ဒေသခံ

မန္တလေး၊ ဒီဇင်ဘာ ၂၆၊ ၂၀၂၂။

မန္တလေးတိုင်း၊ မတ္တရာမြို့နယ်၊ ပိုဝမြောက်ရွာကို စစ်ကောင်စီတပ်သားတွေက ဒီဇင်ဘာလ ၂၆ ရက်ဒီကနေ့နေ့လည် ၂ နာရီဝန်းကျင်မှာ မီးရှို့ပြီး ရွာခံ ၃၀ ဦးနီးပါးကိုလည်း ဖမ်းဆီးသွားတယ်လို့သိရပါ တယ်။

စိန်ပန်းကုန်းကျေးရွာကို မီးရှို့ခဲ့တဲ့စစ်ကောင်စီတွေဟာ တိုက်ပွဲမဖြစ်ပဲ ပိုဝမြောက်ရွာကိုဝင်ပြီး နေအိမ် ၁ လုံးကိုမီးရှို့ခဲ့တဲ့အပြင် ဒေသခံတွေကိုပါဖမ်းဆီးသွားတာဖြစ်တယ်လို့ Peacock Warrior Forceမှတာဝန် ခံက မြေလတ်အသံကိုပြောပါတယ်။

“စစ်ကောင်စီတွေက ပိုဝမြောက်ရွာက နေအိမ် တလုံးကိုမီးရှို့တယ်။ ပြီးတော့ ရွာထဲက လူကြီး၊လူငယ် ၂၀ ကျော် ၃၀ လောက်ကိုဖမ်းတယ်။ သူတို့ကို ကြိုးတုတ်ထားပြီးတော့ ရိုက်နှက်ကြတယ်။ ဖမ်းခံထားရသူတွေအကုန်လုံးက ပြည်သူတွေပါ။ နာမည်တွေမသိရသေးဘူး။ စကစတွေက သူတို့ကိုမတ္တရာဘက်ကို ခေါ်သွားတယ်” လို့ဆိုပါတယ်။

ဒါ့အပြင် ပြီးခဲ့တဲ့ဒီဇင်ဘာလ ၂၄ ရက်ညပိုင်းမှာလည်း စိန်ပန်းကုန်းကျေးရွာကို စစ်ကောင်စီတပ်တွေက မီးရှို့ခဲ့တာကြောင့် နေအိမ် ၁၂ လုံးပျက်စီးပြာကျသွားခဲ့ပြီး အဲဒီနေ့မှာပဲ ပိုဝမြောက်ရွာ၊ ပိုဝတောင်ရွာက ဒေသခံတွေဟာ ဘေးလွှတ်ရာကို ထွက်ပြေးတိမ်းရှောင်သွားခဲ့ရတယ်လို့ ထောက်ပို့လုပ်ငန်းတွေလုပ်ဆောင်နေသူတဦးက ပြောပါတယ်။

“ထွက်ပြေးနေရတဲ့ဒေသခံတွေက ရွာသုံးရွာကဆိုတော့ လူဦးရေတထောင်လောက်ရှိတယ်ဗျ။ အခုအဖမ်းထိတဲ့သူတွေက ထွက်မပြေးဘဲရွာမှာကျန်ခဲ့ကြသူတွေပါ။ ထွက်ပြေးတဲ့သူတွေက အခုတော့ ဧရာဝတီမြစ်ရေခမ်းလို့ သောင်ထွန်းနေတဲ့ကုန်းတွေမှာ ကျူပင်တွေနဲ့အဆောင်တွေလုပ်ပြီးတော့ နေနေကြရတယ်” လို့ဆိုပါတယ်။

စစ်ကောင်စီတပ်တွေအနေနဲ့ ကျေးရွာတွေကိုမီးရှို့ပြီးတော့ ဒေသခံတွေကိုဖမ်းဆီးနေတာဟာ ဒီဇင်ဘာလ၂၃ ရက်က စိန်ပန်းကုန်းကျေးရွာအနီးမှာ စစ်ကောင်စီရဲ့မော်တော်ဘုတ်ဒရုန်းနဲ့ တိုက်ခိုက်ခံလိုက်ရတာကို အခဲမကျေတဲ့အတွက် အခုလိုလုပ်ဆောင်နေတာဖြစ်နိုင်တယ်လို့ ကာကွယ်ရေးတပ်ဖွဲ့တွေနဲ့ဒေသခံတွေကလည်း ခန့်မှန်းပြောဆိုနေကြပါတယ်။

အဲ့ဒီနေ့တိုက်ခိုက်မှုမှာ မော်တော်ဘုတ်ထဲမှာ လိုက်ပါလာတဲ့ စစ်သားတွေထဲက ၁ ဦးပွဲချင်းပြီး သေဆုံးခဲ့ပြီး၊ နောက်ထပ် ၅ ဦးမှာလည်း ဒဏ်ရာပြင်းထန် ရရှိသွားခဲ့တယ်လို့သိရပါတယ်။

