေက ပြောပါတယ်။

ဒါ့အပြင် ပြီးခဲ့တဲ့ ဖေဖော်ဝါရီလ ၄ ရက်မှာလည်း ပြင်ဦးလွင်ရပ်ကွက်မှာ နေထိုင်တဲ့ ကိုသူရိန်ထွန်းမှာ နေအိမ်ကနေ ဆိုင်ကယ်နဲ့ လုပ်ငန်းခွင်ကို သွားချိန် စစ်ကောင်စီတပ်သားတွေက ပစ်ခတ်ခဲ့တာကြောင့် ပေါင်ကိုထိမှန်ပြီး ဒဏ်ရာရရှိခဲ့ပါသေးတယ်။