မန္တလေး၊ ဒီဇင်ဘာ ၂၃၊ ၂၀၂၂။

မန္တလေးတိုင်း၊ မတ္တရာမြို့နယ်၊ အိုက့်ဒိုင်ကျေးရွာနဲ့ ရွှေဂဲပြန်ကျေးရွာက ဒေသခံ ၃ ထောင်ကျော်မှာ တောထဲမှာ တဲဆောင်တွေဆောက်ပြီးတော့ ခိုလှုံနေရတာ ၁ လကျော်ရှိနေပြီလို့ ကာယကံရှင်တွေကပြောပါတယ်။

ပြီးခဲ့တဲ့ နိုဝင်ဘာလကစတင်ပြီးတော့ စစ်ကောင်စီတွေက အိုက့်ဒိုင်ရွာနဲ့ ရွှေဂဲပြန်ရွာက နေအိမ်တွေကို မီးရှို့ဖျက်စီးခဲ့တဲ့အပြင် မီးမလောင်ဘဲကျန်နေတဲ့ နေအိမ်တွေကိုလည်း ရိုက်နှက်ဖျက်စီးခဲ့တာကြောင့် ရွာလုံးကျွတ်ထွက်ပြေးလာခဲ့ကြရတာဖြစ်တယ်လို့ အိုက့်ဒိုင်ကျေး ရွာသူတဦးက မြေလတ်အသံကိုပြောပါတယ်။

“တန်ဆောင်မုန်းလကတည်းက ပြေးနေရတာပါ။ အခုအချိန်ထိ တောထဲမှာပုန်းနေရတုန်းပါရှင့်။ တောထဲမှာကျူပင်တွေနဲ့ တဲဆောင်ငယ်တွေလုပ်ပြီးတော့ ပုန်းနေရတာပါ။ ကျူတောထဲမှာ အိပ်၊ ကျူတောထဲမှာစားနေရတယ်။ အခုကျမတို့ အအေးဒဏ်ကို တော်တော်လည်းခံစားနေရပါတယ်။ စောင်တထည်တည်းနဲ့ နှစ်ယောက်သုံးယောက်ကျစီခြုံနေရပါတယ်”လို့ဆိုပါတယ်။

မီးရှို့ခံလိုက်ရတဲ့ အိုက့်ဒိုင်ကျေးရွာနဲ့ ရွှေဂဲပြန်ကျေးရွာမှ အိမ်ခြေ ၇၀၀ ကျော်က လူဦးရေ ၃ ထောင်ကျော်မှာ အခုအချိန်ထိနေရပ်ကိုမပြန်နိုင်သေးဘဲ တောထဲမှာခိုလှုံနေရတာကြောင့် အနွေးအထည်တွေ၊ စား နပ်ရိက္ခာတွေနဲ့ ဆေးဝါးပစ္စည်းတွေ အရေးတကြီးလိုအပ်နေတယ်လို့ ကူညီပေးနေသူတဦးက ပြောပါတယ်။

“ဒီဒေသခံတွေက တောထဲခိုလို့ရမယ့်နေရာတွေမှာ နေနေရတယ်။ ကိုင်းပင်တွေကို ခုတ်ပြီး၊ ရိတ်ပြီးတော့ နှင်းလုံအောင်ဆိုပြီးတော့ အမိုးတွေလုပ်ပြီးနေကြတယ်။ ပြောရမယ်ဆိုရင် အခုကဧရာဝတီမြစ်ရေကျနေတော့ သဲ သောင်တွေပေါ်ထွန်းနေတယ်။ အဲဒီပေါ်မှာဘဲ ကျူတွေကိုခုတ်ပြီးနေနေရတာ။ ကျန်းမာရေးအတွက်ကလည်း ဆေးဆရာတွေမရှိတော့ ရောဂါတွေဖြစ်လာရင် စိုးရိမ်ရမယ့်အနေအထားရှိပါတယ်”လို့ဆိုပါတယ်။

အခုလိုနေထိုင်နေကြရတဲ့ဒေသခံတွေအနေနဲ့ မိမိတို့နေရပ်ကို ပြန်ချင်နေကြပေမယ့် နေအိမ်တွေမရှိတော့တာရယ်၊ စစ်ကောင်စီတပ်သားတွေနဲ့ ပြန်တွေ့မှာကို ကြောက်လန့်နေကြရတာကြောင့် တောထဲမှာဘဲဒုက္ခခံပြီး ခိုလှုံနေကြရတာဖြစ်တယ်လို့ ရွှေဂဲပြန်ရွာသားတဦးက ပြောပါတယ်။

“ရွာကအိမ်တွေက မီးရှို့ခံထားရတာများပါတယ်။ စစ်ကောင်စီတွေက မီးမလောင်တဲ့အိမ်တွေဆိုရင်လည်း ရိုက်ဖျက်တယ်။ ဆန်တွေ၊ဆီတွေဆိုရင်လည်း ယူသွားတယ်။ စျေးဆိုင်တွေကဆိုရင်လည်း စားသောက်လို့ရမယ့်ပစ္စည်းတွေ အကုန်လုံးကိုယူသွားတာ။ ပြောရမယ်ဆိုရင် စစ်ကောင်စီတွေက မင်းမဲ့စရိုက်တွေလုပ်ပြီးတော့ ရွာကိုဖျက်စီးသွားတာဗျ။ ကျနော်တို့လည်း အသက်တချောင်းရှင်နေရင်ပြီးတော့ ဆိုပြီး အခုလိုရွာကိုမပြန်ရဲဘဲ တောထဲမှာခိုနေရတာ”လို့ ဆိုပါတယ်။

ဒါ့အပြင် အခုလိုတောထဲမှာ ၁ လကျော်ကြာခိုလှုံနေကြရတဲ့ သက်ကြီးရွယ်အိုးတွေ၊ ကလေးသူငယ်တွေအတွက် ဆေးဝါးပစ္စည်းတွေ၊ အနွေးအထည်တွေနဲ့ စားနပ်ရိက္ခာတွေကို နီးစပ်ရာကျေးရွာတွေနဲ့ အဖွဲ့အစည်းတွေက ကူညီထောက်ပံ့ပေးထားရတာကြောင့် ပြည်တွင်း၊ပြည်ပကအလှူရှင်တွေအနေနဲ့ တတ်နိုင်သလောက်လည်း လှူဒါန်းပေးကြဖို့ကို ဒေသခံတွေနဲ့ ကူညီဆောင်ရွက်ပေးနေသူတွေက မျှော်လင့်နေကြပါတယ်။

ပဲခူး၊ ဒီဇင်ဘာ ၂၂၊ ၂၀၂၂။

ပဲခူးတိုင်းဒေသကြီး၊ အနောက်ခြမ်းဖြစ်တဲ့ မိုးညို၊ နတ်တလင်း၊ ကြို့ပင်ကောက်၊ အုတ်ဖို၊ ဇီးကုန်း၊ ပေါင်းတည်မြို့နယ်တွေမှာ ရဲ၊ စစ်တပ်၊ ယာဥ်ထိန်းပေါင်းပြီး ဆိုင်ကယ်စီးသူတွေကို ငွေတောင်းကြမ်းနေလို့ ဒေသခံတွေ ခက်ခဲနေတယ်လို့ သိရပါတယ်။

စစ်ကောင်စီတပ်သား၊ ရဲနဲ့ယာဥ်ထိန်းတွေဟာ မြို့တွေရဲ့ လမ်းဆုံလမ်းခွတွေအပါအဝင် ကျေးရွာဘက်ဆင်းတဲ့ လမ်းတွေမှာတောင် ပိတ်ဆို့စစ်ဆေးငွေတောင်းနေလို့ ဒေသခံကျေးရွာနေသူတွေဟာ မြို့ပေါ်တက် ထွက်ကုန်တွေရောင်းချဖို့တောင် ခက်ခဲနေကြတယ်လို့ မိုးညိုဒေသခံတဦးက ပြောပါတယ်။

“ကျွန်တော်တို့ မိုးညိုဘက်မှာဆို မနက် ၅ နာရီလောက်ကတည်းကနေ ညပိုင်းထိဖမ်းနေတာ။ ရွာဘက်က သူတွေ မြို့ပေါ်တက်စျေးတောင်မရောင်းရဲဘူး။ သူတို့နဲ့တွေ့ရင် တခုမဟုတ်တခုအကြောင်းရှာပြီး ငွေတောင်းတယ်။ ကျွန်တော်တောင် တခါ ဖမ်းခံထိတာ ၅၀၀၀၀ မိသွားတယ်။ ကိုယ်တွေ ရွာကလူတွေက အဲလောက်ပိုက်ဆံဆို တပတ်ကျော်လောက်စားလို့ရတယ်လေ။ သူတို့လုပ်မှ လူတွေက ကျီးလန့်စာစားနေရတယ်” လို့ ပြောပါတယ်။

ဆိုင်ကယ်တွေကို စစ်ဆေးချိန်မှာတော့ ယာဥ်လိုင်စင်၊ လူလိုင်စင်၊ ဦးထုပ်၊ ဘက်မှန်၊ နံပါတ်ပြား၊ လေပေါင်တင်းမတင်းတာကအစ စစ်ဆေးနေတယ်လို့ ဆိုပါတယ်။

စစ်ကောင်စီတပ်သား၊ ရဲနဲ့ယာဥ်ထိန်းတွေဟာ ဆိုင်ကယ်ဖမ်းဆီးချိန်မှာ အပြစ်တခုမဟုတ်တခုရှာပြီး ငွေတောင်းနေပြီး အနည်းဆုံးငွေကျပ် ၃၀၀၀၀ ကနေ ကျပ်တသိန်းထိ တောင်းကြတယ်လို့ ဆိုပါတယ်။

“သူတို့လုပ်တာက အခြေခံလူတန်းစားတွေကို ဒုက္ခပေးတာနဲ့တူတူဘဲ။ တမြို့နယ်ထဲလုပ်နေတာမဟုတ်ဘူး။ ပဲခူးအနောက်ခြမ်းမြို့နယ်အားလုံးမှာ တပုံစံတည်းလုပ်နေတာ။ ငွေတောင်းတယ်။ မပေးရင် ဆိုင်ကယ်သိမ်းတယ်။ ဒါက သူတို့ကံကြမ္မာကို သူတို့ဖန်တီးနေတာဘဲ။ ဒီလိုလုပ်လေ လူထုက သူတို့ကို မုန်းလေစိတ်နာလေဘဲ။ ဖမ်းခံထိတဲ့ အထဲမှာ စကစ ထောက်ခံသူ၊ ပါဝင်နေသူတွေတောင် ဖမ်းတာဘဲ။ ဖမ်းဆီးရေးတာဝန်ရှိတဲ့သူတွေက ငွေရဖို့တခုတည်းဘဲ ကြည့်တော့တာ”လို့ ပဲခူးတိုင်းဒေသကြီး ပြည်သူ့ကာကွယ်ရေးတပ်ဖွဲ့ တာဝန်ရှိသူတဦးက ပြောပါတယ်။

ပဲခူးတိုင်းအနောက်ခြမ်းက မြို့နယ်တွေမှာ စစ်ကောင်စီလက်အောက်ခံဌာနဆိုင်ရာရုံး၊ စစ်ကောင်စီခန့် အုပ်ချုပ်ရေးမှူးတွေ၊ စစ်ကောင်စီဂိတ်စခန်းတွေကို ဆိုင်ကယ်စီးနင်းလာသူတွေက ပစ်ခတ်တိုက်ခိုက်တာတွေ မကြာခဏခံနေရလို့ စစ်ကောင်စီဘက်က ဆိုင်ကယ်စီးသူတွေကို တင်းတင်းကြပ်ကြပ် စစ်ဆေးနေတာလို့ သိရပါတယ်။

ဒါအပြင် စစ်ကောင်စီတပ်သားတွေနဲ့ လက်အောက်ခံအဖွဲ့တွေကတော့ လုပ်ပိုင်ခွင့်ကို အသုံးချပြီး ကိုယ်ကျိုးအတွက် ငွေတောင်းကြမ်းနေတယ်လို့ ဆိုပါတယ်။

စစ်ကိုင်း၊ ဒီဇင်ဘာ ၂၀၊ ၂၀၂၂။

စစ်ကိုင်းတိုင်း၊ ရေဦးမြို့နယ်က စစ်ကောင်စီတပ်တွေမီးရှို့ခဲ့တဲ့ ဇဝရှာ၊ နှောကုန်းရွာနဲ့ ကုန်းနန်းရွာက ဒေသခံတွေမှာ စားနပ်ရိက္ခာ၊နေထိုင်စရာနဲ့ အဝတ်အထည်တွေ အရေးပေါ်လိုအပ်နေတယ်လို့ ဒေသခံတွေကပြောပါတယ်။

ဒီဇင်ဘာလ ၁၇ ရက်မှာ နှောကုန်းရွာက နေအိမ် ၁၀ လုံး၊ ၁၈ ရက်မှာ ဇဝရှာရွာက နေအိမ် ၇၀ လုံးနဲ့ ၁၉ ရက်မှာ ကုန်းနန်းရွာက နေအိမ် ၁၉ လုံးတို့ကို စစ်ကောင်စီတပ်တွေက မီးရှို့ဖျက်ဆီးခဲ့တာကြောင့် စုစုပေါင်းဒေသခံ ၄၀၀ ဝန်းကျင် အကူညီတွေလိုအပ်နေတာလည်းဖြစ်ပါတယ်။

“စစ်ကြောင်းက ၃ ကြောင်းဗျ။ စစ်ကြောင်းတကြောင်းစီက တရွာကျစီမီးဝင်ရှို့ခဲ့တာ။ အခုမီးရှို့ခံရတဲ့ရွာသုံး ရွာက ကျေးရွာအုပ်စုတခုတည်းပါ။ စစ်သားတွေက ရွာထဲဝင်လာပြီးတော့ ဘာမှမပြောမဆို အိမ်တွေကို မီးရှို့တော့တာပဲ”လို့ နှောကုန်းကျေးရွာသားတဦးက ပြောပါတယ်။

အခုစစ်ကြောင်းထိုးမီးရှို့ခဲ့တဲ့စစ်သားတွေဟာ မော်လိုက်အခြေစိုက် ခမရ ၃၆၄ နဲ့ မှော်ဘီအခြေစိုက် ခမရ ၇၀၁ တပ်ရင်းတွေက ဖြစ်ကြပြီး လက်ရှိမှာ ရေဦးအနောက်ဖက်ခြမ်းက ကျေးရွာတွေကို ဝင်ရောက်မီးရှို့နေကြတယ်လို့ သိရပါတယ်။

စစ်ကြောင်း ၃ ကြောင်းခွဲပြီး ရေဦးမြို့ နယ်အနောက်ဖက်ခြမ်းကို စစ်ကြောင်းထိုးလျှက်ရှိပြီး၊ မီးရှို့ခံကျေးရွာတွေကဒေသခံတွေအနေနဲ့လည်း ကျေးရွာထဲကိုပြန်ဝင်ကာ ဘုန်းကြီးကျောင်းတွေ၊ ဆေးခန်းအဟောင်းတွေနဲ့ စာသင်ကျောင်းတွေထဲမှာကပ်ပြီး နေထိုင်နေကြရတယ်လို့ နေအိမ်မီးရှို့ခံလိုက်ရတဲ့ နှောကုန်းကျေးရွာသားတဦးက ပြောပါတယ်။

“ဇဝရှာရွာမှာဆိုရင် အိမ်ခြေစုစုပေါင်းက ၁၀၀ လောက်ပဲရှိတာ။ အဲဒီထဲက ၇၀ လောက်ပြာကျသွားတယ်။ ကျနော်တို့ဆိုလည်း အခုစာသင်ကျောင်းမှာ ဖြစ်သလိုနေနေရတယ်။ အိမ်မှမရှိတော့တာ။ အိမ်က ပြာပုံပဲကျန်ခဲ့တယ်။ စားသောက်ရတာကလည်း မီးရှို့မခံရတဲ့ရွာကလူတွေ ပေးကမ်းလို့စားနေရတယ်။ အများကြီးတော့မဟုတ်ဘူး။ သူတို့တတ်နိုင်သလောက်လေးပေါ့။ ဒီလိုပဲစားနေရတယ်” လို့ ပြောပါတယ်။

ဒါ့အပြင် နေအိမ်တွေမီးရှို့ခံလိုက်ရတဲ့ ဒေသခံတွေရဲ့အခက်အခဲတွေကို တထောင့်တနေရာက ဖြေရှင်နိုင်ဖို့အတွက် ပြည်တွင်း၊ ပြည်ပကအလှူရှင်တွေအနေနဲ့လည်း တတ်နိုင်သလောက် လှူဒါန်းပေးစေချင်တယ်လို့လည်း ဆိုပါတယ်။

အခုဒီဇင်ဘာလ ပထမပတ်အတွင်းမှာ ရေဦးမြို့နယ်က ရှာမိဿာရှာ၊ မုတ်စီရွာ၊ ချမ်းသာရွာ၊ ကုန်းသာရွာ၊ ရွာသစ်ရွာ၊ ဆည်ကြီးရွာ၊ ပေါက်သာရွာ၊ ဇိန့်ဇွန်းရွာ၊ ပိဋိကက်ကျရွာ၊ ဇဝရှာ၊ ဝက်ဖိုးရွာ၊ ငှက်ပျောတောရွာ၊ တောင်ကုန်းရွာ၊ ချောင်းဆုံရွာ၊ သရက်ကန်ရွာ၊ မိုးဒေါင်ရွာ၊ ကွမ်းအုံရွာက နေအိမ်တွေကို စစ်ကောင်စီမီးရှို့ဖျက်ဆီးခဲ့တယ်လို့ ရေဦးမြို့နယ် ပြည်သူ့ကာကွယ်ရေးအဖွဲ့ရဲ့စာရင်းမှတ်တမ်းအရသိရပါတယ်။

ပဲခူး၊ နိုဝင်ဘာ ၇၊ ၂၀၂၂။

ပဲခူးတိုင်းအနောက်ခြမ်း၊ ပေါင်းတည်မြို့နယ်မှာ ရဲတွေနဲ့ အုပ်ချုပ်ရေးမှူးတွေ မကြာခဏ သတ်ခံနေရလို့ မဆိုင်တဲ့ ဒေသခံပြည်သူတွေကို စစ်ကောင်စီက ဖမ်းထားတာ ၁၅ ဦးထက် မနည်းရှိနေပြီ ဖြစ်ပါတယ်။

PDF အနေနဲ့ ဒလံ အုပ်ချုပ်ရေးမှူးနဲ့ ရဲတွေကို မိုင်းဆွဲတာ ရှင်းလင်းတာတွေ လုပ်ရင် တရားဝင်ထုတ်ပြန်နေတာဖြစ်လို့ PDF နဲ့ မဆိုင်ပဲ ဒေသခံတွေကို ဖမ်းနေတာကို အပြင်းအထန် ကန့်ကွက်ရှုံ့ချတယ်လို့ PPDF တာဝန်ခံတဦးက ပြောပါတယ်။

“ကျနော်တို့ ပေါင်းတည်မှာ ဒလန်တွေ အုပ်ချုပ်ရေးမှူးတွေနဲ့ မိုင်းဆွဲတိုက်ခိုက်မှုတွေလုပ်တိုင်း PDFကလုပ်ရင် ကြေညာချက်ထုတ်တယ်။ ခုလည်း ဖားယားကြီးဖြစ်စဥ်မှာ ကြေညာချက်ထုတ်ပြီးသားကို မဆိုင်တဲ့ခရာပေါက်ရွာက CDM ကျောင်းဆရာ ကိုတက်တိုးနဲ့ ရွာသားတွေအပြင် ကြို့ပင်သာရွာသား ၂ ဦးကိုလည်း ဖမ်းပြီးနှိပ်စက်နေတယ်” လို့ ပြောပါတယ်။

ပြီးခဲ့တဲ့ နိုဝင်ဘာ ၅ ရက်က ကြို့ပင်သာ အုပ်ချုပ်ရေးမှူးကို ဖားယားကြီးရွာ သူ့အိမ်မှာပဲ ထောက်ခံစာ လုပ်ရင်း သတ်ခဲ့တဲ့ ဖြစ်စဉ်ကြောင့် နိုဝင်ဘာ ၆ ရက် မနေ့က ခရာပေါက်ရွာက CDM ကျောင်းဆရာအပါအဝင် ရွာသား ၆ ဦးကို ဖမ်းသွားခဲ့တာပါ။

“အုပ်ကြီး အသတ်ခံရမှုနဲ့ မဆိုင်တဲ့ ဆရာဦးတက်တိုး အပါအဝင် ခရာပေါက်ရွာသား လေးဦး အဖမ်းခံရတာ။ အဲနေ့က အုပ်ကြီးကို သေနတ်နဲ့ ပစ်တဲ့သူတွေကို ရွာသားတွေက ဖမ်းဆီးဖို့တောင် လုပ်ကြသေးတာ။ ဟိုက သေနတ်နဲ့ချိန်လို့ နောက်ပြန်ဆုတ်သွားတာ” လို့ ဒေသခံတဦးက ပြောပါတယ်။

အဲ့ဒီအပြင် စစ်ကောင်စီက အခုလိုတွေ လုပ်နေတာဟာ ဒေသခံပြည်သူ့ကာကွယ်ရေးတပ် ( PDF ) တွေနဲ့ ပြည်သူတွေကို ရန်တိုက်ပေးနေတာ ဖြစ်တယ်လို့ မြို့ခံတဦးကလည်း ပြောဆိုထားပါတယ်။

ပေါင်းတည်မြို့နယ်မှာ မကြာခဏ ဆိုသလို ကင်းပတ်တဲ့ ရဲတွေ မိုင်းဆွဲခံရတာအပြင် အုပ်ချုပ်ရေးမှူးတွေ အသတ်ခံနေရလို့ မနေ့ကဖမ်းခံရတဲ့ ပြည်သူ ၆ ဦးအပါ စုစုပေါင်း ဒေသခံ ၁၅ ဦးကျော်ကို စစ်ကောင်စီက ဖမ်းဆီးနှိပ်စက်နေတယ်လို့ ဒေသခံတွေဆီက သိရပါတယ်။

မြေလတ်အသံ၊ စက်တင်ဘာ ၈၊ ၂၀၂၂။

ရခိုင်ပြည်နယ်၊ ပုဏ္ဏားကျွန်းမြို့နယ်၊ ကွမ်းအုံစု ကျေးရွာမှ အမျိုးသားတဦး ယနေ့စက်တင်ဘာ ၈ရက် ညနေ ၄နာရီကျော်အချိန်တွင် ဝါးခုတ်ပြီးပြန်လာစဉ် မိုင်းနင်းမိကာ ခြေထောက်တဖက်ပြတ်ထွက်သွားခဲ့သည်ဟု သိရသည်။

မိုင်းထိမှန်ခဲ့သူမှာ ဦးဘရွှေ ၄၁နှစ် ဖြစ်ပြီး ၎င်းမှာ ကျေးရွာ၏အနောက်ဖက်ရှိ တောင်တန်းမှ ဝါးခုတ်ပြီး ကျေးရွာသို့ပြန်အလာတွင် မိုင်းနင်မိကာ ပေါက်ကွဲမှုဖြစ်သွားသဖြင့် ညာဖက်ခြေထောက် ပြတ်သွားရခြင်းဖြစ်သည်ဟု သားမက်ဖြစ်သူ ကိုဆန်းလင်းကပြောသည်။

“ဒဏ်ရာကတော့ ခြေထောက်ခြေချင်းဝတ်အောက်က ပြတ်သွားတာပါ။ ခန္ဓာကိုယ်အနှံ့မှာတော့ မိုင်းစတွေဝင်သွားတယ်။ အခုတော့ ယိုးတရုတ်ဆေးရုံကို ပို့ထားတယ်။ သိပ်တော့မစိုးရိမ်ရဘူး”ဟုဆိုသည်။

ဩဂုတ် ၁၃ရက်နေ့တွင်လည်း ဗုဒ္ဓေါကျေးရွာအနီးရှိ တောင်တန်းပေါ်တွင် နွားရှာနေစဉ်မိုင်းပေါက်ကွဲမှုဖြစ်၍ ဒေသခံ ၄ဦး ဒဏ်ရာရရှိသွားခဲ့သည်ဟု သိရသည်။

အလားတူ ပြီးခဲ့သည့် ဩဂုတ် ၅ရက်နေ့တွင်လည်း စစ်ကောင်စီက စခန်းချထားသည့် မင်းပြားမြို့နယ်ရှိ ရာမောင်တောင်တန်းပေါ်တွင် မိုင်းပေါက်ကွဲမှုဖြစ်၍ အမျိုးသားတဦး ခြေတဖက်ပြတ်သွားခဲ့သည်။

ရခိုင်ပြည်နယ်၌ ပေါက်ကွဲမှုဖြစ်‌နေသည့်မြေမြုပ်မိုင်းများမှာ စစ်ကောင်စီတပ်မှ ထောင်သည့်မိုင်း များဖြစ်ကြသည်ဟု ဩဂုတ် ၁၁ရက်နေ့ သတင်း စာရှင်းလင်းပွဲတွင် AA၏ ပြောရေးဆိုခွင့်ရှိသူ ခိုင်သုခကပြောဆိုခဲ့သည်။

မြေလတ်အသံ၊ သြဂုတ် ၉၊ ၂၀၂၂။

ရခိုင်ပြည်နယ်၊ အမ်းမြို့နယ်၊ ထန်းချောင်းကျေးရွာမှ အမျိုးသားတဦးမှာ မွတ်ဆလင်များကို နိုင်ငံခြားသို့ တရားမဝင်လမ်းမှ ပို့ဆောင်နေသည်ဟုဆိုကာ ယနေ့ဩဂုတ် ၉ ရက်နံနက် ၁၀ နာရီကျော် အချိန်ခန့်တွင် စစ်ကောင်စီက ဖမ်းဆီးသွားခဲ့သည်ဟု သိရသည်။

ဖမ်းဆီးခံရသူမှာ ဦးတင်အုန်း (ခ) ဥဩ (၅၄) နှစ်ဖြစ်ပြီး၊ ၎င်းကို စစ်ကောင်စီတပ်သား ၄၀ ခန့်က ကားဖြင့် အမ်းမြို့သို့ ခေါ်ဆောင်သွားခဲ့သည်ဟု ထန်းချောင်းကျေးရွာမှ ရာအိမ်မှူး ဦးသိန်းလှိုင်က မြေလတ်အသံကို ပြောသည်။

“စစ်သားတွေက ရွာကို ကားနှစ်စီးနဲ့လာကြတယ်။ ကျနော့်ကိုခေါပြီးတော့ ဥဩအိမ်ကို လိုက်ပို့ဆိုပြီးပြောတယ်။ ဥဩအိမ်ကိုရောက်တော့ သူက ကုလားတွေကို နိုင်ငံခြားကိုပို့နေတယ်ဆိုပြီး ပြောတယ်။ ဖမ်းတယ်။ ကျနော်ကတောင် သူက အဲဒီအလုပ်မလုပ်ဘူး။ကျနော်အာမခံပါတယ်လို့တောင် ပြောလိုက်သေးတယ်။ ဒါပေမဲ့မရဘူး။ စစ်သားတွေကတော့ ပြောသွားတယ်။ သူ့ကို စစ်ဆေးမေးမြန်းပြီးရင်တော့ ပြန်လွတ်ပေးမယ် လို့ပြောတယ်” ဟုဆိုသည်။

ပြီးခဲ့သည့် သြဂုတ်လ ၆ ရက်တွင် ရန်ကုန်မှတဆင့် မလေးရှားနိုင်ငံသို့ သွားရောက်ရန် ပွဲစားဆိုသူဖြင့်လာကြသည့် မွတ်ဆလင် ၈ ဦးကို ရန်ကုန်သို့ မရောက်မီ ဂွမြို့နယ်တွင် ဖမ်းဆီးရမိခဲ့သည်ဟု စစ်ကောင်စီသတင်းတွေထုတ်ပြန်သည့် ရခိုင်နေ့စဉ်က ထုတ်ပြန်ထားသည်။

ပဲခူး၊ ဇူလိုင် ၁၂၊ ၂၀၂၂။

ပဲခူးတိုင်းဒေသကြီး(အနောက်ပိုင်း)၊ ပြည်မြို့နယ် တိုင်းဒေသကြီးလွှတ်တော်ကိုယ်စားလှယ် ဦးကျော်ဇေယျ ဖမ်းဆီးခံရပြီးနောက် ဒေသခံတချို့ကို ဆက်တိုက်ဆိုသလို ဖမ်းဆီးခံနေရတယ်လို့ မြို့ခံတွေကပြောပါတယ်။

ပြီးခဲ့တဲ့ ဇွန်လ ၉ ရက်နေ့က ရန်ကုန်မြို့မှာ ဦးကျော်ဇေယျအပါအဝင် ၄ ဦးဖမ်းဆီးခံခဲ့ရပြီး ပြည်မြို့ကို လွှဲပြောင်းပေးလိုက်တယ်ဆိုတဲ့ သတင်းတွေထွက်ပေါ်ခဲ့ပြီး ဘယ်နေရာမှာထိန်းသိမ်းထားတယ် ဆိုတာ တိကျစွာမပြောနိုင်သေးချိန်မှာပဲ သံသယရှိတဲ့ဒေသခံတချို့ကို စစ်ကောင်စီက လိုက်လံဖမ်းဆီးနေတာပါ။

“အဖမ်းခံနေရတာကတော့ ဆက်တိုက်ပဲ အရင် NLD ပြန်ကြားရေးလုပ်ခဲ့ဖူးသူလည်း အဖမ်းခံလိုက်ရတယ်။ နောက် မြို့ကနာမည်ကြီးစီးပွားရေးသမားတယောက်လည်း လာဖမ်းသွားတယ်။ ပြန်လွှတ်မလွှတ်တော့မသိဘူး နောက်ပြီး ပေါင်းတလည်နဲ့ ဝက်ထီးကန်မြို့တွေမှာလည်း ဖုန်းနဲ့လိုက်တိုက်စစ်ပြီး ရှာတယ်။ တချို့လည်း ရှောင်နေကြတယ်။ ကိုကျော်ဇေယျနဲ့ ဆက်စပ်မှုရှိတယ်မရှိဘူးကတော့ သေချာမပြောနိုင်ဘူး” လို့ မြို့ခံအမျိုးသားတဦးကပြောပါတယ်။

ပေါင်းတလည်မြို့က စစ်ကောင်စီခန့် ရပ်ကွက်အုပ်ချုပ်ရေးမှူးတဦး၊ ယခင် NLD ပါတီသတင်းနဲ့ပြန်ကြားရေးအဖွဲ့ဝင်တဦး၊ စီးပွားရေးလုပ်ငန်းရှင်တဦးနဲ့ အခြား ဖမ်းဆီးခံရသူ ၅ ဦးထက်မနည်းရှိတယ်လို့ မြို့ခံတွေက ဆိုပါတယ်။

အဲဒီလို ကိုကျော်ဇေယျအပါအဝင် ဖမ်းဆီးခံခဲ့ရသူတွေနဲ့ နောက်ဆက်တွဲ ဖမ်းဆီးခံရသူတွေကိုပါ စစ်ကောင်စီနဲ့ NUG၊ သက်ဆိုင်ရာအဖွဲ့အစည်းတွေက တရားဝင်သတင်းထုတ်ပြန်ခြင်းမရှိသေးတဲ့အပေါ် လူထုက စိုးရိမ်နေကြတယ်လို့ဆိုပါတယ်။

“ဘယ်မှာဖမ်းမိပြီး ဘယ်ကိုပို့တယ်ဆိုတာ ကျနော်တို့သိရသလောက်ကတော့ တိတိကျကျ ပြောနိုင်သူမရှိဘူး။ ထုတ်ပြန်တာလည်းမတွေ့ရတော့ မြို့ခံတွေနဲ့ ပတ်သက်စပ်ဆက်သူတွေက စိုးရိမ်တာပေါ့ဗျာ။ အဖမ်းခံနေရတဲ့သူတွေလည်း ရှိနေတော့။ ကျနော်ပြောချင်တာကတော့ ကိုယ့်အခြေအနေကိုယ်သိပေါ့ဗျာ။ စပ်ဆက်ပတ်သက်မှုကြီးကြီးရှိနေတယ်ဆိုရင်တော့ အဖမ်းမခံရခင် ရှောင်နေတာအကောင်းဆုံးပါပဲ။” လို့ မြို့ခံတဦးကပြောပါတယ်။

ဦးကျော်ဇေယျ ဟာ အမျိုးသားဒီမိုကရေစီအဖွဲ့ချုပ်ပါတီရဲ့ ပြည်မြို့နယ် တိုင်းဒေသကြီးလွှတ်တော်ကိုယ်စားလှယ်အဖြစ် ၂၀၁၅၊ ၂၀၂၀ ရွေးကောက်ပွဲများမှာ အနိုင်ရကိုယ်စားလှယ်ဖြစ်ခဲ့ပြီး စစ်အာဏာသိမ်းပြီးနောက်ပိုင်းမှာလည်း အာဏာရှင်ဆန့်ကျင်တော်လှန်ရေးတွေ ဆက်လက်လုပ်ဆောင်ခဲ့လို့ သူငှားရမ်းနေထိုင်ခဲ့တဲ့ အိမ်အပါအဝင် ပိုင်ဆိုင်မှုတွေကိုပါ ချိတ်ပိတ်သိမ်းဆည်းခံထားရသူဖြစ်ပါတယ်။